1. Mɩnla ti mɔɔ yɛma munwalɩyɛ wɔ dɩyɛzumanlɛ tʋ a?

 MƖNLA ti mɔɔ yɛkɔ dɩyɛzumanlɛ a? Sianti titili paa yɛ lɛ kɛɛ, yɛfa yɛyɩ Gyehova ayɛlɛ. (Ndw. 26:12; 111:1) Akʋ̃ sʋ̃, yɛkɔ dɩyɛzumanlɛ ama yɛahyɛ yɛ nwʋ yɛ nwʋ ɛzɩzɩbɛ wɔ mmɩlɩ tanɩ eyi nu. (1 Tɛs. 5:11) Meti sɛ yepigyia yɛ sa sʋlɔ yɛma munwalɩyɛ a, nɩ yɛyɛɛ nninyeni anwɩ̃ eyimmɔ munwala.

2. Mɩnla ɔnwʋmɔ ɔhʋanɩ yɛ yɛwɔ kɛɛ yɛkɛva yɛkɛma munwalɩyɛ wɔ yɛ dɩyɛzumanlɛ azʋlɔtʋ yɩ tʋ a?

² Dapɛnɩ bela, yɛwɔ ɔnwʋmɔ ɔhʋanɩ mɔɔ yɛkɛva yɛkɛma munwalɩyɛ wɔ dɩyɛzumanlɛ tʋ. Kɛ ndianwʋ nɩ, sɛ itwu dapɛnɩ yɩ awielɩyɛ a, sa yɛkʋla yɛfa yɛ nwʋ yewula Ɔwɩɛnɩlɛ Aɣanɩ Dɩyɛzumanlɛ yi nu. Wɔ dapɛnɩ avinli dɩyɛzumanlɛ tʋ sʋ̃, sa yɛkʋla yɛma munwalɩyɛ mmɩlɩ mɔ yɛyɛɛ Pɩbɛlɩ Bayɩbʋlʋ Nu, Asafʋ Bayɩbʋlʋ Dɩyɛzumanlɛ, nɩɩ ndwokɔɣizialɛ nɩɩ munwalɩyɛ ɔfʋã bela nɩ.

3. Mɩnla ndwokɔzɩzɩbɛ yɛ yɛkɔhʋla keyiyia a, na mɩnla ɔhʋanɩ zʋ yɛ Hibulumaa 10:24, 25 kɔhʋla kɔwʋwa yɛ a?

³ Ye munwala yɛpɛ kɛɛ yɛyɩ Gyehova ayɛlɛ na yɛhyɛ yɛ ɔhɔnwʋmmɔ dedimaa ɛzɩzɩbɛ. Naasʋ̃ nninyeni be kɔhʋla kɛma ɩkɛyɛ sɩ kɛɛ yɛkɛma munwalɩyɛ. Ebiye a, ye kunlu tu kɛɛ yɛkɛma munwalɩyɛ, anzɛnyɩɩ yɛ anyɩ deli nwʋmɔ kɛɛ yɛkɛma munwalɩyɛ sʋ̃maa naasʋ̃ bɛávʋlɔ yɛ kɛmɔ ebiye a yɛpɛ yɩ nɩ. Kɛ yɛkɛyɛ na yɛali ndwokɔzɩzɩbɛ eyimmɔ zʋ a? Yɛnwʋ munwalɩyɛ yɩ wɔ kɛlɛta mɔɔ sʋ̃mavʋlɔ Pɔɔlʋ hɛlɛlɩ hɔ manlɩ Hibulumaa nɩ  nu. Mmɩlɩ mɔ ɩkãã sianti mɔɔ nwʋmɔ hyinyia kɛɛ yekeyiyia numɔ nɩ nwʋ odwokɔ nɩ, ɩhanlɩ kɛɛ yɛvá yɛ adwɩnɩ yeziye zʋlɔ kɛɛ yɛkɛhyɛ yɛ nwʋ yɛ nwʋ ɛzɩzɩbɛ. (Kɩnga Hibulumaa 10:24, 25.) Sɛ yɛba yɛnwʋ kɛɛ ye dedi nwʋ odwokɔ ɛgyɩkɩ̃ɩ̃ mɔɔ yɛkɛhã nɩ kɛhyɛ abiyemmɔ ɛzɩzɩbɛ a, ɩkɛhã yɛ ma yɛkɔzʋ̃ yɛ pɛ nu yɛkɛma munwalɩyɛ. Na sɛ bɛáfʋlɔ yɛ mbɔmɩ sʋ̃maa po a, sa yɛ anyɩ kʋla de kɛɛ abiyemmɔ sʋ̃ nyia ɔnwʋmɔ ɔhʋanɩ bɛmaa munwalɩyɛ.—1 Pit. 3:8

