1. Mɩnla ti mɔɔ ɩkɔhʋla ɩkɛyɛ sɩ kɛɛ yɛkɛyɛ sutiye a?

 ASƲ̃ ɩyɛ a ɩyɛ sɩ ɩma wʋ kɛɛ ɛkɛyɛ sutiye a? Ɔzɔ la yɛ nɩ ɩdɩ wɔ Bulombunli Devidi yɩ ɔfʋã nu a, meti ɩwɔlɩ Nyamɩnlɩ mpayɩ kɛɛ: “Má minyia ɛpɛ kɛɛ mikediye wʋ.” (Ndw. 51:12) Nɩ Devidi dɔ Gyehova, naasʋ̃ nɩ itwu mmɩlɩ be a ɩyɛ sɩ ɩma yɩ kɛɛ ɩkɛyɛ sutiye, na ɔzɔ la yɛ ɩdɩ wɔ amɩyɛ sʋ̃ yɛ ɔfʋã nu a. Mɩnla ti a? Mɔɔ ili bɔmʋnlɩ, bɛva azʋ̃nzɩzɩbɛ bɔwʋ yɛ. Mɔɔ ɩtɔ zʋlɔ anwɩ̃, Setanɩ ɩbɔɔ mmɔdɩnɩ kɛɛ ɩkɛma yekodwodwu yekediyia Gyehova kɛmɔ ɩyɛlɩ nɩ. (2 Kɔl. 11:3) Mɔɔ ɩtɔ zʋlɔ asã, “sunzuma evinli nɩ mɔɔ sikalɛpɛyɩ isiye mmenii mɔɔ bɛádiye Nyamɩnlɩ odwokɔ nɩ” yɛ idua yɛ nwʋ iyiyia a. (Ɛfɩ. 2:2) Eyi ti ɩsɛ kɛɛ yɛkʋ̃ yetiyia yɛ mɛlɛkɛyɛlɛ, Abɔnsamɩ, nɩɩ oyuwadɩ yɩ ama yɛahʋla yeadiye Gyehova nɩɩ bɛzabɛ mɔɔ ɩva tumi ɩma bɛ nɩ.

2. Mɩnla yɛ ikile kɛɛ abiye ziyeziye yɩ nwʋ kɛɛ ɩkɛyɛ sutiye a? (Gyemisi 3:​17, NWT.)

² Kɩnga Gyemisi 3:​17, NWT. Sunzuma yɩ hanlɩ Gyemisi ma ɩhɛlɛlɩ kɛɛ bɛzabɛ mɔɔ bezi nɣɛlɛbɛ nɩ “bɛyɛ sutiye.” Eyi kile kɛɛ ɩsɛ kɛɛ yenyia ɛpɛ na yesiyeziye yɛ nwʋ kɛɛ yekediye bɛzabɛ mɔɔ Gyehova ɩva tumi ɛgyɩkɩ̃ɩ̃ iwula bɛ sa nɩ. Naasʋ̃ Gyehova iáhila ɔhʋanɩ kɛɛ yekediye abiye mɔɔ ɩpɛ kɛɛ yebu yɩ mmɛla zʋ nɩ.—Egy. 4:​18-20.

3. Mɩnla ti mɔɔ nwʋmɔ hyinyia Gyehova kɛɛ yekediye bɛzabɛ mɔɔ ɩva tumi ɩma bɛ nɩ a?

 ³ Ebiye a, yɛkɛdɩ nɣanlɩ kɛɛ ɩyɛ mɛlɛkɛ kɛɛ yekediye Gyehova tɛla kɛɛ yekediye mmenii. Iluwakɛɛ Gyehova yɩ ahʋanɩ munwala di munli, naasʋ̃ ɩ́dɩ zɔ wɔ mmenii mɔɔ bɔwɔ tumi bɛ ɔfʋã nu. (Ndw. 19:7) Mɛyɩ po nɩ, yɛ sʋlɔ Ɛzɩlɛ yɩ ɩva tumi ɛgyɩkɩ̃ɩ̃ ɩma awʋvʋlɔ, aɣanɩ mbanimbani nɩɩ asafʋ nu mbanimbani. (Ɛɣɛ. 6:20; 1 Tɛs. 5:12; 1 Pit. 2:​13, 14) Sɛ yetiye bɛ a, nɩ ikile kɛɛ yetiyee Gyehova. Bɛmá yehila kezimɔ yɛkɔhʋla yekediye bɛzabɛ mɔɔ Gyehova va tumi ɩma bɛ nɩ, ɩávalɩ nwʋmɔ kɛɛ ɩyɛ a ɩyɛ sɩ kɛɛ yekediye bɛ nɩ.

