1-2. Mɩnla ndwokɔzɩzɩbɛ yɛ Gyehova azʋ̃mɩvʋlɔ nɔhʋanlɛmaa bɔkɔhʋla bekeyiyia a?

 SƐ ASIANƖ be tʋ yɛ a, ɩkɔhʋla ɩkɛzɩnza yɛ ɛbɩlawɔlɛ aɣilemvile nu. Kɛ ndianwʋ nɩ, eliyema nɔhʋanlɛvʋlɔ be mɔɔ bɔfʋlɔ yɩ Luis a ɣa nwʋnlɩ kɛɛ inyia kansa. Dɔkɩta yɩ hanlɩ hileli yi kɛɛ, ɩka aziyianɩ ɛgyɩkɩ̃ɩ̃ be ma iwu. Nɩ Monika nɩɩ yi hũ bɛlɛ ɛhyɩmɛ bɛyɛɛ ɔzʋ̃mɩnlɛ egyima yɩ. Eɣile ɔkʋ̃, Monika ɣa nwʋnlɩ kɛɛ yi hũ mɔɔ nɩ ɩdɩ asafʋ nu ebani nɩ, ntʋlɔnkʋdɩ ɩva alʋbɔ sʋ̃maa ɩyɛ tanɩ iziye. Eliyema baalɛ sigyianii be mɔɔ bɔfʋlɔ yɩ Olivia sʋ̃, bɛhã behileli yi kɛɛ ɩzʋ̃ yɩ awudo idú, iluwa ahumi kezile be mɔɔ nɩ ibadu nɩ ti. Mmɩlɩ mɔ ɩɣa idwuli awudo nɩ, ɩnwʋnlɩ kɛɛ ahumi yi ɩzɩkɛ yɩ aliyia yɩ pasaa. Mmeliyema eyimmɔ mɔɔ yɛhã bɔ nwʋ odwokɔ yɩ, aɣilemvile nu la yɛ bɛ ɛbɩlawɔlɛ munwala zɩnzanlɩ a. Asʋ̃ debe mɔɔ ɩdɩ zɔ ɩdʋ wʋ ma wʋ ɛbɩlawɔlɛ munwala zɩnzã aɣilemvile nu kyɩ̃ a?

² Ɩwɔ numɔ kɛɛ yɛdɩ Gyehova azʋ̃mɩvʋlɔ nɔhʋanlɛmaa dɩyɛ, naasʋ̃ ndwokɔzɩzɩbɛ mɔɔ ɩtʋ mmenii munwala nɩ, ebiye kʋla tʋ yɛ. Akʋ̃ sʋ̃, yɛ adamvʋlɔ fa odwohilalɛ nɩɩ odwodwudiyialɛ ba yɛ zʋ. Ɩwɔ numɔ kɛɛ Gyehova ɩáwɔ yɛ nwʋ banɩ wɔ ndwokɔzɩzɩbɛ bela mɔɔ yekeyiyia nɩ nwʋ dɩyɛ, naasʋ̃ ɩwɔ anʋhʋba kɛɛ ɩkɔwʋwa yɛ. (Ayɩ. 41:10) Iluwa yɩ mmʋwalɩyɛ zʋ nɩ, sa yɛ anyɩ kʋla de, yesizi abɔkɔ baaba, na yɛahɔ zʋ yɛali nɔhʋanlɛ yɛama yɩ mmɩlɩ po mɔ yeyiyiaa ndwokɔzɩzɩbɛ nɩ. Wɔ dɩyɛzumanlɛ eyi nu nɩ, yekehila ahʋanɩ anla mɔɔ Gyehova duwa zʋlɔ bʋwa yɛ mmɩlɩ mɔ yeyiyiaa ɔhawʋ be nɩ. Sa yesia sʋ̃ yekila mɔɔ ɩsɛ kɛɛ yɛyɛ na ama yɛanyia ɔzɔ mmʋwalɩyɛ yɩ zʋ mfasʋ.

