1. Ɩka ɛgyɩkɩ̃ɩ̃ ma sʋ̃mavʋlɔ Pita wu nɩ, mɩnla yɛ sunzuma yɩ hanlɩ yɩ ma ɩyɛlɩ a?

 SƲ̃MAVƲLƆ Pita ɩvalɩ nɔhʋanlɛlilɛ ɩzʋ̃mɩnlɩ Gyehova alʋbɔ sʋ̃maa, ɩhɩnlanlɩ Gyisɛsɩ nwʋ wɔ yi odwokɔbahanlɛ egyima yi nu, na ɩwɔlɩ yɩ tʋ ɩhanlɩ odwokɔba yɩ be ihileli bɛzabɛ mɔɔ bɛ́dɩ Dwuumaa, na aɣinzi yi ɩɣa ɩyɛlɩ ɔhʋanɩhilelɛ okuwu yi nu enii. Ɩka ɛgyɩkɩ̃ɩ̃ ma Pita iwu nɩ, Gyehova valɩ egyima sʋ̃maa wulalɩ yɩ sa. Wɔ ɔlʋbɔ 62-64 Y.M. nu kɛnɩ nɩ, Gyehova valɩ yi sunzuma nwanzanwanza ɩhanlɩ Pita ma ɩhɛlɛlɩ ahɛlɛta anwɩ̃ be. Mɛyɩ yɛ lɛ 1 Pita nɩɩ 2 Pita yɩ. Nɩ Pita wɔ anwʋlazʋ kɛɛ wɔ yi owulo mɛda nɩ, ahɛlɛta anwɩ̃ eyimmɔ kɔwʋwa Kilisinyiamaa.—2 Pit. 1:​12-15.

2. Mɩnla ti mɔɔ ahɛlɛta mɔɔ Pita hɛlɛlɩ nɩ, nɩ ɩdɩ yɩ mmɩlɩ nu dɩyɛ a?

² Mmɩlɩ mɔ Pita hɛlɛlɩ yɩ ahɛlɛta yɩ, nɩ yi mmeliyema dedimaa yɩ beyiyiaa “odwohilalɛ nɩɩ amanɩyɛnwʋnlɛ azʋlɔtʋ.” (1 Pit. 1:6) Nɩ mmenii tanɩ bɔbɔɔ mmɔdɩnɩ kɛɛ bɛkɛva awohwi ehilehilelɛ nɩɩ ɛbɩla tanɩ bɔkɔwɔlɔ asafʋ yɩ nu. (2 Pit. 2:​1, 2, 14) Nɩ ɩlɛ́kyɛ na Kilisinyiamaa mɔɔ bɔwɔ Gyelusalamɩ nɩ bɛanwʋ kɛɛ Wulomi azogyiamaa yɩ bɛsɩkɛɛ Gyelusalamɩ twonwa yɩ nɩɩ asɔlɩ aliyia yɩ. (1 Pit. 4:7) Pɩlazunɛ bela íni nwʋmɔ kɛɛ Pita yɩ ahɛlɛta yɩ wʋwalɩ bɛ ma bɔnwʋnlɩ kezimɔ bekeziyeziye bɔ nwʋ na bɛahʋla bɛagyina odwohilalɛ mɔɔ beyiyiaa nɩɩ mɔɔ bekeyiyia yɩ eɣile be nɩ yi munwa. b

