Mmeliyema mmenyia mɔɔ bɔwɔ Bɛtɩlɩ nɩ valɩ kɛyɛ ɔlʋbɔ ɔkʋ̃ yɛlɩ egyima ɛzɩzɩbɛ va gyinanlɩ WBBR ɣilediyo stehyɛnɩ yɩ wɔ Staten Island, New York City. Mmɩlɩ mɔ beziyeziyeli azɩlɛ nɩ zʋ bowieli nɩ, begyinanlɩ aliyia kezile be bɛmanlɩ egyimayɛlɛmaa yɩ nɩɩ aliyia fʋlɔ sʋ̃ mɔɔ bɛkɛhyɩhyɛ nninyeni yi wɔ numɔ. Mɛyɩ mɛda nɩ, mmeliyema yɩ wɔlɩ yɩ tʋ valɩ nninyeni mɔɔ bɛkɛva kɛyɛ egyima wɔ ɣilediyo stehyɛnɩ kɛnɩ nɩ bɔhɔlɩ. Naasʋ̃ nɩ ndwokɔzɩzɩbɛ sʋ̃maa wɔ kɛnɩ mɔɔ ɩsɛ kɛɛ bedi nwʋmɔ egyima.

Antenna mɔɔ nɩ bɛkɛva bɛkɛyɛ egyima yɩ nɩ, nɩ ɩ́la azɩ kɛɛ bɛkɛhyɩhyɛ. Nɩ yɩ tɩndɩnlɩ dɩ mita 91 (fiiti 300), na nɩ ɩsɛ kɛɛ bɛfa bekyeni nnuno anwɩ̃ mɔɔ numɔ ɔkʋ̃ bela yɩ tɩndɩnlɩ dɩ mɩta 61 (fiiti 200) zʋ. Ahyɛasɩ yɩ mɔɔ bɛyɛlɩ nɩ, ɩáyɛ bʋwɔ. Naasʋ̃ iluwakɛɛ mmeliyema yɩ valɩ bɔ nwʋ dianlɩ Gyehova zʋ nɩ ti aɣinzi yi, bɔhʋla bɛyɛlɩ. Calvin Prosser mɔɔ ɩyɛlɩ egyima yɩ be nɩ hanlɩ kɛɛ, “Ahyɛasɩ yɩ mɔɔ yɛyɛlɩ nɩ, sɛ ɩyɛlɩ bʋwɔ a, ankɩ sa yɛfa yetu yɛ nwʋ baaba.” Naasʋ̃ mmeliyema yɩ valɩ nwʋmɔ animinyiamɩ munwala manlɩ Gyehova mfomi. Naasʋ̃ nɩ ɔhawʋ fʋlɔ sʋ̃ wɔ kɛ.

Nɩ ɣilediyo zʋ egyimalilɛ ɣalɩ a ɩlɛ́kyɛlɩ bela, meti nɩ nninyeni mɔɔ bɛfa bɛyɛ nwʋmɔ egyima nɩ, ɩbɩbɛlɛ yɛ sɩ. Naasʋ̃ mmeliyema yɩ nwʋnlɩ ɣilediyo nwʋ nninyeni be mɔɔ abiye hyɩhyɛ yɩ daada wɔ bɛ apaa yi nu kɛnɩ. Kɛ ankɩ bɔkɔdɔ mayɩkɩ fʋlɔ nɩ, mayɩkɩ mɔɔ iziye tɛlifoonu zʋ yɛ bɛva belili egyima a. Yalɛ eɣile nunuma ɔkʋ̃ be, mmeliyema yɩ hanlɩ kɛɛ botwee nninyeni mɔɔ bɛhyɩhyɛ nɩ munwatĩĩ bekehila. Nɩ ɩsɛ kɛɛ bɛyɛ egyimalilɛ be wɔ ɣilediyo yɩ zʋ bɛfa botwe bekila, meti mmeliyema yɩ dʋlɩ asafʋ ndwomi. Bo nu ɔkʋ̃ mɔɔ bɔfʋlɛ yɩ Ernest  Lowe hanlɩ ɛzɩlɩkɛ odwokɔ be mɔɔ izili wɔ ɔzɔ eɣile nɩ. Ɩhanlɩ kɛɛ mmɩlɩ mɔ bogua zʋlɔ bɔtʋʋ ndwomi nɩ, Judge Rutherford b dɩlɩ wɔ yi ɣilediyo zʋ na ɩvʋlɔlɩ bɛ. Nɩ ɩwɔ Brooklyn, na nɩ ɩ nɩɩ bɛ avinli twɩ̃ kɛyɛ kilomita 25 (mayɛlɩ 15).

