1. Kɛ yɛ nnwʋanlɩ tʋ bʋlɔ ma Gyehova ise a?

 FA YƖ kɛɛ wʋ ɔhɔnwʋ be ɩva aliyia ɩma wʋ, aliyia yɩ nwʋ peenti ɩyɛ dadampɔ na ayɩansɩ mɔɔ igua zʋlɔ sʋ̃ yɩ ɔfʋã be dɩdɩ. Naasʋ̃ ɩávalɩ nwʋmɔ ɔhawʋ ngyɩkɩ̃ɩ̃ mɔɔ ɩwɔ aliyia yɩ nwʋ nɩ sɛ ise ɩtɔnɩɩ yɩ a, ankɩ yɩ bʋlɔ kɛyɛ dɔla abʋmɩ abʋmɩ sʋ̃maa zɛ. Pɩlazunɛ bela íni nwʋmɔ kɛɛ ankɩ ekehile nwʋmɔ anyɩnlɩzɔlɛ na wʋayɛ mɔɔ ɔkɔhʋla bela wʋawɔ aliyia yɩ nwʋ banɩ. Ɔzɔ la sʋ̃ yɛ Gyehova ɩva akyɛdɩ be mɔɔ ɩtʋ bʋlɔ paa ɩma yɛ a, mɛyɩ yɛ lɛ yɛ nnwʋanlɩ. Nɔhʋanlɛ nu nɩ, Gyehova luwa yɩ Ɣa yɩ elelɛ afɔlɩ yɩ zʋ ihile yɛ kɛɛ, yɛ nnwʋanlɩ tʋ bʋlɔ ma yɩ paa.—Dwɔ. 3:16.

2. Kɛmɔ 2 Kɔlɛntɩmaa 7:1 kile nɩ, mɩnla yɛ Gyehova kila ɔhʋanɩ kɛɛ yɛkɛyɛ a?

² Nnwʋanlɩ zʋ̃ Gyehova kɛ. (Ndw. 36:9) Nɩ sʋ̃mavʋlɔ Pɔɔlʋ de odwokɔ eyi di, meti ɩhanlɩ kɛɛ: “Iluwa yɩ zʋ yɛ yɛwɔ nnwʋanlɩ na yɛkɩnhã yɛ nwʋ na yɛwɔ kɛnɩ a.” (Egy. 17:25, 28) Meti ɩdɩ yɩ ɔhʋanɩ zʋ kɛɛ yɛkɛhã kɛɛ yɛ nnwʋanlɩ dɩ akyɛdɩ mɔɔ ɩzʋ̃ Nyamɩnlɩ kɛ. Ɩzʋ̃ ɔlɔlɛ nu ɩfa dɩyɛ bela mɔɔ yehyinyia na ama yɛahɔ zʋlɔ yɛawʋwa nnwʋanlɩ nu nɩ ɩma yɛ. (Egy. 14:15-17) Naasʋ̃ Gyehova iáluwa nnwʋánlɩ ɔhʋanɩ zʋ bɔ yɛ nnwʋanlɩ nwʋ banɩ. Na mfomi ikila ɔhʋanɩ kɛɛ yɛkɛyɛ mɔɔ yɛkɔhʋla bela yekehila yɛ pɔkɔdɩlɛ zʋ bʋwɔ na yɛahɔ zʋlɔ yɛazʋ̃mɩ yɩ. (Kɩnga 2 Kɔlɛntɩmaa 7:1.) Mɩnla ti mɔɔ ɩsɛ kɛɛ yɛbɔ yɛ pɔkɔdɩlɛ nɩɩ yɛ nnwʋanlɩ nwʋ banɩ a, na kɛ yɛkɛyɛ yɩ yekeze a?