3. Mɩnla ti mɔɔ ɩsɛ kɛɛ yesunzu Pita yɩ ahɛlɛta yɩ nwʋ a?

³ Ɩwɔ numɔ kɛɛ Pita ɩhɛlɛlɩ yɩ ahɛlɛta yɩ ɩhɔ ɩmanlɩ ɔwɔkɩ Kilisinyiamaa nɩ dɩyɛ, naasʋ̃ Gyehova ɩmanlɩ bɛva bɛhɩnlanlɩ  yi odwokɔ Bayɩbʋlʋ yɩ nwʋ. Meti nnɛ, ɩma amɩyɛ sʋ̃ yɛkʋla yenyia ahɛlɛta eyimmɔ zʋ mfasʋ. (Wul. 15:4) Dɩkɛɛ ɔwɔkɩ Kilisinyiamaa nɩ, yɛda oyuwadɩ be mɔɔ nyɛlɩyɛ tanɩ iwulu zʋlɔ wɔ numɔ nɩ nu, meti ɩkɔhʋla ɩkɛma ɩkɛyɛ sɩ kɛɛ yɛkɔzʋ̃mɩ Gyehova. Akʋ̃ sʋ̃, ɩlɛ́kyɛ na yɛayiyia anwʋhyɩlɩyɛ kezile be mɔɔ ɩtɛla mɔɔ ɩvalɩ Gyelusalamɩ yɩ ɛzɩkɛlɛ ɩɣalɩ nɩ. Ndwokɔ be mɔɔ nwʋmɔ hyinyia paa wɔ Pita yɩ ahɛlɛta anwɩ̃ yi nu. Ɔzɔ ndwokɔ yɩ kɔwʋwa yɛ ma Gyehova yɩ eɣile yi kɔwʋwa yɛ adwɩnɩ nu, yɛali enii nwʋ bɔlɔ zʋ, na yeanyia ɔlɔlɛ kezile yɛama yɛ nwʋ yɛ nwʋ. Akʋ̃ sʋ̃, ɩkɔwʋwa asafʋ nu mbanimbani ma bɔkɔnwʋ kezimɔ bɔkɔwʋwa bɛ asafʋ yɩ nu maa ma bekegyina pindinyii.

4. Kɛmɔ 2 Pita 3:​3, 4 kile nɩ, mɩnla yɛ ɩkɔhʋla ɩkɛma ye dedi kehimahima a?

⁴ Mmenii sʋ̃maa bodua yɛ nwʋ beyiyia mɔɔ bɛále mɔɔ Bayɩbʋlʋ ɩkã ɩfalɩ eɣile be nwʋ nɩ bedi. Iluwakɛɛ yɛwɔlɩ yɩ tʋ kɛɛ yɛkãã kɛɛ ɩlɛ́kyɛ na awielɩyɛ nɩ ɩaɣa nɩ, ɩhyɛ nɩ ti, ɩyɛ a bɛzabɛ mɔɔ botwodwu betiyia yɛ nɩ bedi yɛ nwʋ nwɔwɩ. Abiyemmɔ po kã kɛɛ awielɩyɛ nɩ ɩlɛ́ba kyɩ̃. (Kɩnga 2 Pita 3:​3, 4.) Sɛ bɛzabɛ mɔɔ yeyiyia bɛ wɔ dasɩlɛlilɛ nu, yɛ ɔhɔnwʋ egyimayɛlɛnii, anzɛnyɩɩ ye busunwanii be kã odwokɔ mɔɔ ɩdɩ zɔ kile yɛ a, ɩkɔhʋla ɩkɛma ye dedi kehimahima. Pita hileli mɔɔ ɩkɔhʋla ɩkɔwʋwa yɛ.

5. Mɩnla yɛ ɩkɔhʋla kɔwʋwa yɛ ma yekenyia abʋtalɩ na yɛalɩkɛ oyuwadɩ eyi yɩ awielɩyɛ a? (2 Pita 3:​8, 9)

⁵ Wɔ abiyemmɔ bɛ anyɩ zʋ nɩ, ɩdɩ kɛɛ mɔɔ Gyehova ɩkyɛɛ kɛɛ ɩkɛva oyuwadɩ eyi ɩkɛɣa awielɩyɛ. Pita yɩ ndwokɔ yɩ kɔhʋla kɔwʋwa yɛ ma yekenyia abʋtalɩ, na ɩama yɛanwʋ kɛɛ, kezimɔ Gyehova itinyia aɣile nɩ, ɩdɩ sʋnʋnkʋ̃ wɔ enii yɩ dɩyɛ nwʋ. (Kɩnga 2 Pita 3:​8, 9.) Wɔ Gyehova anyɩ zʋ nɩ, alʋbɔ abʋmɩ dɩ kɛɛ eɣile ɔkʋ̃. Gyehova izi abʋtalɩ iluwakɛɛ ɩábɛ kɛɛ ɩsɩkɛ abiyela. Naasʋ̃ sɛ yɩ mmɩlɩ twu a, ɩkɛzɩkɛ oyuwadɩ eyi. Ɩdɩ ɔnwʋmɔ ɔhʋanɩ kezile kɛɛ yɛkɛva mmɩlɩ ɛgyɩkɩ̃ɩ̃ mɔɔ ɩha nɩ yekeli mmenii mɔɔ bɔwɔ oyuwadɩ munwala dasɩlɛ.

