1. Mɩnla yɛ ɩyɛ a ɩma bɔlɔ kã yɛ a?

 ƖYƐ a, bɔlɔ kã ye munwatĩĩ. Ɩwɔ numɔ iluwa Bayɩbʋlʋ mɔɔ yezuma nɩ ti, ɩáma ye kunlu tuli awuvʋlɔ, azunzuma evinli anzɛnyɩɩ mɔɔ ɩkɔdʋ yɛ wɔ eɣile be nɩ nwʋ. Naasʋ̃ iluwakɛɛ yɛda mmɩlɩ be nu mɔɔ “nninyeni ɛyɛlɛ ɛyɛlɛ” dɩkɛɛ kʋnɛ, bɛsabɛsayɛlɛ nɩɩ adimakɛlɛ dua yɛ nwʋ yiyia nɩ ti, ɩyɛ a bɔlɔ kã yɛ. (Lk. 21:11) Akʋ̃ sʋ̃, mmenii be dɩkɛɛ aɣanɩ mbanimbani anzɛnyɩɩ ye mmusunwamaa mɔɔ botwodwu betiyia nɔhʋanlɛ ɔzʋ̃mɩnlɛ yɩ sʋ̃, bɔ nwʋ bɔlɔ kɔhʋla kɛhã yɛ. Abiyemmɔ tɩ nɣanlɩ kɛɛ, ebiye a bɔlɔ́kʋla bekegyina odwodwudiyialɛ mɔɔ beyiyia wɔ nnɛ anzɛnyɩɩ mɔɔ bekeyiyia wɔ eɣile be nɩ yi munwa.

2. Mmɩlɩ mɔ Devidi hɔlɩ Gaatɩ nɩ, mɩnla yɛ izili a?

² Devidi sʋ̃, nɩ ɩyɛ a bɔlɔ kã yɩ. Kɛ ndianwʋ nɩ, mmɩlɩ mɔ Bulombunli Sɔɔlʋ ɩpɛɛ Devidi ikohũ yi nɩ, Devidi ɣiandinli hɔlɩ Fɩlɩsɩtiyiamaa bo twonwa Gaatɩ zʋ. Ɩákyɛ yɛ Gaatɩ Bulombunli Ekishɩ ɣa nwʋnlɩ kɛɛ Devidi yɛ lɛ kʋnɛhʋnɛvʋlɔ mɔɔ nɩ bɔtʋʋ ndwomi bɛkamvʋ yɩ kɛɛ ihũ “Fɩlɩsɩtiyiamaa abʋmɩ bunlu” yɩ a. Devidi “yi kunlu duli baaba.” (1 Sa. 21:​10-12) Nɩ yi kunlu tu kɛɛ Ekishɩ kɛyɛ tanɩ yɩ. Mɩnla yɛ ɩwʋwalɩ Devidi ma ilili bɔlɔ eyi zʋ a?

3. Kɛmɔ Ndwomi 56:​1-3, 11 kile nɩ, kɛ ɩyɛlɩ mɔɔ Devidi lili bɔlɔ mɔɔ ɩhanlɩ yɩ nɩ zʋ a?

³ Wɔ Ndwomi 56 yɩ nu nɩ, Devidi hanlɩ kezimɔ nɩ ɩtɩ nɣanlɩ mmɩlɩ mɔ nɩ ɩwɔ Gaatɩ nɩ. Wɔ ɔzɔ ndwomi yi nu nɩ, Devidi hilelihileli sianti mɔɔ nɩ bɔlɔ hã yɩ nɩ nu. Naasʋ̃, izia sʋ̃ ɩhanlɩ mɔɔ ɩwʋwalɩ yɩ ma ilili ɔzɔ bɔlɔ nɩ zʋ. Mmɩlɩ mɔ Devidi yi kunlu duli nɩ, ɩvalɩ yɩ nwʋ idianlɩ Gyehova zʋ. (Kɩnga Ndwomi 56:​1-3, 11.) Nɩ Gyehova ɩyɛ ebiye ɩma yɩ kyɩ̃, meti nɩ sa ɩkʋla ɩfa yɩ nwʋ itiã yɩ zʋ. Gyehova wʋwalɩ Devidi ma ɩvalɩ adwɩnɩ be mɔɔ ɩwʋwalɩ yɩ paa: Ɩyɛlɩ yɩ nwʋ kɛɛ abiye mɔɔ yi ti zɩkɛ! Eyi manlɩ Ekishɩ nwʋnlɩ Devidi kɛɛ bɔdamvʋlɔ, meti kɛ ankɩ ikohũ yɩ nɩ, iduduli yi mfomi.—1 Sa. 21:13–22:1.

