1-2. Mmɩlɩ mɔ nɩ Gyisɛsɩ yɩ adʋwavʋlɔ anwɩ̃ bɔkɔɔ Yimayɔsʋ nɩ, mɩnla yɛ izili a?

 NƖ ƖDƖ Nisan 16, 33 Y.M. Nɩ Gyisɛsɩ yɩ adʋwavʋlɔ yɩ bedii alɔbɔ na bo kunlu du. Nɩ bo nu anwɩ̃ bɔzʋ̃ Gyelusalamɩ bɔkɔɔ Yimayɔsʋ, suwa be mɔɔ ɩ nɩɩ Gyelusalamɩ avinli twɩ̃ kɛyɛ kilomita 11 (mayɛlɩ 7). Nɩ adʋwavʋlɔ eyimmɔ bɛ ɛɣɛɛlɛ ɩwɔ, iluwakɛɛ nɩ Gyisɛsɩ mɔɔ nɩ beli yɩ mɛda nɩ, bohũ yi. Nɩ bɛ anyɩnlɩlazʋ yɛ lɛ kɛɛ Mɛzaya nɩ kɛyɛ nninyeni nɣezile kɛma Dwuumaa nɩ, naasʋ̃ kakɩ yɩ nɩ ɩdɩ kɛɛ mɔɔ bɛ anyɩnlɩlazʋ ɩzã. Naasʋ̃ nɩ debe mɔɔ bɛáhila yɩ ɔhʋanɩ ibazi.

² Benyia be mɔɔ bézi yi ɣa dʋlɩ bɛ na ɩ nɩɩ bɛ wɔlɩ numɔ hɔlɩ. Adʋwavʋlɔ yɩ hanlɩ nninyeni tanɩ mɔɔ bɛva bɛyɛlɩ Gyisɛsɩ nɩ nwʋ odwokɔ behileli benyia yɩ. Benyia nɩ wɔlɩ yɩ tʋ kɛɛ ɩ nɩɩ bɛ bɔbɔɔ nkɔmmɔ be mɔɔ bɛ ɛɣɛɛlɛ iléfi kyɩ̃. “Ɩwɔlɩ yɩ tʋ wɔ Mosisi yɩ awuuku nɩ zʋ ɩhɔlɩ idwuli nkɔmɩhyɛmaa nɩ mmɔ bɛ dɩyɛ nɩ zʋ,” ihilehileli bɛ sianti mɔɔ nɩ ɩsɛ kɛɛ Mɛzaya nɩ ɩnwʋ amanɩyɛ na iwu nɩ. Mmɩlɩ mɔ bodwuli Yimayɔsʋ nɩ, benyia nɩ lalɩ yɩ nwʋ ali hileli bɛ. Nɩ ɩdɩ Gyisɛsɩ mɔɔ bodunwo yɩ nɩ! Mɔwʋ kila kezimɔ bɛ anyɩ leli, mmɩlɩ mɔ bɔnwʋnlɩ kɛɛ Mɛzaya nɩ da azɩ nɩ!—Lk. 24:​13-35.

3-4. Mɩnla yɛ ɩdʋlɩ Gyisɛsɩ yɩ adʋwavʋlɔ yɩ a, na mɩnla yɛ yekozuma wɔ dɩyɛzumanlɛ eyi nu a? (Egyima 1:3)

³ Gyisɛsɩ yɩlɩ yɩ nwʋ hileli yɩ adʋwavʋlɔ yɩ mbɔmɩ sʋ̃maa wɔ yi eɣile 40 mɔɔ itualɩ yɩ tʋ wɔ azɩlɛ yɩ zʋ nɩ. (Kɩnga Egyima 1:3.) Wɔ ɔzɔ mmɩlɩ yɩ nɩ, Gyisɛsɩ yɩ adʋwavʋlɔ mɔɔ nɩ bɔlɔ kezile hã bɛ na bo kunlu du nɩ, benyianlɩ anyɩnlɩlelɛ na bɛvalɩ akɛnɣazɩzɩbɛ  bɛhanlɩ Bulombunlililɛ nwʋ odwokɔba yɩ na behilehileli mmenii. a

⁴ Sɛ yesuma mɔɔ Gyisɛsɩ yɛlɩ wɔ ɔzɔ mmɩlɩ yɩ nu nɩ nwʋ dɩyɛ a, yekenyia zʋlɔ mfasʋ sʋ̃maa. Wɔ dɩyɛzumanlɛ eyi nu nɩ, yekehila kezimɔ Gyisɛsɩ valɩ ɛzɛ mmɩlɩ eyi (1) hyɛlɩ yɩ adʋwavʋlɔ yɩ ɛzɩzɩbɛ, (2) wʋwalɩ bɛ ma bɛdɩlɩ Ɛhɛlɛlɛdwokɔ yɩ tʋ bʋwɔ, nɩɩ (3) dɩdɩlɩ bɛ manlɩ egyima kezile mɔɔ nɩ bɛkɛyɛ yɩ wɔ eɣile be nɩ. Wɔ numɔ ɔkʋ̃ bela nu nɩ, yekehila kezimɔ yɛkɔhʋla kozumazuma Gyisɛsɩ yi ndianwʋ yɩ.