4. Nninyeni asã ɛhɩnla dɩyɛ yɛ yekozunzu nwʋmɔ wɔ dɩyɛzumanlɛ eyi nu a?

⁴ Wɔ dɩyɛzumanlɛ eyi nu nɩ, sa yedi bɔmʋnlɩ yekila kezimɔ yɛkɛhyɛ yɛ nwʋ yɛ nwʋ ɛzɩzɩbɛ wɔ asafʋ ɛgyɩkɩ̃ɩ̃ mɔɔ bɛzabɛ mɔɔ bɛma munwalɩyɛ nɩ dɩ ɛgyɩkɩ̃ɩ̃ nɩ nu. Akʋ̃ sʋ̃, yekehila kezimɔ yɛkɛhyɛ yɛ nwʋ yɛ nwʋ ɛzɩzɩbɛ wɔ asafʋ kezile nu mɔɔ bɛzabɛ mɔɔ bɛma munwalɩyɛ sʋ̃ bɔ nwʋ ɩzʋnɩ nɩ. Awielɩyɛ kʋlaa nɩ, yekozunzu kezimɔ yɛkɔhʋla yekoluwa ndwokɔ mɔɔ ɩwɔ ye munwalɩyɛ yi nu zʋ yɛkɛhyɛ mmenii mvʋlɔ ɛzɩzɩbɛ nwʋ.

5. Kɛ yɛkɛyɛ na yɛahyɛ yɛ nwʋ yɛ nwʋ ɛzɩzɩbɛ mmɩlɩ po mɔɔ bɛzabɛ mɔɔ bɛkɛma munwalɩyɛ nɩ bɔ nwʋ ɩásʋ̃ nɩ a?

⁵ Wɔ asafʋ mɔɔ bɔ nwʋ ɩásʋ̃ anzɛnyɩɩ okuwu nu nɩ, mmenii sʋ̃maa béni kɛnɩ mɔɔ bɔkɔvʋlɔ bɛ ma bɛkɛma munwalɩyɛ. Ɩyɛ a, ɩsɛ kɛɛ enii mɔɔ ikilaa dɩyɛzumanlɛ yɩ zʋ nɩ dɩkɛ nkʋ̃ʋ̃ kɔbʋmɩ kɛɛ abiye kebigyia yɩ sa sʋlɔ. Sɛ ɩba yɩ zɔ a, dɩyɛzumanlɛ yɩ tʋ ɩáyɛ anyɩnlɩlelɛ na ɩáhyɛ mmeliyema sʋ̃ ɛzɩzɩbɛ. Mɩnla yɛ ɔkɔhʋla kɛyɛ a? Ɔzʋ̃ wʋ pɛ nu pigyia wʋ sa mbɔmɩ sʋ̃maa. Sɛ ɛyɛ zɔ a, ɩkɛhyɛ mmenii mvʋlɔ ɛzɩzɩbɛ ma bɛzabɛ sʋ̃ bɛkɛma munwalɩyɛ.

6-7. Kɛ ɩkɛyɛ na yɛadɩ bɔlɔ mɔɔ ɩkã yɛ mmɩlɩ mɔ yɛpɛ kɛɛ yɛma munwalɩyɛ nɩ zʋ a?

⁶ Na sɛ wu kunlu tu kɛɛ ɛkɛma munwalɩyɛ sʋ̃ ɛ? Mmenii sʋ̃maa sʋ̃ tɩ nɣanlɩ zɔ. Mɔɔ ɩkɛyɛ na wʋama munwalɩyɛ wʋava wʋahyɛ wʋ mmeliyema ɛzɩzɩbɛ nɩ, mɩnla ti mɔɔ wʋábɩbɛ ɔhʋanɩ azʋlɔtʋ mɔɔ ɛkɛva keli ɔzɔ bɔlɔ yɩ zʋ a? Kɛ ɛkɛyɛ yɩ keze a?