Eliyema Rutherford hanlɩ kɛɛ: “Beyiakí dede mɔɔ bɛyɛɛ yɩ. Bɔtʋ ndwomi kɛɛ ahuusu mɔɔ bɛtɩnyɩadɩnyɩaa nu.” Mmeliyema yɩ bɛ anyɩ dʋnlɩ, na ndɛndɛ la bonlumanlɩ mahyini yi. Naasʋ̃ nɩ bɔwɔ anwʋlazʋ kɛɛ dɩyɛ bela dʋdɔ numɔ mɔɔ bɔkɔhʋla bɛkɛva be egyimalilɛ mɔɔ ili bɔmʋnlɩ bekediã anwʋma nu.

Bɛyɛlɩ be ɣilediyo zʋ egyimalilɛ mɔɔ ili bɔmʋnlɩ wɔ February 24, 1924, na Eliyema Rutherford yilalɩ ɣilediyo stehyɛnɩ yɩ zʋ manlɩ “Mɛzaya bulombunlililɛ egyima yɩ.” Ɩhanlɩ kɛɛ, sianti mɔɔ bɛyɛlɩ ɣilediyo stehyɛnɩ eyi yɛ lɛ kɛɛ “ɩkɔwʋwa mmenii ma bɛkɛdɩ Bayɩbʋlʋ nu nɔhʋanlɛ yɩ tʋ na bɛanwʋ kezimɔ mmɩlɩ mɔ yɛda numɔ nɩ nwʋ hyinyia.”

Egyimalilɛ mɔɔ ili bɔmʋnlɩ nɩ hɔlɩ bʋwɔ paa. Bɛvalɩ ɣilediyo stehyɛnɩ eyi mɔɔ nɩ bɔfʋlɛ yɩ WBBR nɩ belili egyima alʋbɔ 33 bɛva bɛyɛlɩ egyimalilɛ sʋ̃maa wɔ Gyehova ɔzʋ̃mɩnlɛ nu.

Wɔ July 1924 nɩ, Bayɩbʋlʋ Zumanlɛmaa nɩ yɛlɩ ayiyialɩyɛ be wɔ Columbus, Ohio. Bayɩbʋlʋ Zumanlɛmaa bɔzʋ̃ oyuwadɩ yɩ ɔfʋã azʋlɔtʋ bɛɣalɩ na bediyeli ndɛnɩ azʋlɔtʋ wɔ Arabic, Bʋlɔfʋlɔ, French, German, Greek, Hungarian, Italian, Lithuanian, Polish, Russian, Scandinaviamaa bɛ ndɛnɩ azʋlɔtʋ, nɩɩ Ukrainian ɛdɩndɛlɛ nu. Mmenii diyeli ayiyialɩyɛ yɩ ɔfʋã azʋlɔtʋ be wɔ ɣilediyo zʋ, na bɛ nɩɩ Ohio State Journal yɛlɩ nhyɩhyɛlɩyɛ kɛɛ eɣile ɔkʋ̃ bela mɔɔ bɔkɔbɔ ayiyialɩyɛ yɩ nɩ, bɛvá nwʋmɔ odwokɔ bɛɣɩla amanɩyɛwɔlɛ ahɛlɛta nu.

Wɔ Kulo eɣile, July 24 nɩ, mmeliyema mmenyia nɩɩ mmaalɛ mɔɔ bɔbʋ 5,000 hɔlɩ dasɩlɛlilɛ wɔ twonwa mɔɔ nɩ bɛyɛɛ ayiyialɩyɛ yɩ wɔ numɔ nɩ. Bɛhyɛlɩ awuuku kɛyɛ 30,000 na bɔwɔlɩ Bayɩbʋlʋ dɩyɛzumanlɛ abʋmɩ abʋmɩ sʋ̃maa tʋ. Ɔwɩɛnɩlɛ Aɣanɩ yɩ hanlɩ kɛɛ, ɔzɔ eɣile yi nɩ yɛ lɛ “ayiyialɩyɛ yɩ ɔfʋã mɔɔ ɩyɛ anyɩnlɩlelɛ paa a.”

