1. Ozumalɛdɩyɛ mɔɔ ɩkyɩkyɩ yɛ ɛɣɛɛlɛ ɛhɩnla dɩyɛ yɛ Gyehova manlɩ Abilehamɩ nyianlɩ a?

 NYAMƖNLƖ luwalɩ bɔvʋlɔ be zʋ hã hileli Abilehamɩ kɛɛ, ɩkɛzɩkɛ Sɔdɔmɩ nɩɩ Gomola. Nɩ eyi dɩ nkɔmmɔwɔlɛ be mɔɔ Abilehamɩ yɩ ɛɣɛɛlɛ léfi kyɩ̃. Nɩ odwokɔ eyi dide benyia nɔhʋanlɛvʋlɔ yɩ. Meti iɣizialɩ Nyamɩnlɩ kɛɛ: ‘Amba kɛɛ ɛbazɩkɛ ɛdɩnɣɛlɛmaa kɛhɩnla tanɩyɛlɛmaa nwʋ a? Asʋ̃ azɩlɛ yɩ munwala zʋ Ndɛnɩwuwalɛvʋlɔ nɩ ɩlɛ́yɛ mɔɔ ɩtɩnɣɛ anzɛnyɩɩ?’ Gyehova zʋ̃ abʋtalɩ nu wʋwalɩ Abilehamɩ mɔɔ ɩdɩ yɩ ɔhɔnwʋ mɔɔ ɩpɛ yi odwokɔ paa nɩ ma inyianlɩ ozumalɛdɩyɛ be. Mɛyɩ yɛ lɛ kɛɛ: Nyamɩnlɩ lɛ́sɩkɛ ɛdɩnɣɛlɛmaa kyɩ̃. Yenyia ozumalɛdɩyɛ eyi zʋ mfasʋ, na ɩkyɩkyɩ yɛ ɛɣɛɛlɛ paa wɔ nnɛ.—Gyn. 18:​23-33.

2. Mɩnla ti mɔɔ yɛkɔhʋla yekenyia anwʋlazʋ kɛɛ, mmɩlɩ bela mɔɔ Gyehova kowuwa mmenii ndɛnɩ nɩ, ɩyɛ mɔɔ ɩtɩnɣɛ na ɩda nwɔkɛnwʋnlɛ ali a?

² Mɩnla ti mɔɔ yɛkɔhʋla yekenyia anwʋlazʋ kɛɛ, mmɩlɩ bela mɔɔ Gyehova kowuwa mmenii ndɛnɩ nɩ, ɩyɛ mɔɔ ɩtɩnɣɛ na ɩda nwɔkɛnwʋnlɛ ali a? Iluwakɛɛ yezi kɛɛ “Gyehova mɛyɩ, ikila ahʋnlɩnɩ nu.” (1 Sa. 16:7) Nɔhʋanlɛ odwokɔ yɛ lɛ kɛɛ, izi mɔɔ ɩwɔ “desanii bela yɩ ahʋnlɩnɩ nu.” (1 Aw. 8:39; 1 Mm. 28:9) Eyi dɩ nɔhʋanlɛ odwokɔ mɔɔ ɩyɛ anyɩnlɩlelɛ baaba. Gyehova zi nɣɛlɛbɛ tɛla yɛ kʋlaa. Meti kɛ mmɩlɩ bela yɛ yɛkɛdɩ sianti mɔɔ ɩyɛ debe nɩ tʋ a. Eyi ti, ɩfata paa kɛɛ sunzuma yɩ hanlɩ sʋ̃mavʋlɔ Pɔɔlʋ ma ɩhanlɩ ɩvalɩ Gyehova Nyamɩnlɩ nwʋ kɛɛ: “Aninyia yɛ ɩkɔhʋla ɩkɛdɩ Nyamɩnlɩ yɩ adwɩnɩ tʋ a?”—Wul. 11:33.

3-4. Mɩnla ndwokɔ yɛ ebiye a yekeɣizia a, na mɩnla yɛ yekozunzu nwʋmɔ wɔ dɩyɛzumanlɛ eyi nu a? (Dwɔɔnʋ 5:​28, 29, NWT)

³ Yezi kɛɛ Gyehova yɛ mɔɔ ɩtɩnɣɛ mmɩlɩ bela dɩyɛ, naasʋ̃ ebiye a yekeɣizia odwokɔ mɔɔ Abilehamɩ ɣizialɩ nɩ be kɛɛ: ‘Asʋ̃  mmenii be mɔɔ Gyehova zɩkɛlɩ bɛ, dɩkɛɛ mmenii mɔɔ nɩ bɔwɔ Sɔdɔmɩ nɩɩ Gomola nɩ kɔhʋla kɔwʋwa azɩ ebiyekʋ̃ a? Asʋ̃ bo nu be kɛhɩnla “tanɩyɛlɛmaa mɔɔ bɛbadunwo bɛ wɔ owulo nu bɛkɛɣa nnwʋanlɩ nu” nɩ nwʋ a?’—Egy. 24:15.

