1. Mɩnla yɛ ɩlɛ́kyɛ Gyisɛsɩ kɛyɛ a?

 YƐDA mmɩlɩ be mɔ nninyeni nɣezile nɣezile kezizi nu! Ɩlɛ́kyɛ, Gyisɛsɩ kowuwa mmenii mɔɔ bɛda azɩlɛ yɩ zʋ nɩ munwala ndɛnɩ. Gyisɛsɩ manlɩ yɛnwʋnlɩ “sɛnkyɩlɛdɩ” mɔɔ ɩkɛma yɛkɔnwʋ kɛɛ yɩ ndɛnɩwuwalɛ mmɩlɩ nɩ dwu na “oyuwadɩ eyi ɩbaa awielɩyɛ.” (Mt. 24:3) Ɔzɔ nkɔmɩhyɛ yɩ wɔ Matiyu yi ti 24 nɩɩ 25 nɩɩ Maakɩ yi ti 13 nɩɩ Luuku yi ti 21 yɩ nu.

2. Mɩnla yɛ yɛbazunzu nwʋmɔ a, na mɩnla ɔhʋanɩ zʋ yɛ ɩkɔwʋwa yɛ a?

² Gyisɛsɩ wuli ɛɣɛlɛ asã be mɔɔ ɩdɩ kɔkɔwɔlɛ mɔɔ ɩkɔwʋwa yɛ. Ɛɣɛlɛ eyi falɩ mmuwuanɩ nɩɩ nzɩkɛ, nɣɛdɛkɛ be mɔɔ bo nu be dɩ ahwasɩya na bo nu be sʋ̃ dɩ nɣɛlɛbɛmaa nɩɩ ozukua nwʋ. Ɛɣɛlɛ eyimmɔ nu ɔkʋ̃ bela bʋwa yɛ ma yɛnwʋ kɛɛ Gyisɛsɩ kegyina kezimɔ abiyela yɛ yɩ dɩyɛ nɩ zʋ kowuwa yɩ ndɛnɩ. Mmɩlɩ mɔ yesunzuu ɛɣɛlɛ eyimmɔ nwʋ nɩ, bɛmá yɛbɩbɛ ozumalɛdɩyɛ mɔɔ ɩwɔ numɔ nɩɩ kezimɔ yɛkɔhʋla yɛkɛva yɛkɛyɛ egyima. Yekeli bɔmʋnlɩ yekozunzu mɔɔ ɩfalɩ mmuwuanɩ nɩɩ nzɩkɛ yɩ nwʋ nɩ nwʋ.

MMUWUANƖ NƖƖ NZƖKƐ YƖ

3. Mɩnla mmɩlɩ yɛ Gyisɛsɩ kowuwa mmenii ndɛnɩ a?

³ Wɔ ɛɣɛlɛ mɔɔ ɩfalɩ mmuwuanɩ nɩɩ nzɩkɛ yɩ nwʋ nɩ, Gyisɛsɩ hanlɩ kɛɛ ikegyina kezimɔ mmenii yɛlɩ bɛ dɩyɛ wɔ odwokɔba yɩ nwʋ nɩɩ mmʋwalɩyɛ mɔɔ bɛva bɛmanlɩ yi mmenlima mɔɔ bɔvɔ ngɔlɔ bɛ nɩ zʋ yɛ ikowuwa bɛ ndɛnɩ a. (Mt. 25:​31-46) Wɔ ‘anwʋhyɩlɩyɛ kezile’ yi nu nɩ, ikowuwa mmenii ndɛnɩ ansaana Amagadɔnʋ kʋnɛ yɩ ɩawɔ yɩ tʋ. (Mt. 24:21) Kɛmɔ mmuwuanɩzʋhilalɛvʋlɔ ɩyɩ mmuwuanɩ wɔ nzɩkɛ nu nɩ, Gyisɛsɩ kɛyɩ mmenii mɔɔ bɛvalɩ nɔhʋanlɛlilɛ bɔwʋwalɩ bɛzabɛ mɔɔ bɔvɔ ngɔlɔ bɛ nɩ wɔ mmenii mɔɔ bɛáyɛ zɔ nɩ nu.

4. Kɛmɔ Ayɩzaya 11:​3, 4 kã nɩ, mɩnla ti mɔɔ yɛkɔhʋla kenyia anwʋlazʋ kɛɛ Gyisɛsɩ kowuwa ndɛnɩ mɔɔ ɩtɩnɣɛ a? (Kila yɩ anyunu mfonyini yi.)

