1-2. (a) Sɛ yɛdwɩnɩndwɩnɩ Gyisɛsɩ yɩ ɛbɩlawɔlɛ nɩɩ yɩ ɔzʋ̃mɩnlɛ egyima yɩ nwʋ a, kɛ ɩkɛma yɛkɛdɩ nɣanlɩ yekeze a? (b) Mɩnla yɛ yɛbazunzu nwʋmɔ wɔ dɩyɛzumanlɛ eyi nu a?

 SƐ YƐDƆVƲLƆ be wu a, yɛ ɛɣɛɛlɛ dɔ yɩ baaba paa! Ahyɛasɩ yɩ, sɛ yɛkakɛ nninyeni mɔɔ ɩhɔlɩ ɔzʋlɔ ansaana ibawu nɩ a, ɩma yedi ɛyɛkɛ baaba paa. Naasʋ̃ mmɩlɩ kɔlɩɩ zʋlɔ nɩ sɛ yɛkakɛ dɩyɛ be mɔɔ ihileli yɛ, ɩyɛlɩ ɩmanlɩ yɛ, anzɛnyɩɩ ɩva ɩhyɛlɩ yɛ ɛzɩzɩbɛ nɩ a, nɩ yɛ anyɩ ile.

² Ɔzɔ la sʋ̃ yɛ sɛ yɛkɩnga Gyisɛsɩ yɩ amanɩyɛnwʋnlɛ nɩɩ yi owulo nwʋ odwokɔ a, ɩma yɛ ɛɣɛɛlɛ bɔ. Sɛ itwu Ɛhakɛlɛlilɛ mmɩlɩ yɩ a, yede mmɩlɩ yɛdwɩnɩndwɩnɩ kezimɔ Gyisɛsɩ yɩ elelɛ afɔlɩ nɩ tʋ bʋlɔ ma yɛ nɩ nwʋ. (1 Kɔl. 11:24, 25) Naasʋ̃, sɛ yɛdwɩnɩndwɩnɩ nninyeni mɔɔ Gyisɛsɩ yɛlɩ nɩɩ mɔɔ ɩhanlɩ mmɩlɩ mɔ nɩ ɩwɔ azɩlɛ yɩ zʋ nɩ nwʋ a, nɩ yɛ anyɩ ile. Akʋ̃ sʋ̃, sɛ yɛdwɩnɩndwɩnɩ mɔɔ ɩyɛɛ sikalɛyɩ nɩɩ mɔɔ ɩkɛyɛ ɩkɛma yɛ eɣile be nɩ nwʋ a, ɩhyɛ yɛ ɛzɩzɩbɛ. Wɔ dɩyɛzumanlɛ eyi nu nɩ, yɛbahila kezimɔ sɛ yɛdwɩnɩndwɩnɩ nninyeni eyimmɔ nɩɩ ɔlɔlɛ mɔɔ ɩwɔ ɩma yɛ nɩ nwʋ a, ɩkɛhã yɛ ma yekehile anyɩnlɩzɔlɛ wɔ ahʋanɩ pɔkyɩɩ be zʋ.

3. Mɩnla ti mɔɔ ɩsɛ kɛɛ yɛma yɛ anyɩ sɔ elelɛdɩyɛ nɩ a?

³ Sɛ yɛdwɩnɩndwɩnɩ Gyisɛsɩ yɩ ɛbɩlawɔlɛ nɩɩ yi owulo yɩ nwʋ a, ɩma yenyia anyɩnlɩzɔlɛ yɛ ma yɩ. Mmɩlɩ mɔ nɩ Gyisɛsɩ wɔ azɩlɛ yɩ zʋ nɩ, ihilehileli mmenii nninyeni mɔɔ Nyamɩnlɩ  Bulombunlililɛ kɛyɛ. Yɛ anyɩ sɔ kɛɛ yɛnwʋ nɔhʋanlɛ mɔɔ ɩfalɩ elelɛdɩyɛ yɩ nɩɩ mɔɔ ɩyɛ ɩma adasamaa nɩ nwʋ baaba paa. Yɛ anyɩ sɔ elelɛdɩyɛ nɩ, iluwakɛɛ ɩma yenyia nwʋmɔ ɔhʋanɩ yɛ nɩɩ Gyehova nɩɩ Gyisɛsɩ nyia ɔhɔnwʋvalɛ. Bɛzabɛ mɔɔ bede Gyisɛsɩ bedi nɩ bɔwɔ anyɩnlɩlazʋ kɛɛ bɔkɔwʋwa azɩ daabaa na bɛanwʋ bɛ alɔvʋlɔ mɔɔ bowuwu nɩ ebiyekʋ̃. (Dwɔ. 5:28, 29; Wul. 6:23) Yɛlɛ́yɛlɩ hwɩɩ mɔɔ ɩma yɛfata nyilalɛ eyimmɔ munwala; na yɛlɔ́kʋla yekoduwa Nyamɩnlɩ nɩɩ Kɩlayɩsɩ kakɛ wɔ mɔɔ bɛyɛ bɛma yɛ nɩ nwʋ kyɩ̃. (Wul. 5:8, 20, 21) Naasʋ̃, sa yɛkʋla yɛma bɔnwʋ kɛɛ yɛ anyɩ sɔ mɔɔ bɛyɛ bɛma yɛ nɩ. Kɛ yɛkɛyɛ yɩ yekeze a?