4. Mɩnla ti mɔɔ nnwuakula sʋ̃maa bɛádiye bɛ awʋvʋlɔ a?

⁴ Nnwuakula sʋ̃maa bɛádiye bɛ awʋvʋlɔ. (2 Tim. 3:​1, 2) Mɩnla ti a? Bo nu sʋ̃maa tɩ nɣanlɩ kɛɛ mɔɔ bɛ awʋvʋlɔ bɛkã nɩ bɛzabɛ bɛáva bɛyɛ egyima. Ebiyemmɔ sʋ̃ tɩ nɣanlɩ kɛɛ bɛ awʋvʋlɔ bɔ fʋlɔdulɛ idua numɔ, anzɛnyɩɩ bɛyɛ kyɩngyɩ̃ɩ̃ sʋ̃maa. Sɛ ɛdɩ kuakula a, ɔzɔ yɛ ɛtɩ nɣanlɩ a? Gyehova yɩ odwokɔ mɔɔ ise: “Ɩdɩ mʋnlʋmmɔ bɛ asɛdɩ kɛɛ bekediye bɛ awʋvʋlɔ bo odwokɔ. Sianti yɛ lɛ kɛɛ, eyi yɛ ɩdɩ dɩyɛ baaba mɔɔ ɩsɛ kɛɛ bɛyɛ” nɩ, ɩyɛ sɩ ɩma nnwuakula sʋ̃maa kɛɛ bɛkɛva bɛkɛyɛ egyima. (Ɛfɩ. 6:1) Mɩnla yɛ ɩkɔwʋwa wʋ ma ɛkɛva ahyɛdɩ eyi ɛkɛyɛ egyima a?

5. Kɛmɔ Luuku 2:​46-52 kile nɩ, mɩnla ndianwʋba yɛ Gyisɛsɩ yɛlɩ wɔ sutiyeyɛlɛ nwʋ a?

⁵ Gyisɛsɩ yɛlɩ sutiye nwʋ ndianwʋba mɔɔ sa ɔkʋla osuma. (1 Pit. 2:​21-24) Nɩ Gyisɛsɩ di munli naasʋ̃ yɩ awʋvʋlɔ mɛyɩ nɩ bɛáli munli. Eyi munwala mɛda nɩ, Gyisɛsɩ lili yɩ awʋvʋlɔ nni ɩávalɩ nwʋmɔ kɛɛ nɩ bedi mfʋmɩ na ɩyɛ a bɛádɩ yɩ tʋ nɩ. (Ɛkɩ. 20:12) Bɛmá yehila odwokɔ be mɔɔ izili mmɩlɩ mɔ Gyisɛsɩ lili alʋbɔ 12 nɩ. (Kɩnga Luuku 2:​46-52.) Gyisɛsɩ nɩɩ yɩ awʋvʋlɔ hɔlɩ Gyelusalamɩ, na mmɩlɩ mɔ besiaa nɩ bedianlɩ yɩ kɛnɩ mɔɔ nɩ bézi. Nɩ ɩdɩ Dwosefi nɩɩ Mɛɛlɩ bɛ asɛdɩ kɛɛ bekehila kɛɛ nnwuakula yɩ munwala kɩnla bɔ nwʋ yɛ bɔkɔɔ a. Mmɩlɩ mɔ bɔnwʋnlɩ Gyisɛsɩ nɩ, Mɛɛlɩ manlɩ ɩyɛlɩ kɛɛ Gyisɛsɩ mfomi yɛ ili mfʋmɩ a. Ankɩ Gyisɛsɩ kɔhʋla kɛhã kɛɛ mfʋmɩ yɩ ɩzʋ̃ bɛzabɛ mfomi. Naasʋ̃ ɩáyɛ zɔ, mfomi ɩmanlɩ munwalɩyɛ bɛ wɔ annidi ɔhʋanɩ zʋ. Dwosefi nɩɩ Mɛɛlɩ “bɛátɩ odwokɔ nɩ mɔɔ izeli bɛ nɩ tʋ.” Eyi munwala mɛda nɩ Gyisɛsɩ “ɩyɛlɩ sutiye ɩmanlɩ bɛ.”

6-7. Mɩnla yɛ ɩkɔhʋla ɩkɔwʋwa nnwuakula ma bekediye bɛ awʋvʋlɔ a?