⁴ Bayɩbʋlʋ yɩ kã kɛɛ sɛ Gyisɛsɩ ibuwaa ndɛnɩ ɩkɛma Gyehova a, ɩyɛ yɩ pɛpɛɛpɛ mɔɔ nsisi bela íni numɔ. (Kɩnga Ayɩzaya 11:​3, 4.) Ikila mɔɔ mmenii yɛ, mɔɔ bɔdwɩnɩ nwʋmɔ, mɔɔ bɛkã,  nɩɩ kezimɔ bɛ nɩɩ yi mmenlima mɔɔ bɔvɔ ngɔlɔ bɛ nɩ sʋ̃ di. (Mt. 12:​36, 37; 25:40) Gyisɛsɩ kɔnwʋ bɛzabɛ mɔɔ bɔwʋwalɩ yi mmenlima mɔɔ bɔvɔ ngɔlɔ bɛ nɩ. a Ɔhʋanɩ ɔkʋ̃ mɔɔ bɛzabɛ mɔɔ bɛdɩ kɛɛ mmuwuanɩ kɔhʋla koluwa zʋlɔ kehile kɛɛ bɛda Gyisɛsɩ yi mmenlima yɩ mɛda yɛ lɛ kɛɛ bɔkɔwʋwa bɛ wɔ dasɩlɛlilɛ egyima yɩ nu. Gyisɛsɩ kowuwa bɛ ndɛnɩ kɛɛ “ɛdɩnɣɛlɛmaa” na bekenyia nwʋmɔ ɔhʋanɩ bɔkɔhɔ “nnwʋanlɩ mɔɔ íni awielɩyɛ nu.” (Mt. 25:46; Yik. 7:​16, 17) Eyi dɩ nyilalɛ mɔɔ ɩyɛ anyɩnlɩlelɛ ma bɛzabɛ mɔɔ bekeli nɔhʋanlɛ nɩ! Sɛ bedi nɔhʋanlɛ wɔ anwʋhyɩlɩyɛ kezile yi nu nɩɩ yɩ mɛda a, ɩkɛma be dima kɔhɔ zʋlɔ kɔwʋwa “nnwʋanlɩ buuku” yi nu.—Yik. 20:15.

5. Mɩnla ozumalɛdɩyɛ yɛ yenyia wɔ ɛɣɛlɛ mɔɔ ɩfalɩ mmuwuanɩ nɩɩ nzɩkɛ yɩ nwʋ nɩ nu a, na aninyiammɔ yɛ bɔkɔhʋla bekenyia zʋlɔ mfasʋ a?

⁵ Di nɔhʋanlɛ. Gyisɛsɩ yɩ ɛɣɛlɛ mɔɔ ɩfalɩ mmuwuanɩ nɩɩ nzɩkɛ nwʋ nɩ, ɩfalɩ bɛzabɛ mɔɔ bɔkɔwʋwa azɩlɛ yɩ zʋ daabaa nɩ nwʋ titili. Bɔbʋwa Kɩlayɩsɩ yi mmenlima yɩ wɔ dasɩlɛlilɛ egyima yi nu na bedi sʋ̃mɩvʋlɔ nɔhʋanlɛvʋlɔ nɩɩ nɣɛlɛbɛvʋlɔ mɔɔ Gyisɛsɩ ɩyɩ yɩ nɩ yɩ ɔhʋanɩhilelɛ mɛda bɛfa bekile kɛɛ bɔwɔ dedi. (Mt. 24:45) Naasʋ̃ ɩsɛ kɛɛ bɛzabɛ mɔɔ bɔwɔ sʋlɔ anyɩnlɩlazʋ yɩ sʋ̃ tiye kɔkɔwɔlɛ mɔɔ ɩwɔ ɛɣɛlɛ mɔɔ ɩfalɩ mmunwanɩ nɩɩ nzɩkɛ yɩ nwʋ nɩ nu. Mɩnla ti a? Iluwakɛɛ Gyisɛsɩ kila bɛ nyɛlɩyɛ, mɔɔ bɔdwɩnɩ nwʋmɔ nɩɩ mɔɔ bɛkã. Ɩsɛ kɛɛ bɛzabɛ sʋ̃ bɛda yɩ ali kɛɛ bedi nɔhʋanlɛ. Mɔɔ ɩdɩ yɛ lɛ kɛɛ, Gyisɛsɩ wuli ɛɣɛlɛ anwɩ̃ be sʋ̃ mɔɔ kɔkɔwɔlɛ mɔɔ ɩwɔ nu nɩ falɩ bɛzabɛ mɔɔ bɔvɔ ngɔlɔ bɛ nɩ nwʋ. Ɛɣɛlɛ eyimmɔ wɔ Matiyu ti 25. Kakɩ yɩ, bɛmá yehila ɛɣɛlɛ mɔɔ ɩfalɩ nɣɛdɛkɛ be mɔɔ bo nu be dɩ ahwasɩya na bo nu be sʋ̃ dɩ nɣɛlɛbɛmaa nɩ.