⁴ Bɛmá yezunzu ntɩyasɩ mɔɔ yɛwɔ wɔ awudunwolɩyɛ yɩ nwʋ nɩ nwʋ. Eɣile asã yɩ la, yenyia ntɩyasɩ fʋlɔ yɛvalɩ bɛzabɛ mɔɔ “bɛbadunwo bɛ bɛkɛɣa nnwʋanlɩ nu” nɩɩ bɛzabɛ mɔɔ “bɛbadunwo bɛ na bɛawuwa bɛ ndɛnɩ” nɩ nwʋ. a (Kɩnga Dwɔɔnʋ 5:​28, 29, NWT.) Ɔzɔ ntɩyasɩ fʋlɔ eyi ɩma yɛyɛ nzɩnzanlɩyɛ azʋlɔtʋ be, na yekozunzu nwʋmɔ wɔ dɩyɛzumanlɛ eyi nɩɩ mɔɔ ili kɛnɩ nɩ nu. Mɔɔ ɩfalɩ Gyehova yɩ ndɛnɩwuwalɛ mɔɔ ɩtɩnɣɛ nwʋ nɩ, yekeli bɔmʋnlɩ yekozunzu mɔɔ yézi nɩɩ mɔɔ yezi nɩ nwʋ.

MƆƆ YÉZI

5. Mɩnla yɛ mmɩlɩ be yɛ awuuku azʋlɔtʋ nɩ hanlɩ valɩ mmenii mɔɔ Gyehova zɩkɛlɩ bɛ wɔ Sɔdɔmɩ nɩɩ Gomola nɩ nwʋ a?

⁵ Mmɩlɩ be, yɛ awuuku azʋlɔtʋ nɩ hanlɩ mɔɔ ɩkɔdʋ mmenii mɔɔ Gyehova buwa bɛ ndɛnɩ kɛɛ bɛdɩ tanɩyɛlɛmaa nɩ nwʋ odwokɔ. Nɩ yɛtɩ yɩ tʋ kɛɛ, mmenii mɔɔ Gyehova zɩkɛlɩ bɛ dɩkɛɛ mmenii mɔɔ nɩ bɔwɔ Sɔdɔmɩ nɩɩ Gomola nɩ, bolótunwo bɛ wɔ owulo nu. Naasʋ̃ mmɩlɩ mɔ yɛvalɩ mpayɩ yezumanlɩ nwʋmɔ dɩyɛ yɛhɔlɩ aɣinzi nɩ, ɩlalɩ ali petee kɛɛ yɛlɔ́kʋla yɛkɛva yɛ sa yekezi yɛ kɛnɣa yɛkɛhã zɔ. Mɩnla ti a?

6. (a) Ndianwʋ mɔɔ ɩfalɩ ndɛnɩwuwalɛ mɔɔ Gyehova va manlɩ tanɩyɛlɛmaa be nɩ, ebiye yɛ lɛ ɛhɩnla dɩyɛ a? (b) Mɩnla yɛ yézi a?

⁶ Bɛmá yezunzu Bayɩbʋlʋ nu ndianwʋ eyimmɔ nwʋ yehila. Bayɩbʋlʋ nu ndwokɔ azʋlɔtʋ kã kezimɔ Gyehova wuwalɩ tanɩyɛlɛmaa ndɛnɩ, dɩkɛɛ mmenii mɔɔ bowuli wɔ Nzuloyilɛ nɩ nu anzɛnyɩɩ amanlɩ asunwa mɔɔ nɩ bɔwɔ Anʋhʋba Azɩlɛ yɩ zʋ mɔɔ Gyehova hyɛlɩ yi mmenii kɛɛ bɛzɩkɛ́ bɛ anzɛnyɩɩ Asiliyia azogyiamaa 185,000 mɔɔ Gyehova yɩ bɔvʋlɔ hunli bɛ ohunluma ɔkʋ̃ nɩ nwʋ odwokɔ. (Gyn. 7:23; Dit. 7:​1-3; Ayɩ. 37:​36, 37) Wɔ ndwokɔ eyimmɔ nu nɩ, asʋ̃ Bayɩbʋlʋ yɩ kã yɩ petee kɛɛ Gyehova zili pɔkɔ kɛɛ ɩsɩkɛɛ bɛ donwuu mɔɔ ilótunwo bo nu ɔkʋ̃ po a? Anhã, ɩáhã zɔ. Mɩnla ti mɔɔ yɛkʋla yɛkã zɔ a?

7. Tanɩyɛlɛmaa mɔɔ bowuli wɔ Nzuloyilɛ yɩ nu anzɛnyɩɩ bohunli bɛ wɔ Keenanɩ azɩlɛ yɩ zʋ nɩ, mɩnla yɛ yézi yɛfalɩ bɔ nwʋ a? (Kila yɩ anyunu mfonyini.)