⁷ Adwɩnɩhilelɛ azʋlɔtʋ be wɔ Ɔwɩɛnɩlɛ Aɣanɩ mɔɔ ɩɣa daada yi nu mɔɔ osunzu nwʋmɔ a, ɩkɔwʋwa wʋ. b Kɛ ndianwʋ nɩ, siyeziye wʋ nwʋ bʋwɔ. (Ɛɣɛ. 21:5) Sɛ ɛtɩ mɔɔ bokozuma yɩ tʋ bʋwɔ a, ɩkɛyɛ mɛlɛkɛ kɛɛ ɛkɛma munwalɩyɛ. Akʋ̃ sʋ̃, ma wu munwalɩyɛ nɩ ɩyɛ nzikalɛ. (Ɛɣɛ. 15:23; 17:27) Sɛ wu munwalɩyɛ nɩ dɩ sikalɛ a, ɩlɛ́ma wu kunlu kodu. Sɛ yɛma munwalɩyɛ nzikalɛ a, ɩkɛyɛ mɛlɛkɛ kɛma ye mmeliyema yɩ kɛɛ bɛkɛdɩ yɩ tʋ, kɛdɛla kɛɛ yɛkɛdɩndɛ kɔlɔlɔɔ. Sɛ ɛfa wʋzawʋ wu ndwokɔ ma munwalɩyɛ sikalɛ a, ikile kɛɛ eziyeziye wʋ nwʋ bʋwɔ na ɛtɩ dɩyɛzumanlɛ yɩ tʋ sʋ̃.

8. Kɛ Gyehova bu yɛ mmɔdɩnɩwɔlɛ ise a?

⁸ Na sɛ otwe adwɩnɩhilelɛ eyimmɔ munwala kila na mɛyɩ mɛda nɩ, wu kunlu tu kɛɛ ɛkɛma munwalɩyɛ ma ɩkɔwʋ ɔkʋ̃ anzɛnyɩɩ anwɩ̃ sʋ̃ ɛ? Nyia anwʋlazʋ kɛɛ Gyehova yɩ anyɩ sɔ mmɔdɩnɩ mɔɔ ɔbɔ kɛɛ ɛkɛyɛ mɔɔ ɔkɔhʋla bela nɩ. (Lk. 21:1-4) Kɛ ɛkɛyɛ mɔɔ ɔkɔhʋla bela nɩ iáhile kɛɛ ɛkɛyɛ mɔɔ ɩbʋlʋ wʋ anwʋzɩzɩbɛ zʋ. (Fɩl. 4:5) Nwʋ́ munwalɩyɛ mɔɔ ɛkɛma, fa siye wʋ anyɩ zʋ kɛɛ ɛkɛma, na siã Gyehova ma ɩmá akɛnɣazɩzɩbɛ wʋ. Ahyɛasɩ mɛyɩ, fa siye wʋ anyɩ zʋ kɛɛ ɛkɛma munwalɩyɛ sikalɛ ɔkʋ̃.

9. Mɩnla ti mɔɔ ɩkɔhʋla ɩkɛyɛ sɩ kɛɛ yɛkɛma munwalɩyɛ wɔ asafʋ kezile nu a?

⁹ Sɛ ɛlawulowɔlɛmaa mɔɔ bɔwɔ wʋ asafʋ yi nu bɔ nwʋ ɩzʋnɩ a, mɛyɩ sʋ̃ ɩlɛ yɩ ndwokɔzɩzɩbɛ. Ebiye a, iluwakɛɛ mmeliyema sʋ̃maa  pigyia bɛ sa sʋlɔ ti bɛáda bɔfʋlɔ wʋ. Kɛ ndianwʋ nɩ, Danielle yɩ anyɩ deli nwʋmɔ kɛɛ ɩkɛma munwalɩyɛ wɔ dɩyɛzumanlɛ tʋ eɣile bela. c Ɩnwʋ munwalɩyɛmanlɛ kɛɛ yɩ ɔzʋ̃mɩnlɛ yɩ ɔfʋã nɩɩ ɔhʋanɩ mɔɔ iduwa zʋlɔ ɩhyɛ mvʋlɔ nɩɩ yɩzayɩ yi dedi ɛzɩzɩbɛ wɔ nɔhʋanlɛ yi nu. Naasʋ̃ mmɩlɩ mɔ ɩhɔlɩ asafʋ mɔɔ bɔ nwʋ ɩzʋnɩ nu nɩ, ɩyɛ a nɩ bɛáda bɔfʋlɔ yɩ. Ɩyɛ po a, nɩ bɛávʋlɔ yɩ kʋlaa na bɛabɔ. Ɩhanlɩ kɛɛ: “Nɩ ɩma mɩfa ɛya. Nɩ mɩtɩ nɣanlɩ kɛɛ, ɩdɩ kɛɛ mɔɔ bele ɔzɔ ɔnwʋmɔ ɔhʋanɩ yɩ wɔ mɩ sa nu. Sɛ ɩtʋwadʋwa zʋlɔ mbɔmɩ sʋ̃maa zɔ a, ebiye a ɔkɔwɔ yɩ tʋ keɣizia wʋ nwʋ kɛɛ gyama bɛhyɛda.”

