1-2. Mɩnla nyilalɛ yɛ abiye nyia wɔ yɩ onlumanlɛ mɛda a?

 ƖDƖ ɔnwʋmɔ ɔhʋanɩ kezile kɛɛ yɛ nɩɩ Gyehova nyia ɔhɔnwʋvalɛ mɔɔ numɔ yɛ sɩ. Yɛ nɩ ndwomidʋlɛvʋlɔ Devidi yɛ adwɩnɩ, mmɩlɩ mɔ ɩhanlɩ kɛɛ: ‘Anyɩnlɩlelɛ yɛ lɛ enii mɔɔ [Gyehova] ɩyɩ yɩ na ɩtwɩ̃ yɩ ibike kɛɛ ɩɣa ɩwʋwa yi pika yɩ yaadɩ kɛnɩ.’—Ndw. 65:4.

² Kɛ abiyela kɛkɛ yɛ Gyehova fa yɩ ba yi pika yɩ yaadɩ nu anzɛnyɩɩ yɩ abusunwa nu a. Kɛmɔ yɛhã wɔ dɩyɛzumanlɛ mɔɔ ili eyi yɩ anyunu nɩ, Gyehova ɩtwɩ̃ ibike mmenii mɔɔ bɛda bɔ nwʋ ali kɛɛ bɛpɛ kɛɛ bɛ nɩɩ yɩ nyia ɔhɔnwʋvalɛ mɔɔ numɔ yɛ sɩ nɩ. (Gye. 4:8) Sɛ eyila wʋ nwʋ zʋ ma Gyehova na onuma a, ɔtwɩ̃ bike yi wɔ ɔhʋanɩ sʋnʋnkʋ̃ be zʋ. Sa ɔkʋla nyia anwʋlazʋ kɛɛ wɔ wʋ onlumanlɛ mɛda nɩ, ‘ikodwonwɔ yɩ nyilalɛ ikogua wʋ zʋ ma ikowulu wʋ zʋ.’—Mal. 3:10; Gyɛ. 17:​7, 8.

3. Asɛdɩ mɔɔ anyɩnlɩbʋlʋ wɔ numɔ ɛhɩnla dɩyɛ yɛ Kilisinyiamaa mɔɔ beyila bɔ nwʋ zʋ na bonluma nɩ bɔwɔ a? (Odwokɔhanlɛvʋlɔ 5:​4, 5)

³ Wʋ nnwʋanlɩ eɣile mɔɔ ɛkɛva kɔzʋ̃mɩ Gyehova nɩ, ɩbɔ yɩ tʋ wɔ wʋ onlumanlɛ mɛda. Sɛ onuma owie yɩ a, ɔkɔwɔ mmɔdɩnɩ kɛɛ ekeli anʋhʋba mɔɔ ɔwɔ kɛɛ ɔkɔzʋ̃mɩ Gyehova na wʋahɔ zʋ wʋali nɔhʋanlɛ wʋama yɩ nɩ zʋ, mmɩlɩ po mɔ botwee wʋ bekehila kɛɛ ɛyɛ́ tanɩ anzɛnyɩɩ bodwodwu bediyia wʋ nɩ. (Kɩnga Odwokɔhanlɛvʋlɔ 5:​4, 5.) Kɛ Gyisɛsɩ yɩ tʋwavʋlɔ nɩ, ɩsɛ kɛɛ ɔbɔ mmɔdɩnɩ kɛɛ okozumazuma yi ndianwʋba na wʋali yɩ ahyɛdɩ zʋ. (Mt. 28:​19, 20; 1 Pit. 2:21) Dɩyɛzumanlɛ eyi kɔwʋwa wʋ ma ɛkɛyɛ zɔ.