⁷ Mmenii mɔɔ yɛhã bɔ nwʋ odwokɔ nɩ, yézi mɔɔ Gyehova gyinanlɩ zʋlɔ wuwalɩ bo nu ɔkʋ̃ bela ndɛnɩ; yɛɛ yézi sʋ̃ kɛɛ bɛzabɛ mɔɔ bohunli bɛ nɩ, benyianlɩ ɔnwʋmɔ ɔhʋanɩ bozumanlɩ Gyehova nwʋ dɩyɛ na bonlunli bɔ nwʋ a. Sɛ Bayɩbʋlʋ yɩ ɩkãã Nzuloyilɛ yɩ nwʋ odwokɔ a, ɩkã kɛɛ nɩ Nowa “ituu mmenii fʋlɔ kɛɛ bɔwɔ́ ɛbɩla mɔɔ ɩtɩnɣɛ.” (2 Pit. 2:5) Naasʋ̃ Bayɩbʋlʋ ɩáhã kɛɛ, mmɩlɩ mɔ nɩ Nowa ɩbʋbɔɔ alɩka tɛtɩyɛmʋnlɩ nɩ, nɩ ɩbɔɔ mmɔdɩnɩ kɛɛ ɩkɛhã odwokɔ yɩ kehile enii ɔkʋ̃ bela wɔ azɩlɛ yɩ zʋ. Ɔzɔ la sʋ̃ yɛ yézi kɛɛ tanɩyɛlɛmaa mɔɔ nɩ bɔwɔ Keenanɩ azɩlɛ yɩ zʋ nɩ, benyianlɩ ɔnwʋmɔ ɔhʋanɩ bozumanlɩ Gyehova nwʋ dɩyɛ na bɛzɩnzanlɩ bɛ ɛbɩlawɔlɛ a.

8. Mmenii mɔɔ nɩ bɔwɔ Sɔdɔmɩ nɩɩ Gomola nɩ, mɩnla yɛ yézi yɛfalɩ bɔ nwʋ a?

⁸ Na mmenii mɔɔ bɛzɩkɛlɩ bɛ wɔ Sɔdɔmɩ nɩɩ Gomola nɩ sʋ̃ ɛ? Nɩ ɛdɩnɣɛlɛnii Lɔɔtʋ da bo nu. Asʋ̃ Lɔɔtʋ duli bɛ fʋlɔ kɛɛ bɔwɔ́ ɛbɩla mɔɔ ɩtɩnɣɛ a? Yézi. Ɩwɔ numɔ, nɩ bɛdɩ tanɩyɛlɛmaa ankasa dɩyɛ, naasʋ̃ ekila a, nɩ bo nu ɔkʋ̃ bela zi mɔɔ ɩdɩ baaba nɩɩ tanɩ a? Kakɛ kɛɛ, twonwa yi nu mmenyia duli bɔ nwʋ hɔlɩ Lɔɔtʋ yɩ ngyɛvʋlɔ yɩ zʋ kɛɛ bɛ nɩɩ bɛ kɛla. Bayɩbʋlʋ yɩ kã kɛɛ, nɩ nnwuakula mmenyia po kɩnla nwʋ. (Gyn. 19:4; 2 Pit. 2:7) Asʋ̃ yɛkɔhʋla kɛhã kɛɛ, Gyehova Nyamɩnlɩ mɔɔ ɩnwʋ nwɔkɛ nɩ zili pɔkɔ kɛɛ ɩkɛzɩkɛ bɛ donwuu mɔɔ ilótunwo bo nu ɔkʋ̃ po a? Anhã, yɛlɔ́kʋla kɛhã zɔ. Nkɔmmɔ mɔɔ Gyehova nɩɩ Abilehamɩ wɔlɩ nɩ ma yɛnwʋ kɛɛ nɩ ɛdɩnɣɛlɛmaa bunlu po béni ɔzɔ twonwa yɩ nu. (Gyn. 18:32) Meti nɩ bɛdɩ tanɩyɛlɛmaa, na  Gyehova valɩ pɛlɩpɛlɩlilɛ wuwalɩ bɛ ndɛnɩ kɛmɔ bɛ nyɛlɩyɛ dɩ. Asʋ̃ yɛkɔhʋla kɛhã yɩ petee kɛɛ ɔzɔ mmenii yi bo nu ɔkʋ̃ po ɩlɛ́kɩnla tanɩyɛlɛmaa mɔɔ bɛbadunwo bɛ nɩ nwʋ a? Anhã, yɛlɔ́kʋla yɛkɛva yɛ sa yekezi yɛ kɛnɣa yɛkɛhã zɔ kʋlaa!