3. Mɩnla ti mɔɔ ɩsɛ kɛɛ yɛbɔ yɛ pɔkɔdɩlɛ nwʋ banɩ a?

³ Sianti ɔkʋ̃ ti mɔɔ ɩsɛ kɛɛ yɛbɔ yɛ pɔkɔdɩlɛ nwʋ banɩ yɛ lɛ kɛɛ, ɩkɛma yɛkɛva yɛ anwʋzɩzɩbɛ munwala yɛkɔzʋ̃mɩ Gyehova. (Mk. 12:30) Yɛpɛ kɛɛ yɛfa yɛ ‘eniiwudo yɛma Nyamɩnlɩ  kɛɛ afɔlɩwɔlɛ mɔɔ ɩda nnwʋanlɩ nu na ɩyɛ nwanzanwanza na ɩsɔ Nyamɩnlɩ anyɩ,’ meti yɛáyɛ dɩyɛ bela mɔɔ ɩkɛma yɛ nwʋ kɛba yɛ. (Wul. 12:1) Ɩwɔ numɔ, yɛlɔ́kʋla yɛkɛva yɛ sa yekezi yɛ kɛɣa kɛɛ yɛ nwʋ ɩlɛ́pa yɛ kyɩ̃. Naasʋ̃, yɛyɛ mɔɔ yɛkɔhʋla bela yɛbɔ yɛ pɔkɔdɩlɛ nwʋ banɩ iluwakɛɛ yɛpɛ kɛɛ yɛ sʋlɔ Ɛzɩlɛ nɩ nwʋ kɛɛ yɛ anyɩ sɔ nnwʋanlɩ mɔɔ ɩva ɩhyɛ yɛ nɩ.

4. Mɩnla yɛ nɩ Bulombunli Devidi pɛ kɛɛ ɩyɛ a?

⁴ Ndwokɔ mɔɔ Bulombunli Devidi hanlɩ nɩ ma yɛnwʋ kɛɛ nɩ yɩ anyɩ ɩsɔ nnwʋanlɩ mɔɔ ɩdɩ akyɛdɩ mɔɔ Gyehova ɩva ɩma yɩ nɩ. Ɩhanlɩ kɛɛ: “Mɩnla mfasʋ yɛ ɩwɔ mu owulo nɩɩ kuma mɔɔ mʋkɔɔ numɔ nɩ zʋ a? Asʋ̃ ndɛdɛlɛ kɛyɩ wʋ ayɛlɛ a? Asʋ̃ ɩkɛhã wʋ nɔhʋanlɛlilɛ nwʋ odwokɔ a?” (Ndw. 30:9) Ebiye a, Devidi hɛlɛlɩ ndwokɔ eyimmɔ mmɩlɩ mɔ nɩ ɩka ɛgyɩkɩ̃ɩ̃ ma iwu nɩ, naasʋ̃ nɩ ɩpɛ kɛɛ ɩbʋwa nnwʋanlɩ nu ɩkyɛ na ama ɩahɔ zʋlɔ ɩazʋ̃mɩ Gyehova. Pɩlazunɛ bela íni nwʋmɔ kɛɛ, ɔzɔ la yɛ amɩyɛ sʋ̃ yɛpɛ kɛɛ yɛyɛ a.