4. Kɛ ɩkɛyɛ na yɛahyɛ anwʋlazʋ mɔɔ yɛwɔ wɔ Gyehova nu nɩ ɛzɩzɩbɛ a? Ma nwʋmɔ ndianwʋ.

 ⁴ Amɩyɛ sʋ̃, sɛ yɛfa yɛ nwʋ yetiã Gyehova zʋ a, yɛkɔhʋla yekeli bɔlɔ zʋ. Naasʋ̃ kɛ ɩkɛyɛ na yɛahyɛ anwʋlazʋ mɔɔ yɛwɔ wɔ Gyehova nu nɩ ɛzɩzɩbɛ, titili mmɩlɩ mɔ bɔlɔ hã yɛ nɩ a? Bɛmá yehila ndianwʋ eyi. Fa yɩ kɛɛ bɛhã behile wʋ kɛɛ enyia adimakɛlɛ be. Ahyɛasɩ yɩ mɛyɩ sa wu kunlu tu paa, naasʋ̃ sɛ ɔwɔ wʋ dɔkɩta yɩ nu anwʋlazʋ a, ɩkɔhʋla ɩkɛma bɔlɔ nɩ kɛhã azɩ. Ebiye a, ɩwʋwa mmenii sʋ̃maa mɔɔ bɔwɔ ɔzɔ adimakɛlɛ yɩ be ma bɛdɩ pɔkɔ. Mmɩlɩ mɔ ɔnwʋnlɩ kezimɔ ɩyɛ azʋnlɩ itiyee wʋ nɩ, ɛdɩlɩ nɣanlɩ kɛɛ ɩtɩ wʋ bʋwabɩlɛ yɩ tʋ na ɩdwɩnɩ wʋ nwʋ. Na ebiye a ɩkɛhã kɛɛ ɔnlʋ́ awudo be mɔɔ ɩwʋwa mmenii sʋ̃maa ma bɔ nwʋ dɔ bɛ nɩ be. Ɔzɔ la yɛ amɩyɛ sʋ̃ sɛ yesunzu mɔɔ Gyehova yɛ daada, mɔɔ ɩyɛɛ kakɩ yɩ nɩɩ mɔɔ ɩkɛyɛ wɔ eɣile be nɩ nwʋ a, ɩkɛhyɛ anwʋlazʋ mɔɔ yɛwɔ wɔ yɩ nu nɩ ɛzɩzɩbɛ. Ɔzɔ pɛpɛɛpɛ yɛ Devidi yɛlɩ a. Mmɩlɩ mɔ yesunzuu ndwokɔ mɔɔ ɩhɛlɛlɩ wɔ Ndwomi 56 yɩ nwʋ nɩ, dwɩnɩndwɩnɩ kezimɔ wʋzawʋ sʋ̃ ɔkɔhʋla kɛhyɛ anwʋlazʋ mɔɔ ɔwɔ wɔ Gyehova nu nɩ ɛzɩzɩbɛ na wʋali bɔlɔ zʋ.

MƖNLA YƐ GYEHOVA ƖYƐ DAADA A?

5. Mmɩlɩ mɔ bɔlɔ hanlɩ Devidi nɩ, mɩnla yɛ ɩdwɩnɩndwɩnɩnlɩ nwʋmɔ a? (Ndwomi 56:​12, 13)

⁵ Ɩwɔ numɔ kɛɛ nɩ bʋwabɩlɛ mɔɔ Devidi wɔ numɔ nɩ yɛ ɛyɛlɛ dɩyɛ, naasʋ̃ ɩdwɩnɩndwɩnɩnlɩ nninyeniba mɔɔ nɩ Gyehova ɩyɛ ɩma yɩ daada nɩ nwʋ. (Kɩnga Ndwomi 56:​12, 13.) Wɔ Devidi yɩ nnwʋanlɩ eɣile munwatĩĩ nu nɩ, nɩ eyi dɩ debe mɔɔ ɩta ɩyɛ paa. Kɛ ndianwʋ nɩ, nɩ ɩta ɩdwɩnɩndwɩnɩ Gyehova yɩ abɔdɩ nwʋ, na eyi hakɛlɩ yɩ kɛɛ Gyehova wɔ tumi kezile baaba na ɩdɔ adasamaa sʋ̃. (Ndw. 65:​6-9) Akʋ̃ sʋ̃, Devidi dwɩnɩndwɩnɩnlɩ nninyeni mɔɔ Gyehova ɩyɛ ɩma mmenii mvʋlɔ nɩ nwʋ. (Ndw. 31:19; 37:​25, 26) Na mɔɔ ihyinyia paa nɩ, ɩdwɩnɩndwɩnɩnlɩ mɔɔ Gyehova ɩyɛ ɩma yɩzayɩ daada nɩ nwʋ. Nɩ Gyehova wʋwa Devidi na ɩwɔ yɩ nwʋ banɩ ɔzʋmɩ yi nnwuakula nu. (Ndw. 22:​9, 10) Pɩlazunɛ bela íni nwʋmɔ kɛɛ, eyimmɔ mɔɔ Devidi dwɩnɩndwɩnɩnlɩ nwʋmɔ nɩ, ɩwʋwalɩ yɩ ma ɩhyɛlɩ anwʋlazʋ mɔɔ nɩ ɩwɔ wɔ Gyehova nu nɩ ɛzɩzɩbɛ!