9. Mɩnla yɛ yézi yɛfalɩ Sɔlɔmɔnʋ nwʋ a?

⁹ Naasʋ̃, Bayɩbʋlʋ yɩ kã mmenii be mɔɔ nɩ bɛdɩ ɛdɩnɣɛlɛmaa mɔɔ aɣinzi yi, bɛɣa bɛyɛlɩ mmenii mɔɔ bɛádɩnɣɛ nwʋ odwokɔ. Bulombunli Sɔlɔmɔnʋ dɩ bo nu ɔkʋ̃. Nɩ izi Gyehova bʋwɔ paa, na nɩ izi kezimɔ ɩsɛ kɛɛ ɩsʋ̃mɩ yɩ, na Gyehova yilalɩ yɩ baaba. Naasʋ̃ aɣinzi yi, Sɔlɔmɔnʋ wɔlɩ yɩ tʋ kɛɛ ɩsʋ̃mɩɩ awʋzʋmɩ. Tanɩ mɔɔ ɩyɛlɩ nɩ manlɩ Gyehova valɩ ɛya baaba. Na mɔɔ ɩzʋ̃ yɩ tanɩ yi nu ɩɣalɩ nɩ, ilileli Yizilayamaa nɩ alʋbɔ sʋ̃maa. Ɩwɔ numɔ, Ɛhɛlɛlɛdwokɔ yɩ kã kɛɛ, Sɔlɔmɔnʋ “ɩ nɩɩ yɩ zɩ mmɔ hɔ lalɩ,” mɔɔ nɔhʋanlɛmaa be dɩkɛɛ Bulombunli Devidi kɩnla nwʋ. (1 Aw. 11:​5-9, 43; 2 Aw. 23:13) Naasʋ̃, kezimɔ beziyeli Sɔlɔmɔnʋ nɩ kile kɛɛ ɔhʋanɩ bela zʋ bokodunwo yi a? Bayɩbʋlʋ yɩ ɩáhã. Naasʋ̃ ebiye a abiye kozunzu kɛɛ, iluwakɛɛ Bayɩbʋlʋ kã kɛɛ sɛ abiye wu a, “nɩ íni tanɩ yi tumi yɩ tʋ ebiyekʋ̃” nɩ ti, bɛva Sɔlɔmɔnʋ yɩ tanɩ bɛhyɛ yɩ, meti bokodunwo yi. (Wul. 6:7) Mɔɔ Bayɩbʋlʋ yɩ kã nɩ dɩ nɔhʋanlɛ dɩyɛ, naasʋ̃ mɛyɩ iáhile kɛɛ abiyela mɔɔ ikowu nɩ, bokodunwo yi ɔhʋanɩ bela zʋ. Awudunwolɩyɛ dɩ akyɛdɩ mɔɔ ɩzʋ̃ ɔlɔlɛ Nyamɩnlɩ yɩ kɛnɩ, na ɩfa ɩma bɛzabɛ mɔɔ ɩpɛ kɛɛ ɩma ɔnwʋmɔ ɔhʋanɩ bɛ ma bɔsʋ̃mɩ yɩ daabaa nɩ. (Dwb. 14:​13, 14; Dwɔ. 6:44) Asʋ̃ Sɔlɔmɔnʋ kɛhɩnla nwʋ a? Gyehova yɛ izi a, amɩyɛ mɛyɩ yézi. Naasʋ̃ yezi kɛɛ Gyehova mɛyɩ, ɩkɛyɛ mɔɔ ɩtɩnɣɛ.

MƆƆ YEZI

10. Kɛ Gyehova tɩ nɣanlɩ se wɔ tanɩyɛlɛmaa bɛ ɛzɩkɛlɛ nwʋ a? (Izikɩyɛlɩ 33:11) (Kila mfonyini yi sʋ̃.)

¹⁰ Kɩnga Izikɩyɛlɩ 33:11. Gyehova ma yɛnwʋ kezimɔ ɩtɩ nɣanlɩ mmɩlɩ mɔ ibuwaa mmenii ndɛnɩ nɩ. Sunzuma yɩ hanlɩ sʋ̃mavʋlɔ Pita ma ɩhanlɩ ndwokɔ mɔɔ nkɔmɩhyɛnii Izikɩyɛlɩ hanlɩ nɩ be kɛɛ, ‘Gyehova ɩábɛ kɛɛ ɩsɩkɛ abiyela.’ (2 Pit. 3:9) Ɔzɔ nɔhʋanlɛ odwokɔ eyi kyɩkyɩ yɛ ɛɣɛɛlɛ baaba. Meti yezi kɛɛ Gyehova ɩlɛ́sɩkɛ abiyela kɛkɛ gyɩsɛ ɩwɔ sianti baaba be ti mɔɔ ɩsɛ kɛɛ ɩyɛ zɔ. Gyehova yɩ nwɔkɛnwʋnlɛ dɩ kezi paa, na ɩda yɩ ali wɔ mmɩlɩ bela mɔɔ ɩfata nɩ.