6. Kɛ ɩkɛyɛ na yɛama “yɛ anyɩ ɩala” kɛɛ Gyehova yɩ eɣile yi kɛɣa ndɛndɛ a? (2 Pita 3:​11, 12)

⁶ Pita hyɛ yɛ ɛzɩzɩbɛ kɛɛ “yɛmá yɛ anyɩ ɩla” kɛɛ Gyehova yɩ eɣile yi kɛɣa ndɛndɛ. (Kɩnga 2 Pita 3:​11, 12.) Kɛ yɛkɛyɛ yɩ yekeze a? Eɣile bela, ɩsɛ kɛɛ yɛbɔ mmɔdɩnɩ yɛdwɩnɩndwɩnɩ nyilalɛ mɔɔ yekenyia wɔ oyuwadɩ fʋlɔ yɩ nu nɩ nwʋ. Tua nwʋmɔ mfomi kɛɛ ɔwɔ oyuwadɩ fʋlɔ yɩ nu na anwʋma baaba be ɩfalɩɩ wʋ nwʋ, edii alɩyɛ baaba, ɛmaa wʋ alɔvʋlɔ mɔɔ bodunwo bɛ nɩ akwaaba, na ekilehile mmenii mɔɔ bɔwʋwalɩ azɩ wɔ ɔwɔkɩ mmɩlɩ nu kezimɔ Bayɩbʋlʋ nkɔmɩhyɛ ɣalɩ nu. Sɛ ɔdwɩnɩndwɩnɩ eyimmɔ nwʋ a, ɩkɔwʋwa wʋ ma ekehila oyuwadɩ fʋlɔ yɩ ɔhʋanɩ. Akʋ̃ sʋ̃, ɩkɛma ɔkɔnwʋ kɛɛ ɩlɛ́kyɛ na awielɩyɛ nɩ ɩaɣa. Iluwakɛɛ mɔɔ ikezi wɔ eɣile be nɩ, ‘yezi yi dadampɔ nɩ ti,’ ɩkɔwʋwa yɛ na bɛávalɩ bɛ awohwi ehilehilelɛ nɩ ‘bɛáhwɩnlɩ yɛ.’—2 Pit. 3:17.

7. Mɩnla yɛ enii nwʋ bɔlɔ ɩkɔhʋla ɩkɛma yɛkɛyɛ a?

⁷ Iluwakɛɛ yezi kɛɛ ɩlɛ́kyɛ na Gyehova yɩ eɣile yi ɩaɣa nɩ ti, ɩsɛ kɛɛ yɛyɛ mɔɔ yɛkɔhʋla bela yɛkã odwokɔba yɩ be yekile abiyela. Naasʋ̃, sɛ yeyiyia bʋwabɩlɛ be a, ɩyɛ a bɔlɔ ti yɛáhʋla yɛtɩndɛ. Mɩnla ti a? Iluwakɛɛ ɩyɛ a ye kunlu tuli mɔɔ mmenii kɛhã anzɛnyɩɩ bɛkɛyɛ bekediyia yɛ nɩ nwʋ. Eyi be dʋlɩ Pita. Nunuma mɔɔ bɛbali Gyisɛsɩ yɩ odwokɔ nɩ, Pita ɩákʋla ɩkã kɛɛ ɩdɩ Gyisɛsɩ yɩ tʋwavʋlɔ iluwakɛɛ nɩ yi kunlu tu. Ɩbʋlɩ yɩ mbɔmɩ sʋ̃maa na ɩhanlɩ kɛɛ ízi yi po. (Mt. 26:​69-75) Naasʋ̃ aɣinzi yi, Pita lili bɔlɔ eyi zʋ na ɩvalɩ anwʋlazʋ ɩhanlɩ kɛɛ: “Máma mʋnlʋmmɔ bɛyɛ́ abiyela yɛɛ mʋnlʋmmɔ máma bo kunlu tu.” (1 Pit. 3:14) Pita yɩ odwokɔ yɩ hyɛ yɛ ɛzɩzɩbɛ kɛɛ sa yɛkʋla yedi enii nwʋ bɔlɔ zʋ.