10. Kɛ ɩkɛyɛ na yɛahʋla yɛama munwalɩyɛ sʋ̃maa wɔ dɩyɛzumanlɛ tʋ a?

¹⁰ Ɛdɩ nɣanlɩ kɛɛ Danielle kyɩ̃ a? Sɛ ɔzɔ a, ebiye a ɩkɛyɛ wʋ kɛɛ eɣiakí munwalɩyɛmanlɛ na ediye dɩyɛzumanlɛ yɩ la. Naasʋ̃ áma eyiaki mmɔdɩnɩ mɔɔ ɔbɔɔ kɛɛ ɛkɛma munwalɩyɛ nɩ. Mɩnla yɛ ɔkɔhʋla kɛyɛ a? Sɛ esiyeziye wʋ nwʋ kɛɛ ɛkɛma munwalɩyɛ sʋ̃maa a, ɩkɔwʋwa wʋ paa. Meti sɛ bɛáfʋlɔ wʋ ndɛ ma ɛma munwalɩyɛ po a, sa enyia ɔnwʋmɔ ɔhʋanɩ ma munwalɩyɛ mmɩlɩ mɔ dɩyɛzumanlɛ yɩ ɩkɔlɩɩ zʋlɔ nɩ. Sɛ esiyeziyee wʋ nwʋ kɛma Ɔwɩɛnɩlɛ Aɣanɩ Dɩyɛzumanlɛ a, dwɩnɩndwɩnɩ kezimɔ nkyɩkyɛmi bela falɩ dɩyɛzumanlɛ yi odwokɔtile yɩ nwʋ. Sɛ ɛyɛ zɔ a, sa ɔkʋla ma munwalɩyɛ mɔɔ numɔ la ɛkɛnɩ wɔ dɩyɛzumanlɛ tʋ. Akʋ̃ sʋ̃, ebiye a sa ɔkʋla esiyeziye wʋ nwʋ ma munwalɩyɛ wɔ nkyɩkyɛmi azʋlɔtʋ mɔɔ Bayɩbʋlʋ ehilehilelɛ mɔɔ yɩ tʋdɩlɛ yɛ sɩ wɔ numɔ nɩ. (1 Kɔl. 2:10) Mɩnla ti a? Iluwakɛɛ ebiye a, mmenii ɛgyɩkɩ̃ɩ̃ bela yɛ bekebigyia bɛ sa sʋlɔ wɔ ɔzɔ ɔfʋã yɩ a. Naasʋ̃ sɛ ɩba yɩ kɛɛ ɛfa adwɩnɩhilelɛ eyimmɔ munwala edi egyima na dɩyɛzumanlɛ sʋ̃maa mɛda nɩ elényianlɩ ɔnwʋmɔ ɔhʋanɩ ɛlɛ́manlɩ munwalɩyɛ sʋ̃ ɛ? Ansaana bɔkɔwɔ dɩyɛzumanlɛ tʋ nɩ, ebiye a sa ɔkʋla kã kile enii mɔɔ ikehila dɩyɛzumanlɛ yɩ zʋ kɛɛ, ɛpɛ kɛɛ ɛma odwokɔɣizialɛ pɔkyɩɩ be nwʋ munwalɩyɛ.

11. Mɩnla yɛ Fɩlɩpɩmaa 2:4 hyɛ yɛ ɛzɩzɩbɛ kɛɛ yɛyɛ a?

¹¹ Kɩnga Fɩlɩpɩmaa 2:4. Sunzuma hanlɩ sʋ̃mavʋlɔ Pɔɔlʋ ma ɩhyɛlɩ Kilisinyiamaa ɛzɩzɩbɛ kɛɛ bɔdwɩnɩ́ mmenii mvʋlɔ sʋ̃ bɔ nwʋ. Kɛ ɩkɛyɛ na yɛava fʋlɔdulɛ eyi yɛayɛ egyima wɔ dɩyɛzumanlɛ tʋ a? Ɩsɛ kɛɛ yɛkakɛ  kɛɛ mmenii mvʋlɔ sʋ̃ pɛ kɛɛ bɛma munwalɩyɛ dɩkɛɛ amɩyɛ la.

