1. Nnɛ mɩnla yɛ mmenii sʋ̃maa fa bɛ adwɩnɩ siye zʋlɔ a?

 EBIYE a ɛyɛ yɩ ndwɩ kɛɛ nnɛ mmenii sʋ̃maa dwɩnɩ bɛzabɛ bɔ nwʋ tɛla kɛɛ bɔkɔdwɩnɩ mmenii mvʋlɔ nwʋ. Kɛ ndianwʋ nɩ, mmenii sʋ̃maa fa mɔɔ bɛlɛ yɩ nɩɩ mɔɔ bɔhʋla bɛyɛ wɔ bɛ ɛbɩlawɔlɛ nu botu bɔ nwʋ wɔ sohyiya midiya zʋ. Naasʋ̃, mmenii ɛgyɩkɩ̃ɩ̃ be la yɛ bɛfa animinyiamɩ mɔɔ ɩfata Gyehova nɩ bɛma yɩ a. Wɔ dɩyɛzumanlɛ eyi nu nɩ, yekehila mɔɔ animinyiamɩ mɔɔ yɛkɛva kɛma Gyehova nɩ tʋ kile nɩɩ mɔɔ ɩsɛ kɛɛ ɩkã yɛ ma yɛhyɛ yɩ animinyiamɩ. Akʋ̃ sʋ̃, yekozuma kezimɔ yɛkɔhʋla kɛva animinyiamɩ mɔɔ ɩfata Nyamɩnlɩ nɩ yɛkɛma yɩ nɩɩ kezimɔ yɩzayɩ ɩkɛhyɛ yi dima animinyiamɩ eɣile be.

GYEHOVA MƆƆ YƐKƐHYƐ YƖ ANIMINYIAMƖ NƖ, KƐ YƖ TƲ KILE A?

 2. Mɩnla ɔhʋanɩ zʋ yɛ Gyehova lalɩ yɩ animinyiamɩ ali wɔ File Sɩnayɩ zʋ a? (Kila mfonyini yi sʋ̃.)

² Bayɩbʋlʋ yɩ ma yɛnwʋ kɛɛ, Gyehova dɩ Nyamɩnlɩ mɔɔ ɩwɔ tumi kezile. Gyehova lalɩ yɩ animinyiamɩ ali mmɩlɩ mɔ ileli Yizilayamaa yɩ wɔ Igyibiti alɔngɔzʋ̃mɩnlɛ nu mɛda pɛɛ nɩ. Tua eyi nwʋ mfonyini kila: Yizilayamaa abʋmɩ abʋmɩ sʋ̃maa yiyia numɔ wɔ File Sɩnayɩ nwʋ kɛnɩ kɛɛ bɛbadiye mɔɔ Nyamɩnlɩ kɛhã kehile bɛ. Mununkumi tunwuu be ɣa ɣɩdalɩ file yi zʋ. Aɣilemvile nu la, azɩlɛ yɩ wʋsʋlɩ, sɛlɛmanɩ buko bukoli na sʋlɔ wʋwɔlɩ numɔ na bɛdɩlɩ awɩɛnɩ dede kezile be. (Ɛkɩ. 19:​16-18; 24:17; Ndw. 68:8) Mmɩlɩ mɔ Gyehova lalɩ yɩ animinyiamɩ ali wɔ ɔhʋanɩ eyi zʋ nɩ, ɩkɛyɛ kɛɛ ɩmanlɩ Yizilayamaa nwʋnlɩ kɛɛ ɩlɛ tumi kezile baaba.

