1. Mɩnla yɛ yɛkɔhʋla kɛyɛ na Gyehova yɩ anyɩ iale a?

 FA YƖ kɛɛ ɛva akyɛdɩ sʋnʋnkʋ̃ be mɔɔ ɩyɛ pɩkɛ na mfasʋ wɔ zʋlɔ ɛma abiye mɔɔ ɔdɔ yɩ paa. Sɛ ɛba ɔnwʋ yɩ kɛɛ ɩva akyɛdɩ yɩ iwula alɩka be nu ɩdʋ yɩ adwɩnɩ nu a, ɩkɛma ekeli ɛyɛkɛ paa! Naasʋ̃ sɛ ɔnwʋ yɩ kɛɛ ɩlɛ akyɛdɩ eyi idii egyima bʋwɔ na ihile nwʋmɔ anyɩnlɩzɔlɛ a, ɩkɛma wʋ anyɩ kele paa. Kɛ ndianwʋ eyi falɩ elelɛdɩyɛ nɩ nwʋ ise a? Gyehova manlɩ yɩ ɣa Gyisɛsɩ wuli manlɩ yɛ. Sɛ yekile akyɛdɩ mɔɔ ɩtʋ bɔlɔ eyi nɩɩ ɔlɔlɛ mɔɔ ɩhanlɩ Gyehova ma ɩvalɩ akyɛdɩ mɔɔ ɩdɩ zɔ ɩmanlɩ yɛ nɩ nwʋ anyɩnlɩzɔlɛ a, kila kezimɔ Gyehova anyɩ kele!—Dwɔ. 3:16; Wul. 5:​7, 8.

 2. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Mmɩlɩ kɔlɩ zʋlɔ nɩ, yɛákila bʋwɔ a, kezimɔ elelɛdɩyɛ akyɛdɩ yɩ tʋ bʋlɔ ma yɛ nɩ kɛhã azɩ. Eyi kɛyɛ kɛɛ mɔɔ yɛva Nyamɩnlɩ yɩ akyɛdɩ mɔɔ ɩtʋ bʋlɔ eyi yewula alɩka be nu mɔɔ yɛádwɩnɩ nwʋmɔ po. Sɛ yɛábɛ kɛɛ eyi kezi a, nɩ ɩsɛ kɛɛ eɣile bela yɛdwɩnɩndwɩnɩɩ mɔɔ Nyamɩnlɩ nɩɩ Gyisɛsɩ bɛyɛ bɛma yɛ nɩ nwʋ. Na dɩyɛzumanlɛ eyi kɔhʋla kɔwʋwa yɛ ma yɛkɔhʋla yɛkɛyɛ zɔ. Sa yesunzu kezimɔ yekenyia elelɛdɩyɛ nɩ zʋ mfasʋ wɔ nnɛ nɩɩ kezimɔ yekenyia zʋlɔ mfasʋ wɔ eɣile be sʋ̃ nɩ nwʋ. Akʋ̃ sʋ̃, yekozunzu kezimɔ yekehile anyɩnlɩzɔlɛ yɛkɛma Gyehova, titili wɔ Ɛhakɛlɛlilɛ mmɩlɩ eyi nu.

KEZIMƆ YENYIA ZƲLƆ MFASƲ NNƐ

 3. Mfasʋ mɔɔ elelɛdɩyɛ yɩ ma yenyia wɔ nnɛ nɩ, numɔ ɔkʋ̃ yɛ lɛ mɩnla a?

³ Nnɛ po yenyiaa Kɩlayɩsɩ yɩ elelɛdɩyɛ afɔlɩ yɩ zʋ mfasʋ. Kɛ ndianwʋ nɩ, iluwa elelɛdɩyɛ nɩ ti, Gyehova fa yɛ tanɩ kyɛ yɛ. Ɩ́dɩ nhyɛ kɛɛ ɩkɛva yɛ tanɩ kɛhyɛ yɛ, naasʋ̃ ɩpɛ kɛɛ ɩfa ɩkyɛ yɛ. Ndwomidʋlɛvʋlɔ yɩ valɩ anyɩnlɩzɔlɛ dʋlɩ ndwomi kɛɛ: “O Gyehova, ɛdɩyɛnɛ na ɔwɔ ɛpɛ kɛɛ ɛkɛva tanɩ kɛhyɛ.”—Ndw. 86:5; 103:​3, 10-13.