NƔƐDƐKƐ BE MƆƆ BO NU BE DƖ AHWASƖYA NA BO NU BE SƲ̃ DƖ NƔƐLƐBƐMAA

6. Mɩnla ɔhʋanɩ zʋ yɛ nɣɛdɛkɛ yɩ, bo nu anlu lalɩ yɩ ali kɛɛ bɛdɩ nɣɛlɛbɛmaa a? (Matiyu 25:​6-10)

⁶ Wɔ ɛɣɛlɛ mɔɔ ɩfalɩ nɣɛdɛkɛ yɩ nwʋ yɩ nu nɩ, Gyisɛsɩ hanlɩ kɛɛ nɣɛdɛkɛ bunlu be hɔlɩ kɛɛ bekeyiyiaa ayɩfʋlɔ ohunɛ be. (Mt. 25:​1-4) Bɛyɛlɩ bɛ adwɩnɩ kɛɛ bɛ nɩɩ yɩ kɔwɔ numɔ kɔhɔ yɩ ayɩfʋlɔ yɩ tʋ. Gyisɛsɩ hanlɩ bo nu anlu nwʋ odwokɔ kɛɛ bɛdɩ “nɣɛlɛbɛmaa” yɛɛ anlu sʋ̃ dɩ “ahwasɩya.” Nɩ nɣɛdɛkɛ mɔɔ bɛdɩ nɣɛlɛbɛmaa nɩ ziyeziye bɔ nwʋ na bɛ anyɩ la kɛ. Nɩ beziyeziye bɔ nwʋ kɛɛ bɛkɛlɩkɛ ayɩfʋlɔ ohunɛ yɩ ɩávalɩ nwʋmɔ mmɩlɩ tɩndɩnlɩ mɔɔ ikeli nɩ, sɛ dasuwo nu yɛ ɩkɛɣa po a, nɩ bɛkɛlɩkɛ. Meti bɛvalɩ bɛ ahɩnlanɩyɛ mɔɔ ngɔlɔ wɔ nu mɔɔ ɩkɛma bekenyia hanyɩɩ wɔ anwunzumi nu. Bezia bɛvalɩ ngɔlɔ yɩ be bogualɩ dɩyɛ nu bowulalɩ bɔ nwʋ, na sɛ ɩba yɩ kɛɛ ayɩfʋlɔ ohunɛ yɩ kyɛ po a, bɛahʋla bɛalɩkɛ yɩ. Nɩ beziyeziye bɔ nwʋ kɛɛ bɛkɛma bɛ ahɩnlanɩyɛ nɩ kɔhɔ zʋlɔ kodwe. (Kɩnga Matiyu 25:​6-10.) Mmɩlɩ mɔ ayɩfʋlɔ ohunɛ yɩ ɣalɩ nɩ, nɣɛdɛkɛ nɣɛlɛbɛmaa yɩ bɛ nɩɩ yɩ hɔlɩ ayɩfʋlɔ yɩ tʋ. Ɔzɔ la sʋ̃ yɛ sɛ Kilisinyiamaa mɔɔ bɔvɔ ngɔlɔ bɛ nɩ siyeziye bɔ nwʋ iluwa bɛ anyɩ mɔɔ bɛkɛma ɩkɛla kɛnɩ na bɛali nɔhʋanlɛ kɔbʋmɩ kɛɛ Kɩlayɩsɩ kɛɣa nɩ a, bokowu bɛ kɛɛ bɛfata kɛɛ bɛkɛhɩnla Ayɩfʋlɔ Ohunɛ, Gyisɛsɩ nwʋ wɔ yɩ sʋlɔ Bulombunlililɛ yɩ nu. b (Yik. 7:​1-3) Na nɣɛdɛkɛ anlu mɔɔ bɛdɩ ahwasɩya yɩ sʋ̃ ɛ?

7. Mɩnlɛ yɛ ɩdʋlɩ nɣɛdɛkɛ ahwasɩya anlu yɩ a, na mɩnla ti a?

⁷ Nɣɛdɛkɛ anlu mɔɔ bɛdɩ ahwasɩya nɩ, bɛáyɛ bɛ dɩyɛ kɛɛ nɣɛlɛbɛmaa nɩ, meti ayɩfʋlɔ ohunɛ yɩ ɣalɩ nɩ, nɩ belésiyeziyeli bɔ nwʋ kɛɛ bɛ nɩɩ yɩ kɔhɔ. Nɩ bɛ ahɩnlanɩyɛ yɩ inuu, na bɛáfa ngɔlɔ yɩ be bɛkɩnla bɔ nwʋ bɔkɔ. Mmɩlɩ mɔ bɛdɩlɩ kɛɛ ɩlɛ́kyɛ na ayɩfʋlɔ ohunɛ yɩ ɩaɣa nɩ,  yɛɛ bɔhɔlɩ kɛɛ bɔkɔdɔɔ ngɔlɔ a. Meti mmɩlɩ mɔ ayɩfʋlɔ ohunɛ yɩ ɣalɩ nɩ, nɩ béni kɛnɩ. Ɔzɔ mmɩlɩ yɩ, “nɣɛdɛkɛ nɣɛlɛbɛmaa anlu nɩ mmɔ mɔɔ nɩ beziyeziye bɔ nwʋ nɩ, bɛ nɩɩ yɩ hɔlɩ ayɩfʋlɔyiyialɛ nɩ tʋ, na bɔdʋlɩ anyɩnkɛ nɩ nu.” (Mt. 25:10) Aɣinzi yi mɔɔ nɣɛdɛkɛ ahwasɩya yɩ ɣalɩ mɔɔ nɩ bɛpɛ kɛɛ bɔwɔlɔ anyɩnkɛ yɩ nu nɩ, ayɩfʋlɔ ohunɛ yɩ hanlɩ hileli bɛ kɛɛ: “Mízi mʋnlʋmmɔ.” (Mt. 25:​11, 12) Ɔzɔ nɣɛdɛkɛ yɩ bɛásiyeziye bɔ nwʋ kɛɛ bɛkɛlɩkɛ ayɩfʋlɔ ohunɛ yɩ. Mɩnla ozumalɛdɩyɛ yɛ ɩwɔ numɔ ɩma bɛzabɛ mɔɔ bɔvɔ ngɔlɔ bɛ nɩ a?

