1. Mɩnla yɛ ɩbʋwa Gyehova yɩ mmenii ma bɔkɔzʋ̃ bɔsʋ̃mɩ yɩ ɩávalɩ nwʋmɔ ndwokɔzɩzɩbɛ mɔɔ beyiyia nɩ a?

 BAYƖBƲLƲ yɩ kã kɛɛ mmɩlɩ mɔɔ yɛda numɔ yɩ nu nɩ, “anwʋhyɩlɩyɛ sʋ̃maa ɩkɛɣa.” (2 Tim. 3:1) Gyehova yi mmenii yiyia ɔhawʋ azʋlɔtʋ mɔɔ abiyela yiyia wɔ Setanɩ yi oyuwadɩ tanɩ eyi nu nɩ be, naasʋ̃ besia sʋ̃ beyiyia odwodwudiyialɛ iluwakɛɛ bɔsʋ̃mɩ Gyehova nɩ ti. Mɩnla yɛ ɩbʋwa yɛ ma yɛkɔ zʋ yɛsʋ̃mɩ Gyehova ɩávalɩ nwʋmɔ ndwokɔzɩzɩbɛ eyimmɔ a? Sianti titili ɔkʋ̃ yɛ lɛ kɛɛ, yezi kɛɛ Gyehova yɛ lɛ “tɩyasɩvʋlɔ Nyamɩnlɩ nɩ.”—Gyɛ. 10:10; 2 Tim. 1:12.

2. Mɩnla ɔhʋanɩ zʋ yɛ Gyehova dɩ tɩyasɩvʋlɔ Nyamɩnlɩ nɩ a?

² Gyehova dɩ abiye mɔɔ ɩwɔ kɛnɩ ankasa, ɩnwʋ ndwokɔzɩzɩbɛ azʋlɔtʋ mɔɔ yeyiyia nɩ, na ɩpɩbɛ ɔhʋanɩ mɔɔ ikoluwa zʋlɔ ɩkɔwʋwa yɛ. (2 Mm. 16:9; Ndw. 23:4) Sɛ yɛnwʋ yɩ kɛɛ mɛyɩ yɛ lɛ tɩyasɩvʋlɔ Nyamɩnlɩ nɩ a, ɩkɔhʋla kɔwʋwa yɛ ma yekegyina ndwokɔzɩzɩbɛ bela munwa. Kila kezimɔ eyi wʋwalɩ Bulombunli Devidi.

3. Mmɩlɩ mɔ Devidi hanlɩ kɛɛ “Gyehova da azɩ” nɩ, nɩ ɩpɛ kehile mɩnla a?

³ Nɩ Devidi zi Gyehova na ɩvalɩ yɩ nwʋ idianlɩ yɩ zʋ. Mmɩlɩ mɔ Bulombunli Sɔɔlʋ nɩɩ mmenii mvʋlɔ wɔlɩ mmɔdɩnɩ kɛɛ bokohũ Devidi nɩ, ɩwɔlɩ Gyehova mpayɩ kɛɛ ɩwʋwá yɩ. (Ndw. 18:6) Mmɩlɩ mɔ Nyamɩnlɩ wuwalɩ Devidi yɩ mpayɩwɔlɛ na ileli yi nɩ, ɩhanlɩ kɛɛ: “Gyehova da azɩ!” (Ndw. 18:46) Asʋ̃ nɩ Devidi ɩpɛɛ kɛhã kɛɛ Nyamɩnlɩ wɔ kɛnɩ kɛkɛ a? Buuku be hilehileli numɔ kɛɛ, nɩ Devidi ɩdaa yɩ ali kɛɛ ɩwɔ anwʋlazʋ kɛɛ Gyehova dɩ “Nyamɩnlɩ mɔɔ ɩda azɩ na ɩkɔ zʋlɔ ɩbʋwa yi mmenii.” Amba, nɩ Devidi zi paa kɛɛ yɩ Nyamɩnlɩ nɩ ɩnwʋ dɩyɛ bela mɔɔ iduwaa numɔ nɩ, na iziyeziye yɩ nwʋ kɛɛ ɩkɔwʋwa yɩ. Mɛyɩ wʋwalɩ Devidi ma ɩhɔlɩ zʋlɔ  ɩzʋ̃mɩnlɩ Gyehova na ɩyɩlɩ yɩ ayɛlɛ.—Ndw. 18:​28, 29, 49.

