1. Ɩyɛ a, kɛ Gyehova azʋ̃mɩvʋlɔ nɔhʋanlɛmaa be bɛtɩ nɣanlɩ bese a?

 YEZI kɛɛ Gyehova de yi mmenii munwala tiã numɔ, na eyi hyɛ ɛzɩzɩbɛ baaba! Bayɩbʋlʋ yɩ kã kɛɛ: “Gyehova yɩ anyɩ deli yi mmenii nwʋ.” (Ndw. 149:4) Naasʋ̃ ɩyɛ a, abiyemmɔ bɛ padi kolɔ nkʋ̃ʋ̃ ma bebizia bɔ nwʋ kɛɛ, ‘Asʋ̃ Gyehova ide mɩ itiã nu a?’ Gyehova azʋ̃mɩvʋlɔ nɔhʋanlɛmaa mɔɔ bɔwʋwalɩ azɩ wɔ Bayɩbʋlʋ mmɩlɩ nu nɩ, nɩ ɩyɛ a bɛtɩ nɣanlɩ zɔ la.—1 Sa. 1:​6-10; Dwb. 29:​2, 4; Ndw. 51:11.

2. Aninyiammɔ yɛ Gyehova de bɛ tiã nu a?

² Bayɩbʋlʋ yɩ ma yɛnwʋ yɩ petee kɛɛ mmenii mɔɔ bɔtɔ sini kɔhʋla kenyia Gyehova yɩ anyunu ɔnlʋmɩnlɛ. Mɩnla ɔhʋanɩ zʋ a? Ɩsɛ kɛɛ yenyia Gyisɛsɩ Kɩlayɩsɩ nu dedi na yenuma. (Dwɔ. 3:16) Sɛ yɛyɛ zɔ a, nɩ yɛmaa mmenii kɔnwʋ kɛɛ yenlu yɛ nwʋ wɔ yɛ tanɩ nwʋ na yɛwɔ Nyamɩnlɩ anʋhʋba kɛɛ yɛkɛyɛ yɩ apɛdɩ. (Egy. 2:38; 3:19) Sɛ Gyehova nwʋ kɛɛ yɛyɛɛ nninyeni mɔɔ ɩkɛma yɛkɛva yɩ ɔhɔnwʋ a, ɩma yɩ anyɩ de baaba. Sɛ yɛbɔ mmɔdɩnɩ yedi anʋhʋba mɔɔ yɛwɔ kɛɛ yɛkɔzʋ̃mɩ yɩ nɩ zʋ a, Gyehova de yɛ tiã numɔ na ibu yɛ kɛɛ yɛdɩ yɩ ɔhɔnwʋmmɔ paa.—Ndw. 25:14.

3. Mɩnla ndwokɔɣizialɛ asã yɛ yɛbazunzu nwʋmɔ a?

³ Naasʋ̃ mɩnla ti mɔɔ ɩyɛ a, abiyemmɔ tɩ nɣanlɩ kɛɛ Nyamɩnlɩ iále bɛ itiã numɔ yɩ a? Mɩnla ɔhʋanɩ zʋ yɛ Gyehova ikile kɛɛ ide yɛ itiã nu a? Na kɛ ɩkɛyɛ na Kilisinyianii be ianyia anwʋlazʋ kɛɛ Nyamɩnlɩ de yi tiã nu a?

SIANTI MƆƆ EBIYE A ABIYEMMƆ TƖ NƔANLƖ KƐƐ GYEHOVA IÁLE BƐ ITIÃ NUMƆ

4-5. Sɛ yɛtɩ nɣanlɩ kɛɛ mfasʋ íni yɛ zʋ a, mɩnla anwʋlazʋ yɛ yɛkɔhʋla yekenyia a?