6. Sɛ bɔlɔ kã yɛ a, mɩnla yɛ ɩkɔwʋwa yɛ ma yɛkɛva yɛ nwʋ yekediã Gyehova zʋ a?

⁶ Sɛ bɔlɔ kã wʋ a, bizia wʋ nwʋ kɛɛ, ‘Mɩnla yɛ  Gyehova yɛ daada a?’ Dwɩnɩndwɩnɩ yɩ abɔdɩ nwʋ. Kɛ ndianwʋ nɩ, “sɛ yetiã yɛ anyɩ azɩ yekila” kezimɔ Gyehova kila nnʋma nɩɩ fɩlawɛsɩ mɔɔ ɩábɔ bɛ wɔ yi subanɩ zʋ na bɛázʋ̃mɩ yɩ nɩ a, ɩkɛma amɩyɛ sʋ̃ yekenyia anwʋlazʋ kezile kɛɛ ikehila yɛ. (Mt. 6:​25-32) Akʋ̃ sʋ̃, dwɩnɩndwɩnɩ mɔɔ Gyehova ɩyɛ ɩma yɩ azʋ̃mɩvʋlɔ nɩ nwʋ. Sa ɔkʋla suma abiye mɔɔ ɩwɔ Bayɩbʋlʋ yɩ nu mɔɔ ɩlalɩ dedi kezile ali nɩ nwʋ dɩyɛ, anzɛnyɩɩ sa ɔkʋla kɩnga Gyehova azʋ̃mɩvʋlɔ mɔɔ bɔwɔ nnɛ mmɩlɩ nu nɩ bo ozumanlɛnwʋnlɛ. a Mɛyɩ la ahanlɩ a, sa ɔkʋla dwɩnɩndwɩnɩ kezimɔ Gyehova ɩwʋwa wʋzawʋ nɩ nwʋ. Mɩnla ɔhʋanɩ zʋ yɛ ɩwʋwalɩ wʋ ma ɔnwʋnlɩ nɔhʋanlɛ yɩ a? (Dwɔ. 6:44) Mɩnla ɔhʋanɩ zʋ yɛ iwuwa wʋ mpayɩwɔlɛ a? (1 Dwɔ. 5:14) Na mɩnla ɔhʋanɩ zʋ yɛ eɣile bela enyia yɩ Dɔɣalɛ yɩ elelɛdɩyɛ afɔlɩ yɩ zʋ mfasʋ a?—Ɛfɩ. 1:7; Hib. 4:​14-16.

7. Mɩnla ɔhʋanɩ zʋ yɛ nkɔmɩhyɛnii Danɩyɛlɩ yɩ ozumanlɛnwʋnlɛ yɩ wʋwalɩ Vanessa ma ilili bɔlɔ zʋ a?

⁷ Eliyema baalɛ be mɔɔ bɔfʋlɔ yɩ Vanessa, b mɔɔ ɩwɔ Haiti nɩ yiyialɩ bʋwabɩlɛ be mɔɔ nɩ ɩyɛ ɛyɛlɛ paa. Nɩ benyia be mɔɔ ɩwɔ yɩ apaa yi nu kɛnɩ nɩ, ɩhyɛɛ yɩ kɛɛ ɩpɛ kɛɛ ɩ nɩɩ yɩ twɩ̃ mpɩna. Meti nɩ ɩfʋlɛ yɩ na ɩsɛndɩ mesegyi yi eɣile bela. Naasʋ̃ Vanessa hanlɩ hileli yi petee kɛɛ ɩlɛ́yɛ. Eyi manlɩ benyia yɩ yɩ anyɩ wʋlʋlɩ na ɩhanlɩ po kɛɛ ɩkɛyɛ debe yɩ. Vanessa hanlɩ kɛɛ, “Mu kunlu duli baaba.” Mɩnla ɔhʋanɩ zʋ yɛ Vanessa lili bɔlɔ yɩ zʋ a? Ɩyɛlɩ mɔɔ ɩkɔhʋla bela ɩwɔlɩ yɩ nwʋ banɩ. Asafʋ nu ebani be hyɛlɩ yɩ ɛzɩzɩbɛ kɛɛ ɩvʋlɔ́ abolisimaa. Akʋ̃ sʋ̃, ɩdwɩnɩndwɩnɩnlɩ kezimɔ Gyehova wɔlɩ yɩ azʋ̃mɩvʋlɔ nwʋ banɩ wɔ ɔwɔkɩ nɩ nwʋ. Vanessa hanlɩ kɛɛ, “Enii mɔɔ yi odwokɔ lili bɔmʋnlɩ ɣalɩ mi ti nu yɛ lɛ nkɔmɩhyɛnii Danɩyɛlɩ. Bɛvalɩ yɩ bedianlɩ kuma mɔɔ gyata mɔɔ kɔmɩ ikũũ bɛ gua numɔ nɩ nu, ɩávalɩ nwʋmɔ kɛɛ nɩ yɩ nwʋ íni odwokɔ bela nɩ. Naasʋ̃ Gyehova wʋwalɩ yɩ. Mizianlɩ Gyehova kɛɛ yɩzayɩ ihila ili bʋwabɩlɛ yɩ nwʋ egyima ɩma mɩ. Mmɩlɩ mɔ mɩyɛlɩ zɔ nɩ, mu kunlu iátu dɔkʋ̃.”—Da. 6:​12-22.