8. Mɩnla yɛ ɩkɔhʋla ɩkɔwʋwa yɛ ma yekeli enii nwʋ bɔlɔ zʋ a? (1 Pita 3:15)

 ⁸ Mɩnla yɛ ɩkɔhʋla ɩkɔwʋwa yɛ ma yekeli enii nwʋ bɔlɔ zʋ a? Pita kã kile yɛ kɛɛ: “Bɛva annidi mɔɔ ɩfata nɩ bɔzʋ̃ mʋnlʋmmɔ bɛ ahʋnlɩnɩ nu bɛma Kɩlayɩsɩ mɔɔ ɩdɩ Niibenyia nɩ.” (Kɩnga 1 Pita 3:15.) Ɔhʋanɩ ɔkʋ̃ mɔɔ yekoluwa zʋlɔ yɛkɛyɛ zɔ yɛ lɛ kɛɛ yɛkɛhakɛ yɛ nwʋ kɛɛ Gyisɛsɩ Kɩlayɩsɩ yɛ ɩdɩ ye Bulombunli a, na ɩwɔ tumi kezile sʋ̃. Sɛ ɔnwʋmɔ ɔhʋanɩ buko kɛɛ ekeli abiye dasɩlɛ na bɔlɔ kã wʋ a, kakɛ ye Bulombunli yi. Tua nwʋmɔ mfonyini kɛɛ idii bulombunli wɔ sʋlɔ na awɔvʋlɔ abʋmɩ abʋmɩ sʋ̃maa bodua yɩ nwʋ beyiyia. Kakɛ kɛɛ ‘bɛva sʋlɔ nɩɩ azɩlɛ yɩ zʋ tumi munwatĩĩ bowula yɩ sa’ na ‘ɩ nɩɩ wʋ wɔ kɛnɩ eɣile bela kɔbʋmɩ oyuwadɩ awielɩyɛ.’ (Mt. 28:​18-20) Pita hyɛlɩ yɛ ɛzɩzɩbɛ kɛɛ ‘yeziyeziye yɛ nwʋ eɣile bela’ kɛɛ yɛkɛhã ye dedi nwʋ odwokɔ. Asʋ̃ ɛkɛbɛ yɩ kɛɛ ekeli dasɩlɛ wɔ egyima nu, sukuulu nu, anzɛnyɩɩ dɩka fʋlɔ be a? Di bɔmʋnlɩ dwɩnɩ mmɩlɩ mɔ ebiye a ɔkɔhʋla ɛkɛyɛ zɔ nwʋ, na siyeziye mɔɔ ɛkɛhã nɩ. Bɔ mpayɩ siã akɛnɣazɩzɩbɛ na nyia anwʋlazʋ kɛɛ Gyehova kɔwʋwa wʋ ma ekeli enii nwʋ bɔlɔ zʋ.—Egy. 4:29.

9. Mɩnla yɛ mmɩlɩ be Pita yɛlɩ mɔɔ nɩ iáhile ɔlɔlɛ a? (Kila mfonyini yi sʋ̃.)

⁹ Pita zumanlɩ kezimɔ ɩkɔhɔ zʋlɔ ɩkɛla ɔlɔlɛ ali. Mmɩlɩ mɔ Gyisɛsɩ hanlɩ kɛɛ: “Eyi ti mɩma  mmɛla fʋlɔ mʋnlʋmmɔ, bɔlʋlɔ́ bɔ nwʋ nkʋ̃kʋ̃. Kɛmɔ mizi mʋlɔ mʋnlʋmmɔ nɩ, ɔzɔ sʋ̃ la yɛ mʋnlʋmmɔ bɔlʋlɔ́ bɔ nwʋ nkʋ̃kʋ̃ a” nɩ, nɩ Pita wɔ ɛkɛnɩ be. (Dwɔ. 13:34) Naasʋ̃ eyi munwala mɛda nɩ, aɣinzi yi, nɩ ɩábɛ kɛɛ ɩ nɩɩ mmeliyema mɔɔ bɛ́dɩ Dwuumaa nɩ bo numɔ di alɩyɛ, iluwakɛɛ nɩ yi kunlu tuli Dwuumaa mɔɔ bɛdɩ Kilisinyiamaa nɩ nwʋ. Sʋ̃mavʋlɔ Pɔɔlʋ hanlɩ kɛɛ mɔɔ Pita yɛlɩ nɩ ɩdɩ “nnahɩlɩbɛ.” (Gal. 2:​11-14) Pita leli ɛdɩnyɩanlɛ mɔɔ Pɔɔlʋ ɩva ɩmanlɩ yɩ nɩ idianlɩ nu na izumanlɩ debe wɔ numɔ. Wɔ yɩ ahɛlɛta anwɩ̃ yɩ munwala nu nɩ, izili ɔzʋlɔ wudo kɛɛ ɩsɛ kɛɛ yenyia ɔlɔlɛ yɛma ye mmeliyema na akʋ̃ sʋ̃ yɛda ɔzɔ ɔlɔlɛ nɩ ali.

