1. Mmɩlɩ mɔ Gyisɛsɩ wʋwalɩ Pita ma ɩhyɩlɩ egyeni sʋ̃maa nɩ, kɛ ɩdɩlɩ nɣanlɩ izeli a?

 NƖ PITA ɩhɔ ngyemvile nu nunuma yɩ munwala, naasʋ̃ iányia hwɩɩ. Gyisɛsɩ hanlɩ hileli yi kɛɛ: “Kwanɩ kɔ dɩka mɔɔ ɩyɛ kuma na ɛ nɩɩ wʋ ɔhɔnwʋmmɔ bɔdʋ́ bɔ mmʋwa bɛhyɩ egyeni.” (Lk. 5:4) Nɩ Pita yɩ adwɩnɩ iázi yi pi kɛɛ ikenyia egyeni wɔ kɛnɩ, naasʋ̃ ɩyɛlɩ mɔɔ Gyisɛsɩ hanlɩ nɩ. Mmɩlɩ mɔ bɔdʋlɩ asawu yɩ nɩ, bɛhyɩlɩ egyeni sʋ̃maa na asawu yi wɔlɩ yɩ tʋ kɛɛ ɩtɩdɩɩ. Mmɩlɩ mɔ Pita nɩɩ yɩ ɔhɔnwʋmmɔ yɩ nwʋnlɩ yɩ zɔ nɩ, “asibɔnwʋ hanlɩ bɛ.” Pita dɩnyɩanlɩ numɔ kɛɛ: “Mi Niibenyia! Ɔzʋ̃ mɩ pɛ ɛkɩhyɩ yɩ wʋ nwʋ, iluwakɛɛ mɩdɩ tanɩvʋlɔ mɔɔ íni kɛɛ ebike mɩ!” (Lk. 5:​6-9) Pita dɩlɩ nɣanlɩ kɛɛ ɩávata po kɛɛ ibike Gyisɛsɩ.

2. Mɩnla ti mɔɔ Pita yɩ nwʋ dɩyɛ mɔɔ yekozuma nɩ kɔhʋla kɔwʋwa yɛ a?

² Ɩdɩ nɔhʋanlɛ, nɩ Pita dɩ “tanɩvʋlɔ.” Bayɩbʋlʋ yɩ kã kɛɛ, wɔ mmɩlɩ be nu nɩ, ɩhanlɩ ndwokɔ anzɛnyɩɩ ɩyɛlɩ nninyeni be mɔɔ aɣinzi yi, inlunlɩ yɩ nwʋ. Asʋ̃ ɩyɛ a ɛtɩ nɣanlɩ kɛɛ Pita a? Subanɩ anzɛnyɩɩ mɛlɛkɛyɛlɛ be wɔ kɛnɩ mɔɔ ɔbɔɔ mmɔdɩnɩ kɛɛ ekeli zʋ a? Sɛ ɔzɔ a, nɩ Pita nwʋ dɩyɛ mɔɔ okozuma nɩ kɔhʋla kɔwʋwa wʋ. Mɩnla ɔhʋanɩ zʋ a? Bɛmá yehila eyi: Ankɩ sa bɔkʋla bɛyɩ mfʋmɩ mɔɔ Pita lili nɩ wɔ Bayɩbʋlʋ yɩ nu, naasʋ̃ bɛhɛlɛ wɔ numɔ ama yɛazuma debe wɔ nu. (2 Tim. 3:​16, 17) Sɛ yesuma Pita yɩ mɛlɛkɛyɛlɛ mɔɔ nɩ ɩbɔɔ mmɔdɩnɩ kɛɛ ikeli zʋlɔ nɩ nwʋ dɩyɛ a, ɩkɛma yɛkɔnwʋ sianti mɔɔ Gyehova iáhila ɔhʋanɩ kɛɛ yɛkɛyɛ yɛ dɩyɛ bela pɛpɛɛpɛ nɩ. Ɩávalɩ nwʋmɔ yɛ mɛlɛkɛyɛlɛ nɩ, Gyehova pɛ kɛɛ yɛkɔ zʋlɔ yɛfa nɔhʋanlɛlilɛ yɛsʋ̃mɩ yɩ.