8-9. Mɩnla yɛ bɛzabɛ mɔɔ bɔvɔ ngɔlɔ bɛ nɩ kɔhʋla kozuma wɔ ɛɣɛlɛ mɔɔ ɩfalɩ nɣɛdɛkɛ bunlu yɩ nwʋ nɩ nu a? (Kila mfonyini yi sʋ̃.)

⁸ Siyeziye wʋ nwʋ na ma wʋ anyɩ la kɛ.  Gyisɛsɩ ɩákã kɛɛ bɛzabɛ mɔɔ bɔvɔ ngɔlɔ bɛ nɩ dɩ okuwu anwɩ̃, mɔɔ okuwu ɔkʋ̃ ziyeziye yɩ nwʋ kɛɛ ɩkɛlɩkɛ kɔbʋmɩ oyuwadɩ yɩ awielɩyɛ na okuwu ɔkʋ̃ yɩ mɛyɩ ɩlɛ́yɛ ɔzɔ. Mfomi mɔɔ ɩkɔdʋ bɛzabɛ mɔɔ bɔvɔ ngɔlɔ bɛ mɔɔ belésiyeziyeli bɔ nwʋ kɛɛ bekeli nɔhʋanlɛ bɔkɔhɔ awielɩyɛ nɩ yɛ nɩ ikilehilee nu a. Sɛ ɩba yɩ zɔ a, bɛ sa lɛ́kã bɛ akatuwa nɩ. (Dwɔ. 14:​3, 4) Eyi dɩ anyɩnlɩbʋlʋ odwokɔ paa! Kɛ yɛwɔ anyɩnlɩlazʋ kɛɛ yɛkɔhɔ sʋlɔ anzɛnyɩɩ yɛkɔwʋwa azɩlɛ yɩ zʋ nɩ, ɩsɛ kɛɛ ye munwala yɛma kɔkɔwɔlɛ mɔɔ ɩfalɩ nɣɛdɛkɛ bunlu yɩ nwʋ nɩ bʋwa yɛ adwɩnɩ nu. Ɩsɛ kɛɛ ye nu ɔkʋ̃ bela kɔ zʋlɔ wɩɛnɩ na isiyeziye yɩ nwʋ kɛɛ ikegyina pindinyii ɩkɔhɔ awielɩyɛ.—Mt. 24:13.

⁹ Mmɩlɩ mɔ Gyisɛsɩ wuli ɛɣɛlɛ mɔɔ ɩfalɩ nɣɛdɛkɛ yɩ nwʋ va hileli kezimɔ nwʋmɔ hyinyia kɛɛ yekeziyeziye yɛ nwʋ na yɛama yɛ anyɩ ɩala kɛnɩ mɛda nɩ, izia iwuli ɛɣɛlɛ mɔɔ ɩfalɩ ozukua nwʋ. Ɔzɔ ɛɣɛlɛ yɩ ma yɛnwʋ kezimɔ ihyinyia kɛɛ yɛbɔ yɛ nwʋ mmɔdɩnɩ wɔ yɛ ɔzʋ̃mɩnlɛ nu.