11. Aninyiammɔ yɛ bolótunwo bɛ a, na kɛ ɩyɛ mɔɔ yɛnwʋ yɩ zɔ a?

¹¹ Mɩnla yɛ yezi yɛfalɩ mmenii mɔɔ bolótunwo bɛ nɩ nwʋ a? Bayɩbʋlʋ yɩ kã bo nu ɛgyɩkɩ̃ɩ̃ be nwʋ odwokɔ. b Kɛ ndianwʋ nɩ, Gyisɛsɩ hanlɩ kɛɛ Dwudasɩ Ɩsɩkalɩyɔtʋ mɛyɩ, bolótunwo yi. (Mk. 14:21; Dwɔ. 17:12 c) Dwudasɩ ɩhyɛlɩda idwodwuli idiyialɩ Gyehova Nyamɩnlɩ nɩɩ yɩ Ɣa yɩ. (Mk. 3:29 d) Ɔzɔ sʋ̃ la yɛ Gyisɛsɩ hanlɩ kɛɛ, Nyamɩnlɩzʋ̃mɩnlɛ nu mbanimbani be mɔɔ bodwodwuli bediyialɩ yɩ nɩ bokowu, mɔɔ belényia awudunwolɩyɛ. (Mt. 23:33) Na sʋ̃mavʋlɔ Pɔɔlʋ sʋ̃ hanlɩ kɛɛ, ɔvʋakɩlɛmaa mɔɔ bɛánlu bɔ nwʋ nɩ, bolótunwo bɛ.—Hib. 6:​4-8; 10:29.

12. Mɩnla yɛ yezi yɛfalɩ Gyehova yɩ nwɔkɛnwʋnlɛ nwʋ a? Ma nwʋmɔ ndianwʋ.

¹² Naasʋ̃, mɩnla yɛ yezi yɛfalɩ Gyehova yɩ nwɔkɛnwʋnlɛ nwʋ a? Mɩnla ɔhʋanɩ zʋ yɛ ihile kɛɛ “ɩábɛ kɛɛ ɩsɩkɛ abiyela” a? Mɔwʋ sunzu kezimɔ ɩlalɩ nwɔkɛnwʋnlɛ ali ihileli mmenii be mɔɔ bɛyɛlɩ tanɩ mɔɔ numɔ yɛ ɔnlʋmɔ nɩ nwʋ. Bulombunli Devidi yɛlɩ tanɩ azʋlɔtʋ mɔɔ numɔ yɛ ɔnlʋmɔ, dɩkɛɛ agyiahʋnlɩzɩkɛlɛ nɩɩ awulilɛ. Naasʋ̃ Devidi nlunli yɩ nwʋ, meti Gyehova nwʋnlɩ yɩ nwɔkɛ, na ɩva ɩhyɛlɩ yɩ. (2 Sa. 12:​1-13) Bulombunli Manasɛ sʋ̃ yɛlɩ tanɩ nɣezile sʋ̃maa wɔ yɩ ɛbɩlawɔlɛ nu. Ɩyɛlɩ tanɩ ɩhɔlɩ aɣinzi paa, naasʋ̃, Gyehova nwʋnlɩ yɩ nwɔkɛ na  ɩvalɩ yɩ tanɩ ɩhyɛlɩ yɩ, iluwakɛɛ inlunli yɩ nwʋ. (2 Mm. 33:​9-16) Ndianwʋ eyimmɔ ma yɛnwʋ kɛɛ, sɛ Gyehova nwʋ sianti be ti mɔɔ ɩsɛ kɛɛ ɩda nwɔkɛnwʋnlɛ ali ikile abiye a, ɩyɛ zɔ. Ikodunwo ɔzɔ mmenii yi, iluwakɛɛ beleli bedianlɩ numɔ kɛɛ bɛyɛlɩ tanɩ mɔɔ anyɩnlɩbʋlʋ wɔ nu, na bonlunli bɔ nwʋ.

13. (a) Mɩnla ti mɔɔ Gyehova nwʋnlɩ Nɩnɩvɛmaa nɩ nwɔkɛ a? (b) Mɩnla yɛ aɣinzi yi Gyisɛsɩ hanlɩ valɩlɩ Nɩnɩvɛmaa nɩ nwʋ a?

¹³ Akʋ̃ sʋ̃, yezi kezimɔ Gyehova lalɩ nwɔkɛnwʋnlɛ ali hileli Nɩnɩvɛmaa nɩ. Nyamɩnlɩ hã hileli Dwona kɛɛ: “Bɛ tanɩ ɣa dwu mɩ anyunu.” Naasʋ̃ mmɩlɩ mɔ bonlunli bɔ nwʋ wɔ bɛ tanɩ nwʋ nɩ, Gyehova zʋ̃ kunlumiba nu va hyɛlɩ bɛ. Gyehova lalɩ nwɔkɛnwʋnlɛ ali hileli bɛ kʋlaa dɛlalɩ Dwona. Nɩ nkɔmɩhyɛnii Dwona va ɛya paa, meti nɩ ɩsɛ kɛɛ Nyamɩnlɩ kakɛ yɩ kɛɛ Nɩnɩvɛmaa nɩ, “bézi baaba nɩɩ tanɩ.” (Dwn. 1:​1, 2; 3:10; 4:​9-11) Aɣinzi yi, Gyisɛsɩ valɩ ɔzɔ ndianwʋ yɩ hilehileli Gyehova yɩ nwɔkɛnwʋnlɛ nɩɩ yɩ pɛlɩpɛlɩlilɛ nu. Gyisɛsɩ hanlɩ kɛɛ, Nɩnɩvɛmaa mɔɔ bonlunli bɔ nwʋ nɩ, ‘bokodwodwu wɔ ndɛnɩwuwalɛ eɣile nɩ nu.’—Mt. 12:41.

