1. Kɛ ɛtɩ nɣanlɩ wɔ nɔhʋanlɛ yɩ nwʋ ese a?

 GYEHOVA yi mmenii anyɩ deli nɔhʋanlɛ mɔɔ bosuma wɔ Nyamɩnlɩ Odwokɔ yi nu nɩ nwʋ. Mɛyɩ yɛ ye dedi gyĩ zʋlɔ a. (Wul. 10:17) Yɛɣa yɛnwʋ kɛɛ Gyehova hyɩhyɛ Kilisinyianɩ asafʋ yɩ kɛɛ ‘igyiná nɔhʋanlɛ ehilehilelɛ nɩ yɩ mɛda pindinyii.’(1 Tim. 3:15) Yɛzʋ̃ yɛ pɛ nu yɛyɛ sutiye yɛma ‘mbanimbani nɩ mmɔ mɔɔ beli yɛ anyunu’ mɔɔ bekilehile nɔhʋanlɛ mɔɔ ɩwɔ Bayɩbʋlʋ nu, na bɛfa ɔhʋanɩhilelɛ mɔɔ ɩbʋwa yɛ ma yɛyɛ Nyamɩnlɩ yɩ apɛdɩ bɛma yɛ nɩ.—Hib. 13:17.

2. Kɛmɔ Gyemisi 5:19 kile nɩ, sɛ yesuma nɔhʋanlɛ yɩ po a, mɩnla yɛ ɩkɔhʋla kɔdʋ yɛ a?

² Naasʋ̃ sɛ yede nɔhʋanlɛ yɩ yetiã nu, na yede yetiã numɔ kɛɛ ihyinyia kɛɛ yɛfa ɔhʋanɩhilelɛ mɔɔ Nyamɩnlɩ yɩ ahyɩhyɛdɩ fa ma yɛ nɩ yɛyɛ egyima po a, sa yɛkʋla yɛzʋ̃ nɔhʋanlɛ yɩ nu yɛyɩ. (Kɩnga Gyemisi 5:19.) Mɔɔ Setanɩ pɛ yɛ lɛ kɛɛ, ɩkɛma anwʋlazʋ mɔɔ yɛwɔ wɔ Bayɩbʋlʋ yɩ nɩɩ ɔhʋanɩhilelɛ mɔɔ yenyia yɩ wɔ Nyamɩnlɩ yɩ ahyɩhyɛdɩ yɩ kɛnɩ nɩ kɛhã azɩ.—Ɛfɩ. 4:14.

3. Mɩnla ti mɔɔ ihyinyia kɛɛ yɛsɔ nɔhʋanlɛ yɩ nu ɛzɩzɩbɛ ɛzɩzɩbɛ a? (Ɛfɩsɛsɩmaa 6:​13, 14)

³ Kɩnga Ɛfɩsɛsɩmaa 6:​13, 14. Ɩlɛ́kyɛ, Abɔnsamɩ koluwa awohwi ndwokɔ mɔɔ ɩyɛ fɛ zʋ ɩkɛlahɩlɩlahɩlɩ amanlɩ yɩ munwala ma bokodwodwu bekediyia Gyehova. (Yik. 16:​13, 14) Yezi sʋ̃ kɛɛ, Setanɩ kɔwɔ mmɔdɩnɩ kɛdɛla mmɩlɩ bela kɛlahɩlɩ Gyehova yi mmenii. (Yik. 12:9) Eyi ti mɔɔ ihyinyia kɛɛ yɛnwʋ sʋnʋnkʋ̃ mɔɔ ɩwɔ nɔhʋanlɛ nɩɩ awohwi ndwokɔ bɛ avinli na yɛfa nɔhʋanlɛ yɩ  yɛbɔ yɛ ɛbɩla yɩ a. (Wul. 6:17; 1 Pit. 1:22) Eyi nwʋ hyinyia na ama yɛanyia ye ti ialili numɔ wɔ anwʋhyɩlɩyɛ kezile yi nu!

4. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

⁴ Wɔ dɩyɛzumanlɛ eyi nu nɩ, yekozunzu subanɩ anwɩ̃ be mɔɔ ihyinyia mɔɔ ɩkɔhʋla ɩkɔwʋwa yɛ ma yɛkɔnwʋ nɔhʋanlɛ mɔɔ ɩwɔ Bayɩbʋlʋ yɩ nu, na yeale ɔhʋanɩhilelɛ mɔɔ ɩzʋ̃ Nyamɩnlɩ yɩ ahyɩhyɛdɩ yɩ kɛnɩ nɩ iadiã numɔ. Akʋ̃ sʋ̃, yekozunzu adwɩnɩhilelɛ asã be mɔɔ ɩkɔwʋwa yɛ ma yɛkɔhɔ zʋ kɔzɔ nɔhʋanlɛ yɩ nu ɛzɩzɩbɛ ɛzɩzɩbɛ.

SUBANI AZƲLƆTƲ MƆƆ YEHYINYIA NA AMA YƐANWƲ NƆHƲANLƐ YƖ

5. Mɩnla ɔhʋanɩ zʋ yɛ Gyehova nwʋ bɔlɔ bʋwa yɛ ma yɛnwʋ nɔhʋanlɛ yɩ a?

⁵ Gyehova nwʋ bɔlɔ. Sɛ yɛwɔ Gyehova nwʋ bɔlɔ mɔɔ ɩfata a, yɛkɛla ɔlɔlɛ kezile ali yekehile yi na ɩlɛ́ma yɛkɛyɛ dɩyɛ bela mɔɔ yɩ anyɩ iáleli nwʋmɔ. Yɛnwʋ pɩlɩ yɛ kɛɛ yɛkɔnwʋ sʋnʋnkʋ̃ mɔɔ ɩwɔ baaba nɩɩ tanɩ, awohwi nɩɩ nɔhʋanlɛ ndwokɔ bɛ avinli na ama Gyehova iale yɛ iadiã numɔ. (Ɛɣɛ. 2:​3-6; Hib. 5:14) Íni kɛɛ yɛma enii nwʋ bɔlɔ ɩyɛ kezi ɩtɛla ɔlɔlɛ mɔɔ yɛwɔ yɛma Gyehova nɩ, kɛ zɔ a yɛkɛyɛ mɔɔ ɩsɔ enii anyɩ. Na mɔɔ ɩsɔ enii anyɩ sʋ̃ mɛyɩ, mbɔmɩ sʋ̃maa nɩ ɩázɔ Gyehova anyɩ.