Wɔ Eliyema Rutherford yɩ ndɛnɩ ɔkʋ̃ be mɔɔ ɩmanlɩ wɔ Yalɛ eɣile, July 25 nu nɩ, ɩvalɩ akɛnɣazɩzɩbɛ ɩɣɩnganlɩ kɛlɛta be mɔɔ nɩ ɩbɔɔ azɔfʋ yɩ bɛ mɛda. Ɩhanlɩ kɛɛ, manlɩwulɛ nu mbanimbani, ɔzʋ̃mɩnlɛ nu mbanimbani nɩɩ kualɛlilɛ nu mbanimbani bɛáma mmenii nwʋ nɔhʋanlɛ mɔɔ ɩfalɩ Nyamɩnlɩ yi  Bulombunlililɛ mɔɔ Nyamɩnlɩ koluwa zʋlɔ keyila adasamaa nɩ nwʋ. Izia ɩhanlɩ kɛɛ, ɔzɔ mbanimbani yi bɔvʋ̃ ɔhʋanɩ kɛɛ bɔhɔ begyina Amanlɩ Amanlɩ Nhyɩhyɛlɩyɛ yɩ mɛda mɔɔ bosunzu kɛɛ mɛyɩ yɛ Nyamɩnlɩ iduwaa zʋlɔ keli azɩlɛ yɩ zʋ tumi a. Nɩ Bayɩbʋlʋ Zumanlɛmaa nɩ kehyinyia akɛnɣazɩzɩbɛ na bɛahʋla bɛahã ɔzɔ odwokɔ yɩ bɛahile mmenii.

Kezimɔ ayiyialɩyɛ yɩ nyianlɩ bɔ zʋ tumi nɩ, Ɔwɩɛnɩlɛ Aɣanɩ yɩ hanlɩ nwʋmɔ odwokɔ kɛɛ: “Niibenyia yɩ azogyiamaa okuwu ɛgyɩkɩ̃ɩ̃ eyi mɔɔ bɛɣalɩ ayiyialɩyɛ wɔ Columbus besiaa bɔkɔhɔ nɩ, nɩ be dedi yɛ kezi . . . , mɔɔ ɩkɛma bɛkɛva akɛnɣazɩzɩbɛ bɛkɛhã odwokɔba yɩ ɩávalɩ nwʋmɔ odwodwudiyialɛ bela mɔɔ bekeyiyia nɩ.” Leo Claus mɔɔ ɩhɔlɩ ayiyialɩyɛ yɩ be nɩ hanlɩ kɛɛ: “Yɛbɔlɩ ayiyialɩyɛ yɩ nɩ, nɩ yɛ nwʋ pɩlɩ yɛ kɛɛ yɛkɛhã mɔɔ yɛdɩlɩ nɩ nwʋ odwokɔ kehile mmenii mɔɔ bɔwɔ yɛ azɩlɛ-sini yi nu.”

Ndwokɔ mɔɔ Eliyema Rutherford ɣɩnganlɩ diyialɩ azɔfʋ yɩ nɩ, bɛbɩlɩntɩlɩ bogualɩ ahɛlɛta mmalɛ zʋ, na nɩ bɔfʋlɔ yɩ Ecclesiastics Indicted, na Bayɩbʋlʋ Zumanlɛmaa nɩ hyɛlɩ numɔ miliyɔnʋ sʋ̃maa wɔ October aziyianɩ yɩ nu. Wɔ twonwa ɛgyɩkɩ̃ɩ̃ be mɔɔ bɔfʋlɛ yɩ Cleveland mɔɔ ɩwɔ Oklahoma nu nɩ, Frank Johnson hyɛlɩ ɔzɔ ahɛlɛta mmalɛ yɩ wɔ yɩ azɩlɛ-sini yi nu wieli nɩ, nɩ ɩsɛ kɛɛ ɩdɩkɛ miniti 20 ma ɛlawulowɔlɛmaa nɣalɩyɛ yɩ bɛba bɛfa yɩ. Naasʋ̃ nɩ ɩlɔ́kʋla kɛlɩkɛ wɔ petee nu, iluwakɛɛ odwokɔ mɔɔ ɩhɔ ɩhanlɩ nɩ manlɩ mmenyia mɔɔ bɔwɔ twonwa yɩ nu valɩ ɛya, meti nɩ bɛpɩbɛɛ yɩ. Meti, Eliyema Johnson valɩ yɩ nwʋ hɔ ziyeli asɔlɩ aliyia be mɔɔ nɩ ibike kɛnɩ nɩ nu. Mmɩlɩ mɔ ɩnwʋnlɩ kɛɛ abiyela íni kɛnɩ nɩ, ɩvalɩ Ecclesiastics Indicted ahɛlɛta mmalɛ yɩ be iwulalɩ ɔsɔfʋ yɩ Bayɩbʋlʋ yɩ nu na iyiakili ebiye sʋ̃ wɔ biyia bela zʋ. Ɩyɛlɩ yɩ ndɛndɛ zʋ paa na iwieli la yɛ ivindenli a. Nɩ ɩlanwʋ la ɩwɔ mmɩlɩ ɛgyɩkɩ̃ɩ̃, meti ɩhɔ ɩyɛlɩ zɔ la wɔ asɔlɩ nniyia anwɩ̃ be sʋ̃ nu.