⁴ Ye nu sʋ̃maa wɔ kɛnɩ a, ɔzʋmɩ ye nnwuakula nu munwala yɛtɩ nɣanlɩ kɛɛ mfasʋ íni yɛ zʋ. (Ndw. 88:15) Eliyema benyia be  mɔɔ bɔfʋlɔ yɩ Adrián hanlɩ kɛɛ: “Nɩ mɩtɩ nɣanlɩ kɛɛ mfasʋ íni mʋ zʋ. Mmɩlɩ mɔ nɩ mɩdɩ kuakula nɩ, mɩkakɛ kɛɛ nɩ mʋbɔ mpayɩ kɛɛ mɩ abusunwa yɩ kɔhʋla kɔhɔ Paladayɩsɩ yɩ be, naasʋ̃ mamɩ mɛyɩ nɩ mɩádɩ nɣanlɩ kɛɛ mɩfata kɛɛ mʋkɔ ebiye.” Tony mɔɔ nɩ yɩ abusunwamaa bɛ́dɩ Gyehova Dasɩvʋlɔmaa nɩ hanlɩ kɛɛ, “Mɩ awʋvʋlɔ bɛákã bekile mɩ kyɩ̃ kɛɛ bɔdɔ mɩ anzɛnyɩɩ bɛ anyɩ deli mʋ nwʋ. Eyi manlɩ mɩdɩlɩ nɣanlɩ kɛɛ mɔɔ mɩkɛyɛ bela ɩázɔ bɛ anyɩ.”

⁵ Sɛ itwu mmɩlɩ be na yɛtɩ nɣanlɩ kɛɛ mfasʋ íni yɛ zʋ a, sa yɛkʋla yɛkakɛ kɛɛ Gyehova yɩzayɩ yɛ ɩhwɩnlɩ yɛ iɣikeli yi a. (Dwɔ. 6:44) Ɩnwʋ subanɩ baaba mɔɔ ɩwɔ ye nu nɩ, mɔɔ yɛzayɛ po yézi, na izi mɔɔ ɩwɔ yɛ ahʋnlɩnɩ nu sʋ̃. (1 Sa. 16:7; 2 Mm. 6:30) Meti sɛ ɩkã ikile yɛ kɛɛ yɛtʋ bʋlɔ yɛma yɩ a, sa yɛkʋla yede yedi.—1 Dwɔ. 3:​19, 20.

6. Nɩ kɛ sʋ̃mavʋlɔ Pɔɔlʋ ɩtɩ nɣanlɩ wɔ yɩ tanɩ mɔɔ ɩyɛ idua numɔ yɩ nwʋ ise a?

⁶ Ansaana yɛbazuma nɔhʋanlɛ yɩ nɩ, ye nu be yɛlɩ nninyeni be mɔɔ ebiye a ɩlanwʋ la ididee yɛ. (1 Pit. 4:3) Bɛzabɛ mɔɔ bɛva nɔhʋanlɛlilɛ bɔzʋ̃mɩ Gyehova bɛhyɛ po nɩ, bɔwɔ mɛlɛkɛyɛlɛ azʋlɔtʋ mɔɔ bɔbɔɔ mmɔdɩnɩ kɛɛ bekeli zʋlɔ. Asʋ̃ ɩyɛ a ɛtɩ nɣanlɩ kɛɛ Gyehova lɔ́kʋla kɛva wʋ tanɩ ɩkɛhyɛ wʋ kyɩ̃ a? Sɛ ɔzɔ a, mɛyɩ nɩ sɛ ɛba ɔnwʋ kɛɛ Gyehova asʋ̃mɩvʋlɔ nɔhʋanlɛmaa abiyemmɔ po dɩlɩ nɣanlɩ zɔ la a, ɩkɛyɩkyɩ wʋ ɛɣɛɛlɛ. Kɛ ndianwʋ nɩ, sɛ nɩ sʋ̃mavʋlɔ Pɔɔlʋ yɩ mɛlɛkɛyɛlɛ nɩɩ yi sinidɔlɛ nwʋ odwokɔ ba si yi ti nu a, nɩ ɩma yi padi kolɔ. (Wul. 7:24) Ɩwɔ numɔ, nɩ Pɔɔlʋ inlu yɩ nwʋ wɔ yɩ tanɩ nwʋ na inluma dɩyɛ, naasʋ̃ nɩ ɩlanwʋ la ɩnwʋ yɩ nwʋ kɛɛ “adʋwavʋlɔ nɩ mmɔ munwatĩĩ bo kuakula” nɩɩ “tanɩyɛlɛmaa munwatĩĩ be ebani”.—1 Kɔl. 15:9; 1 Tim. 1:15.

7. Sɛ yɛyɛ tanɩ be ma idua nu a, mɩnla yɛ ɩsɛ kɛɛ yɛkakɛ a?

⁷ Yɛ sʋlɔ Ɛzɩlɛ yɩ bɔ anʋhʋba kɛɛ sɛ yenu yɛ nwʋ wɔ yɛ tanɩ nwʋ a, ɩkɛva kɛhyɛ yɛ. (Ndw. 86:5) Meti sɛ yɛyɛ tanɩ na yenu yɛ nwʋ wɔ nɔhʋanlɛ nu a, sa yɛkʋla yenyia anwʋlazʋ kɛɛ Gyehova ɩva ɩhyɛ yɛ.—Kol. 2:13.