6. Mɩnla ɔhʋanɩ zʋ yɛ enii nwʋ bɔlɔ manlɩ Yizilaya abusunwa nu mbanimbani bunlu yi gugualɩ ndwokɔ nu a?

⁶ Sɛ yɛma enii nwʋ bɔlɔ yɛ kezi tɛla Nyamɩnlɩ nwʋ bɔlɔ a, ɩkɛma yekele ndwokɔ be mɔɔ ɩáyɛ nɔhʋanlɛ yekeli. Bɛmá yehila abusunwa nu mbanimbani 12 mɔɔ bɔzʋ̃manlɩ bɛ kɛɛ bɔhɔ behila azɩlɛ mɔɔ nɩ Gyehova va wɔ Yizilayamaa nɩ anʋhʋba nɩ bo odwokɔ yɩ. Bo nu bunlu mɛyɩ, bɛmanlɩ Keenanɩmaa nɩ bɔ nwʋ bɔlɔ yɛlɩ kezi dɛlalɩ ɔlɔlɛ mɔɔ nɩ bɔwɔ bɛma Gyehova nɩ, meti bɛhã behileli bɔ ɔhɔnwʋmmɔ Yizilayamaa nɩ kɛɛ: “Yɛlɔ́kʋla yɛ nɩɩ bɛ kɔhʋ̃ iluwakɛɛ bɔ nwʋ yɛ sɩ tɛla yɛ.” (Nɔ. 13:​27-31) Ɩdɩ nɔhʋanlɛ, wɔ enii yɩ anyɩ zʋ nɩ, nɩ Keenanɩmaa nɩ bɔ nwʋ yɛ sɩ tɛla Yizilayamaa nɩ. Naasʋ̃ ɛhanlɛ mɔɔ bɛhanlɩ kɛɛ bɔlɔ́kʋla keli bɛ adamvʋlɔ yɩ zʋ  nkunimi nɩ kile kɛɛ nɩ bɛyɩ Gyehova wɔ odwokɔ yɩ nu. Ankɩ ɩsɛ kɛɛ ɛdɩdɛlɛmaa bunlu nɩ fa bɛ adwɩnɩ siye mɔɔ nɩ Gyehova pɛ kɛɛ Yizilayamaa yɛ nɩ zʋ. Akʋ̃ sʋ̃, nɩ ankɩ ɩsɛ kɛɛ bɛkakɛ mɔɔ Gyehova ɩyɛlɩ manlɩ bɛ a ɩlɛ́kyɛlɩ nɩ. Bɛyɛlɩ zɔ a, ankɩ bɔkɔnwʋ kɛɛ Keenanɩmaa bɛ anwʋzɩzɩbɛ nɩ iádwu Gyehova yɩ dɩyɛ nwʋ kʋlaa. Dwohyuwa nɩɩ Kelɛbɩ mɛyɩ, bɛáyɛ bɛ dɩyɛ kɛɛ ɛdɩdɛlɛmaa bunlu mɔɔ nɩ béni dedi nɩ, mfomi nɩ bɛpɛ kɛɛ bɔsɔ Gyehova anyɩ. Bɛhã behileli mmenii nɩ kɛɛ: “Sɛ Gyehova le yɛ diã numɔ dɩyɛ a, ɔhʋanɩ bela zʋ ɩ nɩɩ yɛ kɔhɔ azɩlɛ eyi zʋ na ɩava ɩama yɛ.”—Nɔ. 14:​6-9.

7. Kɛ ɩkɛyɛ na yɛama Gyehova nwʋ bɔlɔ mɔɔ yɛwɔ nɩ ɩayɛ kezi a? (Kila mfonyini yi sʋ̃.)

⁷ Sɛ yɛfa yɛ adwɩnɩ yesiye mɔɔ ɩsɔ Gyehova anyɩ nɩ zʋ mmɩlɩ bela mɔɔ yesii pɔkɔ nɩ a, ɩkɛma Gyehova nwʋ bɔlɔ mɔɔ yɛwɔ nɩ kɛyɛ kezi. (Ndw. 16:8) Sɛ ɛkɩnga Bayɩbʋlʋ nu odwokɔ be a, bizia wʋ nwʋ kɛɛ, ‘Sɛ ɩdɩ mɩzamɩ a, ankɩ mɩnla yɛ mɩkɛyɛ a?’ Kɛ ndianwʋ nɩ, fa yɩ kɛɛ ɔwɔ kɛnɩ be yɛ Yizilaya mbanimbani bunlu nɩ bɛkãã kɛɛ Yizilayamaa nɩ bɔlɔ́kʋla keli Keenanɩmaa nɩ bɔ zʋ nkunimi. Asʋ̃ ekele ndwokɔ mɔɔ bɛkãã nɩ ekeli iluwa enii nwʋ bɔlɔ ti, anzɛnyɩɩ ɛkɛma ɔlɔlɛ mɔɔ ɔwɔ ma Gyehova nɩɩ ɛpɛ mɔɔ ɔwɔ kɛɛ ɔkɔzɔ yɩ anyɩ nɩ kɛhyɛ enii nwʋ bɔlɔ nɩ zʋ? Yizilaya manlɩ yɩ munwala bɛáde nɔhʋanlɛ odwokɔ mɔɔ Dwohyuwa nɩɩ Kelɛbɩ hanlɩ nɩ bedi. Eyi manlɩ Anʋhʋba Azɩlɛ yɩ wɔlɩ bɛ.—Nɔ. 14:​10, 22, 23.

