1-2. Mɩnla yɛ ɩma Nyamɩnlɩ yɩ azʋ̃mɩvʋlɔ bɛ anyɩ de a? (Gyemisi 1:​22-25)

 GYEHOVA nɩɩ yɩ Dɔɣalɛ yɩ pɛ kɛɛ yɛ anyɩ de. Ndwomi 119:2 yɩ hɛlɛlɛvʋlɔ nɩ hanlɩ kɛɛ: “Anyɩnlɩlelɛ yɛ lɛ bɛzabɛ mɔɔ bedidi wʋ ɛhakɛlɛ ndwokɔ zʋ, na bɛfa bɛ ahʋnlɩnɩ munwatĩĩ bɛpɩbɛ wʋ nɩ.” Gyisɛsɩ sʋ̃ hanlɩ kɛɛ: “Nyilalɛ ɩhã mmenii mɔɔ betiye Nyamɩnlɩ odwokɔ nɩ, na bedidi ɔzʋlɔ nɩ!”—Lk. 11:28.

² Gyehova yɩ azʋ̃mɩvʋlɔ wɔ anyɩnlɩlelɛ. Mɩnla ti a? Yɛwɔ sianti sʋ̃maa, naasʋ̃ numɔ ɔkʋ̃ mɔɔ nwʋmɔ hyinyia yɛ lɛ kɛɛ yɛkɩnga Nyamɩnlɩ Odwokɔ eɣile bela na yɛbɔ mmɔdɩnɩ yɛfa mɔɔ yesuma nɩ yɛyɛ egyima.—Kɩnga Gyemisi 1:​22-25.

3. Sɛ yɛfa Nyamɩnlɩ Odwokɔ yɛyɛ egyima a, mɩnla mfasʋ yɛ yenyia a?

³ Sɛ yɛyɛ mɔɔ ‘Nyamɩnlɩ Odwokɔ nɩ ikilehile yɛ nɩ’ a, yenyia zʋlɔ mfasʋ sʋ̃maa. Kɛ ndianwʋ nɩ, sɛ yɛfa mɔɔ yesuma wɔ Nyamɩnlɩ Odwokɔ yɩ nu nɩ yɛyɛ egyima a, ɩma yɛsɔ Gyehova anyɩ, na eyi ma yɛ anyɩ de. (Odw. 12:13) Akʋ̃ sʋ̃, ɩbʋwa ma yɛ nɩɩ ye mmusunwamaa nɩɩ yɛ asafʋ yɩ nu maa nyia abusunwawɔlɛ baaba. Ebiye a ɔnwʋ yɩ zɔ wɔ wʋ ɛbɩlawɔlɛ nu. Ebiyekʋ̃ sʋ̃, ɩáma yeyiyia ɔhawʋ mɔɔ bɛzabɛ mɔɔ bɛáva Gyehova yɩ mmɛla bɛyɛ egyima nɩ yiyia nɩ be. Amba, yɛ nɩɩ Bulombunli Devidi yɛ adwɩnɩ. Mmɩlɩ mɔ ɩhanlɩ Gyehova yɩ mmɛla, yɩ ahyɛdɩ, nɩɩ yɩ ndɛnɩwuwalɛ ndwokɔ nwʋ odwokɔ wɔ yi ndwomi nu nɩ, idwulalɩ yi odwokɔ nɩ kɛɛ: “Mɔɔ ididi zʋlɔ nɩ, inyia akatuwa kezile.”—Ndw. 19:​7-11.