MƖNLA YƐ GYEHOVA ƖYƐƐ KAKƖ YƖ A?

8. Mɩnla yɛ nɩ Devidi izi a? (Ndwomi 56:8)

⁸ Ɩwɔ numɔ kɛɛ mmɩlɩ mɔ nɩ Devidi wɔ Gaatɩ nɩ, nɩ yɩ nnwʋanlɩ la asianɩ nu dɩyɛ, naasʋ̃ ɩáfa yɩ adwɩnɩ isiye nninyeni mɔɔ nɩ ɩma bɔlɔ hã yɩ nɩ zʋ. Mfomi, ɩvalɩ yɩ adwɩnɩ iziyeli mɔɔ nɩ Gyehova ɩyɛɛ ɩkɛma yɩ wɔ ɔzɔ mmɩlɩ yɩ nɩ zʋ. Devidi nwʋnlɩ dasɩlɛ mɔɔ nɩ ikile kɛɛ Gyehova ikilee yɩ ɔhʋanɩ, ɩbɔɔ yɩ nwʋ banɩ na ɩtɩ kezimɔ ɩtɩ nɣanlɩ nɩ tʋ. (Kɩnga Ndwomi 56:8.) Akʋ̃ sʋ̃, Gyehova manlɩ Devidi nyianlɩ ɔhɔnwʋmmɔ baaba dɩkɛɛ Dwonatanɩ nɩɩ Ɔsɔfʋ Ebani Ahimɛlɛkɩ mɔɔ bɛhyɛlɩ yɩ ɛzɩzɩbɛ na bɔwʋwalɩ yɩ. (1 Sa. 20:​41, 42; 21:​6, 8, 9) Na ɩwɔ numɔ kɛɛ, nɩ Bulombunli Sɔɔlʋ pɛ kɛɛ ikũ Devidi dɩyɛ, naasʋ̃ inyianlɩ yi ti ilili numɔ. Akʋ̃ sʋ̃, nɩ Devidi zi paa kɛɛ Gyehova zi ndwokɔzɩzɩbɛ mɔɔ iyiyia nɩ munwatĩĩ nɩɩ kezimɔ eyi ma ɩtɩ nɣanlɩ nɩ.

9. Sɛ yeyiyiaa odwohilalɛ a, mɩnla yɛ Gyehova nwʋ yɩ a?

⁹ Sɛ eyiyia odwohilalɛ be na wu kunlu tu a, kakɛ kɛɛ Gyehova ɩnwʋ mɔɔ eyiyiaa nɩ, nɩ kezimɔ ɩma ɛtɩ nɣanlɩ. Kɛ ndianwʋ nɩ, kɛ ayɛkwa mɔɔ nɩ Igyibitimaa bɛlɛ bɛyɛɛ Yizilayamaa yɩ nkʋ̃ la yɛ nɩ ɩnwʋ yɩ a, mfomi nɩ izi “bɛ ɛvɛlɩyɛ munwala” sʋ̃. (Ɛkɩ. 3:7) Devidi dʋlɩ ndwomi kɛɛ Gyehova ɩnwʋ yɩ “ɛyɛkɛlilɛ nɩɩ yɩ atɩɩtɩɩ sʋ̃maa munwala.” (Ndw. 31:7) Na mmɩlɩ po mɔ Nyamɩnlɩ yɩ mmenii bɔnwʋʋ amanɩyɛ iluwa pɔkɔ tanɩ mɔɔ bezili ti nɩ, “ɩyɛlɩ yɩ atɩɩtɩɩ.” (Ayɩ. 63:9) Sɛ bɔlɔ kã wʋ a, Gyehova tɩ kezimɔ ɛtɩ nɣanlɩ nɩ tʋ, na ɩpɛ paa kɛɛ ɩbʋwa wʋ ma edi ɔzɔ bɔlɔ yɩ zʋ.