Frank yɛlɩ ndɛndɛ hɔlɩ dɩka mɔɔ nɩ ɩsɛ kɛɛ mmeliyema yɩ bɛba beyiyia yɩ nɩ. Ɩhɔ ɩɣɩntalɩ filling stehyɛnɩ be yɩ mɛda mɔɔ nɩ yɩ anyɩ duwa mmenyia mɔɔ nɩ bɛpɩbɛɛ yɩ nɩ. Bɛvalɩ kaalɩ bɛɣa bodualɩ nu, naasʋ̃ bɛánwʋ yɩ. Bɔhɔlɩ la pɛ yɛ Frank yɩ ɔhɔnwʋmmɔ ɛlawulowɔlɛmaa mɔɔ nɩ bɛyɛɛ egyima wɔ apaa yi nu kɛnɩ nɩ ɣalɩ a, na bɛvalɩ bɛ kaalɩ bɛvalɩ yɩ ma bɔhɔlɩ.

Mmeliyema yɩ bo nu ɔkʋ̃ hanlɩ kɛɛ: “Mmɩlɩ mɔ yɛzʋ̃ twonwa yi nu yɛyɩɩ yɛ nwʋ nɩ, yeluwalɩ asɔlɩ nniyia asã yɩ nwʋ, na yɛnwʋnlɩ kɛɛ mmenii kɛyɛ 50 begyĩ asɔlɩ aliyia bela yɩ anyunu. Nɩ abiyemmɔ bɛkɩngaa ahɛlɛta mmalɛ yɩ, na abiyemmɔ sʋ̃ bigyia bɛ dɩyɛ sʋlɔ kɛɛ bɔ ɔsɔfʋ yɩ ihilá. Yɛzʋ̃ kɛnɩ yɛyɩlɩ yɛ nwʋ wɔ mmɩlɩba nu paa, meti yɛáyiyia ɔhawʋ bela! Na yɛla Gyehova asɩ paa kɛɛ ɩwʋwalɩ yɛ ma yɛhanlɩ odwokɔ yɩ mɔɔ yɛ adamvʋlɔ bɛákyɩ yɛ.”

Bayɩbʋlʋ Zumanlɛmaa nɩ bɔzʋ̃ akɛnɣazɩzɩbɛ nu belili dasɩlɛ wɔ amanlɩ mvʋlɔ zʋ sʋ̃. Wɔ France nɩ, Józef Krett hanlɩ odwokɔ yɩ be hileli mmenii be mɔɔ bɔzʋ̃ Poland bɛɣa kɛnɩ mɔɔ botu awʋlɔ mɔɔ bɛfa bɔsɔ sɩnɩ mɔɔ bɔfʋlɔ yɩ coal nɩ. Ɩyɛlɩ nhyɩhyɛlɩyɛ kɛɛ ɩkɛma ndɛnɩ be mɔɔ yi odwokɔtile se “Ɩlɛ́kyɛ, Sa Botunwo Awuvʋlɔ.” Mmɩlɩ mɔ bɔdʋlɩ salɛ bɔvʋlɔlɩ twonwa yɩ nu maa nɩ, ɔsɔfʋ be mɔɔ ɩwɔ kɛnɩ nɩ hanlɩ hileli yɩ asɔlɩmaa kɛɛ áma bɔkɔ. Yɩ asɔlɩmaa nɩ bɛátiye yi. Mmenii mɔɔ bɔbʋ 5,000 mɔɔ ɔsɔfʋ yɩ kɩnla nwʋ bɛɣa bediyeli ndɛnɩ yɩ be! Eliyema Krett hanlɩ hileli ɔsɔfʋ yɩ kɛɛ ɩɣá ihilehile yi dedi nu, naasʋ̃ ɩáyɛ. Mmɩlɩ mɔ Eliyema Krett manlɩ ndɛnɩ yɩ wieli nɩ, ɩnwʋnlɩ kɛɛ Nɔhʋanlɛ yɩ nwʋ ohobe ikũũ mmenii nɩ, meti ɩvalɩ awuuku mɔɔ nɩ ɩlɛ yɩ nɩ munwala ɩmanlɩ bɛ.—Em. 8:11.