4. Sɛ yɛnwʋ Gyehova kɛɛ tɩyasɩvʋlɔ Nyamɩnlɩ nɩ a, kɛ ɩbʋwa yɛ ise a?

⁴ Sɛ yede yedi kɛɛ Gyehova yɛ lɛ tɩyasɩvʋlɔ Nyamɩnlɩ nɩ a, ɩkɔwʋwa yɛ ma yɛkɛva ɛhyɩmɛ yɛkɔzʋ̃mɩ yɩ. Ɩkɛma yekenyia anwʋzɩzɩbɛ yɛkɛva yekegyina odwohilalɛ bela munwa na ɩkɛhyɛ yɛ ɛzɩzɩbɛ ma yɛkɔhɔ zʋ yɛkɛyɛ sʋ̃maa wɔ yɛ ɔzʋ̃mɩnlɛ egyima yɩ nu. Akʋ̃ sʋ̃, ɩkɛma yekezi yɛ kɛnɣa kɛɛ yɛkɔhɔ zʋ yekeɣike Gyehova.

TƖYASƖVƲLƆ NYAMƖNLƖ NƖ KƐHYƐ WƲ ƐZƖZƖBƐ

5. Mɩnla yɛ ɩkɔhʋla kɛma yekenyia anwʋlazʋ kɛva kegyina odwohilalɛ munwa a? (Fɩlɩpɩmaa 2:13)

⁵ Sɛ yɛkakɛ kɛɛ Gyehova da azɩ na ɩkɔhʋla kɔwʋwa yɛ mmɩlɩ munwala a, ɩkɛma yɛkɔhʋla yekegyina odwohilalɛ bela munwa, kɛ ɩdɩ kezi anzɛnyɩɩ ɛgyɩkɩ̃ɩ̃ nɩ. Gyehova mɛyɩ, ɔhawʋ bela íni kɛnɩ mɔɔ ɩdɩ kezi ɩtɛla yɩ. Mɛyɩ yɛ ɩdɩ Dɩyɛ Munwala Zʋ Tumivʋlɔ nɩ a, na ɩkɔhʋla kɛma yekenyia anwʋzɩzɩbɛ na yɛahʋla yɛagyina pindinyii. (Kɩnga Fɩlɩpɩmaa 2:13.) Eyi ma yenyia anwʋlazʋ kɛɛ, yɛkɔhʋla yekegyina odwohilalɛ bela munwa. Sɛ yɛnwʋ kezimɔ Gyehova bʋwa yɛ wɔ odwohilalɛ ngyɩkɩ̃ɩ̃ ngyɩkɩ̃ɩ̃ nu a, ɩma yenyia anwʋlazʋ kɛɛ sɛ odwohilalɛ kezile sʋ̃ ba a, ɩkɔwʋwa yɛ.

6. Mɩnla ndwokɔ yɛ izizili wɔ Devidi yi nnwuakula nu mɔɔ ɩmanlɩ inyianlɩ anwʋlazʋ kezile wɔ Gyehova nu a?

⁶ Bɛmá yezunzu ndwokɔ anwɩ̃ be mɔɔ izili wɔ Devidi yɩ ɛbɩlawɔlɛ nu mɔɔ ɩmanlɩ yɩ anwʋlazʋ mɔɔ ɩwɔ wɔ Gyehova nu nɩ yɛlɩ kezi nɩ nwʋ. Mmɩlɩ mɔ nɩ ɩdɩ kuakula mɔɔ nɩ ikilaa yɩ papa yi mmuwuanɩ zʋ nɩ, sʋmʋlɔ ɣa hyɩlɩ mmuwuanɩ yɩ ɔkʋ̃, na mmɩlɩ fʋlɔ sʋ̃ gyata ɣa hyɩlɩ ɔkʋ̃. Wɔ bʋwabɩlɛ anwɩ̃ yɩ munwala nu nɩ, Devidi ɩzʋ̃ akɛnɣazɩzɩbɛ nu ɩdʋwalɩ nnamɩ yɩ na ileli mmuwuanɩ yɩ wɔ bo munwa nu. Naasʋ̃ ɩáfa eyi nwʋ animinyiamɩ ɩma yɩ nwʋ. Nɩ izi kɛɛ Gyehova yɛ nɩ ɩbʋwaa yɩ a. (1 Sa. 17:​34-37) Devidi yɩ ɛɣɛɛlɛ iáfi ndwokɔ eyimmɔ kyɩ̃. Iluwakɛɛ ɩdwɩnɩndwɩnɩnlɩ ndwokɔ eyimmɔ nwʋ ti, ɩmanlɩ inyianlɩ anwʋlazʋ kɛɛ tɩyasɩvʋlɔ Nyamɩnlɩ nɩ kɛma ikenyia anwʋzɩzɩbɛ eɣile be sʋ̃.