14. Sɛ bɛkã kɛɛ bɛbadunwo Nɩnɩvɛmaa nɩ na bɛawuwa bɛ ndɛnɩ a, ikile mɩnla a?

¹⁴ Sɛ bɛkã kɛɛ bɛbadunwo Nɩnɩvɛmaa nɩ na bɛawuwa bɛ ndɛnɩ a, ikile mɩnla a? Gyisɛsɩ hanlɩ kɛɛ eɣile be, bokodunwo mmenii be na bɛawuwa bɛ ndɛnɩ. (Dwɔ. 5:​29, NWT) Nɩ Gyisɛsɩ ɩkãã yɩ Ɔlʋbɔ Abʋmɩ Tumililɛ nwʋ odwokɔ. Ɔzɔ mmɩlɩ nɩ yɛ ‘bokodunwo baabayɛlɛmaa nɩɩ tanɩyɛlɛmaa munwatĩĩ’ a. (Egy. 24:15) Ɔzɔ tanɩyɛlɛmaa nɩ, bokodunwo bɛ na bɛawuwa bɛ ndɛnɩ. Eyi kile kɛɛ, sɛ botunwo ɔzɔ mmenii nɩ a, Gyehova nɩɩ Gyisɛsɩ kehila kɛɛ sɛ bɛkɛyɛ sutiye na bɛava mɔɔ bosumaa nɩ bɛawɔ bɛ ɛbɩla a. Sɛ botunwo Nɩnɩvɛnii be na ɩpʋ Gyehova zʋ̃mɩnlɛ a, Gyehova lɛ́ma ɔhʋanɩ ma ɩkɔhɔ zʋ kɔwʋwa azɩ. (Ayɩ. 65:20) Naasʋ̃ bɛzabɛ mɔɔ besi pɔkɔ kɛɛ bɔkɔzʋ̃mɩ Gyehova munwatĩĩ nɩ, ndɛnɩwuwalɛ yɩ kɔhɔ bʋwɔ kɛma bɛ. Bekenyia ɔnwʋmɔ ɔhʋanɩ bɔkɔwʋwa azɩ daabaa!—Da. 12:2.

15. (a) Mɩnla ti mɔɔ íni kɛɛ yɛkã kɛɛ bɛzabɛ mɔɔ bɛzɩkɛlɩ bɛ wɔ Sɔdɔmɩ nɩɩ Gomola nɩ, bolótunwo bo nu bela a? (b) Odwokɔ mɔɔ ɩwɔ Dwuudu 7 nɩ, kɛ yɛkɛdɩ yɩ tʋ yekeze a? (Kila alɩka mɔɔ ise “ Mɩnla Yɛ Nɩ Dwuudu Ɩpɛɛ Kehile a?”)