 ‘KƆ ƆZƲLƆ TƲWA’ GYISƐSƖ ƖÁVALƖ ƆNWƲMƆ ODWODWUDIYIALƐ NƖƖ ODWOHILALƐ

4. Mɩnla ɔhʋanɩ zʋ yɛ Gyisɛsɩ yɩ adʋwavʋlɔ sʋwa amanɩyɛnwʋnlɛwudo a? (Luuku 9:23)

⁴ Onuma a, áma ɛyɛ wʋ adwɩnɩ kɛɛ eléyiyia ndwokɔzɩzɩbɛ. Nɔhʋanlɛ nu nɩ, Gyisɛsɩ manlɩ numɔ lalɩ ɛkɛnɩ petee kɛɛ yɩ adʋwavʋlɔ kɔzʋwa amanɩyɛnwʋnlɛwudo. Na odwokɔ yɩ yɛ lɛ kɛɛ, bɔkɔzʋwa yɩ “eɣile bela.” (Kɩnga Luuku 9:23.) Asʋ̃ mɔɔ nɩ Gyisɛsɩ ɩkãã yɛ lɛ kɛɛ yɩ adʋwavʋlɔ keyiyia atɩɩtɩɩ mmɩlɩ munwala a? Anhã kɛ ɔzɔ kʋlaa. Nɩ isii zʋlɔ owudo kɛɛ wɔ nyilalɛ mɔɔ bekenyia yɩ mɛda nɩ bekeyiyia ndwokɔzɩzɩbɛ. Ndwokɔzɩzɩbɛ mɔɔ bekeyiyia nɩ, ebiye nu kɔhʋla kɛyɛ sɩ paa.—2 Tim. 3:12.

5. Mɩnla nyilalɛ yɛ Gyisɛsɩ ɩva ɩwɔ mmenii mɔɔ bɛva nninyeni bɔwɔ afɔlɩ nɩ anʋhʋba a?

⁵ Ebiye a wu mmusunwamaa bodwodwu bediyia wʋ anzɛnyɩɩ ɛva nnwʋnlamɩ ɔfʋã nu nninyeni be ɔwɔ afɔlɩ na ama wʋahʋla wʋava Nyamɩnlɩ yi Bulombunlililɛ wʋali bɔmʋnlɩ wɔ wʋ ɛbɩlawɔlɛ nu. (Mt. 6:33) Sɛ ɔzɔ a, sa ɔkʋla enyia anwʋlazʋ kɛɛ Gyehova zi mɔɔ ɛyɛ ɛma yɩ munwala. (Hib. 6:10) Ebiye a, ɔnwʋ yɩ kɛɛ Gyisɛsɩ yɩ odwokɔ eyi dɩ nɔhʋanlɛ: “Abiyela mɔɔ iyiaki pika, mmeliyema, anzɛnyɩɩ enlilɛ anzɛnyɩɩ ɛzɩlɛ anzɛnyɩɩ mmalɛ anzɛnyɩɩ azɩlɛ ɛkɛnɩ wɔ mamɩ nɩɩ odwokɔba nɩ ti nɩ, ikenyia mɔɔ ɩtɛla ɔzɔ kʋlaa wɔ nnɛ oyuwadɩ eyi nu. Na bɔkɔwɔ ɔzɔ nninyeni eyimmɔ nwʋ yaalɛ bɛkɛma yɩ, nniyia, mmeliyema, enlilɛ, mmalɛ, azɩlɛ; ikeyiyia atɩɩtɩɩ dɩyɛ, naasʋ̃, wɔ oyuwadɩ mɔɔ ɩbaa nɩ nu, ikenyia nnwʋanlɩ mɔɔ íni awielɩyɛ.” (Mk. 10:​29, 30) Nyilalɛ mɔɔ enyia nɩ, ɩzʋnɩ ɩtɛla afɔlɩ azʋlɔtʋ mɔɔ ɔwɔ nɩ.—Ndw. 37:4.