HYƐ MMENII MVƲLƆ ƐZƖZƖBƐ

5. Mɩnla ti mɔɔ nɩ Gyisɛsɩ yɩ adʋwavʋlɔ yɩ hyinyia ɛzɩzɩbɛhyɛlɛ a?

⁵ Nɩ Gyisɛsɩ yɩ adʋwavʋlɔ yɩ hyinyia ɛzɩzɩbɛhyɛlɛ. Mɩnla ti a? Nɩ bo nu be diã be nniyia, bo mmusunwamaa nɩɩ be egyima azʋlɔtʋ kɛnɩ bɛɣa beli Gyisɛsɩ mɛda. (Mt. 19:27) Nɩ bɛ nɩɩ bo nu be sʋ̃ iáli yi bʋwɔ wɔ bo twonwa zʋ iluwakɛɛ nɩ bɛɣa bɛyɛ Gyisɛsɩ yɩ adʋwavʋlɔ nɩ ti. (Dwɔ. 9:22) Bɛyɛlɩ ɔzɔ nzɩnzanlɩyɛ yɩ munwala iluwakɛɛ nɩ bede bedi kɛɛ, Gyisɛsɩ yɛ lɛ Mɛzaya mɔɔ bɔwɔlɩ yɩ nwʋ anʋhʋba nɩ a. (Mt. 16:16) Naasʋ̃ mmɩlɩ mɔ bohunli Gyisɛsɩ nɩ, bɛ ɛɣɛɛlɛ wɔlɩ na bɛ padi golɔlɩ, iluwakɛɛ nɩ bɛ adwɩnɩ yɛ bɛ kɛɛ mɔɔ nɩ bɛ anyɩ la yɩ nɩ ɩlɛ́ba numɔ.

6. Mɩnla yɛ Gyisɛsɩ yɛlɩ wɔ yi awudunwolɩyɛ mɛda a?

⁶ Gyisɛsɩ nwʋnlɩ alɔbɔ mɔɔ nɩ yɩ adʋwavʋlɔ yɩ bedii wɔ yi owulo yɩ nwʋ nɩ kɛɛ ɩdɩ yɩ ɔhʋanɩ zʋ, na iábu bɛ kɛɛ bɛyɛ mɛlɛkɛ wɔ sunzuma ɔfʋã nu. Meti eɣile mɔɔ bodunwonli yi la yɛ ɩwɔlɩ yɩ tʋ kɛɛ ɩhyɛɛ yɩ ɔhɔnwʋmmɔ yɩ ɛzɩzɩbɛ a. Kɛ ndianwʋ nɩ, ɩyɩlɩ yɩ nwʋ ihileli Mɛɛlɩ Magidalini mmɩlɩ mɔ nɩ igyĩ yɩ nna yɩ nwʋ isũũ nɩ. (Dwɔ. 20:​11, 16) Akʋ̃ sʋ̃, ɩyɩlɩ yɩ nwʋ ihileli adʋwavʋlɔ anwɩ̃ yɩ mɔɔ yeli bɔmʋnlɩ yɛhã bɔ nwʋ odwokɔ nɩ. Na ɩyɩlɩ yɩ nwʋ ihileli sʋ̃mavʋlɔ Pita sʋ̃. (Lk. 24:34) Mɩnla yɛ yɛkɔhʋla kozuma wɔ Gyisɛsɩ yi ndianwʋ yɩ nu a? Bɛmá yehila mɔɔ izili mmɩlɩ mɔ Gyisɛsɩ yɩlɩ yɩ nwʋ hileli Mɛɛlɩ Magidalini nɩ.

7. Kɛmɔ Dwɔɔnʋ 20:​11-16 kã nɩ, mɩnla yɛ Gyisɛsɩ nwʋnlɩ kɛɛ Mɛɛlɩ ɩyɛɛ wɔ Nisan 16 nwɔnɩ dɛkɛdɛkɛ a, na mɩnla yɛ eyi hanlɩ Gyisɛsɩ ma ɩyɛlɩ a? (Kila mfonyini yi sʋ̃.)