10. Mɩnla yɛ ɩbʋwa yɛ ma yɛda “nɔhʋanlɛ ɔlɔlɛ” ali a? Kilehile nu. (1 Pita 1:22)

¹⁰ Pita hanlɩ kɛɛ ɩsɛ kɛɛ yenyia “nɔhʋanlɛ ɔlɔlɛ” yɛma ye mmeliyema. (Kɩnga 1 Pita 1:22.) Sɛ yɛfa mɔɔ yesuma wɔ nɔhʋanlɛ yɩ nu yɛyɛ egyima a, ɩkɛma yɛkɛla ɔzɔ ɔlɔlɛ yɩ nɩ ali. Nɔhʋanlɛ yɩ be yɛ lɛ kɛɛ “Nyamɩnlɩ ɩába mmenii nu.” (Egy. 10:​34, 35) Sɛ yɛda ɔlɔlɛ ali yekile mmenii ɛgyɩkɩ̃ɩ̃ be wɔ asafʋ yɩ nu a, nɩ yɛlɛ́fa Gyisɛsɩ yɩ ahyɛdɩ mɔɔ ɩfalɩ ɔlɔlɛ nwʋ nɩ yɛkɛyɛ egyima. Ɩwɔ numɔ, dɩkɛɛ Gyisɛsɩ nɩ sa yebike abiyemmɔ yɛtɛla mvʋlɔ. (Dwɔ. 13:23; 20:2) Naasʋ̃ Pita kakɛ yɛ kɛɛ, ɩsɛ kɛɛ yɛbɔ mmɔdɩnɩ yenyia ɔlɔlɛ yɛma yɛ nwʋ yɛ nwʋ, iluwakɛɛ ye munwatĩĩ yɛdɩ abusunwa ɔkʋ̃.—1 Pit. 2:17.

11. Sɛ bɛkã kɛɛ ‘yɛlʋlɔ́ yɛ nwʋ wɔ yɛ ahʋnlɩnɩ nu baaba’ a, ikile mɩnla?

¹¹ Pita hyɛlɩ yɛ ɛzɩzɩbɛ kɛɛ “yɛlʋlɔ́ yɛ nwʋ wɔ yɛ ahʋnlɩnɩ nu baaba.” Wɔ ɛkɩ nɩ, “wɔ yɛ ahʋnlɩnɩ nu baaba” nɩ kile kɛɛ yɛkɛla ɔlɔlɛ ali yekehile mmenii wɔ mmɩlɩ po mɔ ɩyɛ sɩ kɛɛ yɛkɛyɛ zɔ nɩ. Kɛ ndianwʋ nɩ, sɛ eliyema be fʋmɩ yɛ a, mɩnla yɛ yɛkɛyɛ a? Ebiye a ahyɛasɩ yɩ kɛ ankɩ yɛkɛla ɔlɔlɛ ali yekehile yi nɩ, yɛkɛbɛ yɩ kɛɛ yɛkɛyɛ ebiye yekoduwa kakɛ yɩ mfomi. Pita zumanlɩ wɔ Gyisɛsɩ kɛnɩ kɛɛ, ɔzɔ subanɩ yɩ Nyamɩnlɩ yɩ anyɩ iáleli nwʋmɔ. (Dwɔ. 18:​10, 11) Pita hɛlɛlɩ kɛɛ: “Máma bɛfa tanɩ botuwa tanɩ kakɛ anzɛnyɩɩ bɛfa amʋnlɩgulɩyɛ beyiyia amʋnlɩgulɩyɛ. Na mfomi mʋnlʋmmɔ beziã Nyamɩnlɩ ma iyila mmenii mɔɔ bɛyɛ tanɩ bɛ nɩ.” (1 Pit. 3:9) Sɛ ɔwɔ ɔlɔlɛ kezile a, ɩkɛma ɛkɛla kunlumiba ali ekehile bɛzabɛ mɔɔ bɛyɛ debe ma ɩyɛ ɛyɛkɛ wʋ po nɩ.

12. (a) Mɩnla dɔkʋ̃ yɛ sɛ yɛzʋ̃ yɛ ahʋnlɩnɩ nu yɛdɔ ye mmeliyema a, ɩkɛhã yɛ ma yɛkɛyɛ a? (b) Mɩnla yɛ ezi wʋ kɛnɣa kɛɛ ɛkɛyɛ a? (Kila vidiyo mɔɔ ise Bɔ́ Ɔkʋ̃yɛlɛ Mɔɔ Ɩwɔ Yɛ Avinli Nɩ Nwʋ Banɩ)