7. Mɩnla yɛ Devidi valɩ yɩ adwɩnɩ ziyeli zʋ a, na kɛ eyi wʋwalɩ yɩ zeli a?

⁷ Aɣinzi yi, mmɩlɩ mɔ nɩ Devidi lanwʋ la dɩ abɩlantɩyɛ kuakula nɩ, ɩhɔlɩ Yizilaya azogyiamaa yɩ bɔ kʋnɛ azʋkɔlɩyɛ kɛnɩ. Ɩhɔ ɩnwʋnlɩ kɛɛ azogyiamaa yɩ bo kunlu du, mɛyɩ yɛ lɛ kɛɛ, Fɩlɩsɩtiyiamaa bɔ kɔbɩlanɩ mɔɔ bɔfʋlɔ yɩ Golayatɩ nɩ, idii Yizilaya azogyiamaa yɩ nwʋ nwɔwɩ kɛɛ ‘Sɛ bɛdɩ mmenyia a, nnɛ bɛmá ɩnwʋ yɩ.’ (1 Sa. 17:​10, 11) Azogyiamaa yɩ bo kunlu duli, iluwakɛɛ nɩ bɛva bɛ adwɩnɩ beziye kezimɔ Golayatɩ yi kezile dɩ nɩɩ ndwokɔ mɔɔ ɩkãã itiyia bɛ nɩ zʋ. (1 Sa. 17:​24, 25) Naasʋ̃ Devidi nwʋnlɩ bʋwabɩlɛ yɩ wɔ ɔhʋanɩ fʋlɔ zʋ. Nɩ izi kɛɛ kɛ Yizilayamaa azogyiamaa yɩ nkʋ̃ la yɛ nɩ Golayatɩ idii bɔ nwʋ nwɔwɩ a, mfomi nɩ izi kɛɛ “ibuu tɩyasɩvʋlɔ Nyamɩnlɩ nɩ animitiyia wɔ kʋnɛ yɩ munwa.” (1 Sa. 17:26) Devidi valɩ yɩ adwɩnɩ ziyeli Gyehova zʋ. Nɩ ɩwɔ anwʋlazʋ kɛɛ Nyamɩnlɩ mɔɔ ɩwʋwalɩ yɩ mmɩlɩ mɔ nɩ ikilaa mmuwuanɩ zʋ nɩ, ɩkɔwʋwa yɩ wɔ bʋwabɩlɛ eyi nu sʋ̃. Iluwakɛɛ nɩ Devidi yɩ adwɩnɩ si yi pi kɛɛ Nyamɩnlɩ kɩnla yɩ nwʋ nɩ ti, ɩ nɩɩ Golayatɩ hʋnlɩ na ilili nkunimi!—1 Sa. 17:​45-51.

