Íni kɛɛ yesunzu kɛɛ iluwakɛɛ nɩ adʋwavʋlɔ 70 yɩ bɛáhɩnla Gyisɛsɩ nwʋ mmɩlɩ mɔ ɩvalɩ Niibenyia Nunuma Alɩyɛ yɩ iziyeli kɛnɩ nɩ ti, ikile kɛɛ nɩ Gyisɛsɩ iále bɛ itiã numɔ anzɛnyɩɩ nɩ bɔbʋ yɩ. Mfomi yɩzayɩ yɛ nɩ ɩpɛ kɛɛ ɩ nɩɩ yɩ asʋ̃mavʋlɔ yɩ la di ɔzɔ awuwa yɩ a.

Nɩ Gyisɛsɩ de adʋwavʋlɔ 12 yɩ nɩɩ 70 yɩ munwatĩĩ itiã numɔ. Ɩyɩlɩ mmenii 12 wɔ yɩ adʋwavʋlɔ sʋ̃maa yɩ nu, na ɩvʋlɔlɩ bɛ asʋ̃mavʋlɔ. (Lk. 6:​12-16) Mmɩlɩ mɔ nɩ Gyisɛsɩ wɔ Galilii nɩ, ɩvʋlɔlɩ “adʋwavʋlɔ bunlu nɩɩ anwɩ̃ nɩ” na “ɩzʋ̃manlɩ bɛ kɛɛ bɔhɔ́ bɔwɔ Nyamɩnlɩ Bulombunlililɛ nɩ nwʋ ɛlawulo, na bɛmá anlamvʋlɔ bɔ nwʋ ɩza.” (Lk. 9:​1-6) Aɣinzi yi mɔɔ nɩ Gyisɛsɩ wɔ Dwudiyia nɩ, “ɩyɩlɩ mmenii anwunluma asunwa nɩɩ anwɩ̃ sʋ̃, na ɩzʋ̃manlɩ bɛ anwɩ̃ anwɩ̃.” (Lk. 9:51; 10:1) Meti nɩ Gyisɛsɩ wɔ adʋwavʋlɔ sʋ̃maa wɔ nnɩka azʋlɔtʋ mɔɔ nɩ bedi yɩ nwʋ dasɩlɛ.

Dwuumaa mɔɔ bɛɣa bɛyɛlɩ Gyisɛsɩ yɩ adʋwavʋlɔ nɩ, ɩkɛyɛ kɛɛ ɔlʋbɔ bela, nɩ bɛ nɩɩ bo mmusunwamaa bɔ numɔ di Ahʋanɩnwʋmɔ Awuwa yɩ. (Ɛkɩ. 12:​6-11, 17-20) Ɩka ɛgyɩkɩ̃ɩ̃ ma Gyisɛsɩ wu nɩ, ɩ nɩɩ yɩ asʋ̃mavʋlɔ yɩ hɔlɩ Gyelusalamɩ. Naasʋ̃ ɩáfʋlɔ yɩ adʋwavʋlɔ mɔɔ nɩ bɔwɔ Dwudiyia, Galilii, nɩɩ Pɛlɩya nɩ kɛɛ bɛɣɩla ma bɔwɔ numɔ beli Ahʋanɩnwʋmɔ Awuwa yɩ. Ɩda ali petee kɛɛ, nɩ Gyisɛsɩ pɛ kɛɛ ɩ nɩɩ yɩ asʋ̃mavʋlɔ 12 yɩ la di awuwa eyi. Ɩhã ihileli bɛ kɛɛ: “Mɔɔ mɩpɛɛ yɩ ɛzɩzɩbɛ ɛzɩzɩbɛ yɛ lɛ kɛɛ mɩ nɩɩ mʋnlʋmmɔ yekeli Ahʋanɩnwʋmɔ Awuwa alɩyɛ eyi ansaana mɩahɔ ɛvɛlɩyɛ nu.”—Lk. 22:15.

