1-2. Mɩnla ɔhʋanɩ zʋ yɛ Kilisinyianii ɩdɩ kɛɛ abʋlɔnsanɩ tɩndɩnlɩ be a? (1 Kɔlɛntɩmaa 15:58)

 WƆ 1978 nu nɩ, begyinanlɩ abʋlɔnsanɩ tɩndɩnlɩmakɛ be wɔ Tokyo, Japan. Iluwakɛɛ nɩ azɩlɛwʋsʋlɛ ta si wɔ ɛkɛnɩ ti, nɩ mmenii sʋ̃maa sunzu kɛɛ aliyia nɩ ɩlɔ́kʋla ikegyina. Naasʋ̃ kɛ ɩba yɩ mɔɔ ɩhʋlalɩ igyinanlɩ a? Sianti yɛ lɛ kɛɛ, bɛvalɩ nninyeni mɔɔ ɩyɛ sɩ begyinanlɩ aliyia yɩ, naasʋ̃ begyinanlɩ yɩ wɔ ɔhʋanɩ be zʋ mɔɔ sɛ azɩlɛ wʋsʋ a, ɩkʋla ɩkyɩyɩa ɛgyɩkɩ̃ɩ̃ naasʋ̃ iáwu. Kilisinyiamaa bɛdɩ kɛɛ ɔzɔ abʋlɔnsanɩ nɩ. Mɩnla ɔhʋanɩ zʋ a?

² Ɩsɛ kɛɛ Kilisinyianii kyina pindinyii na ɩda ntɩyasɩ ali sʋ̃. Sɛ ɩba yɩ nɩ Gyehova yɩ mmɛla a, ɩsɛ kɛɛ isi yɩ adwɩnɩ pi na isi yɩ kɛnɣa kɛɛ ɩkɛva ɩkɛyɛ egyima eɣile bela. (Kɩnga 1 Kɔlɛntɩmaa 15:58.) Isiyeziye yɩ nwʋ kɛɛ ɩkɛyɛ sutiye, na iádindiã Gyehova yɩ mmɛla azɩ. Naasʋ̃ wɔ bʋwabɩlɛ azʋlɔtʋ be nu nɩ, sɛ nwʋmɔ ba hyinyia a, ɩsɛ kɛɛ ɩda ntɩyasɩ ali. (Gye. 3:17) Kilisinyianii mɔɔ ɩda ntɩyasɩ ali nɩ, ɩbɔ mmɔdɩnɩ kɛɛ ɩlɛ́yɛ kyɩngyɩ̃ɩ̃ na kɛ dɩyɛ bela sʋ̃ yɛ ide itiã nu a. Wɔ dɩyɛzumanlɛ eyi nu nɩ, yekozunzu kezimɔ yɛkɔhʋla yekegyina pindinyii nɩ nwʋ. Akʋ̃ sʋ̃, yɛkɔnwʋ ahʋanɩ azʋlɔtʋ anlu mɔɔ Abɔnsamɩ duwa zʋlɔ bɔ mmɔdɩnɩ kɛɛ ɩkɛma ɩkɛyɛ sɩ kɛɛ yekegyina pindinyii nɩɩ kezimɔ yɛkɔhʋ̃ yekediyia yɩ.