8. Mɩnla yɛ ɩkɔwʋwa yɛ ma yɛkɛhyɛ anwʋlazʋ mɔɔ yɛwɔ kɛɛ Gyehova kɔwʋwa yɛ nɩ nu ɛzɩzɩbɛ a? (Kila mfonyini yi sʋ̃.)

⁸ Amɩyɛ sʋ̃ sɛ yɛkakɛ kɛɛ tɩyasɩvʋlɔ Nyamɩnlɩ nɩ ziyeziye yɩ nwʋ kɛɛ ɩkɔwʋwa yɛ a, ɩkɔhʋla kɛma yekegyina odwohilalɛ munwa pindinyii. (Ndw. 118:6) Sɛ yɛdwɩnɩndwɩnɩ nninyeni mɔɔ Gyehova ɩyɛ daada nɩ nwʋ a, ɩkɔwʋwa yɛ ma yekenyia yi nu anwʋlazʋ. Kɩnga Bayɩbʋlʋ nu ndwokɔ mɔɔ ɩkɛma ɛkɛhakɛ kezimɔ Gyehova leli yɩ azʋ̃mɩvʋlɔ wɔ ɔwɔkɩ nɩ. (Ayɩ. 37:​17, 33-37) Akʋ̃ sʋ̃, kila anzɛnyɩɩ kɩnga ndwokɔ mɔɔ ɩwɔ yɛ jw.org wɛbsayɩtɩ yɩ zʋ mɔɔ ɩma  yɛnwʋ kezimɔ Gyehova ɩwʋwa ye mmeliyema mmenyia nɩɩ mmaalɛ nnɛ nɩ, na dwɩnɩndwɩnɩ nwʋmɔ. Akʋ̃ sʋ̃, dwɩnɩndwɩnɩ mmɩlɩ be mɔ Gyehova wʋwalɩ wʋ nɩ nwʋ. Ebiye a ɔlɔ́nwʋ nnwʋánlɩ dɩyɛ kezile bela mɔɔ Gyehova ɩyɛ ɩma wʋ, dɩkɛɛ mɔɔ ɩmanlɩ abiyemmɔ hunli sʋmʋlɔ nɩɩ gyata nɩ, naasʋ̃ máma idide wʋ. Nɔhʋanlɛ odwokɔ yɛ lɛ kɛɛ, Gyehova ɩyɛ nninyeni sʋ̃maa ɩma wʋ wɔ wʋ ɛbɩlawɔlɛ nu! Ɩdʋ salɛ ɩvʋlɔ wʋ ma ɛɣa yɛ yɩ ɔhɔnwʋ. (Dwɔ. 6:44) Yɛtɩndɛɛ yɩ, iluwa yɩ mmʋwalɩyɛ zʋ yɛ ɛlanwʋ la ɔwɔ nɔhʋanlɛ yɩ nu a. Mɩnla ti mɔɔ wʋáziã yɩ kɛɛ ɩwʋwá wʋ ma ɛhakɛ́ mmɩlɩ be mɔ iwuwalɩ wʋ mpayɩ, kezimɔ ɩwʋwalɩ wʋ wɔ mmɩlɩ mɔ ɩfata nu, anzɛnyɩɩ kezimɔ ɩwʋwalɩ wʋ ma egyinanlɩ bʋwabɩlɛ be mɔɔ numɔ yɛ sɩ munwa nɩ a? Ndwokɔ mɔɔ ɩdɩdɩ zɔ mɔɔ ɔkɔdwɩnɩndwɩnɩ nwʋmɔ nɩ kɛhyɛ anwʋlazʋ mɔɔ ɔwɔ wɔ Gyehova nu kɛɛ ɩkɔhɔ zʋ kɔwʋwa wʋ yɩ nu ɛzɩzɩbɛ.

9. Sɛ yeyiyia odwohilalɛ a, kɛ yɛkɔhʋla kowu yi keze a? (Ɛɣɛlɛwulɛ 27:11)

⁹ Sɛ yɛnwʋ Gyehova kɛɛ abiye mɔɔ ɩda azɩ a, ɩkɛma yekenyia odwohilalɛ mɔɔ yeyiyia nɩ nwʋ adwɩnɩba. Mɩnla ɔhʋanɩ zʋ a? Sɛ yeyiyia odwohilalɛ a, sa yɛkʋla yebu yi kɛɛ ɩkɩnla odwokɔ kezile mɔɔ idwodwu wɔ Gyehova nɩɩ Setanɩ bɛ avinli nɩ nwʋ. Abɔnsamɩ ɩhã kɛɛ sɛ yɛnwʋʋ amanɩyɛ a, yekeyiaki Gyehova ɔzʋ̃mɩnlɛ. Meti kezimɔ yɛkɛyɛ yɛ dɩyɛ wɔ odwohilalɛ nu nɩ kɔhʋla kɛhã Gyehova. (Dwb. 1:​10, 11; kɩnga Ɛɣɛlɛwulɛ 27:11.) Meti sɛ yeyiyia odwohilalɛ na yɛfa nɔhʋanlɛlilɛ yekyina nu a, nɩ yɛdaa yɩ ali kɛɛ yɛdɔ Gyehova na Abɔnsamɩ ɩdɩ awohwinii. Asʋ̃ aɣanɩ itwodwuu kediyia wʋ, eyiyiaa ozukuasɛmɩ nu anwʋkyɩlɩ, mmenii iádiye wʋ wɔ dasɩlɛlilɛ nu, anzɛnyɩɩ eyiyiaa odwohilalɛ fʋlɔ be a? Sɛ ɔzɔ a, kakɛ kɛɛ wʋ odwohilalɛ yɩ dɩ ɔnwʋmɔ ɔhʋanɩ mɔɔ ɛkɛva kɛma Gyehova yɩ ahʋnlɩnɩ keli fɛlɛkʋ̃. Kakɛ sʋ̃ kɛɛ, ɩlɛ́ma ekeyiyia odwohilalɛ mɔɔ ɔlɔ́kʋla yi munwa kyina kyɩ̃. (1 Kɔl. 10:13) Ɩkɛma anwʋzɩzɩbɛ wʋ ma ɛkɛva kegyina pindinyii.