6. Mɩnla ti mɔɔ ihyinyia kɛɛ ɔkɔ zʋlɔ kʋ̃ tiyia “nnwʋnlamɩ akɔnɔ” wɔ wu onlumanlɛ mɛda a?

⁶ Wɔ wʋ onlumanlɛ mɛda nɩ, ɩsɛ kɛɛ ɔkɔ ɔzʋlɔ ɔkʋ̃ tiyia “nnwʋnlamɩ akɔnɔ.” (1 Dwɔ. 2:16) Eyi dɩ zɔ iluwakɛɛ ɛlanwʋ la ɔtɔ sini. Ɩyɛ a sa ɔkʋla tɩ nɣanlɩ kɛmɔ sʋ̃mavʋlɔ Pɔɔlʋ dɩlɩ nɣanlɩ nɩ, mmɩlɩ mɔ ɩhanlɩ kɛɛ: “Mamɩ mɩ ahʋnlɩnɩ nu mɛyɩ, mɩ anyɩ ideli Nyamɩnlɩ yɩ mmɛla nɩ nwʋ baaba. Naasʋ̃ mʋnwʋ mmɛla fʋlɔ be mɔɔ idii egyima wɔ mi eniiwudo nɩ nu, mɔɔ ɩ nɩɩ mɩ adwɩnɩ bɔkʋ̃, na ɩma mɩyɛ dɔngɔnii mɩma tanɩ mmɛla nɩ mɔɔ idii egyima wɔ mi eniiwudo nɩ nu nɩ.” (Wul. 7:​22, 23) Ebiye a iluwa wʋ mɛlɛkɛyɛlɛ ti, wʋ padi kɔhʋla kogolɔ. Naasʋ̃ sɛ ɔdwɩnɩndwɩnɩ anʋhʋba mɔɔ ɔwɔlɩ Gyehova mmɩlɩ mɔ eyilaa wʋ nwʋ zʋ kɛma yɩ nɩ nwʋ a, ɩkɛhyɛ wʋ ɛzɩzɩbɛ na wʋahʋla wʋahʋ̃ wuadiyia wʋ mɛlɛkɛyɛlɛ. Nɔhʋanlɛ odwokɔ yɛ lɛ kɛɛ, sɛ eyiyia odwohilalɛ a, wʋnwʋzʋyilalɛ anʋhʋba nɩ kɔhʋla kɔwʋwa wʋ ma ekegyina yi munwa. Mɩnla ɔhʋanɩ zʋ a?

7. Mɩnla ɔhʋanɩ zʋ yɛ sɛ eyila wʋ nwʋ zʋ a, ɩkɔwʋwa wʋ ma ekeli nɔhʋanlɛ ɛkɛma Gyehova a?

⁷ Sɛ eyila wʋ nwʋ zʋ ma Gyehova a, íni kɛɛ ɛyɛ mɔɔ wʋzawʋ ɛpɛ yɩ dɔkʋ̃. Eyi kile kɛɛ ɔkɔbʋ nninyeni mɔɔ wʋ anyɩ deli nwʋmɔ nɩɩ bʋtayɩ azʋlɔtʋ mɔɔ ɩázɔ Gyehova anyɩ. (Mt. 16:24) Meti sɛ eyiyia odwohilalɛ a, kɛ banzɛmɔ ɛbaɣizia wʋ nwʋ kɛɛ, ‘Mɩyɛ́ mɩnla a?’ Iluwakɛɛ ezi mɔɔ ɩsɛ kɛɛ ɛyɛ nɩ nwʋ pɔkɔ daada, mɛyɩ yɛ lɛ kɛɛ ekeli nɔhʋanlɛ kɛma Gyehova, na ezi wʋ kɛnɣa kɛɛ ɛkɛyɛ mɔɔ ɩsɔ Gyehova anyɩ. Ɛkɛɣa kɛyɛ kɛɛ Dwoobu mɔɔ ɩávalɩ nwʋmɔ kɛɛ iyiyialɩ ndwokɔzɩzɩbɛ nɩ, ɩvalɩ akɛnɣazɩzɩbɛ ɩhanlɩ kɛɛ: “Miléyiaki mʋ nɔhʋanlɛlilɛ nu nɩ!”—Dwb. 27:5.

8. Mɩnla ɔhʋanɩ zʋ yɛ sɛ ɔdwɩnɩndwɩnɩ wʋnwʋzʋyilalɛ mpayɩ yɩ nwʋ a, ɩkɔwʋwa wʋ ma ekegyina odwohilalɛ munwa a?

⁸ Sɛ ɔdwɩnɩndwɩnɩ wʋnwʋzʋyilalɛ mpayɩ yɩ nwʋ a, ɩkɔwʋwa wʋ ma ekegyina odwohilalɛ munwa. Kɛ ndianwʋ nɩ, asʋ̃ ekehile abiye yɩ nwʋkãvʋlɔ nwʋ anyɩnlɩlelɛ wɔ ɔhʋanɩ mɔɔ ɩávata zʋ a? Anhã! Iluwakɛɛ ɔwɔ Gyehova anʋhʋba daada kɛɛ ɛlɛ́yɛ debe mɔɔ ɩdɩ zɔ.  Sɛ wʋáma ɔhʋanɩ ma akɔnɔ tanɩ de ndɩnɩ wɔ wu nu a, sa ɩyɛ mɛlɛkɛ kɛɛ ɔkɔbʋ nyɛlɩyɛ tanɩ. Eyi kɛma “ɔkɔhwɩ̃ wʋ nwʋ wɔ tanɩvʋlɔ yɩ ɔhʋanɩ nwʋ.”—Ɛɣɛ. 4:​14, 15.