 3. Mɩnla ɔhʋanɩ zʋ yɛ yɛhyɛ Gyehova animinyiamɩ a?

³ Na adasamaa sʋ̃ ɛ? Asʋ̃ sa yɛkʋla yɛhyɛ Gyehova animinyiamɩ a? Nyɛ, sa yɛkʋla. Ɔhʋanɩ ɔkʋ̃ mɔɔ yeduwa zʋlɔ yɛhyɛ  Gyehova animinyiamɩ yɛ lɛ kɛɛ yɛkɛhã yi tumi kezile nɩɩ yi subanɩ ngɩnlɩma yɩ nwʋ odwokɔ yekehile mmenii mvʋlɔ. Akʋ̃ sʋ̃, sɛ yɛfa mɔɔ ɩbʋwa yɛ ma yɛkʋla yɛyɛ nɩ nwʋ ɛhamvʋlɛ yɛma yɩ a, nɩ yɛhyɛɛ yɩ animinyiamɩ. (Ayɩ. 26:12) Bulombunli Devidi yɛlɩ Gyehova mɔɔ yɛkɛva animinyiamɩhyɛlɛ yɛkɛma yɩ nɩ nwʋ ndianwʋ kɩnlɩma manlɩ yɛ. Mmɩlɩ be mɔ igyinanlɩ Yizilayamaa yɩ bɛ anyunu wɔlɩ mpayɩ nɩ, ɩhã ihileli Nyamɩnlɩ kɛɛ: “O Gyehova, mɔwʋ yɛ kezileyɛlɛ nɩɩ tumi nɩɩ animinyiamɩ nɩɩ hanyɩɩ nɩɩ annidi dɩ wʋ dɩyɛ a, na mɔɔ ɩwɔ sʋlɔ nɩɩ azɩlɛ yɩ zʋ munwatĩĩ dɩ wʋ dɩyɛ.” Devidi wɔlɩ mpayɩ wieli nɩ, “asafʋ yɩ munwatĩĩ yɩlɩ Gyehova ayɛlɛ.”—1 Mm. 29:​11, 20.

 4. Mɩnla ɔhʋanɩ zʋ yɛ Gyisɛsɩ hyɛlɩ Gyehova animinyiamɩ a?

⁴ Mmɩlɩ mɔ Gyisɛsɩ wɔ azɩlɛ yɩ zʋ nɩ, ɩvalɩ nnwʋánlɩ nninyeni mɔɔ ɩyɛlɩ nɩ nwʋ ɛhamvʋlɛ ɩmanlɩ yɩ Zɩ ɩva ɩhyɛlɩ yɩ animinyiamɩ. (Mk. 5:​18-20) Akʋ̃ sʋ̃, Gyisɛsɩ luwalɩ kezimɔ ɩhanlɩ yɩ Zɩ nwʋ odwokɔ nɩɩ kezimɔ ɩ nɩɩ mmenii lili nɩ zʋ hyɛlɩ Gyehova animinyiamɩ. Eɣile ɔkʋ̃ be, nɩ Gyisɛsɩ ikilehilee wɔ ayiyialɩyɛ aliyia be nu, na bɛzabɛ mɔɔ nɩ betiyee yi nɩ, nɩ baalɛ be kɩnla nwʋmɔ mɔɔ sunzuma evinli be lile yi alʋbɔ 18. Nɩ sunzuma evinli nɩ ma baalɛ nɩ yi nu wu anwɩ̃ mɔɔ ɩáhʋla ɩtɩnɣɛ yi nu senyii. Kila kezimɔ eyi kɛyɛ atɩɩtɩɩ! Kunlumiyɩbalɛ hanlɩ Gyisɛsɩ ma nɩ ɩpɛ kɛɛ ɩbʋwa baalɛ yɩ, meti iɣikeli yi na ɩzʋ̃ abʋtalɩ nu ɩhanlɩ kɛɛ: “Baalɛ, wʋ nwʋ ɩza!” Akʋ̃ ɩvalɩ yɩ sa igualɩ baalɛ yɩ zʋ, na ɛkɛnɩ la baalɛ nɩ dwodwuli dɩnɣɛnlɩ yi nu senyii na “ɩyɩlɩ Nyamɩnlɩ ayɛlɛ.” Yɩ anyɩ leli kɛɛ Nyamɩnlɩ ma ɩdɩ pɔkɔ dɔkʋ̃! (Lk. 13:​10-13) Nɩ baalɛ nɩ wɔ sianti baaba be ti mɔɔ ɩsɛ kɛɛ ɩhyɛ Gyehova animinyiamɩ, na ɔzɔ la yɛ ɩdɩ wɔ amɩyɛ sʋ̃ yɛ ɔfʋã nu a.

MƖNLA YƐ ƖKÃ YƐ MA YƐHYƐ GYEHOVA ANIMINYIAMƖ A?