4. Mɩnla ɔhʋanɩ zʋ yɛ Mɛɛlɩ Magidalini hileli kɛɛ yɩ anyɩ sɔ mɔɔ Gyisɛsɩ yɛlɩ manlɩ yɩ nɩ a? (Kila mfonyini yi.)

⁴ Kila Dwuunii baalɛ be mɔɔ bɔfʋlɔ yɩ Mɛɛlɩ Magidalini yi ndianwʋ yɩ. Nɩ ɩfɛɛ baaba paa iluwakɛɛ nɩ azunzuma evinli asunwa bɛtɩɩdɩɩ yɩ. Nɩ ɩtɩ nɣanlɩ kɛɛ abiyela ɩlɔ́kʋla kɔwʋwa yɩ. Mɔwʋ dɩyɛ kila kezimɔ yɩ anyɩ leli mmɩlɩ mɔ Gyisɛsɩ duli azunzuma evinli yɩ wɔ yi nu nɩ! Yɩ anyɩ zɔlɩ mɔɔ Gyisɛsɩ yɛlɩ manlɩ yɩ nkʋ̃ʋ̃ ma ɩɣa ɩyɛlɩ yɩ tʋwavʋlɔ. Na ɩvalɩ yɩ mmɩlɩ, yɩ anwʋzɩzɩbɛ, nɩɩ yɩ anwʋnyia ɩwʋwalɩ yɩ wɔ yɩ ɔzʋ̃mɩnlɛ egyima yɩ nu. (Lk. 8:1-3) Ɩwɔ numɔ kɛɛ Mɛɛlɩ yɩ anyɩ zɔlɩ mɔɔ Gyisɛsɩ yɛlɩ manlɩ yɩ dɩyɛ, naasʋ̃ nɩ ízi kɛɛ Gyisɛsɩ kɛyɛ nninyeni sʋ̃maa kɛma yɩ eɣile be. Nɩ ɩkɛva yɩ nnwʋanlɩ ikediã kɛnɩ ɩkɛma adasamaa, “ama abiyela mɔɔ ikele yɩ ikeli nɩ,” ianyia nnwʋanlɩ mɔɔ íni awielɩyɛ. (Dwɔ. 3:16) Nɩ Mɛɛlɩ ízi eyimmɔ munwala, naasʋ̃ ilili Gyisɛsɩ nɔhʋanlɛ ɩva ihileli kɛɛ yɩ anyɩ sɔ mɔɔ ɩyɛ ɩma yɩ nɩ. Mmɩlɩ mɔ nɩ Gyisɛsɩ ɩtɩɩ ɛyɛkɛ wɔ owudo yɩ zʋ nɩ, nɩ Mɛɛlɩ gyĩ yɩ pɛ mɔɔ nɩ ɩkyɩkyɩɩ Gyisɛsɩ nɩɩ bɛzabɛ mɔɔ begyingyĩ yɩ nwʋ kɛnɩ nɩ bɛ ɛɣɛɛlɛ. (Dwɔ. 19:25) Wɔ Gyisɛsɩ yi owulo mɛda nɩ, Mɛɛlɩ nɩɩ mmaalɛ mvʋlɔ anwɩ̃ valɩ awudo vʋãmɛ hɔlɩ nna yɩ zʋ kɛɛ bɛlɛkɔvʋvɔ Gyisɛsɩ yi funli yɩ nwʋ. (Mk. 16:1, 2) Mɛɛlɩ nyianlɩ yɩ nɔhʋanlɛlilɛ zʋ akatuwa. Inyianlɩ nwʋmɔ ɔhʋanɩ ɩnwʋnlɩ Gyisɛsɩ mɔɔ nɩ bodunwo yɩ nɩ  na ɩ nɩɩ yɩ dɩndɛlɩ. Eyi dɩ ɔnwʋmɔ ɔhʋanɩ mɔɔ adʋwavʋlɔ yɩ bo nu sʋ̃maa po bɛányia yɩ.—Dwɔ. 20:11-18.