8-9. Nɣanlɩdɩlɛ mɔɔ yenyia kɛɛ yɛlɔ́kʋla yɛkɛyɛ sʋ̃maa wɔ Gyehova ɔzʋ̃mɩnlɛ nu nɩ, kɛ ɩkɛyɛ na yɛali zʋlɔ a?

⁸ Ye munwala yɛpɛ kɛɛ yɛyɛ mɔɔ yɛkɔhʋla bela yɛsʋ̃mɩ Gyehova. Naasʋ̃, abiyemmɔ tɩ nɣanlɩ kɛɛ bɔlɔ́kʋla bɛkɛyɛ sʋ̃maa mɔɔ ɩkɛma Gyehova kele bɛ kediã nu. Eliyema baalɛ be mɔɔ bɔfʋlɔ yɩ Amanda kã kɛɛ: “Nɩ musunzu kɛɛ sɛ bɛkã kɛɛ mɩyɛ́ mɔɔ mʋkɔhʋla bela wɔ Gyehova ɔzʋ̃mɩnlɛ nu a, ikile kɛɛ ɩsɛ kɛɛ mɩyɛ sʋ̃maa mmɩlɩ munwala. Meti nɩ mɩta mɩyɛ nninyeni mɔɔ mɩ anwʋzɩzɩbɛ po ɩáhʋla. Na sɛ mɩákʋla mɩyɛ a, nɩ ɩma mɩtɩ nɣanlɩ kɛɛ mɩma Gyehova sa zi azɩ na ɩma mɩ padi kolɔ sʋ̃.”

⁹ Nɣanlɩdɩlɛ mɔɔ yenyia kɛɛ yɛlɔ́kʋla yɛkɛyɛ sʋ̃maa wɔ Gyehova ɔzʋ̃mɩnlɛ nu nɩ, kɛ ɩkɛyɛ na yɛali zʋlɔ a? Kakɛ kɛɛ Gyehova ɩáyɛ kyɩngyɩ̃ɩ̃, mfomi ɩda ntɩyasɩ ali. Iáhila ɔhʋanɩ kɛɛ yɛkɛyɛ mɔɔ yɛ anwʋzɩzɩbɛ lɔ́kʋla kɛyɛ kyɩ̃. Yɩ anyɩ sɔ mɔɔ yɛkʋla yɛyɛ bela, mɔɔ ihyinyia yɛ lɛ kɛɛ ɩzʋ̃ yɛ ahʋnlɩnɩ nu. Akʋ̃ sʋ̃, dwɩnɩndwɩnɩ bɛzabɛ mɔɔ bɔzʋ̃ bɛ ahʋnlɩnɩ munwala nu bɔzʋ̃mɩnlɩ Gyehova mɔɔ bɔ nwʋ ndwokɔ wɔ Bayɩbʋlʋ nu nɩ nwʋ. Mɔwʋ ma yehilá Pɔɔlʋ kɛɛ ndianwʋ. Ɩvalɩ ɛhyɩmɛ ɩyɛlɩ dasɩlɛlilɛ egyima yɩ alʋbɔ sʋ̃maa, iduduli ahʋanɩ ndɩndɩnlɩ, na ɩhyɩhyɛlɩ asafʋ sʋ̃maa. Naasʋ̃, mmɩlɩ mɔ yɩ bʋwabɩlɛ zɩnzanlɩ na ɩáhʋla ɩyɛ sʋ̃maa wɔ dasɩlɛlilɛ nu nɩ, nɩ ikile kɛɛ Gyehova iále yi itiã numɔ dɔkʋ̃ a? Anhã. Ɩhɔlɩ zʋlɔ ɩyɛlɩ mɔɔ ɩkɔhʋla, na Gyehova sʋ̃ yilalɩ yɩ. (Egy. 28:​30, 31) Ɔzɔ la yɛ mɔɔ amɩyɛ sʋ̃ yɛkʋla yɛyɛ wɔ Gyehova ɔzʋ̃mɩnlɛ nu nɩ, itwu mmɩlɩ be a ɩkʋla ɩsɩnza a. Naasʋ̃, mɔɔ ihyinyia Gyehova yɛ lɛ adwɩnɩ mɔɔ yɛlɛ yɛsʋ̃mɩɩ yɩ nɩ. Bɛmá yehila ɔhʋanɩ azʋlɔtʋ mɔɔ Gyehova duwa zʋlɔ kile kɛɛ ide yɛ itiã numɔ.