8. Mɩnla subanɩ yɛ ɩsɛ kɛɛ yɛbɔ mmɔdɩnɩ yɛda yɩ ali a, na mɩnla ti a?

⁸ Kãnwʋazɩ. Gyehova da nɔhʋanlɛ yɩ ali kile bɛzabɛ mɔɔ bɛkã bɔ nwʋ azɩ nɩ. (Mt. 11:25) Yɛhanlɩ yɛ nwʋ azɩ ma bɔwʋwalɩ yɛ ma yezumanlɩ nɔhʋanlɛ yɩ. (Egy. 8:​30, 31) Naasʋ̃, ɩsɛ kɛɛ yɛkɔ zʋlɔ yɛkã yɛ nwʋ azɩ na iábigyiabigyialɩ yɛ nwʋ sʋlɔ. Sɛ yepigyiabigyia yɛ nwʋ sʋlɔ a, sa ɩkʋla ɩma yɛtɩ nɣanlɩ kɛɛ yɛzayɛ ye nzunzunlɩyɛ dɩ baaba kɛmɔ Bayɩbʋlʋ egyinalɛzʋ-ndwokɔ nɩɩ ɔhʋanɩhilelɛ mɔɔ ɩzʋ̃ Gyehova yɩ ahyɩhyɛdɩ yɩ kɛnɩ dɩ baaba nɩ la.

9. Kɛ ɩkɛyɛ na yɛahɔ zʋ yɛahã yɛ nwʋ azɩ a?

⁹ Sɛ yɛkɔhɔ zʋ kɛhã yɛ nwʋ azɩ a, ɩsɛ kɛɛ yɛkakɛ kɛɛ sɛ yɛfa yɛ nwʋ yetindiã Gyehova nwʋ a, yɛázɛlɩ hwɩɩ. (Ndw. 8:​3, 4) Sa yɛkʋla sʋ̃ yesiã Gyehova kɛɛ ɩwʋwa yɛ ma yɛhã yɛ nwʋ azɩ na yɛyɛ́ mmenii mɔɔ bɔkʋla bekilehile yɛ. Gyehova kɔwʋwa yɛ ma yekowu mɔɔ yesuma wɔ yi Odwokɔ yi nu nɩɩ ɔhʋanɩhilelɛ mɔɔ ɩzʋ̃ yɩ ahyɩhyɛdɩ yɩ kɛnɩ nɩ kɛɛ nwʋmɔ hyinyia tɛla ye nzunzunlɩyɛ. Wɔ wʋzawʋ wʋ Bayɩbʋlʋ ɛɣɩngalɛ nu nɩ, pɩbɛ dasɩlɛ mɔɔ ikile kɛɛ Gyehova dɔ bɛzabɛ mɔɔ bɛkã bɔ nwʋ azɩ na ikyi mmenii mɔɔ bɛdɩ ahantanɩ na bepigyiabigyia bɔ nwʋ sʋlɔ nɩ. Na sɛ enyia ɔzʋ̃mɩnlɛ nu ɔnwʋmɔ ɔhʋanɩ be mɔɔ ɩma enyia tumi ɛgyɩkɩ̃ɩ̃ anzɛnyɩɩ ɩma mmenii nwʋ wʋ a, bɔ mmɔdɩnɩ paa kɛɛ ɔkɔhɔ zʋ kɛhã wʋ nwʋ azɩ.