4. Mɩnla ti mɔɔ ɩyɛ sɩ kɛɛ yɛkɛva Nyamɩnlɩ Odwokɔ yɛkɛyɛ egyima a?

⁴ Sɛ yɛkɔhʋla kɛva mɔɔ Nyamɩnlɩ Odwokɔ kilehile yɛ nɩ kɛyɛ  egyima a, ɩsɛ kɛɛ yɛkɩnga na yesuma na ama yɛanwʋ mɔɔ Gyehova pɛ kɛɛ yɛyɛ. Naasʋ̃ nɔhʋanlɛ odwokɔ yɛ lɛ kɛɛ, ɩ́la azɩ kɛɛ yɛkɛyɛ zɔ, iluwakɛɛ yéni alagyɩ. Meti ɩsɛ kɛɛ yɛyɩ mmɩlɩ yesiye kɛ yɛfa yɛkɩnga Bayɩbʋlʋ yɩ. Bɛmá yehila adwɩnɩhilelɛ azʋlɔtʋ be mɔɔ ɩkɔwʋwa yɛ ma yɛkɛɣɩnga Bayɩbʋlʋ yɩ eɣile bela. Akʋ̃ sʋ̃, yekehila mɔɔ ɩkɔwʋwa yɛ ma yɛkɔdwɩnɩndwɩnɩ mɔɔ yɛkɩnga nɩ nwʋ na yɛahila kezimɔ yɛkɛva kɛyɛ egyima wɔ yɛ ɛbɩlawɔlɛ nu.

YƖ́ MMƖLƖ SIYE KƐ FA KƖNGA BAYƖBƲLƲ YƖ

5. Mɩnla asɛdɩ azʋlɔtʋ yɛ ide yɛ mmɩlɩ sʋ̃maa a?

⁵ Gyehova yi mmenii bo nu sʋ̃maa béni alagyɩ. Yɛfa yɛ mmɩlɩ sʋ̃maa yedi nninyeni mɔɔ Bayɩbʋlʋ yɩ kã kɛɛ nwʋmɔ hyinyia nɩ nwʋ egyima. Kɛ ndianwʋ nɩ, ye nu sʋ̃maa yɛyɛ nnwʋnlamɩ ɔfʋã nu egyima yɛfa yekila yɛ nwʋ nɩɩ ye mmusunwa. (1 Tim. 5:8) Ye nu be kila ye mmusunwamaa mɔɔ bɛ alʋbɔ hɔ anyunumi anzɛnyɩɩ bɔ nwʋ ba bɛ nɩ. Na ɩsɛ kɛɛ ye munwala yekila yɛ pɔkɔdɩlɛ bʋwɔ, na mɛyɩ sʋ̃ de yɛ mmɩlɩ. Eyimmɔ munwala la ahanlɩ a, abiyela wɔ egyima mɔɔ idi wɔ asafʋ yɩ nu. Numɔ ɔkʋ̃ mɔɔ ihyinyia paa yɛ lɛ kɛɛ yɛkɛva yɛ nwʋ yekowula dasɩlɛlilɛ egyima yɩ nu. Egyima sʋ̃maa mɔɔ igua wʋ zʋ munwatĩĩ mɛda nɩ, kɛ ɩkɛyɛ na wʋanyia mmɩlɩ wʋaɣɩnga Bayɩbʋlʋ yɩ eɣile bela, wʋadwɩnɩndwɩnɩ nwʋmɔ na wʋava wʋayɛ egyima a?