 4. Aninyiammɔ ti yɛ Gyehova valɩ elelɛdɩyɛ yɩ manlɩ a? (Luuku 5:32; 1 Timoti 1:15)

 ⁴ Abiyemmɔ kɛdɩ nɣanlɩ kɛɛ bɛávata kɛɛ Gyehova kɛva bɛ tanɩ kɛhyɛ bɛ. Nɔhʋanlɛ nu nɩ, yɛ munwala yɛávata kɛɛ bɛfa yɛ tanɩ bɛkyɛ yɛ. Sʋ̃mavʋlɔ Pɔɔlʋ po hanlɩ kɛɛ, “Mɩávata kɛɛ bɔkɔvʋlɛ mɩ sʋ̃mavʋlɔ.” Naasʋ̃, ɩva ɩhɩnlanlɩ nwʋmɔ kɛɛ: “Iluwa Nyamɩnlɩ yɩ adʋmɩ nɩ ti, yɛ nnɛ mɩdɩ kɛmɔ mɩdɩ yɩ a.” (1 Kɔl. 15:​9, 10) Sɛ yenu yɛ nwʋ wɔ yɛ tanɩ nwʋ a, Gyehova ɩfa yɛ tanɩ ɩkyɛ yɛ. Mɩnla ti a? Kɛ ebiye a yɛfata ti a, mfomi iluwakɛɛ ɩdɔ yɛ. Sɛ edii ɛyɛkɛ iluwakɛɛ ɛtɩ nɣanlɩ kɛɛ wʋávata kɛɛ Gyehova kɛva wʋ tanɩ kɛhyɛ wʋ a, kakɛ kɛɛ Gyehova ɩáfa elelɛdɩyɛ nɩ ɩma mmenii mɔɔ bedi munli, mfomi ɩva ɩmanlɩ tanɩyɛlɛmaa mɔɔ bedi bɛ tanɩ nwʋ ɛyɛkɛ na bɛpɛ kɛɛ bɛsɩnza nɩ.—Kɩnga Luuku 5:32; 1 Timoti 1:15.

 5. Asʋ̃ ye nu be kɔhʋla kɛva yɩ sa kezi yɩ kɛnɣa kɛhã kɛɛ ɩfata Gyehova yɩ nwɔkɛnwʋnlɛ a? Kilehile numɔ.

⁵ Sɛ yɛva alʋbɔ sʋ̃maa yɛzʋ̃mɩ Gyehova po a, ye nu bela íni kɛnɩ mɔɔ ɩkɔhʋla kɛva yɩ sa kezi yɩ kɛnɣa kɛhã kɛɛ, ɩfata kɛɛ Gyehova nwʋ yɩ nwɔkɛ. Ɩwɔ numɔ, Gyehova anyɩ sɔ mɔɔ yɛyɛ yɛma yɩ nɩ munwatĩĩ. (Hib. 6:10) Ɩvalɩ elelɛdɩyɛ nɩ ɩhyɛlɩ yɛ mbʋanlɩ, ɩáfa ɩma yɛ kɛɛ ɩlɛ ituwaa ɔzʋ̃mɩnlɛ mɔɔ yɛfa yɛma yɩ nɩ nwʋ kakɛ. Sɛ yɛkã kɛɛ yɛ mmɔdɩnɩwɔlɛ ti ɩsɛ kɛɛ ɩnwʋ yɛ nwɔkɛ a, nɩ ɩdɩ kɛɛ mɔɔ yɛkãã kɛɛ mfasʋ bela íni Kɩlayɩsɩ yi owulo yi zʋ.—Fa tindiã Galatiyiamaa 2:21 nwʋ.