5. Sɛ yɛ anyɩ ɩdɩ anzɛnyɩɩ yɛ nwʋ ɩba yɛ po a, mɩnla yɛ yɛkɔhʋla yɛkɛyɛ a?

⁵ Ebiye a, adimakɛlɛ nɩɩ ebaniyɛlɛ ti, yɛáhʋla yɛyɛ nninyeni sʋ̃maa mɔɔ nɩ ankɩ yɛkʋla yɛyɛ nɩ. Sɛ ɩba yɩ ɔzɔ a, yɛ adwɩnɩ kʋla tu fʋla na yɛ ɛɣɛɛlɛ bɔ. Naasʋ̃ íni kɛɛ yɛma yɛ padi kolɔ na yeyiaki kɛɛ yekehila yɛ pɔkɔdɩlɛ zʋ bʋwɔ. Mɩnla ti a? Iluwakɛɛ sɛ yɛ anyɩ dɩ anzɛnyɩɩ sɛ yɛ nwʋ ɩba yɛ po a, sa yɛkʋla yɛyɩ Gyehova ayɛlɛ kɛmɔ Bulombunli Devidi yɛlɩ nɩ. Kila kezimɔ ɩkã ahʋnlɩnɩ kɛɛ yɛlanwʋ la yɛtʋ bʋlɔ yɛma yɛ Nyamɩnlɩ nɩ, ɩávalɩ nwʋmɔ ebaniyɛlɛ anzɛnyɩɩ adimakɛlɛ mɔɔ idide yɛ nɩ! (Mt. 10:29-31) Sɛ yewu po a, yɩ ɛɣɛɛlɛ kɔlɔ kɛɛ ikodunwo yɛ. (Dwb. 14:14, 15) Kakɩ mɔɔ yɛda azɩ yɩ, yɛpɛ kɛɛ yɛyɛ mɔɔ yɛkɔhʋla bela yɛbɔ yɛ pɔkɔdɩlɛ nɩɩ yɛ nnwʋanlɩ nwʋ banɩ.

6. Sɛ ɩba yɩ nɩ alɩyɛlilɛ nɩɩ nzanlʋnlɛ nwʋ a, mɩnla yɛ Gyehova kila ɔhʋanɩ kɛɛ yɛkɛyɛ a?

⁶ Ɩwɔ numɔ kɛɛ Bayɩbʋlʋ yɩ ɩ́dɩ pɔkɔdɩlɛ buuku anzɛnyɩɩ iáhile alɩyɛ mɔɔ yeli dɩyɛ, naasʋ̃ ɩma yɛnwʋ Gyehova yɩ adwɩnɩ wɔ nninyeni eyimmɔ nwʋ. Kɛ ndianwʋ nɩ, itu yɛ fʋlɔ kɛɛ yɛyɩ́ “nninyeni mɔɔ ɩkɔhʋla ikebila yɛ” wɔ ye eniiwudo yi nu yegua. (Odw. 11:10) Bayɩbʋlʋ yɩ tɩndɛ tiyia alɩyɛ sʋ̃maa lilɛ nɩɩ nzã sʋ̃maa nlʋnlɛ. Iluwakɛɛ nninyeni eyimmɔ kɔhʋla kɛva yɛ nnwʋanlɩ kediã asianɩ nu. (Ɛɣɛ. 23:20) Gyehova kila ɔhʋanɩ kɛɛ yɛkɛhyɛ yɛ nwʋ zʋ mmɩlɩ mɔ yesii pɔkɔ wɔ alɩyɛ nɩɩ nzã dʋdʋ mɔɔ yɛkɔnlʋ nwʋ nɩ.—1 Kɔl. 6:12; 9:25.

7. Mɩnla ɔhʋanɩ zʋ yɛ fʋlɔdulɛ mɔɔ ɩwɔ Ɛɣɛlɛwulɛ 2:11 nɩ, ɩbʋwa yɛ ma yesi pɔkɔ baaba yɛfalɩ yɛ pɔkɔdɩlɛ nwʋ a?

⁷ Sa yɛkʋla yɛfa yɛ adwɩnɩ yedi egyima bʋwɔ na yeazi pɔkɔ mɔɔ ikehile kɛɛ yɛ anyɩ sɔ nnwʋanlɩ mɔɔ ɩdɩ akyɛdɩ mɔɔ ɩzʋ̃ Nyamɩnlɩ kɛ nɩ. (Ndw. 119:99, 100; kɩnga Ɛɣɛlɛwulɛ 2:11.) Kɛ ndianwʋ nɩ, yɛfa nɣɛlɛbɛ yɛyɛ egyima wɔ alɩyɛ mɔɔ yedi nwʋ. Sɛ yɛ anyɩ deli alɩyɛ be nwʋ na yɛnwʋ kɛɛ yedi a ɩma yɛ nwʋ ɩpa yɛ a, nɣɛlɛbɛ wɔ numɔ kɛɛ yelédi ɔzɔ alɩyɛ yɩ nɩ. Akʋ̃ sʋ̃, sɛ yede mmɩlɩ yɛda bʋwɔ, yɛta yɛtɩnɣɛdɩnɣɛ yɛ abɔkɔ nu, yedi yɛ eniiwudo yi nni na yɛkɔ zʋlɔ yesiyeziye yɛ awudo a, nɩ yekilee kɛɛ yɛlɛ nɣɛlɛbɛ yɛyɛ egyima.