GYEHOVA KƆWƆ WƲ NWƲ BANƖ

3. Sɛ yeyiyiaa ndwokɔzɩzɩbɛ a, mɩnla yɛ ebiye a ɩkɛyɛ sɩ kɛɛ yɛkɛyɛ a?

³ Mɔɔ ɩyɛ sɩ ɩma yɛ. Sɛ yeyiyiaa ndwokɔzɩzɩbɛ a, sa ɩkʋla ɩyɛ sɩ  ɩma yɛ kɛɛ yekozunzu nninyeni nwʋ bʋwɔ na yɛazizi abɔkɔba. Mɩnla ti a? Ebiye a ɔzɔ mmɩlɩ yɩ nɩ yedii ɛyɛkɛ kezile, adwɩnɩndwɩnɩ ɩma yɛ adwɩnɩ du vʋla, na ɩkɛyɛ yɛ kɛɛ mɔɔ yeluwa anwunzumi nu mɔɔ yɛánwʋ ye ti zʋ yɛtɩ ngɔlɔ yetiã po. Bɛmá yehila kezimɔ mmeliyema mmaalɛ anwɩ̃ mɔɔ yɛhã bɔ nwʋ odwokɔ daada nɩ dɩlɩ nɣanlɩ. Olivia hanlɩ kɛɛ, “Mmɩlɩ mɔ ahumi yi zɩkɛlɩ mɩ aliyia yɩ nɩ, mɩ adwɩnɩ duli vʋlalɩ, na nɩ mɩánwʋ mɔɔ mɩyɛ́.” Monika hanlɩ mɔɔ yi hũ yɛlɩ nɩ nwʋ odwokɔ kɛɛ: “Ɩmanlɩ mɩdɩlɩ nɣanlɩ kɛɛ mɩ sa zi azɩ. Ɩmanlɩ milili ɛyɛkɛ kezile baaba wɔ mɩ ahʋnlɩnɩ nu. Odwokɔ yɩ wuwuli mɩ meti nɩ mɩáhʋla mɩyɛ nninyeni mɔɔ mɩyɛ yɩ eɣile bela nɩ. Miásunzu kɛɛ eyi kɔhʋla kɔdʋ mɩ kyɩ̃.” Sɛ yɛ adwɩnɩ tʋ fʋla a, mɩnla yɛ Gyehova ɩhã kɛɛ ɩkɛyɛ kɔwʋwa yɛ a?

4. Kɛmɔ Fɩlɩpɩmaa 4:​6, 7 kile nɩ, mɩnla yɛ Gyehova bɔ anʋhʋba kɛɛ ɩkɛyɛ kɛma yɛ a?

⁴ Mɩnla yɛ Gyehova kɛyɛ kɔwʋwa yɛ a? Ɩbɔ anʋhʋba kɛɛ ɩkɛma yekenyia mɔɔ Bayɩbʋlʋ fʋlɔ yɩ “Nyamɩnlɩ azʋ̃nudwolɩyɛ” nɩ. (Kɩnga Fɩlɩpɩmaa 4:​6, 7.) Azʋ̃nudwolɩyɛ eyi yɛ lɛ yɛ ahʋnlɩnɩ mɔɔ ɩtɔ ye kunlu iluwa abusunwawɔlɛ baaba mɔɔ yɛ nɩɩ Gyehova wɔ ti. Azʋ̃nudwolɩyɛ eyi “ɩtɛla enii yɩ ntɩyasɩ munwatĩĩ,” na ɩkʋla ɩma yɛ ahʋnlɩnɩ tɔ ye kunlu ankasa. Asʋ̃ ɔwɔ Gyehova mpayɩ kyɩ̃ ma mɛyɩ mɛda nɩ kezimɔ wʋ ahʋnlɩnɩ dɔlɩ wu kunlu nɩ yɛlɩ wʋ nnwʋánlɩ a? Ɔzɔ nɣanlɩdɩlɛ nɩ yɛ lɛ “Nyamɩnlɩ azʋ̃nudwolɩyɛ” yɩ.

5. Mɩnla ɔhʋanɩ zʋ yɛ Nyamɩnlɩ azʋ̃nudwolɩyɛ ɩbɔ yɛ adwɩnɩ nɩɩ yɛ ahʋnlɩnɩ nwʋ banɩ a?

⁵ Nkyɩkyɛmi kʋ̃ yɩ la kã kɛɛ, Nyamɩnlɩ azʋ̃nudwolɩyɛ nɩ kɛma mʋnlʋmmɔ “bɛ adwɩnɩ ikegyina,” anzɛnyɩɩ ɩkɔwɔ bɔ nwʋ banɩ. Odwokɔpɔkɔ ankasa mɔɔ bɛva belili egyima wɔ nkyɩkyɛmi eyi nu nɩ dɩ “banɩwɔlɛ,” mɔɔ bɛfa bekile kezimɔ nɩ azogyiamaa bɔ twonwa be nwʋ banɩ wɔ adamvʋlɔ nwʋ nɩ. Twonwa mɔɔ bɔwɔ nwʋmɔ banɩ nɩ, sɛ yɩ manlɩmaa bɛda a nɩ bɛla, iluwakɛɛ bezi kɛɛ azogyiamaa wɔ kɛnɩ mɔɔ bɔbɔɔ twonwa yɩ anyɩnkɛ nwʋ banɩ. Ɔzɔ la sʋ̃ yɛ sɛ Nyamɩnlɩ azʋ̃nudwolɩyɛ bɔ yɛ adwɩnɩ nɩɩ yɛ ahʋnlɩnɩ nwʋ banɩ a, ɩma yɛ ahʋnlɩnɩ tɔ ye kunlu a, iluwakɛɛ yezi kɛɛ yɛwɔ banɩwɔlɛ. (Ndw. 4:8) Dɩkɛɛ Hana nɩ, sɛ yɛbɔ mpayɩ yewie na yɛ bʋwabɩlɛ ɩásɩnza po a, sa yɛkʋla yenyia azʋ̃nudwolɩyɛ. (1 Sa. 1:​16-18) Na sɛ yɛ ahʋnlɩnɩ tɔ ye kunlu a, mbɔmɩ sʋ̃maa nɩ, ɩyɛ mɛlɛkɛ kɛɛ yekozunzu nninyeni nwʋ bʋwɔ na yɛazi pɔkɔba.

