1. Mɩnla yɛ Gyisɛsɩ hanlɩ hileli yɩ adʋwavʋlɔ yɩ falɩ awielɩyɛ yɩ nwʋ a, na mɩnla kɔkɔwɔlɛ yɛ ɩva ɩmanlɩ bɛ a?

 ƖKA eɣile ɛgyɩkɩ̃ɩ̃ ma Gyisɛsɩ wu nɩ, yɩ adʋwavʋlɔ yɩ numɔ anla ɣizialɩ yɩ kɛɛ: ‘Mɩnla yɛ ɩkɛyɛ oyuwadɩ yɩ awielɩyɛ nwʋ sɛnkyɩlɛdɩ a?’ (Mt. 24:3) Ebiye a nɩ adʋwavʋlɔ yɩ bebiziaa mɔɔ ɩkɛma bɔkɔnwʋ mmɩlɩ mɔ bɛkɛzɩkɛ Gyelusalamɩ nɩɩ asɔlɩ aliyia yɩ. Mmɩlɩ mɔ Gyisɛsɩ ɩyɩɩ yi munwa nɩ, ɩákã Gyelusalamɩ nɩɩ asɔlɩ aliyia yɩ ɛzɩkɛlɛ nkʋ̃ nwʋ odwokɔ, mfomi ɩhanlɩ “oyuwadɩ yɩ awielɩyɛ” mɔɔ yɛda numɔ sikalɛyɩ yɩ awielɩyɛ nwʋ odwokɔ sʋ̃. Gyisɛsɩ ɩkãã oyuwadɩ yɩ awielɩyɛ nwʋ odwokɔ nɩ, ɩhanlɩ kɛɛ: “Mɔɔ ɩfalɩ eɣile yi anzɛnyɩɩ dɔnɩhwɩlɩ yɩ nwʋ nɩ abiyela ízi, awɔvʋlɔ mɔɔ bɔwɔ sʋlɔ nɩɩ Ɛɣalɛ nɩ po bézi, gyɩsɛ Ɛzɩlɛ yɩ.” Akʋ̃ ɩwɔlɩ yɩ adʋwavʋlɔ yɩ munwala kɔkɔ kɛɛ “bɔhɔ́ zʋ bɛma bɛ anyɩ ɩla kɛ” na “bɔhɔ́ zʋ bɔwɩɛnɩ.”—Mk. 13:32-37.

2. Mɩnla ti mɔɔ nɩ ɩsɛ kɛɛ Kilisinyiamaa mɔɔ nɩ bɔwɔ adʋwavʋlɔ bɛ mmɩlɩ zʋ nɩ kɔ zʋlɔ wɩɛnɩ a?

² Nɩ ɩsɛ kɛɛ Dwuumaa mɔɔ bɛɣa bɛyɛ Kilisinyiamaa wɔ adʋwavʋlɔ yɩ bɛ mmɩlɩ zʋ nɩ kɔ zʋlɔ wɩɛnɩ, iluwakɛɛ nɩ bɔ nnwʋanlɩ igyĩ zʋlɔ. Gyisɛsɩ manlɩ yɩ adʋwavʋlɔ yɩ sɛnkyɩlɛdɩ mɔɔ ɩkɛma bɔkɔnwʋ kɛɛ Gyelusalamɩ nɩɩ asɔlɩ aliyia yɩ ɛzɩkɛlɛ iɣike. Ɩhanlɩ kɛɛ: “Sɛ bɔnwʋ kɛɛ azogyiamaa dua Gyelusalamɩ nwʋ yiyia a, mɛyɩ nɩ bɔnwʋ́ kɛɛ yɩ ɛzɩkɛlɛ iɣike.” Ɔzɔ mmɩlɩ nɩ, nɩ ɩsɛ kɛɛ betiye Gyisɛsɩ yɩ kɔkɔwɔlɛ yɩ na ‘benɣiandi bɔkɔ avile nɩ mmɔ zʋ.’ (Lk. 21:20, 21) Bɛzabɛ mɔɔ bediyeli kɔkɔwɔlɛ eyi nɩ benyianlɩ nnwʋanlɩ mmɩlɩ mɔ Wulomimaa nɩ ɣa zɩkɛlɩ Gyelusalamɩ nɩ.

3. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

 ³ Nnɛ amɩyɛ sʋ̃ yɛda oyuwadɩ tanɩ eyi yɩ awielɩyɛ mmɩlɩ nu. Meti ɩsɛ kɛɛ yɛma yɛ anyɩ da kɛnɩ na yɛwɩɛnɩ. Wɔ dɩyɛzumanlɛ eyi nu nɩ, yekozunzu kezimɔ yɛkɛma yɛ anyɩ kɛla kɛ mmɩlɩ mɔ yekilaa mɔɔ isizii wɔ oyuwadɩ, kezimɔ yekehila yɛ nwʋ bʋwɔ nɩɩ kezimɔ yɛkɛva mmɩlɩ mɔ ɩha nɩ yekeli egyima bʋwɔ nɩ nwʋ.

4. Mɩnla ti mɔɔ ɩsɛ kɛɛ yɛfa yɛ anyɩ yedi mɔɔ isizii wɔ oyuwadɩ eyi nu nɩɩ kezimɔ ɩmaa Bayɩbʋlʋ nkɔmɩhyɛ ɩbaa nu nɩ mɛda a?

⁴ Iluwakɛɛ yɛpɛ kɛɛ yɛnwʋ kɛɛ Bayɩbʋlʋ nkɔmɩhyɛ ɩbaa numɔ nɩ ti, yɛfa yɛ anyɩ yedi mɔɔ isizii wɔ oyuwadɩ yi nu nɩ mɛda. Kɛ ndianwʋ nɩ, Gyisɛsɩ hileli nninyeni azʋlɔtʋ be mɔɔ sɛ isizi a, ɩkɛma yɛkɔnwʋ kɛɛ Setanɩ yɩ oyuwadɩ eyi yɩ awielɩyɛ iɣike. (Mt. 24:3-14) Sʋ̃mavʋlɔ Pita hyɛlɩ yɛ ɛzɩzɩbɛ kɛɛ yɛvá yɛ adwɩnɩ yeziye nkɔmɩhyɛ azʋlɔtʋ yɩ numɔɣalɛ zʋ na ama ye dedi ɩayɛ ɛzɩzɩbɛ. (2 Pit. 1:19-21) Ndwokɔ mɔɔ ɩwɔ Bayɩbʋlʋ buuku mɔɔ itualɩ yɩ tʋ nu nɩ bɔ yɩ tʋ kɛɛ: “Gyisɛsɩ Kɩlayɩsɩ yɩ yikile mɔɔ Nyamɩnlɩ va manlɩ yɩ, kɛɛ ɩva ihile yɩ nkɛlɛ nninyeni mɔɔ ɩsɛ kɛɛ isizi ndɛndɛ nɩ.” (Yik. 1:1) Eyi ti yɛfa yɛ anyɩ yedi mɔɔ isizii wɔ oyuwadɩ eyi nu nɩɩ kezimɔ ɩmaa Bayɩbʋlʋ nkɔmɩhyɛ ɩbaa nu nɩ mɛda. Na ebiye a yɛ nwʋ kɛbɩlɩ yɛ kɛɛ yɛ nɩɩ mvʋlɔ kozunzu mɔɔ isizii nɩ nwʋ.