¹⁵ Mmɩlɩ mɔ nɩ Gyisɛsɩ ɩkãã Sɔdɔmɩ nɩɩ Gomola nwʋ odwokɔ nɩ, ɩhanlɩ kɛɛ, bɔkɔnwʋ bɛ nwɔkɛ wɔ “ndɛnɩwuwalɛ eɣile” nɩ nu bɛkɛdɛla mmenii mɔɔ bɔbʋlɩ mɛyɩ Gyisɛsɩ nɩɩ yi ehilehilelɛ nɩ. (Mt. 10:​14, 15; 11:​23, 24; Lk. 10:12)  Mɩnla yɛ nɩ Gyisɛsɩ ɩpɛɛ kehile a? Ebiye a yekozunzu kɛɛ nɩ Gyisɛsɩ ikuguaa ndwokɔ nu kɛkɛ kɛva kehile kɛɛ nɩ yɩ mmɩlɩ zʋ maa nɩ bɛ tanɩ dɩ kezi tɛla Sɔdɔmɩ nɩɩ Gomola maa bɛ dɩyɛ nɩ. Kakɛ kɛɛ, mmɩlɩ mɔ Gyisɛsɩ hanlɩ kɛɛ Nɩnɩvɛmaa nɩ kodwodwu wɔ ndɛnɩwuwalɛ eɣile yi nu nɩ, nɩ ilókugua ndwokɔ nu. Nɩ ɩdɩ dɩyɛ mɔɔ ikezi ankasa. Meti ɩkɛyɛ kɛɛ nɩ Gyisɛsɩ ɩpɛɛ kehile kɛɛ, mmenii mɔɔ nɩ bɔwɔ Sɔdɔmɩ nɩɩ Gomola nɩ, bokodwodwu bɛkɛɣa nnwʋanlɩ nu ankasa. Ɩda ali petee kɛɛ, “ndɛnɩwuwalɛ eɣile” mɔɔ Gyisɛsɩ hanlɩ nwʋmɔ odwokɔ valɩ Nɩnɩvɛ nɩɩ Sɔdɔmɩ nɩɩ Gomola nwʋ nɩ, nɩ ɩdɩ ndɛnɩwuwalɛ eɣile kʋ̃. Dɩkɛɛ Nɩnɩvɛmaa nɩ, Sɔdɔmɩ nɩɩ Gomola maa nɩ sʋ̃ yɛlɩ nninyeni tanɩ. Naasʋ̃ Nɩnɩvɛmaa nɩ nyianlɩ ɔnwʋmɔ ɔhʋanɩ nlunli bɔ nwʋ. Dɔkʋ̃ sʋ̃, kakɛ kɛɛ, mmɩlɩ mɔ nɩ Gyisɛsɩ ɩkãã “awudunwolɩyɛ mɔɔ ɩkɔ ndɛnɩwuwalɛ nu” nwʋ odwokɔ nɩ, ɩhanlɩ kɛɛ, bokodunwo bɛzabɛ mɔɔ “bɛyɛlɩ nninyeni tanɩ nɩ.” (Dwɔ. 5:​29, NWT) Meti ebiye a, anyɩnlɩlazʋ wɔ kɛnɩ ma mmenii mɔɔ nɩ bɔwɔ Sɔdɔmɩ nɩɩ Gomola nɩ. Ɩáyɛ bʋwɔ kʋlaa nɩ, ɩkɔhʋla kɛɣa kɛɛ bokodunwo bo nu be ma bɛkɛɣa nnwʋanlɩ nu dɔkʋ̃, na yekenyia ɔnwʋmɔ ɔhʋanɩ yekehilehile bɛ Gyehova nɩɩ Gyisɛsɩ Kɩlayɩsɩ bɔ nwʋ dɩyɛ.

16. Mɔɔ Gyehova kegyina zʋlɔ kodunwo mmenii nɩ, mɩnla yɛ yezi yɛfalɩ nwʋmɔ a? (Gyɛlɩmaya 17:10)

¹⁶ Kɩnga Gyɛlɩmaya 17:10. Ɛhɛlɛlɛdwokɔ eyi kakɛ yɛ mɔɔ yezi yɛfalɩ kezimɔ Gyehova buwa ndɛnɩ nɩ nwʋ kɛɛ, Gyehova ‘kilahila ahʋnlɩnɩ nu, na ɩpɩbɛlɩ enii yɩ nzunzunlɩyɛ nu’ mmɩlɩ munwala. Meti sɛ isii pɔkɔ wɔ mmenii mɔɔ ikodunwo bɛ nɩ nwʋ a, ‘ikoduwa abiyela kakɛ kɛmɔ yɩ ahʋanɩ dɩ.’ Gyehova lókugo yɩ ndɛnɩwuwalɛ nu kyɩ̃, naasʋ̃ sɛ nwʋmɔ ba hyinyia kɛɛ ɩda nwɔkɛnwʋnlɛ ali a, ɩyɛ zɔ. Meti íni kɛɛ yɛbɔ ye ti nu yɛkã kɛɛ, bolótunwo abiye gyɩsɛ yezi yi petee kɛɛ Bayɩbʋlʋ yɩ hã zɔ!

“AZƖLƐ YƖ MUNWALA ZƲ NDƐNƖWUWALƐVƲLƆ NƖ” KƐYƐ “MƆƆ ƖTƖNƔƐ”