9. Mɩnla ɔhʋanɩ zʋ yɛ sɛ ɔdwɩnɩndwɩnɩ wʋnwʋzʋyilalɛ mpayɩ yɩ nwʋ a, ɩkɔwʋwa wʋ ma ɛkɛva sunzuma ɔfʋã nu nninyeni keli bɔmʋnlɩ a?

⁹ Na sɛ enyia egyima be mɔɔ ɩkɛma ekedindiã dɩyɛzumanlɛhɔlɛ nu sʋ̃ ɛ? Pɩlazunɛ bela íni nwʋmɔ kɛɛ ɔkɔnwʋ mɔɔ ɩsɛ kɛɛ ɛyɛ. Iluwakɛɛ ansaana ekenyia ɔzɔ egyima yɩ nɩ, nɩ ezi pɔkɔ daada kɛɛ, ɛlɛ́yɛ egyima bela mɔɔ ɩkɛma ekedindiã dɩyɛzumanlɛhɔlɛ nu. Meti elédi bɔmʋnlɩ kele ɔzɔ egyima nɩ kediã nu, na akʋ̃ aɣinzi yi wʋabɩbɛ ɔhʋanɩ mɔɔ okoluwa zʋ kɔhɔ dɩyɛzumanlɛ. Sɛ yɛdwɩnɩndwɩnɩ kezimɔ nɩ Gyisɛsɩ zi yɩ kɛnɣa kɛɛ ɩkɛma yɩ Zɩ yɩ anyɩ kele nɩ nwʋ a, ɩkɛma yɛkɛyɛ ndɛndɛ yɛkɔbʋ dɩyɛ bela mɔɔ yezi kɛɛ ɩlɛ́ma Nyamɩnlɩ mɔɔ yeyila yɛ nwʋ zʋ yɛma yɩ nɩ yɩ anyɩ kele.—Mt. 4:10; Dwɔ. 8:29.

10. Wɔ wu onlumanlɛ mɛda nɩ, mɩnla ɔhʋanɩ zʋ yɛ Gyehova kɔhʋla kɔwʋwa wʋ ma ‘ɔkɔhɔ zʋ kɔdʋwa’ Gyisɛsɩ a?

¹⁰ Nɔhʋanlɛ odwokɔ yɛ lɛ kɛɛ, ndwokɔzɩzɩbɛ nɩɩ odwohilalɛ mɔɔ yeyiyia nɩ, ɩma yenyia ɔnwʋmɔ ɔhʋanɩ yɛda yɩ ali kɛɛ yezi yɛ kɛnɣa kɛɛ ‘yɛkɔhɔ zʋ yɛkɔdʋwa’ Gyisɛsɩ. Ɛyɛ yɩ zɔ a, ekenyia anwʋlazʋ kɛɛ Gyehova kɔwʋwa wʋ. Bayɩbʋlʋ yɩ kã kɛɛ: ‘Nyamɩnlɩ ɩdɩ nɔhʋanlɛvʋlɔ, meti ɩlɛ́ma ɔhʋanɩ ma odwohilalɛ mɔɔ mʋnlʋmmɔ bɔlɔ́kʋla yi munwa kyina nɩ ɩkɔdʋ mʋnlʋmmɔ kyɩ̃. Mʋnlʋmmɔ bo odwohilalɛ mmɩlɩ nɩ nu po, ɩkɛma anwʋzɩzɩbɛ mʋnlʋmmɔ, ma mʋnlʋmmɔ bɛkɛva bekegyina yi munwa.’—1 Kɔl. 10:13.

KEZIMƆ YƐKƆHƆ ZƲLƆ YEKELI GYISƐSƖ MƐDA

11. Ɔhʋanɩba azʋlɔtʋ mɔɔ yekoluwa zʋlɔ kɔhɔ zʋ keli Gyisɛsɩ mɛda nɩ, numɔ ɔkʋ̃ yɛ lɛ mɩnla a? (Kila mfonyini yi sʋ̃.)