5. Mɩnla ɔhʋanɩ zʋ yɛ yɛkɔhʋla yekehile mɔɔ Gyehova nɩɩ Gyisɛsɩ bɛyɛ bɛma yɛ nɩ nwʋ anyɩnlɩzɔlɛ a?

⁵ Amɩyɛ sʋ̃, sa yɛkʋla yekile anyɩnlɩzɔlɛ yɛma mɔɔ Gyehova nɩɩ Gyisɛsɩ bɛyɛ bɛma yɛ nɩ. Iluwa yɛ mmɩlɩ, yɛ anwʋzɩzɩbɛ, nɩɩ yɛ anwʋnyia mɔɔ yɛkɛva yɛkɔwʋwa Gyehova yɩ ɔzʋ̃mɩnlɛ nɩ zʋ. Kɛ ndianwʋ nɩ, sa yɛkʋla yɛbʋwa ma bekyina anzɛnyɩɩ besiyeziye ayiyialɩyɛ nnɩka azʋlɔtʋ.

6. Mɩnla ti mɔɔ yɛkɔhʋla yɛkɛhã kɛɛ elelɛdɩyɛ nɩ dɩ akyɛdɩ ma ye nu ɔkʋ̃ bela a?

⁶ Sɛ yɛdwɩnɩndwɩnɩ ɔlɔlɛ mɔɔ Gyehova nɩɩ Gyisɛsɩ dɔ yɛ nɩ nwʋ a, ɩkã yɛ ma amɩyɛ sʋ̃ yɛdɔ bɛ. (1 Dwɔ. 4:10, 19) Sɛ yɛba yɛnwʋ yɩ kɛɛ Gyisɛsɩ wuli manlɩ ye nu ɔkʋ̃ bela a, ɩma ɔlɔlɛ mɔɔ yɛwɔ yɛma bɛ nɩ yɛ kezi. Sʋ̃mavʋlɔ Pɔɔlʋ nwʋnlɩ eyi na ihileli nwʋmɔ anyɩnlɩzɔlɛ wɔ kɛlɛta mɔɔ ɩhɛlɛlɩ ɩhɔ ɩmanlɩ Galatiyiamaa yi nu kɛɛ: ‘Nyamɩnlɩ Ɣalɛ yɩ lɔlɩ mɩ na ɩvalɩ yɩ nnwʋanlɩ idianlɩ kɛnɩ ɩmanlɩ mɩ.’ (Gal. 2:20) Gyehova iluwa elelɛdɩyɛ yɩ zʋ ɩhwɩ̃ wʋ iɣike yɩ nwʋ, na ama wʋahʋla wʋayɛ yɩ ɔhɔnwʋ. (Dwɔ. 6:44) Asʋ̃ ɩáyɛ wʋ fɛ kɛɛ Gyehova ɩnwʋ dɩyɛ baaba be wɔ wʋ nu ma mɛyɩ ti iduwa bʋlɔ ɛzɩzɩbɛ na ama mɔwʋ sʋ̃ wʋaɣa wʋayɛ yɩ ɔhɔnwʋ a? Asʋ̃ eyi ɩama ɔlɔlɛ mɔɔ ɔwɔ ma Gyehova nɩɩ Gyisɛsɩ nɩ ɩyɛ kezi a? Meti ɩsɛ kɛɛ yebizia yɛ nwʋ kɛɛ, ‘Mɩnla yɛ ɔzɔ ɔlɔlɛ nɩ kã mɩ kɛɛ mɩyɛ a?’