TƖYASƖVƲLƆ NYAMƖNLƖ NƖ KEYILA WƲ

10. Mɩnla yɛ tɩyasɩvʋlɔ Nyamɩnlɩ nɩ kɛyɛ kɛma yɩ azʋ̃mɩvʋlɔ a?

¹⁰ Gyehova yila bɛzabɛ mɔɔ bɔsʋ̃mɩ yɩ nɩ mmɩlɩ munwala. (Hib. 11:6) Ɩma yenyia azʋ̃nudwolɩyɛ  na yɛ ahʋnlɩnɩ tɔ ye kunlu nnɛ, na ɩkɛma yekenyia nnwʋanlɩ mɔɔ íni awielɩyɛ wɔ eɣile be sʋ̃. Sa yɛkʋla yɛfa yɛ ɛɣɛɛlɛ yewula Gyehova nu na yɛanyia anwʋlazʋ kɛɛ ɩwɔ ɛpɛ nɩɩ tumi mɔɔ ɩkɛva keyila yɛ. Iluwa eyi ti, yɛkɔ zʋ yɛyɛ sʋ̃maa wɔ yɩ ɔzʋ̃mɩnlɛ nu, kɛmɔ yɩ azʋ̃mɩvʋlɔ mɔɔ bɔwʋwalɩ azɩ wɔ ɔwɔkɩ yɛlɩ nɩ. Ɔzɔ yɛ Timoti yɛlɩ a.—Hib. 6:​10-12.

11. Mɩnla yɛ ɩhanlɩ Timoti ma ɩyɛlɩ egyima ɛzɩzɩbɛ wɔ asafʋ yɩ nu a? (1 Timoti 4:10)

¹¹ Kɩnga 1 Timoti 4:10. Nɩ Timoti de di kɛɛ tɩyasɩvʋlɔ Nyamɩnlɩ nɩ keyila yɩ. Meti mɔɔ ɩyɛlɩ sʋ̃maa wɔ Gyehova ɔzʋ̃mɩnlɛ nu na ɩwʋwalɩ mmenii mvʋlɔ yɩ a. Mɩnla ɔhʋanɩ zʋ a? Sʋ̃mavʋlɔ Pɔɔlʋ hyɛlɩ yɩ ɛzɩzɩbɛ kɛɛ ɩhɔ́ zʋ idu mpʋnɩ wɔ ehilehilelɛ nɩɩ bagua nu ndɛnɩmanlɛ nu. Nɩ ɩsɛ kɛɛ Timoti isia ɩyɛ ndianwʋba ɩma yɩ ɔhɔnwʋmmɔ dedimaa, mbanimbani nɩɩ nnwuakula munwala. Pɔɔlʋ zia hã hileli yi kɛɛ ɩyɛ́ debe mɔɔ ɩyɛlɛ kɛyɛ sɩ, mɔɔ ebiye yɛ lɛ kɛɛ ɩzʋ̃ ɔlɔlɛ nu ɩkɛva fʋlɔdulɛ mɔɔ numɔ yɛ sɩ ɩkɛma abiyemmɔ. (1 Tim. 4:​11-16; 2 Tim. 4:​1-5) Nɩ itwu mmɩlɩ be a, abiyemmɔ bɛánwʋ egyima mɔɔ Timoti yɛ nɩ na bɛáhile nwʋmɔ anyɩnlɩzɔlɛ, naasʋ̃ nɩ ɩwɔ anwʋlazʋ kɛɛ Gyehova keyila yɩ.—Wul. 2:​6, 7.