 MƖNLA ƆHƲANƖ YƐ GYEHOVA DUWA ZƲLƆ DA YƖ ALI KƐƐ IDE YƐ ITIÃ NU A?

10. Kɛ ɩkɛyɛ na yɛadɩ kɛɛ Gyehova ɩkãã kehile yɛ kɛɛ ide yɛ itiã nu a? (Dwɔɔnʋ 16:27)

¹⁰ Iduwa Bayɩbʋlʋ yɩ zʋ. Gyehova anyɩ deli nwʋmɔ kɛɛ ɩkɛhã kezimɔ ɩtɩ nɣanlɩ wɔ bɛzabɛ mɔɔ ide bɛ itiã numɔ nɩ nwʋ odwokɔ. Bayɩbʋlʋ yɩ ma yɛnwʋ kɛɛ Gyehova hanlɩ hileli Gyisɛsɩ mbɔmɩ anwɩ̃ zʋ kɛɛ ɩdɩ yɩ Ɔdɔɣalɛ mɔɔ ide yi itiã nu. (Mt. 3:17; 17:5) Asʋ̃ wʋ anyɩ keleli nwʋmɔ kɛɛ ɛkɛdɩ kɛɛ Gyehova ɩkãã ikehile wʋ kɛɛ ide wʋ itiã nu a? Mɔɔ ɩdɩ yɛ lɛ kɛɛ, Gyehova ɩádɩndɛ ikile yɛ senyii mfomi iduwa yi Odwokɔ Bayɩbʋlʋ yɩ zʋ. Sɛ yɛkɩnga ndwokɔ mɔɔ ɩkã ahʋnlɩnɩ mɔɔ Gyisɛsɩ hanlɩ hileli yɩ adʋwavʋlɔ yɩ a, nɩ ɩdɩ kɛɛ mɔɔ yetiyee Gyehova. (Kɩnga Dwɔɔnʋ 16:27.) Gyisɛsɩ lalɩ yɩ Zɩ yi subanɩ ali pɛpɛɛpɛ. Meti sɛ yɛkɩnga ndwokɔ mɔɔ Gyisɛsɩ hanlɩ va hileli kɛɛ ide yɩ adʋwavʋlɔ nɔhʋanlɛmaa mɔɔ bɛáli munli nɩ itiã numɔ nɩ a, sa yɛkʋla yetua nwʋmɔ mfonyini kɛɛ Gyehova yɛ ɩkãã ɔzɔ ndwokɔ yɩ ikehile yɛ a.—Dwɔ. 15:​9, 15.

11. Mɩnla ti mɔɔ sɛ yɛnwʋʋ amanɩyɛ a, iáhile kɛɛ Gyehova iále yɛ itiã numɔ dɔkʋ̃ a? (Gyemisi 1:12)

¹¹ Iduwa yɩ nyɛlɩyɛ zʋ. Gyehova pɛ paa kɛɛ ɩbʋwa yɛ. Kɛ ndianwʋ nɩ, ɩfa yɛ nnwʋnlamɩ ɔfʋã nu ahyinyiadɩ ɩma yɛ. Naasʋ̃ ɩyɛ a, Gyehova kɛma ɔhʋanɩ ma yɛkɔnwʋ amanɩyɛ ɛgyɩkɩ̃ɩ̃ kɛmɔ ɩmanlɩ ɔhʋanɩ ma ɩdʋlɩ ɛdɩnɣɛlɛnii Dwoobu nɩ. (Dwb. 1:​8-11) Sɛ yɛnwʋʋ amanɩyɛ a, iáhile kɛɛ Nyamɩnlɩ iále yɛ itiã numɔ dɔkʋ̃. Mfomi, ɩma yenyia ɔnwʋmɔ ɔhʋanɩ yɛfa yekile kezimɔ yɛdɔ yɩ na yede yi yedi nɩ. (Kɩnga Gyemisi 1:12.) Sɛ yeyiyiaa odwohilalɛ a, yɛkɔnwʋ kezimɔ ɩdɔ yɛ na ɩbʋwa yɛ ma yekyina pindinyii nɩ.

