1-2. Mɩnla ti mɔɔ Gyehova wɔlɩ yɛ wɔ ɔhʋanɩ be zʋ mɔɔ ɩma yenyia anyɩnlɩlelɛ sʋ̃maa wɔ ɛmanlɛ nu yɛtɛla elelɛ a?

 SƐ YƐKYƐ dɩyɛ a, ɩma yɛ anyɩ de paa tɛla kɛɛ bɛkɛhyɛ dɩyɛ yɛ. Ɔzɔ yɛ Gyehova wɔlɩ yɛ a. (Egy. 20:35) Asʋ̃ eyi kile kɛɛ sɛ bɛkyɛ dɩyɛ yɛ a, yɛ anyɩ iále kʋlaa a? Ɩ́dɩ zɔ. Ye munwatĩĩ bɛkyɛ dɩyɛ yɛ a, yɛ anyɩ de. Naasʋ̃ sɛ amɩyɛzayɛ yɛkyɛ dɩyɛ a, yɛ anyɩ de baaba paa. Na ɩdɩ baaba paa kɛɛ Gyehova wɔlɩ yɛ zɔ. Mɩnla ti a?

² Iluwakɛɛ Gyehova wɔlɩ yɛ zɔ nɩ ti, yɛzayɛ ankasa yɛkɔhʋla yɛkɛma yɛ anyɩnlɩlelɛ kɛyɛ kezi. Sɛ yɛpɩbɛ ahʋanɩ azʋlɔtʋ mɔɔ yekoluwa zʋlɔ kɛhyɛ dɩyɛ na yɛyɛ zɔ a, ɩkɛma yɛ anyɩ kele. Asʋ̃ ɩáyɛ nnwʋánlɩ kɛɛ Gyehova wɔlɩ yɛ zɔ a?—Ndw. 139:14.

3. Mɩnla ti mɔɔ yɛkʋla yɛkã kɛɛ Gyehova dɩ “anyɩnlɩlelɛ Nyamɩnlɩ nɩ” a?

³ Ɛhɛlɛlɛdwokɔ yɩ ma yɛnwʋ kɛɛ sɛ yɛkyɛ dɩyɛ a, ɩkɛma yekenyia anyɩnlɩlelɛ sʋ̃maa, meti ɩáyɛ nnwʋánlɩ kɛɛ Bayɩbʋlʋ yɩ kã Gyehova nwʋ odwokɔ kɛɛ ɩdɩ “anyɩnlɩlelɛ Nyamɩnlɩ nɩ.” (1 Tim. 1:​11, NWT) Gyehova yɛ ilili bɔmʋnlɩ ɩhyɛlɩ dɩyɛ a, na abiyela íni kɛnɩ mɔɔ ɩkyɛ dɩyɛ ɩtɛla yɩ. Kɛmɔ Pɔɔlʋ hanlɩ nɩ, iluwa mɛyɩ ti yɛ “yɛda azɩ na yɛkɔ yɛba a.” (Egy. 17:28) Nɔhʋanlɛ nu nɩ, “dɩyɛ baaba bela nɩɩ ɛhyɛlɛdɩyɛ baaba mɔɔ idi munli” nɩ ɩzʋ̃ Gyehova kɛ.—Gye. 1:17.

4. Mɩnla yɛ ɩkɔwʋwa yɛ ma yekenyia anyɩnlɩlelɛ sʋ̃maa a?

⁴ Ebiye a ye munwatĩĩ yɛkɛbɛ kɛɛ yekenyia anyɩnlɩlelɛ mɔɔ ɩzʋ̃ ɛmanlɛ nu ɩba nɩ be. Sɛ yesumazuma Gyehova yi kunlumiba yɩ a, sa yɛkʋla yenyia ɔzɔ anyɩnlɩlelɛ yɩ be. (Ɛfɩ. 5:1) Wɔ dɩyɛzumanlɛ eyi nu nɩ, yekozunzu ndianwʋ kɩnlɩma mɔɔ Gyehova ɩyɛ ɩma yɛ wɔ ɛmanlɛ nu nɩ nwʋ, na yɛahila mɔɔ yɛkɔhʋla yɛkɛyɛ mmɩlɩ mɔ yɛtɩ nɣanlɩ kɛɛ mmenii iáhile anyɩnlɩzɔlɛ wɔ mɔɔ yɛyɛ yɛma bɛ nɩ nwʋ nɩ. Eyi kɔwʋwa yɛ ma yɛkɔhɔ zʋ kɛhyɛ dɩyɛ na ama yɛ anyɩnlɩlelɛ ɩayɛ kezi.