OZUKUA YƖ

10. Mɩnla ɔhʋanɩ zʋ yɛ azʋ̃mɩvʋlɔ yɩ bo nu anwɩ̃ lalɩ yɩ ali kɛɛ bedi nɔhʋanlɛ a? (Matiyu 25:​19-23)

¹⁰ Wɔ ɛɣɛlɛ mɔɔ ɩfalɩ ozukua nwʋ yɩ nu nɩ, Gyisɛsɩ hanlɩ azʋ̃mɩvʋlɔ anwɩ̃ be mɔɔ belili nɔhʋanlɛ bɛmanlɩ be diibenyia nɩɩ sʋ̃mɩvʋlɔ ɔkʋ̃ mɔɔ iádi nɔhʋanlɛ nwʋ odwokɔ. (Mt. 25:​14- 18) Azʋ̃mɩvʋlɔ anwɩ̃ yɩ hileli kɛɛ bɛdɩ nɔhʋanlɛmaa iluwa mmɔdɩnɩ mɔɔ bɔwɔlɩ benyianlɩ ozukua yɩ be bɛhɩnlanlɩ mɔɔ be diibenyia va manlɩ bɛ yɩ nwʋ nɩ. Ansaana be diibenyia badu ɔhʋanɩ nɩ, ɩvalɩ ozukua kezile be iwulalɩ bɛ sa. Azʋ̃mɩvʋlɔ nɔhʋanlɛmaa anwɩ̃ yɩ wɔlɩ bɔ nwʋ mmɔdɩnɩ valɩ ozukua yɩ yɛlɩ egyima wɔ nɣɛlɛbɛ nu. Mɩnla yɛ ɩzʋ̃ numɔ ɩɣalɩ a? Mmɩlɩ mɔ be diibenyia ɣalɩ nɩ, nɩ benyia ozukua mɔɔ ɩva ɩmanlɩ bɛ nɩ yɩ mmɔ nwʋ anwɩ̃. Be diibenyia hamvʋlɩ bɛ na ɩmanlɩ ‘bɔwʋwalɩ yɩ nwʋ ma belili fɛlɛkʋ̃.’ (Kɩnga Matiyu 25:​19-23.) Na sʋ̃mɩvʋlɔ mɔɔ ɩtɔ zʋlɔ asã yɩ sʋ̃ ɛ? Mɩnla yɛ ɩvalɩ yi ozukua dɩyɛ nɩ ɩyɛlɩ a?

11. Mɩnla yɛ ɩdʋlɩ sʋ̃mɩvʋlɔ “kwadwʋvʋlɔ” yɩ a, na mɩnla ti a?

¹¹ Bɛmanlɩ sʋ̃mɩvʋlɔ mɔɔ ɩtɔ zʋlɔ asã yɩ ozukua pɔnʋ 1,000 naasʋ̃ nɩ ɩdɩ “kwadwʋvʋlɔ.” Nɩ yi diibenyia ikilaa ɔhʋanɩ kɛɛ ɩkɛva ozukua yɩ ɩkɛyɛ egyima wɔ nɣɛlɛbɛ nu. Naasʋ̃, iduduli azɩ ɩvalɩ ozukua yɩ iwulalɩ kɛ. Mmɩlɩ mɔ yi diibenyia zia ɣalɩ nɩ, ɩákʋla nyia mfasʋ bela ɩkɩnla nwʋmɔ ma yɩ. Na nɩ sʋ̃mɩvʋlɔ yɩ íni subanɩ. Kɛ ankɩ ɩkɛba kyɛbɛ wɔ yi diibenyia kɛɛ ɩákʋla nyia mfasʋ bela ɩma yɩ nɩ, ɩhanlɩ kɛɛ yi diibenyia yɩ ‘yi ti nu ɩyɛ sɩ.’ Sʋ̃mɩvʋlɔ eyi ɩáma yi diibenyia yɩ anyɩ deli yɩ nwʋ. Mɔɔ ɩyɛ alɔbɔ po yɛ lɛ kɛɛ, beleli ozukua yɩ wɔ yɩ sa nu na boduduli yi wɔ yi diibenyia yɩ awudo.—Mt. 25:​24, 26-30.

12. Nnɛ, azʋ̃mɩvʋlɔ nɔhʋanlɛmaa anwɩ̃ yɩ gyĩ kɛnɩ ma aninyiammɔ a?

¹² Azʋ̃mɩvʋlɔ nɔhʋanlɛmaa anwɩ̃ yɩ gyĩ kɛnɩ ma Kilisinyiamaa mɔɔ bɔvɔ ngɔlɔ bɛ na bedi nɔhʋanlɛ nɩ. Be Diibenyia Gyisɛsɩ tʋ salɛ fʋlɔ bɛ kɛɛ bɛɣɩla ‘bɔwʋwa yɩ nwʋ kɛnɩ ma beli fɛlɛkʋ̃.’ Benyia awudunwolɩyɛ mɔɔ ili bɔmʋnlɩ nɩ kɛɛ bɔ sʋlɔ akatuwa. (Mt. 25:​21, 23; Yik. 20:5b) Naasʋ̃, sʋ̃mɩvʋlɔ kwadwʋvʋlɔ yɩ yi ndianwʋ tanɩ nɩ dɩ kɔkɔwɔlɛ ma bɛzabɛ mɔɔ bɔvɔ ngɔlɔ bɛ nɩ. Mɩnla ɔhʋanɩ zʋ a?

13-14. Mɩnla yɛ bɛzabɛ mɔɔ bɔvɔ ngɔlɔ bɛ nɩ suma wɔ ɛɣɛlɛ mɔɔ ɩfalɩ ozukua nwʋ nɩ nu a? (Kila mfonyini yi sʋ̃.)

