1. Mɩnla yɛ izili ansaana Gyisɛsɩ ɩbayɛ nnwʋánlɩdɩyɛ mɔɔ ili bɔmʋnlɩ nɩ a?

 TUÁ mɔɔ izili wɔ ɔlʋbɔ 29 Y.M. nu yɩ awielɩyɛ nɩ nwʋ mfonyini kila. Nɩ banzɛmɔ Gyisɛsɩ ɩwɔ yɩ ɔzʋ̃mɩnlɛ egyima yɩ tʋ a. Bɔdʋlɩ salɛ bɔvʋlɔlɩ ɩ nɩɩ yɩ maamɩ Mɛɛlɩ, nɩɩ adʋwavʋlɔ yɩ bo nu be bɔhɔlɩ ayɩfʋlɔ be tʋ wɔ Keena, suwa be mɔɔ nɩ ɩwɔ Gyisɛsɩ yɩ twonwa zʋ Nazɩlɛtɩ yi tisʋlɔ ɔfʋã nu. Nɩ Mɛɛlɩ dɩ ɔzɔ abusunwa yɩ bɔ ɔhɔnwʋ na ɩkɛyɛ kɛɛ nɩ ɩbʋwaa ma bekele ngyɛvʋlɔ. Naasʋ̃ mmɩlɩ mɔ ayɩfʋlɔ yɩ ɩkɔlɩɩ zʋlɔ nɩ, debe zili mɔɔ ankɩ sa ɩkʋla ɩma abusunwa yɩ nɩɩ agyiahʋnlɩmaa fʋlɔ eyi bɛ anyunu kua azɩ. Nzã mɔɔ ɩwɔ ayɩfʋlɔ yɩ tʋ nɩ zanlɩ. b Ebiye a, ngyɛvʋlɔ mɔɔ bɛɣalɩ nɩ yɛlɩ sʋ̃maa dɛlalɩ mɔɔ nɩ bekilaa yɩ ɔhʋanɩ. Ndɛndɛ la a, Mɛɛlɩ hɔlɩ yɩ ɣa yɩ pɛ hɔ zeli yi kɛɛ: “Bɛ nzã yɩ ɩzã.” (Dwɔ. 2:1-3) Mɩnla yɛ Gyisɛsɩ yɛlɩ a? Ɩyɛlɩ nnwʋánlɩ dɩyɛ kezile be. Ɩmanlɩ nzulo lanɩnlɩ “nzã baaba.”—Dwɔ. 2:9, 10.

2-3. (a) Mɩnla nnwʋánlɩ nninyeni yɛ Gyisɛsɩ yɛlɩ a? (b) Sɛ yesunzu Gyisɛsɩ yɩ nnwʋánlɩ nninyeni yɩ nwʋ a, kɛ ɩkɔwʋwa yɛ ikeze a?

² Gyisɛsɩ yɛlɩ nnwʋánlɩ nninyeni sʋ̃maa wɔ yɩ ɔzʋ̃mɩnlɛ egyima yi nu. c Ɩvalɩ yi tumi ɩwʋwalɩ mmenii abʋmɩ abʋmɩ sʋ̃maa. Kɛ ndianwʋ nɩ, wɔ nnwʋánlɩ nninyeni anwɩ̃ pɛ mɔɔ ɩyɛlɩ nu nɩ, ɩmanlɩ mmenyia 5,000 alɩyɛ na mmɩlɩ fʋlɔ sʋ̃ ɩmanlɩ mmenyia 4,000 alɩyɛ. Na sɛ yɛfa mmaalɛ nɩɩ nnwuakula mɔɔ nɩ bɔwɔ ɛkɛnɩ yɛkɩnla nwʋ a, ɩkɛyɛ mmenii 27,000  nɩɩ yɩ mɛda. (Mt. 14:15-21; 15:32-38) Wɔ ɔzɔ mmɩlɩ yɩ nu la sʋ̃, ɩzalɩ mmenii sʋ̃maa mɔɔ nɩ bɔ nwʋ ɩba bɛ nɩ adimakɛlɛ. (Mt. 14:14; 15:30, 31) Kila kezimɔ ɩyɛlɩ ɔlɔmɩ nɩ asibɔnwʋ kɛɛ Gyisɛsɩ luwalɩ nnwʋánlɩ ɔhʋanɩ zʋ zalɩ bɛ adimakɛlɛ na ɩmanlɩ alɩyɛ bɛ!