7. Kɛmɔ yɛnwʋ yɩ wɔ mfonyini yi nu nɩ, kɛ ɩkɛyɛ na ye munwala yɛahile kɛɛ yɛdɔ Gyehova nɩɩ Gyisɛsɩ a? (2 Kɔlɛntɩmaa 5:14, 15; 6:1, 2)

⁷ Ɔlɔlɛ mɔɔ yɛwɔ yɛma Nyamɩnlɩ nɩɩ Kɩlayɩsɩ nɩ kã yɛ ma yɛdɔ mmenii mvʋlɔ sʋ̃. (Kɩnga 2 Kɔlɛntɩmaa 5:14, 15; 6:1, 2.) Ɔhʋanɩ ɔkʋ̃ mɔɔ yeduwa zʋ yekile yɛ ɔlɔlɛ yɛ lɛ kɛɛ, yɛkɛva ɛhyɩmɛ yɛkɛyɛ odwokɔbahanlɛ egyima  yɩ. Yɛkã odwokɔba yɩ yekile abiyela. Yɛába mmenii nu ɩávalɩ nwʋmɔ dɩka mɔɔ bɔzʋ̃, bɔ nnwʋnlamɩ kɔla, kɛ bɔwɔ ozukua anzɛnyɩɩ béni ebiye, anzɛnyɩɩ ndɛnɩ mɔɔ bɛkã nɩ. Sɛ yɛyɛ zɔ a, nɩ yɛbʋwaa ma Gyehova yi tile nu pɔkɔ mɔɔ mɛyɩ yɛ lɛ kɛɛ, “mmenii munwatĩĩ kɔnwʋ ehilehilelɛ mɔɔ idi munli nɩ na bɛanyia nnwʋanlɩ” nɩ kɛɣa nu.—1 Tim. 2:4.

8. Kɛ ɩkɛyɛ na yɛahile kɛɛ yɛdɔ ye mmeliyema mmenyia nɩɩ mmaalɛ a?

⁸ Sɛ yɛda ɔlɔlɛ ali yekile ye mmeliyema mmenyia nɩɩ mmaalɛ a, nɩ yekilee kɛɛ yɛdɔ Nyamɩnlɩ nɩɩ Kɩlayɩsɩ. (1 Dwɔ. 4:21) Yɛma bɔnwʋ kɛɛ bɔ nwʋ hyinyia yɛ na yɛbʋwa bɛ mmɩlɩ mɔ beyiyiaa ndwokɔzɩzɩbɛ nɩ. Sɛ bɔ dɔvʋlɔ be wu a, yɛkɔ yɛkyɩkyɩ bɛ ɛɣɛɛlɛ, yekyela bɛ mmɩlɩ mɔ bɔ nwʋ ba bɛ nɩ, na sɛ bɛ padi kolɔ a, yɛkɔ yɛhyɛ bɛ ɛzɩzɩbɛ. (2 Kɔl. 1:3-7; 1 Tɛs. 5:11, 14) Yɛkɔ zʋlɔ yɛbɔ mpayɩ yɛ ma bɛ, iluwakɛɛ yezi kɛɛ, “tumi kezile wɔ ɛdɩnɣɛlɛnii yɩ mpayɩwɔlɛ nu.”—Gye. 5:16.

9. Mɩnla ɔhʋanɩ fʋlɔ zʋ yɛ yɛkɔhʋla yekehile kɛɛ yɛdɔ ye mmeliyema mmenyia nɩɩ mmaalɛ a?

⁹ Akʋ̃ sʋ̃, sɛ yɛbɔ mmɔdɩnɩ yɛma azʋ̃nudwolɩyɛ bʋwa yɛ nɩɩ ye mmeliyema mmenyia nɩɩ mmaalɛ avinli a, nɩ yekilee kɛɛ yɛdɔ bɛ. Yɛbɔ mmɔdɩnɩ yesumazuma kezimɔ Gyehova fa tanɩ kyɛ nɩ. Gyehova zʋ̃ yɩ pɛ nu manlɩ yɩ Ɣa nɩ wuli manlɩ yɛ iluwa yɛ tanɩ ti, meti ɩsɛ kɛɛ amɩyɛ sʋ̃ yɛzʋ̃ yɛ pɛ nu yɛfa ye mmeliyema bɛ tanɩ yɛkyɛ bɛ. Yɛábɛ kɛɛ yɛyɛ yɛ dɩyɛ kɛɛ sʋ̃mɩvʋlɔ tinuzɩzɩbɛvʋlɔ mɔɔ Gyisɛsɩ hanlɩ yɩ nwʋ odwokɔ wɔ yɩ ndianwʋ be nu nɩ. Yi diibenyia valɩ yɩ kakɛ kezile hyɛlɩ yɩ naasʋ̃ ɩáfa yɩ ɔhɔnwʋ sʋ̃mɩvʋlɔ yɩ kakɛ ɛgyɩkɩ̃ɩ̃ be ɩkyɛ yɩ. (Mt. 18:23-35) Sɛ akasakasa be ɣa ɛ nɩɩ eliyema be avinli wɔ asafʋ yi nu a, sa ɔkʋla edi bɔmʋnlɩ ɛ nɩɩ yɩ kɔ siyeziye ansaana wʋaɣa Ɛhakɛlɛlilɛ yɩ a? (Mt. 5:23, 24) Ɔzɔ mɔɔ yɛkɛyɛ nɩ ikehile kɛɛ yɛdɔ Gyehova nɩɩ Gyisɛsɩ.