 6. Mɩnla ti mɔɔ Pɔɔlʋ yɛlɩ sʋ̃maa wɔ Gyehova yɩ ɔzʋ̃mɩnlɛ nu a?

⁶ Nɩ Pɔɔlʋ zi kɛɛ ɩávalɩ nwʋmɔ mmɔdɩnɩ bela mɔɔ ɩkɔwɔ wɔ Gyehova yɩ ɔzʋ̃mɩnlɛ nu nɩ, kɛ mɛyɩ yɛ Gyehova kegyina zʋlɔ kɛva yɩ tanɩ kɛhyɛ yɩ a. Sɛ ɔzɔ a, nɩ mɩnla ti mɔɔ ɩyɛlɩ sʋ̃maa wɔ Gyehova yɩ ɔzʋ̃mɩnlɛ nu a? Kɛ ebiye a nɩ ɩyɛɛ kɛva kehile kɛɛ ɩfata, mfomi ɩyɛlɩ ɩva ihileli Gyehova yi kunlumiba nɩɩ yɩ nwɔkɛnwʋnlɛ nwʋ anyɩnlɩzɔlɛ. (Ɛfɩ. 3:7) Dɩkɛɛ Pɔɔlʋ nɩ, amɩyɛ sʋ̃ yɛyɛ sʋ̃maa wɔ Gyehova yɩ ɔzʋ̃mɩnlɛ nu, kɛ ebiye a yɛlɛ yekilee kɛɛ yɛfata a, mfomi yɛfa yekile yɩ nwɔkɛnwʋnlɛ nwʋ anyɩnlɩzɔlɛ.

 7. Mɩnla ɔhʋanɩ fʋlɔ zʋ sʋ̃ yɛ yenyia elelɛdɩyɛ yɩ zʋ mfasʋ wɔ nnɛ a? (Wulomimaa 5:1; Gyemisi 2:23)

⁷ Ɔhʋanɩ fʋlɔ sʋ̃ mɔɔ yenyia elelɛdɩyɛ yɩ zʋ mfasʋ wɔ nnɛ yɛ lɛ kɛɛ, ɩma yɛkʋla yɛ nɩɩ Gyehova nyia abusunwawɔlɛ mɔɔ numɔ yɛ sɩ. a Kɛmɔ yɛhanlɩ wɔ dɩyɛzumanlɛ mɔɔ ili eyi anyunu nɩ, bɔwʋlɩ yɛ nɩ, nɩ yɛ nɩɩ Nyamɩnlɩ yéni abusunwawɔlɛ bela. Naasʋ̃ iluwa elelɛdɩyɛ nɩ ti ɩma “yenyia azʋ̃nudwolɩyɛ wɔ Nyamɩnlɩ yɩ ɛkɛnɩ” meti ɩma yɛkʋla yebike yi.—Kɩnga Wulomimaa 5:1; Gyemisi 2:23.

 8. Mɩnla ti mɔɔ ɩsɛ kɛɛ yɛma yɛ anyɩ sɔ ɔnwʋmɔ ɔhʋanɩ mɔɔ Gyehova va ma yɛ kɛɛ yɛwɔ́ yɩ mpayɩ nɩ a?

⁸ Mpayɩwɔlɛ dɩ ɔnwʋmɔ ɔhʋanɩ sʋnʋnkʋ̃ mɔɔ yenyia iluwa ɔhɔnwʋvalɛ mɔɔ yɛ nɩɩ Gyehova wɔ nɩ ti. Kɛ mpayɩ mɔɔ yɩ asʋ̃mɩvʋlɔ bɔ mmɩlɩ mɔ beyiyia numɔ wɔ bagua nu nkʋ̃ la yɛ itiye a, mfomi itiye mpayɩ mɔɔ ye nu ɔkʋ̃ bela bɔ nɩ. Mpayɩwɔlɛ kʋla ma yɛ ahʋnlɩnɩ tɔ ye kunlu na ɩma yenyia azʋ̃nudwolɩyɛ, naasʋ̃ kɛ mɛyɩ nkʋ̃ yɛ lɛ mfasʋ mɔɔ yenyia wɔ zʋ a. Ɩkʋla sʋ̃ ɩma yɛ nɩɩ Nyamɩnlɩ avinli abusunwawɔlɛ nu yɛ sɩ. (Ndw. 65:2; Gye. 4:8; 1 Dwɔ. 5:14) Mmɩlɩ mɔ Gyisɛsɩ wɔ azɩlɛ yɩ zʋ nɩ, nɩ ɩta ɩbɔ mpayɩ iluwakɛɛ nɩ izi kɛɛ Gyehova kediye yi na ɩkɛma ɩ nɩɩ yɩ Zɩ bɛ avinli abusunwawɔlɛ nu kɛyɛ sɩ. (Lk. 5:16) Yɛ anyɩ sɔ paa kɛɛ iluwa Gyisɛsɩ yɩ afɔlɩ yɩ ti yɛkʋla yɛ nɩɩ Gyehova fa ɔhɔnwʋ na yɛ nɩɩ yɩ tɩndɛ wɔ mpayɩwɔlɛ nu!