¹¹ Gyisɛsɩ zʋ̃ yɩ ahʋnlɩnɩ munwala nu zʋ̃mɩnlɩ Gyehova, na nɩ ɩta ɩbɔ yɩ mpayɩ.  (Lk. 6:12) Nɔhʋanlɛ nu nɩ, ɔhʋanɩba ɔkʋ̃ mɔ yɛkɔhʋla yekoluwa zʋlɔ yekeli Gyisɛsɩ mɛda wɔ ye onlumanlɛ mɛda yɛ lɛ kɛɛ, yɛkɛbɩbɛ ahʋanɩ mɔɔ yekoluwa zʋlɔ yekeɣike Gyehova. Bayɩbʋlʋ kã kɛɛ: “Ɔhʋanɩ nɩ mɔɔ ye munwa ɩzɛlɩ yɛ nwʋ, na yeluwa ɔzʋlɔ nkʋ̃ʋ̃ ɩɣa idwu nnɛ nɩ, mʋnlʋmmɔ bɛmá yeluwa ɔzɔ ɔhʋanɩ nɩ zʋ yɛhɔ yɩ anyunu.” (Fɩl. 3:16) Ɩyɛ a ɛkɛdɩ mmeliyema mmenyia nɩɩ mmaalɛ mɔɔ bɛyɛɛ sʋ̃maa wɔ Gyehova yɩ ɔzʋ̃mɩnlɛ nu bo ozumanlɛnwʋnlɛ azʋlɔtʋ. Ebiye a, bɔhɔ Bulombunlililɛ Odwokɔbahanlɛmaa Sukuulu anzɛnyɩɩ bodu bɔhɔ dɩka mɔɔ mmʋwalɩyɛ nwʋ hyinyia. Sɛ wʋ bʋwabɩlɛ kɛma ɔhʋanɩ a, sa ɔkʋla fa bʋtayɩ baaba eyimmɔ be esiye wʋ anyɩ zʋ. Gyehova yi mmenii pɩbɛ ahʋanɩ azʋlɔtʋ mɔɔ bokoluwa zʋ bɛkɛdɛlɛ bɔ ɔzʋ̃mɩnlɛ nu. (Egy. 16:9) Na sɛ sikalɛyɩ ɔlɔ́kʋla kɛyɛ zɔ sʋ̃ ɛ? Áma ɛtɩ nɣanlɩ kɛɛ bɛzabɛ mɔɔ bɔkɔhʋla bɛkɛyɛ zɔ nɩ bɔ nwʋ hyinyia tɛla wʋ. Mɔɔ ihyinyia yɛ lɛ kɛɛ ɔkɔhɔ zʋ kegyina pindinyii. (Mt. 10:22) Kakɛ eɣile bela kɛɛ, mɔɔ ɔkɔhʋla kɛyɛ kɛva kɔzʋ̃mɩ Gyehova kɛmɔ wʋ bʋwabɩlɛ kɛma ɔhʋanɩ nɩ, yɩ anyɩ sɔ yɩ. Eyi dɩ dɩyɛ mɔɔ nwʋmɔ hyinyia ama wʋahʋla wʋahɔ zʋlɔ wʋali Gyisɛsɩ mɛda wɔ wu onlumanlɛ mɛda.—Ndw. 26:1.

12-13. Sɛ wʋ anyɩnlɩlelɛ zʋ tɩ a, mɩnla yɛ ɔkɔhʋla kɛyɛ a? (1 Kɔlɛntɩmaa 9:​16, 17) (Kila alɩka mɔɔ ise “ Kɔ Zʋlɔ Tu Tɔlɔnwa yɩ.”)