³ Nnɛ, sa yɛkʋla yesuma nninyeni sʋ̃maa wɔ nnwʋánlɩ nninyeni mɔɔ Gyisɛsɩ yɛlɩ nɩ nu. Wɔ dɩyɛzumanlɛ eyi nu nɩ, yekozunzu kezimɔ nnwʋánlɩ nninyeni azʋlɔtʋ nɩ be kɔhʋla kɛhyɛ ye dedi ɛzɩzɩbɛ nɩ nwʋ. Akʋ̃ sʋ̃, yekehila kezimɔ yekozumazuma kãnwʋazɩ nɩɩ kunlumiyɩbalɛ mɔɔ Gyisɛsɩ lalɩ yɩ ali mmɩlɩ mɔ ɩyɛɛ nnwʋánlɩ nninyeni azʋlɔtʋ nɩ.

4. Gyisɛsɩ yɩ nnwʋánlɩ nninyeni mɔɔ ɩyɛlɩ nɩ, ɩma yesuma debe yɛfalɩ aninyia yɩ nwʋ a?

⁴ Nnwʋánlɩ nninyeni mɔɔ Gyisɛsɩ yɛlɩ nɩ ɩma yesuma debe yɛfalɩ yɩ Zɩ sʋ̃ nwʋ mɔɔ ɩhyɛ ye dedi ɛzɩzɩbɛ, iluwakɛɛ Gyehova kɛnɩ yɛ tumi mɔɔ Gyisɛsɩ va yɛlɩ nnwʋánlɩ nninyeni yi munwala ɩzʋ̃ a. Egyima 10:38 kã kile yɛ kɛɛ: “Nyamɩnlɩ valɩ sunzuma nwanzanwanza vɔlɩ Gyisɛsɩ na ɩmanlɩ tumi yi, na ihyimanlɩ azɩlɛ yɩ zʋ ɩyɛlɩ nninyeniba na ɩzalɩ bɛzabɛ mɔɔ Abɔnsamɩ ɩhyɛ bɔ zʋ nɩ munwala adimakɛlɛ, iluwakɛɛ nɩ Nyamɩnlɩ kɩnla yɩ nwʋ.” Kakɛ kɛɛ mɔɔ Gyisɛsɩ yɛlɩ nɩɩ mɔɔ ɩhanlɩ, mɔɔ nnwʋánlɩ nninyeni mɔɔ ɩyɛlɩ munwala kɩnla nwʋmɔ nɩ, ɩva ɩlalɩ yɩ Zɩ yɩ adwɩnɩ nɩɩ yɩ nɣanlɩdɩlɛ ali pɛpɛɛpɛ. (Dwɔ. 14:9) Bɛmá yehila nninyeni asã mɔɔ yɛkɔhʋla yekozuma wɔ nnwʋánlɩ nninyeni mɔɔ Gyisɛsɩ yɛlɩ yi nu.

5. Mɩnla yɛ ɩhanlɩ Gyisɛsɩ ma ɩyɛlɩ nnwʋánlɩ nninyeni a? (Matiyu 20:30-34)

⁵ Mɔɔ ili bɔmʋnlɩ, Gyisɛsɩ nɩɩ yɩ Zɩ dɔ yɛ baaba paa. Mmɩlɩ mɔ ɩwɔ azɩlɛ yɩ zʋ nɩ, ɩvalɩ yi tumi mɔɔ ɩyɛ nnwʋánlɩ nɩ ɩwʋwalɩ bɛzabɛ mɔɔ nɩ bɛfɛɛ nɩ ɩva ihileli kɛɛ ɩdɔ bɛ baaba. Eɣile ɔkʋ̃ be, anyɩnlɩsunliɣamaa anwɩ̃ zianlɩ yɩ kɛɛ ɩwʋwá bɛ. (Kɩnga Matiyu 20:30-34.) Yɛ yɩ ndwɩ kɛɛ, bɔ nwʋ yɛlɩ Gyisɛsɩ nwɔkɛ na ɩzalɩ bɛ adimakɛlɛ. Giliki dɩyɛyɛlɛ odwokɔ mɔɔ bekile yɩ tʋ “yɛlɩ yɩ nwɔkɛ” nɩ, ikile kunlumiyɩbalɛ mɔɔ numɔ yɛ sɩ mɔɔ abiye nyia wɔ yi nu. Ɔzɔ nɣanlɩdɩlɛ mɔɔ numɔ yɛ sɩ nɩ hanlɩ Gyisɛsɩ ma ɩlalɩ ɔlɔlɛ ali, ɩmanlɩ bɛzabɛ mɔɔ kɔmɩ ikũũ bɛ nɩ alɩyɛ, na ɩzalɩ kokobenii be adimakɛlɛ. (Mt. 15:32; Mk. 1:41) Sa yɛkʋla yenyia anwʋlazʋ kɛɛ Nyamɩnlɩ mɔɔ yi kunlumiyɩbalɛ dɩ kezi nɩ, ɩ nɩɩ yɩ Ɣa nɩ dɔ yɛ. Na sɛ bɔnwʋ kɛɛ yɛnwʋʋ amanɩyɛ a ɩyɛ ɛyɛkɛ bɛ. (Lk. 1:78; 1 Pit. 5:7) Bɔ nwʋ ɩpɩlɩɩ bɛ kɛɛ bɛkɛyɩ nninyeni mɔɔ ɩma adasamaa nwʋ amanɩyɛ munwala wɔ kɛ!