⁷ Kɩnga Dwɔɔnʋ 20:​11-16. Nwɔnɩ dɛkɛdɛkɛ wɔ Nisan 16 nɩ, mmaalɛ nɔhʋanlɛmaa be  hɔlɩ Gyisɛsɩ yɩ nna yɩ zʋ. (Lk. 24:​1, 10) Bo nu ɔkʋ̃ yɛ lɛ Mɛɛlɩ Magidalini. Bɛmá yehila yi ozumanlɛnwʋnlɛ yɩ. Mmɩlɩ mɔ Mɛɛlɩ dwuli nna yɩ zʋ nɩ, nɩ dɩyɛ bela íni kɛnɩ. Meti iduli tɔlɔnwa ɩhɔ ɩhã ihileli Pita nɩɩ Dwɔɔnʋ, na ilili bɛ mɛda ma bezia bɛɣalɩ nna yɩ zʋ. Mmɩlɩ mɔ bɔhɔlɩ nɩ bɔnwʋnlɩ kɛɛ amba, Gyisɛsɩ yi funli íni kɛnɩ, meti bezia bɔhɔlɩ awudo. Naasʋ̃ Mɛɛlɩ mɛyɩ, ɩákɔ awudo. Ɩwʋwalɩ kɛnɩ izunli. Nɩ ízi kɛɛ Gyisɛsɩ ikilaa yɩ. Gyisɛsɩ nwʋnlɩ kezimɔ baalɛ nɔhʋanlɛvʋlɔ eyi isũũ nɩ, na ɩhanlɩ yɩ ma nɩ ɩpɛ kɛɛ ɩkyɩkyɩ yɩ ɛɣɛɛlɛ. Meti ɩyɩlɩ yɩ nwʋ ihileli Mɛɛlɩ na ɩyɛlɩ debe ɛgyɩkɩ̃ɩ̃ be mɔɔ ɩyɩkyɩlɩ yɩ ɛɣɛɛlɛ kezile baaba. Ɩ nɩɩ yɩ dɩndɛlɩ na ɩvalɩ egyima be mɔɔ nwʋmɔ hyinyia iwulalɩ yɩ sa kɛɛ, ɩhɔ́ ɩhã yɩ awudunwolɩyɛ yɩ nwʋ odwokɔ ihile yi mmenlima yɩ.—Dwɔ. 20:​17, 18.

8. Kɛ ɩkɛyɛ na yɛazumazuma Gyisɛsɩ a?

⁸ Kɛ ɩkɛyɛ na yɛazumazuma Gyisɛsɩ a? Dɩkɛɛ Gyisɛsɩ nɩ, sɛ yɛnwʋ mɔɔ ɩma ye mmeliyema bedii alɔbɔ na yɛda kunlumiyɩbalɛ ali yekile bɛ a, sa yɛkʋla yɛyɛ sʋ̃maa yɛfa yɛhyɛ bɛ ɛzɩzɩbɛ ma bɔkɔ zʋ bɔsʋ̃mɩ Gyehova. Bɛmá yehila eliyema baalɛ be mɔɔ bɔfʋlɔ yɩ Jocelyn yi ozumanlɛnwʋnlɛ yɩ. Yɩ anlima baalɛ wuli wɔ asɩdɛntɩ ɛyɛlɛ ɛyɛlɛ be nu. Ɩkã kɛɛ, “Mmɩlɩ munwala, nɩ alɔbɔ kezile hyɛ mʋ zʋ.” Naasʋ̃, eliyema benyia be nɩɩ yɩ yɩ dʋlɩ salɛ vʋlɔlɩ yɩ wɔ bɛ awudo, bɔzʋ̃ kunlumiyɩbalɛ nu bediyeli yi, na bɛmanlɩ ɩnwʋnlɩ kɛɛ ɩtʋ bʋlɔ wɔ Gyehova anyɩ zʋ. Jocelyn kã kɛɛ: “Nɩ mɩ adwɩnɩ du vʋla, nɩ ɩdɩ kɛɛ mɔɔ mimii wɔ ngyemvile mɔɔ ahumi ituu wɔ zʋlɔ nu. Naasʋ̃, Gyehova luwalɩ eliyema benyia yɩ nɩ yɩ yɩ bɔ zʋ leli mɩ. Bɔwʋwalɩ mɩ ma mizia minyianlɩ ɛpɛ kɛɛ mʋkɔhɔ zʋ mʋkɔzʋ̃mɩ Gyehova.” Amɩyɛ sʋ̃, sɛ yɛyɛ azʋnlɩ yetiye mmenii mvʋlɔ mmɩlɩ mɔ bɛkãã bɛ ahʋnlɩnɩ nu ndwokɔ kehile yɛ na yɛzʋ̃ kunlumiba nu yɛtɩndɛ yekile bɛ a, sa yɛkʋla yɛkyɩkyɩ bɛ ɛɣɛɛlɛ na yɛawʋwa bɛ ma bɛahɔ zʋ bɛazʋ̃mɩ Gyehova.—Wul. 12:15.