8. Mɩnla ɔhʋanɩ zʋ yɛ Bayɩbʋlʋ yɩ ma yɛnwʋ kɛɛ, yɛ banɩwɔlɛ nwʋ hyinyia Gyehova a?

⁸ Wɔ Mmɛla mɔɔ Gyehova va manlɩ Yizilayamaa yɩ nu nɩ, ɩvalɩ ɔhʋanɩhilelɛ mɔɔ ɩkɔwɔ bɔ nwʋ banɩ wɔ nninyeni mɔɔ ɩkɔhʋla ikebila bɛ wɔ awudo nɩɩ egyima nu ɩmanlɩ bɛ. (Ɛkɩ. 21:28, 29; Dit. 22:8) Sɛ abiye ɩáhyɛda na ikũ yɩ ɔhɔnwʋ a, nɩ azʋ̃nlɩhwɩnlɛ be wɔ kɛnɩ ma yɩ. (Dit. 19:4, 5) Na nɩ Mmɛla yɩ pɩbɛ kɛɛ sɛ  abiye ɩáhyɛda na ikũ ɛɣalɛ mɔɔ ɩla kunlumi nu a, bɔhwɩ̃ yɩ azʋ̃. (Ɛkɩ. 21:22, 23) Bayɩbʋlʋ yɩ ma yɛnwʋ yɩ petee kɛɛ, Gyehova pɛ kɛɛ yɛma banɩwɔlɛ nwʋ hyinyia yɛ.

9. Mɩnla nninyeni yɛ yɛkɔhʋla yɛkɛyɛ na yɛava yɛawɔ yɛ nnwʋanlɩ nwʋ banɩ a? (Kila mfonyini yi sʋ̃)

⁹ Sɛ yɛyɛ nninyeni be yɛfa yɛbɔ yɛ nwʋ banɩ wɔ awudo nɩɩ egyima nu a, nɩ yekilee kɛɛ yɛ anyɩ sɔ nnwʋanlɩ mɔɔ Nyamɩnlɩ ɩva ɩma yɛ nɩ. Kɛ ndianwʋ nɩ, yɛfa nninyeni mɔɔ ɩkʋla itua yɛ, nninyeni mɔɔ ɩdɩ pɔyɩzɩnɩ, anzɛnyɩɩ nnuno yekua bʋwɔ na yekila kɛɛ ye nnwuakula bɛlɛ́fa bɛ sa bɛkɛhã yɩ. Sɛ yɛsɔ sɩnɩ, yɛfa nzulo anzɛnyɩɩ ngɔlɔ yɛta sɩnɩ zʋ, anzɛnyɩɩ yɛsɔ mahyini be mɔɔ ɩfa ɩlɛtɩlɩkɩ idi egyima a, íni kɛɛ yetiã yɩ kɛ. Sɛ ɔnlʋ̃ nzã anzɛnyɩɩ awudo be mɔɔ ɩma wʋ anyɩ zʋ ikyĩ wʋ anzɛnyɩɩ sɛ wʋ anyɩ ɩkʋ̃ʋ̃ a, íni kɛɛ ɛfa kã kaalɩ. Akʋ̃ sʋ̃, áma eminyia minyia wʋ foonu mmɩlɩ mɔ ɛkãã kaalɩ nɩ.