6. Kɛ ɩkɛyɛ na wʋama Bayɩbʋlʋ ɛɣɩngalɛ nwʋ iahyinyia wʋ a? (Kila mfonyini yi sʋ̃.)

⁶ Kɛ Kilisinyiamaa nɩ, nninyeni “mɔɔ ɩdɩ baaba anzɛnyɩɩ nwʋmɔ hyinyia paa” ma yɛ nɩ, numɔ ɔkʋ̃ yɛ lɛ Bayɩbʋlʋ ɛɣɩngalɛ, meti ɩsɛ kɛɛ yekila kɛɛ yɛkɛyɛ. (Fɩl. 1:10) Ndwomi mɔɔ ili bɔmʋnlɩ nɩ kã enii mɔɔ ɩwɔ anyɩnlɩlelɛ nwʋ odwokɔ kɛɛ: “Yɩ anyɩ ideli Gyehova yɩ mmɛla nɩ nwʋ, na ɩkɩnga yɩ mmɛla nɩ ɩdwɩnɩndwɩnɩ nwʋmɔ awulohyɩnlɩyɛ nɩɩ awulodwolɩyɛ.” (Ndw. 1:​1, 2) Eyi kile kɛɛ, ɩsɛ kɛɛ yɛyɩ mmɩlɩ yesiye kɛ yɛfa yɛkɩnga Bayɩbʋlʋ yɩ. Mɩnla mmɩlɩ yɛ ɩdɩ baaba paa kɛɛ yɛkɛɣɩnga Bayɩbʋlʋ yɩ a? Ɩsʋnɩ mmɩlɩ mɔ ɩdɩ baaba ɩma abiyela. Naasʋ̃ ɩsɛ kɛɛ ɛfa wula mmɩlɩ mɔ ɩkɛma ɔkɔhʋla kɛɣɩnga yɩ eɣile bela. Eliyema  benyia be mɔɔ bɔfʋlɔ yɩ Victor kã kɛɛ: “Mɩ anyɩ deli nwʋmɔ kɛɛ mɩkɛyɛ mɩ Bayɩbʋlʋ ɛɣɩngalɛ nwɔnɩ. Ɩwɔ numɔ kɛɛ mɩáda mutunwo ndɛ dɩyɛ, naasʋ̃ mɩyɛ yɩ ndwɩ kɛɛ itwu nwɔnɩ a, nninyeni ɩáhwɩhwɩ̃ mɩ adwɩnɩ sʋ̃maa. Na mʋkʋla mɩfa mɩ adwɩnɩ misiye mɔɔ musuma nɩ zʋ bʋwɔ.” Asʋ̃ ɔzɔ la yɛ ɩdɩ wɔ wʋzawʋ sʋ̃ wʋ ɔfʋã nu a? Bizia wʋ nwʋ kɛɛ, ‘Mɩnla mmɩlɩ yɛ ɩdɩ baaba ɩma mɩ kɛɛ mɩkɛɣɩnga Bayɩbʋlʋ yɩ a?’

DWƖNƖNDWƖNƖ MƆƆ ƐKƖNGA NƖ NWƲ

7-8. Mɩnla yɛ ebiye a ɩlɛ́ma yekenyia yɛ Bayɩbʋlʋ ɛɣɩngalɛ zʋ mfasʋ kezile a? Ma nwʋmɔ ndianwʋ.

⁷ Ebiye a yɛta yɛkɩnga nninyeni sʋ̃maa, naasʋ̃ ɩáhalɩ ye ti nu. Asʋ̃ ɛɣɩnga debe ma mɛyɩ mɛda mmɩlɩ ɛgyɩkɩ̃ɩ̃ be nɩ, nɩ wʋáhakɛ mɔɔ ɛɣɩnganlɩ nɩ a? Ebiye dʋ ye munwala kyɩ̃. Alɔbɔ odwokɔ yɛ lɛ kɛɛ, eyi kɔhʋla kezi wɔ yɛ Bayɩbʋlʋ ɛɣɩngalɛ nu. Ebiye a, yɛva yɛyɛ yɛ bʋtayɩ kɛɛ yɛkɛɣɩnga adile dʋdʋ be eɣile bela. Ɩdɩ bʋtayɩ baaba paa. Ɩsɛ kɛɛ yɛfa bʋtayɩ azʋlɔtʋ yesiye yɛ anyɩ zʋ na yɛbɔ mmɔdɩnɩ kɛɛ yekodwu nwʋmɔ. (1 Kɔl. 9:26) Naasʋ̃ sɛ yɛpɛ kɛɛ yenyia Bayɩbʋlʋ yɩ zʋ mfasʋ sʋ̃maa a, íni kɛɛ yɛkɩnga yɩ kɛkɛ.