KEZIMƆ YƐKƆHƲLA KENYIA ZƲLƆ MFASƲ WƆ EƔILE BE

 9. Mɩnla ɔhʋanɩ zʋ yɛ Gyehova asʋ̃mɩvʋlɔ nɔhʋanlɛmaa kenyia elelɛdɩyɛ yɩ zʋ mfasʋ wɔ eɣile be a?

⁹ Mɩnla ɔhʋanɩ zʋ yɛ Gyehova asʋ̃mɩvʋlɔ nɔhʋanlɛmaa kenyia elelɛdɩyɛ yɩ zʋ mfasʋ wɔ  eɣile be a? Bekenyia nnwʋanlɩ mɔɔ íni awielɩyɛ. Mmenii sʋ̃maa sunzu kɛɛ eyi ɩlɔ́kʋla kɛyɛ bʋwɔ iluwakɛɛ adasamaa wɔlɩ yɩ tʋ kɛɛ bowuu nɩ, kɛ nnɛba a. Naasʋ̃ nɩ Gyehova yi tile nu pɔkɔ ankasa yɛ lɛ kɛɛ adasamaa kɔwʋwa azɩ eɣile bela. Sɛ Adamɩ ɩáyɛ tanɩ a, ankɩ abiyela lényia adwɩnɩ kɛɛ yɛlɔ́kʋla kɔwʋwa azɩ daabaa. Ebiye a kakɩ yɩ, ɩkɛyɛ yɛ kɛɛ sa ɩyɛ sɩ kɛɛ yɛkɔwʋwa azɩ daabaa, naasʋ̃ sa yɛkʋla yede yedi iluwakɛɛ Gyehova valɩ yɩ Ɣa yɩ nnwʋanlɩ mɔɔ yɩ bʋlɔ yɛ sɩ tɛla dɩyɛ bela nɩ duwalɩ nwʋmɔ kakɛ na ama eyi ɩaɣa numɔ.—Wul. 8:32.

10. Mɩnla yɛ bɛzabɛ mɔɔ bɔvɔ ngɔlɔ bɛ nɩɩ mmuwuanɩ mvʋlɔ yɩ bekilaa yɩ ɔhʋanɩ a?

¹⁰ Ɩwɔ numɔ kɛɛ nnwʋanlɩ mɔɔ íni awielɩyɛ yɩ dɩ mfasʋ mɔɔ yekenyia yɩ wɔ eɣile be dɩyɛ, naasʋ̃ Gyehova pɛ kɛɛ yɛdwɩnɩndwɩnɩ nwʋmɔ wɔ nnɛ. Bɛzabɛ mɔɔ bɔvɔ ngɔlɔ bɛ nɩ bekilaa ɔhʋanɩ kɛɛ bɛ nɩɩ Kɩlayɩsɩ keli dɩyɛ wɔ sʋlɔ na bɛahila azɩlɛ yɩ zʋ. (Yik. 20:6) Mmuwuanɩ mvʋlɔ yɩ sʋ̃ bekilaa ɔhʋanɩ kɛɛ bɔkɔwʋwa paladayɩsɩ azɩlɛ yɩ zʋ, dɩka mɔɔ ozunɛ nɩɩ ɛyɛkɛlilɛ bela íni kɛnɩ. (Yik. 21:​3, 4) Asʋ̃ ɛkɩnla mmuwuanɩ mvʋlɔ mɔɔ bekilaa ɔhʋanɩ kɛɛ bɔkɔwʋwa azɩlɛ yɩ zʋ daabaa nɩ nwʋ a? Áma obu eyi kɛɛ ɩdɩ ɔnwʋmɔ ɔhʋanɩ mɔɔ ɩba azɩ! Gyehova wɔlɩ adasamaa kɛɛ bɔwʋwá azɩlɛ yɩ zʋ daabaa. Meti azɩlɛ yɩ zʋ wʋwalɛ kɛma yɛ anyɩ kele baaba paa.