12. Mɩnla ɔhʋanɩ yɛ yɛkɔhʋla yekoluwa zʋ yɛkɛhyɛ abiyemmɔ ɛzɩzɩbɛ wɔ dɩyɛzumanlɛ tʋ a? (Kila mfonyini yi sʋ̃.)

¹² Dwɩnɩ eyi nwʋ kila. Sɛ ɛ nɩɩ wʋ ɔhɔnwʋmmɔ bɔbɔɔ nkɔmmɔ a, asʋ̃ ekele nkɔmmɔ yɩ kɔwɔ zʋlɔ mɔɔ belényia ebiye bɛkɛhã a? Ɛlɛ́yɛ zɔ kʋlaa! Ɛkɛbɛ kɛɛ bɔnlʋmmɔ sʋ̃ bɛkɛdɩndɛ ebiye. Ɔzɔ la yɛ wɔ dɩyɛzumanlɛ tʋ sʋ̃ nɩ, yɛpɛ kɛɛ yɛma ɔhʋanɩ ma mmenii sʋ̃maa ma munwalɩyɛ a. Nɔhʋanlɛ nu nɩ, ɔhʋanɩ ɔkʋ̃ mɔɔ yekoluwa ɔzʋlɔ yɛkɛhyɛ ye mmeliyema ɛzɩzɩbɛ yɛ lɛ kɛɛ, yɛkɛma ɔhʋanɩ bɛ ma bɛkɛma munwalɩyɛ na bɛava bɛala be dedi ali. (1 Kɔl. 10:24) Bɛmá yehila kezimɔ yɛkɔhʋla yɛkɛyɛ zɔ.

13. Kɛ yɛkɛyɛ na yɛama ɔhʋanɩ ma mmenii sʋ̃maa bɛama munwalɩyɛ wɔ dɩyɛzumanlɛ tʋ a?

¹³ Dɩyɛ ɔkʋ̃ yɛ lɛ kɛɛ, sa yɛkʋla yɛma ye munwalɩyɛ nɩ yɛ nzikalɛ, na abiyemmɔ sʋ̃ bɛanyia ɔhʋanɩ bɛama munwalɩyɛ yɩ be. Asafʋ nu mbanimbani nɩɩ ɛlawulowɔlɛmaa mɔɔ bɔ nwʋ ɩwʋkwa kɔhʋla kɛyɛ eyi nwʋ ndianwʋ. Sɛ ɛmaa munwalɩyɛ sikalɛ po a, áma ɛkã dɩyɛ bela mɔɔ ɩwɔ ɔfʋã yi nu nwʋ odwokɔ. Sɛ ɛkã ozumalɛdɩyɛ mɔɔ ɩwɔ nkyɩkyɛmi yi nu munwala a, mmenii mvʋlɔ belényia ebiye bɛkɛhã. Kɛ ndianwʋ nɩ, wɔ nkyɩkyɛmi eyi nu nɩ, yenyia adwɩnɩhilelɛ anwɩ̃: (1) Ma wʋ munwalɩyɛ ɩyɛ nzikalɛ. (2) Áma ɛkã dɩyɛ bela mɔɔ ɩwɔ ɔfʋã yi nu nwʋ odwokɔ. Sɛ bedi bɔmʋnlɩ bɔfʋlɔ wʋ wɔ nkyɩkyɛmi eyi nu a, kã adwɩnɩhilelɛ ɔkʋ̃ pɛ nwʋ odwokɔ na yiaki ɔkʋ̃ mɔɔ ɩha nɩ ma enii fʋlɔ sʋ̃.