12. Mɩnla yɛ yɛkɔhʋla yekozuma wɔ Dmitrii yi odwokɔ yɩ nu a?

¹² Bɛmá yezunzu Eliyema benyia Dmitrii mɔɔ ɩwɔ Asia yi odwokɔ yɩ nwʋ yehila. Yi egyima vili yɩ sa na aziyanɩ sʋ̃maa dualɩ numɔ mɔɔ iányia egyima ɩyɛ. Meti izili pɔkɔ kɛɛ ɩkɛyɛ sʋ̃maa wɔ dasɩlɛlilɛ nu na ɩava iahile kɛɛ ɩfa yɩ nwʋ itiã Gyehova zʋ. Aziyanɩ sʋ̃maa dualɩ numɔ mɔɔ nɩ ɩlanwʋ la ilényianlɩ egyima ɩlɛ́yɛlɩ. Akʋ̃ adimakɛlɛ be wɔlɩ yɩ dianlɩ azɩ. Eyi manlɩ ɩdɩlɩ nɣanlɩ kɛɛ ɩ́dɩ ohunɛ nɩɩ ɛzɩlɛ baaba, na inyianlɩ adwɩnɩ po kɛɛ Gyehova ɩábɛ yi odwokɔ dɔkʋ̃. Eɣile ɔkʋ̃ nunuma be, yɩ ɣa baalɛ bɩlɩntɩlɩ odwokɔ mɔɔ ɩwɔ Ayɩzaya 30:15 mɔɔ ise: “Bɔbʋwa kɛnɩ dinyii bɛfa bɔ nwʋ betiã mʋ zʋ a, bekenyia anwʋzɩzɩbɛ” nɩ igualɩ kɛlɛta zʋ. Ɩva ɩɣɩlɛlɩ yɩ wɔ yɩ mba yɩ  nwʋ na ɩhanlɩ kɛɛ, “Dada, sɛ wʋ ɛɣɛɛlɛ bɔ a, kakɛ ɛhɛlɛlɛdwokɔ eyi.” Dmitrii ɣa nwʋnlɩ kɛɛ Gyehova yɩ mmʋwalɩyɛ zʋ ti, yɩ abusunwa yɩ lanwʋ la wɔ alɩyɛ, ntalɩ, nɩɩ dɩka mɔɔ bɛkɛva be ti bekediã. Ɩdʋwalɩ zʋlɔ kɛɛ, “Mɔɔ nɩ ihyinyia kɛɛ mɩyɛ yɛ lɛ kɛɛ, mʋkɔwʋwa kɛnɩ dinyii na mɩahɔ zʋ mɩava mʋ nwʋ miadiã mɩ Nyamɩnlɩ yɩ zʋ.” Meti wʋzawʋ sʋ̃, sɛ eyiyiaa ndwokɔzɩzɩbɛ mɔɔ ɩdɩ zɔ be a, sa ɔkʋla enyia anwʋlazʋ kɛɛ Gyehova dwɩnɩ wʋ nwʋ na ɩkɔwʋwa wʋ ma ekegyina yi munwa.