6. Kɛ ɩkɛyɛ na yeanyia Nyamɩnlɩ azʋ̃nudwolɩyɛ zʋ mfasʋ a? (Kila mfonyini yi sʋ̃.)

⁶ Mɔɔ ɩsɛ kɛɛ ɛyɛ. Sɛ eyiyiaa ndwokɔzɩzɩbɛ a, siã Gyehova kɛɛ ɩwʋwá wʋ. Mɩnla ɔhʋanɩ zʋ a? Bɔ́ yɩ mpayɩ, kɔbʋmɩ kɛɛ ekenyia Nyamɩnlɩ azʋ̃nudwolɩyɛ. (Lk. 11:9; 1 Tɛs. 5:17) Luis mɔɔ yɛhã yɩ nwʋ odwokɔ daada nɩ hanlɩ mɔɔ  ɩwʋwalɩ ɩ nɩɩ yɩ yɩ Ana, mmɩlɩ mɔ bɛɣa bɔnwʋnlɩ kɛɛ ɩha aziyianɩ ɛgyɩkɩ̃ɩ̃ be ma iwu nɩ. Ɩhanlɩ kɛɛ: “Wɔ bʋwabɩlɛ mɔɔ ɩdɩ zɔ nu nɩ, ɩyɛ sɩ paa kɛɛ ekezi pɔkɔ kɛvalɩ adimakɛlɛzalɛ nɩɩ ndwokɔ mvʋlɔ nwʋ. Naasʋ̃ mpayɩwɔlɛ nkʋ̃ la yɛ ɩwʋwalɩ yɛ ma yenyianlɩ azʋ̃nudwolɩyɛ na yɛhʋla yegyinanlɩ numɔ a.” Luis nɩɩ yɩ yɩ hanlɩ kɛɛ, nɩ bɛta bɔbɔ mpayɩ ɛzɩzɩbɛ ɛzɩzɩbɛ besiã Gyehova kɛɛ ɩmá bɛ adwɩnɩ igyina na benyia nɣɛlɛbɛ mɔɔ bɛkɛva bekezizi abɔkɔba. Eyi wʋwalɩ bɛ baaba. Wʋzawʋ sʋ̃, sɛ eyiyiaa ndwokɔzɩzɩbɛ a, ɩyɛ a ta bɔ mpayɩ na ekenyia Gyehova yɩ azʋ̃nudwolɩyɛ mɔɔ ɩkɔwɔ wʋ adwɩnɩ nɩɩ wʋ ahʋnlɩnɩ nwʋ banɩ.—Wul. 12:12.