 SUMAZUMA GYEHOVA YƖ BAABAYƐLƐ

5. Mɩnla nnwʋnlamɩ ɔfʋã nu nninyeni yɛ Gyehova fa ma yɛ a?

⁵ Mɩnla nninyeni yɛ Gyehova ɩzʋ̃ yɩ pɛ nu ɩfa ɩma yɛ a? Bɛmá yehila ndianwʋ azʋlɔtʋ be. Gyehova ɩfa nnwʋnlamɩ ɔfʋã nu nninyeni ɩma yɛ. Ebiye a Gyehova lɛ́ma yekenyia yɛ nwʋ, naasʋ̃ ikila kɛɛ yekenyia mɔɔ yehyinyia mmɩlɩ munwala. Kɛ ndianwʋ nɩ, ɩma yenyia alɩyɛ, ntalɩ nɩɩ dɩka mɔɔ yɛkɛva ye ti yekediã. (Ndw. 4:8; Mt. 6:​31-33; 1 Tim. 6:​6-8) Asʋ̃ iluwakɛɛ ɩdɩ Gyehova yɩ asɛdɩ kɛɛ ikila yɛ nɩ ti yɛ ɩfa ɔzɔ nninyeni yi ɩma yɛ a? Ɩ́dɩ zɔ kʋlaa! Mɛyɩ nɩ mɩnla ti mɔɔ Gyehova ɩyɛ zɔ ɩma yɛ a?

6. Mɩnla yɛ yesuma wɔ Matiyu 6:​25, 26 yɩ nu a?

⁶ Sɛ yetuaa yɩ sini a, Gyehova fa yɛ nnwʋnlamɩ ɔfʋã nu ahyinyiadɩ ma yɛ iluwakɛɛ ɩdɔ yɛ. Mɔwʋ sunzu Gyisɛsɩ yi ndwokɔ mɔɔ ɩwɔ Matiyu 6:​25, 26 nɩ nwʋ kila. (Kɩnga.) Gyisɛsɩ valɩ abɔdɩ yɛlɩ eyi nwʋ ndianwʋ. Mmɩlɩ mɔ ɩkãã nnʋma nwʋ odwokɔ nɩ, ɩhanlɩ kɛɛ: “Bɛálɔ, bɛáluwa, na bɛawu bɛagua apa zʋ.” Naasʋ̃ kila mɔɔ ɩhanlɩ ɩzɔlɩ zʋlɔ: “Bɛ Zɩ mɔɔ ɩwɔ sʋlɔ nɩ ɩma alɩyɛ bɛ.” Akʋ̃ Gyisɛsɩ ɣizialɩ kɛɛ: “Asʋ̃ mʋnlʋmmɔ bɛázʋmɩ bʋlɔ sʋ̃maa bɛtɛla nnʋma a?” Mɩnla yɛ eyi ɩma yɛnwʋ yɩ a? Gyehova bu yɩ azʋ̃mɩvʋlɔ kɛɛ bɔtʋ bʋlɔ bɛtɛla nnamɩ kʋlaa. Sɛ Gyehova kila nnamɩ a, amɩyɛ sʋ̃ sa yɛkʋla yenyia anwʋlazʋ kɛɛ ikehila yɛ! Dɩkɛɛ ɛzɩlɛ mɔɔ ɩdwɩnɩ yɩ abusunwa nwʋ nɩ, Gyehova zʋ̃ ɔlɔlɛ nu fa mmenii mɔɔ bɔwɔ yɩ abusunwa yɩ nu nɩ bɛ ahyinyiadɩ ɩma bɛ.—Ndw. 145:16; Mt. 6:32.