¹² Na sɛ aɣile asã yɩ ɔnwʋ kɛɛ wʋ mpayɩwɔlɛ ɩ́zʋ̃ wʋ ahʋnlɩnɩ nu anzɛnyɩɩ wʋ anyɩ iáleli dasɩlɛlilɛ egyima yɩ nwʋ kɛmɔ nɩ ɩdɩ ahyɛasɩ yɩ a, mɩnla yɛ ɛkɛyɛ a? Na sɛ wʋ Bayɩbʋlʋ ɛɣɩngalɛ ɩáyɛ wʋ fɛ dɔkʋ̃ sʋ̃ ɛ? Sɛ ɛtɩ nɣanlɩ zɔ wɔ wu onlumanlɛ mɛda a, áma enyia adwɩnɩ kɛɛ Gyehova ɩyɩ yi sunzuma wɔ wʋ zʋ. Iluwakɛɛ wʋáli munli nɩ ti, ɩyɛ a wʋ nɣanlɩdɩlɛ kɔhʋla kɛzɩnza. Sɛ wʋ anyɩnlɩlelɛ zʋ ɩtɩɩ a, sa ɔkʋla ɔdwɩnɩndwɩnɩ sʋ̃mavʋlɔ Pɔɔlʋ yi ndianwʋ yɩ nwʋ. Ɩwɔ numɔ kɛɛ ɩwɔlɩ  mmɔdɩnɩ izumazumanlɩ Gyisɛsɩ dɩyɛ, naasʋ̃ nɩ izi kɛɛ itwu mmɩlɩ be a, anyɩnlɩlelɛ mɔɔ ɩlɛ ɩyɛɛ yɩ ɔzʋ̃mɩnlɛ egyima nɩ, ɔzʋlɔ kɔhʋla kɛdɩ. (Kɩnga 1 Kɔlɛntɩmaa 9:​16, 17.) Ɩhanlɩ kɛɛ: “Naasʋ̃ mɩyɛ yɩ kɛɛ ɩdɩ egyima mɔɔ ɩsɛ kɛɛ mɩyɛ. Sianti yɛ lɛ kɛɛ, Nyamɩnlɩ yɛ ɩva iwula mɩ sa kɛɛ mɩyɛ a.” Sɛ yɛkɛhã a, nɩ Pɔɔlʋ izi yɩ kɛnɣa kɛɛ ɩkɔwɔ mmɔdɩnɩ ikowie yɩ ɔzʋ̃mɩnlɛ egyima yɩ ɩávalɩ nwʋmɔ kezimɔ nɩ ɩtɩ nɣanlɩ nɩ.

¹³ Wʋzawʋ sʋ̃ iluwakɛɛ ɔtɔ sini ti, íni kɛɛ ekyina wʋ nɣanlɩdɩlɛ zʋ esizi abɔkɔ. Si wʋ kɛnɣa kɛɛ ɛkɛyɛ dɩyɛ baaba ɩávalɩ nwʋmɔ kezimɔ ɛtɩ nɣanlɩ bela nɩ. Sɛ ɔkɔ zʋlɔ yɛ mɔɔ ɩdɩ baaba a, mmɩlɩ ɩkɔlɩ zʋlɔ nɩ ɩkɛzɩnza kezimɔ ɛtɩ nɣanlɩ nɩ. Kɛmɔ ɩdɩ bela nɩ, sɛ ɔkɔ zʋlɔ yɛ wʋzawʋ wʋ dɩyɛzumanlɛ, ɔbɔ mpayɩ, ɔkɔ dɩyɛzumanlɛ na ɛfa wʋ nwʋ wula odwokɔbahanlɛ egyima yɩ nu a, ɩkɔwʋwa wʋ ma ɔkɔhɔ zʋ keli Gyisɛsɩ mɛda wɔ wu onlumanlɛ mɛda. Sɛ wu mmeliyema nwʋ pindinyiigyinanlɛ mɔɔ ɛlɛ ɔsʋ̃mɩɩ Gyehova nɩ a, ɩkɛhyɛ be dedi ɛzɩzɩbɛ.—1 Tɛs. 5:11.

‘KILAHILA WƲ AHƲNLƖNƖ NU NA TWE WƲ NWƲ KILA’