14. Mɩnla yɛ ɩkɔwʋwa yɛ ma yɛkɔnwʋ mbɔmɩ dʋdʋ mɔɔ ɩsɛ kɛɛ yepigyia yɛ sa sʋlɔ a? (Kila mfonyini yi sʋ̃.)

¹⁴ Da ntɩyasɩ ali na áma epigyia wʋ sa sʋlɔ sʋ̃maa. Sɛ yepigyia yɛ sa sʋlɔ sʋ̃maa a, ɩkɛma enii mɔɔ ikilaa dɩyɛzumanlɛ yɩ zʋ nɩ kɛdɩ nɣanlɩ kɛɛ ɩsɛ kɛɛ ɩfʋlɔ yɛ mbɔmɩ sʋ̃maa, mmɩlɩ po mɔɔ abiyemmɔ belényianlɩ nwʋmɔ ɔhʋanɩ bɛlɛ́tɩndɛlɩ nɩ. Sɛ ɩba yɩ zɔ a, ɩkɛma mmenii mvʋlɔ bɛ padi kogolɔ kɛɛ bekebigyia bɛ sa sʋlɔ.—Odw. 3:7.

15. (a) Sɛ bɛáfʋlɔ yɛ ma yɛma munwalɩyɛ a, kɛ ɩsɛ kɛɛ yɛyɛ yɛ dɩyɛ yese a? (b) Mɩnla yɛ bɛzabɛ mɔɔ bekila dɩyɛzumanlɛ zʋ nɩ kɛyɛ kɛva kehile kɛɛ bɔdwɩnɩ abiyela nwʋ a? (Kila alɩka mɔɔ ise “ Mmɩlɩ Mɔ Ekilaa Dɩyɛzumanlɛ Zʋ.”)

¹⁵ Sɛ dɩyɛzumanlɛ ɩkɔlɩɩ zʋlɔ na mmeliyema sʋ̃maa pigyia bɛ sa sʋlɔ a, ebiye a elényia ɔnwʋmɔ ɔhʋanɩ kɛma munwalɩyɛ sʋ̃maa kɛmɔ ɛpɛ yɩ nɩ. Itwu mmɩlɩ be a, ebiye a enii mɔɔ ikilaa dɩyɛzumanlɛ yɩ zʋ nɩ ɩlɔ́fʋlɔ yɛ kʋlaa. Sɛ ɩba yɩ zɔ a, sa ɩkʋla ɩma wʋ padi kolɔ, naasʋ̃ áma ɛfa ɛya.—Odw. 7:9.

16. Kɛ yɛkɛyɛ na yɛahyɛ bɛzabɛ mɔɔ bɛma munwalɩyɛ nɩ ɛzɩzɩbɛ a?

¹⁶ Sɛ wʋákʋla ma munwalɩyɛ sʋ̃maa kɛmɔ ɛpɛ yɩ a, mɩnla ti mɔɔ wʋádiye mmenii mvʋlɔ bo munwalɩyɛ yɩ bʋwɔ na bɔpɔ dɩyɛzumanlɛ a wʋahamvʋ bɛ a? Wʋ ɛhamvʋlɛ yɩ kɛhyɛ wʋ mmeliyema ɛzɩzɩbɛ kɛmɔ ankɩ wu munwalɩyɛ yɩ kɛyɛ nɩ la. (Ɛɣɛ. 10:21) Ɛhamvʋlɛ dɩ ɔhʋanɩ fʋlɔ mɔɔ yeduwa zʋ yɛhyɛ yɛ nwʋ yɛ nwʋ ɛzɩzɩbɛ.

17. (a) Kɛ ɩkɛyɛ na awʋvʋlɔ bɛawʋwa bo nnwuakula ma bɛaziyeziye munwalɩyɛ mɔɔ bɔkɔhʋla bɛkɛma a? (b) Wɔ vidiyo yi nu nɩ, mɩnla nninyeni anla yɛ ɩkɔwʋwa yɛ ma yekeziyeziye munwalɩyɛ a? (Kila azɩkɛnɩ odwokɔ yɩ.)