3. Mɩnla ti mɔɔ ihyinyia kɛɛ yɛkɔ zʋlɔ yedi nɔhʋanlɛ a?

 ³ Mɩnla ti mɔɔ ihyinyia kɛɛ yɛkɔ zʋlɔ yedi nɔhʋanlɛ a? Ɩyɛ a bɛkã kɛɛ, Sɛ yɛta yɛyɛ debe a, yɛ yɛnwʋ ɩyɛlɛ bʋwɔ a. Kɛ ndianwʋ nɩ: Sɛ abiye pɛ kɛɛ isuma kezimɔ bɔbɔ ɔganɩ a, ikele alʋbɔ sʋ̃maa ansaana ɩanwʋ ɩwɔlɛ bʋwɔ. Na sɛ ɩba ɩnwʋ ɩwɔlɛ po a, ɩyɛ a sa ɩkʋla idi mfʋmɩ naasʋ̃ ɩáma yi padi kolɔ, ɩkɔ zʋlɔ la isuma. Ɔzɔ la yɛ amɩyɛ sʋ̃, mmɩlɩ mɔ yɛtɩ nɣanlɩ kɛɛ yeli yɛ mɛlɛkɛyɛlɛ be zʋ mɛda po nɩ, ebiye a ɩwɔ numɔ la a, sa yesia yedi mfʋmɩ yɩ nɩ dɔkʋ̃. Naasʋ̃ yɛkɔ zʋlɔ yɛbɔ mmɔdɩnɩ kɛɛ yekeli zʋlɔ. Ɩyɛ a, ye munwala yɛkã odwokɔ anzɛnyɩɩ yɛyɛ debe mɔɔ aɣinzi yi, nɩ yenlu yɛ nwʋ. Naasʋ̃ sɛ yɛáma ye padi kolɔ a, Gyehova kɔwʋwa yɛ ma yekodu mpʋnɩ. (1 Pit. 5:10) Bɛmá yehila kezimɔ Pita ɩáma yi padi kolɔ na ɩhɔlɩ zʋlɔ ilili nɔhʋanlɛ nɩ. Kunlumiyɩbalɛ mɔɔ Gyisɛsɩ lalɩ yɩ ali hileli Pita ɩávalɩ nwʋmɔ yɩ mɛlɛkɛyɛlɛ nɩ, ɩkɔhʋla ɩkɛhyɛ yɛ ɛzɩzɩbɛ ma yɛkɔhɔ zʋlɔ yɛkɔzʋ̃mɩ Gyehova.

4. Kɛmɔ Luuku 5:​5-10 kile nɩ, mɩnla yɛ Pita ɩhanlɩ ɩvalɩ yɩzayɩ yɩ nwʋ a, na kɛ Gyisɛsɩ hyɛlɩ yɩ ɛzɩzɩbɛ zeli a?

⁴ Bayɩbʋlʋ yɩ ɩáhã sianti mɔɔ Pita vʋlɔlɩ yɩ nwʋ kɛɛ ɩdɩ “tanɩvʋlɔ” anzɛnyɩɩ tanɩ kʋ̃ mɔɔ nɩ ɩwɔ yɩ adwɩnɩ nu nwʋ odwokɔ. (Kɩnga Luuku 5:​5-10.) Naasʋ̃ ebiye a ilili mfʋmɩ nɣezile be. Nɩ Gyisɛsɩ zi kɛɛ Pita yi kunlu idu, ebiye a iluwakɛɛ nɩ ibu yɩ nwʋ kɛɛ ɩávata nɩ ti a. Naasʋ̃ nɩ Gyisɛsɩ zi kɛɛ Pita kɔhʋla kɔhɔ zʋ keli nɔhʋanlɛ. Meti Gyisɛsɩ zʋ̃ kunlumiba nu hanlɩ hileli Pita kɛɛ, “áma eyi ɩyɛ wʋ asibɔnwʋ.” Anwʋlazʋ mɔɔ Gyisɛsɩ nyianlɩ wɔ Pita nu nɩ, ɩzɩnzanlɩ Pita yɩ ɛbɩlawɔlɛ. Pita nɩɩ yɩ anlima Andulusu yiakili be egyima yɩ na bɔhɔ bɛhɩnlanlɩ Gyisɛsɩ nwʋ ma bɛyɛlɩ dasɩlɛlilɛ egyima yɩ. Eyi manlɩ Gyehova yilalɩ bɛ sʋ̃maa.—Mk. 1:​16-18.