6. Mɩnla tumi yɛ Nyamɩnlɩ va wula Gyisɛsɩ yɩ sa a?

⁶ Mɔɔ ɩtɔ zʋlɔ anwɩ̃, Nyamɩnlɩ va tumi ɩma Gyisɛsɩ kɛɛ ɩva ili adasamaa munwala bɛ ɔhawʋ nwʋ egyima. Gyisɛsɩ yɛlɩ nnwʋánlɩ nninyeni va hileli kɛɛ, yɛ ɔhawʋ azʋlɔtʋ mɔɔ yɛzayɛ yɛlɔ́kʋla keli nwʋmɔ egyima nɩ, ɩwɔ tumi mɔɔ ɩkɛva ɩkɛyɩ wɔ kɛ. Kɛ ndianwʋ nɩ, ɩwɔ tumi mɔɔ ɩkɔhʋla ikele yɛ wɔ tanɩ mɔɔ ɩvalɩ adasamaa yɛ atɩɩtɩɩ munwala ɩɣalɩ nɩ yɩ tʋ. Na ɩkɛyɩ ɔhawʋ mɔɔ tanɩ va ɣa munwala, mɔɔ adimakɛlɛ nɩɩ owulo sʋ̃ kɩnla nwʋmɔ nɩ wɔ kɛnɩ. (Mt. 9:1-6; Wul. 5:12, 18, 19) Nnwʋánlɩ nninyeni mɔɔ ɩyɛlɩ nɩ di dasɩlɛ kɛɛ ɩkɔhʋla ɩkɛza adimakɛlɛ azʋlɔtʋ munwala na iadunwo awuvʋlɔ po. (Mt. 4:23; Dwɔ. 11:43, 44) Akʋ̃ sʋ̃, ɩwɔ tumi mɔɔ ɩkɔhʋla ɩkɛma ahumi mɔɔ yi munwa yɛ sɩ keyiaki na iali azunzuma evinli zʋ nkunimi. (Mk. 4:37-39; Lk. 8:2) Ɩhyɛ ɛzɩzɩbɛ kɛɛ yɛnwʋ kɛɛ Gyehova va tumi kezile mɔɔ ɩdɩ zɛ iwula yɩ Ɣa yɩ sa!

7-8. (a) Mɩnla anwʋlazʋ yɛ nnwʋánlɩ nninyeni mɔɔ Gyisɛsɩ yɛlɩ nɩ ɩma yenyia a?(b) Mɩnla nnwʋánlɩdɩyɛ yɛ ekilaa yɩ ɔhʋanɩ wɔ oyuwadɩ fʋlɔ yi nu a?