3. Mɩnla mmɛla yɛ Mmɛlahyɛlɛvʋlɔ Kezile yi ɩva ɩma yɛ wɔ Egyima 15:28, 29 a?

³ Kɛ Mmɛlahyɛlɛvʋlɔ Kezile yi nɩ, Gyehova kɔ zʋlɔ fa mmɛla mɔɔ ɩáyɛ sɩ kɛɛ yi mmenii kɛdɩ yɩ tʋ ɩma bɛ. (Ayɩ. 33:22) Kɛ  ndianwʋ nɩ, wɔ ɔwɔkɩ Kilisinyiamaa bɛ mmɩlɩ zʋ nɩ, ɔhʋanɩhilelɛ okuwu nɩ nwʋnlɩ ahʋanɩ asã be mɔɔ ɩsɛ kɛɛ Kilisinyianii duwa zʋlɔ kyina pindinyii: (1) kɛɛ bɔkɔhwɩ̃ bɔ nwʋ wɔ awʋzʋmɩzʋ̃mɩnlɛ nwʋ na bɛazʋ̃mɩ Gyehova nkʋ̃ la, (2) bokowu mmegyia kɛɛ ɩdɩ nwanzanwanza, na (3) bɛava Bayɩbʋlʋ mmɛla mɔɔ ɩfalɩ ɛbɩlawɔlɛ nwʋ nɩ bɛayɛ egyima. (Kɩnga Egyima 15:28, 29.) Nnɛ, kɛ ɩkɛyɛ na Kilisinyiamaa bɛadiye Gyehova wɔ nninyeni asã eyimmɔ nu a?

4. Mɩnla yɛ yɛyɛ a ikile kɛɛ yɛsʋ̃mɩɩ Gyehova nkʋ̃ la a? (Yikile 4:11)

⁴ Yɛpʋ awʋzʋmɩzʋ̃mɩnlɛ na yɛsʋ̃mɩ Gyehova nkʋ̃ la. Gyehova hyɛlɩ Yizilayamaa yɩ kɛɛ bɔzʋ̃mɩ́ yɩzayɩ nkʋ̃. (Dit. 5:6-10) Na mmɩlɩ mɔ Abɔnsamɩ dweli Gyisɛsɩ hilalɩ nɩ, Gyisɛsɩ hanlɩ kɛɛ ɩsɛ kɛɛ yɛsʋ̃mɩ Gyehova nkʋ̃ la. (Mt. 4:8-10) Meti, yɛázʋ̃mɩ mmoduwaba. Akʋ̃ sʋ̃, yɛázʋ̃mɩ mmenii. Kɛ ndianwʋ nɩ, yɛáva animinyiamɩ yɛma mmenii be dɩkɛɛ nyamɩnlɩzʋ̃mɩnlɛ nu mbanimbani, manlɩwulɛmaa, bɔɔlʋwɔlɛmaa, ndwomidʋlɛmaa nɩɩ bɛzabɛ mɔɔ bɛyɩ fɩlɩmɩ nɩ, dɩkɛɛ mɔɔ bɛdɩ nyamɩnlɩ be. Yekyina Gyehova yɩ ɔfʋã pindinyii na yɛsʋ̃mɩ yɩzayɩ nkʋ̃ la, iluwakɛɛ mɛyɩ yɛ “ɩwɔlɩ nninyeni munwatĩĩ a.”—Kɩnga Yikile 4:11.

5. Gyehova yɩ mmɛla mɔɔ ɩfalɩ kezimɔ nnwʋanlɩ nɩɩ mmegyia dɩ nwanzanwanza nwʋ nɩ, mɩnla ti mɔɔ yɛfa yɛyɛ egyima a?

⁵ Yɛfa Gyehova yɩ mmɛla mɔɔ ɩfalɩ kezimɔ nnwʋanlɩ nɩɩ mmegyia dɩ nwanzanwanza nwʋ nɩ yɛyɛ egyima. Mɩnla ti a? Iluwakɛɛ Gyehova ɩhã kɛɛ mmegyia gyĩ kɛnɩ ma nnwʋanlɩ na ɩdɩ akyɛdɩ mɔɔ ɩtʋ bʋlɔ mɔɔ ɩva ɩma yɛ. (Lɛv. 17:14) Mmɩlɩ mɔ Gyehova manlɩ mmenii ɔhʋanɩ kɛɛ belí nnamɩ be egyeni nɩ, ɩhanlɩ kɛɛ máma bedi yɩ mmegyia. (Gyn. 9:4) Mmɩlɩ mɔ ɩvalɩ Mosisi Mmɛla yɩ ɩmanlɩ Yizilayamaa nɩ, izili eyi zʋ wudo. (Lɛv. 17:10) Na iluwa ɔwɔkɩ ɔhʋanɩhilelɛ okuwu yi zʋ ɩhyɛlɩ Kilisinyiamaa munwala kɛɛ “máma bedi mmegyia.” (Egy. 15:28, 29) Sɛ yesii yɛ adimakɛlɛzalɛ nwʋ pɔkɔ a, yɛádindiã mmɛla eyi azɩ. b

6. Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ, mɩnla yɛ yɛyɛ yɛfa yedidi zʋ a?