5. Mɩnla yɛ íni kɛɛ yɛyɛ a, na mɩnla yɛ ɩsɛ kɛɛ yɛyɛ a? (Kila mfonyini yi sʋ̃.)

⁵ Sɛ yesunzuu Bayɩbʋlʋ nkɔmɩhyɛ nwʋ a íni kɛɛ yɛbɔ ye ti nu yɛkã mɔɔ ikezi. Mɩnla ti a? Iluwakɛɛ yɛábɛ kɛɛ yɛkɛhã debe mɔɔ ɩkɛma nkyɩkyɛmi kɛɣa asafʋ yɩ nu. Kɛ ndianwʋ nɩ, ebiye a yɛkɛdɩ kɛɛ oyuwadɩ adumivʋlɔ bɛkãã kɛɛ sa bɔkʋla bɛma bɛsabɛsayɛlɛ be tʋ tua na bɛama yeanyia azʋ̃nudwolɩyɛ nɩɩ banɩwɔlɛ. Kɛ ankɩ yɛkɔwɔ ye ti nu yɛkɛhã kɛɛ Bayɩbʋlʋ nkɔmɩhyɛ mɔɔ ɩwɔ 1 Tɛsalonikamaa 5:3 yɛ ɩbaa numɔ nɩ, ɩsɛ kɛɛ yɛnwʋ ndwokɔ mɔɔ ɩfalɩ nwʋmɔ mɔɔ bedindimi aɣile asã yɩ la nɩ. Sɛ yɛfa yɛ nkɔmmɔ munwala yekyina yɛ awuuku azʋlɔtʋ mɔɔ Gyehova ahyɩhyɛdɩ yɩ idindimi nɩ zʋ a, nɩ yɛbʋwaa ma ɔkʋ̃yɛlɛ kɔwʋwa asafʋ yi nu na ‘ye nzunzunlɩyɛ munwala ɩayɛ ɔkʋ̃.’—1 Kɔl. 1:10; 4:6.

6. Mɩnla yɛ yɛkɔhʋla yekozuma wɔ 2 Pita 3:11-13 yi nu a?

⁶ Kɩnga 2 Pita 3:11-13. Sʋ̃mavʋlɔ Pita bʋwa yɛ ma yɛnwʋ adwɩnɩ mɔɔ ɩsɛ kɛɛ yɛfa yesunzu Bayɩbʋlʋ nkɔmɩhyɛ nwʋ. Ɩhyɛ yɛ ɛzɩzɩbɛ kɛɛ ‘yɛmá Gyehova yi eɣile nɩ yɩ ɛɣalɩyɛ ɩwʋwa yɛ adwɩnɩ nu.’ Mɩnla ti a? Kɛ “eɣile nɩɩ dɔnɩhwɩlɩ” mɔɔ Gyehova kɛva Amagadɔnʋ kɛɣa yɛ yɛpɛ kɛɛ yɛnwʋ yɩ a, mfomi yɛpɛ kɛɛ yɛfa mmɩlɩ mɔ ɩha nɩ yɛbɔ ‘ɛbɩla nwanzanwanza mɔɔ nwʋmɔ tɩ na yɛfa Nyamɩnlɩzʋ̃mɩnlɛba yɛbʋwa azɩ.’ (Mt. 24:36; Lk 12:40) Sɛ yɛkɛhã wɔ ɔhʋanɩ fʋlɔ zʋ a, yɛpɛ kɛɛ yɛbɔ ɛbɩla mɔɔ ɩtɩnɣɛ na yɛava yɛahile kɛɛ ɔlɔlɛ mɔɔ yɛwɔ yɛma Gyehova nɩ, yɛ ɩkã yɛ ma yɛzʋ̃ yɛ ahʋnlɩnɩ munwala nu yɛsʋ̃mɩ yɩ a. Mɔɔ ɩkɛyɛ na yɛahʋla yɛayɛ zɔ nɩ, ɩsɛ kɛɛ yekila yɛ nwʋ bʋwɔ.

7. Kɛ yɛkɛyɛ na yɛahile kɛɛ yekilaa yɛ nwʋ bʋwɔ a? (Luuku 21:34)

⁷ Gyisɛsɩ hanlɩ hileli yɩ adʋwavʋlɔ nɩ mmɔ kɛɛ, máma bɛfa bɛ adwɩnɩ besiye mɔɔ isizii wɔ oyuwadɩ yɩ zʋ nkʋ̃ la mfomi behilá bɛzabɛ bɔ nwʋ sʋ̃ bʋwɔ. Kɔkɔwɔlɛ eyi mɔɔ numɔ da kɛnɩ eyi nwʋ odwokɔ wɔ Luuku 21:34. (Kɩnga.) Yɛ́ Gyisɛsɩ yi ndwokɔ yɩ ndwɩ: “Behilá bɔ nwʋ bʋwɔ.” Enii mɔɔ ikila yɩ nwʋ bʋwɔ nɩ, ɩda yɩ nwʋ zʋ wɔ dɩyɛ bela mɔɔ ɩkɔhʋla ɩkɛzɩkɛ ɩ nɩɩ Gyehova avinli abusunwawɔlɛ nwʋ, na ɩyɛ debe ndɛndɛ ɩfa isi yɩ ɔhʋanɩ. Wɔ ɔzɔ ɔhʋanɩ  yɩ zʋ nɩ, nɩ ɩlɛ yɩ nwʋ isiye Nyamɩnlɩ yɩ ɔlɔlɛ nu.—Ɛɣɛ. 22:3; Dwu. 20, 21.