⁶ Nnwuakula, asʋ̃ ɩyɛ a ɩyɛ sɩ ɩma bɛ kɛɛ bekediye bɛ awʋvʋlɔ mmɩlɩ mɔ ebiye a beli mfʋmɩ anzɛnyɩɩ bɛádɩ bɔtʋ nɩ a? Mɩnla yɛ ɩkɔwʋwa bɛ a? Mɔɔ ili bɔmʋnlɩ, sunzu kezimɔ Gyehova tɩ nɣanlɩ nɩ nwʋ. Bayɩbʋlʋ yɩ kã kɛɛ sɛ bɛyɛ sutiye bɛma bɛ awʋvʋlɔ a, “mɛyɩ yɛ ɩsɔ Niibenyia anyɩ a.” (Kol. 3:20) Gyehova zi kɛɛ ɩyɛ a wʋ awʋvʋlɔ bɛlɛ́tɩ wʋ tʋ anzɛnyɩɩ bɛkɛhyɛ mmɛla be mɔɔ ɩyɛ a ɩkɛyɛ sɩ kɛɛ ɛkɛva kɛyɛ egyima. Naasʋ̃ sɛ ɔbɔ mmɔdɩnɩ etiye bɛ a, ɩma Gyehova yɩ anyɩ de.

⁷ Mɔɔ ɩtɔ zʋlɔ anwɩ̃, dwɩnɩ kezimɔ wʋ awʋvʋlɔ tɩ nɣanlɩ nɩ nwʋ. Sɛ etiye wʋ awʋvʋlɔ a, ɩma bɛ anyɩ de na bede wʋ bedi. (Ɛɣɛ. 23:​22-25) Na ɩkɛma bɛkɛbɛ wʋ odwokɔ sʋ̃. Alexandre mɔɔ ɩwɔ Belgium nɩ hanlɩ kɛɛ, “Mmɩlɩ mɔ mʋwɔlɩ yɩ tʋ kɛɛ mitiyee mɩ awʋvʋlɔ nɩ, ɩmanlɩ yɛ avinli yɛlɩ baaba na yɛ anyɩ leli. b Mɔɔ ɩtɔ zʋlɔ asã, sɛ etiye wʋ awʋvʋlɔ kakɩ yɩ a, ɩkɔwʋwa wʋ eɣile be. Paulo mɔɔ ɩda Brazil nɩ hanlɩ kɛɛ, “Mmɔdɩnɩ mɔɔ mʋwɔlɩ kɛɛ mikediye mɩ awʋvʋlɔ nɩ ɩwʋwa  mɩ ma mɩyɛ sutiye mɩma Gyehova nɩɩ mmenii mɔɔ bɔwɔ tumi nɩ.” Nyamɩnlɩ odwokɔ kã sianti mɔɔ ihyinyia kɛɛ ekediye wʋ awʋvʋlɔ nɩ. Ɩkã kɛɛ: “Wʋ ɛbɩlawɔlɛ ɩkɔhɔlɩ ɔzʋlɔ na wuanyi wʋahyɛlɩ azɩlɛ yɩ zʋ.”—Ɛfɩ. 6:​2, 3.

8. Mɩnla ti mɔɔ nnwuakula sʋ̃maa si pɔkɔ kɛɛ bekediye bɛ awʋvʋlɔ a?

⁸ Nnwuakula sʋ̃maa nwʋ mfasʋ mɔɔ ɩwɔ zʋlɔ kɛɛ bɛkɛyɛ sutiye. Luiza sʋ̃ mɔɔ ɩzʋ̃ Brazil nɩ, nɩ ɩádɩ yɩ nwʋ tʋ kʋlaa kɛɛ wɔ mmɩlɩ be nɩ, nɩ bɛáma ɩfa foonu idi egyima, iluwakɛɛ ɩnwʋnlɩ kɛɛ yɩ atipɛnɩmaa sʋ̃maa bɔwɔ foonu. Naasʋ̃ ɩɣa ɩnwʋnlɩ yɩ kɛɛ ntʋlɔnkʋdɩ nɩ yɩ awʋvʋlɔ bɔbɔɔ yɩ nwʋ banɩ. Kakɩ yɩ ɩkã kɛɛ, “Mɩɣa mʋnwʋ yɩ kɛɛ nɩ ɩ́dɩ kɛɛ ebiye a bɛhyɛɛ mʋ zʋ, mfomi sɛ mitiye bɛ a ɩbɔ mʋ nwʋ banɩ. Eliyema baalɛ kuakula Elizabeth da United States, ɩyɛ a ɩyɛ sɩ ɩma yɩ kɛɛ ikediye yɩ awʋvʋlɔ. Ikile numɔ kɛɛ, “Sɛ ɩyɛ na mɩádɩ sianti mɔɔ mɩ awʋvʋlɔ hyɛ mmɛla be nɩ tʋ a, mɩkakɛ kezimɔ bɛ mmɛla yɩ be wɔlɩ mʋ nwʋ banɩ wɔ mmɩlɩ be nɩ.” Monica mɔɔ ɩda Armenia nɩ hanlɩ kɛɛ, sɛ iátiye yɩ awʋvʋlɔ a, nninyeni ɩáhɔ bʋwɔ ɩma yɩ naasʋ̃ sɛ itiye bɛ a, yɩ anyɩ de paa.