10. Ansaana asianɩ be kezi nɩɩ mmɩlɩ mɔ asianɩ yɩ izi nɩ, mɩnla yɛ yɛkɔhʋla yɛkɛyɛ a?

¹⁰ Itwu eɣile be a, yɛlɔ́kʋla yekezi asianɩ  mɔɔ ɩkɔhʋla ɩkɛva yɛ nnwʋanlɩ ikediã asianɩ nu nɩ ɔhʋanɩ. Eyi dɩ nɔhʋanlɛ titili mmɩlɩ mɔ asianɩ, adimakɛlɛ mɔɔ ɩyɛ nsanɩ nɩɩ bɛsabɛsayɛlɛ be zi nɩ. Sɛ asianɩ be mɔɔ ɩdɩ zɔ si a, sa yɛkʋla yɛbɔ yɛ nwʋ banɩ iluwa odulɛ mɔɔ yekodu wɔ dɩka mɔɔ yɛwɔ nɩ anzɛnyɩɩ ediyelɛ mɔɔ yekediye asianɩ mmɩlɩ nu ɔhʋanɩhilelɛ mɔɔ aɣanɩ mbanimbani kɛva kɛma yɛ nɩ. (Wul. 13:1, 5-7) Asianɩ be wɔ kɛ a, bɔkʋla bɔnwʋ yɩ ansaana iazi, meti yɛbɔ mmɔdɩnɩ yetiye ɔhʋanɩhilelɛ mɔɔ adumivʋlɔ yɩ fa ma yɛ nɩ na ama yɛahʋla yɛaziyeziye yɛ nwʋ yeaziye. Kɛ ndianwʋ nɩ, ansaana bʋwabɩlɛ mɔɔ ɩdɩ zɔ kezi nɩ, nɣɛlɛbɛ wɔ numɔ kɛɛ yɛkɛbɛ nzulo, alɩyɛ mɔɔ ɩázɩkɛ ndɛ nɩɩ nnuno be yekeziye.

11. Sɛ adimakɛlɛ be mɔɔ ɩyɛ nsanɩ ɩpɩndɩ a, mɩnla yɛ ɩsɛ kɛɛ yɛzʋ̃ yɛ pɛ nu yɛyɛ a?

¹¹ Sɛ adimakɛlɛ be mɔɔ ɩyɛ nsanɩ ɩpɩndɩ wɔ dɩka mɔɔ yɛda nɩ a, mɩnla yɛ ɩsɛ kɛɛ yɛyɛ a? Ɩsɛ kɛɛ yetiye asianɩ mmɩlɩ nu ɔhʋanɩhilelɛ mɔɔ aɣanɩ kɛva kɛɣa nɩ. Dɩkɛɛ yɛ sa nwʋ mɔɔ yɛkɔwʋwʋ, mmenii mɔɔ yelébike bɛ sʋ̃maa, mask mɔɔ yekowula nɩɩ yɛ nwʋ mɔɔ yɛkɛva yekeziye. Kezimɔ yɛkɛyɛ yɛ dɩyɛ wɔ nninyeni eyimmɔ nwʋ nɩ kehile kezimɔ yɛ anyɩ sɔ nnwʋanlɩ mɔɔ Nyamɩnlɩ ɩva hyɛ yɛ nɩ.