5. Mmɩlɩ mɔ Pita lili yɩ mɛlɛkɛyɛlɛ zʋ na ilili Gyisɛsɩ yɩ mɛda nɩ, mɩnla nyilalɛ yɛ inyianlɩ a?

⁵ Pita ɣa yɛlɩ Kɩlayɩsɩ yɩ tʋwavʋlɔ nɩ, inyianlɩ ozumanlɛnwʋnlɛ ngɩnlɩma sʋ̃maa. Mmɩlɩ mɔ nɩ Gyisɛsɩ ɩsaa mmenii adimakɛlɛ, ituu azunzuma evinli na itunwo awuvʋlɔ nɩ, Pita nwʋnlɩ yi munwala. b (Mt. 8:​14-17; Mk. 5:​37, 41, 42) Akʋ̃ sʋ̃, Pita nwʋnlɩ Gyisɛsɩ mɔɔ ɩwɔ yɩ animinyiamɩ nu wɔ Nyamɩnlɩ Bulombunlililɛ nu wɔ anyɩnlɩzʋdɩyɛnwʋnlɛ nu, na eyi hyɛlɩ Pita ɛzɩzɩbɛ baaba. (Mk. 9:​1-8; 2 Pit. 1:​16-18) Pita nwʋnlɩ nninyeni azʋlɔtʋ mɔɔ sɛ kɛ Gyisɛsɩ yɩ mɛda mɔɔ ilili a, ankɩ ɩlɔ́nwʋ yɩ kyɩ̃. Pɩlazunɛ bela íni nwʋmɔ kɛɛ, Pita anyɩ leli paa kɛɛ ɩhʋla ilili yɩ mɛlɛkɛyɛlɛ zʋ na inyianlɩ nyilalɛ eyimmɔ!

6. Asʋ̃ eɣile ɔkʋ̃ pɛ la yɛ Pita va lili yɩ mɛlɛkɛyɛlɛ zʋ a? Kilehile nu.

 ⁶ Ɩávalɩ nwʋmɔ mɔɔ Pita ɩnwʋnlɩ na ɩdɩlɩ nɩ, nɩ yɩ mɛlɛkɛyɛlɛ lanwʋ la idide yi. Kɛ ndianwʋ nɩ, mmɩlɩ mɔ Gyisɛsɩ hanlɩ kezimɔ ɩkɔnwʋ amanɩyɛ na iawu na ama Bayɩbʋlʋ nkɔmɩhyɛ ɩaɣa numɔ nɩ, Pita dɩndɛlɩ yɩ anyunu. (Mk. 8:​31-33) Akʋ̃ sʋ̃, nɩ Pita nɩɩ adʋwavʋlɔ nɣalɩyɛ yɩ, bɛta bosũ mɔɔ ɩdɩ kezi wɔ bo nu nɩ nwʋ pɩla. (Mk. 9:​33, 34) Nunuma mɔɔ ansaana Gyisɛsɩ ibawu nɩ, Pita ɩvalɩ ɛya idualɩ benyia be yɩ azʋ̃ wɔ zʋlɔ. (Dwɔ. 18:10) Ɔzɔ nunuma yɩ la, iluwa enii nwʋ bɔlɔ ti, Pita hanlɩ mbɔmɩ asã kɛɛ, ízi yɩ ɔhɔnwʋ Gyisɛsɩ. (Mk. 14:​66-72) Eyi manlɩ Pita zunli baaba.—Mt. 26:75.

7. Mmɩlɩ mɔ bodunwonli Gyisɛsɩ nɩ, mɩnla egyima yɛ ɩva iwulalɩ Pita yɩ sa a?

⁷ Gyisɛsɩ iáyiaki Pita mɔɔ nɩ yɩ padi golɔ nɩ. Mmɩlɩ mɔ bodunwonli Gyisɛsɩ nɩ, ɩvalɩ ɔnwʋmɔ ɔhʋanɩ ɩmanlɩ Pita kɛɛ, ihile kɛɛ ɩdɔ yɩ amba. Gyisɛsɩ hanlɩ hileli Pita kɛɛ ɩzʋ̃ kãnwʋazɩ nu ihila yɩ mmunwanɩ yɩ zʋ. (Dwɔ. 21:​15-17) Nɩ Pita ziyeziye yɩ nwʋ kɛɛ ɩkɛyɛ mɔɔ Gyisɛsɩ hanlɩ hileli yi nɩ. Wɔ Pɛntɩkɔsʋ eɣile mɔɔ bɛvalɩ sunzuma nwanzanwanza bɔvɔlɩ mmenii ngɔlɔ wɔ Gyelusalamɩ yɩ nɩ, nɩ Pita wɔ kɛ.