Eliyema be mɔɔ bɔfʋlɛ yɩ Claude Brown valɩ odwokɔba yɩ hɔlɩ Africa dɩka mɔɔ nɩ bɔfʋlɛ yɩ Gold Coast, mɔɔ nnɛ bɔfʋlɛ yɩ Ghana nɩ. Ndɛnɩ azʋlɔtʋ mɔɔ ɩmanlɩ nɩɩ awuuku mɔɔ ɩhyɛlɩ nɩ manlɩ nɔhʋanlɛ yɩ dɛlɛlɩ ndɛndɛ wɔ manlɩ yɩ nu. John Blankson  mɔɔ nɩ isumaa asʋpiti nnuno nwʋ dɩyɛ wɔ sukuulu nɩ hɔ diyeli Eliyema Brown yɩ ndɛnɩ yɩ numɔ ɔkʋ̃. Ɛkɛnɩ la yɛ ɩnwʋnlɩ kɛɛ ɩnwʋ nɔhʋanlɛ yɩ a. John hanlɩ kɛɛ: “Mɩ anyɩ leli baaba, na mɩhanlɩ nwʋmɔ odwokɔ mihileli mmenii wɔ mu sukuulu kɛ.”

Nɩ John zuma Bayɩbʋlʋ yɩ ɩnwʋ kɛɛ Nyamɩnlɩ asã ɔkʋ̃ ehilehilelɛ yɩ ígyĩ Bayɩbʋlʋ yɩ zʋ. Meti eɣile ɔkʋ̃, ɩhɔlɩ Anglican asɔlɩ be nu ɩhɔ iɣizialɩ bɔ ɔsɔfʋ yɩ nwʋmɔ odwokɔ. Ɔsɔfʋ yɩ valɩ ɛya, na ɩdɩnyɩanlɩ dɩnyɩanlɩ numɔ igualɩ yɩ zʋ kɛɛ: “Ɛ́dɩ Kilisinyianii, ɔzʋ̃ Abɔnsamɩ. Ɔzʋ̃ ɛkɩhyɩ yɩ wʋ nwʋ!”

Mmɩlɩ mɔ John dwuli awudo nɩ, ɩhɛlɛlɩ kɛlɛta ɩhɔ ɩmanlɩ ɔsɔfʋ yɩ kɛɛ ɩmá beyiyia numɔ wɔ bagua nu na ɩɣa ihilehile Nyamɩnlɩ asã ɔkʋ̃ ehilehilelɛ yɩ nu. Ɔsɔfʋ yɩ hɔ hanlɩ odwokɔ yɩ hileli tikyia ebani mɔɔ ɩwɔ John yi sukuulu kɛnɩ nɩ, na tikyia yɩ vʋlɔlɩ John wɔ yɩ ɔfɩsɩ. Ɩhɔlɩ nɩ, tikyia yɩ ɣizialɩ yɩ kɛɛ, ɩdɩ nɔhʋanlɛ kɛɛ ɩhɛlɛ kɛlɛta mɔɔ ɩdɩ zɔ ɩma ɔsɔfʋ yɩ a.

John wuwalɩ yɩ kɛɛ,“Sir, Ɩdɩ nɔhʋanlɛ.”

Tikyia yɩ hanlɩ kɛɛ John ɩhɛlɛ́ kɛlɛta ɩhɔ ɩba ɔsɔfʋ yɩ kyɛbɛ. Meti John hɛlɛlɩ hɔ manlɩ ɔsɔfʋ yɩ kɛɛ:

“Sir, Mi tikyia yɩ se mɩhɛlɛ́ kɛlɛta mɩva mɩba kyɛbɛ wʋ, naasʋ̃ gyɩsɛ ede tiã numɔ kɛɛ ekilehile awohwi ehilehilelɛ ansaana.”

Ɩdɔlɩ tikyia yɩ zʋ, na iɣizialɩ yɩ kɛɛ, “Blankson, meti eyi yɛ ɛpɛ kɛɛ ɛkɛlɛ a?”

“Nyɛ, Sir, mɔɔ mʋkɔhʋla mɩkɛhɛlɛ la yɛ nɩ.”