10. Mɩnla ti mɔɔ ɔkɔhʋla kenyia anwʋlazʋ kɛɛ Gyehova dwɩnɩ wʋ nwʋ, na ɩkɔwʋwa wʋ ma ekegyina odwohilalɛ bela nu a?

 ¹⁰ Sɛ yeyiyiaa odwohilalɛ be mɔɔ numɔ yɛ sɩ a, ebiye a ɔlɔ́nwʋ kezimɔ Gyehova ɩbʋwaa wʋ. Meti siã yɩ ma ɩwʋwa wʋ ma ɔnwʋ kezimɔ ɩbʋwaa wʋ nɩ. (2 Aw. 6:​15-17) Akʋ̃ bizia wʋ nwʋ kɛɛ: Asʋ̃ ndɛnɩ anzɛnyɩɩ munwalɩyɛ be mɔɔ bɛmanlɩ wɔ dɩyɛzumanlɛ tʋ hyɛlɩ mɩ ɛzɩzɩbɛ a? Asʋ̃ mɩɣɩnga asafʋ awuuku, mihila vidiyo anzɛnyɩɩ midiye ndwomi mɔɔ íni ye ndwomi buuku yi nu be ma ɩhyɛ mɩ ɛzɩzɩbɛ a? Asʋ̃ abiye hã odwokɔ be anzɛnyɩɩ ɩɣɩnga Ɛhɛlɛlɛ Odwokɔ be mɔɔ ɩhyɛ ɛzɩzɩbɛ ihile mɩ a? Sɛ yɛákila yɩ bʋwɔ a, yekedindiã ye mmeliyemayɛlɛ okuwu yi nɩɩ sunzuma ɔfʋã nu alɩyɛ mɔɔ yɛ sa kã yɩ nɩ azɩ. Naasʋ̃ eyimmɔ munwala dɩ akyɛdɩ mɔɔ ɩzʋ̃ Gyehova kɛnɩ. (Ayɩ. 65:13; Mk. 10:​29, 30) Eyi dɩ dasɩlɛ mɔɔ ikile kɛɛ ɩdwɩnɩ wʋ nwʋ. (Ayɩ. 49:​14-16) Na sa ɔkʋla ɛfa wʋ nwʋ etiã yɩ zʋ.

11. Mɩnla yɛ ɩwʋwalɩ Aida ma ilili bɔlɔ zʋ a?

¹¹ Aida mɔɔ ɩda Senegal nɩ yɛlɩ kezimɔ Gyehova wʋwalɩ yɩ wɔ yi odwohilalɛ nu nɩ ndwɩ. Iluwakɛɛ nɩ ɩdɩ abakanɩ ti, nɩ yɩ awʋvʋlɔ bekilaa ɔhʋanɩ kɛɛ ɩkɛyɛ egyima ikenyia ozukua sʋ̃maa mɔɔ ɩkɛva ikehila yɩzayɩ yɩ nwʋ nɩ abusunwa yɩ. Naasʋ̃ mmɩlɩ mɔ ɩyɛlɩ nzɩnzanlɩyɛ wɔ yɩ ɛbɩlawɔlɛ nu na ama ɩahʋla ɩayɛ ɔhʋanɩbukolɛ egyima yɩ be nɩ, Aida yɩ ozukuasɛmɩ yɛlɩ basaa. Yi mmusunwamaa valɩ yɩ nwʋ ɛya na bɛdɩndɛnlɩ bediyialɩ yɩ. Ɩhanlɩ kɛɛ: “Nɩ mu kunlu tu kɛɛ ebiye a mʋlɔ́kʋla mikehila mɩ awʋvʋlɔ, na abiyela sʋ̃ ɩlɛ́pɛ mu odwokɔ. Mɩvalɩ ɛya po kɛɛ Gyehova manlɩ ɔhʋanɩ ma nninyeni leli salɛ nu zɔ.” Aɣinzi yi, idiyeli ndɛnɩ be wɔ dɩyɛzumanlɛ tʋ. Ɩdʋwalɩ zʋlɔ kɛɛ: “Ndɛnɩmanlɛvʋlɔ yɩ hakɛlɩ yɛ kɛɛ, ɛyɛkɛ bela mɔɔ yedii wɔ ye nu nɩ Gyehova zi yi munwala. Iluwa asafʋ nu mbanimbani nɩɩ mmeliyema bɔ mmʋwalɩyɛ zʋ nɩ, ngyɩkɩ̃ɩ̃ ngyɩkɩ̃ɩ̃ la mɩɣa minyianlɩ anwʋlazʋ wɔ Gyehova nu kɛɛ ɩdɔ mɩ. Mʋwɔlɩ yɩ tʋ kɛɛ mɩlɛ anwʋlazʋ kezile mʋbɔɔ Gyehova mpayɩ, na mmɩlɩ mɔ mʋnwʋnlɩ kezimɔ ibuwaa mɩ mpayɩ nɩ, mɩ ahʋnlɩnɩ dɔlɩ mu kunlu.” Aɣinzi yi, Aida nyianlɩ egyima be mɔɔ ɩwʋwalɩ yɩ ma ɩyɛlɩ ɔhʋanɩbukolɛ egyima yɩ, na ɩhʋlalɩ ihilalɩ yɩ awʋvʋlɔ. Ɩhanlɩ kɛɛ, “Muzuma kɛɛ mɩkɛva mʋ nwʋ mikediã Gyehova zʋ kʋlakʋla. Sikalɛyɩ mʋbɔ mpayɩ muwie a, mu kunlu iádu dɔkʋ̃.”