7. Mɩnla ɔhʋanɩ ɔkʋ̃ yɛ yɛkɔhʋla koluwa zʋ kozumazuma Gyehova yɩ baabayɛlɛ a? (Kila mfonyini yi sʋ̃.)

⁷ Dɩkɛɛ Gyehova nɩ, amɩyɛ sʋ̃ sa yɛkʋla yɛzʋ̃ ɔlɔlɛ nu yɛfa mmenii mvʋlɔ bɔ nnwʋnlamɩ ɔfʋã nu ahyinyiadɩ yɛma bɛ. Kɛ ndianwʋ nɩ, asʋ̃ ezi eliyema be mɔɔ ihyinyia alɩyɛ nɩɩ ntalɩ a? Sa Gyehova kʋla duwa wʋ zʋ fa ɔzɔ eliyema nɩ yɩ ahyinyiadɩ ma yɩ. Bezi Gyehova yi mmenii kɛɛ bɛda kunlumiba ali titili mmɩlɩ mɔ asianɩ be zi nɩ. Kɛ ndianwʋ nɩ, wɔ COVID-19 adimakɛlɛ mmɩlɩ yɩ nu nɩ, mmeliyema mmenyia nɩɩ mmaalɛ hyɛlɩ alɩyɛ, ntalɩ nɩɩ nninyeni mvʋlɔ manlɩ bɛzabɛ mɔɔ nɩ behyinyia mmʋwalɩyɛ nɩ. Mmeliyema sʋ̃maa sʋ̃ yɩlɩ fʋtʋlɔ va wʋwalɩ oyuwadɩ munwala ɔzʋ̃mɩnlɛ egyima yɩ. Eyi manlɩ benyianlɩ ozukua bɔwʋwalɩ mmeliyema mɔɔ bɔwɔ oyuwadɩ munwala mɔɔ asianɩ dʋ bɛ nɩ. Bɛvalɩ odwokɔ mɔɔ ɩwɔ Hibulumaa 13:16 nɩ bɛyɛlɩ egyima. Ɛkɛnɩ se: “Máma mʋnlʋmmɔ bɛ ɛɣɛɛlɛ ifi kɛɛ bɛkɛyɛ baaba, na bɔkɔwʋwa bɔ nwʋ nkʋ̃kʋ̃ nkʋ̃kʋ̃. Sianti yɛ lɛ kɛɛ, eyi yɛ ɩdɩ afɔlɩwɔlɛ mɔɔ ɩsɔ Nyamɩnlɩ yɩ anyɩ a.”

8. Mɩnla ɔhʋanɩ zʋ yɛ yenyia Gyehova yi tumi zʋ mfasʋ a? (Fɩlɩpɩmaa 2:13)

 ⁸ Gyehova fa yi tumi bʋwa yɛ. Gyehova anyɩ deli nwʋmɔ kɛɛ ɩkɛva yi tumi mɔɔ íni awielɩyɛ nɩ be kɔwʋwa yɩ azʋ̃mɩvʋlɔ nɔhʋanlɛmaa. (Kɩnga Fɩlɩpɩmaa 2:13.) Asʋ̃ ɔwɔ mpayɩ kɛɛ Gyehova ɩma anwʋzɩzɩbɛ wʋ ma ɛva egyina odwohilalɛ be munwa anzɛnyɩɩ ɩma tumi wʋ ma ɛva gyina ndwokɔzɩzɩbɛ be munwa kyɩ̃ a? Ebiye a ɔwɔ mpayɩ sʋ̃ kɛɛ ɩwʋwá wʋ ma enyia anwʋzɩzɩbɛ ɛva ɛyɛ nninyeni mɔɔ ɩsɛ kɛɛ ɛyɛ wɔ eɣile yi nu nɩ. Mmɩlɩ mɔ enyianlɩ wʋ mpayɩwɔlɛ yɩ nwʋ munwalɩyɛ na enyianlɩ anwʋzɩzɩbɛ nɩ, ɛ nɩɩ sʋ̃mavʋlɔ Pɔɔlʋ yɛlɩ adwɩnɩ kɛɛ: “Dɩyɛ munwala nu nɩ, mʋwɔ anwʋzɩzɩbɛ iluwa enii mɔɔ ɩhyɛ mɩ ɛzɩzɩbɛ nɩ ti.”—Fɩl. 4:​13, NWT.

9. Mɩnla yɛ sɛ yɛfa yɛ anwʋzɩzɩbɛ yɛyɛ a, nɩ ikile kɛɛ yesumazumaa kezimɔ Gyehova fa yi tumi bʋwa mmenii nɩ a? (Kila mfonyini yi sʋ̃.)

⁹ Ɩwɔ numɔ kɛɛ yɛáli munli dɩyɛ, naasʋ̃ sa yɛkʋla yesumazuma kezimɔ Gyehova fa yi tumi bʋwa mmenii nɩ. Yɛlɔ́kʋla kɛva yɛ anwʋzɩzɩbɛ yɛkɛma mmenii senyii dɩyɛ, naasʋ̃ sa yɛkʋla yɛfa yɛyɛ debe yɛbʋwa bɛ. Kɛ ndianwʋ nɩ, sa yɛkʋla yɛbʋwa mmeliyema mɔɔ bɛ alʋbɔ hɔ anyunumi anzɛnyɩɩ bɔ nwʋ ba bɛ nɩ ma besiyeziye bɛ awudo anzɛnyɩɩ yɛkɔ yedi kualɛ yɛbɩlɛ bɛ. Sɛ yɛ bʋwabɩlɛ kɛma ɔhʋanɩ a, sa yɛkʋla yetu yɛ nwʋ yɛma ma besiyeziye Kɩndɔm Hɔɔlʋ anzɛnyɩɩ bɛyɛ yɩ bʋwɔ. Sɛ yɛfa yɛ anwʋzɩzɩbɛ yɛyɛ nninyeni eyimmɔ a, nɩ yɛbʋwaa ye mmeliyema mmenyia nɩɩ mmaalɛ.