11-12. Mɩnla nyilalɛ yɛ yɛkɔhʋla kehila yɩ ɔhʋanɩ wɔ paladayɩsɩ a? (Kila mfonyini yi sʋ̃.)

¹¹ Mɔwʋ tua nwʋmɔ mfonyini kila kezimɔ wʋ ɛbɩlawɔlɛ kɛyɛ wɔ Paladayɩsɩ azɩlɛ yɩ zʋ. Adimakɛlɛ anzɛnyɩɩ owulo nwʋ adwɩnɩndwɩnɩ ɩlɛ́ba kɛla wʋ zʋ dɔkʋ̃. (Ayɩ. 25:8; 33:24) Gyehova kɛva nninyeniba mɔɔ ɛpɛ yɩ munwala kɛma wʋ. Mɩnla nninyeni yɛ ɛkɛbɛ kɛɛ ɛkɛyɛ a? Asʋ̃ ɛkɛbɛ kɛɛ okozuma nnamɩ nɩɩ nnʋma nwʋ dɩyɛ a? Asʋ̃ ɛkɛbɛ kɛɛ okodudu ɔhʋanɩ kɔhɔ kehilahila nnɩka azʋlɔtʋ a? Anzɛnyɩɩ ɛkɛbɛ kɛɛ okozuma kezimɔ bɔdʋlɔ mfonyini a? Pɩlazunɛ bela íni nwʋmɔ kɛɛ yekehyinyia bɛzabɛ mɔɔ bɛyɛ aliyia yɩ planɩ, aliyiagyinanlɛmaa, nɩɩ bɛzabɛ mɔɔ bɛyɛ ɔwʋlɔtʋ egyima wɔ kɛ. Amba, yekehyinyia mmenii mɔɔ bokoluwa dɩyɛ na bɛayɛ alɩyɛ, mmenii mɔɔ bɛkɛyɛ nninyeni  mɔɔ bɛfa bɛyɛ egyima, nɩɩ mmenii mɔɔ bokoluwa fɩlawɛsɩ azʋlɔtʋ na bɛahila zʋlɔ. (Ayɩ. 35:1; 65:21) Iluwakɛɛ yɛkɔwʋwa azɩ daabaa nɩ ti, ekenyia mmɩlɩ sʋ̃maa kɛva kɛyɛ dɩyɛ bela mɔɔ ɛpɛ kɛɛ ɛyɛ nɩ.