13. Aninyiammɔ yɛ Gyehova koluwa bɔ zʋ kɛla yɩ ali kɛɛ ide yɛ itiã nu a, na kɛ ɩyɛ yɩ ise a?

¹³ Iduwa yɛ ɔhɔnwʋmmɔ dedimaa zʋ. Gyehova duwa ye mmeliyema mmenyia nɩɩ mmaalɛ zʋ ɩma yɛnwʋ kɛɛ ide yɛ itiã numɔ. Kɛ ndianwʋ nɩ, ɩkɔhʋla kɛhã bɛ ahʋnlɩnɩ ma bɛkɛhã ndwokɔ mɔɔ ɩhyɛ ɛzɩzɩbɛ bekehile yɛ wɔ mmɩlɩ mɔ ɩfata nu. Eliyema baalɛ be mɔɔ ɩwɔ Asia yɩ sa hanlɩ mmʋwalɩyɛ mɔɔ ɩdɩ zɔ mmɩlɩ mɔ nɩ iyiyiaa atɩɩtɩɩ sʋ̃maa nɩ. Yi egyima vili yɩ sa na yɩ nwʋ balɩ yɩ ɛzɩzɩbɛ ɛzɩzɩbɛ. Akʋ̃ yi hũ hɔ yɛlɩ tanɩ mɔɔ numɔ yɛ ɔnlʋmɔ na beleli yi ebani wɔ yɩ sa nu. Ɩhanlɩ kɛɛ: “Nɩ mɩánwʋ sianti mɔɔ ndwokɔ eyi munwatĩĩ isizii. Nɩ musunzu kɛɛ gyama mɩyɛ tanɩ be na ɩma Gyehova iále mɩ itiã numɔ dɔkʋ̃.” Ye eliyema baalɛ yɩ zianlɩ Gyehova kɛɛ ɩmá ɩnwʋ kɛɛ ide yi itiã nu amba. Kɛ Gyehova wuwalɩ yɩ mpayɩ nɩ zeli a? Ɩva ɩzɔlɩ zʋlɔ kɛɛ, “Asafʋ nu mbanimbani bɛ nɩɩ mɩ wɔlɩ nkɔmmɔ na bɛmanlɩ mʋnwʋnlɩ kɛɛ Gyehova ɩlanwʋ la ɩdɔ mɩ.” Mmɩlɩ be mɛda nɩ, izia ɩwɔlɩ Gyehova mpayɩ kɛɛ ɩmá ɩnwʋ kɛɛ ide yi itiã numɔ amba a. Ɩhanlɩ kɛɛ, “Ɔzɔ eɣile yi la, minyianlɩ kɛlɛta be mɔɔ ɩzʋ̃ mmeliyema mmenyia nɩɩ mmaalɛ mɔɔ bɔwɔ mɩ asafʋ yi nu bɛ kɛnɩ. Mmɩlɩ mɔ mɩkɩngaa bo ndwokɔ mɔɔ ɩhyɛ ɛzɩzɩbɛ nɩ, mɩdɩlɩ nɣanlɩ kɛɛ Gyehova idiye mɩ mpayɩ.” Amba, mbɔmɩ sʋ̃maa nɩ, Gyehova duwa ndwokɔ mɔɔ ɩhyɛ ɛzɩzɩbɛ  mɔɔ mmenii mvʋlɔ kã kile yɛ nɩ zʋ ɩma yɛnwʋ kɛɛ ide yɛ itiã numɔ.—Ndw. 10:17.

14. Mɩnla ɔhʋanɩ fʋlɔ yɛ Gyehova duwa zʋlɔ kile kɛɛ ide yɛ itiã nu a?

¹⁴ Akʋ̃ sʋ̃, Gyehova duwa fʋlɔdulɛ mɔɔ yɛ ɔhɔnwʋmmɔ dedimaa fa ma yɛ nɩ zʋ kile kɛɛ ide yɛ itiã numɔ. Kɛ ndianwʋ nɩ, wɔ adʋwavʋlɔ yɩ bɛ mmɩlɩ zʋ nɩ, Gyehova luwalɩ sʋ̃mavʋlɔ Pɔɔlʋ zʋ hɛlɛlɩ ahɛlɛta 14 hɔ manlɩ yɩ ɔhɔnwʋmmɔ dedimaa. Wɔ ɔzɔ ahɛlɛta yɩ nu nɩ, ɩzʋ̃ ɔlɔlɛ nu ɩvalɩ fʋlɔdulɛ senyii ɩmanlɩ yi mmeliyema. Mɩnla ti mɔɔ Gyehova hanlɩ Pɔɔlʋ ma ɩhɛlɛlɩ fʋlɔdulɛ mɔɔ ɩdɩ zɔ a? Iluwakɛɛ Gyehova dɩ Ɛzɩlɛba, na ɩtɩnɣɛ yɩ mma mɔɔ “ɩpɛ bo odwokɔ nɩ.” (Ɛɣɛ. 3:​11, 12) Meti sɛ bɛfa Bayɩbʋlʋ yɩ botu yɛ fʋlɔ a, ɩsɛ kɛɛ yɛnwʋ yɩ kɛɛ ɩdɩ dasɩlɛ mɔɔ ikile kɛɛ Gyehova ide yɛ itiã numɔ, na kɛ ebiye a ɩbʋ yɛ a. (Hib. 12:6) Mɩnla dɔkʋ̃ yɛ Gyehova ɩyɛ ɩfa ikile kɛɛ ide yɛ itiã nu a?