10. Kɛ ɩkɛyɛ na yɛava ye munwa ndɛnɩ yɛahyɛ mvʋlɔ ɛzɩzɩbɛ a?

¹⁰ Kakɛ sʋ̃ kɛɛ, tumi wɔ ndwokɔ mɔɔ yɛkã nɩ nu paa. Asʋ̃ ezi abiye mɔɔ sɛ ɛkã kile yi kɛɛ wʋ anyɩ sɔ yɩ mmɔdɩnɩwɔlɛ a, ɩkɛhyɛ yɩ ɛzɩzɩbɛ a? Ezi abiye mɔɔ ihyinyia ɛɣɛɛlɛyɩkyɩlɛ a? Sɛ ɔzɔ a, bɔ mmɔdɩnɩ kɛɛ ɛkɛma enii ɔkʋ̃ nɩ kɔnwʋ kɛɛ ɔdwɩnɩ yɩ nwʋ. Sa yɛkʋla yɛkɔ yekyela bɛ, yɛfʋlɛ bɛ wɔ foonu zʋ, anzɛnyɩɩ yɛkɛlɛ kɛlɛta, email, anzɛnyɩɩ yɛtɛstɩ bɛ. Áma ɛma mɔɔ ɛkɛhã nwʋ adwɩnɩndwɩnɩ hyɛ wʋ zʋ sʋ̃maa. Ebiye a odwokɔ ɛgyɩkɩ̃ɩ̃ be mɔɔ ɔzʋ̃ wʋ ahʋnlɩnɩ nu kɛhã kehile eliyema be nɩ yɛ ɩkɔwʋwa yɩ ma ɩkɔhɔ zʋ keli nɔhʋanlɛ wɔ eɣile yi nu anzɛnyɩɩ ikegyina bʋwabɩlɛ be nu a.—Ɛɣɛ. 12:25; Ɛfɩ. 4:29.

11. Mɩnla ɔhʋanɩ zʋ yɛ Gyehova ɩ nɩɩ yɛ kyɛ yɩ nɣɛlɛbɛ a?

¹¹ Gyehova fa yɩ nɣɛlɛbɛ ma yɛ. Gyisɛsɩ yɩ tʋwavʋlɔ Gyemisi hɛlɛlɩ kɛɛ: “Na sɛ mʋnlʋmmɔ bo nu be yɩ nɣɛlɛbɛ ɩtɔ sini a, iɣizia Nyamɩnlɩ na ɩkɛva ɩkɛma yɩ, Nyamɩnlɩ mɔɔ yi ti nu iko na ɩfa ɩma mmenii munwatĩĩ mbʋanlɩ, mɔɔ sɛ ɩfa ɩma a, ɩádɩndɛnlɩ nwʋmɔ nɩ.” (Gye. 1:5) Eyi kile kɛɛ Gyehova ɩáva yɩ nɣɛlɛbɛ yɛ dɩyɛ ma yɩzayɩ nkʋ̃ yɩ nwʋ, mfomi ɩ nɩɩ yɛ kyɛ yɩ nɣɛlɛbɛ yɩ. Yɛ yɩ ndwɩ sʋ̃ kɛɛ,  Gyehova fa yɩ nɣɛlɛbɛ ma yɛ mɔɔ “ɩádɩndɛnlɩ nwʋmɔ.” Sɛ yebizia yɩ kɛnɩ mmʋwalɩyɛ a, iáwu yɛ animitiyia. Mfomi, yɩzayɩ po yɛ ɩtʋ salɛ ɩfʋlɔ yɛ kɛɛ yɛɣɩla yɛbɩbɛ ɔhʋanɩhilelɛ wɔ yɩ kɛ a.—Ɛɣɛ. 2:​1-6.