8. Mɩnla fʋlɔdulɛ yɛ Pɔɔlʋ va manlɩ Kilisinyiamaa a?

⁸ Sʋ̃mavʋlɔ Pɔɔlʋ hanlɩ hileli Kilisinyiamaa kɛɛ behila bɔ nwʋ bʋwɔ. Kɛ ndianwʋ nɩ, ɩhanlɩ ihileli Kilisinyiamaa mɔɔ nɩ bɔwɔ Ɛfɩsɛsɩ nɩ kɛɛ: “Behilá bɔ nwʋ bʋwɔ baaba na kezimɔ bɔbɔ bɛ ɛbɩla nɩ ɩáyɛ kɛɛ mmenii mɔɔ bézi nɣɛlɛbɛ mfomi kɛɛ nɣɛlɛbɛmaa.” (Ɛfɩ. 5:15, 16) Setanɩ bɔ mmɔdɩnɩ mmɩlɩ bela kɛɛ ɩkɛzɩkɛ yɛ nɩɩ Gyehova avinli, meti mɔɔ Bayɩbʋlʋ yɩ tu yɛ fʋlɔ kɛɛ ‘yɛwɔ́ mmɔdɩnɩ yɛbɩbɛlɩ nu yɛnwʋ Gyehova yɩ apɛdɩ’ na ama yɛahʋla yeagyina mɔɔ Setanɩ kɛva kɛɣa yɛ zʋ nɩ yi munwa.—Ɛfɩ. 5:17.

9. Kɛ ɩkɛyɛ na yɛanwʋ Gyehova yɩ apɛdɩ a?

⁹ Nninyeni mɔɔ ɩkɔhʋla ɩkɛzɩkɛ yɛ nɩɩ Gyehova avinli abusunwawɔlɛ nɩ, kɛ yi munwala yɛ Bayɩbʋlʋ yɩ kã kile yɛ a. Mbɔmɩ sʋ̃maa nɩ, ɩsɛ kɛɛ yesizi ndwokɔ be nwʋ abɔkɔ mɔɔ bɛlɛ́kanlɩ nwʋmɔ odwokɔ senyii wɔ Bayɩbʋlʋ yɩ nu. Meti sɛ yɛkɔhʋla yekezizi abɔkɔ mɔɔ nɣɛlɛbɛ wɔ nu a, ɩsɛ kɛɛ yɛpɩbɛlɩ numɔ yɛnwʋ “Gyehova yɩ apɛdɩ.” Mɩnla ɔhʋanɩ zʋ a? Iluwa Nyamɩnlɩ Odwokɔ yɩ mɔɔ yekozuma na yɛadwɩnɩndwɩnɩ nwʋmɔ eɣile bela nɩ zʋ. Sɛ yɛtɩ Gyehova yɩ apɛdɩ tʋ na yenyia “Kɩlayɩsɩ yɩ adwɩnɩ” a, ɩkɛma yɛkɛyɛ “nɣɛlɛbɛmaa” mmɩlɩ po mɔ bɛlɛ́falɩ mmɛla pɔkyɩɩ be bɛlɛ́manlɩ yɛ wɔ debe nwʋ nɩ. (1 Kɔl. 2:14-16) Nninyeni mɔɔ ɩkɔhʋla ɩkɛzɩkɛ yɛ nɩɩ Gyehova avinli nɩ, ebiye wɔ kɛ a, ɩáyɛ sɩ kɛɛ yɛkɔnwʋ yɩ, naasʋ̃ ebiye sʋ̃ wɔ kɛ a, ɩyɛ a ɩyɛ sɩ kɛɛ yɛkɔnwʋ yɩ.