⁸ Mɔwʋ kila ndindianwʋ eyi: Sɛ nzulo twu a, ɩma nnuwalɩba yɛ bʋwɔ paa. Naasʋ̃ sɛ nzulo twu sʋ̃maa wɔ mmɩlɩ sikalɛ be nu a, sa ɩta azɩlɛ yɩ anyɩ. Sɛ ɩba yɩ zɔ a, nzulo yi ɩlɛ́mɩmɩ kɔhɔ azɩlɛ yɩ nu, na nnuwalɩba yɩ lényia zʋlɔ mfasʋ. Meti ɩdɩ baaba kɛɛ nzulo yi kodwu ngyɩkɩ̃ɩ̃ ngyɩkɩ̃ɩ̃, iluwakɛɛ mɛyɩ yɛ ɩkɛma ɩkɔhɔ azɩlɛ yɩ nu na nnuwalɩba yɩ bɛanyia zʋlɔ mfasʋ a. Ɔzɔ la yɛ íni kɛɛ yɛfa yɛ Bayɩbʋlʋ ɛɣɩngalɛ yetu tɔlɔnwa a. Eyi kɛma yekenyia mmɩlɩ yɛkɔdwɩnɩndwɩnɩ mɔɔ yɛɣɩnganlɩ nɩ nwʋ, yɛahakɛ na yɛava yɛayɛ egyima.—Gye. 1:24.

9. Sɛ yɛyɛ yɩ ndwɩ kɛɛ yɛfa yɛ Bayɩbʋlʋ ɛɣɩngalɛ yetu tɔlɔnwa a, mɩnla yɛ ɩsɛ kɛɛ yɛyɛ a?

⁹ Asʋ̃ ɛyɛ yɩ ndwɩ kɛɛ ɩyɛ a, ɛfa wʋ Bayɩbʋlʋ ɛɣɩngalɛ tu tɔlɔnwa a? Sɛ ɔzɔ a, mɩnla yɛ ɩsɛ kɛɛ ɛyɛ a? Dɩdagyɩ. Sɛ ɛkɩngaa a, dɩdagyɩ na wʋahʋla wʋadwɩnɩndwɩnɩ mɔɔ ɛkɩngaa nɩ nwʋ, anzɛnyɩɩ sɛ ɛkɩnga owie yi a, de mmɩlɩ fa dwɩnɩndwɩnɩ nwʋmɔ. Eyi ɩyɛlɛ ɩáyɛ sɩ. Mmɩlɩ mɔ ɛfa osuma dɩyɛ nɩ, sa ɔkʋla fa ebiye kɩnla nwʋmɔ na ama wʋahʋla wʋadwɩnɩndwɩnɩ mɔɔ  ozuma nɩ nwʋ. Anzɛnyɩɩ sɛ ɛpɛ sʋ̃ a, sa ɔkʋla kɩnga nkyɩkyɛmi ɛgyɩkɩ̃ɩ̃ be na wʋava mmɩlɩ mɔ ɩha nɩ wʋadwɩnɩndwɩnɩ nwʋmɔ. Victor mɔɔ yɛhã yɩ nwʋ odwokɔ daada nɩ hanlɩ kɛɛ, “Mɩáma mɩ Bayɩbʋlʋ ɛɣɩngalɛ yɩ yɛ tɩndɩnlɩ, ɩyɛ a mɩkɩnga nkyɩkyɛmi ɔkʋ̃ pɛ. Na iluwakɛɛ mɩkɩnga yɩ nwɔnɩ dɛkɛdɛkɛ nɩ ti, ɩma mʋkʋla mʋdwɩnɩndwɩnɩ mɔɔ muzuma yɩ nwʋ wɔ ɔzɔ eɣile yi munwala.” Ɩávalɩ nwʋmɔ kezimɔ ɛkɛyɛ yɩ bela nɩ, ihyinyia kɛɛ ɛkɩnga yɩ wɔ ɔhʋanɩ be zʋ mɔɔ ɩkɛma ekenyia zʋlɔ mfasʋ sʋ̃maa.—Ndw. 119:97; kila alɩka mɔɔ ise “ Ndwokɔɣizialɛ Mɔɔ Ɔkɔhʋla Kozunzu Nwʋmɔ.”