12. Mɩnla ɔhʋanɩ zʋ yɛ yɛkɔhʋla yɛ nɩɩ mmenii mvʋlɔ kɛhyɛ yɛ nɣɛlɛbɛ a?

¹² Na amɩyɛ sʋ̃ ɛ? Asʋ̃ yɛkɔhʋla yɛ nɩɩ mmenii mvʋlɔ kɛhyɛ yɛ nɣɛlɛbɛ kɛva kozumazuma Gyehova a? (Ndw. 32:8) Gyehova yi mmenii wɔ ɔnwʋmɔ ɔhʋanɩ sʋ̃maa mɔɔ bokoluwa zʋ bɛ nɩɩ mmenii mvʋlɔ kɛhyɛ mɔɔ bozuma nɩ. Kɛ ndianwʋ nɩ, yɛta yɛtɩdɩ ɛlawulowɔlɛmaa mvʋlɔ wɔ dasɩlɛlilɛ nu. Asafʋ nu mbanimbani bɔzʋ̃ abʋtalɩ nu bɔbʋwa asafʋ nu azʋ̃mɩvʋlɔ nɩɩ mmeliyema mmenyia mɔɔ bonluma nɩ ma bɔnwʋ kezimɔ bekeli asɛdɩ mɔɔ iwula bɛ sa wɔ asafʋ yɩ nu nɩ nwʋ egyima. Na mmeliyema sʋ̃ mɔɔ bɔ nwʋ wʋkwa wɔ aliyiagyinanlɛ nɩɩ yi ziyeziyelɛ nu nɩ, bɔbʋwa ma bɛtɩdɩ mmenii mvʋlɔ ma bɛyɛ nniyia mɔɔ yɛfa yɛsʋ̃mɩ Gyehova nɩ nwʋ egyima.

13. Sɛ yɛtɩdɩ mmenii mvʋlɔ a, kɛ ɩkɛyɛ na yɛazumazuma kezimɔ Gyehova ɩ nɩɩ mmenii kyɛ yɩ nɣɛlɛbɛ nɩ a?

¹³ Bɛzabɛ mɔɔ bɛfa ɛdɩdɩlɛ bɛma mmenii mvʋlɔ nɩ bɔ mmɔdɩnɩ kɛɛ bokozumazuma kezimɔ Gyehova ɩ nɩɩ mmenii kyɛ yɩ nɣɛlɛbɛ nɩ. Kakɛ kɛɛ, Gyehova ɩzʋ̃ yɩ ahʋnlɩnɩ nu ɩ nɩɩ yɛ kyɛ yɩ nɣɛlɛbɛ. Ɔzɔ la yɛ amɩyɛ sʋ̃ yɛzʋ̃ yɛ ahʋnlɩnɩ nu yɛ nɩɩ mmenii mvʋlɔ kyɛ mɔɔ yezi nɩ a. Sɛ yɛtɩdɩɩ abiye a, yɛáva dɩyɛ bela yesiye yi, iluwakɛɛ ye kunlu iádu kɛɛ sɛ yɛtɩdɩ yɩ ma ɩba ɩnwʋ egyima yɩ anyɩ zʋ bʋwɔ a, ikele yɛ ɔnwʋmɔ ɔhʋanɩ yɩ wɔ yɛ sa nu. Yɛɛ yɛáhã sʋ̃ kɛɛ: ‘Mamɩ abiyela ɩátɩdɩ mɩ, meti yɩzayɩ izumá yɩ debe!’ Íni kɛɛ Gyehova yɩ sʋ̃mɩvʋlɔ bela nyia ɔzɔ adwɩnɩ yɩ. Mfomi, yɛzʋ̃ yɛ ahʋnlɩnɩ munwala nu yɛ nɩɩ mmenii mvʋlɔ kyɛ dɩyɛ bela mɔɔ yezi nɩ, na yɛyɛ mɔɔ yɛkɔhʋla bela yɛtɩdɩ bɛ. (1 Tɛs. 2:8) Yɛpɛ kɛɛ bɔnlʋmmɔ sʋ̃ bɔ nwʋ kʋkwa, mɔɔ “bɔkɔhʋla bekehilehile abiyemmɔ sʋ̃.” (2 Tim. 2:​1, 2) Sɛ yɛyɛ zɔ a, ɩkɛma yɛ nɩɩ mmenii mɔɔ yɛ nɩɩ bɛ kyɛ yɛ nɣɛlɛbɛ nɩ anyɩ kele baaba.

MMƖLƖ MƆ MMENII BƐÁHILE MƆƆ YƐYƐ NƖ NWƲ ANYƖNLƖZƆLƐ

14. Sɛ yɛyɛ debe yɛma mmenii a, mɩnla yɛ bo nu sʋ̃maa yɛ wɔ nwʋmɔ a?

¹⁴ Sɛ yɛyɛ ye mmeliyema baaba a, ɩyɛ a bekile nwʋmɔ anyɩnlɩzɔlɛ. Ebiye a bɛkɛhɛlɛ debe ɛgyɩkɩ̃ɩ̃ bokogua kɛlɛta zʋ bɛkɛma yɛ anzɛnyɩɩ bekehile anyɩnlɩzɔlɛ wɔ ɔhʋanɩ fʋlɔ zʋ. (Kol. 3:15) Sɛ bɛyɛ zɔ a, ɩma yɛ anyɩ de kɛɛ yɛyɛlɩ debe yɛmanlɩ bɛ.