Sianti baaba be ti yɛ Gyisɛsɩ yɛlɩ zɔ a. Nɩ ɩlɛ́kyɛ na iawu kɛɛ “Nyamɩnlɩ yɩ Owuanɩɣalɛ nɩ mɔɔ ɩyɩ oyuwadɩ tanɩ ɩkɔ nɩ!” (Dwɔ. 1:29) Nɩ ɩsɛ kɛɛ iwu wɔ Gyelusalamɩ, ɛkɛnɩ yɛ ɔzʋmɩ tɩɩtɩɩ mmɩlɩ nu munwala nɩ bɔbɔ afɔlɩ bɛma Nyamɩnlɩ a. Nɩ owuanɩ mɔɔ bokũ yi wɔ Ahʋanɩnwʋmɔ Awuwa mmɩlɩ nu nɩ kakɛ Yizilayamaa nɩ kɛɛ, Gyehova leli bɛ wɔ Igyibitimaa bɛ sa nu. Naasʋ̃ nɩ Gyisɛsɩ koluwa yɩ afɔlɩ yɩ zʋ kɛyɛ debe mɔɔ ɩtɛla zɔ. Nɩ ikele adasamaa munwatĩĩ wɔ tanɩ nɩɩ owulo tʋ. (1 Kɔl. 5:​7, 8) Mɔɔ Gyisɛsɩ yɛlɩ nɩ, nɩ ɩkɛma ɔhʋanɩ ma asʋ̃mavʋlɔ bunlu nɩɩ anwɩ̃ yɩ kɛɣa kɛyɛ Kilisinyianɩ asafʋ nɩ yɩ fapɩmɩ. (Ɛfɩ. 2:​20-22) Mɔɔ ɩyɛ nnwʋánlɩ yɛ lɛ kɛɛ, twonwa nwanzanwanza Gyelusalamɩ yɩ wɔ “awʋlɔ fapɩmɩ bunlu nɩɩ anwɩ̃” mɔɔ bɛhɛlɛ “Owuanɩɣalɛ nɩ yɩ adʋwavʋlɔ bunlu nɩɩ anwɩ̃ nɩ mmɔ bɛ anlima wɔ nwʋmɔ.” (Yik. 21:​10-14) Eyi kile kɛɛ nɩ asʋ̃mavʋlɔ nɔhʋanlɛmaa yɩ keli egyima titili mɔɔ ɩkɛma Nyamɩnlɩ yi tile nu pɔkɔ kɛɣa numɔ. Meti ntɩyasɩ wɔ numɔ kɛɛ nɩ Gyisɛsɩ pɛ kɛɛ ɩ nɩɩ asʋ̃mavʋlɔ 12 yɩ la di Ahʋanɩnwʋmɔ Awuwa mɔɔ nɩ itualɩ yɩ tʋ nɩ, iluwakɛɛ mɛyɩ mɛda pɛɛ nɩ, nɩ ɩkɛva Niibenyia Nunuma Alɩyɛ yɩ keziye kɛnɩ.

Ɩwɔ numɔ kɛɛ adʋwavʋlɔ 70 yɩ nɩɩ adʋwavʋlɔ nɣalɩyɛ yɩ bɛ nɩɩ Gyisɛsɩ bɛábɔ numɔ bedi ɔzɔ alɩyɛ yɩ dɩyɛ, naasʋ̃ nɩ bɛzabɛ mɔɔ bekeli nɔhʋanlɛ nɩ kenyia Niibenyia Nunuma Alɩyɛ yɩ mɔɔ ɩva iziyeli kɛnɩ nɩ zʋ mfasʋ. Adʋwavʋlɔ mɔɔ aɣinzi yi bɛɣa bɛyɛlɩ Kilisinyiamaa mɔɔ bɔvɔ ngɔlɔ bɛ nɩ kɛɣa kɛhɩnla bulombunlililɛ nhyɩhyɛlɩyɛ mɔɔ Gyisɛsɩ hanlɩ nwʋmɔ odwokɔ hileli asʋ̃mavʋlɔ yɩ wɔ ɔzɔ nunuma yɩ nɩ nwʋ.—Lk. 22:​29, 30.