 5. Mɩnla ti mɔɔ ɩsɛ kɛɛ yebu Gyehova a?

⁵ Yɛhyɛ Gyehova animinyiamɩ iluwakɛɛ yebu yi baaba paa. Yɛwɔ sianti sʋ̃maa ti mɔɔ ɩsɛ kɛɛ yebu yi. Gyehova yɛ lɛ dɩyɛ munwala zʋ tumivʋlɔ nɩ a, na yi tumi íni awielɩyɛ. (Ndw. 96:​4-7) Yɩ nɣɛlɛbɛ mɔɔ numɔ dɔ nɩ da ali petee wɔ nninyeni mɔɔ ɩwɔ nɩ nu. Mɛyɩ yɛ ɩmanlɩ nnwʋanlɩ yɛ a, na ɩva dɩyɛ bela mɔɔ yehyinyia na yɛahɔ zʋ yɛawʋwa nnwʋanlɩ nu ɩma yɛ. (Yik. 4:11) Ɩdɩ nɔhʋanlɛvʋlɔ. (Yik. 15:4) Mɔɔ ɩyɛ bela nɩ yɛ bʋwɔ, na ididi yɩ anʋhʋba zʋ mmɩlɩ munwala. (Dwh. 23:14) Ɩáyɛ nnwʋánlɩ kɛɛ nkɔmɩhyɛnii Gyɛlɩmaya hanlɩ Gyehova nwʋ odwokɔ kɛɛ: “Wɔ amanlɩ amanlɩ yɩ bɛ nɣɛlɛbɛmaa munwatĩĩ nu nɩɩ bo bulombunlililɛ munwatĩĩ nu nɩ, abiyela íni kɛnɩ mɔɔ ɩdɩ kɛɛ mɔwʋ”! (Gyɛ. 10:​6, 7) Meti, yɛwɔ sianti baaba sʋ̃maa ti mɔɔ ɩsɛ kɛɛ yebu yɛ sʋlɔ Ɛzɩlɛ nɩ. Naasʋ̃ yɛáwu Gyehova la, mfomi yɛdɔ yɩ sʋ̃.

 6. Mɩnla ti mɔɔ yɛdɔ Gyehova a?

⁶ Yɛhyɛ Gyehova animinyiamɩ iluwakɛɛ yɛdɔ yɩ paa. Bɛmá yehila Gyehova yi subanɩ azʋlɔtʋ mɔɔ ɩma yɛdɔ yɩ nɩ be. Ɩda nwɔkɛnwʋnlɛ nɩɩ kunlumiyɩbalɛ ali. (Ndw. 103:13; Ayɩ. 49:15) Sɛ yedii ɛyɛkɛ a, yɩzayɩ sʋ̃ idi ɛyɛkɛ. (Zak. 2:8) Ɩma ɩyɛ mɛlɛkɛ kɛɛ yekeɣike yi na yɛava yɩ Ɔhɔnwʋ. (Ndw. 25:14; Egy. 17:27) Ɩkã yɩ nwʋ azɩ sʋ̃; “ɩkã yi nu azɩ ikila sʋlɔ nɩɩ azɩlɛ yɩ zʋ, na ipigyia enii mɔɔ yɩ nwʋ yɛ nwɔkɛ nɩ wɔ ndudulubo nu.” (Ndw. 113:​6, 7) Iluwa sianti eyimmɔ ti, yɛpɛ kɛɛ yɛhyɛ yɛ Nyamɩnlɩ kezile yi nɩ animinyiamɩ.—Ndw. 86:12.

 7. Mɩnla ɔnwʋmɔ ɔhʋanɩ sʋnʋnkʋ̃ yɛ yɛwɔ a?

⁷ Yɛhyɛ Gyehova animinyiamɩ iluwakɛɛ yɛpɛ kɛɛ mmenii mvʋlɔ nwʋ yɩ. Mmenii sʋ̃maa bézi nɔhʋanlɛ mɔɔ ɩfalɩ Gyehova nwʋ. Mɩnla ti a? Iluwakɛɛ Setanɩ izi bɛ adwɩnɩ anyɩ iluwa  awohwi ndwokɔ mɔɔ ɩkã ɩfalɩ Gyehova nwʋ mɔɔ mmenii sʋ̃maa bele beli nɩ zʋ. (2 Kɔl. 4:4) Setanɩ ma mmenii sʋ̃maa bele beli kɛɛ Gyehova yi ti nu yɛ sɩ, ɩádwɩnɩ yɛ nwʋ, na amanɩyɛ mɔɔ yɛnwʋʋ yɩ nɩ numɔ sʋ̃maa zʋ̃ mɛyɩ. Naasʋ̃ yezi nɔhʋanlɛ mɔɔ ɩfalɩ yɛ Nyamɩnlɩ yɩ nwʋ nɩ! Yɛwɔ ɔnwʋmɔ ɔhʋanɩ kɛɛ yɛkɛma mmenii kɔnwʋ Nyamɩnlɩ kʋ̃ mɔɔ ɩdɩ na yɛawʋwa bɛ ma bɔnlʋmmɔ sʋ̃ bɛahyɛ yɩ animinyiamɩ. (Ayɩ. 43:10) Ndwomi 96 twɩ̃ adwɩnɩ siye kezimɔ yɛkɛhyɛ Gyehova animinyiamɩ nɩ zʋ. Mmɩlɩ mɔ yesunzuu ndwomi eyi nu ndwokɔ be nwʋ nɩ, dwɩnɩ kezimɔ ɛkɛva animinyiamɩ mɔɔ ɩfata Gyehova ɛkɛma yɩ nɩ nwʋ.