8. Mɩnla mfʋmɩ kezile yɛ Pita lili wɔ Antɩyɔkɩ a?

⁸ Mmɩlɩ mɔ bɔvɔlɩ Pita ngɔlɔ mɛda po nɩ, nɩ ɩsɛ kɛɛ ɩkɔ zʋlɔ ɩkʋ̃ itiyia yɩ mɛlɛkɛyɛlɛ. Mmɩlɩ mɔ bɔvɔlɩ Kɔnɛlɩyɔsɩ ngɔlɔ wɔ alʋbɔ 36 Y.M. nu nɩ, nɩ Pita wɔ kɛnɩ. Nɩ eyi dɩ dasɩlɛ mɔɔ ikile kɛɛ “Nyamɩnlɩ ɩába mmenii nu,” na bɛzabɛ mɔɔ bɛ́dɩ Dwuumaa sʋ̃ bɔkɔhʋla kɛɣa kɛhɩnla Kilisinyianɩ asafʋ yɩ wʋ. (Egy. 10:​34, 44, 45) Eyi mɛda nɩ, Pita wɔlɩ yɩ tʋ kɛɛ ɩ nɩɩ bɛzabɛ mɔɔ bɛ́dɩ Dwuumaa bɔbɔɔ numɔ bekeli alɩyɛ. Eyi dɩ dɩyɛ mɔɔ ankɩ Pita ɩlɛ́yɛ kyɩ̃ (Gal. 2:12) Naasʋ̃ nɩ Dwuumaa Kilisinyiamaa nɩ be tɩ nɣanlɩ kɛɛ, íni kɛɛ bɛ nɩɩ bɛzabɛ mɔɔ bɛ́dɩ Dwuumaa nɩ bo numɔ di alɩyɛ. Mmɩlɩ mɔ bɛzabɛ mɔɔ bɔwɔ ɔzɔ adwɩnɩ yi be ɣalɩ Antɩyɔkɩ nɩ, ebiye a bɔ nwʋ bɔlɔ ti, Pita yiakili kɛɛ ɩ nɩɩ mmeliyema mɔɔ bɛ́dɩ Dwuumaa nɩ bekeli alɩyɛ bɔkɔwɔ numɔ. Mmɩlɩ mɔ sʋ̃mavʋlɔ Pɔɔlʋ nwʋnlɩ Pita yɩ nyɛlɩyɛ eyi nɩ, ihwili yɩ anyunu wɔ mmeliyema yɩ bɛ anyunu. (Gal. 2:​13, 14) Ɩávalɩ nwʋmɔ mfʋmɩ mɔɔ Pita lili nɩ, ɩhɔlɩ zʋlɔ ɩzʋ̃mɩnlɩ Gyehova. Mɩnla yɛ ɩwʋwalɩ yɩ a?

9. Mɩnla ɔhʋanɩ zʋ yɛ Dwɔɔnʋ 6:​68, 69 ɩma yɛnwʋ kɛɛ nɩ Pita dɩ nɔhʋanlɛvʋlɔ a?

⁹ Nɩ Pita dɩ nɔhʋanlɛvʋlɔ na ɩáma dɩyɛ bela si yi ɔhʋanɩ kɛɛ ɩkɔhɔ zʋlɔ ikeli Gyisɛsɩ yɩ mɛda. Kɛ ndianwʋ nɩ, mmɩlɩ kʋ̃ be Gyisɛsɩ hanlɩ odwokɔ be mɔɔ yɩ adʋwavʋlɔ yɩ bɛátɩ yɩ tʋ, naasʋ̃ bɛádɩkɛ ma ikilehile numɔ ikile bɛ. Na eyi manlɩ bo nu sʋ̃maa yiakili yɩ mɛdalilɛ, naasʋ̃ Pita gyinanlɩ Gyisɛsɩ yɩ mɛda pindinyii. (Kɩnga Dwɔɔnʋ 6:​68, 69.) Nɩ Pita zi kɛɛ Gyisɛsɩ yɛ ɩlɛ “ndwokɔ mɔɔ ɩma nnwʋanlɩ mɔɔ íni awielɩyɛ nɩ a.”