 MƖNLA YƐ GYEHOVA KƐYƐ A?

12. Kɛmɔ Ndwomi 56:9 kã nɩ, mɩnla anwʋlazʋ yɛ nɩ Devidi wɔ a?

¹² Kɩnga Ndwomi 56:9. Ɛhɛlɛlɛ Odwokɔ eyi ɩma yɛnwʋ dɩyɛ fʋlɔ mɔɔ ɩwʋwalɩ Devidi ma ilili bɔlɔ zʋ: Ɩwɔ numɔ kɛɛ nɩ yɩ nnwʋanlɩ la asianɩ nu wɔ ɔzɔ mmɩlɩ yɩ dɩyɛ, naasʋ̃ ɩdwɩnɩndwɩnɩnlɩ mɔɔ Gyehova ɩbayɛ kɛma yɩ nɩ nwʋ. Nɩ Devidi zi kɛɛ Gyehova kele yɩ wɔ mmɩlɩ mɔ ɩfata nu. Debe yɩzayɩ, nɩ Gyehova hã kɛɛ Devidi yɛ ɩkɛɣa kɛyɛ Yizilaya Bulombunli a. (1 Sa. 16:​1, 13) Nɩ Devidi zi kɛɛ, sɛ Gyehova bɔ anʋhʋba a, ɩkɛɣa numɔ wɔ ɔhʋanɩ bela zʋ.

13. Mɩnla anwʋlazʋ yɛ yɛwɔ wɔ Gyehova nu a?

¹³ Mɩnla yɛ Gyehova wɔ anʋhʋba kɛɛ ɩkɛyɛ ɩkɛma wʋ a? Yɛáhila ɔhʋanɩ kɛɛ ɩkɔwɔ yɛ nwʋ banɩ wɔ ndwokɔzɩzɩbɛ mɔɔ yeyiyia munwatĩĩ nwʋ. c Naasʋ̃ kakɛ kɛɛ, ndwokɔzɩzɩbɛ mɔɔ eyiyiaa wɔ oyuwadɩ tanɩ eyi nu nɩ, Gyehova kɛyɩ yi munwatĩĩ wɔ kɛnɩ wɔ oyuwadɩ fʋlɔ yɩ nu. (Ayɩ. 25:​7-9) Yɛ Wɔlɛvʋlɔ nɩ wɔ tumi kezile mɔɔ ɩkɛva ikodunwo awuvʋlɔ, ɩaza yɛ adimakɛlɛ, na ɩava ɩayɩ mmenii mɔɔ botwodwu betiyia yɛ nɩ munwatĩĩ wɔ kɛnɩ.—1 Dwɔ. 4:4.