KƐ ƖKƐYƐ NA YƐAVA ANIMINYIAMƖ MƆƆ ƖFATA GYEHOVA NƖ YƐAMA YƖ A?

 8. Ahʋanɩ mɔɔ yeduwa zʋ yɛhyɛ Gyehova animinyiamɩ nɩ, numɔ ɔkʋ̃ yɛ lɛ mɩnla a? (Ndwomi 96:​1-3)

⁸ Kɩnga Ndwomi 96:​1-3. Yeduwa mɔɔ yɛkã yɛfalɩ Gyehova nwʋ nɩ zʋ yɛhyɛ yɩ animinyiamɩ. Wɔ ɛhɛlɛlɛdwokɔ eyi nu nɩ, bɛkã bekile Gyehova yi mmenii kɛɛ “bɔdʋ́ ndwomi bɛma Gyehova,” “bɛyɩ́ yi dima ayɛlɛ,” “bɛhã yɩ nnwʋanlɩlelɛ nwʋ odwokɔba yɩ,” na “bɛhã yɩ animinyiamɩ behile amanlɩ amanlɩ yɩ.” Eyimmɔ munwala dɩ ahʋanɩ mɔɔ sa yɛkʋla yeduwa zʋlɔ yɛhyɛ yɛ sʋlɔ Ɛzɩlɛ yɩ animinyiamɩ. Gyehova yɩ azʋ̃mɩvʋlɔ mɔɔ bɔwʋwalɩ azɩ wɔ ɔwɔkɩ nɩ, nɩ bɔ nwʋ pɩlɩ bɛ kɛɛ bɛkɛhã nninyeniba mɔɔ Gyehova ɩyɛ ɩma bɛ nɩɩ yi subanɩ ngɩnlɩma yɩ nwʋ odwokɔ kehile mmenii mvʋlɔ. (Da. 3:​16-18; Egy. 4:29) Kɛ ɩkɛyɛ na yɛazumazuma bɛ a?

9-10. Mɩnla yɛ yesuma wɔ Angelena yi ozumanlɛnwʋnlɛ yɩ nu a? (Kila mfonyini yi sʋ̃.)

⁹ Bɛmá yehila eliyema baalɛ be mɔɔ ɩda United States mɔɔ bɔfʋlɔ yɩ Angelena a yi ozumanlɛnwʋnlɛ yɩ. Ɩzʋ̃ akɛnɣazɩzɩbɛ nu ilili Gyehova nwʋ dasɩlɛ wɔ yi egyima nu. Nɩ banzɛmɔ Angelena ɩhɔ egyima yɩ nu fʋlɔ a. Meti wɔ meeting be tʋ nɩ, bɔvʋlɔlɩ mɛyɩ nɩɩ mmenii mvʋlɔ mɔɔ bɛɣalɩ egyima yɩ nu a ɩlɛ́kyɛlɩ nɩ kɛɛ, bɛhã bɔ nwʋ odwokɔ ɛgyɩkɩ̃ɩ̃ behilé egyimayɛlɛmaa nɣalɩyɛ nɩ. Angelena yɛlɩ kɛɛ ɩkɛva mfonyini azʋlɔtʋ be kehile bɛ na bɛanwʋ kɛɛ yɩ anyɩ de kɛɛ ɩdɩ Gyehova Dasɩvʋlɔ. Naasʋ̃ ansaana ikodwu yɩ zʋ ma ɩkɛdɩndɛ nɩ, abɩlantɩyɛ be dwodwuli hanlɩ kɛɛ bɛdɩdɩlɩ yɩ kɛɛ Gyehova Dasɩvʋlɔmaa bo nu ɔkʋ̃. Akʋ̃ ɩwɔlɩ yɩ tʋ kɛɛ ɩkãã Gyehova Dasɩvʋlɔmaa nɩɩ ye dedi nwʋ ndwokɔ tanɩ. Angelena kã kɛɛ: “Ɛkɛnɩ la mu kunlu duli. Naasʋ̃ nɩ  mizi kɛɛ mɔɔ ɩkãã ɩfalɩ Gyehova nwʋ nɩ ɩ́dɩ nɔhʋanlɛ. Meti mɩhã mihileli mʋ nwʋ kɛɛ: ‘Mʋlɔ́kʋla kɛhã mu munwa mikediã numɔ. Ɩsɛ kɛɛ mɩma bɔnwʋ kezimɔ Gyehova dɩ ankasa.’”