DASƖLƐ MVƲLƆ MƆƆ IKILE KƐƐ GYEHOVA DE YƐ TIÃ NU

15. Aninyiammɔ yɛ Gyehova ɩfa yi sunzuma nwanzanwanza yɩ ɩma bɛ a, na mɩnla ti mɔɔ eyi kɔhʋla kɛma yekenyia anwʋlazʋ a?

¹⁵ Bɛzabɛ mɔɔ Gyehova ide bɛ itiã nu nɩ yɛ ɩfa yi sunzuma nwanzanwanza yɩ ɩma bɛ a. (Mt. 12:18) Sa yɛkʋla yebizia yɛ nwʋ kɛɛ, ‘Asʋ̃ mʋhʋla mɩla Nyamɩnlɩ sunzuma yɩ mma nɩ be ali wɔ mɩ ɛbɩlawɔlɛ nu a?’ Asʋ̃ ɔnwʋ kɛɛ kakɩ yɩ ɛda abʋtalɩ ali ɛtɛla mmɩlɩ mɔ nɩ olósumanlɩ Gyehova nwʋ dɩyɛ nɩ a? Nɔhʋanlɛ nu nɩ, mbɔmɩ sʋ̃maa mɔɔ ɛdaa Nyamɩnlɩ yi sunzuma yɩ mma nɩ ali nɩ, ɛkɛɣa kɔnwʋ yɩ petee kɛɛ Gyehova de wʋ tiã nu amba!—Kila alɩka mɔɔ ise “ Nyamɩnlɩ Sunzuma Nɩ Yɩ Mma Dɩyɛ Nɩ Yɛ Lɛ Eyimmɔ . . . ”

16. Aninyiammɔ yɛ Gyehova ɩfa odwokɔbahanlɛ egyima yɩ iwula bɛ sa a, na kɛ eyi ɩma ɛtɩ nɣanlɩ ese a? (1 Tɛsalonikamaa 2:4)

¹⁶ Bɛzabɛ mɔɔ Gyehova ide bɛ itiã numɔ nɩ yɛ ɩfa odwokɔbahanlɛ egyima yɩ iwula bɛ sa a. (Kɩnga 1 Tɛsalonikamaa 2:4.) Kila kezimɔ eliyema baalɛ be mɔɔ bɔfʋlɔ yɩ Jocelyn nwʋnlɩ kɛɛ eyi dɩ nɔhʋanlɛ mmɩlɩ mɔ ɩkãã odwokɔba yɩ kehile mmenii nɩ. Eɣile ɔkʋ̃ be mɔɔ Jocelyn dwodwuli nɩ, nɩ ɩyɛ basaa. Ɩhanlɩ kɛɛ, “Mɩdɩlɩ nɣanlɩ kɛɛ anwʋzɩzɩbɛ ɔkʋ̃ po íni mu nu na mfasʋ bela íni mʋ zʋ. Naasʋ̃ nɩ mɩdɩ ɔhʋanɩbukolɛvʋlɔ, na nɩ ɔzɔ eɣile yi dɩ mɩ dasɩlɛlilɛ eɣile. Meti mʋwɔlɩ mpayɩ na mʋdɔlɩ ɔhʋanɩ zʋ mʋhɔlɩ dasɩlɛlilɛ.” Ɔzɔ nwɔnɩ yɩ Jocelyn yiyialɩ baalɛ be mɔɔ yi kunlu ɩdɩyɛnɛ mɔɔ bɔfʋlɔ yɩ Mary, na ileli idianlɩ numɔ  kɛɛ ikozuma Bayɩbʋlʋ yɩ. Aziyianɩ be mɛda nɩ, Mary hanlɩ kɛɛ, nɩ igua zʋlɔ ɩbɔɔ mpayɩ kɛɛ Nyamɩnlɩ ɩwʋwá yɩ mmɩlɩ mɔ Jocelyn ɣa wɔlɩ yɩ anyɩkɛ nu nɩ. Mɩnla yɛ Jocelyn zumanlɩ wɔ odwokɔ eyi nu a? Ɩhanlɩ kɛɛ, “Mɩdɩlɩ nɣanlɩ kɛɛ Gyehova ɩkãã ikilee mɩ kɛɛ, ‘Mide wʋ mitiã numɔ.’” Amba, kɛ abiyela yɛ ikediye odwokɔba mɔɔ yɛkã nɩ a, naasʋ̃ sa yɛkʋla yenyia anwʋlazʋ kɛɛ Gyehova anyɩ ɩsɔ mmɔdɩnɩ bela mɔɔ yɛbɔ kɛɛ yɛkɛhã odwokɔba yɩ be yekehile mmenii mvʋlɔ nɩ.