10. Mɩnla ɔhʋanɩ zʋ yɛ Gyisɛsɩ hileli kɛɛ ɩlɛ Pita nu anwʋlazʋ a? (Kila mfonyini yi sʋ̃.)

¹⁰ Gyisɛsɩ ɩáma yi padi kolɔ wɔ Pita nwʋ. Nunuma mɔɔ itualɩ yɩ tʋ wɔ Gyisɛsɩ yɩ ɛbɩlawɔlɛ nu wɔ azɩlɛ yɩ zʋ nɩ, nɩ Gyisɛsɩ zi kɛɛ Pita nɩɩ adʋwavʋlɔ nɣalɩyɛ yɩ, bɔkɔbʋ yɩ. Naasʋ̃ Gyisɛsɩ hanlɩ hileli Pita kɛɛ ɩwɔ yɩ nu anwʋlazʋ na izi kɛɛ ɩkɔhʋla ɩkɔhɔ zʋlɔ ikeli nɔhʋanlɛ. (Lk. 22:​31, 32) Nɩ Gyisɛsɩ zi kɛɛ “sunzuma nɩ pɛ yɩ na nnwʋnlamɩ nɩ ɩyɛ mɛlɛkɛ.” (Mk. 14:38) Meti ɩávalɩ nwʋmɔ kɛɛ Pita bʋlɩ Gyisɛsɩ nɩ, Gyisɛsɩ ɩáma yɩ padi kolɔ wɔ yɩ nwʋ. Mmɩlɩ mɔ bodunwonli Gyisɛsɩ nɩ, ɩyɩlɩ yɩ nwʋ ihileli Pita mmɩlɩ mɔ nɩ ɩha yɩzayɩ nkʋ̃ nɩ. (Mk. 16:7; Lk. 24:34; 1 Kɔl. 15:5) Kila kezimɔ eyi manlɩ Pita mɔɔ nɩ yi padi golɔ nɩ, yɩ ahʋnlɩnɩ dɔlɩ yi kunlu!

11. Mɩnla ɔhʋanɩ zʋ yɛ Gyisɛsɩ manlɩ Pita nwʋnlɩ kɛɛ Gyehova kɔwʋwa yɩ a?

 ¹¹ Gyisɛsɩ manlɩ Pita nwʋnlɩ kɛɛ Gyehova kɔwʋwa yɩ. Gyisɛsɩ dunwonli nɩ, iluwalɩ nnwʋánlɩ ɔhʋanɩ zʋ ɩmanlɩ Pita nɩɩ adʋwavʋlɔ yɩ hyɩlɩ egyeni sʋ̃maa. (Dwɔ. 21:​4-6) Eyi manlɩ Pita nyianlɩ anwʋlazʋ kɛɛ Gyehova kɛva mɔɔ ihyinyia wɔ nnwʋnlamɩ ɔfʋã nu nɩ ɩkɛma yɩ. Ebiye a eyi manlɩ Pita hakɛlɩ Gyisɛsɩ yi odwokɔ mɔɔ ɩhanlɩ nɩ kɛɛ, Gyehova kehila bɛzabɛ mɔɔ ‘bedi bɔmʋnlɩ bɛpɩbɛ sʋlɔ Bulombunlililɛ nɩ.’ (Mt. 6:33) Eyi wʋwalɩ Pita ma ɩvalɩ dasɩlɛlilɛ egyima yɩ ilili bɔmʋnlɩ wɔ yɩ ɛbɩlawɔlɛ nu, na kɛ egyenihyɩlɛ egyima yɩ be a. Wɔ Pɛntɩkɔsʋ 33 Y.M. nu nɩ, Pita zʋ akɛnɣazɩzɩbɛ nu ilili dasɩlɛ na eyi manlɩ mmenii abʋmɩ abʋmɩ sʋ̃maa ɣa yɛlɩ dedimaa. (Egy. 2:​14, 37-41) Eyi mɛda nɩ, ɩwʋwalɩ Samaliyiamaa yɩ nɩɩ bɛzabɛ mɔɔ bɛ́dɩ Dwuumaa nɩ ma bɛɣa belili Kɩlayɩsɩ mɛda. (Egy. 8:​14-17; 10:​44-48) Gyehova valɩ Pita lili egyima wɔ ɔhʋanɩ sʋnʋnkʋ̃ zʋ ɩva ɩhwɩnlɩ mmenii sʋ̃maa ɩɣalɩ asafʋ yɩ nu.