⁷ Mɔɔ ɩtɔ zʋlɔ asã, sa yɛkʋla yenyia anwʋlazʋ kɛɛ, nninyeniba mɔɔ bɔwɔ nwʋmɔ anʋhʋba kɛɛ  Nyamɩnlɩ Bulombunlililɛ kɛva kɛɣa nɩ, ɩkɛɣa numɔ. Nnwʋánlɩ nninyeni mɔɔ Gyisɛsɩ yɛlɩ wɔ azɩlɛ yɩ zʋ nɩ ma yɛnwʋ kɛɛ, kɛ Nyamɩnlɩ Bulombunlililɛ zʋ Bulombunli nɩ, ɩkɛyɛ mɔɔ ɩtɛla zɔ kʋlaa wɔ oyuwadɩ fʋlɔ yi nu. Sunzu nyilalɛ mɔɔ ɩlɛ́kyɛ Kɩlayɩsɩ yi tumililɛ nɩ kɛma yekenyia wɔ azɩlɛ yɩ zʋ nɩ nwʋ kila. Yekenyia pɔkɔdɩlɛ mɔɔ idi munli iluwakɛɛ ɩkɛyɩ adimakɛlɛ nɩɩ sinidɔlɛ mɔɔ ɩwɔ adasamaa nwʋ munwala wɔ kɛ. (Ayɩ. 33:24; 35:5, 6; Yik. 21:3, 4) Kɔmɩ ilókũ yɛ ebiyekʋ̃ na yɛlɔ́nwʋ amanɩyɛ iluwa asianɩ ti. (Ayɩ. 25:6; Mk. 4:41) Yɛkɛva anyɩnlɩlelɛ kezile yɛkɛma yɛ alɔvʋlɔ mɔɔ nɩ bɔwɔ “ɛhakɛlɛ nna” yi nu munwala akwaaba. (Dwɔ. 5:28, 29) Mɩnla nnwʋánlɩdɩyɛ yɛ ekilaa yɩ ɔhʋanɩ paa wɔ oyuwadɩ fʋlɔ yɩ nu a?

⁸ Sɛ nɩ Gyisɛsɩ ɩyɛɛ nnwʋánlɩ nninyeni a, nɩ ɩda kãnwʋazɩ nɩɩ kunlumiyɩbalɛ kezile ali. Eyimmɔ dɩ subanɩ mɔɔ ɩsɛ kɛɛ yesuma. Bɛmá yezunzu numɔ anwɩ̃ nwʋ. Yɛbɔɔ yɩ tʋ wɔ ayɩfʋlɔ mɔɔ ɩhɔlɩ zʋlɔ wɔ Keena nɩ zʋ.

9. Mɩnla ti mɔɔ Gyisɛsɩ yɛlɩ nnwʋánlɩdɩyɛ wɔ ayɩfʋlɔ yɩ tʋ a? (Dwɔɔnʋ 2:6-10)

⁹ Kɩnga Dwɔɔnʋ 2:6-10. Mmɩlɩ mɔ nzã zanlɩ wɔ ayɩfʋlɔ yɩ tʋ nɩ, asʋ̃ nɩ ɩdɩ Gyisɛsɩ yi egyima kɛɛ ɩkɛyɛ nwʋmɔ debe a? Anhã. Nɩ nkɔmɩhyɛ bela íni kɛnɩ mɔɔ ikile kɛɛ Mɛzaya nɩ koluwa nnwʋánlɩ ɔhʋanɩ zʋ ɩkɛyɛ nzã. Mɔwʋ fa yɩ kɛɛ, ɩdɩ wʋzawʋ wʋ ayɩfʋlɔ yɛ nzã ɩzã wɔ yɩ tʋ mmɩlɩ mɔ mmenii sʋ̃maa belényianlɩ ebiye a, kɛ ɛkɛdɩ nɣanlɩ keze a? Gyisɛsɩ nyianlɩ kunlumiyɩbalɛ manlɩ abusunwa  yɩ, titili agyiahʋnlɩmaa yɩ, na nɩ ɩábɛ kɛɛ bɛ anyunu kua azɩ. Meti kɛmɔ yeli bɔmʋnlɩ yɛhã nɩ, ɩmanlɩ nzulo galɔnʋ 103 lanɩnlɩ nzã baaba. Ebiye a, ɩhyɛlɩ da la ɩyɛlɩ sʋ̃maa na ama bɛava ebiye bɛaziye ɛkɛnɩ bɛama eɣile be anzɛnyɩɩ ama agyiahʋnlɩmaa nɩ bɛadɔnɩ mɔɔ ɩkɛha nɩ na bɛanyia ozukua. Mɔwʋ kila kezimɔ agyiahʋnlɩmaa fʋlɔ eyi bɛ ahʋnlɩnɩ kɔdɔ bo kunlu!