10-11. Mɩnla yɛ asafʋ nu mbanimbani kɔhʋla kɛyɛ kɛva kehile kɛɛ bɔdɔ Gyehova nɩɩ Gyisɛsɩ a? (1 Pita 5:1, 2)

¹⁰ Kɛ ɩkɛyɛ na asafʋ nu mbanimbani bɛahile kɛɛ bɔdɔ Gyehova nɩɩ Gyisɛsɩ a? Ɔhʋanɩ ɔkʋ̃ mɔɔ ihyinyia mɔɔ boduwa zʋlɔ bɛyɛ zɔ yɛ lɛ kɛɛ, bɛkɛva mɔɔ Gyisɛsɩ yi mmuwuanɩ hyinyia nɩ bɛkɛma bɛ. (Kɩnga 1 Pita 5:1, 2.) Gyisɛsɩ hanlɩ eyi nwʋ odwokɔ senyii hileli sʋ̃mavʋlɔ Pita. Mmɩlɩ mɔ Pita bʋlɩ Gyisɛsɩ mbɔmɩ asã mɛda nɩ, ɩkɛyɛ kɛɛ nɩ yɩ nwʋ pɩlɩ kɛɛ ikehile Gyisɛsɩ kɛɛ ɩdɔ yɩ. Mmɩlɩ mɔ bodunwonli Gyisɛsɩ mɛda nɩ, iɣizialɩ Pita kɛɛ: “Simɔnʋ, Dwɔɔnʋ ɣalɛ yɩ, ɔdɔ mɩ a?” Sa yɛkʋla yɛkã kɛɛ nɩ Pita kɛyɛ mɔɔ ɩkɔhʋla bela na ɩava iahile yi Niibenyia kɛɛ ɩdɔ yɩ. Gyisɛsɩ hã hileli Pita kɛɛ: “Kilá mu mmuwuanɩ mmalɛ yɩ.” (Dwɔ. 21:15-17) Amba, Pita yɩ nnwʋanlɩ eɣile yɩ munwala, ihilalɩ yi Niibenyia yɩ mmuwuanɩ nɩ ɩva ihileli kɛɛ ɩdɔ Gyisɛsɩ.

¹¹ Asafʋ nu mbanimbani, sɛ itwu Ɛhakɛlɛlilɛ mmɩlɩ a, mɩnla yɛ bɛkɛyɛ na bɛava bɛahile kɛɛ mɔɔ Gyisɛsɩ hanlɩ hileli Pita nɩ hyinyia mʋnlʋmmɔ sʋ̃ a? Sa bɔkʋla bekile kɛɛ bɔdɔ Gyehova nɩɩ Gyisɛsɩ iluwa asafʋ nu maa mɔɔ bɛkɛda bekegyela bɛ na bɛawʋwa bɛzabɛ mɔɔ beyiaki dasɩlɛlilɛhɔlɛ ma bɛazia bɛaɣa Gyehova pɛ. (Izi. 34:11, 12) Sa bɔkʋla bɛhyɛ Bayɩbʋlʋ dɩyɛzumanlɛmaa nɩɩ anyɩnlɩlelɛmaa mvʋlɔ mɔɔ bɛɣa Ɛhakɛlɛlilɛ yɩ be nɩ ɛzɩzɩbɛ, yɛpɛ kɛɛ yɛma bɛ ahʋnlɩnɩ tɔ bo kunlu iluwakɛɛ bɛzabɛ sʋ̃ bɔkɔhʋla bɛkɛɣa bɛkɛyɛ Gyisɛsɩ yɩ adʋwavʋlɔ.