¹² Wɔ Pita yɩ kɛlɛta mɔɔ ili bɔmʋnlɩ yɩ nu nɩ, ɩhanlɩ kɛɛ sɛ yɛzʋ̃ yɛ ahʋnlɩnɩ nu yɛdɔ yɛ nwʋ baaba a, ɩkɔwʋwa yɛ ma yɛkɛva ye mmeliyema bɛ “tanɩ sʋ̃maa yɛkɛhyɛ bɛ.” (1 Pit. 4:8) Ebiye a, Pita ɩhakɛlɩ tanɩfakyɛ nwʋ ndianwʋba mɔɔ Gyisɛsɩ yɛlɩ wɔ alʋbɔ be mɔɔ nɩ ɩzɩ̃ ɩhɔ nɩ. Mmɩlɩ mɔ Pita hanlɩ kɛɛ, sɛ yɩ anlima fʋmɩ yɩ a ɩkɛva ɩkɛhyɛ yɩ “mbɔmɩ asunwa” nɩ, nɩ isunzu kɛɛ ɩdaa kunlumiba ali. Naasʋ̃ Gyisɛsɩ hileli Pita nɩɩ ye munwala kɛɛ ɩsɛ kɛɛ yɛfa yɛkyɛ “mbɔmɩ anwunluma asunwa mbɔnwʋ asunwa,” kile kɛɛ ɩsɛ kɛɛ yɛfa tanɩ yɛkyɛ mmɩlɩ munwala. (Mt. 18:​21, 22) Sɛ ɩyɛ sɩ ɩma wʋ kɛɛ ɛkɛva fʋlɔdulɛ eyi ɛkɛyɛ egyima a, áma wʋ padi kolɔ! Iluwakɛɛ Gyehova yɩ azʋ̃mɩvʋlɔ munwala bɛáli munli nɩ ti, ɩyɛ a ɩyɛ sɩ kɛɛ bɛkɛva tanɩ bɛkɛhyɛ. Mɔɔ ihyinyia kɛɛ ɛyɛ yɩ sikalɛyɩ yɛ lɛ kɛɛ, ɔkɔwɔ mmɔdɩnɩ ɛkɛva wʋ mmeliyema bɛ tanɩ ɛkɛhyɛ bɛ na wʋava wʋabɩbɛ azʋ̃nudwolɩyɛ.

13. Mɩnla yɛ ɩkɔhʋla ɩkɛma ɩkɛyɛ sɩ kɛɛ asafʋ nu mbanimbani kɛhyɛ be mmeliyema ɛzɩzɩbɛ a?

¹³ Wɔ Gyisɛsɩ yɩ awudunwolɩyɛ mɛda nɩ, izeli Pita kɛɛ: “Kila mu mmuwuanɩ nɩ mmɔ bʋwɔ,” na ɩkɛyɛ kɛɛ Pita yɩ ɛɣɛɛlɛ iáfi odwokɔ  eyi kyɩ̃. (Dwɔ. 21:16) Sɛ ɛdɩ asafʋ nu ebani a, ezi kɛɛ ɔzɔ odwokɔ yɩ falɩ wʋzawʋ sʋ̃ wʋ nwʋ. Naasʋ̃ kɛ mmɩlɩ munwala yɛ ɩkɔhʋla ɩkɛyɛ mɛlɛkɛ kɛɛ asafʋ nu ebani be keli asɛdɩ mɔɔ nwʋmɔ hyinyia eyi nwʋ egyima a. Ɩsɛ kɛɛ asafʋ nu mbanimbani bedi bɔmʋnlɩ bɛma bo mmusunwamaa nyia bɔ nwʋnlamɩ ɔfʋã nu, nɣanlɩdɩlɛ ɔfʋã nu, nɩɩ bo sunzuma ɔfʋã nu ahyinyiadɩ. Akʋ̃ sʋ̃ bedi dasɩlɛlilɛ egyima yɩ anyunu, na besiyeziye bɔ nwʋ bɛyɛ egyimalilɛ azʋlɔtʋ wɔ dɩyɛzumanlɛ, mansini ayiyialɩyɛ, nɩɩ manlɩ-avinli ayiyialɩyɛ tʋ. Abiyemmɔ sʋ̃ dɩ Asʋpiti Nkitanwʋlilɛ Kɔmitii nu maa anzɛnyɩɩ bɔbʋwa ma bekyinangyina asafʋ nniyia azʋlɔtʋ. Amba, asafʋ nu mbanimbani béni alagyɩ kʋlaa!