¹³ Bɔ wʋ nwʋ mmɔdɩnɩ na bɔ ɛhyɩmɛ. Dɩkɛɛ ɛɣɛlɛ mɔɔ ɩfalɩ nɣɛdɛkɛ bunlu yɩ nwʋ nɩ, wɔ ɛɣɛlɛ mɔɔ ɩfalɩ ozukua nwʋ yɩ nu sʋ̃ nɩ, nɩ Gyisɛsɩ lɛ́kã kɛɛ bɛzabɛ mɔɔ bɔvɔ ngɔlɔ bɛ nɩ kɛyɛ ahwadwʋvʋlɔ. Mfomi nɩ ɩmaa bɔkɔnwʋ kɛɛ, sɛ  bɛákɔ zʋlɔ bɔbɔ ɛhyɩmɛ a, mɔɔ ɩkɔdʋ bɛ yɛ nɩ. Ɩkɛma ɩkɛyɛ sɩ kɛɛ ‘Nyamɩnlɩ kɔvʋlɔ bɛ,’ na belényia ɔhʋanɩ bɔkɔhɔ sʋlɔ Bulombunlililɛ yɩ nu.—2 Pit. 1:10.

¹⁴ Gyisɛsɩ yɩ ɛɣɛlɛ mɔɔ ɩfalɩ nɣɛdɛkɛ bunlu nɩɩ ozukua yɩ nwʋ nɩ ma ɩda ali petee kɛɛ ɩsɛ kɛɛ Kilisinyiamaa mɔɔ bɔvɔ ngɔlɔ bɛ nɩ munwala siyeziye bɔ nwʋ na bɛma bɛ anyɩ da kɛ. Akʋ̃ sʋ̃, ɩsɛ kɛɛ bɔbɔ bɔ nwʋ mmɔdɩnɩ na bɛyɛ ɛhyɩmɛ. Asʋ̃ Gyisɛsɩ hanlɩ debe fʋlɔ mɔɔ ɩdɩ kɔkɔwɔlɛ ɩma bɛzabɛ mɔɔ bɔvɔ ngɔlɔ bɛ nɩ a? Nyɛ! Gyisɛsɩ yi odwokɔ mɔɔ ɩwɔ Matiyu 24:​40, 41 nɩ sʋ̃ falɩ bɛzabɛ mɔɔ bɔvɔ ngɔlɔ bɛ nɩ bɛ ndɛnɩwuwalɛ mɔɔ itualɩ yɩ tʋ nɩ nwʋ.

ANINYIA YƐ ‘BƐKƐVA YƖ’ A?

15-16. Mɩnla ɔhʋanɩ zʋ yɛ Matiyu 24:​40, 41 ma yɛnwʋ kɛɛ ihyinyia kɛɛ bɛzabɛ mɔɔ bɔvɔ ngɔlɔ bɛ nɩ wɩɛnɩ a?

¹⁵ Ansaana Gyisɛsɩ ibuu ɛɣɛlɛ asã yɩ nɩ, ɩhanlɩ ndɛnɩwuwalɛ be mɔɔ itualɩ yɩ tʋ mɔɔ ɩkɛɣa bɛzabɛ mɔɔ bɔvɔ ngɔlɔ bɛ nɩ zʋ, na mɛyɩ yɛ ɩkɛma bɔkɔnwʋ bɛzabɛ mɔɔ bekele bɛ nɩ a. Ɩhanlɩ mmenyia anwɩ̃ be mɔɔ bɛyɛɛ egyima wɔ egyini nu nɩɩ mmaalɛ anwɩ̃ be mɔɔ betĩĩ dɩyɛ nwʋ odwokɔ. Wɔ bʋwabɩlɛ eyimmɔ bela nu nɩ, nɩ ɩdɩ kɛɛ mmenii anwɩ̃ yɩ munwala bɛyɛɛ egyima ɔkʋ̃, naasʋ̃ Gyisɛsɩ hanlɩ kɛɛ Nyamɩnlɩ “ɩkɛva ɔkʋ̃ ɩkɔhɔ sʋlɔ, na iayiaki ɔkʋ̃.” (Kɩnga Matiyu 24:​40, 41.) Akʋ̃ ɩhyɛlɩ yɩ mɛdalilɛmaa ɛzɩzɩbɛ kɛɛ: “Bɔwɩɛnɩ; iluwakɛɛ mʋnlʋmmɔ bézi eɣile mɔ mʋnlʋmmɔ be Niibenyia nɩ ɩkɛɣa wɔ numɔ.” (Mt. 24:42) Gyisɛsɩ hanlɩ odwokɔ be mɔɔ ɩ nɩɩ eyi di nsɛ mmɩlɩ mɔ iwuli ɛɣɛlɛ mɔɔ ɩfalɩ nɣɛdɛkɛ bunlu yi nwʋ iwieli nɩ. (Mt. 25:13) Asʋ̃ ndwokɔ eyimmɔ wɔ abusunwawɔlɛ a? Ɩkɛyɛ zɔ. Bɛzabɛ mɔɔ bɔvɔ ngɔlɔ bɛ mɔɔ bekeli nɔhʋanlɛ nɩ nkʋ̃ la yɛ ‘ɩkɛva bɛ’ a, na Gyisɛsɩ iále bɛ ɩahɔ sʋlɔ Bulombunlililɛ yɩ nu.—Dwɔ. 14:3.