¹⁰ Abɩlantɩyɛ yi munwa dɔlɩ la pɛ, yɛ Angelena wɔlɩ mpayɩ sikalɛ be wɔ yi ti nu a. Akʋ̃ ɩzʋ̃ abʋtalɩ nu ɩhã ihileli yi kɛɛ: “Mʋ nwʋ ndwokɔ ɩyɛɛ kɛyɛ kɛɛ wʋ dɩyɛ yɩ la. Mɩzamɩ sʋ̃ bɛdɩdɩlɩ mɩ kɛɛ Gyehova Dasɩvʋlɔmaa bo nu ɔkʋ̃, na nnɛ munwala mɩdɩ Dasɩvʋlɔ.” Nɩ ɩ́la azɩ dɩyɛ, naasʋ̃ Angelena ɩzʋ̃ abʋtalɩ nu ɩvalɩ mfonyini azʋlɔtʋ mɔɔ ikile kɛɛ ɩ nɩɩ yɩ ɔhɔnwʋmmɔ bɛlɛ anyɩnlɩlelɛ bɔsʋ̃mɩɩ Gyehova ihileli egyimayɛlɛmaa nɩ na ɩzʋ̃ annidi nu ɩhanlɩ yi dedi nwʋ odwokɔ. (1 Pit. 3:15) Mɩnla yɛ ɩzʋ̃ numɔ ɩɣalɩ a? Angelena dɩndɛlɩ wieli nɩ, nɩ abɩlantɩyɛ yɩ nwʋ igo yɩ. Ɩhanlɩ ozumanlɛnwʋnlɛ azʋlɔtʋ be po mɔɔ ɩyɛ anyɩnlɩlelɛ mɔɔ inyianlɩ wɔ yi nnwuakula nu mmɩlɩ mɔ nɩ ɩsʋ̃mɩ Gyehova nɩ nwʋ odwokɔ. Angelena kã kɛɛ: “Ɩfata kɛɛ yedi Gyehova nwʋ dasɩlɛ. Ɩdɩ ɔnwʋmɔ ɔhʋanɩ kɛɛ yɛkɛhã yɩ nwʋ nɔhʋanlɛ odwokɔ.” Amɩyɛ sʋ̃, yɛwɔ ɔnwʋmɔ ɔhʋanɩ kɛɛ yɛkɛyɩ Gyehova ayɛlɛ na yɛahyɛ yɩ animinyiamɩ wɔ mmɩlɩ po mɔɔ mmenii mvʋlɔ da yɩ ali kɛɛ bɛáwu yi nɩ.

11. Ɔzʋmɩ ɔwɔkɩ nɩ, mɩnla ɔhʋanɩ zʋ yɛ Gyehova azʋ̃mɩvʋlɔ nɔhʋanlɛmaa bɛva odwokɔ mɔɔ ɩwɔ Ndwomi 96:8 nɩ bɛyɛ egyima a?