“Sa yɛyɩ wʋ ali. Kɛ ɩkɛyɛ na wʋadɩndɛ wʋadiyia ɔsɔfʋ mɔɔ ikila aɣanɩ yɩ asɔlɩ zʋ na wʋahɔ zʋ wʋawʋwa aɣanɩ yi sukuulu nu a?”

“Naasʋ̃, Sir, . . . sɛ ekilee dɩyɛ yɛ na sɛ yɛádɩ debe tʋ a, yɛáɣizia odwokɔ wʋ a?”

“Nyɛ, bebizia.”

“Sir, mɔɔ izili la nɩ o. Nɩ abɩlantɩyɛ yɩ ɩkãã Bayɩbʋlʋ nu odwokɔ kehile yɛ, yɛɛ miɣizialɩ odwokɔ yɩ a. Na sɛ ɩákʋla ɩyɩ odwokɔɣizialɛ yɩ munwa a, mɩnla ti mɔɔ ɩsɛ kɛɛ bɛma mɩkɛlɛ kɛlɛta mɩfa mɩpa kyɛbɛ yɩ a?”

Bɛáyɩ Blankson ali. Na ɩákɛlɛ kɛlɛta bela ɩfa ɩpa kyɛbɛ sʋ̃.

Mɔɔ izili wɔ ɔzɔ ɔlʋbɔ yɩ nu munwala nɩ, Ɔwɩɛnɩlɛ Aɣanɩ yɩ hanlɩ nwʋmɔ odwokɔ kɛɛ: “Sa yɛkʋla yɛkã mɔɔ Devidi hanlɩ nɩ be kɛɛ: ‘Ɛkɛma mikenyia anwʋzɩzɩbɛ mɔɔ mɩkɛva mʋkɔhɔ kʋnɛ.’ (Ndwomi 18:39) Mɔɔ ɩhɔlɩ zʋlɔ wɔ ɔlʋbɔ yɩ nu nɩ ɩhyɛ yɛ ɛzɩzɩbɛ kezile baaba, iluwakɛɛ yɛnwʋ kezimɔ Niibenyia ɩwʋwa yɛ wɔ yi egyima yɩ nu nɩ . . . Yɩ azʋ̃mɩvʋlɔ nwanzanwanzamaa nɩ . . . bɛva anyɩnlɩlelɛ beli dasɩlɛ.”

Ɔzɔ ɔlʋbɔ yɩ ɩbaa awielɩyɛ nɩ, mmeliyema yɩ yɛlɩ nhyɩhyɛlɩyɛ mɔɔ bɛkɛva bɛkɛdɛlɛ ɔzʋ̃mɩnlɛ egyima mɔɔ bɛyɛ wɔ ɣilediyo zʋ nɩ nu. Meti bɔwɔlɩ yɩ tʋ kɛɛ bekyinaa ɣilediyo stehyɛnɩ fʋlɔ wɔ dɩka be mɔɔ ibike Chicago. Bɔvʋlɔlɩ stehyɛnɩ fʋlɔ eyi kɛɛ ODWOKƆ, na nɩ dima yɩ fata yɩ paa. Iluwakɛɛ mahyini mɔɔ bɛva bɛhyɩhyɛlɩ ɔzɔ ɣilediyo nɩ yɩ anwʋzɩzɩbɛ wɔ sʋlɔ nɩ ti, nɩ ODWOKƆ stehyɛnɩ yɩ kɔ aɣinzi baaba paa ma bɛzabɛ mɔɔ bɔwɔ Canada tisʋlɔ ɔfʋã nu po dɩlɩ Bulombunlililɛ nwʋ odwokɔba yɩ.

Wɔ ɔlʋbɔ 1925 nu nɩ, Gyehova wʋwalɩ mmeliyema yɩ ma benyianlɩ ntɩyasɩ fʋlɔ mɔɔ ɩyɛ anyɩnlɩlelɛ wɔ Yikile yi ti 12 yɩ nwʋ. Iluwa ntɩyasɩ fʋlɔ eyi ti, abiyemmɔ yiakili Gyehova ɔzʋ̃mɩnlɛ. Naasʋ̃ bo nu sʋ̃maa bɛ anyɩ leli kɛɛ benyia ntɩyasɩ fʋlɔ mɔɔ ɩdɩ baaba falɩ ndwokɔ mɔɔ izizili wɔ sʋlɔ nɩɩ kezimɔ eyi kã Nyamɩnlɩ yi mmenii wɔ azɩlɛ yɩ zʋ nɩ nwʋ.