BƲWA MMENII MVƲLƆ MA BƐDƖ NYAMƖNLƖ ODWOKƆ YƖ TƲ

9. Mɩnla ndwokɔzɩzɩbɛ yɛ Gyisɛsɩ yɩ adʋwavʋlɔ yɩ yiyialɩ a, na mɩnla ɔhʋanɩ zʋ yɛ Gyisɛsɩ wʋwalɩ bɛ a?

⁹ Gyisɛsɩ yɩ adʋwavʋlɔ yɩ leli Nyamɩnlɩ Odwokɔ yɩ lili na bɔwɔlɩ mmɔdɩnɩ kɛɛ bɛkɛva kɛyɛ egyima wɔ bɛ ɛbɩlawɔlɛ nu. (Dwɔ. 17:6) Naasʋ̃, Gyisɛsɩ mɔɔ iwuli wɔ amanɩyɛnwʋnlɛ owudo zʋ dɩkɛɛ tanɩyɛlɛnii nɩ mɛyɩ, nɩ bɛádɩ yɩ tʋ. Nɩ Gyisɛsɩ zi kɛɛ yɩ adʋwavʋlɔ yɩ wɔ dedi na bɔdɔ Gyehova, naasʋ̃ ɩnwʋnlɩ kɛɛ nɩ ihyinyia kɛɛ bɛtɩ Ɛhɛlɛlɛdwokɔ yɩ tʋ bʋwɔ. (Lk. 9:​44, 45; Dwɔ. 20:9) Meti ɩwʋwalɩ bɛ ma bɛdɩlɩ mɔɔ bɛkɩnga wɔ Ɛhɛlɛlɛdwokɔ yɩ nu nɩ tʋ bʋwɔ. Bɛmá yehila kezimɔ ɩyɛlɩ zɔ mmɩlɩ mɔ ɩyɩlɩ yɩ nwʋ ihileli adʋwavʋlɔ anwɩ̃ mɔɔ nɩ boluwaa ɔhʋanɩ zʋ bɔkɔɔ Yimayɔsʋ nɩ.

10. Mɩnla ɔhʋanɩ zʋ yɛ Gyisɛsɩ wʋwalɩ yɩ adʋwavʋlɔ yɩ ma bɔnwʋnlɩ kɛɛ mɛyɩ yɛ lɛ Mɛzaya nɩ a? (Luuku 24:​18-27)

¹⁰ Kɩnga Luuku 24:​18-27. Yɛ́ yɩ ndwɩ kɛɛ, Gyisɛsɩ ɩáda yɩ nwʋ ali ikile bɛ amʋnɔ nu kɛnɩ la. Mfomi, iɣizialɩ ndwokɔ bɛ. Mɩnla ti a? Ebiye a nɩ ɩpɛ kɛɛ bɛkã kezimɔ bɛtɩ nɣanlɩ nɩɩ mɔɔ bɔdwɩnɩɩ nwʋmɔ nɩ bekile yi. Na bɛhã behileli yi sʋ̃. Bɛhã behileli yi kɛɛ nɩ bekilaa ɔhʋanɩ kɛɛ Gyisɛsɩ kele Yizilayamaa yɩ wɔ Wulomimaa bo tumililɛ tʋ. Mmɩlɩ mɔ bɛhanlɩ bɔ ɔhawʋ behileli yi bowieli nɩ, Gyisɛsɩ gyinanlɩ Ɛhɛlɛlɛdwokɔ yɩ zʋ wʋwalɩ mmenyia eyi ma bɛdɩlɩ mɔɔ nɩ izi nɩ yɩ tʋ. b Aɣinzi yi wɔ ɔzɔ nunuma yɩ nɩ, Gyisɛsɩ leli mmɩlɩ ɩ nɩɩ adʋwavʋlɔ nɣalɩyɛ yɩ sʋ̃ wɔlɩ nkɔmmɔ na ɩwʋwalɩ bɛ ma bɛdɩlɩ nkɔmɩhyɛ azʋlɔtʋ yɩ tʋ. (Lk. 24:​33-48) Mɩnla yɛ yɛkɔhʋla kozuma wɔ odwokɔ eyi nu a?