9. Kɛ mmenii sʋ̃maa bɛtɩ nɣanlɩ bese wɔ aɣanɩ mmɛla nwʋ a?

⁹ Mmenii sʋ̃maa de tiã numɔ kɛɛ ɩdɩ baaba kɛɛ aɣanɩ wɔ kɛ, na ihyinyia kɛɛ yɛfa mmɛla mɔɔ “mbanimbani nɩ mɔɔ bobuu manlɩ nɩ” bɛhyɩhyɛ nɩ yɛyɛ egyima. (Wul. 13:1) Naasʋ̃ ɔzɔ mmenii ɔkʋ̃ yɩ la bɛtɩ nɣanlɩ kɛɛ mmɛla yɩ be wɔ kɛnɩ a bɛábɛ yɩ anzɛnyɩɩ bɔlɔ́kʋla bɛkɛva bɛkɛyɛ egyima. Bɛmá yɛva ndwuliyɛ duwalɛ kɛɛ ndianwʋ. Wɔ Europe amanlɩ be nu nɩ, mmenii sunzu kɛɛ “sɛ ɛtɩ nɣanlɩ kɛɛ ndwuliyɛ be dɩ nsisi a, íni kɛɛ otuwa.” Eyi ɩáyɛ nnwʋánlɩ, iluwakɛɛ ndwuliyɛ mɔɔ aɣanɩ kila ɔhʋanɩ kɛɛ manlɩmaa yɩ koduwa nɩ, numɔ ɛgyɩkɩ̃ɩ̃ be la yɛ botuwa a.

10. Mɩnla ti mɔɔ sɛ yɛ anyɩ iáleli mmɛla be nwʋ po a, yedidili zʋ a?

¹⁰ Bayɩbʋlʋ yɩ kã kɛɛ enii yɩ aɣanɩ mɔɔ iwula Setanɩ yɩ tumililɛ yɩ tʋ nɩ, ɩva amanɩyɛnwʋnlɛ sʋ̃maa ɩɣa adasamaa zʋ na ɩlɛ́kyɛ na bɛazɩkɛ yɩ. (Ndw. 110:​5, 6; Odw. 8:9; Lk. 4:​5, 6) Isia sʋ̃ ɩkã kɛɛ “abiyela mɔɔ ikediyia mbanimbani nɩ mɔɔ bobu manlɩ yɩ nɩ, ɩpʋ tumi nɩ mɔɔ Nyamɩnlɩ ɩhyɩhyɛ nɩ.” Gyehova ɩma ɔhʋanɩ kɛɛ aɣanɩ mbanimbani belí tumi na ama dɩyɛ bela ɩahɔlɩ zʋlɔ pɛpɛɛpɛ, meti Gyehova kila ɔhʋanɩ kɛɛ yekediye bɛ. Bayɩbʋlʋ kã kɛɛ,“abiyela mɔɔ mʋnlʋmmɔ bɛma kakɛ yɩ nɩ, mʋnlʋmmɔ boduwá,” mɔɔ ndwuliyɛ, annidi nɩɩ sutiye mɔɔ yɛkɛyɛ yɛkɛma bɛ nɩ kɩnla nwʋ. (Wul. 13:​1-7) Ebiye a yɛkɛdɩ nɣanlɩ kɛɛ mmɛla be ɩáwʋwa yɛ, ɩ́dɩ yɩ ɔhʋanɩ zʋ anzɛnyɩɩ ɩyɛ sɩ kɛɛ yekeli zʋlɔ. Yetiye mbanimbani eyimmɔ iluwakɛɛ Gyehova yɛ ise yɛyɛ́ zɔ a, mmɩlɩ tɩndɩnlɩ la mɔɔ iádiyia yɩ mmɛla nɩ.—Egy. 5:29.