10. Kɛ ɩkɛyɛ na wʋahʋla wʋava mɔɔ osumaa nɩ wʋayɛ egyima a? (1 Tɛsalonikamaa 5:​17, 18)

¹⁰ Ɩávalɩ nwʋmɔ mmɩlɩ mɔ ɛfa yɛ wʋ Bayɩbʋlʋ ɛɣɩngalɛ nɩɩ mmɩlɩ dʋdʋ mɔ ɛfa yɛ nɩ, bɔ mmɔdɩnɩ kɛɛ ɔkɔnwʋ kezimɔ ɛkɛva mɔɔ ozuma nɩ kɛyɛ egyima. Mmɩlɩ mɔ ɔdwɩnɩndwɩnɩɩ Bayɩbʋlʋ yɩ ɔfʋã be mɔɔ ɛɣɩnga yɩ nwʋ nɩ, bizia wʋ nwʋ kɛɛ, ‘Kɛ ɩkɛyɛ na mɩava odwokɔ eyi mɩayɛ egyima kakɩ yɩ anzɛnyɩɩ eɣile be a?’ Kɛ ndianwʋ nɩ, fa yɩ kɛɛ 1 Tɛsalonikamaa 5:​17, 18 kɩnla wʋ Bayɩbʋlʋ ɛɣɩnga yɩ nwʋ. (Kɩnga.) Sɛ ɛkɩnga nkyɩkyɛmi anwɩ̃ eyimmɔ owie yi a, sa ɔkʋla kyina na wʋaɣizia wʋ nwʋ kɛɛ, ‘mbɔmɩ dʋdʋ ana yɛ mʋzʋ̃ mɩ ahʋnlɩnɩ munwala nu mʋbɔ mpayɩ a?’ Akʋ̃ sʋ̃, sa ɔkʋla dwɩnɩndwɩnɩ nninyeni mɔɔ ɛpɛ kɛɛ ekile nwʋmɔ anyɩnlɩzɔlɛ nɩ nwʋ. Ebiye a, ɛkɛbɛ yɩ kɛɛ ɛkɛla Gyehova asɩ wɔ nninyeni asã pɔkyɩ̃ɩ̃ be nwʋ. Sɛ ede mmɩlɩ ɛgyɩkɩ̃ɩ̃ po fa dwɩnɩndwɩnɩ mɔɔ osuma nɩ nwʋ a, ɩkɔwʋwa wʋ ma ɛkɛdɩ Nyamɩnlɩ Odwokɔ yɩ tʋ na wʋayɛ mɔɔ ɩkã nɩ sʋ̃. Sɛ ɛyɛ zɔ eɣile bela a, kila kezimɔ ekenyia zʋlɔ mfasʋ! Amba, ɛkɛɣa kɛyɛ Gyehova yɩ sʋ̃mɩvʋlɔ mɔɔ yɩ nwʋ wʋkwa. Na sɛ ɛba ɔnwʋ yɩ kɛɛ nninyeni sʋ̃maa wɔ kɛnɩ mɔɔ ɩsɛ kɛɛ otu mpʋnɩ wɔ numɔ sʋ̃ ɛ, mɩnla yɛ ɩsɛ kɛɛ ɛyɛ a?