GYEHOVA KƐMA EKEGYINA PINDINYII

7. Sɛ yeyiyiaa ndwokɔzɩzɩbɛ a, ebiye a kɛ yɛkɛdɩ nɣanlɩ yekeze a?

⁷ Mɔɔ ɩyɛ sɩ ɩma yɛ. Sɛ yeyiyiaa ndwokɔzɩzɩbɛ a, kezimɔ yɛtɩ nɣanlɩ, kezimɔ yesunzu nninyeni nwʋ, nɩɩ kezimɔ yɛyɛ yɛ dɩyɛ nɩ kɔhʋla kɛzɩnza. Kɛmɔ sɛ ahumi ituu wɔ ngyemvile zʋ a, ɩkʋla ɩtʋ ɛlɛnɩ ɩkɔ ɛkɩ ɩba ɛkɩ nɩ, ebiye a bʋwabɩlɛ mɔɔ eyiyiaa nɩ ɩma ɛtɩ nɣanlɩ kɛɛ bɔtʋʋ wʋ bɔkɔ ɛkɩ bɛba ɛkɩ. Ana mɔɔ yeli bɔmʋnlɩ yɛhã yɩ nwʋ odwokɔ nɩ hanlɩ kɛɛ, mmɩlɩ mɔ yi hũ Luis wuli nɩ ɔzɔ yɛ ɩdɩlɩ nɣanlɩ a. Ɩhanlɩ kɛɛ: “Ɩyɛ a adwɩnɩndwɩnɩ hyɛ mʋ zʋ, na ɩma midi alɔbɔ baaba. Akʋ̃ sʋ̃, sɛ mɩkakɛ kɛɛ Luis íni ɛkɩhyɩ dɔkʋ̃ a, nɩ ɩma mɩfa ɛya.” Mɛyɩ la ahanlɩ a, nɩ Ana tɩ nɣanlɩ kɛɛ ɩyɛ ankʋnamɩ. Na sɛ ɩba yɩ kɛɛ izí pɔkɔ ɩvalɩ odwokɔ be mɔɔ ankɩ ɩlɛ́yɛ sɩ kɛɛ Luis keli nwʋmɔ egyima nwʋ a, nɩ ɩdʋ yɩ adwɩnɩndwɩnɩ. Nɩ ɩyɛ a ɩtɩ nɣanlɩ dɩkɛɛ mɔɔ ahumi be ɩ nɩɩ yɩ idii akɔnɩyaba wɔ ngyemvile zʋ. Sɛ adwɩnɩndwɩnɩ hyɛ yɛ zʋ a, mɩnla yɛ Gyehova ɩyɛ ɩbʋwa yɛ a?

8. Kɛmɔ 1 Pita 5:10 kã nɩ, mɩnla yɛ Gyehova bɔ anʋhʋba kɛɛ ɩkɛyɛ ɩkɛma yɛ a?

⁸ Mɩnla yɛ Gyehova ɩyɛ ɩbʋwa yɛ a? Ɩwɔ anʋhʋba kɛɛ ɩkɛma anwʋzɩzɩbɛ yɛ ma yekegyina pindinyii. (Kɩnga 1 Pita 5:10.) Sɛ ahumi bɔ ɛlɛnɩ be wɔ ngyemvile zʋ a, ɩkʋla ɩtʋ yɩ ɩkɔ ɛkɩ ɩba ɛkɩ. Mɔɔ ɩkɛyɛ na ɛlɛnɩ yɩ ɩahʋla iagyina ahumi yi munwa nɩ, bɛyɛ debe wɔ ɛlɛnɩ yɩ pɛ nɩɩ yɩ pɛ wɔ nzulo yɩ tʋ. Ɔzɔ nninyeni yi mɔɔ bɛyɛ yɩ wɔ ɛlɛnɩ yɩ pɛ nɩ, ɩáma ahumi yi ɩwʋsʋ ɛlɛnɩ yɩ sʋ̃maa, ɩbɔ mmenii mɔɔ bɔwɔ ɛlɛnɩ yɩ nu bɔ nwʋ banɩ na ɩma bɛ ahʋnlɩnɩ tɔ bo kunlu. Naasʋ̃ ɔzɔ nninyeni yi mɔɔ bɛyɛ yɩ wɔ ɛlɛnɩ yɩ pɛ nɩ ɩyɛ egyima bʋwɔ mmɩlɩ mɔ ɛlɛnɩ yɩ ɩkɔɔ yɩ anyunu nɩ. Ɔzɔ la yɛ sɛ amɩyɛ sʋ̃ yeyiyiaa ndwokɔzɩzɩbɛ, na yɛkɔ zʋ yɛfa nɔhʋanlɛlilɛ yɛsʋ̃mɩ Gyehova a, ɩkɛma yekegyina pindinyii.

9. Mɩnla ɔhʋanɩ zʋ yɛ nninyeni mɔɔ yɛfa yɛyɛ ɛbɩbɛlɛnu nɩ, ɩkɔhʋla kɔwʋwa yɛ ma yɛ adwɩnɩ kegyina a? (Kila mfonyini yi sʋ̃.)