11-12. Kɛmɔ Luuku 2:​1-6 kã nɩ, mɩnla yɛ nɩ ɩsɛ kɛɛ Dwosefi nɩɩ Mɛɛlɩ bɛyɛ bɛfa bedi mmɛla yɩ zʋ a, na mɩnla yɛ ɩzʋ̃ numɔ ɩɣalɩ a? (Kila mfonyini yi sʋ̃.)

 ¹¹ Sa yɛkʋla yesuma debe wɔ Dwosefi nɩɩ Mɛɛlɩ mɔɔ bediyeli mbanimbani mɔɔ bobu manlɩ nɩ, ɩávalɩ nwʋmɔ kɛɛ nɩ ɩyɛ sɩ ɩma bɛ kɛɛ bɛkɛyɛ zɔ nɩ. (Kɩnga Luuku 2:​1-6.) Mmɩlɩ mɔ Mɛɛlɩ ɩɣɩnzɛlɩ kɛyɛ aziyianɩ ahɔnla nɩ, aɣanɩ yɩ hyɛlɩ mmɛla be mɔɔ nɩ ɩyɛ sɩ kɛɛ ɩ nɩɩ Dwosefi bekelili zʋlɔ. Ɔgɛsɩtɔsɩ mɔɔ nɩ idi Wulomi Bulombunli Manlɩ nɩ zʋ hanlɩ kɛɛ bedinyiá mmenii yi. Meti nɩ ɩsɛ kɛɛ Dwosefi nɩɩ Mɛɛlɩ tua ɔhʋanɩ tɩndɩnlɩ kɛyɛ kilomita 150 (mayɛlɩ 93) boduwa avile ɔhʋanɩ zʋ bɔkɔ Bɛtɩlɛhamɩ. Nɩ ɔhʋanɩdulɛ yɩ kɛyɛ sɩ kɛma Mɛɛlɩ baaba. Iluwakɛɛ ɩkɛyɛ kɛɛ nɩ bɔdwɩnɩɩ Mɛɛlɩ yɩ pɔkɔdɩlɛ nɩɩ kuakula mɔɔ ɩla kunlumi nu yi sʋ̃ yɩ nwʋ. Akʋ̃ sʋ̃, ebiye a nɩ bɔdwɩnɩɩ nwʋmɔ kɛɛ, na sɛ bɔwʋ kuakula yɩ wɔ ɔhʋanɩ yɩ nu sʋ̃ ɛ, kɛ ɩkɛyɛ na bɛawɔ yɩ nwʋ banɩ a? Iluwakɛɛ nɩ kuakula yɩ yɛ ɩkɛyɛ Mɛzaya nɩ a. Asʋ̃ nɩ eyi ɩkɛma bokowuli aɣanɩ yɩ mmɛla yɩ zʋ a?

¹² Ɩávalɩ nwʋmɔ kɛɛ nɩ Dwosefi nɩɩ Mɛɛlɩ bɔdwɩnɩɩ eyimmɔ munwala nwʋ nɩ, belili mmɛla yɩ zʋ. Na Gyehova yilalɩ bɔ sutiyeyɛlɛ yɩ zʋ. Mɛɛlɩ ɩhɔ idwuli Bɛtɩlɛhamɩ azʋ̃nudwolɩyɛ nu, ɩwʋlɩ kuakula yɩ mɔɔ nɩ ɩwɔ anwʋzɩzɩbɛ na ɩwʋwalɩ ma Bayɩbʋlʋ nkɔmɩhyɛ ɣalɩ nu!—Mik. 5:2.

13. Sɛ yedidi mmɛla zʋ a, mɩnla ɔhʋanɩ zʋ yɛ ɩbɔ ye mmeliyema nwʋ banɩ a?

¹³ Sɛ yetiye mbanimbani nɩ mɔɔ bobu manlɩ nɩ a, yɛ nɩɩ mmenii mvʋlɔ nyia zʋlɔ mfasʋ. Mɩnla ɔhʋanɩ zʋ a? Ɔkʋ̃ yɛ lɛ kɛɛ, yɛ nɩɩ aɣanɩ yɩ yelényia odwokɔ bela. (Wul. 13:4) Sɛ yetiye aɣanɩ mbanimbani a, ɩkɛma bɔkɔnwʋ kɛɛ Gyehova Dasɩvʋlɔmaa bedidi mmɛla zʋ. Kɛ ndianwʋ nɩ, wɔ alʋbɔ be mɔɔ idua numɔ nɩ, azogyiamaa wɔlɔlɩ Kɩndɔm Hɔɔlʋ be mɔɔ ɩwɔ Nigeria nɩ kɛɛ, bɛkɛhyɩɩ bɛzabɛ mɔɔ bɛábɛ kɛɛ botuwa ndwuliyɛ nɩ. Naasʋ̃ azogyiamaa yɩ bɛ ebani yi hanlɩ kɛɛ: “Beyiakí na bɔhɔ, iluwakɛɛ Gyehova Dasɩvʋlɔmaa botuwa bo ndwuliyɛ mmɩlɩ munwala.” Sɛ  edidi mmɛla zʋ a, ɩma ɔbɔ dima baaba mɔɔ Gyehova Dasɩvʋlɔmaa bɔwɔ nɩ nwʋ banɩ na eɣile be sa ɩbɔ ye mmeliyema mmenyia nɩɩ mmaalɛ nwʋ banɩ.—Mt. 5:16.