10. Nninyeni mɔɔ ɩkɔhʋla ɩkɛzɩkɛ yɛ nɩɩ Gyehova avinli mɔɔ ɩsɛ kɛɛ yɛpʋ nɩ, ebiye yɛ lɛ mɩnla a?

¹⁰ Nninyeni mɔɔ ɩkɔhʋla ɩkɛzɩkɛ yɛ nɩɩ Gyehova avinli mɔɔ ɩsɛ kɛɛ yɛtwɩ̃ yɛ nwʋ wɔ nwʋmɔ nɩ ebiye yɛ lɛ kɛɛ, yekehile abiye nwʋ anyɩnlɩlelɛ wɔ ɔhʋanɩ mɔɔ ɩávata zʋ, nzã sʋ̃maa nlʋnlɛ, alɩyɛ sʋ̃maa lilɛ, ndwokɔ mɔɔ ɩwʋwɔ, anyɩnlɩlelɛdɩyɛ mɔɔ bɛsabɛsayɛlɛ wɔ nu, ponogɩlafi nɩɩ nninyeni mɔɔ ɩdɩdɩ zɔ. (Ndw. 101:3) Eɣile bela, yɛ tamvʋlɔ Abɔnsamɩ ɩpɛ ɔhʋanɩ mɔɔ ɩkɛva ɩkɛzɩkɛ yɛ nɩɩ Gyehova avinli abusunwawɔlɛ. (1 Pit. 5:8) Sɛ yɛáma yɛ anyɩ ɩda kɛ a, Setanɩ kɔhʋla koluwa mma tanɩ wɔ yɛ ahʋnlɩnɩ nu, dɩkɛɛ anyɩnlɩbʋlʋ, awohwililɛ, angʋmidi, ɛdanɩlɛ, ahantanɩ nɩɩ mmenii mvʋlɔ nwʋ ɛya mɔɔ yɛkɛva yekowula ye nu. (Gal. 5:19-21) Ebiye a ahyɛasɩ yɩ mɛyɩ yɛ adwɩnɩ kɛyɛ yɛ kɛɛ yɛtɩ nɣanlɩ zɔ a, ɩázɩkɛ dɩyɛ bela. Naasʋ̃, sɛ yɛátu agyiakɛ ndɛndɛ yetu yɩ tʋ a, sa ɩkʋla inyi wɔ ye nu na awielɩyɛ kʋlaa nɩ, iali yɛ awu.—Gye. 1:14, 15.