⁹ Mɔɔ ɩsɛ kɛɛ yɛyɛ. Sɛ adwɩnɩndwɩnɩ hyɛ wʋ zʋ a, áma eyiaki kɛɛ ɔkɔwɔ mpayɩ, ɔkɔhɔ  dɩyɛzumanlɛ nɩɩ dasɩlɛlilɛ. Ɩwɔ numɔ, ebiye a ɔlɔ́kʋla kɛyɛ sʋ̃maa kɛmɔ nɩ ɛyɛ yɩ bɔmʋnlɩ nɩ, naasʋ̃ kakɛ kɛɛ Gyehova tɩ wʋ bʋwabɩlɛ yɩ tʋ. (Fa tindiã Luuku 21:​1-4 nwʋ.) Akʋ̃ sʋ̃, yɩ mmɩlɩ siye kɛ fa suma dɩyɛ na dwɩnɩndwɩnɩ nwʋmɔ. Mɩnla ti a? Gyehova luwa yɩ ahyɩhyɛdɩ yɩ zʋ ɩma yɛ sa hã ndwokɔ nɩɩ vidiyo azʋlɔtʋ mɔɔ ɩkɔwʋwa yɛ ma yɛ adwɩnɩ kegyina. Sa ɔkʋla duwa JW Library^®, Watch Tower Publications Index, nɩɩ Buuku Mɔɔ Gyehova Dasɩvʋlɔmaa Bɛfa Bɛyɛ Ɛbɩbɛlɛnu yi zʋ ɛpɩbɛ ndwokɔ nɩɩ vidiyo azʋlɔtʋ mɔɔ ɩkɔwʋwa wʋ. Monika mɔɔ yɛhã yɩ nwʋ odwokɔ daada nɩ hanlɩ kɛɛ, sɛ ɩyɛ na nninyeni ɩyɛ kɛhyɛ yɩ zʋ a, nninyeni mɔɔ yɛfa yɛyɛ ɛbɩbɛlɛnu nɩ yɛ ɩfa ɩpɩbɛ fʋlɔdulɛ mɔɔ ɩma inyia anwʋzɩzɩbɛ fʋlɔ a. Kɛ ndianwʋ nɩ, ɩyɛlɩ odwokɔpɔkɔ “ɛya” nwʋ ɛbɩbɛlɛnu. Mmɩlɩ fʋlɔ sʋ̃, ɩyɛlɩ ɛbɩbɛlɛnu ɩvalɩ “awohwi” anzɛnyɩɩ “nɔhʋanlɛlilɛ” nwʋ. Akʋ̃ ɩkɩnga nwʋmɔ ndwokɔ sʋ̃maa kɔbʋmɩ kɛɛ yɩ ahʋnlɩnɩ kɔdɔ yi kunlu. Ɩhanlɩ kɛɛ: “Ansaana mʋkɔwɔ ɛbɩbɛlɛnu be tʋ nɩ, nɩ adwɩnɩndwɩnɩ ɩhyɛ mʋ zʋ daada. Naasʋ̃ sɛ mʋkɔ zʋ mɩkɩnga ndwokɔ yɩ a, mɩtɩ nɣanlɩ kɛɛ Gyehova ɩdɔ mʋ nwʋ na ɩma mɩ ahʋnlɩnɩ tɔ mu kunlu.” Mmʋwalɩyɛ mɔɔ ɩdɩ zɔ mɔɔ yenyia yɩ wɔ Gyehova kɛnɩ nɩ, ɩkɔhʋla kɔwʋwa yɛ ma yɛ adwɩnɩ kegyina kɔbʋmɩ kɛɛ yekenyia azʋ̃nudwolɩyɛ.—Ndw. 119:​143, 144.

GYEHOVA KƆWƲWA WƲ

10. Sɛ yeyiyia bʋwabɩlɛ mɔɔ ɩyɛ atɩɩtɩɩ a, kɛ ɩkɔhʋla ɩkɛma yɛkɛdɩ nɣanlɩ yekeze a?

¹⁰ Mɔɔ ɩyɛ sɩ ɩma yɛ. Sɛ bʋwabɩlɛ be mɔɔ ɩyɛ atɩɩtɩɩ tʋ yɛ a, ɩkʋla ɩma yɛ ɛɣɛɛlɛ bɔ na yɛtɩ nɣanlɩ kɛɛ yɛvɛ. Sa ɩkʋla ɩma yɛtɩ nɣanlɩ dɩkɛɛ tɔlɔnwadulɛvʋlɔ be mɔɔ iɣiandii paa mɔɔ kakɩ yɩ ɩáhʋla itu tɔlɔnwa, iluwakɛɛ yi agyia nu hã. Ebiye a ɩlɛ́yɛ mɛlɛkɛ kɛɛ yɛkɛyɛ nninyeni be mɔɔ nɩ ɩyɛlɛ ɩáyɛ sɩ ɩma yɛ nɩ. Anzɛnyɩɩ ebiye a, anyɩnlɩlelɛ mɔɔ nɩ yɛfa yɛyɛ egyimalilɛ be nɩ kɛhã azɩ. Dɩkɛɛ Ilayɩgya nɩ, amɩyɛ sʋ̃ sa yɛkʋla yɛtɩ nɣanlɩ kɛɛ ye padi golɔ na yɛpɛ kɛɛ yɛda. (1 Aw. 19:​5-7) Sɛ ye padi kolɔ a, mɩnla yɛ Gyehova ɩwɔ anʋhʋba kɛɛ ɩkɛyɛ kɔwʋwa yɛ a?