14. Mɩnla yɛ ɩwʋwalɩ eliyema baalɛ be ma ɩyɛlɩ sutiye ɩmanlɩ aɣanɩ mbanimbani a?

¹⁴ Naasʋ̃ ɩyɛ a, kɛ mmɩlɩ munwala yɛ yenyia ɛpɛ kɛɛ yekediye aɣanɩ mbanimbani a. Joanna mɔɔ ɩda United States nɩ hanlɩ kɛɛ, “nɩ ɩyɛ sɩ ɩma mɩ paa kɛɛ mɩkɛyɛ sutiye iluwakɛɛ nɩ aɣanɩ mbanimbani be bezizi mu mmusunwamaa kyɩ̃.” Naasʋ̃ Joanna va yɛlɩ yɩ bʋtayɩ kɛɛ ɩkɛzɩnza ɔzɔ adwɩnɩ mɔɔ ɩlɛ nɩ. Mɔɔ ili bɔmʋnlɩ, nninyeni mɔɔ nɩ ɩkɩnga wɔ sohyiya midiya zʋ mɔɔ ɩma inyia ɔzɔ adwɩnɩ mɔɔ ɩávata nɩ, iyiakili yɩ ɛɣɩngalɛ. (Ɛɣɛ. 20:3) Mɔɔ ɩtɔ zʋlɔ anwɩ̃, kɛ ankɩ ɩkɔwɔ mpayɩ kɛɛ bɛzɩnzá aɣanɩ yɩ nu nɩ, ɩwɔlɩ mpayɩ kɛɛ Gyehova ɩwʋwa yɩ ma ɩva yɩ nwʋ idiã yɩ zʋ mfomi. (Ndw. 9:​9, 10) Mɔɔ ɩtɔ zʋlɔ asã, ɩkɩnga mɔɔ yɛ awuuku azʋlɔtʋ yɩ kã falɩ ɔfʋã bela mɔɔ yelékyina wɔ manlɩwulɛndwokɔ nu nɩ nwʋ. (Dwɔ. 17:16) Kakɩ yɩ, Joanna kã kɛɛ iluwakɛɛ ɩyɛ sutiye ɩma aɣanɩ mbanimbani ti, ɩma yɩ “ahʋnlɩnɩ ɩdɔ yi kunlu na yɩ azʋ̃ nu dwe yi.”

15. Mɩnla ti mɔɔ ɩyɛ a, ɩyɛ sɩ kɛɛ yekediye ɔhʋanɩhilelɛ mɔɔ ɩzʋ̃ Gyehova yɩ ahyɩhyɛdɩ yɩ kɛnɩ nɩ a?

¹⁵ Gyehova kã kile yɛ kɛɛ “yediyé mbanimbani mɔɔ beli yɛ anyunu” wɔ asafʋ yɩ nu nɩ. (Hib. 13:17) Ɩwɔ numɔ kɛɛ yɛ Anyunumililɛvʋlɔ Gyisɛsɩ di munli dɩyɛ, naasʋ̃ bɛzabɛ mɔɔ ɩlɛ bɛ idii egyima wɔ azɩlɛ yɩ zʋ nɩ, bɛáli munli. Meti ɩyɛ a ɩyɛ sɩ kɛɛ yekediye bɛ, titili mmɩlɩ mɔ bɛhã kɛɛ yɛyɛ debe mɔɔ yɛábɛ kɛɛ yɛyɛ nɩ. Mmɩlɩ be, bɛvalɩ ɔhʋanɩhilelɛ bɛmanlɩ sʋ̃mavʋlɔ Pita naasʋ̃ nɩ ɩábɛ kɛɛ itiye. Mmɩlɩ mɔ bɔvʋlɔ be hanlɩ hileli Pita kɛɛ ilí egyeni be mɔɔ nɩ Mosisi Mmɛla yɩ bu yɩ kɛɛ nwʋmɔ ɩádɩ nɩ, Pita bʋlɩ yɩ mbɔmɩ asã! (Egy. 10:​9-16) Mɩnla ti a? Iluwakɛɛ nɩ izi kɛɛ ntɩyasɩ íni numɔ. Nɩ ɔhʋanɩhilelɛ eyi ɩdɩ sʋnʋnkʋ̃ wɔ mɔɔ izi nɩ nwʋ. Sɛ nɩ ɩyɛ sɩ ɩma Pita kɛɛ ikediye bɔvʋlɔ po a, ɩáyɛ nnwʋánlɩ kɛɛ ɩyɛ a ɩyɛ sɩ kɛɛ yekediye mmenii mɔɔ bɛáli munli bɔ ɔhʋanɩhilelɛ.