10. Nninyeni be mɔɔ nwʋmɔ hyinyia ɛhɩnla dɩyɛ yɛ ɩwɔ Dwɔɔnʋ yi ti 2 yi nu a? (Kila mfonyini yi sʋ̃.)

¹⁰ Kila ndwokɔ be mɔɔ nwʋmɔ hyinyia mɔɔ bɛhã nwʋmɔ odwokɔ wɔ Dwɔɔnʋ yi ti 2 yi nu. Ɛyɛlɩ yɩ ndwɩ kɛɛ Gyisɛsɩ yɩzayɩ ɩásɩza nzulo ikua awʋlɔ awuwakɛ yi nu a? Mɔɔ ɩkɛyɛ na ɩáhwɩnlɩ adwɩnɩ ɩáɣalɩ yɩ nwʋ zʋ nɩ, ɩmanlɩ azʋ̃mɩvʋlɔ yɩ mfomi bɛzɩzalɩ nzulo bogualɩ awuwakɛ yɩ nu. (Nkyɩkyɛmi 6, 7) Na mmɩlɩ mɔ ɩmanlɩ nzulo yɩ ɩlanɩnlɩ nzã nɩ yɩzayɩ ɩása ebiye ɩkɔ ikile ayɩfʋlɔ zʋ ehilalɛvʋlɔ nɩ, mfomi ɩzʋ̃manlɩ azʋ̃mɩvʋlɔ yɩ. (Nkyɩkyɛmi 8) Gyisɛsɩ yɩzayɩ ɩáfa kɔpʋ ɩsa nzã yɩ be ɩkɔ ikyina mmenii anyunu tu yɩ nwʋ kɛɛ, ‘Bodwé nzã baaba mɔɔ mɩyɛ nɩ be behila!’

11. Mɩnla yɛ yɛkɔhʋla yekozuma wɔ Gyisɛsɩ yɩ nnwʋánlɩdɩyɛ yɩ nu a?

¹¹ Mɩnla yɛ yɛkɔhʋla yekozuma wɔ nzulo mɔɔ Gyisɛsɩ ɩmanlɩ ɩlanɩnlɩ nzã nɩ nu a? Yesuma debe yɛfalɩ kãnwʋazɩ nwʋ. Gyisɛsɩ ɩáfa nnwʋánlɩdɩyɛ eyi itu yɩ nwʋ, nɔhʋanlɛ nu nɩ, nninyeni mɔɔ ɩyɛlɩ nɩ ɩáfa numɔ bela itu yɩ nwʋ kyɩ̃. Mfomi ɩzʋ̃ kãnwʋazɩ nu ɩvalɩ nwʋmɔ animinyiamɩ munwala ɩmanlɩ yɩ Zɩ. (Dwɔ. 5:19, 30; 8:28) Sɛ yesumazuma Gyisɛsɩ na yɛkã yɛ nwʋ azɩ a, yɛlɛ́fa mɔɔ yɛkʋla yɛyɛ nɩ yekodu yɛ nwʋ. Ɩávalɩ nwʋmɔ mɔɔ yɛkʋla yɛyɛ wɔ Gyehova yɩ ɔzʋ̃mɩnlɛ nu nɩ, íni kɛɛ yɛfa yetu yɛ nwʋ, mfomi ɩsɛ kɛɛ yetu yɛ nwʋ kɛɛ yenyia ɔnwʋmɔ ɔhʋanɩ yɛsʋ̃mɩɩ Nyamɩnlɩ mɔɔ yɩ nwʋ yɛ nnwʋánlɩ nɩ. (Gyɛ. 9:23, 24) Bɛmá yɛva animinyiamɩ mɔɔ ɩfata yɩ nɩ yɛma yɩ. Iluwakɛɛ, sɛ kɛ Gyehova yɩ mmʋwalɩyɛ a, ankɩ yɛlɔ́kʋla yɛkɛyɛ dɩyɛ baaba bela.—1 Kɔl. 1:26-31.