¹² Sɛ mmɩlɩ twu kɛɛ yɛkɛma bɛzabɛ mɔɔ bodunwo bɛ wɔ owulo nu nɩ akwaaba a, ɩkɛyɛ anyɩnlɩlelɛ paa! (Egy. 24:15) Mɔwʋ kila kezimɔ wʋ anyɩ kele mmɩlɩ mɔ osumaa Gyehova yɩ abɔdɩ azʋlɔtʋ sʋ̃maa mɔɔ ɩyɛ nnwʋánlɩ nwʋ dɩyɛ nɩ. (Ndw. 104:24; Ayɩ. 11:9) Na mɔɔ ɩtɛla yi munwala nɩ, Gyehova ɔzʋ̃mɩnlɛ kɛyɛ anyɩnlɩlelɛ paa wɔ ɔzɔ mmɩlɩ yɩ, iluwakɛɛ yɛlɛ́yɛ tanɩ bela na yeléhyinyia tanɩfakyɛ sʋ̃! Asʋ̃ ɛkɛma wʋ “anyɩ ikeleli tanɩ nwʋ mmɩlɩ ɛgyɩkɩ̃ɩ̃ be” kɛva kɛzɩnza nyilalɛ eyimmɔ mɔɔ ekenyia yɩ wɔ eɣile be nɩ a? (Hib. 11:25) Ɛlɛ́yɛ zɔ! Nyilalɛ mɔɔ yekenyia yɩ wɔ oyuwadɩ fʋlɔ yɩ nu dɩ baaba kʋlaa tɛla dɩyɛ bela mɔɔ yekenyia wɔ oyuwadɩ eyi nu. Kakɛ kɛɛ, Paladayɩsɩ azɩlɛ yɩ ɩlɔ́kɔ zʋ kɛyɛ anyɩnlɩlazʋ mɔɔ yekila yɩ ɔhʋanɩ mmɩlɩ munwala. Mfomi ɩlɛ́kyɛ sa ɩba numɔ, ɩkɛyɛ dɩka mɔɔ yɛkɔwʋwa eɣile bela. Eyi munwatĩĩ kɛyɛ bʋwɔ iluwakɛɛ Gyehova dɔ yɛ na ɩmanlɩ yɩ Ɣa yɩ wuli manlɩ yɛ ti!

KILE KƐƐ WƲ ANYƖ SƆ GYEHVOA YƖ ƆLƆLƐ YƖ

13. Mɩnla ɔhʋanɩ zʋ yɛ yɛkɔhʋla kehile Gyehova yɩ ɔlɔlɛ nwʋ anyɩnlɩzɔlɛ a? (2 Kɔlɛntɩmaa 6:1)

¹³ Kɛ ɩkɛyɛ na yɛahile kɛɛ yɛ anyɩ sɔ elelɛdɩyɛ mɔɔ Gyehova va ma yɛ nɩ a? Ɩsɛ kɛɛ yɛma yɩ ɔzʋ̃mɩnlɛ nwʋ hyinyia yɛ wɔ yɛ ɛbɩlawɔlɛ nu. (Mt. 6:33) Gyisɛsɩ wuli “ama bɛzabɛ mɔɔ bɛda nnwʋanlɩ nu nɩ, bɛáwʋwalɩ bɛámanlɩ bɛzabɛ nkʋ̃ bɔ nwʋ. Na mfomi bɛawʋwa bɛama Gyisɛsɩ Kɩlayɩsɩ nɩ mɔɔ bɔnlʋmmɔ ti iwuli, na Nyamɩnlɩ idunwonli ɩɣalɩ nnwʋanlɩ nu ɩmanlɩ bɔnlʋmmɔ nɩ.” (2 Kɔl. 5:15) Yɛpɛ kɛɛ yɛyɛ mɔɔ yɛkɔhʋla bela yɛfa yɛsʋ̃mɩ Gyehova yɛfa yekile kɛɛ yɛtɩ mɔɔ ɩyɛ ɩma yɛ nɩ tʋ na yɛ anyɩ sɔ yɩ baaba paa.—Kɩnga 2 Kɔlɛntɩmaa 6:1.

14. Kɛ ɩkɛyɛ na yɛahile kɛɛ yɛwɔ dedi wɔ Gyehova yɩ ɔhʋanɩhilelɛ nu a?

¹⁴ Sa yɛkʋla sʋ̃ yekile kɛɛ yɛ anyɩ sɔ Gyehova yɩ ɔlɔlɛ yɩ iluwa yɩ ɔhʋanɩhilelɛ mɔɔ yekenyia numɔ dedi nɩ. Mɩnla ɔhʋanɩ zʋ a? Sɛ yesizii abɔkɔ azʋlɔtʋ be, dɩkɛɛ dɩka mɔɔ yɛkɔhɔ sukuulu yekodwu nɩɩ egyima kʋ̃ mɔɔ yɛkɛyɛ a, ɩsɛ kɛɛ yesunzu mɔɔ Gyehova kɛbɛ kɛɛ yɛkɛyɛ nwʋ. (1 Kɔl. 10:31; 2 Kɔl. 5:7) Sɛ yekyina ye dedi zʋ yesizi abɔkɔ azʋlɔtʋ a, ɩkɛma ye dedi kɛyɛ kezi na yɛ nɩɩ Gyehova avinli abusunwawɔlɛ yɩ nu kɛyɛ sɩ. Ɩma anyɩnlɩlazʋ mɔɔ yɛwɔ kɛɛ yɛkɔwʋwa azɩ daabaa nɩ yɛ kezi.—Wul. 5:​3-5; Gye. 2:​21, 22.