FA BƲTAYƖ MƆƆ ƆKƆHƲLA KODWU NWƲMƆ SIYE WƲ ANYƖ ZƲ

11. Mɩnla ti mɔɔ ɩyɛ a, yɛ adwɩnɩ kɔhʋla kodu kɔvʋla a? Ma nwʋmɔ ndianwʋ.

¹¹ Sɛ ɛkɩnga Bayɩbʋlʋ yɩ na ɔnwʋ yɩ kɛɛ nninyeni sʋ̃maa wɔ kɛnɩ mɔɔ ɩsɛ kɛɛ otu mpʋnɩ wɔ numɔ a, sa ɩkʋla ɩma wʋ adwɩnɩ tu fʋla. Mɔwʋ dwɩnɩ eyi nwʋ kila: Fa yɩ kɛɛ, nnɛ wʋ Bayɩbʋlʋ ɛɣɩngalɛ nɩ kã kɛɛ íni kɛɛ yebu mmenii be yɛtɛla abiyemmɔ. (Gye. 2:​1-8) Na ɛɣa ɔnwʋ yɩ kɛɛ ɩsɛ kɛɛ otu mpʋnɩ wɔ kezimɔ ɛ nɩɩ mmenii di nɩ nu, meti ezi pɔkɔ kɛɛ ɛkɛyɛ nzɩnzanlɩyɛ. Ɛyɛ dɩyɛ paa! Eɣile mɔɔ ili kɛnɩ nɩ, ɛɣɩnganlɩ nkyɩkyɛmi fʋlɔ mɔɔ ɩmanlɩ ɔnwʋnlɩ yɩ kɛɛ ɩsɛ kɛɛ yekila yɛ munwa ndɛnɩ bʋwɔ. (Gye. 3:​1-12) Ɛɣa nwʋnlɩ kɛɛ ɩyɛ a wu munwa ndɛnɩ ɩáhyɛ ɛzɩzɩbɛ. Meti ezili pɔkɔ kɛɛ ɛkɛma wu munwa ndɛnɩ kɛyɛ fɛ na ɩahyɛ ɛzɩzɩbɛ. Eɣile mɔɔ ili kɛnɩ yɩ sʋ̃, wʋ Bayɩbʋlʋ ɛɣɩngalɛ yɩ wɔlɩ wʋ kɔkɔ wɔ oyuwadɩ ɔhɔnwʋvalɛ nwʋ. (Gye. 4:​4-12) Ɩmanlɩ ɔnwʋnlɩ  kɛɛ, nninyeni mɔɔ ɛfa dide wʋ anyɩ nɩ, ihyinyia kɛɛ ɛpa numɔ. Ebiye a ikodwu eɣile mɔɔ ɩtɔ zʋlɔ anla nɩ, nɩ wʋ adwɩnɩ munwala du vʋla iluwa nninyeni sʋ̃maa mɔɔ ɛɣa nwʋ kɛɛ ɩsɛ kɛɛ otu mpʋnɩ wɔ numɔ nɩ ti.

12. Sɛ wʋ Bayɩbʋlʋ ɛɣɩngalɛ ma ɔnwʋ yɩ kɛɛ ihyinyia kɛɛ ɛyɛ nzɩnzanlɩyɛ azʋlɔtʋ be a, mɩnla ti mɔɔ íni kɛɛ ɛma wu padi kolɔ a? (Kila azɩkɛnɩ odwokɔ yɩ sʋ̃.)

¹² Sɛ ɛba ɔnwʋ yɩ kɛɛ nwʋmɔ hyinyia kɛɛ ɛyɛ nzɩnzanlɩyɛ azʋlɔtʋ anzɛnyɩɩ otu mpʋnɩ wɔ nninyeni sʋ̃maa nu a, áma wu padi kolɔ. Eyi dɩ dasɩlɛ mɔɔ ikile kɛɛ ɔwɔ ahʋnlɩnɩba. Enii mɔɔ ɩkã yɩ nwʋ azɩ nɩ sɛ ɩkɩngaa Bayɩbʋlʋ yɩ a, ɩpɩbɛ kezimɔ ɩkɔwʋwa yɩzayɩ ma ikodu mpʋnɩ. a Kakɛ kɛɛ, sɛ ekenyia “subanɩ fʋlɔ” yɩ a, ɩsɛ kɛɛ ɔkɔ zʋlɔ ɛyɛ nwʋmɔ egyima. (Kol. 3:10) Mɩnla yɛ ɩkɔwʋwa wʋ ma ɔkɔhɔ zʋ kɛva Nyamɩnlɩ Odwokɔ yɩ kɛyɛ egyima a?