12. Mɩnla yɛ ɩkɛhã asafʋ nu mbanimbani ma bɔkɔhɔ zʋ bɛkɛyɛ egyima ɛzɩzɩbɛ wɔ asafʋ yɩ nu a? (Kila mfonyini yi sʋ̃.)

¹² Ɔzɔ la yɛ nnɛ sʋ̃, asafʋ nu mbanimbani kɔhʋla kenyia anwʋlazʋ kɛɛ Gyehova nwʋ egyimaba mɔɔ bɛyɛ nɩ na yɩ anyɩ sɔ yɩ. Sɛ yɛfa mmeliyema mɔɔ asafʋ nu mbanimbani kyelagyela bɛ, ehilehilelɛ nɩɩ dasɩlɛlilɛ egyima yɩ yetiã ahanlɩ a, besia bɔbʋwa asafʋ aliyiagyinanlɛ nɩɩ asianɩ mmɩlɩ nu mmʋwalɩyɛ egyima. Abiyemmɔ sʋ̃ sʋ̃mɩ wɔ okuwu mɔɔ bekyelagyela mmeliyema mɔɔ bɔ nwʋ ba bɛ anzɛnyɩɩ Asʋpiti Nkitanwʋlilɛ Kɔmitii yi nu. Asafʋ nu mbanimbani mɔɔ botu bɔ nwʋ bɛma bɛyɛ egyima eyimmɔ nɩ, bɔnwʋ asafʋ yɩ kɛɛ Gyehova yɩ ahyɩhyɛdɩ, na ɩ́dɩ enii yɩ dɩyɛ. Na iluwa eyi ti bɔzʋ̃ bɛ ahʋnlɩnɩ munwala nu bɛyɛ egyima ɛzɩzɩbɛ wɔ asafʋ yɩ nu na bɔwɔ anwʋlazʋ kɛɛ Gyehova keyila bɔ mmɔdɩnɩwɔlɛ yɩ zʋ.—Kol. 3:​23, 24.

13. Mɔɔ yɛzayɛ yɛkʋla yɛyɛ wɔ Gyehova yɩ ɔzʋ̃mɩnlɛ nu nɩ, kɛ ɩtɩ nɣanlɩ wɔ nwʋmɔ ise a?

 ¹³ Kɛ ye munwala yɛ yɛkɔhʋla yɛkɛyɛ asafʋ nu mbanimbani a. Naasʋ̃ sa ye munwala yɛkʋla yɛyɛ debe yɛma Gyehova. Sɛ yɛyɛ mɔɔ yɛkɔhʋla bela yɛma yɛ Nyamɩnlɩ yɩ a, yɩ anyɩ sɔ yɩ paa. Ɩnwʋ fʋtʋlɔ azʋlɔtʋ mɔɔ yɛyɩ yɛbʋwa oyuwadɩ munwala ɔzʋ̃mɩnlɛ egyima yɩ, ɩávalɩ nwʋmɔ kɛɛ ebiye a ɩdɩ ɛgyɩkɩ̃ɩ̃ nɩ. Sɛ yɛfa anyɩnlɩdʋnlɛ yetiã ahanlɩ na yepigyia yɛ sa sʋlɔ yɛma munwalɩyɛ wɔ dɩyɛzumanlɛ tʋ a, yɩ anyɩ de paa. Sɛ yebu yɛ anyɩ yekua yɛ anlima be yɩ mfʋmɩ zʋ na yɛfa yɩ tanɩ yɛkyɛ yɩ a, idi fɛlɛkʋ̃. Sɛ ɛtɩ nɣanlɩ kɛɛ wʋáhʋla yɛ sʋ̃maa kɛmɔ ɛpɛ yɩ po a, nyia anwʋlazʋ kɛɛ Gyehova anyɩ sɔ mɔɔ ɔkʋla ɛyɛ nɩ. Iluwa mɔɔ ɛyɛ nɩ ti, ɩdɔ wʋ na ikeyila wʋ.—Lk. 21:​1-4.