15. Sɛ abiyemmɔ bɛáhile mɔɔ yɛyɛ yɛma bɛ nɩ nwʋ anyɩnlɩzɔlɛ a, mɩnla yɛ ɩsɛ kɛɛ yɛkakɛ a?

¹⁵ Naasʋ̃ itwu mmɩlɩ be a, abiyemmɔ bɛáhile mɔɔ yɛyɛ yɛma bɛ nɩ nwʋ anyɩnlɩzɔlɛ. Ebiye a yɛkɛva yɛ mmɩlɩ, yɛ anwʋzɩzɩbɛ nɩɩ ye ozukua yɛkɔwʋwa mmenii, na ɩyɛ a nɩ yɛánwʋ sɛ bɔkɔnwʋ mɔɔ yɛyɛ yɛma bɛ nɩ po a. Sɛ ɩba yɩ zɔ a, kɛ ɩkɛyɛ na ye padi iákolɔ a? Kakɛ ndwokɔ mɔɔ ɩwɔ Egyima 20:35 mɔɔ yɛ dɩyɛzumanlɛ yɩ gyĩ zʋlɔ nɩ. Anyɩnlɩlelɛ mɔɔ yenyia wɔ ɛmanlɛ nu nɩ, ígyĩ kezimɔ mmenii kɛyɛ bɛ dɩyɛ wɔ nwʋmɔ nɩ zʋ. Sa yɛkʋla yɛkɔ zʋ yɛyɛ baaba mmɩlɩ po mɔ mmenii iáhile nwʋmɔ anyɩnlɩzɔlɛ nɩ. Mɩnla yɛ ɩkɔwʋwa yɛ a? Bɛmá yehila nninyeni azʋlɔtʋ be.

16. Sɛ yɛyɛɛ baaba a, mɩnla yɛ ɩsɛ kɛɛ yɛfa yɛyɛ yɛ bʋtayɩ a?

¹⁶ Fa yɛ wʋ bʋtayɩ kɛɛ okozumazuma Gyehova. Gyehova ɩfa nninyeniba ɩma mmenii munwala ɩávalɩ nwʋmɔ kɛɛ bekile nwʋmɔ anyɩnlɩzɔlɛ anzɛnyɩɩ bɛáyɛ zɔ nɩ. (Mt. 5:​43-48) Gyehova bɔ anʋhʋba kɛɛ, sɛ amɩyɛ sʋ̃ yɛyɛ baaba ‘na yɛáma yɛ anyɩ ɩda kɛɛ yɛ sa ɩkɛhã yɩ’ a, yɛ “akatuwa ɩkɔzʋnɩ.”(Lk. 6:35) Meti sɛ mmenii bɛáda bekile anyɩnlɩzɔlɛ wɔ mɔɔ ɛyɛ ma bɛ nɩ nwʋ a, máma wu padi kolɔ. Kakɛ kɛɛ, Gyehova keyila wʋ wɔ baaba mɔɔ  ɛyɛ fa bʋwa mmenii nɩ nwʋ, iluwakɛɛ ‘ɛtɩ wʋ anyunu kyɛ dɩyɛ.’—Ɛɣɛ. 19:17; 2 Kɔl. 9:7.