¹¹ Kɩnga Ndwomi 96:8. Sa yɛkʋla yɛfa yɛ nnwʋnlamɩ ɔfʋã nu nninyeni yɛhyɛ Gyehova animinyiamɩ. Ɔzʋmɩ ɔwɔkɩ munwala, Gyehova azʋ̃mɩvʋlɔ nɔhʋanlɛmaa bɛva bɔ nnwʋnlamɩ ɔfʋã nu nninyeni bɛhyɛ Gyehova animinyiamɩ. (Ɛɣɛ. 3:9) Kɛ ndianwʋ nɩ, Yizilayamaa nɩ valɩ bo ozukua nɩɩ nninyeni mɔɔ ɩtʋ bʋlɔ wʋwalɩ ma begyinanlɩ asɔlɩ pika yɩ na beziyeziyeli. (2 Aw. 12:​4, 5; 1 Mm. 29:​3-9) Kɩlayɩsɩ yɩ mɛdalilɛmaa mɔɔ nɩ bo kunlu dɩyɛnɛ nɩ valɩ “mɔɔ bɛlɛ yɩ nɩ” wʋwalɩ Gyisɛsɩ nɩɩ yɩ asʋ̃mavʋlɔ yɩ. (Lk. 8:​1-3) Tɩɩtɩɩ Kilisinyiamaa yɩ sʋ̃ yɩlɩ fʋtʋlɔ hɔ wʋwalɩ be mmeliyema mmenyia nɩɩ mmaalɛ mɔɔ nɩ bɔ nwʋ hyɩlɩ bɛ nɩ. (Egy. 11:​27-29) Nnɛ, sa amɩyɛ sʋ̃ yɛkʋla yeduwa fʋtʋlɔ mɔɔ yɛzʋ̃ yɛ ahʋnlɩnɩ nu yɛyɩ nɩ zʋ yɛhyɛ Gyehova animinyiamɩ.

12. Mɩnla ɔhʋanɩ zʋ yɛ yɛ fʋtʋlɔ azʋlɔtʋ nɩ hyɛ Gyehova animinyiamɩ a? (Kila mfonyini yi sʋ̃.)

¹² Bɛmá yehila ozumanlɛnwʋnlɛ ɔkʋ̃ be mɔɔ ɩma yɛnwʋ kɛɛ yɛ fʋtʋlɔ azʋlɔtʋ nɩ hyɛ Gyehova animinyiamɩ. Wɔ 2020 nɩ, ɛpɛ kezile be zili wɔ Zimbabwe, na ɩhyɛlɩ paa ansaana nzulo badwu. Eyi manlɩ alɩyɛ nwʋ yɛlɩ sɩ paa, na kɔmɩ lʋsalɩ mmenii abʋmɩ abʋmɩ sʋ̃maa mɔɔ  nɩ eliyema baalɛ be mɔɔ bɔfʋlɔ yɩ Prisca kɩnla nwʋ. Ɩwɔ numɔ kɛɛ nɩ ɩ́la azɩ dɩyɛ, naasʋ̃ Prisca hɔlɩ zʋlɔ lili yɩ nhyɩhyɛlɩyɛ mɔɔ nɩ ɩfa ɩkɔ dasɩlɛlilɛ Manlɩ nɩɩ Yalɛ bela nɩ zʋ, wɔ mmɩlɩ po mɔ nɩ bɛfa boduwa alɩyɛ nɩ. Nɩ sɛ yɩ apaa yi nu maa bɔnwʋ kɛɛ ɩákɔ ɔwʋlɔtʋ na iluwaa dasɩlɛlilɛ nu a, nɩ bedii yɩ nwʋ nwɔwɩ. Nɩ bɛkã kɛɛ, “Mɔwʋ, kɔmɩ bahũ wʋ.” Nɩ Prisca zʋ̃ anwʋlazʋ nu kã kile bɛ kɛɛ, “Gyehova lɛ́manlɩ yɩ azʋ̃mɩvʋlɔ bɛ sa lésili azɩ kyɩ̃.” Ɩákyɛ bela, yɛ ahyɩhyɛdɩ yɩ valɩ nninyeni hɔ wʋwalɩ mɛyɩ nɩɩ mmeliyema mɔɔ bɔwɔ kɛnɩ nɩ. Yɛ ahyɩhyɛdɩ yɩ hʋla yɛlɩ eyi iluwa fʋtʋlɔ mɔɔ yɛyɩ nɩ ti. Ɩyɛlɩ Prisca yɩ apaa yi nu maa yɩ nnwʋánlɩ na bɛhã behileli yi kɛɛ, “Amba, Nyamɩnlɩ lɛ́manlɩ wʋ sa lésili azɩ kyɩ̃, meti yɛpɛ kɛɛ yesuma sʋ̃maa yɛfalɩ yɩ nwʋ.” Bo nu asunwa wɔlɩ yɩ tʋ kɛɛ bɔkɔɔ dɩyɛzumanlɛ.