14. Mɩnla yɛ ɩsɛ kɛɛ yɛyɛ a, na mɩnla ti a? (2 Kɔlɛntɩmaa 13:5)

¹⁴ Wɔ wu onlumanlɛ mɛda nɩ, dɩyɛ ɔkʋ̃ sʋ̃ mɔɔ ɩkɔhʋla ɩkɔwʋwa wʋ yɛ lɛ kɛɛ, ɛkɛda kɛbɩbɛlɩ wʋ nwʋ nu. (Kɩnga 2 Kɔlɛntɩmaa 13:5.) Ɩwɔ numɔ la a, nɩ ehila kɛɛ ɛta ɔbɔ mpayɩ, ɛyɛ wʋ Bayɩbʋlʋ ɛɣɩngalɛ, ɔkɔ dɩyɛzumalɛ, na ɛfa wʋ nwʋ wula dasɩlɛlilɛ egyima yɩ nu a. Bɔ mmɔdɩnɩ pɩbɛ ahʋanɩ mɔɔ okoluwa zʋ kodu mpʋnɩ wɔ nninyeni eyimmɔ nu. Kɛ ndianwʋ nɩ, bizia wʋ nwʋ ndwokɔ eyimmɔ: ‘Asʋ̃ sa mʋkʋla mikilehile Bayɩbʋlʋ yɩ tʋwɔlɛ ehilehilelɛ nu mikile mmenii mvʋlɔ a? Asʋ̃ ahʋanɩ mvʋlɔ wɔ kɛnɩ mɔɔ sa mʋkʋla muduwa zʋ mɩma mɩ dasɩlɛlilɛ egyima yɩ yɛ anyɩnlɩlelɛ a? Asʋ̃ mʋbɔ nninyeni pɔkyɩɩ be nwʋ mpayɩ a, na mɔɔ mʋbɔ nwʋmɔ mpayɩ nɩ da yɩ ali kɛɛ mʋwɔ Gyehova nu anwʋlazʋ kezile a? Asʋ̃ mʋkɔ dɩyɛzumanlɛ eɣile bela a? Sɛ mʋkɔ dɩyɛzumanlɛ a, kɛ ɩkɛyɛ na mɩava mɩ adwɩnɩ miaziye mɔɔ yesumaa nɩ zʋ na mɩava mʋ nwʋ miawula numɔ bʋwɔ a?’

15-16. Mɩnla yɛ osuma wɔ Robert yi ozumanlɛnwʋnlɛ yɩ nu a?

¹⁵ Ɔnwʋmɔ hyinyia kɛɛ ɔnwʋ wʋ mɛlɛkɛyɛlɛ sʋ̃. Eliyema benyia be mɔɔ bɔfʋlɛ yɩ Robert yi ndianwʋ yɩ ma yɛtɩ eyi tʋ. Ɩkã kɛɛ: “Milili alʋbɔ 20 nɩ, minyianlɩ egyima be mɩyɛlɩ. Eɣile ɔkʋ̃ be mɔɔ yɛbɔlɩ egyima nɩ, kɛdɛkɛ be mɔɔ nɩ mɩ nɩɩ yɩ yɛ egyima hanlɩ kɛɛ mɩmá yɛhɔ yɩ  awudo. Ɩhanlɩ kɛɛ yɛzayɛ anwɩ̃ yɩ la yɛ yɛkɔɔ a, na sa ɩma mɩ nɩɩ yɩ da po. Ahyɛasɩ yɩ mɛyɩ, mɩákã odwokɔ baaba bela mikile yi, naasʋ̃ aɣinzi yi, mɩvalɩ mɩ agyia miziyeli azɩ na mɩhanlɩ kɛɛ mʋlɔ́kɔ, na mɩmanlɩ ɩnwʋnlɩ sianti mɔɔ mʋlɔ́kɔ nɩ.” Robert yɛlɩ dɩyɛ kɛɛ iáyiaki yɩ nwʋ ɩma ɔzɔ odwohilalɛ yɩ. Ɩwɔ numɔ, aɣinzi mɔɔ nɩ ɩdwɩnɩndwɩnɩɩ mɔɔ izili yi nwʋ nɩ, ɩnwʋnlɩ kɛɛ ankɩ sa ɩkʋla idi bʋwabɩlɛ yɩ nwʋ egyima bʋwɔ. Ɩhanlɩ kɛɛ: “Mɩáfa mɩ agyia misiye azɩ anzɛnyɩɩ mɩápʋ yɩ ndɛndɛ kɛmɔ Dwosefi bʋlɩ Pɔtifa yɩ yɩ nɩ. (Gyn. 39:​7-9) Nɔhʋanlɛ nu nɩ, ɩyɛlɩ mʋ nnwʋánlɩ po kɛɛ nɩ ɩyɛ sɩ ɩma mɩ kɛɛ mɩkɛhã kɛɛ mɩlɛ́yɛ. Bʋwabɩlɛ eyi manlɩ mʋnwʋnlɩ kɛɛ nɩ ihyinyia kɛɛ mɩhyɛ mɩ nɩɩ Gyehova avinli abusunwawɔlɛ yɩ nu ɛzɩzɩbɛ.”