12. Sɛ yɛkʋ̃ʋ̃ yekeli yɛ mɛlɛkɛyɛlɛ be zʋ a, mɩnla ɔhʋanɩ zʋ yɛ Pita yɩ ndianwʋ yɩ kɔhʋla kɔwʋwa yɛ a?

¹² Gyehova kɔhʋla kɔwʋwa yɛ ma yɛkɔhɔ zʋlɔ yɛkɔzʋ̃mɩ yɩ. Naasʋ̃ kɛ mmɩlɩ munwala yɛ ɩkɛyɛ mɛlɛkɛ a, titili mmɩlɩ mɔ yɛkʋ̃ʋ̃ yekeli yɛ mɛlɛkɛyɛlɛ be zʋ nɩ. Ɩyɛ a, yɛ mɛlɛkɛyɛlɛ be wɔ kɛnɩ mɔɔ ɩyɛ sɩ ɩtɛla mɔɔ Pita yiyialɩ nɩ, naasʋ̃ Gyehova kɔhʋla kɛma anwʋzɩzɩbɛ yɛ na yɛahɔ zʋ yɛazʋ̃mɩ yɩ. (Ndw. 94:​17-19) Kɛ ndianwʋ nɩ, eliyema benyia be ɩ nɩɩ yɩ ɔhɔnwʋmmɔ mmenyia lalɩ alʋbɔ sʋ̃maa ansaana ibazuma nɔhʋanlɛ yɩ. Yɩzayɩ izili pɔkɔ iyiakili ɛbɩlawɔlɛ ngyɛpɛlɛ eyi. Naasʋ̃ itwu mmɩlɩ be a, nɩ akɔnɔ tanɩ eyi ɩɣa yi nu dɔkʋ̃. Mɩnla yɛ ɩwʋwalɩ yɩ ma ɩhɔlɩ zʋlɔ ilili nɔhʋanlɛ a? Ɩhanlɩ kɛɛ: “Gyehova kɔ zʋlɔ hyɛ yɛ ɛzɩzɩbɛ. Wɔ Gyehova yi sunzuma yɩ mmʋwalɩyɛ zʋ nɩ, muzuma kezimɔ mʋkɔhɔ zʋlɔ mɩkɛva yɩ mmɛla mʋkɔwɔ ɛbɩla. Ɩávalɩ nwʋmɔ mɩ mɛlɛkɛyɛlɛ munwala nɩ, Gyehova ɩlɛ mɩ idii egyima na ɩkɔ zʋlɔ ɩhyɛ mɩ ɛzɩzɩbɛ.”

13. Kɛmɔ Egyima 4:​13, 29, 31 kile nɩ, kɛ yɛkɛyɛ na yɛazumazuma Pita yɩ ndianwʋ yɩ a? (Kila mfonyini yi sʋ̃.)

¹³ Kɛmɔ yɛɣa yɛnwʋ yɩ nɩ, iluwa enii nwʋ bɔlɔ ti, Pita lili mfʋmɩ nɣezile sʋ̃maa. Naasʋ̃ iluwakɛɛ ɩwɔlɩ mpayɩ izianlɩ akɛnɣazɩzɩbɛ ti, ɩhʋla ɩyɛlɩ yɩ dɩyɛ wɔ akɛnɣazɩzɩbɛ zʋ. (Kɩnga Egyima 4:​13, 29, 31.) Amɩyɛ sʋ̃, sa yɛkʋla yedi bɔlɔ zʋ. Bɛmá yehila mɔɔ ɩdʋlɩ eliyema abɩlantɩyɛ be mɔɔ bɔfʋlɔ yɩ Horst mɔɔ nɩ  ɩda Nazi Germany nɩ. Ɔzɔ mmɩlɩ yɩ, nɩ bɔwɔ ezemanlɛ be mɔɔ ikile kɛɛ “Hitler kele yɛ!” Na nɩ bekila ɔhʋanɩ kɛɛ abiyela kɛhã ebiye. Ɩwɔ numɔ kɛɛ nɩ Horst zi kɛɛ íni kɛɛ ɩkã ebiye, naasʋ̃ iluwa enii nwʋ bɔlɔ ti, itwu mmɩlɩ be a nɩ ɩkã ebiye. Horst yɩ awʋvʋlɔ bɛátwi yɩ anyunu, mfomi bɛ nɩɩ yɩ wɔlɩ mpayɩ bezianlɩ akɛnɣazɩzɩbɛ bɛmanlɩ yɩ. Iluwakɛɛ yɩ awʋvʋlɔ wʋwalɩ yɩ na ɩvalɩ yɩ nwʋ idianlɩ Gyehova zʋ ti, awielɩyɛ kʋlaa nɩ, Horst ɩhʋlalɩ igyinanlɩ pindinyii. Aɣinzi yi, ɩhanlɩ kɛɛ: “Gyehova iáyiaki mɩ kyɩ̃.” c