12. Mɩnla ɔhʋanɩ fʋlɔ zʋ yɛ yɛkɔhʋla yekozumazuma Gyisɛsɩ yɩ kãnwʋazɩ nɩ a? Ma nwʋmɔ ndianwʋ.

¹² Kila ɔhʋanɩ fʋlɔ mɔɔ yɛkɔhʋla yekoluwa zʋ yekozumazuma Gyisɛsɩ yɩ kãnwʋazɩ nɩ. Tuá eyi nwʋ mfonyini kila: Asafʋ nu ebani be ɩva mmɩlɩ sʋ̃maa ɩwʋwa asafʋ nu sʋ̃mɩvʋlɔ be ma iziyeziye yɩ bagua nu ndɛnɩ mɔɔ ili bɔmʋnlɩ. Eyi ti, ndɛnɩ nɩ hɔlɩ bʋwɔ na asafʋ yi nu maa munwala bɛ anyɩ lelili nwʋmɔ. Mmɩlɩ mɔ bɔbɔlɩ dɩyɛzumanlɛ nɩ, yɛ abiye ɣalɩ asafʋ nu ebani yɩ pɛ hanlɩ hileli yi kɛɛ: ‘Wʋánwʋ kɛɛ abɩlantɩyɛ yɩ ndɛnɩ yɩ hɔlɩ bʋwɔ a?’ Asʋ̃ ɩsɛ kɛɛ asafʋ nu ebani eyi kã kɛɛ: ‘Nyɛ, naasʋ̃ mɩzamɩ yɛ mɩvalɩ mmɩlɩ sʋ̃maa mʋwʋwalɩ yɩ a’? Anzɛnyɩɩ ɩzʋ̃ kãnwʋazɩ nu ɩkɛhã kɛɛ: ‘Nyɛ, ɩhɔlɩ bʋwɔ paa. Mɩ anyɩ ile ma yɩ’ a? Sɛ yɛkã yɛ nwʋ azɩ a, yeléde nninyeniba mɔɔ yɛyɛ yɛma mmenii mvʋlɔ nɩ nwʋ animinyiamɩ. Yɛ ahʋnlɩnɩ tɔ ye kunlu, iluwakɛɛ yezi kɛɛ Gyehova yɩ anyɩ sɔ mɔɔ yɛyɛ nɩ. (Fa tindiã Matiyu 6:2-4; Hib. 13:16 nwʋ) Amba, sɛ yesumazuma Gyisɛsɩ na yɛkã yɛ nwʋ azɩ a, ɩma Gyehova yɩ anyɩ de.—1 Pit. 5:6.

13. Mmɩlɩ mɔ Gyisɛsɩ ɣikeli Neeni nɩ ɩnwʋnlɩ mɩnla, na mɩnla yɛ ɩyɛlɩ wɔ nwʋ a?

¹³ Kɩnga Luuku 7:11-15. Tuá mɔɔ izili mmɩlɩ mɔ Gyisɛsɩ dualɩ kɛyɛ ɔlʋbɔ anwɩ̃ wɔ yɩ ɔzʋ̃mɩnlɛ egyima yi nu nwʋ mfonyini kila. Nɩ idu ɔhʋanɩ ɩhɔ Galili twonwa be mɔɔ bɔfʋlɔ yɩ Neeni mɔɔ ibike Hyunɛmɩ nɩ. Ɛkɛnɩ yɛ Ilayɩhya dunwonli baalɛ be yɩ ɣa benyia yɩ a. (2 Aw. 4:32-37) Ɩka ɛgyɩkɩ̃ɩ̃ ma Gyisɛsɩ itwu twonwa yi nu nɩ, ɩnwʋnlɩ kɛɛ bɛlɛ funli be botuaa nu. Nɩ ɩyɛ alɔbɔ baaba, iluwakɛɛ nɩ baalɛ be yɩ ɣa ɔkʋ̃ pɛ mɔɔ ɩwɔ nɩ iwu. Nɩ ɔlɔmɩ sʋ̃maa be kɩnla baalɛ mɔɔ idii alɔbɔ nɩ nwʋ. Gyisɛsɩ manlɩ begyinanlɩ na ɩyɛlɩ  dɩyɛ sʋnʋnkʋ̃ be ɩmanlɩ baalɛ mɔɔ idii alɔbɔ yɩ. Idunwonli yɩ ɣa benyia yɩ! Mmenii asã mɔɔ Gyisɛsɩ dunwonli bɛ mɔɔ bɛhã nwʋmɔ odwokɔ wɔ Odwokɔba anla yi nu nɩ, eyi yɛ ili bɔmʋnlɩ a.