11. Kɛmɔ Ndwomi 94:18 kile nɩ, mɩnla yɛ Gyehova kɛyɛ kɛma yɛ a?

¹¹ Mɔɔ Gyehova ɩyɛ ɩbʋwa yɛ. Gyehova bɔ anʋhʋba kɛɛ ɩkɔwʋwa yɛ. (Kɩnga Ndwomi 94:18.) Kɛmɔ tɔlɔnwadulɛvʋlɔ kehyinyia mmʋwalɩyɛ na ama ɩahʋla iadiyia nɩ, ɔzɔ la yɛ amɩyɛ sʋ̃ yekehyinyia mmʋwalɩyɛ na ama yɛahɔ zʋ yɛazʋ̃mɩ Gyehova a. Wɔ bʋwabɩlɛ mɔɔ ɩdɩ zɔ nu nɩ, Gyehova bɔ anʋhʋba yɛ kɛɛ: “Mamɩ Gyehova wʋ Nyamɩnlɩ, mɩlɛ wʋ sa nyini nu, mɩzamɩ yɛ mɩkãã mikilee wʋ kɛɛ, ‘Áma wu kunlu itu. Mʋkɔwʋwa wʋ.’” (Ayɩ. 41:13) Bulombunli Devidi yɩ sa hanlɩ mmʋwalɩyɛ eyi  be mmɩlɩ mɔ iyiyialɩ odwohilalɛ na yɩ adamvʋlɔ bɛtɩɩdɩɩ yɩ nɩ. Ɩhã ihileli Gyehova kɛɛ: “Wʋ sa nyini yɛ ɩbʋwa mɩ a.” (Ndw. 18:35) Naasʋ̃, mɩnla ɔhʋanɩ yɛ Gyehova duwa zʋlɔ bʋwa yɛ a?

12. Sɛ ye padi kolɔ a, aninyiammɔ yɛ ebiye a Gyehova koluwa bɔ zʋ kɔwʋwa yɛ a?

¹² Mbɔmɩ sʋ̃maa nɩ, Gyehova kã mmenii mvʋlɔ bɛ ahʋnlɩnɩ ma bɔbʋwa yɛ. Kɛ ndianwʋ nɩ, mmɩlɩ mɔ Devidi yi padi golɔlɩ nɩ, yɩ ɔhɔnwʋ Dwonatanɩ hɔ gyelalɩ yɩ, ɩyɩkyɩlɩ yɩ ɛɣɛɛlɛ na ɩhyɛlɩ yɩ ɛzɩzɩbɛ sʋ̃. (1 Sa. 23:​16, 17) Ɔzɔ la sʋ̃ yɛ Gyehova luwalɩ Ilayɩhya zʋ wʋwalɩ Ilayɩgya a. (1 Aw. 19:​16, 21; 2 Aw. 2:2) Nnɛ, Gyehova kɔhʋla koluwa yɛ abusunwamaa, yɛ ɔhɔnwʋmmɔ, anzɛnyɩɩ asafʋ nu mbanimbani zʋ ɩkɔwʋwa yɛ. Naasʋ̃ sɛ yedii ɛyɛkɛ a, ebiye a yɛkɔhwɩ̃ yɛ nwʋ wɔ mmenii nwʋ, anzɛnyɩɩ yɛkɛbɛ kɛɛ ɩkɛha yɛzayɛ nkʋ̃. Eyi dɩ debe mɔɔ ɩkʋla ɩtʋ ye nu sʋ̃maa. Mɩnla yɛ yɛkɔhʋla yɛkɛyɛ na ama yɛ sa ɩahã Gyehova yɩ mmʋwalɩyɛ a?