11-12. (a) Ɔhʋanɩ mɔɔ Gyisɛsɩ luwalɩ zʋlɔ hilehileli nɔhʋanlɛ yɩ nɩ, mɩnla yɛ yɛkɔhʋla kozuma wɔ nu a? (Kila mfonyini yi sʋ̃.) (b) Kɛ Nortey yi Bayɩbʋlʋ kilehilevʋlɔ yɩ wʋwalɩ yɩ zeli a?

¹¹ Kɛ ɩkɛyɛ na yɛazumazuma Gyisɛsɩ a? Mɔɔ ili  bɔmʋnlɩ, sɛ ekilehilee wʋ Bayɩbʋlʋ dɩyɛzumanlɛmaa a, bizia ndwokɔ mɔɔ ɩfata fa bʋwa bɛ ma bɛhã kezimɔ bɛtɩ nɣanlɩ nɩɩ mɔɔ ɩwɔ bɛ ahʋnlɩnɩ nu. (Ɛɣɛ. 20:5) Sɛ ɛba ɛtɩ kezimɔ bɛtɩ nɣanlɩ nɩ tʋ a, kile bɛ ɛhɛlɛlɛdwokɔ pɔkyɩɩ mɔɔ ɩkɔwʋwa bɛ wɔ bɔ bʋwabɩlɛ yɩ nu. Áma ɛkã mɔɔ ɩsɛ kɛɛ bɛyɛ nɩ ekile bɛ. Mfomi, bʋwa bɛ ma bozunzu Ɛhɛlɛlɛdwokɔ yɩ nwʋ na bɔnwʋ kezimɔ bɛkɛva numɔ egyinalɛzʋ-ndwokɔ yɩ bɛkɛyɛ egyima wɔ bɛ ɛbɩlawɔlɛ nu. Bɛmá yehila eliyema be mɔɔ ɩwɔ Ghana mɔɔ bɔfʋlɔ yɩ Nortey yi ozumanlɛnwʋnlɛ yɩ.

¹² Mmɩlɩ mɔ Nortey lili ɔlʋbɔ 16 nɩ yɛ ɩwɔlɩ yɩ tʋ kɛɛ isumaa Bayɩbʋlʋ yɩ a. Naasʋ̃, ɩákyɛ yɛ yi mmusunwamaa dwodwuli diyialɩ yɩ a. Mɩnla yɛ ɩwʋwalɩ yɩ ma igyinanlɩ pindinyii a? Nɩ yɩ Bayɩbʋlʋ kilehilevʋlɔ yɩ ɩ nɩɩ yɩ zunzu Matiyu yi ti 10 nwʋ daada ma ɩnwʋ kɛɛ nɔhʋanlɛ Kilisinyiamaa keyiyia odwodwudiyialɛ. Nortey kã kɛɛ: “Meti mmɩlɩ mɔ odwodwudiyialɛ yɩ wɔlɩ yɩ tʋ nɩ, yɛ mʋnwʋnlɩ kɛɛ mʋnwʋ nɔhʋanlɛ yɩ a.” Yɩ Bayɩbʋlʋ kilehilevʋlɔ yɩ wʋwalɩ yɩ sʋ̃ ma izunzunli Matiyu 10:16 nwʋ na ama yɩ anyɩ ɩala kɛnɩ na ɩala annidi ali mmɩlɩ mɔ ikilehilee yi dedi nu kehile yi mmusunwamaa nɩ. Nortey nlumanlɩ mɛda nɩ, nɩ ɩpɛ kɛɛ ɩyɛ ɔhʋanɩbukolɛvʋlɔ, naasʋ̃ nɩ yɩ papa pɛ kɛɛ ɩkɔ yunivɛsiti. Kɛ ankɩ yɩ Bayɩbʋlʋ kilehilevʋlɔ yɩ kehile yi mɔɔ ɩyɛ́ nɩ, iluwalɩ ndwokɔɣizialɛ zʋ ɩwʋwalɩ yɩ ma izunzunli Bayɩbʋlʋ nu egyinalɛzʋ-ndwokɔ nwʋ na ɩawʋwa yɩ ma iazi pɔkɔba. Mɩnla yɛ ɩzʋ̃ numɔ ɩɣalɩ a? Nortey zili pɔkɔ kɛɛ ɩkɛyɛ mmɩlɩ munwala ɔzʋ̃mɩnlɛ egyima yɩ. Meti yɩ papa duduli yi wɔ awudo. Mɔɔ izizili nɩ, kɛ Nortey tɩ nɣanlɩ wɔ nwʋmɔ se a? Ɩkã kɛɛ, “Mide midi paa kɛɛ mizili pɔkɔba.” Amɩyɛ sʋ̃, sɛ yede mmɩlɩ yɛbʋwa mvʋlɔ ma bosunzu Ɛhɛlɛlɛdwokɔ yɩ nwʋ a, ɩkɔwʋwa bɛ ma bɛkɛɣa kɛyɛ Kilisinyiamaa mɔɔ be dedi yɛ sɩ, na bɛahɔ zʋ bɛazʋ̃mɩ Gyehova.—Ɛfɩ. 3:​16-19.