16. Ankɩ sʋ̃mavʋlɔ Pɔɔlʋ ɩkɔhʋla ikowu ɔhʋanɩhilelɛ mɔɔ bɛva bɛmanlɩ yɩ nɩ kɛɛ ntɩyasɩ íni numɔ, naasʋ̃ mɩnla yɛ ɩyɛlɩ a? (Egyima 21:​23, 24, 26)

¹⁶ Mmɩlɩ mɔ sʋ̃mavʋlɔ Pɔɔlʋ yɩ sa hanlɩ ɔhʋanɩhilelɛ be mɔɔ nɩ isunzu kɛɛ ntɩyasɩ íni numɔ nɩ ɩyɛlɩ sutiye. Dwuumaa Kilisinyiamaa nɩ bɛdɩlɩ kɛɛ mmenii bɛkãã kɛɛ, Pɔɔlʋ ikilehile kɛɛ “beyiakí Mosisi mmɛla nɩ zʋ elilɛ.” (Egy. 21:21) Kilisinyianɩ mbanimbani mɔɔ nɩ bɔwɔ kɛnɩ nɩ hanlɩ hileli yɩ kɛɛ, ɩvá mmenyia anla ɩhɩnla yɩ nwʋ na bɔhɔ asɔlɩ aliyia yɩ nu na ɩhɔ ɩdɩ yɩ nwʋ ɩva ihile kɛɛ ididi Mosisi Mmɛla yɩ zʋ. Ɩwɔ numɔ kɛɛ nɩ Pɔɔlʋ zi kɛɛ Kilisinyiamaa béni ɔzɔ Mmɛla yɩ tʋ dɔkʋ̃ na ɩlɛ́yɛlɩ tanɩ bela dɩyɛ, naasʋ̃ idiyeli mbanimbani yi. Awulohyɩnlɩ nɩ, “ɩ nɩɩ bɛ hɔlɩ ma boduli bɔ nwʋ evinli.” (Kɩnga Egyima 21:​23, 24, 26.) Sutiye mɔɔ Pɔɔlʋ yɛlɩ nɩ, ɩmanlɩ ɔkʋ̃yɛlɛ wʋwalɩ bɛ avinli.—Wul. 14:​19, 21.