¹⁶ Sɛ wʋzawʋ sʋ̃ ɛpɩbɛlɩ wʋ nwʋ nu kɛmɔ Robert yɛlɩ nɩ a, ekenyia zʋlɔ mfasʋ. Sɛ ɔkʋla di odwohilalɛ be zʋ po a, bizia wʋ nwʋ kɛɛ, ‘Ilili mmɩlɩ tɩndɩnlɩ ana ansaana mɩbahã kɛɛ mɩlɛ́yɛ a?’ Sɛ ɔnwʋ kɛɛ ɔtɔ sini wɔ dɩka be a, áma wu padi kolɔ. Mfomi ma wʋ anyɩ ilé kɛɛ ɔnwʋ wʋ mɛlɛkɛyɛlɛ. Kã wʋ mɛlɛkɛyɛlɛ nwʋ odwokɔ kile Gyehova na yɛ nninyeni mɔɔ ɩkɛhyɛ ɛpɛ mɔɔ ɔwɔ kɛɛ ekediye Gyehova nɩ nu ɛzɩzɩbɛ.—Ndw. 139:​23, 24.

17. Mɩnla ɔhʋanɩ zʋ yɛ Robert yi ozumanlɛnwʋnlɛ yɩ kã Gyehova yi dima a?

¹⁷ Dɩyɛ fʋlɔ be sʋ̃ wɔ kɛnɩ mɔɔ sa yɛkʋla yesuma wɔ Robert yi ndianwʋ yɩ nu. Ɩdʋwalɩ zʋlɔ kɛɛ: “Mmɩlɩ mɔ mɩhã mihileli kɛdɛkɛ yɩ kɛɛ mɩlɛ́yɛ nɩ, ɩhanlɩ kɛɛ, ‘Ɛyɛ dɩyɛ baaba!’ Meti miɣizialɩ yɩ kɛɛ, mɩnla yɛ ɩpɛɛ ikehile a? Yɛɛ ibahilehile numɔ kɛɛ, yɩ ɔhɔnwʋ be mɔɔ ɩ́dɩ Dasɩvʋlɔ dɔkʋ̃ nɩ hanlɩ hileli yi kɛɛ Gyehova Dasɩvʋlɔ nnwuakula munwatĩĩ sɛ benyia ɔnwʋmɔ ɔhʋanɩ a, bɛyɛ tanɩ besiye. Meti ɩhã ihileli yɩ ɔhɔnwʋ yɩ kɛɛ, ɔzɔ dɩyɛ a, nɩ sa itwe mɩ ikila. Mɔɔ ɩhanlɩ nɩ manlɩ mɩ anyɩ leli kɛɛ mɩdɩlɩ Gyehova yi dima nwʋ.”

18. Mɩnla yɛ ezi wʋ kɛnɣa kɛɛ ɛkɛyɛ wɔ wu onlumanlɛ mɛda a? (Kila alɩka mɔɔ ise “ Ndwokɔ Anwɩ̃ Be Mɔɔ Wʋ Anyɩ Keleli Nwʋmɔ.”)

¹⁸ Sɛ eyila wʋ nwʋ zʋ ɛma Gyehova na onuma a, ɛda yɩ ali kɛɛ ɛpɛ kɛɛ ɛtɩ Gyehova yi dima nwʋ. Sa ɔkʋla nyia anwʋlazʋ kɛɛ Gyehova ɩnwʋ ndwokɔzɩzɩbɛ mɔɔ eyiyia nɩɩ odwohilalɛ azʋlɔtʋ mɔɔ ekyina yi munwa nɩ. Ikeyila mmɔdɩnɩ mɔɔ ɔbɔɔ kɛɛ ekeli nɔhʋanlɛ nɩ zʋ. Nyia dedi kɛɛ ikoluwa yi sunzuma nwanzanwanza nɩ zʋ ɩkɛma ekenyia anwʋzɩzɩbɛ mɔɔ ɛkɛva kɛyɛ zɔ. (Lk. 11:​11-13) Iluwa Gyehova yɩ mmʋwalɩyɛ zʋ nɩ, sa ɔkʋla kɔ zʋ di Gyisɛsɩ mɛda wɔ wu onlumanlɛ mɛda.