¹⁷ Mɩnla ɔhʋanɩ mvʋlɔ zʋ yɛ yɛkɔhʋla kɛhyɛ yɛ nwʋ yɛ nwʋ ɛzɩzɩbɛ wɔ dɩyɛzumanlɛ tʋ a? Sɛ ɛdɩ ɔwʋvʋlɔ a, bʋwa wu nnwuakula ma beziyeziye munwalɩyɛ mɔɔ bɔkɔhʋla bɛkɛma. (Mt. 21:16) Ɩyɛ a, yesuma ndwokɔ be mɔɔ ɩfalɩ agyiahʋnlɩ nu ndwokɔzɩzɩbɛ anzɛnyɩɩ  ɛbɩlawɔlɛ nwʋ, naasʋ̃ mɔɔ ɩdɩ bela nɩ nkyɩkyɛmi ɔkʋ̃ anzɛnyɩɩ anwɩ̃ be wɔ kɛnɩ mɔɔ kuakula kɔhʋla kɛma nwʋmɔ munwalɩyɛ. Akʋ̃ sʋ̃, bʋwa wu nnwuakula ma bɔnwʋ kɛɛ, kɛ mmɩlɩ munwala yɛ bepigyia bɛ sa a bɔkɔvʋlɔ bɛ a. Sɛ bɛtɩ yɩ tʋ zɔ a, ɩlɛ́ma bɛ padi kogolɔ wɔ mmɩlɩ mɔ bɛáfʋlɔ bɛ nɩ.—1 Tim. 6:18. d

18. Kɛ ɩkɛyɛ na yɛáhwɩnlɩ adwɩnɩ yeáziyeli yɛ nwʋ zʋ mmɩlɩ mɔ yɛmaa munwalɩyɛ nɩ a? (Ɛɣɛlɛwulɛ 27:2)

¹⁸ Ye munwala kɔhʋla keziyeziye munwalɩyɛ mɔɔ ɩkɛhyɛ Gyehova animinyiamɩ na ɩkɛhyɛ ye mmeliyema ɛzɩzɩbɛ. (Ɛɣɛ. 25:11) Ɩwɔ numɔ, ɩyɛ a sa yɛkʋla yɛma yɛ ozumalɛnwʋnlɛ be dɩyɛ, naasʋ̃ íni kɛɛ yɛkã yɛ nwʋ ndwokɔ sʋ̃maa. (Kɩnga Ɛɣɛlɛwulɛ 27:2; 2 Kɔl. 10:18) Mfomi yɛbɔ mmɔdɩnɩ kɛɛ yɛkɔhwɩ̃ adwɩnɩ yekeziye Gyehova, yi Odwokɔ yɩ, nɩɩ yi mmenii munwala zʋ. (Yik. 4:11) Sɛ ɩba yɩ kɛɛ nkyɩkyɛmi be yi odwokɔɣizialɛ yɩ pɩbɛ kɛɛ yɛkã yɛ ozumalɛnwʋnlɛ a, ɩdɩ yɩ ɔhʋanɩ zʋ kɛɛ yɛkɛyɛ zɔ. Eyi nwʋ ndianwʋ wɔ nkyɩkyɛmi mɔɔ ili ɛkɛnɩ nɩ nu.

19. (a) Sɛ yekile kɛɛ yɛdwɩnɩ bɛzabɛ mɔɔ bɛɣa dɩyɛzumanlɛ munwala nwʋ a, mɩnla yɛ ɩzʋ̃ numɔ ɩkɛɣa a? (Wulomimaa 1:11, 12) (b) Mɩnla yɛ wʋ anyɩ deli nwʋmɔ wɔ munwalɩyɛ mɔɔ yɛma wɔ dɩyɛzumanlɛ tʋ nɩ nwʋ a?

¹⁹ Bɛáhyɛ yɛ kɛɛ yɛmá munwalɩyɛ wɔ ɔhʋanɩ pɔkyɩɩ be zʋ dɩyɛ, naasʋ̃ ye munwala kɔhʋla kɛma munwalɩyɛ wɔ ɔhʋanɩ be zʋ mɔɔ ɩkɛhyɛ ye mmeliyema ɛzɩzɩbɛ. Eyi kehile kɛɛ yɛkɛda yɛkɛma munwalɩyɛ, anzɛnyɩɩ yɛkɛma yɛ anyɩ kɔzɔ ɔnwʋmɔ ɔhʋanɩ mɔɔ yɛwɔ kɛɛ yɛkɛma munwalɩyɛ nɩ, na yɛama yɛ anyɩ iale ɩama mmenii mvʋlɔ kɛɛ bɔkʋla bɛma munwalɩyɛ. Sɛ yɛfa yɛ adwɩnɩ yesiye mɔɔ ihyinyia mmenii mvʋlɔ sʋ̃ zʋ wɔ asafʋ ayiyialɩyɛ tʋ a, ye munwatĩĩ ‘yɛkɛhyɛ yɛ nwʋ yɛ nwʋ ɛzɩzɩbɛ.’—Kɩnga Wulomimaa 1:11, 12.