14. Mɩnla yɛ yɛkɔhʋla yɛkɔdwɩnɩndwɩnɩ nwʋmɔ a?

¹⁴ Sɛ bɔlɔ kã wʋ a, dwɩnɩndwɩnɩ mɔɔ Gyehova kɛyɛ kɛma yɛ wɔ eɣile be nɩ nwʋ. Dwɩnɩndwɩnɩ kezimɔ ɛkɛdɩ nɣanlɩ mmɩlɩ mɔ bɛyɩ Setanɩ nɩɩ tanɩyɛlɛmaa wɔ kɛnɩ ma ɩha ɛdɩnɣɛlɛmaa nkʋ̃ la, nɩɩ mmɩlɩ mɔ ngyɩkɩ̃ɩ̃ ngyɩkɩ̃ɩ̃ la yɛɣa yeli munli nɩ nwʋ. Yɛkile be mɔɔ bɛyɛlɩ wɔ 2014 manlɩ-avinli ayiyialɩyɛ yɩ tʋ nɩ manlɩ yɛnwʋnlɩ kezimɔ yɛkɔdwɩnɩndwɩnɩ yɛ anyɩnlɩlazʋ yɩ nwʋ. Ɛzɩlɛ be nɩɩ yɩ abusunwa dwɩnɩndwɩnɩnlɩ kezimɔ sɛ yɛfa nninyeni baaba yesiye nninyeni tanɩ mɔɔ bɛhã nwʋmɔ odwokɔ wɔ 2 Timoti 3:​1-5 yɩ agyia nu a, ɩkɛma Paladayɩsɩ kɛyɛ fɛ nɩ nwʋ. Bɛɣɩnganlɩ ɔzɔ Ɛhɛlɛlɛ Odwokɔ nɩ kɛɛ: “Wɔ oyuwadɩ fʋlɔ yɩ nu nɩ, anyɩnlɩlelɛ mmɩlɩ kɛɣa. Iluwakɛɛ mmenii kɔlɔ mmenii mvʋlɔ, bɛ anyɩ keleli sunzuma ɔfʋã nu nninyeni nwʋ, bɛlɛ́yɛ anyɩnlɩbʋlʋ, bɛkɛhã bɔ nwʋ azɩ, bɛkɛhamvʋ Nyamɩnlɩ, bekediye bɛ awʋvʋlɔ, bekehile anyɩnlɩzɔlɛ, bekeli nɔhʋanlɛ, bekenyia ɔlɔlɛ kezile bɛkɛma bo mmusunwamaa, bɛkɛyɛ mmenii mɔɔ bɔkʋla bɛ nɩɩ bɛ fa adwɩnɩ, bɛkɛhã mmenii mvʋlɔ nwʋ odwokɔba mmɩlɩ munwala, bɔkʋla bɛhyɛ bɔ nwʋ zʋ, bɔ nwʋ twe, bɔdɔ baabayɛlɛ, bɔkʋla bɛfa bɔ nwʋ betiã bɔ zʋ, bɛtɩ odwokɔ tʋ, bɛáwu bɔ nwʋ bɛtɛla abiyemmɔ, bɔdɔ Nyamɩnlɩ bɛtɛla anyɩnlɩlelɛdɩyɛ, bɔzʋ̃ bɛ ahʋnlɩnɩ nu botu bɔ nwʋ bɛma Nyamɩnlɩ ɔzʋ̃mɩnlɛ; na mmenii eyimmɔ yɛ fa wʋ nwʋ fʋãmɩ bɛ a.” Asʋ̃ ɛ nɩɩ wu mmusunwamaa anzɛnyɩɩ wʋ ɔhɔnwʋmmɔ dedimaa bɔ kezimɔ oyuwadɩ fʋlɔ yɩ kɛyɛ nwʋ nkɔmmɔ a?

15. Ɩwɔ numɔ kɛɛ bɔlɔ hanlɩ Tanja dɩyɛ, naasʋ̃ mɩnla yɛ ɩwʋwalɩ yɩ ma ilili zʋlɔ a?

¹⁵ Eliyema baalɛ be mɔɔ bɔfʋlɛ yɩ Tanja mɔɔ ɩwɔ North Macedonia hʋla lili bɔlɔ zʋ mmɩlɩ mɔ ɩdwɩnɩndwɩnɩnlɩ nyilalɛ mɔɔ ikenyia yɩ eɣile be nɩ nwʋ nɩ. Mmɩlɩ mɔ ɩwɔlɩ yɩ tʋ kɛɛ isumaa Bayɩbʋlʋ yɩ nɩ, yɩ awʋvʋlɔ dwodwuli diyialɩ yɩ ɛzɩzɩbɛ ɛzɩzɩbɛ. Ikile numɔ kɛɛ: “Nninyeni mɔɔ nɩ mu kunlu tu kɛɛ ikezi nɩ, ebiye zili. Sɛ nɩ mʋkɔ dɩyɛzumanlɛ mɩba bela a, mɩ maamɩ kyĩ mɩ baaba. Mɩ awʋvʋlɔ bonwunlanwunlanlɩ mɩ po kɛɛ sɛ mɩba mɩyɛ Gyehova Dasɩvʋlɔ a, sa bokũ mɩ.” Awielɩyɛ kʋlaa nɩ, boduduli Tanja wɔ awudo. Kɛ ɩyɛlɩ yɩ dɩyɛ izeli a? Ɩhanlɩ kɛɛ: “Mʋdwɩnɩndwɩnɩnlɩ kezimɔ sɛ midi nɔhʋanlɛ mʋkɔ mʋpʋmɩ awielɩyɛ a, mikenyia anyɩnlɩlelɛ daabaa nɩ nwʋ. Akʋ̃ sʋ̃ mʋdwɩnɩndwɩnɩnlɩ kezimɔ Gyehova kɛma mɩ sa kɛhã nninyeni mɔɔ ebiye a ikevi mɩ sa wɔ oyuwadɩ eyi nu nɩ, nɩɩ kezimɔ mɩ ɛɣɛɛlɛ kevi nninyeni dadampɔ nɩ munwatĩĩ nwʋ.” Tanja hɔlɩ zʋlɔ lili nɔhʋanlɛ na iluwa Gyehova yɩ  mmʋwalɩyɛ zʋ nɩ, inyianlɩ dɩka be ɩwʋwalɩ. Sikalɛyɩ, Tanja igyia eliyema benyia nɔhʋanlɛvʋlɔ be, na bɛlɛ anyɩnlɩlelɛ bɛyɛɛ mmɩlɩ munwala ɔzʋ̃mɩnlɛ egyima yɩ.