KƆ ZƲLƆ FƲÃMƖ TƖYASƖVƲLƆ NYAMƖNLƖ NƖ NWƲ

14. Mɩnla ɔhʋanɩ zʋ yɛ sɛ yɛ nɩɩ Gyehova avinli yɛ sɩ a, ɩkɔwʋwa yɛ ma yekeli yi nɔhʋanlɛ a? (Kila mfonyini yi sʋ̃.)

¹⁴ Sɛ yɛnwʋ Gyehova kɛɛ abiye mɔɔ ɩwɔ kɛnɩ ankasa a, ɩkɛma ɩkɛyɛ mɛlɛkɛ kɛɛ yekeli yi nɔhʋanlɛ. Ɔzɔ yɛ nɩ ɩdɩ wɔ Dwosefi yɩ ɔfʋã nu a. Iluwakɛɛ nɩ izi kɛɛ Nyamɩnlɩ wɔ kɛnɩ ankasa nɩ ti, nɩ ɩábɛ kʋlaa kɛɛ ɩkɛva yɩ nwʋ ikowula nna nu ɛbɩlazɩkɛlɛ nu mɔɔ ɩkɛma Nyamɩnlɩ yɩ ɛɣɛɛlɛ kɔwɔ. (Gyn. 39:9) Sɛ yɛpɛ kɛɛ yɛnwʋ Gyehova kɛɛ abiye mɔɔ ɩwɔ kɛnɩ ankasa a, ɩsɛ kɛɛ yede mmɩlɩ yɛbɔ yɩ mpayɩ na yesuma yi Odwokɔ yɩ. Sɛ yɛyɛ zɔ a, yɛ nɩɩ yɩ ɔhɔnwʋvalɛ yɩ nu kɛyɛ sɩ. Dɩkɛɛ Dwosefi nɩ, sɛ yɛzayɛ sʋ̃ yɛ nɩɩ Gyehova nyia ɔhɔnwʋvalɛ mɔɔ numɔ yɛ sɩ a, yɛlɛ́pɛ yɩ kɛɛ yɛkɛyɛ dɩyɛ bela mɔɔ yɩ anyɩ iáleli nwʋ.—Gye. 4:8.

15. Mɩnla yɛ yesuma wɔ mɔɔ ɩdʋlɩ Yizilayamaa wɔ ɛsɛlɛ yɩ zʋ nɩ nu a? (Hibulumaa 3:12)

¹⁵ Bɛzabɛ mɔɔ bɛ ɛɣɛɛlɛ fi kɛɛ Gyehova yɛ lɛ tɩyasɩvʋlɔ Nyamɩnlɩ nɩ, ɩyɛ mɛlɛkɛ kɛɛ bɔkɔhwɩ̃ bɔ nwʋ wɔ yɩ nwʋ. Mɔwʋ sunzu mɔɔ ɩdʋlɩ Yizilayamaa mmɩlɩ mɔ nɩ boluwaa ɛsɛlɛ yɩ zʋ nɩ nwʋ. Nɩ bezi paa kɛɛ Gyehova wɔ kɛnɩ, naasʋ̃ aɣinzi yi, bɛ ɛɣɛɛlɛ vili kɛɛ ikehila bɛ. Beɣizialɩ po kɛɛ: “Asʋ̃ Gyehova wɔ yɛ avinli a, anzɛnyɩɩ íni yɛ avinli?” (Ɛkɩ. 17:​2, 7) Mɛyɩ mɛda nɩ, bɛdɩlɩ Nyamɩnlɩ zʋ atunwa. Nɔhʋanlɛ nu nɩ,  yɛábɛ kɛɛ yesumazuma bɛ azʋ̃nzɩzɩbɛ nɩ, ɩdɩ kɔkɔwɔlɛ nwʋ ndianwʋ ɩma yɛ.—Kɩnga Hibulumaa 3:12.

16. Mɩnla yɛ ɩkɔhʋla kodwe ye dedi kehila a?

¹⁶ Oyuwadɩ eyi ma ɩyɛ sɩ kɛɛ yekeɣike Gyehova. Mmenii sʋ̃maa bɛále bedi kɛɛ Nyamɩnlɩ wɔ kɛ. Mbɔmɩ sʋ̃maa nɩ, bɛzabɛ mɔɔ bobu bɛ anyɩ bokua Nyamɩnlɩ yɩ mmɛla zʋ nɩ, ɩdɩ kɛɛ mɔɔ isi bɛ bʋwɔ. Sɛ yɛnwʋ yɩ zɔ a, ɩkɔhʋla kodwe ye dedi kehila. Ɩwɔ numɔ kɛɛ yede yedi kɛɛ Nyamɩnlɩ wɔ kɛnɩ dɩyɛ, naasʋ̃ wʋákila a, sa yɛkʋla yɛbɔ yɩ tʋ yenyia adwɩnɩ kɛɛ ɩlɔ́bʋwa yɛ. Mmɩlɩ be, ɔzɔ yɛ enii mɔɔ ɩhɛlɛlɩ Ndwomi 73 nɩ dɩlɩ nɣanlɩ a. Ɩnwʋnlɩ kɛɛ mmenii mɔɔ bodua yɩ nwʋ beyiyia nɩ, nɩ bɛáva Nyamɩnlɩ yɩ mmɛla bɛyɛ hwɩɩ, naasʋ̃ nɩ bɛ ɛbɩlawɔlɛ ɩkɔɔ bʋwɔ. Eyi ti ɩwɔlɩ yɩ tʋ inyianlɩ adwɩnɩ kɛɛ gyama mfasʋ íni zʋlɔ po kɛɛ abiye kɔzʋ̃mɩ Nyamɩnlɩ.—Ndw. 73:​11-13.