KEZIMƆ YƐKƆZƆ NƆHƲANLƐ YƖ NU ƐZƖZƖBƐ ƐZƖZƖBƐ

10. Aninyiammɔ yɛ Gyehova luwa bɔ zʋ va ɔhʋanɩhilelɛ ɩma yi mmenii ɔzʋmɩ ɔwɔkɩ babʋmɩ nnɛ a?

¹⁰ Kɔ zʋlɔ nyia anwʋlazʋ wɔ ɔhʋanɩhilelɛ mɔɔ ɩzʋ̃ Gyehova yɩ ahyɩhyɛdɩ yɩ kɛnɩ nɩ nu. Wɔ Yizilayamaa bɛ mmɩlɩ zʋ nɩ, Gyehova luwalɩ Mosisi nɩɩ Dwohyuwa zʋ valɩ ɔhʋanɩhilelɛ manlɩ yi mmenii. (Dwh. 1:​16, 17) Mmɩlɩ mɔ Yizilayamaa yɩ nwʋnlɩ mmenii eyimmɔ kɛɛ begyĩ Gyehova Nyamɩnlɩ yɩ agyia nu na bediyeli bɛ nɩ, Gyehova yilalɩ bɛ. Alʋbɔ sʋ̃maa mɛda mmɩlɩ mɔ belili bɔmʋnlɩ bɛhyɩhyɛlɩ Kilisinyianɩ asafʋ yɩ nɩ, nɩ asʋ̃mavʋlɔ 12 yɩ yɛ nɩ bɛfa ɔhʋanɩhilelɛ bɛma a. (Egy. 8:​14, 15) Aɣinzi yi, bɛvalɩ mbanimbani be mɔɔ nɩ bɔwɔ Gyelusalamɩ bɛhɩnlanlɩ bɔ nwʋ. Mmɩlɩ mɔ asafʋ azʋlɔtʋ yɩ valɩ ɔhʋanɩhilelɛ mɔɔ benyianlɩ wɔ mmenyia nɔhʋanlɛmaa eyimmɔ bɛ kɛnɩ bɛyɛlɩ egyima nɩ, “bɔ nwʋ ɩyɛlɩ ɛzɩzɩbɛ wɔ dedi nu na bɔ nwʋ ɩzʋnɩnlɩ.” (Egy. 16:​4, 5) Nnɛ sʋ̃, sɛ  yɛfa ɔhʋanɩhilelɛ mɔɔ yenyia wɔ Gyehova yɩ ahyɩhyɛdɩ yɩ kɛnɩ yɛyɛ egyima a, yenyia nyilalɛ sʋ̃maa. Naasʋ̃ sɛ yɛáde mmenii mɔɔ Gyehova ɩyɩ bɛ kɛɛ belí nninyeni anyunu nɩ yetiã numɔ a, kɛ ɩkɛdɩ nɣanlɩ keze a? Mɔɔ ɩkɛyɛ na yɛanyia odwokɔɣizialɛ eyi nwʋ munwalɩyɛ nɩ, bɛmá yehila mɔɔ ɩdʋlɩ Yizilayamaa yɩ mmɩlɩ mɔ nɩ bɔkɔɔ anʋhʋba azɩlɛ yɩ zʋ nɩ.

11. Mɩnla yɛ ɩdʋlɩ Yizilayamaa mɔɔ bodwodwuli bediyialɩ Mosisi mɔɔ nɩ Gyehova ɩyɩ yɩ kɛɛ ilí nninyeni anyunu nɩ a? (Kila mfonyini yi sʋ̃.)

¹¹ Mmɩlɩ mɔ nɩ Yizilayamaa yɩ bɔkɔɔ Anʋhʋba Azɩlɛ yɩ zʋ nɩ, mmenyia aditili mɔɔ bɔwɔ bo nu nɩ dwodwuli diyialɩ Mosisi mɔɔ nɩ Gyehova ɩyɩ yɩ kɛɛ ilí nninyeni anyunu nɩ. Bɛhanlɩ kɛɛ: “Mmenii nɩ munwatĩĩ [kɛ Mosisi yɩzayɩ nkʋ̃] bɛdɩ nwanzanwanza, bo munwatĩĩ, na Gyehova wɔ bɛ avinli.” (Nɔ. 16:​1-3) Ɩwɔ numɔ kɛɛ wɔ Nyamɩnlɩ anyɩ zʋ nɩ, nɩ “mmenii nɩ munwatĩĩ” bɛdɩ nwanzanwanza dɩyɛ, naasʋ̃ Mosisi yɛ Gyehova yɩlɩ yɩ kɛɛ ilí yi mmenii bɛ anyunu a. (Nɔ. 16:28) Meti mmɩlɩ mɔ atunwadɩlɛmaa nɩ dɩndɛlɩ diyialɩ Mosisi nɩ, nɩ bɛtɩndɛɛ kediyia Gyehova ankasa. Bɛáfa bɛ adwɩnɩ besiye Gyehova zʋ, mfomi bɛvalɩ bɛ adwɩnɩ beziyeli tumi nɩɩ animinyiamɩ mɔɔ nɩ bɛpɛɛ yɩ nɩ zʋ. Nyamɩnlɩ hunli mmenii mɔɔ nɩ beli atunwadɩlɛmaa nɩ bɛ anyunu nɩɩ bɛzabɛ mɔɔ bɔhɔ bɛhɩnlanlɩ bɔ nwʋ nɩ munwala. (Nɔ. 16:​30-35, 41, 49) Nnɛ sʋ̃, sa yɛkʋla yɛkã yɩ petee kɛɛ Gyehova anyɩ iáleli bɛzabɛ mɔɔ bɛáva ɔhʋanɩhilelɛ mɔɔ yɩ ahyɩhyɛdɩ fa ma yɛ nɩ yɛ egyima nɩ.