12. Sɛ asianɩ be si a, mɩnla ɔhʋanɩ zʋ yɛ Ɛɣɛlɛwulɛ 14:15 nɩ kɔwʋwa yɛ ma yɛkɔnwʋ ndwokɔ mɔɔ ɩsɛ kɛɛ yede yedi a?

¹² Sɛ asianɩ be si a, ɩyɛ a, yɛtɩdɩ ndwokɔ wɔ yɛ ɔhɔnwʋmmɔ, yɛ apaa yi nu maa anzɛnyɩɩ wɔ news nu mɔɔ ɩ́dɩ nɔhʋanlɛ. Kɛ ankɩ yekele “odwokɔ bela” yekeli nɩ, yɛbɔ mmɔdɩnɩ yetiye ndwokɔ mɔɔ ɩdɩ nɔhʋanlɛ mfomi wɔ aɣanɩ yɩ anzɛnyɩɩ dɔkɩtamaa bɛ kɛnɩ. (Kɩnga Ɛɣɛlɛwulɛ 14:15.) Ɔhʋanɩhilelɛ Okuwu yi nɩɩ Bɛtɩlɩ munwala bɔ mmɔdɩnɩ kɛɛ bɛ sa kɛhã ndwokɔ mɔɔ ɩdɩ nɔhʋanlɛ ansaana bɛava ɔhʋanɩhilelɛ bela mɔɔ ɩfalɩ yɛ asafʋ ayiyialɩyɛ nɩɩ dasɩlɛlilɛ egyima nɩ nwʋ bɛama yɛ. (Hib. 13:17) Sɛ yetiye bɔ ɔhʋanɩhilelɛ a, yɛbɔ amɩyɛzayɛ nɩɩ mmenii mvʋlɔ nwʋ banɩ wɔ asianɩ nwʋ. Akʋ̃ sʋ̃ sɛ yɛyɛ ɔzɔ a, nɩ yɛbʋwaa ma mmenii kenyia Gyehova Dasɩvʋlɔmaa nwʋ adwɩnɩba.—1 Pit. 2:12.

13. Sɛ ɩba yɩ nɩ mmegyia nwʋ ndwokɔ a, mɩnla ɔhʋanɩ zʋ yɛ yɛda yɩ ali kɛɛ yɛ anyɩ sɔ nnwʋanlɩ mɔɔ Nyamɩnlɩ ɩva ɩhyɛ yɛ nɩ a?

¹³ Mmenii sʋ̃maa zi Gyehova Dasɩvʋlɔmaa kɛɛ bobu mmegyia kɛɛ ɩdɩ nwanzanwanza. Yetiye Gyehova yɩ ɔhʋanɩhilelɛ mɔɔ ɩfalɩ mmegyia nwʋ nɩ na yɛále mmegyia mmɩlɩ po mɔɔ yɛ nwʋ ɩba yɛ ɛzɩzɩbɛ ɛzɩzɩbɛ wɔ aɣilevile nu nɩ. (Egy. 15:28, 29) Naasʋ̃ eyi iáhile kɛɛ yɛpɛ kɛɛ yewu. Mfomi yɛ anyɩ sɔ nnwʋanlɩ mɔɔ Nyamɩnlɩ ɩva ɩhyɛ yɛ nɩ. Yɛpɩbɛ dɔkɩtamaa mɔɔ bɔ nwʋ ɩwʋkwa mɔɔ bɔwɔ ɛpɛ kɛɛ bɛkɛza yɛ adimakɛlɛ mɔɔ bɛlɛ́fa mmegyia bekeli egyima.

14. Kɛ yɛkɛyɛ na yɛadɩ asianɩ mɔɔ ɩkɔhʋla ɩkɛma bɛkɛyɛ yɛ opilehyɛnɩ nɩ zʋ a?

¹⁴ Sɛ yɛfa mɔɔ yɛhã nwʋmɔ odwokɔ wɔ dɩyɛzumanlɛ eyi nu nɩ yɛyɛ egyima a, ebiye a iléhyinyia kɛɛ bɛkɛyɛ yɛ opilehyɛnɩ anzɛnyɩɩ bɛlɛ́kã kɛɛ bɛsaa yɛ adimakɛlɛ wɔ ɔhʋanɩ be mɔɔ ɩyɛ ɛyɛlɛ zʋ. Sɛ yɛ pɔkɔdɩlɛ di munli na ɩba yɩ kɛɛ bɛyɛ yɛ opilehyɛnɩ po a, yɛ nwʋ kɔdɔ yɛ ndɛndɛ. Yɛkɔhʋla sʋ̃ yɛkɛdɩ asianɩ mɔɔ ɩkɛma bɛkɛyɛ yɛ opilehyɛnɩ nɩ zʋ, iluwa yɛ awudo nɩɩ dɩka mɔɔ yɛyɛ egyima mɔɔ yɛkɛma banɩwɔlɛ nwʋ kehyinyia yɛ wɔ kɛ nɩɩ kaalɩ ɔhʋanɩ nwʋ mmɛla mɔɔ yɛkɛva yɛkɛyɛ egyima bʋwɔ nɩ zʋ.