14. Kɛ ɩkɛyɛ na asafʋ nu mbanimbani mɔɔ bɔwɔ ɔlɔlɛ nɩ, bɛahyɛ bɛzabɛ mɔɔ be padi golɔ nɩ ɛzɩzɩbɛ a?

¹⁴ Gyehova nɩɩ Gyisɛsɩ beléyiaki yɛ. Pita bʋlɩ Gyisɛsɩ mɛda nɩ, nɩ ɩsɛ kɛɛ isi pɔkɔ be mɔɔ nwʋmɔ hyinyia. Mɛyɩ yɛ lɛ kɛɛ, ikeyiaki Gyisɛsɩ yɩ mɛdalilɛ anzɛnyɩɩ kɛɛ ɩkɔhɔ zʋlɔ ɩkɔdʋwa yɩ. Nɩ Gyisɛsɩ iziã Gyehova kɛɛ, ɩmá Pita yi dedi ɩyɛ kezi. Gyisɛsɩ hanlɩ mpayɩ yɩ nwʋ odwokɔ hileli Pita na ɩmanlɩ inyianlɩ anwʋlazʋ kɛɛ, aɣinzi yi, mɛyɩ Pita kɛhyɛ yɩ mmeliyema nɩ ɛzɩzɩbɛ. (Lk. 22:​31, 32) Ebiye a mmɩlɩ mɔ Pita hakɛlɩ odwokɔ eyi nɩ, ɩhyɛlɩ yɩ ɛzɩzɩbɛ paa! Amɩyɛ sʋ̃, sɛ ɩba yɩ kɛɛ ɩsɛ kɛɛ yesi pɔkɔ be mɔɔ nwʋmɔ hyinyia a, Gyehova kɔhʋla koluwa asafʋ nu mbanimbani mɔɔ bɔwɔ ɔlɔlɛ yɩ zʋ bɛkɛhyɛ yɛ ɛzɩzɩbɛ na ama yɛahɔ zʋ yɛali nɔhʋanlɛ. (Ɛfɩ. 4:​8, 11) Ɔzɔ la yɛ eliyema be mɔɔ bɔfʋlɔ yɩ Paul mɔɔ ɩzʋ̃mɩ kɛɛ asafʋ nu ebani ɩhyɛ nɩ ɩbɔ mmɔdɩnɩ kɛɛ ɩkɛyɛ a. Ɩkã ikile bɛzabɛ mɔɔ be padi golɔ nɩ kɛɛ, bɔdwɩnɩ́ kezimɔ Gyehova ilili bɔmʋnlɩ ɩhwɩnlɩ bɛ ɩɣalɩ nɔhʋanlɛ yɩ nu nɩ nwʋ. Akʋ̃ ɩma bɔnwʋ kɛɛ iluwa ɔlɔlɛ kanyɩɩ mɔɔ Gyehova ɩwɔ ɩma bɛ nɩ ti, iléyiaki bɛ kyɩ̃. Iwieli yi odwokɔ yɩ kɛɛ, “Mʋnwʋ mmeliyema sʋ̃maa mɔɔ be padi  golɔ, naasʋ̃ iluwa Gyehova yɩ mmʋwalɩyɛ zʋ nɩ, bɛlanwʋmɔ la bɔsʋ̃mɩɩ yɩ.”