12. Mɩnla ti mɔɔ yɛkɔhʋla kɔhɔ zʋ kenyia anwʋlazʋ wɔ Gyehova yɩ ahyɩhyɛdɩ yɩ nu a?

¹² Sa yɛkʋla yɛkɔ zʋ yenyia anwʋlazʋ wɔ Gyehova yɩ ahyɩhyɛdɩ yɩ nu. Sɛ yɛnwʋ yɩ kɛɛ ihyinyia kɛɛ yɛyɛ nzɩnzanlɩyɛ wɔ kezimɔ yɛtɩ Bayɩbʋlʋ nu nɔhʋanlɛ be tʋ anzɛnyɩɩ kezimɔ yɛyɛ nninyeni be wɔ Gyehova yɩ ɔzʋ̃mɩnlɛ nu a, bɛzabɛ mɔɔ beli nninyeni anyunu nɩ bɛáhwɩnhwɩ̃ bɛ agyia azɩ kʋlaa kɛɛ bɛkɛyɛ nzɩnzanlɩyɛ mɔɔ ihyinyia nɩ. (Ɛɣɛ. 4:18) Bɛyɛ zɔ, iluwakɛɛ bɛpɛ kɛɛ bɔsɔ Gyehova anyɩ tɛla  dɩyɛ bela. Bɔbɔ mmɔdɩnɩ sʋ̃ kɛɛ bɛkɛva bɔ pɔkɔzilɛ munwatĩĩ bekegyina Nyamɩnlɩ Odwokɔ zʋ, iluwakɛɛ mɛyɩ yɛ ɩdɩ nɔhʋanlɛ odwokɔ mɔɔ ɩsɛ kɛɛ Nyamɩnlɩ mmenii fa bɔ bɛ ɛbɩla a.

13. Mɩnla yɛ lɛ “nɔhʋanlɛ odwokɔ” yɩ a, na mɩnla yɛ ɩsɛ kɛɛ yɛfa yɛyɛ a?

¹³ ‘Sɔ nɔhʋanlɛ odwokɔ nɩ nu bʋwɔ.’ (2 Tim. 1:13) “Nɔhʋanlɛ odwokɔ nɩ” kile Kilisinyianɩ ehilehilelɛ mɔɔ ɩwɔ Bayɩbʋlʋ yi nu nɩ. (Dwɔ. 17:17) Ɔzɔ ehilehilelɛ nɩ yɛ ye dedi munwatĩĩ gyĩ zʋlɔ a. Gyehova yɩ ahyɩhyɛdɩ yɩ hilehile yɛ kɛɛ, ɩsɛ kɛɛ yɛfa dɩyɛ bela mɔɔ yede yedi nɩ yekyina nɔhʋanlɛ odwokɔ yɩ zʋ. Yɛyɛ ɔzɔ a, yekenyia nyilalɛ.