¹⁶ Kɔ zʋlɔ wɩɛnɩ. Abiyela mɔɔ bɔvɔ ngɔlɔ yɩ mɔɔ ɩákɔ zʋlɔ ɩwɩɛnɩ nɩ, bɛlɛ́fa yɩ bɛkɛhɩnla “mmenii‘mɔɔ ɩba numɔ ɩyɩ bɛ nɩ” nwʋ. (Mt. 24:31) Sɛ yɛkɛhã a, Nyamɩnlɩ mmenii munwala, kɛ bɔwɔ anyɩnlɩlazʋ kɛɛ bɔkɔhɔ sʋlɔ anzɛnyɩɩ bɔkɔwʋwa azɩlɛ yɩ zʋ nɩ, ɩsɛ kɛɛ bobu Gyisɛsɩ yi odwokɔ yɩ kɛɛ kɔkɔwɔlɛ mɔɔ ɩkɛma bɔkɔhɔ zʋ bɔkɔwɩɛnɩ na bɛali nɔhʋanlɛ.

17. Mɩnla ti mɔɔ íni kɛɛ yɛma mmɩlɩ mɔ Gyehova koluwa yi sunzuma nwanzanwanza yɩ zʋ kɔvɔ abiye ngɔlɔ nɩ dide yɛ a?

¹⁷ Yɛɣa yɛnwʋ Gyehova bʋwɔ, na yɛwɔ yɩ ndɛnɩwuwalɛ nu anwʋlazʋ. Meti sɛ ɩfɔɔ bɛzabɛ mɔɔ bedi nɔhʋanlɛ nɩ be ngɔlɔ wɔ yɛ mmɩlɩ nu a, iálile yɛ. c Wɔ Gyisɛsɩ yi ndianwʋ mɔɔ ɩfalɩ nwanyɩ egyini yi nwʋ nɩ, yɛkakɛ mɔɔ ɩhanlɩ ɩvalɩlɩ ɛpamaa mɔɔ bɛɣa yɛlɩ egyima mmɩlɩ mɔ ɩka ɛgyɩkɩ̃ɩ̃ ma bɔbɔ nɔnɩ anlu yi nwʋ nɩ. (Mt. 20:​1-16) Mmenii mɔɔ bɔvʋlɔlɩ bɛ ma bɛɣa yɛlɩ egyima wɔ nwanyɩ egyini yi nu aɣinzi yi wɔ ɔzɔ eɣile yi nu nɩ, bɛ nɩɩ bɛzabɛ mɔɔ bɔwɔlɩ egyima yɩ tʋ ndɛ nɩ nyianlɩ akatuwa ɔkʋ̃. Ɔzɔ la sʋ̃ yɛ ɩávalɩ nwʋmɔ mmɩlɩ mɔ bɛkɛva bɔkɔvɔ abiye ngɔlɔ nɩ, sɛ bobuwa yɩ ndɛnɩ kɛɛ ɩdɩ nɔhʋanlɛvʋlɔ a, ikenyia sʋlɔ akatuwa yɩ be a.

TIYE KƆKƆWƆLƐ YƖ

18-19. Mɩnla ozumalɛdɩyɛ yɛ yenyia wɔ ɛɣɛlɛ azʋlɔtʋ yɩ nu a?

¹⁸ Mɩnla yɛ yezunzu nwʋmɔ a? Wɔ ɛɣɛlɛ mɔɔ ɩfalɩ mmuwuanɩ nɩɩ nzɩkɛ nwʋ yɩ nu nɩ, yɛnwʋ kɛɛ ihyinyia kɛɛ bɛzabɛ mɔɔ bɔwɔ anyɩnlɩlazʋ kɛɛ bɔkɔwʋwa azɩlɛ yɩ zʋ daabaa nɩ, bɔkɔ zʋ bɔfʋãmɩ Gyehova nwʋ na bedi nɔhʋanlɛ wɔ nnɛ nɩɩ anwʋhyɩlɩyɛ kezile yi nu. Wɔ ɔzɔ mmɩlɩ yɩ nɩ, Gyisɛsɩ kowu bɛzabɛ mɔɔ bedi nɔhʋanlɛ nɩ kɛɛ bɛfata kɛɛ “bɔkɔhɔ nnwʋanlɩ mɔɔ íni awielɩyɛ nu.”—Mt. 25:46.