14. Mɩnla yɛ ɩkɔwʋwa asafʋ nu mbanimbani ma bekehila asafʋ yɩ a? (1 Pita 5:​1-4)

¹⁴ Pita hyɛlɩ asafʋ nu mbanimbani ɛzɩzɩbɛ kɛɛ “behilá Nyamɩnlɩ mmenii nɩ bɔ zʋ bʋwɔ.” (Kɩnga 1 Pita 5:​1-4.) Sɛ ɛdɩ asafʋ nu ebani a, yezi kɛɛ ɔdɔ wʋ mmeliyema yɩ na ɛpɛ kɛɛ ɛhyɛ bɛ ɛzɩzɩbɛ. Naasʋ̃ itwu mmɩlɩ be a ebiye a, ɛkɛdɩ nɣanlɩ kɛɛ éni alagyɩ anzɛnyɩɩ ɛvɛ meti ɔlɔ́kʋla ekeli asɛdɩ eyi nwʋ egyima. Mɩnla yɛ ɔkɔhʋla kɛyɛ a? Kã kezimɔ ɛtɩ nɣanlɩ nɩ nwʋ odwokɔ kile Gyehova. Pita hɛlɛlɩ kɛɛ: “Mɔɔ ɩbʋwa abiyemmɔ sʋ̃ nɩ, ɩva yɩ anwʋzɩzɩbɛ mɔɔ Nyamɩnlɩ ɩva ɩma yɩ nɩ munwala ɩwʋwa.” (1 Pit. 4:11) Ebiye a wʋ mmeliyema beyiyiaa ndwokɔzɩzɩbɛ mɔɔ bɔlɔ́kʋla bekeli nwʋmɔ egyima wɔ oyuwadɩ eyi nu. Naasʋ̃ kakɛ kɛɛ, Kɩlayɩsɩ mɔɔ ɩdɩ mmuwuanɩzʋhilalɛvʋlɔ ebani nɩ, ɩkɔhʋla ɩkɔwʋwa bɛ ɩkɛdɛla mɔɔ ɔkɔhʋla ɛkɛyɛ nɩ. Ɩkɔhʋla ɩkɔwʋwa bɛ kakɩ nɩɩ oyuwadɩ fʋlɔ yɩ nu sʋ̃. Mɔɔ Gyehova pɛ kɛɛ asafʋ nu mbanimbani bɛyɛ yɛ lɛ kɛɛ bɔkɔlɔ be mmeliyema, bekehila bɔ zʋ na bɛayɛ ndianwʋba bɛama bɛ.

15. Mɩnla yɛ asafʋ nu ebani be ɩyɛ na ama ɩahʋla ɩahyɛ yi mmeliyema ɛzɩzɩbɛ a? (Kila mfonyini yi sʋ̃.)

¹⁵ William mɔɔ ɩzʋ̃mɩ kɛɛ asafʋ nu ebani ɩhyɛ nɩ, izi kezimɔ nwʋmɔ hyinyia kɛɛ ɩkɛhyɛ yɩ mmeliyema ɛzɩzɩbɛ. Mmɩlɩ mɔ COVID-19 adimakɛlɛ yɩ wɔlɩ yɩ tʋ nɩ, ɩ nɩɩ yɩ ɔhɔnwʋmmɔ mbanimbani yi bɛva bɛyɛlɩ bɔ bʋtayɩ kɛɛ bɛkɛhyɛ mmeliyema mɔɔ bɔwɔ bɛ dasɩlɛlilɛ okuwu yi nu nɩ ɛzɩzɩbɛ dapɛnɩ bela. Ihilehileli numɔ kɛɛ: “Nɩ mmeliyema yɩ be wɔ kɛnɩ mɔɔ ɩha bɛzabɛ nkʋ̃ wɔ awudo, meti nɩ adwɩnɩndwɩnɩ kɔhʋla kɛhyɛ bɔ zʋ.” Sɛ eliyema be iyiyiaa ndwokɔzɩzɩbɛ be a, William ɩyɛ  dinyii itiye yi na ɩanwʋ mmʋwalɩyɛ mɔɔ ihyinyia. Akʋ̃ ɩkɔ yɛ wɛbsayɩtɩ yɩ zʋ ɩkɔ ɩpɩbɛ awuuku nɩɩ vidiyo mɔɔ ɩkɔhʋla ɩkɔwʋwa yɩ. Ɩhanlɩ kɛɛ: “Nnɛ paa yɛ ihyinyia kɛɛ yɛhyɛ mmeliyema ɛzɩzɩbɛ a. Kɛmɔ yɛbʋwa mmenii mvʋlɔ ma bosuma Gyehova nwʋ dɩyɛ nɩ, ɔzɔ la yɛ ɩsɛ kɛɛ yɛbɔ mmɔdɩnɩ yɛhyɛ Gyehova yi mmuwuanɩ yɩ ɛzɩzɩbɛ na bɛahɔ zʋlɔ bɛawʋwa nɔhʋanlɛ yɩ nu a.”