13. Mɩnla yɛ ɩsɛ kɛɛ yɛyɛ na ama yɛanyia Gyehova yɩ mmʋwalɩyɛ zʋ mfasʋ a? (Kila mfonyini yi sʋ̃.)

¹³ Mɔɔ ɩsɛ kɛɛ yɛyɛ. Bɔ mmɔdɩnɩ kɛɛ wʋzawʋ nkʋ̃ ɛlɛ́tɩ wʋ nwʋ. Sɛ yɛtɩ yɛ nwʋ a, ɩma yɛfa yɛ adwɩnɩ yesiye yɛzayɛ nɩɩ ndwokɔzɩzɩbɛ mɔɔ yeyiyiaa nɩ zʋ. Eyi ɩáma yesunzu nninyeni nwʋ bʋwɔ. Sɛ ɩba yɩ zɔ a, ɩlɛ́ma yekezizi abɔkɔ baaba. (Ɛɣɛ. 18:1) Nɔhʋanlɛ, ɩyɛ a itwu mmɩlɩ be a ikehyinyia kɛɛ yɛzayɛ nkʋ̃ yɛkɔwʋwa dɩka be yekozunzu nninyeni nwʋ, titili mmɩlɩ mɔ yeyiyiaa bʋwabɩlɛ mɔɔ numɔ yɛ sɩ nɩ. Naasʋ̃ sɛ yɛtɩ yɛ nwʋ na yɛma ɩkyɛ a, ebiye a nɩ yesii mmʋwalɩyɛ mɔɔ Gyehova pɛ kɛɛ ɩfa ɩma yɛ nɩ ɔhʋanɩ. Meti, ɩávalɩ nwʋmɔ kezimɔ bʋwabɩlɛ nɩ numɔ yɛ sɩ nɩ, de mmʋwalɩyɛ mɔɔ wu mmusunwamaa, wʋ ɔhɔnwʋmmɔ, nɩɩ asafʋ nu mbanimbani kɛva kɛma wʋ nɩ tiã nu. Nwʋ yɩ kɛɛ Gyehova iduwaa bɔ zʋ ɩkɔwʋwa wʋ.—Ɛɣɛ. 17:17; Ayɩ. 32:​1, 2.

GYEHOVA KƐYƖKYƖ WƲ ƐƔƐƐLƐ

14. Bʋwabɩlɛ azʋlɔtʋ ɛhɩnla dɩyɛ yɛ ɩkɔhʋla kɛma bɔlɔ kɛhã yɛ a?

¹⁴ Mɔɔ ɩyɛ sɩ ɩma yɛ. Wɔ Bayɩbʋlʋ mmɩlɩ nu nɩ, Nyamɩnlɩ yɩ azʋ̃mɩvʋlɔ nɔhʋanlɛmaa be hanlɩ mmɩlɩ mɔ bo kunlu duli na bɔ nwʋ wʋsʋlɩ iluwa bɛ adamvʋlɔ nɩɩ ndwokɔzɩzɩbɛ azʋlɔtʋ be ti. (Ndw. 18:4; 55:​1, 5) Ɔzɔ la yɛ amɩyɛ sʋ̃, sa yɛkʋla yeyiyia odwodwudiyialɛ wɔ sukuulu, egyima nu, anzɛnyɩɩ wɔ aɣanɩ kɛnɩ a. Ebiye a, iluwa adimakɛlɛ be ti ye kunlu tu kɛɛ yekowu. Ɩba yɩ zɔ a, yɛkɔhʋla yɛkɛdɩ nɣanlɩ dɩkɛɛ kuakula be mɔɔ yɩ anyɩ zʋ dã. Mɩnla ɔhʋanɩ zʋ yɛ Gyehova bʋwa yɛ wɔ mmɩlɩ mɔ ɩdɩdɩ zɔ nu a?

15. Kɛmɔ Ndwomi 94:19 kã nɩ, mɩnla yɛ Gyehova kɛyɛ kɛma yɛ a?

 ¹⁵ Mɔɔ Gyehova ɩyɛ ɩbʋwa yɛ. Ɩkyɩkyɩ yɛ ɛɣɛɛlɛ na ɩkã yɛ ahʋnlɩnɩ itiã ye kunlu. (Kɩnga Ndwomi 94:19.) Ebiye a nkyɩkyɛmi eyi kɔhʋla kɛma yekodua bʋwabɩlɛ eyi nwʋ mfonyini yekehila: Kuakula baalɛ be mɔɔ yi kunlu du na ɩáhʋla ɩda iluwa sʋlɔ mɔɔ ɩbʋbɔɔ numɔ nɩ ti. Naasʋ̃ yɩ papa ɣalɩ yɩ pɛ, ibigyialɩ yɩ idianlɩ yɩ hɔ nwʋ, na ɩvalɩ yɩ sa ɩvɩvalɩ yɩ mɛda kɔbʋmɩ kɛɛ ɩlalɩ. Ɩwɔ numɔ kɛɛ sʋlɔ lanwʋ la ɩbʋbɔɔ numɔ dɩyɛ, naasʋ̃ iluwakɛɛ ɩvʋãmɩ yɩ papa nwʋ nɩ ti, ɩtɩ nɣanlɩ kɛɛ ɩwɔ banɩwɔlɛ. Sɛ yeyiyiaa odwohilalɛ be mɔɔ ɩma ye kunlu tu a, ebiye a ikehyinyia kɛɛ yɛ sʋlɔ Ɛzɩlɛ nɩ sɔ ye nu kɔbʋmɩ kɛɛ yɛ ahʋnlɩnɩ kɔdɔ ye kunlu. Kɛ ɩkɛyɛ na yɛ sa ɩahã ɛɣɛɛlɛyɩkyɩlɛ mɔɔ ɩdɩ zɔ wɔ Gyehova kɛ a?