13. Mɩnla ɔhʋanɩ zʋ yɛ ɔkɔhʋla kɛva mɔɔ osuma nɩ kɛyɛ egyima a? (Kila mfonyini yi sʋ̃.)

¹³ Kɛ ankɩ ɔkɔwɔ mmɔdɩnɩ kɛɛ ɛkɛva nninyeni mɔɔ ozuma nɩ munwatĩĩ ɛkɛyɛ egyima wɔ kɛnɩ la nɩ, fa mɔɔ ɔkɔhʋla kodwu nwʋmɔ siye wʋ anyɩ zʋ. (Ɛɣɛ. 11:2) Sa ɔkʋla twe eyi kila: Kɛlɛ subanɩ mɔɔ ɩsɛ kɛɛ ɛyɛ nwʋmɔ egyima nɩ munwala kua kɛ, na akʋ̃ di bɔmʋnlɩ fa ɔkʋ̃ anzɛnyɩɩ anwɩ̃ be siye wʋ anyɩ zʋ na yɛ nwʋmɔ egyima. Aɣinzi yi, nɩ eli mɔɔ ɩha nɩ sʋ̃ nwʋ egyima. Numɔ ɛhɩnla dɩyɛ yɛ ɩsɛ kɛɛ edi bɔmʋnlɩ yɛ nwʋmɔ egyima a?

14. Bʋtayɩ ɛhɩnla dɩyɛ yɛ sa ɔkʋla bɔ yɩ tʋ yɛ nwʋmɔ egyima a?

¹⁴ Ebiye a, sa ɔkʋla bɔ yɩ tʋ wɔ dɩyɛ mɔɔ ɩyɛ mɛlɛkɛ kɛɛ ɛkɛyɛ nwʋmɔ egyima nɩ zʋ. Anzɛnyɩɩ sa ɔkʋla bɔ yɩ tʋ wɔ ɔfʋã mɔɔ ekila a, ihyinyia kɛɛ otu mpʋnɩ wɔ numɔ paa nɩ zʋ. Sɛ enyia nwʋ subanɩ anzɛnyɩɩ dɩyɛ fʋlɔ be mɔɔ ɩsɛ kɛɛ ɛyɛ nwʋmɔ egyima a, fa yɛ awuuku  azʋlɔtʋ yɩ yɛ nwʋmɔ ɛbɩbɛlɛnu. Sa ɔkʋla fa Watch Tower Publications Index anzɛnyɩɩ Buuku Mɔɔ Gyehova Dasɩvʋlɔmaa Bɛfa Bɛyɛ Ɛbɩbɛlɛnu nɩ ɛyɛ zɔ. Bɔ mpayɩ siã Gyehova kɛɛ ‘ɩmá ɔhʋla ɛyɛ nninyeni’ mɔɔ ɛva ziye wʋ anyɩ zʋ nɩ. (Fɩl. 2:13) Akʋ̃ fa mɔɔ ozuma nɩ yɛ egyima. Sɛ ɔkʋla twu wʋ bʋtayɩ mɔɔ ili bɔmʋnlɩ nɩ nwʋ a, ɩkɛhyɛ wʋ ɛzɩzɩbɛ ma ekeli fʋlɔ sʋ̃ nwʋ egyima. Nɔhʋanlɛ nu nɩ, sɛ otu mpʋnɩ wɔ Kilisinyianɩ subanɩ ɔkʋ̃ nu a, ebiye a ɩkɛyɛ mɛlɛkɛ kɛɛ okodu mpʋnɩ wɔ subanɩ mvʋlɔ sʋ̃ nu.