14. Nninyeni mɔɔ nwʋmɔ hyinyia ɛhɩnla dɩyɛ yɛ ɩwɔ Luuku yi ti 7 yi nu a? (Kila mfonyini yi sʋ̃)

¹⁴ Kila ndwokɔ be mɔɔ nwʋmɔ hyinyia mɔɔ bɛhã nwʋmɔ odwokɔ wɔ Luuku yi ti 7 yi nu. Ɛyɛlɩ yɩ ndwɩ kɛɛ Gyisɛsɩ “nwʋnlɩ” baalɛ mɔɔ nɩ idii alɔbɔ yɩ na akʋ̃ “ɩyɛlɩ yɩ alɔbɔ” a? (Nkyɩkyɛmi 13) Ebiye a, Gyisɛsɩ nwʋnlɩ kɛɛ baalɛ nɩ ɩlɛ ozunɛ ili funli yi mɛda, na eyi hanlɩ yɩ ma inyianlɩ kunlumiyɩbalɛ ɩmanlɩ yɩ. Baalɛ nɩ yɩ nwʋ ɩáyɛ Gyisɛsɩ alɔbɔ kɛkɛ, mfomi ɩlalɩ kunlumiyɩbalɛ sʋ̃ ali ihileli yɩ. Ɩvalɩ nnɩ mɔɔ ɩla azɩ bɔkɔɔ ɩhanlɩ ihileli yɩ kɛɛ: “Yiaki Ozunɛ.” Akʋ̃ ɩyɛlɩ debe ɩwʋwalɩ yɩ. Idunwonli yɩ ɣa benyia yɩ na “ɩvalɩ yɩ ɩmanlɩ yɩ maamɩ.”—Nkyɩkyɛmi 14, 15.

15. Mɩnla yɛ yɛkɔhʋla yekozuma wɔ Gyisɛsɩ yɩ nnwʋánlɩdɩyɛ yɩ nu a?

¹⁵ Mɩnla yɛ yɛkɔhʋla yekozuma wɔ kunavʋlɔ yɩ ɣa mɔɔ Gyisɛsɩ dunwonli yi nɩ nu a? Yesuma kɛɛ ɩsɛ kɛɛ yɛda kunlumiyɩbalɛ ali yekile bɛzabɛ mɔɔ bedii alɔbɔ nɩ. Ɩwɔ numɔ, yɛlɔ́kʋla yekodunwo awuvʋlɔ kɛmɔ Gyisɛsɩ yɛlɩ nɩ. Naasʋ̃ dɩkɛɛ Gyisɛsɩ nɩ, sa yɛkʋla yɛfa yɛ anyɩ yetiã azɩ na yɛala kunlumiyɩbalɛ ali yɛahile bɛzabɛ mɔɔ bɛ alɔvʋlɔ wu nɩ. Sa yɛkʋla yɛda kunlumiyɩbalɛ ali yekile bɛ iluwa mɔɔ yɛkɛhã nɩɩ mɔɔ yɛkɛyɛ yɛkɔwʋwa bɛ na yɛayɩkyɩ bɛ ɛɣɛɛlɛ nɩ zʋ. d (Ɛɣɛ. 17:17; 2 Kɔl. 1:3, 4; 1 Pit. 3:8) Sɛ yɛkã ndwokɔ be anzɛnyɩɩ yɛyɛ debe ɛgyɩkɩ̃ɩ̃ be yɛfa yɛkyɩkyɩ bɛ ɛɣɛɛlɛ a, ɩkɛma bɛ ahʋnlɩnɩ kɔdɔ bo kunlu paa.

16. Kɛmɔ behile wɔ mfonyini yi nu nɩ, Mɩnla yɛ osuma wɔ ozumanlɛnwʋnlɛ eyi nu a?

¹⁶ Kila ozumalɛnwʋnlɛ eyi. Alʋbɔ be mɔɔ idua nu nɩ, eliyema baalɛ be nwʋnlɩ kɛɛ enlinlɛ be mɔɔ ɩda ibike yɩ wɔ dɩyɛzumanlɛ tʋ nɩ isũũ mmɩlɩ mɔ bɔtʋʋ ndwomi nɩ. Nɩ ndwomi yi kã awudunwolɩyɛ nwʋ anyɩnlɩlazʋ yɩ nwʋ odwokɔ na baalɛ yɩ sʋ̃, nɩ yɩ ɣa kuakula baalɛ  wuli a ɩlɛ́kyɛlɩ. Nɩ eliyema baalɛ yɩ izi, meti iɣikeli yi, ɩvalɩ yɩ sa idianlɩ yɩ hɔ nu na ɩ nɩɩ yɩ dʋlɩ ndwomi yi. Aɣinzi yi, enlinlɛ yɩ hanlɩ kɛɛ, “Mɩɣa minyianlɩ ɔlɔlɛ kezile mɩmanlɩ mmeliyema mmenyia nɩɩ mmaalɛ yɩ.” Ɩyɛlɩ yɩ fɛ paa kɛɛ ɩhɔlɩ dɩyɛzumanlɛ ɔzɔ eɣile yi. Ɩhanlɩ kɛɛ, “Kɩndɔm Hɔɔlʋ yɛ yenyia ɛzɩzɩbɛhyɛlɛ a.” Sa yɛkʋla yenyia anwʋlazʋ kɛɛ Gyehova anyɩ sɔ nninyeni ngyɩkɩ̃ɩ̃ ngyɩkɩ̃ɩ̃ mɔɔ yɛyɛ yɛfa yɛda kunlumiba ali yekile bɛzabɛ mɔɔ bɛ alɔvʋlɔ wu na “bɛ ahʋnlɩnɩ iwuwu” nɩ.—Ndw. 34:18.