15. Sɛ itwu Ɛhakɛlɛlilɛ mmɩlɩ a, kɛ ɩkɛyɛ na yɛahile kɛɛ yɛ anyɩ sɔ elelɛdɩyɛ yɩ a?

¹⁵ Ɔhʋanɩ fʋlɔ lanwʋ la wɔ kɛnɩ mɔɔ sa yɛkʋla yeduwa zʋ yekile kɛɛ yɛ anyɩ sɔ Gyehova yɩ ɔlɔlɛ yɩ. Mɛyɩ yɛ lɛ kɛɛ yɛkɛva Ɛhakɛlɛlilɛ mmɩlɩ eyi yekehile Gyehova kɛɛ yɛ anyɩ sɔ elelɛdɩyɛ mɔɔ ɩva ɩma yɛ nɩ. Nhyɩhyɛlɩyɛ mɔɔ yɛzayɛ yɛkɛyɛ kɔhɔ Ɛhakɛlɛlilɛ yɩ la ahanlɩ a, ɩsɛ kɛɛ yɛtʋ salɛ yɛfʋlɔ mmenii mvʋlɔ ma bɛba ebiye. (1 Tim.  2:4) Mɔɔ ɩkɔhɔlɩ zʋlɔ wɔ Ɛhakɛlɛlilɛ yɩ tʋ nɩ, kilehile numɔ kile bɛzabɛ mɔɔ ɔkɔdʋ salɛ kɔvʋlɔ bɛ nɩ. Sɛ ɛfa Mɩnla Ti Mɔɔ Gyisɛsɩ Iwuli a? nɩɩ Bɛhakɛ́ Gyisɛsɩ Yi Owulo Nɩ vidiyo mɔɔ ɩwɔ jw.org zʋ nɩ kile bɛ a, ɩkɔwʋwa paa. Ɩsɛ kɛɛ asafʋ nu mbanimbani bɔ mmɔdɩnɩ tʋ salɛ fʋlɔ bɛzabɛ mɔɔ beyiaki dɩyɛzumanlɛhɔlɛ nɩ. Mɔwʋ kila anyɩnlɩlelɛ mɔɔ ɩkɛɣa sʋlɔ nɩɩ azɩlɛ yɩ zʋ mmɩlɩ mɔ Gyehova yi mmuwuanɩ mɔɔ beminli bezia bɛɣa asafʋ yɩ nu nɩ! (Lk. 15:​4-7) Wɔ Ɛhakɛlɛlilɛ yɩ tʋ nɩ, bɛmá yɛva yeziye yɛ anyɩ zʋ kɛɛ yelésema ye mmeliyema nkʋ̃, mfomi yekezema mmenii mvʋlɔ mɔɔ bɛkɛɣa kɛnɩ anzɛnyɩɩ bɛzabɛ mɔɔ beyiakili dɩyɛzumanlɛhɔlɛ a ɩhyɛ nɩ sʋ̃. Yɛpɛ kɛɛ yɛma bɛtɩ nɣanlɩ kɛɛ bɛɣa awudo!—Wul. 12:13.