17. Mɩnla yɛ osuma wɔ Stephanie yɩ ozumanlɛnwʋnlɛ yɩ nu a?

¹⁷ Nɩ ɩyɛ sɩ ɩma eliyema baalɛ Stephanie kɛɛ ɩkɛva ɔhʋanɩhilelɛ mɔɔ Bɛtɩlɩ va manlɩ yɩ nɩ kɛyɛ egyima. Nɩ ɩ nɩɩ yɩ hũ bɛlɛ anyɩnlɩlelɛ bɔsʋ̃mɩɩ wɔ okuwu be mɔɔ bɛfa manlɩ fʋlɔ zʋ ndɛnɩ bedi egyima nu. Aɣinzi yi Bɛtɩlɩ guli okuwu yi, na bɛhanlɩ kɛɛ agyiahʋnlɩmaa yɩ bezia bɔhɔ bɔzʋ̃mɩ wɔ asafʋ mɔɔ bɛkã bɛzabɛ bo twonwa zʋ ndɛnɩ nu. Stephanie hanlɩ kɛɛ, “Nɩ ɩáyɛ mɩ fɛ kʋlaa. Nɩ mɩánwʋ yɩ kɛɛ asafʋ mɔɔ bɛkã mu twonwa zʋ ndɛnɩ wɔ nu nɩ hyinyia mmʋwalɩyɛ.” Naasʋ̃ mɛyɩ po nɩ izili pɔkɔ  kɛɛ ikediye ɔhʋanɩhilelɛ fʋlɔ yɩ. Ɩhanlɩ kɛɛ, “Aɣinzi yi mɩɣa mʋnwʋnlɩ yɩ kɛɛ pɔkɔ mɔɔ mmeliyema yɩ zili nɩ, nɩ ntɩyasɩ wɔ numɔ paa. Wɔ yɛ asafʋ fʋlɔ yɩ nu nɩ, mmenii sʋ̃maa wɔ numɔ mɔɔ bɛzabɛ nkʋ̃ la yɛ bɔwɔ asafʋ yɩ nu a, meti yɛɣa yɛyɛ bɛ abusunwa mɔɔ yɛhyɛ bɛ ɛzɩzɩbɛ. Mɩ nɩɩ eliyema baalɛ be mɔɔ nɩ iyiaki dasɩlɛlilɛhɔlɛ suma dɩyɛ. Sikalɛyɩ minyia mmɩlɩ sʋ̃maa mɩfa mɩyɛ mɩ dɩyɛzumanlɛ.” Ɩva ɩzɔlɩ zʋlɔ kɛɛ, “Minyia tile ɔwʋwaba baaba iluwakɛɛ mɩyɛ mɔɔ mʋkɔhʋla bela mɩyɛ sutiye.”

18. Sɛ yɛyɛ sutiye a, mɩnla mfasʋ yɛ yenyia wɔ zʋ a?

¹⁸ Sa yɛkʋla yesuma kɛɛ yɛkɛyɛ sutiye. Gyisɛsɩ luwalɩ yɩ “amanɩyɛnwʋnlɛ” yɩ zʋ “zumanlɩ sutiyeyɛlɛ” na kɛ ebiye a, nɩ nninyeni kɔ bʋwɔ ma yɩ ti a. (Hib. 5:8) Dɩkɛɛ Gyisɛsɩ nɩ, sɛ yeyiyia bʋwabɩlɛ mɔɔ numɔ yɛ sɩ a, ɩma yesuma sutiyeyɛlɛ. Kɛ ndianwʋ nɩ, mmɩlɩ mɔ COVID-19 adimakɛlɛ yɩ wɔlɩ yɩ tʋ mɔɔ bɛhanlɩ kɛɛ máma yeyiyia numɔ wɔ Kɩndɔm Hɔɔlʋ na máma yɛyɛ abika-abika nu dasɩlɛlilɛ nɩ, asʋ̃ nɩ ɩyɛ sɩ ɩma wʋ kɛɛ ekediye a? Naasʋ̃ mmɩlɩ mɔ ediyeli nɩ ɩwɔlɩ wʋ nwʋ banɩ, ɩwʋwalɩ ma ɔkʋ̃yɛlɛ wʋwalɩ asafʋ yɩ nu, na ɩmanlɩ Gyehova yɩ anyɩ leli. Sikalɛyɩ ye munwala yeziyeziye yɛ nwʋ kɛɛ yekediye ɔhʋanɩhilelɛ bela mɔɔ yɛ sa kɛhã yɩ wɔ anwʋhyɩlɩyɛ kezile yi nu nɩ, iluwakɛɛ ɔzɔ mɔɔ yɛkɛyɛ nɩ kele yɛ nnwʋanlɩ!—Dwb. 36:11.

19. Mɩnla ti mɔɔ ɛpɛ kɛɛ ɛyɛ sutiye a?

¹⁹ Yɛɣa yɛnwʋ yɩ kɛɛ sɛ yɛyɛ sutiye a, yenyia mfasʋ sʋ̃maa wɔ zʋ. Naasʋ̃ sianti titili mɔɔ yetiye Gyehova yɛ lɛ kɛɛ, yɛdɔ yɩ na yɛpɛ kɛɛ yɩ anyɩ de. (1 Dwɔ. 5:3) Mɔɔ Gyehova ɩyɛ ɩma yɛ nɩ, yɛlɔ́kʋla yekoduwa nwʋmɔ kakɛ kyɩ̃. (Ndw. 116:12) Naasʋ̃ sa yɛkʋla yɛyɛ sutiye yɛma Gyehova nɩɩ bɛzabɛ mɔɔ ɩva tumi ɩma bɛ nɩ. Sɛ yɛyɛ sutiye a, ikile kɛɛ yezi nɣɛlɛbɛ. Na abiye mɔɔ izi nɣɛlɛbɛ nɩ ɩma Gyehova yɩ anyɩ de.—Ɛɣɛ. 27:11.