15. Mɩnla ɔhʋanɩ zʋ yɛ Pita nɩɩ Horst be ndianwʋ yɩ ɩma yɛnwʋ kɛɛ odwokɔ mɔɔ ɩwɔ Matiyu 6:33 nɩ, ɩdɩ nɔhʋanlɛ a?

¹⁵ Sɛ yɛfa dasɩlɛlilɛ egyima yɩ yedi bɔmʋnlɩ wɔ yɛ ɛbɩlawɔlɛ nu a, Gyehova kɛva yɛ nnwʋnlamɩ ɔfʋã nu ahyinyiadɩ ɩkɛma yɛ kɛmɔ ɩyɛlɩ ɩmanlɩ Pita nɩɩ adʋwavʋlɔ nɣalɩyɛ yɩ. (Mt. 6:33) Wɔ Oyuwadɩ Kʋnɛ II yɩ mɛda nɩ, nɩ Horst mɔɔ yeli bɔmʋnlɩ yɛhã yɩ odwokɔ yɩ pɛ kɛɛ ɩyɛ ɔhʋanɩbukolɛvʋlɔ. Nɩ ɩdɩ ehyinyianii meti nɩ iále idi kɛɛ ikenyia ozukua mɔɔ ɩkɔwʋwa yɩ ma ɩkɔhɔ zʋ ɩkɛyɛ mmɩlɩ munwala ɔzʋ̃mɩnlɛ egyima yɩ. Meti nɩ mɩnla yɛ ɩkɛyɛ a? Ɩyɛlɩ yɩ adwɩnɩ kɛɛ, ikilaa kɛɛ Gyehova kehila yɩ amba a. Meti dapɛnɩ mɔɔ bɛ mansini zʋ ehilalɛvʋlɔ ɣa gyelalɩ bɛ nɩ, ɩhɔlɩ dasɩlɛlilɛ dapɛnɩ yɩ munwala. Dapɛnɩ yɩ ɣalɩ awielɩyɛ nɩ, mansini zʋ ehilalɛvʋlɔ yɩ valɩ envelope be mɔɔ nɩ ozukua wɔ numɔ manlɩ yɩ. Naasʋ̃ ɩákã dɩka mɔɔ nɩ ozukua yɩ zʋ̃. Ozukua mɔɔ nɩ ɩwɔ numɔ nɩ, nɩ sa ɩkʋla ɩfa ɩyɛ ɔhʋanɩbukolɛ egyima yɩ aziyianɩ sʋ̃maa. Ɔzɔ akyɛdɩ eyi manlɩ Horst nyianlɩ anwʋlazʋ kɛɛ Gyehova kehila yɩ. Ɔzʋ̃mɩ ɔzɔ mmɩlɩ yɩ, ɩvalɩ yɩ nnwʋanlɩ eɣile munwala ɩyɛlɩ Bulombunlililɛ egyima yɩ.—Mal. 3:10.

16. Mɩnla ti mɔɔ ɩsɛ kɛɛ yesuma Pita yɩ ndianwʋ nɩɩ ndwokɔ mɔɔ ɩhɛlɛlɩ wɔ yɩ ahɛlɛta yɩ nu nɩ a?

¹⁶ Mmɩlɩ mɔ Pita ɩnwʋnlɩ kɛɛ Gyisɛsɩ iáyiaki yi kɛmɔ yɩzayɩ Pita izianlɩ wɔ mmɩlɩ be nu kɛɛ Gyisɛsɩ ɩzʋ̃ yɩ pɛ ɩyɩ nɩ, ɩkɛyɛ kɛɛ Pita anyɩ leli baaba! Kɩlayɩsɩ hɔlɩ zʋlɔ dɩdɩlɩ Pita ma ɩyɛlɩ nɔhʋanlɛvʋlɔ na ɩyɛlɩ ndianwʋba ɩmanlɩ Kilisinyiamaa. Na sa yɛkʋla yesuma nninyeni sʋ̃maa zɛ wɔ numɔ. Yɛnwʋ ozumalɛdɩyɛ azʋlɔtʋ eyi be wɔ yɩ ahɛlɛta anwɩ̃ mɔɔ ɩhɛlɛlɩ ɩhɔ ɩmanlɩ ɔwɔkɩ Kilisinyiamaa asafʋ yɩ nu. Wɔ dɩyɛzumanlɛ mɔɔ ili kɛnɩ yɩ nu nɩ, yekozunzu yɩ ahɛlɛta yɩ nu ndwokɔ be nwʋ na yɛanwʋ kezimɔ yɛkɛva yɛkɛyɛ egyima nnɛ.