17. Mɩnla anyɩnlɩlazʋ yɛ ɩwɔ kɛnɩ ɩma bɛzabɛ mɔɔ bowuwu nɩ a?

¹⁷ Ɔzʋmɩ mmɩlɩ mɔ Adamɩ nɩɩ Yifi bɔhɔ bɛhɩnlanlɩ Setanɩ nwʋ ma bɛdɩlɩ Gyehova Nyamɩnlɩ zʋ atunwa nɩ, mmenii abʋmɩ abʋmɩ  sʋ̃maa yɛ bowuwu a. Yɛ ‘tamvʋlɔ owulo’ va mmenii sʋ̃maa ɩhɔ! (1 Kɔl. 15:26) Mɩnla yɛ ɩkɔdʋ ɔzɔ mmenii yi munwatĩĩ a? Bokodunwo Kɩlayɩsɩ yɩ mɛdalilɛmaa nɔhʋanlɛmaa ɛgyɩkɩ̃ɩ̃ mɔɔ bɔ dʋdʋ dɩ 144,000 ma bɔkɔwʋwa sʋlɔ daabaa mɔɔ bolówu kyɩ̃. (Yik. 14:1) Mmɩlɩ mɔ ‘botunwoo baabayɛlɛmaa nɩ’ bokodunwo mmenyia nɩɩ mmaalɛ sʋ̃maa mɔɔ bɔdɔ Gyehova nɩ. Na sɛ bedi nɔhʋanlɛ wɔ Kɩlayɩsɩ yɩ Ɔlʋbɔ Abʋmɩ Tumililɛ nɩɩ odwohilalɛ mɔɔ itualɩ yɩ tʋ nɩ nu a, bɔkɔwʋwa azɩ daabaa wɔ azɩlɛ yɩ zʋ. (Da. 12:13; Hib. 12:1) Akʋ̃ sʋ̃, wɔ Ɔlʋbɔ Abʋmɩ Tumililɛ yɩ nu nɩ, “tanɩyɛlɛmaa” mɔɔ bɛzabɛ mɔɔ bɛásʋ̃mɩ Gyehova kyɩ̃ anzɛnyɩɩ bɛzabɛ mɔɔ “bɔwɔlɩ ɛbɩla tanɩ” kɩnla nwʋmɔ nɩ, bekenyia ɔnwʋmɔ ɔhʋanɩ bɛkɛzɩnza bɛ ahʋanɩ na bɛaɣa bɛayɛ Gyehova yɩ azʋ̃mɩvʋlɔ nɔhʋanlɛmaa. (Lk. 23:​42, 43) Mmenii be wɔ kɛnɩ a, nɩ bezi bɛ kɛnɣa kɛɛ bɛkɛyɛ tanɩ, na bɛadwodwu bɛadiyia Gyehova yi ti nu pɔkɔ. Meti Gyehova sʋ̃ zi pɔkɔ kɛɛ ilótunwo bɛ donwuu donwuu.—Lk. 12:​4, 5.

18-19. (a) Kezimɔ Gyehova nɩɩ Gyisɛsɩ kowuwa mmenii ndɛnɩ nɩ, mɩnla ti mɔɔ yɛkɔhʋla yekenyia numɔ anwʋlazʋ a? (Ayɩzaya 55:​8, 9) (b) Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁸ Asʋ̃ sa yɛkʋla yenyia anwʋlazʋ kɛɛ sɛ Gyehova ibuwaa mmenii ndɛnɩ a, ɩkɛyɛ mɔɔ ɩtɩnɣɛ mmɩlɩ munwala a? Nyɛ! Kɛmɔ Abilehamɩ ɣa nwʋnlɩ yɩ nɩ, Gyehova yɛ lɛ “azɩlɛ yɩ munwala zʋ Ndɛnɩwuwalɛvʋlɔ” mɔɔ ɩnwʋ nwɔkɛ, izi nɣɛlɛbɛ na idi munli a. Gyehova dɩdɩ yɩ Ɣa yɩ, na ɩva ndɛnɩwuwalɛ egyima yɩ munwala wula yɩ sa. (Dwɔ. 5:22) Gyehova nɩɩ Gyisɛsɩ munwala kʋla nwʋ mɔɔ ɩwɔ abiyela yɩ ahʋnlɩnɩ nu. (Mt. 9:4) Meti sɛ bobuwaa abiye ndɛnɩ a, bɛkɛyɛ “mɔɔ ɩtɩnɣɛ” mmɩlɩ munwala!

¹⁹ Bɛmá yenyia anwʋlazʋ kezile kɛɛ Gyehova zi mɔɔ ɩdɩ baaba. Ɩsɛ kɛɛ yede yetiã numɔ kɛɛ, mɛyɩ yɛ lɛ ndɛnɩwuwalɛvʋlɔ yɩ a, na kɛ amɩyɛ a! (Kɩnga Ayɩzaya 55:​8, 9.) Eyi ti ɩsɛ kɛɛ yeyiaki ndɛnɩwuwalɛ yɩ munwala yɛma Gyehova nɩɩ yɩ Ɣa Gyisɛsɩ. Akʋ̃ sʋ̃, yezi kɛɛ ye Bulombunli Gyisɛsɩ kozumazuma yɩ Zɩ yɩ nwɔkɛnwʋnlɛ nɩɩ yɩ pɛlɩpɛlɩlilɛ pɛpɛɛpɛ. (Ayɩ. 11:​3, 4) Meti mɩnla yɛ yɛkɛhã kɛvalɩ kezimɔ Gyehova nɩɩ Gyisɛsɩ kowuwa mmenii ndɛnɩ wɔ anwʋhyɩlɩyɛ kezile yi nu nɩ nwʋ a? Mɩnla yɛ yézi a? Mɩnla yɛ yezi a? Yekozunzu ndwokɔɣizialɛ eyimmɔ nwʋ wɔ dɩyɛzumanlɛ mɔɔ ili kɛnɩ nɩ nu.