17. Mɩnla yɛ yɛɣa yezuma wɔ dɩyɛzumanlɛ eyi nu a?

¹⁷ Sɛ yesuma nnwʋánlɩ nninyeni mɔɔ Gyisɛsɩ yɛlɩ nɩ nwʋ dɩyɛ wɔ Bayɩbʋlʋ nu a, ɩkɛhyɛ ye dedi ɛzɩzɩbɛ. Ɩma yɛnwʋ kɛɛ Gyehova nɩɩ Gyisɛsɩ bɔdɔ yɛ na Gyisɛsɩ wɔ tumi mɔɔ ɩkɛva keli adasamaa munwala bɛ ɔhawʋ nwʋ egyima. Na sa yɛkʋla yenyia anwʋlazʋ kɛɛ sɛ Nyamɩnlɩ Bulombunlililɛ bɔ yɩ tʋ kɛɛ idii tumi wɔ azɩlɛ yɩ zʋ a, nyilalɛ mɔɔ ɩwɔ nwʋmɔ anʋhʋba munwala kɛɣa nu. Mmɩlɩ mɔ yesunzuu nnwʋánlɩ nninyeni eyimmɔ nwʋ nɩ, sa yɛkʋla yɛdwɩnɩndwɩnɩ kezimɔ yekozumazuma Gyisɛsɩ yi subanɩ nɩ nwʋ. Sa ɔkʋla ɛyɛ nhyɩhyɛlɩyɛ mɔɔ ɛkɛva kozuma Gyisɛsɩ yɩ nnwʋánlɩ nninyeni mvʋlɔ nwʋ dɩyɛ anzɛnyɩɩ sa bɔkʋla bosuma wɔ abusunwa ɔzʋ̃mɩnlɛ tʋ. Kila ozumalɛdɩyɛ mvʋlɔ mɔɔ ekenyia na kã nwʋmɔ odwokɔ kile mmenii mvʋlɔ. Sɛ ɛyɛ zɔ a, sa benyia ɛzɩzɩbɛhyɛlɛ ndwokɔ sʋ̃maa bɔbɔ nwʋmɔ nkɔmmɔ!—Wul. 1:11, 12.

18. Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁸ Mmenii asã mɔɔ Gyisɛsɩ dunwonli bɛ mɔɔ bɛhã bɔ nwʋ odwokɔ nɩ, ɩka ɛgyɩkɩ̃ɩ̃ ma iwie yɩ ɔzʋ̃mɩnlɛ egyima yɩ yɛ idunwonli mɔɔ itualɩ yɩ tʋ yɩ a. Naasʋ̃ nɩ eyi dɩ sʋnʋnkʋ̃ kʋlaa. Idunwonli yɩ ɔhɔnwʋ mɔɔ nɩ ɩpɛ yɩ odwokɔ paa wɔ bʋwabɩlɛ sʋnʋnkʋ̃ be nu. Mɩnla yɛ yɛkɔhʋla yekozuma wɔ ɔzɔ nnwʋánlɩdɩyɛ yɩ nu a? Na kɛ ɩkɛyɛ na yɛahyɛ ye dedi ɛzɩzɩbɛ wɔ awudunwolɩyɛ nwʋ anyɩnlɩlazʋ yi nu a? Yekozunzu odwokɔɣizialɛ eyimmɔ nwʋ wɔ dɩyɛzumanlɛ mɔɔ ili kɛnɩ nɩ nu.