BƲWA MMENYIA MA BƐVATA KƐƐ ‘AKYƐDƖ MA ADASAMAA’

13. Ansaana Gyisɛsɩ kɔhɔ sʋlɔ nɩ, mɩnla yɛ ɩyɛlɩ na ama dasɩlɛlilɛ egyima yɩ ɩahɔlɩ zʋlɔ a? (Ɛfɩsɛsɩmaa 4:8)

¹³ Mmɩlɩ mɔ nɩ Gyisɛsɩ wɔ azɩlɛ yɩ zʋ nɩ, ɩyɛlɩ egyima mɔɔ yɩ Zɩ va manlɩ yɩ nɩ pɛpɛɛpɛ. (Dwɔ. 17:4) Naasʋ̃ Gyisɛsɩ iányia adwɩnɩ kɛɛ, yɩzayɩ nkʋ̃ la yɛ ɩkɔhʋla kɛyɛ mɔɔ Gyehova pɛ a. Meti alʋbɔ asã nɩɩ ɔfʋã mɔɔ ɩva ɩyɛlɩ dasɩlɛlilɛ egyima yɩ nɩ, ɩdɩdɩlɩ mmenii mvʋlɔ sʋ̃ ma bɛyɛlɩ egyima be. Ansaana Gyisɛsɩ kɔhɔ sʋlɔ nɩ, ɩva iwulalɩ yɩ adʋwavʋlɔ yɩ bɛ sa kɛɛ behilá Gyehova yi mmenii mɔɔ bɛla yɩ ahʋnlɩnɩ zʋ nɩ,  na bɛyɛ odwokɔbahanlɛ nɩɩ ehilehilelɛ egyima yɩ. Nɩ bo nu be po lédili alʋbɔ 30. (Kɩnga Ɛfɩsɛsɩmaa 4:8.) Mɩnla ɔhʋanɩ zʋ yɛ Gyisɛsɩ valɩ yi eɣile 40 mɔɔ itualɩ yɩ tʋ wɔ azɩlɛ yɩ zʋ nɩ wʋwalɩ mmenyia eyi mɔɔ bedi nɔhʋanlɛ na bɛyɛ egyima ɛzɩzɩbɛ nɩ ma bɛɣa bɛyɛlɩ ‘akyɛdɩ bɛmanlɩ adasamaa’ a?

14. Ɩka aɣile 40 ma Gyisɛsɩ kɔ sʋlɔ nɩ, mɩnla yɛ ihileli yɩ adʋwavʋlɔ yɩ a? (Kila mfonyini yi sʋ̃.)

¹⁴ Gyisɛsɩ ɩzʋ̃ ɔlɔlɛ nu ɩvalɩ fʋlɔdulɛ mɔɔ nɩ yɩ adʋwavʋlɔ yɩ hyinyia nɩ ɩmanlɩ bɛ. Kɛ ndianwʋ nɩ, ɩyɛlɩ yɩ ndwɩ kɛɛ nɩ bo nu be bɛ adwɩnɩ yɛ bɛ anwɩ̃ anwɩ̃ wɔ yi owulo nɩɩ yɩ awudunwolɩyɛ yɩ nwʋ, meti iduli bɔ fʋlɔ. (Lk. 24:​25-27; Dwɔ. 20:27) Ɩmanlɩ bɔnwʋnlɩ kɛɛ ihyinyia kɛɛ bɛfa bɛ adwɩnɩ besiye Gyehova yi mmenii mɔɔ bekehila bɛ nɩ zʋ tɛla bɛzabɛ bɔ nnwʋnlamɩ ɔfʋã nu egyima zʋ. (Dwɔ. 21:15) Akʋ̃ sʋ̃, ɩmanlɩ bɔnwʋnlɩ kɛɛ íni kɛɛ bɛfa mɔɔ bɔkʋla bɛyɛ wɔ Gyehova yɩ ɔzʋ̃mɩnlɛ nu nɩ betindiã mvʋlɔ bɛ dɩyɛ nwʋ. (Dwɔ. 21:​20-22) Na ɩdɩnɣɛnlɩ adwɩnɩ be mɔɔ ɩávata mɔɔ nɩ bɛlɛ yɩ wɔ Bulombunlililɛ yɩ nwʋ na ɩwʋwalɩ bɛ ma bɛvalɩ bɛ adwɩnɩ beziyeli odwokɔbahanlɛ egyima yɩ zʋ mfomi. (Egy. 1:​6-8) Mɩnla yɛ asafʋ nu mbanimbani kɔhʋla kozuma wɔ Gyisɛsɩ kɛnɩ a?