17. Mɩnla yɛ osuma wɔ odwokɔ mɔɔ Vicky hanlɩ valɩlɩ elelɛdɩyɛ yɩ nwʋ nɩ nu a? (Ndwomi 5:12)

¹⁷ Gyehova ɩma bɛzabɛ mɔɔ ide bɛ itiã numɔ nɩ nyia elelɛdɩyɛ afɔlɩ yɩ zʋ mfasʋ. (1 Tim. 2:​5, 6) Na sɛ yɛlanwʋ la yɛtɩ nɣanlɩ kɛɛ Gyehova iále yɛ tiã numɔ ɩávalɩ nwʋmɔ kɛɛ yɛwɔ elelɛdɩyɛ yɩ nu dedi na yenluma sʋ̃ ɛ? Kakɛ kɛɛ, kɛ eɣile bela yɛ yɛkɔhʋla yɛkɛva yɛ nwʋ yekediã yɛ nɣanlɩdɩlɛ zʋ a, naasʋ̃ Gyehova mɛyɩ yɛkʋla yɛfa yɛ nwʋ yetiã yɩ zʋ eɣile bela. Ibu bɛzabɛ mɔɔ bede elelɛdɩyɛ nɩ bedi nɩ kɛɛ ɛdɩnɣɛlɛmaa na ɩbɔ anʋhʋba kɛɛ ikeyila bɛ. (Kɩnga Ndwomi 5:12; Wul. 3:26) Elelɛdɩyɛ yɩ mɔɔ Vicky dwɩnɩndwɩnɩnlɩ nwʋmɔ nɩ wʋwalɩ yɩ paa. Eɣile ɔkʋ̃ be, ɩdwɩnɩndwɩnɩnlɩ elelɛdɩyɛ yɩ nwʋ ɩhɔlɩ aɣinzi, na ɩhanlɩ kɛɛ: “Ntʋlɔnkʋdɩ Gyehova inyia mʋ nwʋ abʋtalɩ ɩhyɛ paa. . . . Naasʋ̃, nɩ ɩdɩ kɛɛ mɔɔ mɩkãã mikehile Gyehova kɛɛ: ‘Ɔlɔ́kʋla ɔkɔlɔ enii mɔɔ ɩdɩ kɛɛ mamɩ. Wʋ Ɣa yɩ afɔlɩ nɩ ɩlɔ́kʋla ikoduwa mɩ tanɩ nwʋ kakɛ.’” Elelɛdɩyɛ yɩ mɔɔ ɩdwɩnɩndwɩnɩnlɩ nwʋmɔ nɩ, ɩmanlɩ ɩwɔlɩ yɩ tʋ ɩdɩlɩ nɣanlɩ kɛɛ Gyehova dɔ yɩ. Amɩyɛ sʋ̃, sɛ yɛdwɩnɩndwɩnɩ elelɛdɩyɛ yɩ nwʋ a, ɩkɛma yɛkɔnwʋ kɛɛ Gyehova dɔ yɛ na ide yɛ itiã numɔ.

18. Sɛ yɛkɔ zʋlɔ yɛdɔ yɛ sʋlɔ Ɛzɩlɛ nɩ a, mɩnla anwʋlazʋ yɛ yɛkɔhʋla kenyia a?

¹⁸ Ɩwɔ numɔ, ebiye a yɛkɔwɔ mmɔdɩnɩ kɛɛ yɛkɛva mɔɔ yezuma wɔ dɩyɛzumanlɛ eyi nu nɩ yɛkɛyɛ egyima, naasʋ̃ ɩyɛ a yɛ padi kɔhʋla kogolɔ na yɛkɛdɩ nɣanlɩ kɛɛ Gyehova iále yɛ itiã numɔ. Sɛ ɩba yɩ zɔ a, kakɛ kɛɛ Gyehova de “mmenii mɔɔ bɔdɔ yɩ nɩ” itiã numɔ. (Gye. 1:12) Meti kɔ zʋlɔ twɩ̃ bike Gyehova na pɩbɛ dasɩlɛ mɔɔ ikile kɛɛ ide wʋ itiã nu. Kakɛ eɣile bela kɛɛ, Gyehova “nɩɩ ye nu bela yɛ avinli ɩáwa.”—Egy. 17:27.