13. Kɛ ɩkɛyɛ na yɛava yɛ nyɛlɩyɛ yɛahyɛ Gyehova animinyiamɩ a? (Ndwomi 96:9)

¹³ Kɩnga Ndwomi 96:9. Sa yɛkʋla yɛfa yɛ nyɛlɩyɛ yɛhyɛ Gyehova animinyiamɩ. Azɔfʋ mɔɔ nɩ bɔsʋ̃mɩ Gyehova wɔ asɔlɩ aliyia yɩ nu nɩ, nɩ ihyinyia kɛɛ bɛma bɔ nwʋ tɩ wɔ nnwʋnlamɩ ɔfʋã nu. (Ɛkɩ. 40:​30-32) Naasʋ̃, mɔɔ ihyinyia kʋlaa ɩtɛla nnwʋnlamɩ ɔfʋã nu anwʋdɩlɛ yɛ lɛ nyɛlɩyɛ mɔɔ nwʋmɔ tɩ. (Ndw. 24:​3, 4; 1 Pit. 1:​15, 16) Ihyinyia kɛɛ yɛbɔ mmɔdɩnɩ yɛyɩ “subanɩ dadampɔ nɩ,” kile kɛɛ, subanɩ nɩɩ nyɛlɩyɛ evinli bela yekua, na yewula “subanɩ fʋlɔ yɩ,” mɔɔ ikile ye nzunzunlɩyɛ nɩɩ yɛ nyɛlɩyɛ mɔɔ yɛkɛma ɩ nɩɩ Gyehova yi subanɩ ngɩnlɩma yɩ keyiyia nɩ. (Kɔl. 3:​9, 10) Gyehova kɔhʋla kɔwʋwa abiye mɔɔ yɩ ɛbɩla zɩkɛ kʋlaa anzɛnyɩɩ ɩyɛ basabasa nɩ ma ɩkɛzɩnza na iawula subanɩ fʋlɔ yɩ.

14. Mɩnla yɛ osuma wɔ Jack yi ozumanlɛnwʋnlɛ yɩ nu a? (Kila mfonyini yi sʋ̃.)

¹⁴ Bɛmá yehila Jack yi ozumanlɛnwʋnlɛ yɩ. Nɩ ɩyɛ basabasa na yɩ nwʋ yɛ ɛyɛlɛ, na nɩ bɔfʋlɔ yɩ po kɛɛ Abɔnsamɩ. Iluwa nninyeni tanɩ mɔɔ nɩ ɩyɛ nɩ ti, bowuli yi owulo ɔfɔ. Naasʋ̃ mmɩlɩ mɔ nɩ ɩdɩkɛɛ eɣile mɔɔ bɛkɛva bokohũ yi nɩ, Jack leli dianlɩ numɔ kɛɛ eliyema be mɔɔ ɩta ɩba fiyiadɩ kɛnɩ nɩ, ɩ nɩɩ yɩ zuma Bayɩbʋlʋ yɩ. Ɩávalɩ nwʋmɔ kezimɔ nɩ Jack dɩ nɩ, ɩhʋla ɩyɩlɩ yi subanɩ dadampɔ nɩ igualɩ, na ɩákyɛ yɛ bonlumanlɩ yɩ a. Nɩ Jack yi subanɩ zɩnza kʋlaa, meti eɣile mɔɔ bokohũũ yi nɩ, nɩ fiyiadɩ zʋ ehilalɛmaa yɩ bo nu be bosũũ. Sogyianii be mɔɔ nɩ ɩyɛ egyima wɔ fiyiadɩ kɛnɩ nɩ hanlɩ kɛɛ: “Mmɩlɩ be, nɩ Jack yɛ yi  subanɩ dɩbɛ kʋlaa wɔ kɩ a. Naasʋ̃ kakɩ yɩ, bɛkãã mmenii mɔɔ bo subanɩ dɩ baaba paa a, ɩkɩnla nwʋ.” Bohunli Jack yɩ dapɛnɩ mɛda nɩ, mmeliyema yɩ zialɩ hɔlɩ fiyiadɩ kɛnɩ kɛɛ bɛkɛyɛɛ dɩyɛzumanlɛ mɔɔ bɛyɛ yɩ dapɛnɩ bela nɩ. Bɔnwʋnlɩ pilizianii be mɔɔ nɩ ɩdɩ yɩ mmɩlɩ mɔ ili bɔmʋnlɩ mɔɔ ɩbaa dɩyɛzumanlɛ yɩ be. Mɩnla yɛ ɩhanlɩ yɩ ma ɩɣalɩ ebiye a? Kezimɔ Jack zɩnzanlɩ yi subanɩ nɩ yɛ ɩhanlɩ yɩ a, meti nɩ ɩpɛ kɛɛ ɩnwʋ mɔɔ ihyinyia kɛɛ ɩyɛ na ɩahʋla ɩazʋ̃mɩ Gyehova. Amba, yɛ nyɛlɩyɛ kɔhʋla kɛhyɛ yɛ sʋlɔ Ɛzɩlɛ yɩ animinyiamɩ!—1 Pit. 2:12.