¹⁹ Akʋ̃ sʋ̃, yezunzu ɛɣɛlɛ anwɩ̃ mɔɔ ɩfa kɔkɔwɔlɛ ɩma bɛzabɛ mɔɔ bɔvɔ ngɔlɔ bɛ nɩ nwʋ. Wɔ  Gyisɛsɩ yɩ ɛɣɛlɛ mɔɔ ɩfalɩ nɣɛdɛkɛ nɣɛlɛbɛmaa nɩɩ ahwasɩya yɩ nwʋ yɩ nu nɩ, bo nu anlu lalɩ yɩ ali kɛɛ bɛdɩ nɣɛlɛbɛmaa. Nɩ beziyeziye bɔ nwʋ na bɛ anyɩ la kɛ, mɔɔ nɩ bɛdɩkɛɛ ayɩfʋlɔ ohunɛ yɩ ɩávalɩ nwʋmɔ mmɩlɩ tɩndɩnlɩ mɔ nɩ ikeli nɩ. Naasʋ̃ nɣɛdɛkɛ ahwasɩya yɩ bɛásiyeziye bɔ nwʋ. Meti ayɩfʋlɔ ohunɛ yɩ ɩáma ɔhʋanɩ bɛ ma bɔkɔ ayɩfʋlɔ yɩ tʋ. Ɩsɛ kɛɛ amɩyɛ sʋ̃ yesiyeziye yɛ nwʋ kɛɛ yɛkɛlɩkɛ, ɩávalɩ nwʋmɔ mmɩlɩ tɩndɩnlɩ mɔɔ ikeli ansaana Gyisɛsɩ ɩava oyuwadɩ nhyɩhyɛlɩyɛ eyi yɩ awielɩyɛ ɩaɣa nɩ. Akʋ̃ sʋ̃, wɔ Gyisɛsɩ yɩ ɛɣɛlɛ mɔɔ ɩfalɩ ozukua yɩ nwʋ nɩ, yɛnwʋnlɩ azʋ̃mɩvʋlɔ nɔhʋanlɛmaa anwɩ̃ be mɔɔ nɩ bɔbɔ bɔ nwʋ mmɔdɩnɩ na bɔbɔ ɛhyɩmɛ nɩ. Bɛyɛlɩ egyima ɛzɩzɩbɛ bɛva bɛbɛlɩ mfasʋ bɛmanlɩ be diibenyia na ɩmanlɩ yɩ anyɩ lelili bɔ nwʋ. Naasʋ̃, sʋ̃mɩvʋlɔ kwadwʋvʋlɔ yɩ mɛyɩ bɛáde yi betiã numɔ. Mɩnla yɛ yesuma wɔ nu a? Ɩsɛ kɛɛ yɛkɔ zʋlɔ yɛyɛ sʋ̃maa wɔ Gyehova ɔzʋ̃mɩnlɛ nu kɔbʋmɩ awielɩyɛ. Awielɩyɛ kʋlaa nɩ, yɛnwʋnlɩ kɛɛ ɩsɛ kɛɛ bɛzabɛ mɔɔ bɔvɔ ngɔlɔ bɛ nɩ kɔ zʋlɔ wɩɛnɩ na ama Gyisɛsɩ ‘ɩáva bɛ’ ɩahɔ sʋlɔ. Ɔzɔ mmenii yi, bekilaa ɔhʋanɩ ɛzɩzɩbɛ ɛzɩzɩbɛ kɛɛ ‘bokohunwahunwa bo munwa’ bɛkɛhɩnla Gyisɛsɩ nwʋ wɔ sʋlɔ. Wɔ Amagadɔnʋ kʋnɛ yɩ mɛda nɩ, ɔzɔ mmenii yi kɛɣa kɛyɛ Gyisɛsɩ yɩ ayɩfʋlɔ wɔ Owuanɩɣalɛ nɩ yɩ ayɩfʋlɔlelɛ yɩ tʋ.—2 Tɛs. 2:1; Yik. 19:9.

20. Bɛzabɛ mɔɔ betiye kɔkɔwɔlɛ yɩ nɩ, mɩnla yɛ Gyehova kɛyɛ kɛma bɛ a?

²⁰ Ɩwɔ numɔ kɛɛ ndɛnɩwuwalɛ eɣile yi ibikee ndɛndɛ dɩyɛ, naasʋ̃ íni kɛɛ yɛma ye kunlu tu. Sɛ yɛkɔ zʋ yedi nɔhʋanlɛ a, yɛ sʋlɔ Ɛzɩlɛ mɔɔ ɩwɔ ɔlɔlɛ nɩ kɛma yekenyia ‘tumi kezile mɔɔ ɩdɩ Nyamɩnlɩ yɩ dɩyɛ nɩ’ na ama “yɛahʋla yɛagyina Enii Ɣalɛ nɩ anyunu.” (2 Kɔl. 4:7; Lk. 21:36) Kɛ yɛ anyɩnlɩlazʋ yɛ lɛ kɛɛ yɛkɔhɔ sʋlɔ anzɛnyɩɩ yɛkɔwʋwa azɩlɛ yɩ zʋ nɩ, sɛ yetiye kɔkɔwɔlɛ mɔɔ ɩwɔ ɛɣɛlɛ azʋlɔtʋ mɔɔ Gyisɛsɩ wuli yi nu nɩ a, yɛkɔzɔ yɛ Zɩ yɩ anyɩ. Iluwa Gyehova yɩ nwɔkɛnwʋnlɛ sʋ̃maa ti, bɛkɛhɛlɛ yɛ “anlima wɔ nnwʋanlɩ buuku nɩ nu.”—Yik. 3:5; Da. 12:1.