17. Sɛ yɛyɛɛ baaba a, mɩnla ɔhʋanɩ fʋlɔ zʋ yɛ yɛkɔhʋla koluwa zʋ kozumazuma Gyehova a? (Luuku 14:​12-14)

¹⁷ Dɩyɛ fʋlɔ sʋ̃ mɔɔ yɛkɔhʋla yɛkɛyɛ kɛva kozumazuma Gyehova mmɩlɩ mɔ yɛyɛɛ baaba yɛ lɛ kɛɛ yɛkɛva odwokɔ mɔɔ Gyisɛsɩ hanlɩ wɔ Luuku 14:​12-14 yɛkɛyɛ egyima. (Kɩnga.) Ɩ́dɩ tanɩ kɛɛ yɛkɛyɛ bɛzabɛ mɔɔ bɔnlʋmmɔ sʋ̃ bɔkɔhʋla bɛkɛyɛ debe bɛkɛma yɛ nɩ baaba. Na sɛ yɛba yɛnwʋ yɩ kɛɛ sɛ yɛkyɛ dɩyɛ a yɛta yekila ɔhʋanɩ kɛɛ bɛkɛyɛ ebiye bɛkɛma yɛ sʋ̃ ɛ? Sɛ ɔzɔ yɛ ɩdɩ a, bɔ mmɔdɩnɩ kɛɛ ɛkɛva Gyisɛsɩ yi odwokɔ yɩ kɛyɛ egyima. Sa yɛkʋla yɛyɛ baaba wɔ mmenii mɔɔ yezi kɛɛ bɔlɔ́kʋla kɛyɛ ebiye kɛma yɛ nɩ. Sɛ yɛyɛ zɔ a yɛ anyɩ kele, iluwakɛɛ nɩ yesumazumaa Gyehova. Sɛ yɛákila ɔhʋanɩ kɛɛ mmenii mɔɔ yɛyɛ baaba bɛ nɩ kɛyɛ ebiye kɛma yɛ a, ɩkɛma yɛkɔhɔ zʋ yɛkɛva anyɩnlɩlelɛ yɛkɛyɛ baaba, mmɩlɩ po mɔ bɛákile nwʋmɔ anyɩnlɩzɔlɛ nɩ.

18. Mɩnla yɛ íni kɛɛ yɛyɛ a, na mɩnla ti a?

¹⁸ Ã́ma enyia mmenii mvʋlɔ nwʋ adwɩnɩ tanɩ. (1 Kɔl. 13:7) Sɛ mmenii bɛákile mɔɔ yɛyɛ yɛma bɛ nɩ nwʋ anyɩnlɩzɔlɛ a, sa yɛkʋla yebizia yɛ nwʋ kɛɛ: ‘Asʋ̃ ɩdɩ amba kɛɛ ɛyɛ dɩyɛ ma bɛ a bɛ anyɩ ɩázɔ yɩ, anzɛnyɩɩ bɛ ɛɣɛɛlɛ yɛ ivili kɛɛ bekehile nwʋmɔ anyɩnlɩzɔlɛ a?’ Ebiye a, sianti mvʋlɔ be ti yɛ bɛákile nwʋmɔ anyɩnlɩzɔlɛ kɛmɔ nɩ yekilaa yɩ ɔhʋanɩ nɩ a. Abiyemmɔ wɔ kɛnɩ a, ɛyɛ dɩyɛ ɛma bɛ a bɛ anyɩ sɔ yɩ paa, naasʋ̃ ɩyɛ sɩ ɩma bɛ kɛɛ bɛkɛla yɩ ali. Bo nu be wɔ kɛnɩ a bɛ anyɩ tʋ̃ kɛɛ mmenii kɔwʋwa bɛ, titili sɛ nɩ mmɩlɩ be bɛzabɛ mfomi yɛ nɩ bɔbʋwa mmenii naasʋ̃ kakɩ yɩ bɛáhʋla bɛyɛ zɔ a. Naasʋ̃ sɛ yɛdɔ ye mmeliyema mmenyia nɩɩ mmaalɛ amba a, yelényia bɔ nwʋ adwɩnɩ tanɩ na yɛkɔhɔ zʋ kɛva anyɩnlɩlelɛ kɛyɛ baaba.—Ɛfɩ. 4:2.

19-20. Sɛ yɛyɛɛ baaba a, mɩnla ti mɔɔ abʋtalɩ nwʋ hyinyia a? (Kila mfonyini yi sʋ̃.)

¹⁹ Nyia abʋtalɩ. Bulombunli Sɔlɔmɔnʋ nɣɛlɛbɛvʋlɔ yɩ hɛlɛlɩ valɩlɩ baabayɛlɛ nwʋ kɛɛ: “Tʋ wʋ pʋanʋ kua nzulo anyɩ, na mmɩlɩ be mɛda nɩ ɔkɔnwʋ yɩ dɔkʋ̃.” (Odw. 11:1) Odwokɔ eyi ma yɛnwʋ kɛɛ, ɩyɛ a anwʋma kogua numɔ ansaana mmenii bɛahile mɔɔ yɛyɛ yɛma bɛ nɩ  nwʋ anyɩnlɩzɔlɛ. Odwokɔ eyi be dʋlɩ eliyema baalɛ be. Bɛmá yehila.