15. (a) Mɩnla ti mɔɔ ihyinyia kɛɛ yenyia durable power of attorney fʋlɔ yɩ be wɔ yɛ nwʋ a? (Kila mfonyini yi sʋ̃.) (b) Kɛmɔ vidiyo yi kile nɩ, mɩnla ɔhʋanɩ zʋ yɛ yɛkɔhʋla yekezi mmegyia mɔɔ bɛfa bedi egyima wɔ adimakɛlɛzalɛ nu nɩ nwʋ pɔkɔ a?

¹⁵ Iluwakɛɛ yɛ anyɩ sɔ nnwʋanlɩ nɩ ti,  yɛhyɩhyɛ yɛ durable power of attorney (yɛ adimakɛlɛzalɛ nwʋ ɔhʋanɩhilelɛ) na yɛfa yewula yɛ nwʋ mmɩlɩ munwala. b Yeduwa kɛlɛta yɩ zʋ yekile yɛ pɔkɔzilɛ wɔ mmegyia mɔɔ bɔtwɩ̃ bɛma nɩɩ adimakɛlɛzalɛ azʋlɔtʋ nu. Asʋ̃ wʋ mmegyia kɛlɛta yɩ, ɩdɩ fʋlɔ yɩ be a? Sɛ ɛpɛ kɛɛ ɛhyɩhyɛ biye anzɛnyɩɩ ɛyɛ mɔɔ ɔwɔ yi nu nzɩnzanlɩyɛ a, mɛyɩ nɩ di nwʋmɔ egyima ndɛndɛ. Sɛ yɛkɛlɛ kezimɔ yɛpɛ kɛɛ bɛsa yɛ adimakɛlɛ nɩ yetiã kɛ a, ɩma dɔkɩtamaa nɩ nwʋ yɛ pɔkɔzilɛ na bɛsa yɛ adimakɛlɛ ndɛndɛ. Akʋ̃ sʋ̃, ɩbʋwa ma bɛáza yɛ adimakɛlɛ wɔ ɔhʋanɩ be zʋ mɔɔ yɛábɛ yɩ anzɛnyɩɩ bɛáma nnuno be yɛ mɔɔ ɩkɛha yɛ. c

16. Sɛ yɛánwʋ kezimɔ yɛkɛhyɩhyɛ yɛ mmegyia kɛlɛta yɩ a, mɩnla yɛ yɛkɔhʋla yɛkɛyɛ a?

¹⁶ Ɩávalɩ nwʋmɔ kɛɛ yɛ nwʋ yɛ sɩ anzɛnyɩɩ yɛtɩ pɔkɔ nɩ, sa asianɩ kʋla tʋ yɛ anzɛnyɩɩ yɛ nwʋ pa yɛ wɔ aɣilevile nu. (Odw. 9:11) Meti nɣɛlɛbɛ wɔ numɔ kɛɛ yɛkɛhyɩhyɛ mmegyia kɛlɛta yɩ be. Sɛ wʋánwʋ kezimɔ ɛkɛyɛ yɩ a, bizia wʋ asafʋ nu mbanimbani ma bɔwʋwa wʋ. Bɔkɔwɔ mmɔdɩnɩ bɔkɔwʋwa wʋ ma ɔkɔnwʋ kezimɔ ɛkɛhyɩhyɛ kɛlɛta yɩ, naasʋ̃  belési wʋ adimakɛlɛzalɛ nwʋ pɔkɔ bɛkɛma wʋ. Ɩdɩ wʋzawʋ wʋ asɛdɩ kɛɛ ekezi nwʋmɔ pɔkɔ. (Gal. 6:4, 5) Naasʋ̃ sa bɔkʋla bɔbʋwa wʋ ma ɛtɩ nninyeni tʋ na wʋahyɩhyɛ kɛlɛta yɩ.  