MA NYAMƖNLƖ ODWOKƆ YƖ ‘ƖYƐ́ EGYIMA WƆ WU NU’

15. Mmenii sʋ̃maa kɩnga Bayɩbʋlʋ yɩ, naasʋ̃ mɩnla ɔhʋanɩ zʋ yɛ Gyehova yi mmenii bɛdɩ sʋnʋnkʋ̃ wɔ bɔ nwʋ a? (1 Tɛsalonikamaa 2:13)

¹⁵ Abiyemmɔ kã kɛɛ, bɛɣɩnga Bayɩbʋlʋ yɩ mbɔmɩ sʋ̃maa. Naasʋ̃ mɔɔ Bayɩbʋlʋ yɩ kã nɩ, asʋ̃ bede bedi ankasa a? Asʋ̃ bɛfa mɔɔ ɩkã nɩ bɛyɛ egyima na bɛma ɔhʋanɩ ma ɩzɩnza bɛ ɛbɩlawɔlɛ a? Alɔbɔ odwokɔ yɛ lɛ kɛɛ, bo nu sʋ̃maa bɛáva Bayɩbʋlʋ yɩ bɛyɛ egyima. Naasʋ̃ Gyehova yi mmenii mɛyɩ, bɛdɩ sʋnʋnkʋ̃! Dɩkɛɛ ɔwɔkɩ Kilisinyiamaa yɩ nɩ, yede yedi kɛɛ Bayɩbʋlʋ yɩ “ɩzʋ̃ Nyamɩnlɩ yɩ kɛnɩ, na ɩdɩ ɔzɔ sʋ̃.” Akʋ̃ sʋ̃, yɛbɔ mmɔdɩnɩ kɛɛ yɛkɛva numɔ fʋlɔdulɛ yɩ yɛkɛyɛ egyima wɔ yɛ ɛbɩlawɔlɛ nu.—Kɩnga 1 Tɛsalonikamaa 2:13.

16. Mɩnla yɛ ɩkɔwʋwa yɛ ma yɛkɛyɛ mɔɔ Nyamɩnlɩ Odwokɔ nɩ ikehile yɛ nɩ a?

¹⁶ Kɛ mmɩlɩ munwala yɛ ɩyɛ mɛlɛkɛ kɛɛ yɛkɛɣɩnga Nyamɩnlɩ Odwokɔ yɩ na yɛava yɛayɛ egyima a. Ɩyɛ a, sa ɩkʋla ɩyɛ sɩ kɛɛ yekele mmɩlɩ yɛkɛɣɩnga. Anzɛnyɩɩ ebiye a yɛkɔnwʋ yɩ nɩ, nɩ yɛlɛ ɛɣɩngalɛ yɩ yetuu tɔlɔnwa, mɔɔ yɛádwɩnɩndwɩnɩ mɔɔ yɛkɩnga nɩ nwʋ. Anzɛnyɩɩ sɛ yɛnwʋ nzɩnzanlɩyɛ sʋ̃maa mɔɔ ɩsɛ kɛɛ yɛyɛ nɩɩ nninyeni mɔɔ ɩsɛ kɛɛ yetu mpʋnɩ wɔ numɔ a, sa ɩkʋla ɩma yɛ adwɩnɩ tu fʋla. Ɩávalɩ nwʋmɔ ndwokɔzɩzɩbɛ kʋ̃ mɔɔ ɛlɛ yɩ wɔ eyi nwʋ nɩ, anyɩnlɩlazʋ wɔ kɛnɩ. Gyehova kɔwʋwa wʋ ma ekeli nwʋmɔ egyima. Bɛmá yezi yɛ kɛnɣa kɛɛ yekele yɩ mmʋwalɩyɛ yekediã nu na yɛaɣa yɛayɛ mmenii mɔɔ yɛádiye yi Odwokɔ nɩ mbʋanlɩ la ma yɛ ɛɣɛɛlɛ fi, na mfomi yɛyɛ mɔɔ ɩkã nɩ. Pɩlazunɛ bela íni nwʋmɔ kɛɛ, mbɔmɩ sʋ̃maa mɔɔ yɛkɩnga Nyamɩnlɩ Odwokɔ yɩ na yɛfa yɛyɛ egyima wɔ yɛ ɛbɩlawɔlɛ nu nɩ, ɩkɛma yekenyia anyɩnlɩlelɛ sʋ̃maa.—Gye. 1:25.