14. Mɩnla ɔhʋanɩ zʋ yɛ Kilisinyiamaa be bɛásɔ “nɔhʋanlɛ odwokɔ” yɩ nu ɛzɩzɩbɛ a?

¹⁴ Sɛ yɛákɔ zʋlɔ yɛfa ye dedi yekyina “nɔhʋanlɛ odwokɔ” yɩ zʋ a, mɩnla yɛ ɩkɔhʋla kɔdʋ yɛ a? Sunzu ndianwʋ eyi nwʋ kila. Wɔ adʋwavʋlɔ yɩ bɛ mmɩlɩ zʋ nɩ, nɩ Kilisinyiamaa be bɛkɩnhãã awohwi ndwokɔ be kɛɛ Gyehova yi eɣile yi ɩɣa. Nɩ abiyemmɔ bɛkɩnhãã kɛɛ sʋ̃mavʋlɔ Pɔɔlʋ hɛlɛ kɛlɛta be mɔɔ ikile zɔ. Kilisinyiamaa be mɔɔ nɩ bɔwɔ Tɛsalonika nɩ bɛbɩndɩnlɩ awohwi ndwokɔ yɩ mmɩlɩ mɔ nɩ bɛlɛ́pɩbɛlɩ nɔhʋanlɛ mɔɔ ɩwɔ numɔ. Sɛ bɛhakɛlɩ ndwokɔ mɔɔ Pɔɔlʋ hanlɩ hileli bɛ mmɩlɩ mɔ nɩ ɩwɔ bɛ pɛ nɩ a, ankɩ beléde ɔzɔ awohwi ndwokɔ yɩ bekeli. (2 Tɛs. 2:​1-5) Pɔɔlʋ duli bɛ fʋlɔ kɛɛ kɛ dɩyɛ bela yɛ ɩsɛ kɛɛ bede bedi a. Pɔɔlʋ wieli yɩ kɛlɛta mɔɔ ɩtɔ zʋlɔ anwɩ̃ mɔɔ ɩva ɩhɔ ɩmanlɩ Tɛsalonikamaa nɩ kɛɛ: “Mɩzamɩ Pɔɔlʋ, mibizia mʋnlʋmmɔ. Ezemanlɛ eyi mɔɔ misemaa yɩ mɛyɩ mɩzamɩ Pɔɔlʋ munli yi yɛ mɩkɛlɛɛ eyi a. Ɔhʋanɩ mɔɔ muduwa nu mɩkɛlɛ kɛlɛta bela nɩ yɛ ɩdɩ.” Nɩ ɔzɔ odwokɔ yɩ kɔwʋwa bɛ wɔ eɣile be.—2 Tɛs. 3:17.

15. Kɛ ɩkɛyɛ na yɛawɔ yɛ nwʋ banɩ wɔ awohwi ndwokɔ mɔɔ wʋákila a ɛkɛhã kɛɛ ɩdɩ nɔhʋanlɛ nɩ nwʋ a? Ma nwʋmɔ ndianwʋ. (Kila mfonyini yi sʋ̃.)

¹⁵ Mɩnla yɛ yɛkɔhʋla yekozuma wɔ Pɔɔlʋ yi ndwokɔ mɔɔ ɩhɛlɛlɩ ɩhɔ ɩmanlɩ Tɛsalonikamaa nɩ nu a? Sɛ yɛtɩ ndwokɔ be mɔɔ ɩ nɩɩ mɔɔ yezuma wɔ Bayɩbʋlʋ nu nɩ iáyiyia anzɛnyɩɩ ndwokɔ be mɔɔ bogugua numɔ sʋ̃maa a, ɩsɛ kɛɛ yɛfa nɣɛlɛbɛ yɛyɛ egyima. Mmɩlɩ mɔ nɩ Soviet Union aɣanɩ yɩ idii tumi nɩ, yɛ adamvʋlɔ valɩ kɛlɛta be mɔɔ nɩ bekile kɛɛ ɩzʋ̃ ye egyimayɛlɛdɩka  ti hɔ manlɩ ye mmeliyema sʋ̃maa. Nɩ kɛlɛta yɩ ɩhyɛɛ mmeliyema yɩ ɛzɩzɩbɛ kɛɛ bɛdɩ́ okuwu be wɔ ahanlɩ. Sɛ wʋákila a ɛkɛhã kɛɛ kɛlɛta yɩ nu ndwokɔ yɩ dɩ nɔhʋanlɛ. Naasʋ̃ eyi ɩádahɩlɩ mmeliyema mɔɔ bedi nɔhʋanlɛ yɩ. Bɔnwʋnlɩ yɩ kɛɛ ndwokɔ mɔɔ ɩwɔ kɛlɛta yɩ nu nɩ, ɩ nɩɩ mɔɔ bozuma nɩ iáyiyia. Nnɛ sʋ̃, bɛzabɛ mɔɔ botwodwu betiyia nɔhʋanlɛ yɩ nɩ, boduwa intanɛtɩ nɩɩ sohyiya midiya zʋ bɔbɔ mmɔdɩnɩ kɛɛ bɛkɛma yɛ adwɩnɩ kodu kɔvʋla na ye nu ɩahyɩhyɛ. Kɛ ankɩ yɛkɛma ‘bɛkɛzɩkɛ yɛ adwɩnɩ’ nɩ, sa yɛkʋla yɛpɩbɛlɩ mɔɔ yɛtɩ nɩɩ mɔɔ yɛkɩnga nɩ nu yekila kɛɛ ɩ nɩɩ nɔhʋanlɛ yɩ mɔɔ yezuma daada nɩ yiyia a.—2 Tɛs. 2:2; 1 Dwɔ. 4:1.