11. Mɩnla asianɩ yɛ ɩsɛ kɛɛ yɛtwɩ̃ yɛ nwʋ wɔ nwʋ a, na mɩnla ti a?

¹¹ Asianɩ ɔkʋ̃ mɔɔ ɩsɛ kɛɛ yɛtwɩ̃ yɛ nwʋ wɔ nwʋmɔ yɛ lɛ ɔhɔnwʋmmɔ tanɩ. Fa yɩ kɛɛ ɛ nɩɩ abiye mɔɔ ɩ́dɩ Gyehova Dasɩvʋlɔ yɛ bɛyɛ egyima a. Na ɛpɛ kɛɛ inyia Gyehova Dasɩvʋlɔmaa bɔ nwʋ adwɩnɩba meti ɛda kunlumiba ali ekile yi. Na ɩyɛ po a, ɛ nɩɩ yɩ bo numɔ kodi alɩyɛ. Naasʋ̃ ɩákyɛ yɛ ɔwɔlɩ yɩ tʋ kɛɛ ɛ nɩɩ yɩ bo numɔ keli alɩyɛ eɣile bela a. Na ɩyɛ na bɔbɔɔ nkɔmmɔ a, ɛbɩlazɩkɛlɛ nwʋ ndwokɔ findenli numɔ na ɔbɔ mmɔdɩnɩ kɛɛ ɔkɔwɔ kogua. Mmɩlɩ ɩkɔlɩɩ zʋlɔ nɩ, iluwakɛɛ nɩ ɛta ɛtɩ ndwokɔ mɔɔ ɩdɩdɩ zɔ nɩ ti nɩ iálile wʋ ebiyekʋ̃. Eɣile ɔkʋ̃ be, ɩhanlɩ hileli wʋ kɛɛ sɛ bɔpɔ egyima a ɛma bɔhɔ bɛbɛ nzã be bɔnlʋ, yɛɛ eleli edianlɩ nu a. Awielɩyɛ kʋlaa nɩ, ɔwɔlɩ yɩ tʋ kɛɛ ɛtɩɩ nɣanlɩ kɛɛ ɛ nɩɩ wʋ ɔhɔnwʋ nɩ yɛ adwɩnɩ wɔ nninyeni nwʋ. Babʋmɩ ɛkɩhyɩ yɩ, wʋanwʋ yɩ kɛɛ ɩlɛ́kyɛ na wʋawɔ yɩ tʋ kɛɛ ɛyɛ wʋ dɩyɛ kɛɛ wʋ ɔhɔnwʋ yɩ a? Ɩwɔ numɔ, yɛda kunlumiba nɩɩ ɔlɔlɛ ali yekile abiyela dɩyɛ, naasʋ̃ ɩsɛ kɛɛ yɛkakɛ kɛɛ bɛzabɛ mɔɔ yɛ nɩɩ bɛ bɔ paa nɩ bɛ nyɛlɩyɛ kɔhʋla kenyia yɛ zʋ tumi baaba. (1 Kɔl. 15:33) Sɛ yekila yɛ nwʋ bʋwɔ kɛmɔ  Gyisɛsɩ hanlɩ nɩ a, ɩkɔwʋwa yɛ ma yɛ nɩɩ bɛzabɛ mɔɔ bɛáva Gyehova yɩ mmɛla bɔbɔ bɛ ɛbɩla nɩ lɔ́bɔ pampɩɩ. (2 Kɔl. 6:15) Akʋ̃ sʋ̃, yɛkɔnwʋ asianɩ nɩ ndɛndɛ na yɛahwɩ̃ yɛ nwʋ wɔ nwʋ.

12. Mɩnla yɛ nɩ ɩsɛ kɛɛ Gyisɛsɩ yɩ adʋwavʋlɔ yɩ yɛ mmɩlɩ mɔ bɛdɩkɛɛ awielɩyɛ yɩ nɩ a?

¹² Nɩ Gyisɛsɩ ɩábɛ kɛɛ yɩ adʋwavʋlɔ yɩ bʋwa kɛnɩ zʋzɔ mmɩlɩ mɔ bɛdɩkɛɛ awielɩyɛ yɩ nɩ. Meti ɩvalɩ egyima iwulalɩ bɛ sa. Ɩhyɛlɩ bɛ kɛɛ bɛhã odwokɔba nɩ ‘wɔ Gyelusalamɩ, Dwudiyia nɩɩ Samaliyia munwala bɔhɔ bodwu oyuwadɩ yɩ dɩka bela.’ (Egy. 1:6-8) Nɩ ɩdɩ egyima kezile ɩma Gyisɛsɩ yɩ adʋwavʋlɔ yɩ baaba! Bɛvalɩ bɛ mmɩlɩ belili egyima bʋwɔ iluwa bɔ nwʋ munwala mɔɔ bɛva bowulalɩ odwokɔbahanlɛ egyima yɩ nu nɩ.

13. Mɩnla ti mɔɔ ɩsɛ kɛɛ yɛfa yɛ mmɩlɩ yedi egyima bʋwɔ a? (Kolosiyiamaa 4:5)

¹³ Kɩnga Kolosiyiamaa 4:5. Sɛ yekehila yɛ nwʋ bʋwɔ a, nɩ ɩsɛ kɛɛ yesunzu kezimɔ yɛfa yɛ mmɩlɩ yedi egyima nɩ nwʋ bʋwɔ. Iluwakɛɛ “asianɩ” kɔhʋla kɔdʋ ye nu bela. (Odw. 9:11) Kɛ ndianwʋ nɩ, sa yɛkʋla yewu aɣilevile nu.

14-15. Kɛ yɛkɛyɛ na yɛava yɛ mmɩlɩ yɛali egyima bʋwɔ a? (Hibulumaa 6:11, 12) (Kila mfonyini yi sʋ̃.)