HYƐ́ WƲ ANWƲLAZƲ NU ƐZƖZƖBƐ NNƐ

16. Sɛ yɛnwʋ kɛɛ odwokɔ mɔɔ bɛhyɛ nwʋmɔ nkɔmɩ wɔ Luuku 21:​26-28 nɩ isizii a, mɩnla yɛ ɩkɔwʋwa yɛ ma yekenyia akɛnɣazɩzɩbɛ a?

¹⁶ Wɔ anwʋhyɩlɩyɛ mmɩlɩ yɩ nu nɩ, “bɔlɔ ɩbama mmenii bɔkɔdʋdɔ abitĩ.” Naasʋ̃ Nyamɩnlɩ yi mmenii mɛyɩ bɛkɛva akɛnɣazɩzɩbɛ bekegyina pindinyii. (Kɩnga Luuku 21:​26-28.) Mɩnla ti mɔɔ yekenyia akɛnɣazɩzɩbɛ a? Iluwakɛɛ ɔzɔ mmɩlɩ nɩ, nɩ yezuma kezimɔ yɛkɛva yɛ nwʋ yekediã Gyehova zʋ. Tanja mɔɔ yeli bɔmʋnlɩ yɛhã yɩ nwʋ odwokɔ nɩ hanlɩ kɛɛ, ndwokɔzɩzɩbɛ mɔɔ iyiyialɩ nɩ ɩbʋwaa yɩ ma ikegyina ndwokɔzɩzɩbɛ mvʋlɔ munwa. Ɩhanlɩ kɛɛ: “Mɩɣa mʋnwʋnlɩ kɛɛ Gyehova kɔhʋla kɔwʋwa yɛ ma yekegyina ndwokɔzɩzɩbɛ bela munwa na iayila yɛ sʋ̃. Itwu mmɩlɩ be a, nɩ ɩdɩ kɛɛ mɔɔ mmenii mɔɔ botwodwu betiyia yɛ nɩ benyiaa yɛ zʋ tumi, naasʋ̃ nɔhʋanlɛ odwokɔ yɛ lɛ kɛɛ Gyehova ɩwɔ tumi ɩtɛla ɔzɔ mmenii yi kʋlaa. Na sɛ odwohilalɛ be nu yɛ sɩ kɛɛ mɩnla la po a, sɛ ɩba awielɩyɛ.”

17. Mɩnla ɔhʋanɩ zʋ yɛ ɔlʋbɔ odwokɔ ma 2024 nɩ kɔwʋwa yɛ a? (Kila Ɔwɩɛnɩlɛ Aɣanɩ yɩ anyunu mfonyini yi.)

¹⁷ Nnɛ, nninyeni sʋ̃maa kʋla ma bɔlɔ kã yɛ. Naasʋ̃ dɩkɛɛ Devidi nɩ, sa yɛkʋla yedi bɔlɔ zʋ. Yɛ ɔlʋbɔ odwokɔ ma 2024 yɩ dɩ mpayɩ mɔɔ Devidi wɔlɩ hileli Gyehova nɩ: “Sɛ bɔlɔ kã mɩ a, mɩfa mʋ nwʋ mitiã wʋ zʋ.” (Ndw. 56:3) Bayɩbʋlʋ nwʋ nnimidivʋlɔ be kã nkyɩkyɛmi eyi nwʋ odwokɔ kɛɛ, Devidi “ɩáfa yɩ adwɩnɩ isiye nninyeni mɔɔ ɩma bɔlɔ kã yɩ anzɛnyɩɩ yi ndwokɔzɩzɩbɛ zʋ, mfomi ɩvalɩ yɩ nwʋ idianlɩ enii mɔɔ ikele yi nɩ zʋ.” Ɔzʋmɩ nnɛ mɔɔ ɩkɔɔ yɩ dwɩnɩndwɩnɩ yɛ ɔlʋbɔ odwokɔ yɩ nwʋ, titili mmɩlɩ mɔ eyiyiaa ndwokɔ mɔɔ ɩkɛma bɔlɔ kɛhã wʋ nɩ. Dé mmɩlɩ fa dwɩnɩndwɩnɩ nninyeni mɔɔ Gyehova yɛ daada, mɔɔ ɩyɛɛ kakɩ yɩ, nɩɩ mɔɔ ɩkɛyɛ wɔ eɣile be nɩ nwʋ. Na dɩkɛɛ Devidi nɩ, wʋzawʋ sʋ̃ ɔkɔhʋla ɛkɛhã kɛɛ: “Nyamɩnlɩ yɛ mɩfa mʋ nwʋ mitiã yɩ zʋ a, mu kunlu ilótu.”—Ndw. 56:4.