12. Mɩnla ti mɔɔ sɛ yɛdwɩnɩndwɩnɩ ndwokɔ mɔɔ Gyisɛsɩ hanlɩ wɔ nunuma ansaana mɔɔ ibawu nɩ nwʋ a, ɩma yenyia akɛnɣazɩzɩbɛ a? (Dwɔɔnʋ 16:32, 33)

¹² Nunuma ansaana mɔɔ Gyisɛsɩ ibawu nɩ, ɩhã ihileli yɩ adʋwavʋlɔ nɩ mmɔ kɛɛ: “Bɔkɔnwʋ amanɩyɛ wɔ oyuwadɩ yi nu! Naasʋ̃  benyia akɛnɣazɩzɩbɛ, mili oyuwadɩ yɩ zʋ nkunimi.” (Kɩnga Dwɔɔnʋ 16:32, 33.) Mɩnla yɛ ɩwʋwalɩ Gyisɛsɩ ma ɩlalɩ akɛnɣazɩzɩbɛ ali na ilili nɔhʋanlɛ ɩhɔ ɩbʋmɩnlɩ owulo nu ɩávalɩ nwʋmɔ mɔɔ yɩ adamvʋlɔ va yɛlɩ yɩ nɩ a? Ɩvalɩ yɩ nwʋ idianlɩ Gyehova zʋ. Iluwakɛɛ nɩ Gyisɛsɩ zi kɛɛ bokodwodwu bekediyia yɩ adʋwavʋlɔ nɩ mmɔ sʋ̃ ti, izianlɩ Gyehova kɛɛ ihila bɔ zʋ. (Dwɔ. 17:11) Mɩnla ti mɔɔ eyi ɩma yenyia akɛnɣazɩzɩbɛ a? Iluwakɛɛ Gyehova nwʋ yɛ sɩ tɛla yɛ adamvʋlɔ. (1 Dwɔ. 4:4) Gyehova yɩ anyɩ duwa dɩyɛ bela. Yɛwɔ anwʋlazʋ kɛɛ sɛ yɛfa yɛ nwʋ yetiã Gyehova zʋ a, ɩkɔwʋwa yɛ ma yekeli bɔlɔ zʋ na yɛala akɛnɣazɩzɩbɛ ali.

13. Mɩnla ɔhʋanɩ zʋ yɛ Dwosefi mɔɔ ɩzʋ̃ Alɩmatɩya nɩ lalɩ yɩ ali kɛɛ ɩwɔ akɛnɣazɩzɩbɛ a?

¹³ Má yehila Dwosefi mɔɔ ɩzʋ̃ Alɩmatɩya yɩ ndianwʋ yɩ. Nɩ ɩdɩ abiye mɔɔ Dwuumaa nɩ bu yɩ baaba paa. Nɩ ɩkɩnla Dwuumaa bɔ kɔɔtʋ kezile Sanɩhɩdɩlɩnɩ nɩ nwʋ. Naasʋ̃ mmɩlɩ mɔ nɩ Gyisɛsɩ ɩyɛɛ yɩ ɔzʋ̃mɩnlɛ egyima wɔ azɩlɛ yɩ zʋ nɩ, nɩ Dwosefi íni akɛnɣazɩzɩbɛ kʋlaa. Dwɔɔnʋ hanlɩ yɩ nwʋ odwokɔ kɛɛ “nɩ ɩdɩ Gyisɛsɩ yɩ tʋwavʋlɔ naasʋ̃ iluwa Dwuumaa bɔ nwʋ bɔlɔ ti, ɩáyɩ yɩ anyunu.” (Dwɔ. 19:38) Ɩwɔ numɔ kɛɛ nɩ Dwosefi yɩ anyɩ deli Bulombunlililɛ nwʋ odwokɔba yɩ nwʋ dɩyɛ, naasʋ̃ ɩáma mmenii nwʋ kɛɛ ɩwɔ Gyisɛsɩ nu dedi. Ebiye a nɩ yi kunlu tu kɛɛ sɛ mmenii bɛba bɔnwʋ yɩ kɛɛ ɩdɩ Gyisɛsɩ yɩ tʋwavʋlɔ a, ɩlɛ́ma bokowu yi. Naasʋ̃ Bayɩbʋlʋ yɩ bɔ amanɩyɛ kɛɛ, wɔ Gyisɛsɩ iwulo mɛda nɩ, Dwosefi “valɩ akɛnɣazɩzɩbɛ hɔlɩ Payɩleti yɩ anyunu ɩhɔ izianlɩ Gyisɛsɩ yi funli.” (Mk. 15:42, 43) Akʋ̃ dɩyɛ mɛyɩ, Dwosefi yɩlɩ yɩ anyunu kɛɛ ɩdɩ Gyisɛsɩ yɩ tʋwavʋlɔ.