15-16. (a) Mɩnla ɔhʋanɩ zʋ yɛ asafʋ nu mbanimbani kɔhʋla kozumazuma Gyisɛsɩ a? (b) Mɩnla ɔhʋanɩ zʋ yɛ Patrick nyianlɩ fʋlɔdulɛ zʋ mfasʋ a?

¹⁵ Kɛ ɩkɛyɛ na asafʋ nu mbanimbani bɛazumazuma Gyisɛsɩ a? Ɩsɛ kɛɛ bɛtɩdɩ na bɔbʋwa mmenyia mɔɔ nnwuakula po kɩnla nwʋ ma bɛfata kɛɛ bekeli asɛdɩ azʋlɔtʋ nwʋ egyima wɔ asafʋ yɩ nu. c Asafʋ nu mbanimbani bɛáhila ɔhʋanɩ kɛɛ bɛzabɛ mɔɔ bɛtɩdɩ bɛ nɩ kɛyɛ bɛ dɩyɛ pɛpɛɛpɛ. Ɩsɛ kɛɛ bɔzʋ̃ ɔlɔlɛ nu bɛfa fʋlɔdulɛ bɛma mmeliyema yɩ ama bɔ nwʋ ɩawʋkwa, bɛanwʋ sianti mɔɔ ihyinyia kɛɛ bɛkã bɔ nwʋ azɩ, bedi nɔhʋanlɛ na benyia ɛpɛ kɛɛ bɔkɔzʋ̃mɩ mmenii mvʋlɔ.—1 Tim. 3:1; 2 Tim. 2:2; 1 Pit. 5:5.

¹⁶ Kila kezimɔ eliyema benyia be mɔɔ bɔfʋlɛ yɩ Patrick nyianlɩ fʋlɔdulɛ zʋ mfasʋ. Mmɩlɩ mɔ nɩ ɩdɩ abɩlantɩyɛ kuakula nɩ, nɩ yi munwa ndɛnɩ ɩáyɛ fɛ, na nɩ ɩ nɩɩ mmenii iáli yi bʋwɔ mɔɔ mmeliyema mmaalɛ po kɩnla nwʋ. Asafʋ nu  ebani be nwʋnlɩ kɛɛ ɩsɛ kɛɛ Patrick yɛ nzɩnzanlɩyɛ, meti ɩzʋ̃ ɔlɔlɛ nu iduli yi fʋlɔ senyii. Patrick kã kɛɛ: “Ɩyɛ mɩ fɛ paa kɛɛ iduli mɩ fʋlɔ, iluwakɛɛ sɛ nɩ mʋnwʋ kɛɛ bɛva ɔnwʋmɔ ɔhʋanɩ be mɔɔ mɩ anyɩ deli nwʋmɔ bɛma abiyemmɔ a, nɩ ɩyɛ ɛyɛkɛ mɩ. Naasʋ̃ asafʋ nu ebani yi yɩ fʋlɔdulɛ yɩ wʋwalɩ mɩ ma mʋnwʋnlɩ kɛɛ ɩsɛ kɛɛ mʋzʋ̃ kãnwʋazɩ nu mʋsʋ̃mɩ mi mmeliyema mmenyia nɩɩ mmaalɛ tɛla kɛɛ mɩkɛma mɩ anyɩ kɔwʋlʋ dibilɛ anzɛnyɩɩ ɔnwʋmɔ ɔhʋanɩ wɔ asafʋ yɩ nu.” Mɔɔ ɩzʋ̃ numɔ ɩɣalɩ yɛ lɛ kɛɛ, ɩɣa ɩyɛlɩ asafʋ nu ebani mmɩlɩ mɔ nɩ ili alʋbɔ 23 nɩ.—Ɛɣɛ. 27:9.