MƖNLA ƆHƲANƖ ZƲ YƐ GYEHOVA KƐHYƐ YI DIMA ANIMINYIAMƖ WƆ EƔILE BE A?

15. Mɩnla ɔhʋanɩ zʋ yɛ Gyehova kɛhyɛ yi dima animinyiamɩ kʋlakʋla wɔ eɣile be a? (Ndwomi 96:​10-13)

¹⁵ Kɩnga Ndwomi 96:​10-13. Ndwomi 96 yɩ awielɩyɛ kã Gyehova nwʋ odwokɔ kɛɛ, ɩdɩ Ndɛnɩwuwalɛvʋlɔ nɩɩ Bulombunli mɔɔ ɩtɩnɣɛ. Mɩnla ɔhʋanɩ zʋ yɛ Gyehova kɛhyɛ yi dima animinyiamɩ wɔ eɣile be a? Iluwa yɩ ndɛnɩwuwalɛ yɩ zʋ. Ɩlɛ́kyɛ ɩkɛyɩ Babilɔnʋ Kezile yi mɔɔ ɩsɩkɛɛ yi dima nɩ wɔ kɛnɩ. (Yik. 17:​5, 16; 19:​1, 2) Bɛzabɛ mɔɔ bɔkɔnwʋ kɛɛ bɛsɩkɛɛ Babilɔnʋ Kizile yi nɩ, ebiye a bo nu be kɛɣa kɛhɩnla yɛ nwʋ ma yɛkɔzʋ̃mɩ Gyehova. Awielɩyɛ kʋlaa nɩ, Gyehova kɛzɩkɛ Setanɩ yi oyuwadɩ tanɩ yɩ nɩɩ bɛzabɛ mɔɔ botwodwu betiyia mɛyɩ Gyehova na bɛsɩkɛ yi dima nɩ wɔ Amagadɔnʋ, naasʋ̃ sa ide bɛzabɛ mɔɔ bɔdɔ yɩ na betiye yi na bɛ anyɩ de kɛɛ bɛkɛhyɛ yi dima animinyiamɩ nɩ. (Mk. 8:38; 2 Tɛs. 1:​6-10) Odwohilalɛ mɔɔ itualɩ yɩ tʋ mɔɔ ɩkɛɣa wɔ Kɩlayɩsɩ yɩ Ɔlʋbɔ Abʋmɩ Tumililɛ yɩ mɛda nɩ, nɩ Gyehova dɩ yi dima nwʋ kʋlakʋla. (Yik. 20:​7-10) Ɔzɔ mmɩlɩ nɩ, “Gyehova yɩ animinyiamɩ nwʋ nnimidi kɛhyɛ azɩlɛ yɩ zʋ manlɩ kɛmɔ nzulo kɩda ngyemvile zʋ nɩ.”—Hab. 2:14.

16. Mɩnla yɛ ezi wʋ kɛnɣa kɛɛ ɛkɛyɛ a? (Kila mfonyini yi sʋ̃.)

¹⁶ Kila kezimɔ ɩkɛyɛ anyɩnlɩlelɛ mmɩlɩ mɔ abiyela mɔɔ ɩda azɩ nɩ kɛva animinyiamɩ mɔɔ ɩfata Gyehova yi dima nɩ kɛma yɩ nɩ! Naasʋ̃ kɔbʋmɩ kɛɛ ɔzɔ mmɩlɩ nɩ kɛɣa nɩ, sa yɛkʋla yɛfa ɔnwʋmɔ ɔhʋanɩ bela mɔɔ yekenyia nɩ yɛhyɛ yɛ Nyamɩnlɩ nɩ animinyiamɩ. Mɔɔ ɩkɔwʋwa yɛ ma yɛkɔnwʋ kɛɛ eyi dɩ asɛdɩ mɔɔ nwʋmɔ hyinyia nɩ, Ɔhʋanɩhilelɛ Okuwu nɩ ɩyɩ Ndwomi 96:8 kɛɛ yɛ ɔlʋbɔ odwokɔ ma 2025: “Bɛvá animinyiamɩ mɔɔ ɩfata Gyehova yi dima nɩ bɛma yɩ.”