14. Sɛ wʋ kunlu tuli enii nwʋ a, mɩnla yɛ ɩsɛ kɛɛ ɛyɛ a?

¹⁴ Ɩyɛ a, wʋ kunlu tuli enii nwʋ dɩkɛɛ Dwosefi a? Sɛ ɔwɔ sukuulu nu anzɛnyɩɩ egyima nu a, ɩyɛ a wʋ anyɩ tʋ̃ kɛɛ ɛkɛla wʋ nwʋ ali kɛɛ ɛdɩ Gyehova Dasɩvʋlɔmaa bo nu ɔkʋ̃ a? Asʋ̃ ɔtwɩnhwɩ̃ɩ̃ wʋ agyia azɩ kɛɛ ɛkɛyɛ ɛlawulowɔlɛvʋlɔ anzɛnyɩɩ okonluma iluwakɛɛ wʋ kunlu tuli mɔɔ ebiye a, mmenii kɛhã nwʋ a? Áma ɛma enii nwʋ bɔlɔ si ɔhʋanɩ wʋ kɛɛ ɛkɛyɛ mɔɔ ezi kɛɛ ɩdɩ baaba nɩ. Ɔzʋ̃ wʋ ahʋnlɩnɩ nu bɔ Gyehova mpayɩ. Siã yɩ ma ɩma akɛnɣazɩzɩbɛ wʋ na wʋava wʋayɛ yɩ apɛdɩ. Sɛ ɔnwʋ kezimɔ Gyehova buwa wʋ mpayɩwɔlɛ a, ɩkɛma ɛkɛyɛ sɩ na wʋanyia akɛnɣazɩzɩbɛ.—Ayɩ. 41:10, 13.

15. Mmɩlɩ mɔ Gyisɛsɩ yɩlɩ yɩ nwʋ hileli yɩ adʋwavʋlɔ yɩ mɛda nɩ, mɩnla yɛ anyɩnlɩlelɛ mɔɔ benyianlɩ nɩ hanlɩ bɛ ma bɛyɛlɩ a? (Luuku 24:52, 53)

¹⁵ Mmɩlɩ mɔ Gyisɛsɩ wuli nɩ, yɩ adʋwavʋlɔ yɩ bɛ ɛɣɛɛlɛ wɔlɩ baaba. Mɔɔ dɩyɛ fa wʋ nwʋ  wula bɔ bʋwabɩlɛ nu. Nɩ bɔ ɔhɔnwʋ mɔɔ bɔdɔ yɩ paa ivi bɛ sa na bɛdɩlɩ nɣanlɩ sʋ̃ kɛɛ bɛ anyɩnlɩlazʋ munwala zã. (Lk. 24:17-21) Naasʋ̃ mmɩlɩ mɔ Gyisɛsɩ ɩyɩlɩ yɩ nwʋ hileli bɛ nɩ, ihileli bɛ ma bɔnwʋnlɩ kezimɔ yi owulo nɩ ma Bayɩbʋlʋ nkɔmɩhyɛ ɣa nu. Akʋ̃ sʋ̃, ɩvalɩ egyima be mɔɔ nwʋmɔ hyinyia paa iwulalɩ bɛ sa. (Lk. 24:26, 27, 45-48) Aɣile 40 mɛda mɔɔ Gyisɛsɩ hɔlɩ sʋlɔ nɩ, nɩ yɩ adʋwavʋlɔ yɩ bɛ alɔbɔlilɛ nɩ lanɩ anyɩnlɩlelɛ. Iluwakɛɛ nɩ bezi kɛɛ be Niibenyia da azɩ na ɩkɔwʋwa bɛ ma bɛkɛyɛ egyima mɔɔ ɩva iwula bɛ sa nɩ ti, ɩmanlɩ bɛ anyɩ leli baaba. Anyɩnlɩlelɛ mɔɔ benyianlɩ nɩ hanlɩ bɛ ma bɔhɔlɩ zʋ bɛyɩlɩ Gyehova ayɛlɛ.—Kɩnga Luuku 24:52, 53; Egy. 5:42.