16. Mɩnla yɛ yɛyɛ a, ɩkɛma Gyehova kɛyɩkyɩ yɛ ɛɣɛɛlɛ a? (Kila mfonyini yi sʋ̃.)

¹⁶ Mɔɔ ɩsɛ kɛɛ yɛyɛ. Nyiá mmɩlɩ ma Gyehova iluwa mpayɩwɔlɛ nɩɩ yi Odwokɔ mɔɔ ɛkɛɣɩnga yɩ eɣile bela nɩ zʋ. (Ndw. 77:​1, 12-14) Sɛ ɛyɛ yɩ zɔ a, mmɩlɩ bela mɔɔ ekeyiyia ndwokɔzɩzɩbɛ nɩ, dɩyɛ mɔɔ ili bɔmʋnlɩ mɔɔ ɛkɛyɛ yɛ lɛ kɛɛ ɛkɛbɩbɛ mmʋwalɩyɛ wɔ wʋ sʋlɔ Ɛzɩlɛ nɩ yɩ kɛnɩ. Dɩyɛ mɔɔ ɩma wu kunlu tu anzɛnyɩɩ wʋ adwɩnɩ tu fʋla nɩ, kã nwʋmɔ odwokɔ kile Gyehova. Ma iluwá Ɛhɛlɛlɛ Odwokɔ yɩ zʋ ɩdɩndɛ ihile wʋ na ɩyɩkyɩ wʋ ɛɣɛɛlɛ. (Ndw. 119:28) Ebiye a, ɔkɔnwʋ ndwokɔ pɔkyɩɩ be wɔ Bayɩbʋlʋ yɩ nu mɔɔ ɩfalɩ wʋ bʋwabɩlɛ yɩ nwʋ mɔɔ ɩkɛyɩkyɩ wʋ ɛɣɛɛlɛ mmɩlɩ mɔ bɔlɔ hã wʋ nɩ. Kɛ ndianwʋ nɩ, sa ɔkʋla enyia ɛzɩzɩbɛhyɛlɛ ndwokɔ wɔ Dwoobu, Ndwomi, nɩɩ Ɛɣɛlɛwulɛ buuku yi nu. Akʋ̃ sʋ̃, ekenyia ebiye wɔ Gyisɛsɩ yi ndwokɔ mɔɔ ɩwɔ Matiyu yi ti 6 yɩ nu. Sɛ ɔbɔ Gyehova mpayɩ na ɛkɩnga yi Odwokɔ yɩ a, ɩkɛyɩkyɩ wʋ ɛɣɛɛlɛ.

17. Mɩnla anwʋlazʋ yɛ yɛkɔhʋla yekenyia a?

¹⁷ Yɛkɔhʋla yekenyia anwʋlazʋ kɛɛ, sɛ yeyiyiaa ndwokɔzɩzɩbɛ be a, Gyehova kɔwʋwa yɛ mmɩlɩ munwala. Ɩlɛ́ka yɛzayɛ nkʋ̃ kyɩ̃. (Ndw. 23:4; 94:14) Gyehova wɔ anʋhʋba kɛɛ ɩkɔwɔ yɛ nwʋ banɩ, ɩkɛma yekegyina pindinyii, ɩkɔwʋwa yɛ, na ɩayɩkyɩ yɛ ɛɣɛɛlɛ. Ayɩzaya 26:3 kã falɩ Gyehova nwʋ kɛɛ: “Bɛzabɛ mɔɔ bɛfa bɔ nwʋ betiã wʋ zʋ kʋlaa nɩ, ɔkɔwɔ bɔ nwʋ banɩ, ɛkɛma azʋ̃nudwolɩyɛ bɛ daabaa, iluwakɛɛ mɔwʋ yɛ bɛva bɔ nwʋ bediã wʋ zʋ a.” Meti, fa wʋ nwʋ tiã Gyehova zʋ, na de ɔhʋanɩ mɔɔ iduwa zʋ ɩbʋwa wʋ nɩ tiã numɔ. Sɛ ɛyɛ yɩ zɔ a, ekenyia anwʋzɩzɩbɛ fʋlɔ wɔ mmɩlɩ po mɔ eyiyiaa ndwokɔzɩzɩbɛ nɩ.