16. Mɩnla ti mɔɔ ɩsɛ kɛɛ yesunzu nwʋmɔ kɛɛ yɛkɛyɛ sʋ̃maa wɔ dasɩlɛlilɛ nu wɔ Ɛhakɛlɛlilɛ mmɩlɩ yɩ nu a?

¹⁶ Asʋ̃ ɔkɔhʋla kɛyɛ sʋ̃maa wɔ ɔzʋ̃mɩnlɛ egyima yɩ nu wɔ Ɛhakɛlɛlilɛ mmɩlɩ yɩ nu a? Ɔzɔ mɔɔ yɛkɛyɛ nɩ dɩ ɔhʋanɩ kɩnlɩma mɔɔ sa yɛkʋla yeduwa zʋ yekile mɔɔ Nyamɩnlɩ nɩɩ Kɩlayɩsɩ bɛyɛ bɛma yɛ nɩ nwʋ anyɩnlɩzɔlɛ. Sɛ yɛyɛ sʋ̃maa wɔ Gyehova yɩ ɔzʋ̃mɩnlɛ nu a, yɩzayɩ sʋ̃ ɩkɔwʋwa yɛ, na mɛyɩ kɛma anwʋlazʋ mɔɔ yɛwɔ wɔ yi nu nɩ kɛyɛ kezi. (1 Kɔl. 3:9) Akʋ̃ sʋ̃, bɔ mmɔdɩnɩ di Ɛhakɛlɛlilɛ Bayɩbʋlʋ ɛɣɩngalɛ nwʋ nhyɩhyɛlɩyɛ mɔɔ ɩwɔ Kyerɛwnsɛm No Mu a Wobɛhwehwɛ Daa anzɛnyɩɩ dapɛnɩ avinli dɩyɛzumanlɛ kɛlɛta yɩ nu nɩ zʋ. Sɛ ɛpɛ po a sa ɔkʋla ɛfa Bayɩbʋlʋ ɛɣɩngalɛ yɩ be yɛ wʋzawʋ wʋ dɩyɛzumanlɛ anzɛnyɩɩ ɛbɩbɛlɛnu.

17. Mɩnla yɛ Gyehova pɛ kɛɛ yɛyɛ a? (Kila alɩka mɔɔ ise “ Mɔɔ Ɛkɛyɛ Kɛva Kehile Kɛɛ Wʋ Anyɩ Sɔ Gyehova Yɩ Ɔlɔlɛ Yɩ.”)

¹⁷ Ɩwɔ numɔ, ebiye a wʋ bʋwabɩlɛ ɩlɛ́ma ɔhʋanɩ ma ɛkɛyɛ nninyeni mɔɔ yɛhã nwʋmɔ odwokɔ wɔ dɩyɛzumanlɛ eyi nu nɩ munwatĩĩ. Naasʋ̃ kakɛ kɛɛ, Gyehova ɩáva mɔɔ ɔkʋla yɛ ma yɩ nɩ tindiã mmenii mvʋlɔ bɛ dɩyɛ nwʋ, mfomi ikila wʋ ahʋnlɩnɩ nu. Sɛ ɩnwʋ mɔɔ ɔzʋ̃ wʋ ahʋnlɩnɩ nu ɛyɛ fa kile elelɛdɩyɛ yɩ nwʋ anyɩnlɩzɔlɛ a, yɩ anyɩ de paa.—1 Sa. 16:7; Mk. 12:​41-44.

18. Mɩnla ti mɔɔ yɛ anyɩ sɔ mɔɔ Gyehova Nyamɩnlɩ nɩɩ Gyisɛsɩ Kɩlayɩsɩ bɛyɛ bɛma yɛ nɩ a?

¹⁸ Iluwa elelɛdɩyɛ afɔlɩ yɩ ti yenyia tanɩfakyɛ, yɛ nɩɩ Gyehova nyia abusunwawɔlɛ, na yenyia nnwʋanlɩ mɔɔ íni awielɩyɛ nwʋ anyɩnlɩlazʋ. Bɛmá yehile Gyehova yɩ ɔlɔlɛ mɔɔ ɩhanlɩ yɩ ma ɩvalɩ nyilalɛ eyimmɔ munwatĩĩ ɩmanlɩ yɛ nɩ nwʋ anyɩnlɩzɔlɛ mmɩlɩ munwala. (1 Dwɔ. 4:19) Akʋ̃ sʋ̃, bɛmá yehile kɛɛ yɛ anyɩ sɔ Gyisɛsɩ mɔɔ iluwa ɔlɔlɛ kezile mɔɔ ɩwɔ ɩma yɛ nɩ ti ɩvalɩ yɩ nnwʋanlɩ ɩwɔlɩ afɔlɩ ɩmanlɩ yɛ nɩ!—Dwɔ. 15:13.