16. Kɛmɔ Wulomimaa 16:​17, 18 kile nɩ, sɛ abiyemmɔ pɩndɩ awohwi ndwokɔ a, mɩnla yɛ ɩsɛ kɛɛ yɛyɛ a?

¹⁶ Kɔ zʋlɔ ma ɔkʋ̃yɛlɛ ɩwʋwá ɛ nɩɩ bɛzabɛ mɔɔ bedi Gyehova nɔhʋanlɛ nɩ bɛ avinli. Nyamɩnlɩ pɛ kɛɛ yɛfa ɔkʋ̃yɛlɛ yɛsʋ̃mɩ yɩ. Sɛ yɛsɔ nɔhʋanlɛ yɩ nu ɛzɩzɩbɛ ɛzɩzɩbɛ a, ɩkɛma ɔkʋ̃yɛlɛ kɔwʋwa yɛ avinli. Bɛzabɛ mɔɔ bɛpɩndɩ awohwi ndwokɔ nɩ, bɛfa nkyɩkyɛmi bɛba asafʋ yɩ nu, meti Nyamɩnlɩ bɔ yɛ kɔkɔ kɛɛ ‘yehilá yɛ nwʋ bʋwɔ’ wɔ bɔ nwʋ. Sɛ ɩáyɛ zɔ a, ɩkɛma yekele awohwi ndwokɔ yekeli na ɩlɛ́ma yekeli Gyehova nɔhʋanlɛ.—Kɩnga Wulomimaa 16:​17, 18.

17. Sɛ yɛnwʋ nɔhʋanlɛ yɩ na yɛsɔ numɔ ɛzɩzɩbɛ a, mɩnla mfasʋ yɛ yekenyia a?

¹⁷ Sɛ yɛnwʋ nɔhʋanlɛ yɩ na yɛsɔ numɔ ɛzɩzɩbɛ a, ɩkɛma yekeɣike Gyehova na ye dedi kɔhɔ zʋlɔ kɛyɛ sɩ. (Ɛfɩ. 4:​15, 16) Ɩkɔwɔ yɛ nwʋ banɩ wɔ Setanɩ yɩ awohwi ehilehilelɛ nɩɩ yɩ nnahɩlɩbɛ ndwokɔ nwʋ, na wɔ anwʋhyɩlɩyɛ kezile yi nu po nɩ, yekenyia banɩwɔlɛ wɔ Gyehova yɩ andɛba tʋ. Kɔ zʋlɔ sɔ nɔhʋanlɛ yɩ nu ɛzɩzɩbɛ ɛzɩzɩbɛ, na ‘Nyamɩnlɩ mɔɔ ɩma azʋ̃nudwolɩyɛ nɩ, ɩ nɩɩ wʋ kɔwʋwa.’—Fɩl. 4:​8, 9.