¹⁴ Sa yɛkʋla yɛfa yɛ mmɩlɩ yedi egyima bʋwɔ iluwa Gyehova yɩ apɛdɩ mɔɔ yɛkɛyɛ nɩɩ yɛ nɩɩ yɩ avinli abusunwawɔlɛ mɔɔ yɛkɛhyɛ numɔ  ɛzɩzɩbɛ nɩ zʋ. (Dwɔ. 14:21) Ɩsɛ kɛɛ ‘yekyina pindinyii, yeléhimãhimã, na yɛyɛ sʋ̃maa wɔ Niibenyia yi egyima yi nu eɣile bela.’ (1 Kɔl. 15:58) Na ama sɛ awielɩyɛ nɩ ba a, kɛ ɩdɩ owulo o, oyuwadɩ tanɩ eyi yɩ awielɩyɛ o, yeánlunli yɛ nwʋ kyɩ̃.—Mt. 24:13; Wul. 14:8.

¹⁵ Nnɛ sʋ̃, Gyisɛsɩ kɔ zʋlɔ kile yɩ adʋwavʋlɔ ɔhʋanɩ wɔ Nyamɩnlɩ Bulombunlililɛ nɩ mɔɔ bɔbɔɔ yɩ ɛlawulo wɔ oyuwadɩ munwala nɩ nwʋ. Gyisɛsɩ li yɩ anʋhʋba zʋ. Iluwa Gyehova yɩ ahyɩhyɛdɩ yɩ zʋ ɩtɩdɩ yɛ wɔ kezimɔ yɛkɛyɛ dasɩlɛlilɛ egyima yɩ na ɩfa nninyeni mɔɔ yehyinyia ɩma yɛ ma yɛfa yɛkã odwokɔba yɩ. (Mt. 28:18-20) Amɩyɛ sʋ̃, yɛyɛ yɛ ɔfʋã nu dɩyɛ iluwa ɛhyɩmɛ mɔɔ yɛfa yɛyɛ odwokɔbahanlɛ nɩɩ ehilehilelɛ egyima yɩ na yɛkɔ zʋlɔ yɛwɩɛnɩ mmɩlɩ mɔ yɛdɩkɛɛ kɛɛ Gyehova kɛva oyuwadɩ nhyɩhyɛlɩyɛ eyi kɛɣa awielɩyɛ nɩ. Sɛ yɛfa fʋlɔdulɛ mɔɔ ɩwɔ Hibulumaa 6:11, 12 nɩ yɛyɛ egyima a, yɛkɔzɔ yɛ anyɩnlɩlazʋ yi nu ɛzɩzɩbɛ ɛzɩzɩbɛ ‘yɛkɔhɔ awielɩyɛ.’—Kɩnga.

16. Mɩnla yɛ yezi yɛ kɛnɣa kɛɛ yɛkɛyɛ a?

¹⁶ Gyehova wɔ mmɩlɩ pɔkyɩɩ nɩɩ dɔnɩhwɩlɩ ɔkʋ̃ mɔɔ ɩkɛva Setanɩ oyuwadɩ nhyɩhyɛlɩyɛ eyi ɩkɛɣa awielɩyɛ. Sɛ ɔzɔ eɣile yi twu a, Gyehova kɛma yɩ nkɔmɩhyɛ mɔɔ ɩwɔ yɩ Odwokɔ yɩ nu munwala kɛɣa nu. Naasʋ̃ ebiye a yɛkɛdɩ nɣanlɩ kɛɛ, mmɩlɩ mɔ oyuwadɩ eyi kɛɣa awielɩyɛ nɩ hyɛ sʋ̃maa. Naasʋ̃, Gyehova yɩ eɣile yi nɩ “ɩlɛ́kalɩ aɣinzi!” (Hab. 2:3) Ɩɣɩla kɛɛ, yekezi yɛ kɛnɣa kɛɛ ‘yɛkɔhɔ zʋlɔ yekehila Gyehova ɔhʋanɩ,’ na ‘yezí abʋtalɩ yɛlɩkɛ yɛ nnwʋanlɩlelɛ Nyamɩnlɩ nɩ.’—Mik. 7:7.