17. Mɩnla yɛ ɩkɔwʋwa yɛ ma yɛkɔhɔ zʋ yekeɣike Gyehova a?

¹⁷ Mɩnla yɛ ɩwʋwalɩ ndwomidʋlɛvʋlɔ yɩ ma ɩzɩnzanlɩ yɩ adwɩnɩ a? Ɩdwɩnɩndwɩnɩnlɩ mɔɔ ɩkɔdʋ bɛzabɛ mɔɔ bɛ ɛɣɛɛlɛ fi Gyehova nɩ nwʋ. (Ndw. 73:​18, 19, 27) Akʋ̃ sʋ̃, ɩdwɩnɩndwɩnɩnlɩ nyilalɛ mɔɔ bɛzabɛ mɔɔ bɔsʋ̃mɩ Nyamɩnlɩ nɩ benyia nɩ nwʋ. (Ndw. 73:24) Yɛzayɛ sʋ̃ sa yɛkʋla yɛdwɩnɩndwɩnɩ nyilalɛ mɔɔ Gyehova ɩva ɩma yɛ nɩ nwʋ. Sunzu nwʋmɔ kila kɛɛ sɛ wʋázʋ̃mɩ Gyehova a, ankɩ sɛnzɛ yɩ kɛ wʋ ɛbɩlawɔlɛ ɩdɩ ise a. Sɛ yɛyɛ zɔ a, ɩkɛma yɛkɔhɔ zʋ yekeli nɔhʋanlɛ na yɛahã odwokɔ mɔɔ ndwomidʋlɛvʋlɔ yɩ hanlɩ nɩ be kɛɛ: “Mamɩ mɛyɩ, Nyamɩnlɩ mɔɔ mʋkɔhwɩ̃ mikeɣike yi nɩ, ɩdɩyɛnɛ ɩma mɩ.”—Ndw. 73:28.

18. Mɩnla ti mɔɔ íni kɛɛ ye kunlu tuli mɔɔ ikezi wɔ eɣile be nɩ nwʋ a?

¹⁸ Sa yɛkʋla yekyina ndwokɔzɩzɩbɛ bela mɔɔ yekeyiyia wɔ awielɩyɛ mmɩlɩ yɩ nu nɩ yi munwa, iluwakɛɛ “yɛsʋ̃mɩ nɔhʋanlɛ nɩɩ ɔdʋmankʋma anzɛnyɩɩ tɩyasɩvʋlɔ Nyamɩnlɩ nɩ.” (1 Tɛs. 1:9) Yɛ Nyamɩnlɩ nɩ dɩ abiye mɔɔ ɩwɔ kɛnɩ ankasa na ɩbʋwa bɛzabɛ mɔɔ bɔsʋ̃mɩ yɩ nɩ mmɩlɩ munwala. Ɩwʋwalɩ yɩ azʋ̃mɩvʋlɔ wɔ tɩɩtɩɩ mmɩlɩ yɩ nu, na ɩbʋwa yɛ wɔ nnɛ sʋ̃. Ɩlɛ́kyɛ na yɛayiyia anwʋhyɩlɩyɛ kezile mɔɔ ebiye lésili kyɩ̃ wɔ azɩlɛ yɩ zʋ nɩ. Naasʋ̃ Gyehova iléyiaki yɛzayɛ nkʋ̃, ɩkɛhɩnla yɛ nwʋ. (Ayɩ. 41:10) Bɛmá ye munwala “yezi yɛ kɛnɣa yɛhã kɛɛ, ‘Sɛ Niibenyia ɩwɔ mʋ ɔfʋã a, mu kunlu ilótu.’”—Hib. 13:​5, 6.