16. Mɩnla ɔhʋanɩ zʋ yɛ yɛkɔhʋla yekozumazuma Gyisɛsɩ yɩ adʋwavʋlɔ yɩ a?

¹⁶ Mɩnla ɔhʋanɩ zʋ yɛ yɛkɔhʋla yekozumazuma Gyisɛsɩ yɩ adʋwavʋlɔ yɩ a? Sa yɛkʋla yɛfa anyɩnlɩlelɛ yɛsʋ̃mɩ Gyehova wɔ ɔlʋbɔ yɩ munwala nu, na kɛ Ɛhakɛlɛlilɛ mmɩlɩ yi nu nkʋ̃ a. Eyi kile kɛɛ ɩsɛ kɛɛ yɛfa Nyamɩnlɩ Bulombunlililɛ yedi bɔmʋnlɩ wɔ yɛ ɛbɩlawɔlɛ nu. Kɛ ndianwʋ nɩ, abiyemmɔ dɩ́ mmɩlɩ mɔ bɛfa bɛyɛ egyima nɩ zʋ na ama bɛanyia mmɩlɩ bɛahɔ dasɩlɛlilɛ, ayiyialɩyɛ azʋlɔtʋ, na bɛayɛ bɛ abusunwa ɔzʋ̃mɩnlɛ dapɛnɩ bela. Abiyemmɔ zi pɔkɔ kɛɛ, bɛlɛ́fa bɛ adwɩnɩ bekeziye nninyeni mɔɔ mvʋlɔ sunzu kɛɛ ɔnwʋmɔ hyinyia nɩ zʋ na ama bɛanyia mmɩlɩ bɛayɛ sʋ̃maa wɔ bɛ asafʋ yɩ nu anzɛnyɩɩ bɛahɔ bɛawʋwa wɔ nnɩka mɔɔ mmʋwalɩyɛ nwʋ hyinyia. Yehyinyia pindinyiigyinanlɛ na ama yɛahɔ zʋlɔ yɛazʋ̃mɩ Gyehova. Na Gyehova wɔ anʋhʋba yɛ kɛɛ, sɛ yɛfa yɩ Bulombunlililɛ yedi bɔmʋnlɩ wɔ yɛ ɛbɩlawɔlɛ nu a, ikeyila yɛ.—Ɛɣɛ. 10:22; Mt. 6:32, 33.

17. Mɩnla yɛ ezi wʋ kɛnɣa kɛɛ ɛkɛyɛ wɔ Ɛhakɛlɛlilɛ mmɩlɩ eyi nu a? (Kila mfonyini yi.)

¹⁷ Yɛkɛyɛ ɔlʋbɔ eyi Ɛhakɛlɛlilɛ yɩ wɔ Twɔkɔ, April 4. Naasʋ̃, áma ɛdɩkɛ ma itwu ɔzɔ mmɩlɩ nɩ ansaana wʋadwɩnɩndwɩnɩ Gyisɛsɩ yɩ ɛbɩlawɔlɛ, yi owulo nɩɩ ɔlɔlɛ mɔɔ ɩ nɩɩ Gyehova bɛla yɩ ali behile yɛ nɩ nwʋ. Fá ɔnwʋmɔ ɔhʋanɩ dwɩnɩndwɩnɩ nninyeni eyimmɔ nwʋ wɔ Ɛhakɛlɛlilɛ mmɩlɩ yi nu. Kɛ ndianwʋ nɩ, dé mmɩlɩ kɩnga na dwɩnɩndwɩnɩ ndwokɔ mɔɔ izizili wɔ “Dapɛnɩ Mɔɔ Itualɩ Yɩ Tʋ Wɔ Gyisɛsɩ Yɩ Ɛbɩlawɔlɛ Nu Wɔ Azɩlɛ Yɩ Zʋ” mɔɔ ɩwɔ April 2019 Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta, owukolɛ 4 nu nɩ nwʋ. Mmɩlɩ mɔ ɛkɩngaa nɩ, kila kɛɛ ɔkɔnwʋ ndwokɔ be mɔɔ ɩkɛhyɛ anyɩnlɩzɔlɛ, ɔlɔlɛ, akɛnɣazɩzɩbɛ, nɩɩ anyɩnlɩlelɛ mɔɔ ɔwɔ nɩ nu ɛzɩzɩbɛ a. Sa ɔkʋla nyia anwʋlazʋ kɛɛ Gyisɛsɩ yɩ anyɩ kɔzɔ dɩyɛ bela mɔɔ ɛkɛyɛ na wʋava wʋahakɛ yɩ wɔ Ɛhakɛlɛlilɛ mmɩlɩ yi nu nɩ.—Yik. 2:19.