17. Mɩnla ɔhʋanɩ zʋ yɛ Gyisɛsɩ lalɩ yɩ ali kɛɛ ɩwɔ yɩ adʋwavʋlɔ yɩ nu anwʋlazʋ a?

¹⁷ Kɛ odwokɔbahanlɛ egyima yɩ yɩzayɩ nkʋ̃ yɛ Gyisɛsɩ va wulalɩ yɩ adʋwavʋlɔ yɩ bɛ sa a, mfomi ɩhanlɩ kɛɛ ɩsɛ kɛɛ bɛyɛ ehilehilelɛmaa sʋ̃. Ɩkɛyɛ kɛɛ adʋwavʋlɔ yɩ dɩlɩ nɣanlɩ kɛɛ bɔlɔ́kʋla bɛkɛyɛ ɔzɔ egyima yɩ. Naasʋ̃ nɩ Gyisɛsɩ zi paa kɛɛ sa bɔkʋla, na ɩmanlɩ bɔnwʋnlɩ yɩ zɔ sʋ̃. Nɩ ɩwɔ bo nu anwʋlazʋ nkʋ̃ʋ̃ ma ɩhanlɩ kɛɛ: “Kɛmɔ Ɛzɩlɛ nɩ ɩzʋ̃manlɩ mɩ nɩ ɔzɔ la yɛ mɩzamɩ sʋ̃ mʋsʋ̃maa mʋnlʋmmɔ a.”—Dwɔ. 20:21.

18. Kɛ ɩkɛyɛ na asafʋ nu mbanimbani bɛazumazuma Gyisɛsɩ a?

¹⁸ Kɛ ɩkɛyɛ na asafʋ nu mbanimbani bɛazumazuma Gyisɛsɩ a? Asafʋ nu mbanimbani mɔɔ bɔ nwʋ wʋkwa nɩ, bɛfa asɛdɩ bowula mmenii sa. (Fɩl. 2:​19-22) Kɛ ndianwʋ nɩ, sɛ besiyeziyee Kɩndɔm Hɔɔlʋ a, asafʋ nu mbanimbani kɔhʋla kɛma nnwuakula kɛyɛ ebiye. Sɛ bɛfa asɛdɩ bowula abiyemmɔ bɛ sa bowie a, sa bɔkʋla bekile kɛɛ bɔwɔ bo nu anwʋlazʋ iluwa ɛdɩdɩlɛ mɔɔ bɛkɛva bɛkɛma bɛ nɩɩ dedi mɔɔ bekenyia kɛɛ mmeliyema yɩ kɛyɛ egyima yɩ bʋwɔ nɩ zʋ. Asafʋ nu ebani fʋlɔ be mɔɔ bɔfʋlɛ yɩ Matthew kã kɛɛ, yɩ anyɩ sɔ asafʋ nu mbanimbani mɔɔ bɔ nwʋ wʋkwa mɔɔ bɛdɩdɩlɩ yɩ bʋwɔ bɛmanlɩ egyimalilɛ be na benyianlɩ yi nu anwʋlazʋ kɛɛ ɩkɔhʋla kɛyɛ nɩ. Ɩkã kɛɛ, “Bowuli mfʋmɩ mɔɔ milili nɩ kɛɛ ɩkɩnla ɛdɩdɩlɛ yɩ nwʋ na bɔwʋwalɩ mɩ ma muduli mpʋnɩ wɔ mi egyimalilɛ yɩ nu, eyi wʋwalɩ mɩ baaba.” d

19. Mɩnla yɛ ɩsɛ kɛɛ yesi yɛ kɛnɣa kɛɛ yɛkɛyɛ a?

¹⁹ Gyisɛsɩ valɩ yi eɣile 40 mɔɔ itualɩ yɩ tʋ wɔ azɩlɛ yɩ zʋ nɩ hyɛlɩ mmenii mvʋlɔ ɛzɩzɩbɛ, ihilehileli bɛ, na ɩdɩdɩlɩ bɛ sʋ̃. Bɛmá ye munwala yezí yɛ kɛnɣa kɛɛ yɛkɛyɛ mɔɔ yɛkɔhʋla bela yekeli yi ndianwʋ mɛda. (1 Pit. 2:21) Ɩkɔwʋwa yɛ ma yɛkɛyɛ zɔ, iluwakɛɛ ɩwɔ yɛ anʋhʋba kɛɛ: “Mɩ nɩɩ mʋnlʋmmɔ yeluwa eɣile bela, kɔbʋmɩ oyuwadɩ awielɩyɛ.”—Mt. 28:20.