²⁰ Alʋbɔ be mɔɔ idua nu nɩ, mansini zʋ ehilalɛvʋlɔ be yɩ yɩ hɛlɛlɩ kɛlɛta hɔ manlɩ eliyema baalɛ be mɔɔ nɩ banzɛmɔ inluma nɩ. Wɔ yɩ kɛlɛta yɩ nu nɩ, ɩmanlɩ ɩnwʋnlɩ kɛɛ ihyinyia kɛɛ ɩkɔ zʋlɔ idi Gyehova nɔhʋanlɛ. Kɛyɛ alʋbɔ awɔtwɛ mɛda nɩ, eliyema baalɛ yɩ sʋ̃ hɛlɛlɩ kɛlɛta hɔ manlɩ mansini zʋ ehilalɛvʋlɔ ɛyɩlɛ yɩ, ɩhanlɩ kɛɛ: “Mizi kɛɛ ézi mɔɔ mɩbahã yɩ, naasʋ̃ mɩpɛ kɛɛ ɔnwʋ kezimɔ ɔwʋwa mɩ wɔ alʋbɔ mɔɔ ɩɣa ɩzɩ̃ ɩhɔ nɩ nu.” Ɩdʋwalɩ zʋlɔ kɛɛ: “[Wʋ kɛlɛta yɩ] hyɛlɩ mɩ ɛzɩzɩbɛ, na mɩ ɛɣɛɛlɛ léfili ɛhɛlɛlɛdwokɔ mɔɔ nɩ ɩwɔ numɔ nɩ.” a Mmɩlɩ mɔ eliyema baalɛ yɩ hanlɩ ndwokɔzɩzɩbɛ mɔɔ iyiyia nwʋ odwokɔ mɛda nɩ, ɩhanlɩ kɛɛ: “Ɩyɛ a nɩ mɩtɩ nɣanlɩ kɛɛ mɩvɛ, meti nɩ mɩpɛ kɛɛ miyiaki Gyehova ɔzʋ̃mɩnlɛ. Naasʋ̃ sɛ nɩ mɩkakɛ ɛhɛlɛlɛdwokɔ mɔɔ ɛhanlɩ nwʋmɔ odwokɔ wɔ wʋ kɛlɛta yɩ nu nɩ a, nɩ ɩma minyia anwʋzɩzɩbɛ fʋlɔ mɔɔ ɩkɛma mʋkɔhɔ zʋ kɔzʋ̃mɩ Gyehova.” Ɩva ɩhɩnlanlɩ nwʋmɔ kɛɛ: “Wɔ ɔzɔ alʋbɔ awɔtwɛ yɩ munwala nu nɩ, wʋ kɛlɛta yɩ nɩɩ ɛhɛlɛlɛdwokɔ mɔɔ nɩ ɩwɔ numɔ nɩ yɛ ɩhyɛ mɩ ɛzɩzɩbɛ paa a.” Mɔwʋ kila kezimɔ mansini zʋ ehilalɛvʋlɔ ɛyɩlɛ yɩ anyɩ kele mmɩlɩ mɔ yɩ sa hanlɩ kɛlɛta yɩ wɔ “mmɩlɩ be mɛda nɩ”! Amɩyɛ sʋ̃, sɛ yɛyɛ baaba yɛma abiye a, ebiye a ɩkɛhyɛ ansaana enii ɔkʋ̃ nɩ iahile nwʋmɔ anyɩnlɩzɔlɛ.

21. Mɩnla ti mɔɔ ezi wʋ kɛnɣa kɛɛ ɔkɔhɔ zʋ kozumazuma Gyehova yɩ baabayɛlɛ yɩ a?

²¹ Kɛmɔ yeli bɔmʋnlɩ yɛhã nɩ, Gyehova wɔlɩ yɛ wɔ ɔhʋanɩ be zʋ mɔɔ ɩma yenyia anyɩnlɩlelɛ wɔ ɛmanlɛ nu yɛtɛla elelɛ. Sɛ yɛbʋwa ye mmeliyema a, yɛ ahʋnlɩnɩ tɔ ye kunlu. Na sɛ bekile nwʋmɔ anyɩnlɩzɔlɛ a yɛ anyɩ de paa. Naasʋ̃ sɛ bɛákile nwʋmɔ anyɩnlɩzɔlɛ sʋ̃ a, yɛ anyɩ de iluwakɛɛ yɛyɛ dɩyɛ baaba. Áma ɛma wʋ ɛɣɛlɛ fi kɛɛ, “Gyehova kɔhʋla kɛva mɔɔ ɩtɛla zɔ kʋlaa ɩkɛma wʋ.” (2 Mm. 25:9) Gyehova keyila wʋ ma ɩkɔwʋlʋ mɔɔ ɛfa ma nɩ zʋ kʋlaa! Na Gyehova yi nyilalɛ sʋ̃ dɩ baaba tɛla dɩyɛ bela. Meti bɛmá yezi yɛ kɛnɣa kɛɛ yekozumazuma yɛ sʋlɔ Ɛzɩlɛ nɩ yɩ baabayɛlɛ yɩ.