17. Sɛ ɩba yɩ nɩ yɛ pɔkɔdɩlɛ nɩɩ yɛ adimakɛlɛzalɛ nwʋ pɔkɔzilɛ a, kɛ yɛkɛyɛ na yɛahile kɛɛ yɛda ntɩyasɩ ali a?

¹⁷ Mɔɔ yezuma wɔ Bayɩbʋlʋ yɩ nu zʋ yɛ yekyina yesizi abɔkɔ mɔɔ ɩfalɩ yɛ pɔkɔdɩlɛ nɩɩ adimakɛlɛzalɛ nwʋ a. (Egy. 24:16; 1 Tim. 3:9) Sɛ yɛkãã yɛ pɔkɔzilɛ nwʋ odwokɔ yekehile mmenii mvʋlɔ a, ɩsɛ kɛɛ yɛkakɛ egyinalɛzʋ-ndwokɔ mɔɔ ɩwɔ Fɩlɩpɩmaa 4:5 nɩ, ise: “Bɛmá mmenii munwala bɔnwʋ kɛɛ bɔwɔ ntɩyasɩ.” Sɛ yɛda ntɩyasɩ ali a, yɛlɛ́dwɩnɩndwɩnɩ yɛ pɔkɔdɩlɛ nwʋ sʋ̃maa na yɛlɛ́hyɛ mmenii mvʋlɔ kɛɛ bele yɛ pɔkɔzilɛ be wɔ adimakɛlɛzalɛ nwʋ bediã numɔ. Sɛ yɛ mmeliyema mmenyia nɩɩ mmaalɛ bɔ pɔkɔzilɛ ɩ nɩɩ yɛ dɩyɛ ɩáyɛ ɔkʋ̃ po a, yɛdɔ bɛ na yebu bɛ.—Wul. 14:10-12.

18. Kɛ yɛkɛyɛ na yɛahile kɛɛ yɛ anyɩ sɔ nnwʋanlɩ mɔɔ ɩdɩ akyɛdɩ nɩ a?

¹⁸ Sɛ yɛbɔ yɛ nnwʋanlɩ nwʋ banɩ na yɛyɛ mɔɔ yɛkɔhʋla bela yɛsʋ̃mɩ Gyehova a, nɩ yekilee kɛɛ yɛ anyɩ sɔ Gyehova mɔɔ nnwʋanlɩ zʋ̃ yɩ kɛnɩ nɩ. (Yik. 4:11) Sikalɛyɩ mɛyɩ, ɩsɛ kɛɛ yɛkɔ zʋlɔ yekyina adimakɛlɛ nɩɩ asianɩ azʋlɔtʋ munwa. Naasʋ̃ kɛ ɔzɔ yɛ yɛ Wɔlɛvʋlɔ yɩ bɛlɩ kɛɛ ankɩ nninyeni kɔhɔ a. Ɩlɛ́kyɛ ɩkɛma yekenyia nnwʋanlɩ mɔɔ íni awielɩyɛ mɔɔ ɛyɛkɛ nɩɩ owulo bela íni numɔ. (Yik. 21:4) Sikalɛyɩ mɛyɩ, ɩyɛ yɛ anyɩnlɩlelɛ kɛɛ yɛda nnwʋanlɩ nu na yɛsʋ̃mɩɩ yɛ sʋlɔ Ɛzɩlɛ, Gyehova mɔɔ ɩwɔ ɔlɔlɛ nɩ!