16. Mɩnla ɔhʋanɩ azʋlɔtʋ zʋ yɛ yɛkɔhʋla yɛkɛva mɔɔ yezuma wɔ Pita yɩ ahɛlɛta yɩ nu nɩ yɛkɛyɛ egyima a?

¹⁶ Yɛɣa yɛnwʋ ozumalɛdɩyɛ mɔɔ ɩwɔ Pita yɩ ahɛlɛta anwɩ̃ yɩ nu numɔ ɛgyɩkɩ̃ɩ̃ be. Ebiye a ɔnwʋnlɩ debe mɔɔ ɛkɛbɛ kɛɛ okodu mpʋnɩ wɔ nu. Kɛ ndianwʋ nɩ, ebiye a ɛkɛbɛ yɩ kɛɛ ɔkɔdwɩnɩndwɩnɩ nyilalɛ mɔɔ ekenyia yɩ wɔ oyuwadɩ fʋlɔ yɩ nu nɩ nwʋ. Anzɛnyɩɩ ebiye a ɛva yɛ wʋ bʋtayɩ kɛɛ ekeli dasɩlɛ wɔ egyima nu, sukuulu nu, anzɛnyɩɩ dɩka fʋlɔ be. Asʋ̃ ɔnwʋ ɔhʋanɩ mvʋlɔ mɔɔ ɔkɔhʋla okoluwa zʋ ɛkɛla ɔlɔlɛ ali ekehile wʋ mmeliyema bʋwɔ a? Asafʋ nu mbanimbani, asʋ̃ bezi bɛ kɛnɣa kɛɛ bɔzʋ̃ bo kunlu bekehila Gyehova yɩ mmuwuanɩ yɩ a? Sɛ ɔzʋ̃ wʋ ahʋnlɩnɩ nu osunzu ndwokɔ eyimmɔ nwʋ a, ebiye a ɔkɔnwʋ kɛɛ ɔtɔ sini wɔ dɩka be. Sɛ ɩba yɩ zɔ a, máma wʋ padi kolɔ. “Niibenyia [Gyisɛsɩ] ɩdɩ baaba,” na ɩkɔwʋwa wʋ ma okodu mpʋnɩ. (1 Pit. 2:3) Pita hyɛ yɛ ɛzɩzɩbɛ kɛɛ: ‘Nyamɩnlɩ yɩzayɩ munli nɩ ikeziyeziye mʋnlʋmmɔ, ɩkɛma mʋnlʋmmɔ anwʋzɩzɩbɛ nɩɩ akɛnɣazɩzɩbɛ na ɩama mʋnlʋmmɔ bɛagyina pindinyii.’—1 Pit. 5:10.

17. Sɛ yɛkɔ zʋ yedi nɔhʋanlɛ na yɛma ɔhʋanɩ ma Gyehova ɩtɩdɩ yɛ iwie a, mɩnla yɛ yekenyia a?

¹⁷ Ahyɛasɩ yɩ, nɩ Pita tɩ nɣanlɩ kɛɛ ɩávata kɛɛ idi Gyisɛsɩ mɛda. (Lk. 5:8) Naasʋ̃ iluwakɛɛ Gyehova nɩɩ Gyisɛsɩ bɔzʋ̃ ɔlɔlɛ nu bɔwʋwalɩ yɩ nɩ ti, ɩvalɩ nɔhʋanlɛlilɛ ilili Kɩlayɩsɩ mɛda. Eyi ti Gyehova manlɩ ɔhʋanɩ ma Pita hɔlɩ “ye Niibenyia nɩɩ ye Devʋlɔ Gyisɛsɩ Kɩlayɩsɩ yi Bulombunlililɛ nɩ mɔɔ íni awielɩyɛ nɩ nu.” (2 Pit. 1:11) Kila nyilalɛ kezile ɔkʋ̃! Sɛ ɔkɔ zʋlɔ di nɔhʋanlɛ dɩkɛɛ Pita na ɛma ɔhʋanɩ ma Gyehova ɩtɩdɩ wʋ iwie a, wʋzawʋ sʋ̃ wu dedi kɛma ekenyia nnwʋanlɩ mɔɔ íni awielɩyɛ.—1 Pit. 1:9.