⁶ Yɛádindiã Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ azɩ kʋlaa. (Hib. 13:4) Pɔɔlʋ duli yɛ fʋlɔ kɛɛ yeminyiá yɛ nwʋ ɛzɩzɩbɛ ɛzɩzɩbɛ na yedú akɔnɔ tanɩ tʋ wɔ ye nu. Yɛáhila anzɛnyɩɩ yɛáyɛ nninyeni mɔɔ ɩkɔhwɩnhwɩ̃ yɛ ɩkɔhɔ ɛbɩlazɩkɛlɛ nu. (Kol. 3:5; Dwb. 31:1) Sɛ yeyiyia tanɩ nwʋ odwohilalɛ a, yɛpʋ yɩ ndɛndɛ na yɛáyɛlɩ debe mɔɔ ɩkɛzɩkɛ yɛ nɩɩ Nyamɩnlɩ avinli.

7. Mɩnla yɛ ɩsɛ kɛɛ yesi yɛ kɛnɣa kɛɛ yɛkɛyɛ a, na mɩnla ti a?

⁷ Gyehova pɛ kɛɛ ‘yɛzʋ̃ yɛ ahʋnlɩnɩ nu yɛyɛ sutiye yɛma yɩ. (Wul. 6:17) Yɛlɔ́kʋla yɛkɛyɩyɩ Gyehova mmɛla nu, naasʋ̃ ɩsɛ kɛɛ yɛkakɛ kɛɛ mɔɔ ɩkã ikile yɛ nɩ, ɩdɩ yɛzayɛ yɛ bʋwɔyɛlɛ ti a. (Ayɩ. 48:17, 18; 1 Kɔl. 6:9, 10) Yɛbɔ mmɔdɩnɩ kɛɛ yɛkɔzɔ Gyehova anyɩ na yɛayɛ mɔɔ ndwomidʋlɛvʋlɔ yɩ yɛlɩ nɩ be, ɩhanlɩ kɛɛ: “Mizi mɩ kɛnɣa kɛɛ mikeli wʋ ahyɛdɩ zʋ mmɩlɩ munwala kɔhɔ kɔbʋmɩ awielɩyɛ.” (Ndw. 119:112) Naasʋ̃ Setanɩ kɔwɔ mmɔdɩnɩ kɛɛ ɩkɛma yekeyiaki ye munlililɛ nu. Mɩnla ɔhʋanɩ zʋ a?

8. Mɩnla ɔhʋanɩ zʋ yɛ Setanɩ duwa odwodwudiyialɛ zʋ kʋ̃ tiyia yɛ a?

⁸ Odwodwudiyialɛ. Abɔnsamɩ duwa bɛsabɛsayɛlɛ nɩɩ nhyɛ zʋ ɩma ɩyɛ sɩ kɛɛ yekediye Gyehova. Yɩ bʋtayɩ yɛ lɛ kɛɛ “ɩkɛhyɩ” yɛ, kile kɛɛ ɩkɛzɩkɛ yɛ nɩɩ Gyehova avinli. (1 Pit. 5:8) Bowunla nwunlalɩ ɔwɔkɩ Kilisinyiamaa  yɩ, behyinli bɛ na bohunli bo nu be iluwa bɛ kɛnɣa mɔɔ nɩ bezi kɛɛ bekegyina pindinyii nɩ ti. (Egy. 5:27, 28, 40; 7:54-60) Nnɛ sʋ̃, Setanɩ fa odwodwudiyialɛ di egyima. Ɔnwʋmɔ ndianwʋ ɔkʋ̃ yɛ lɛ kezimɔ bɛyɛɛ ye mmeliyema mɔɔ bɔwɔ Russia nɩɩ amanlɩ mvʋlɔ zʋ bɛsabɛsa na bɔtʋʋ bɛhyɛɛ ye mmeliyema zʋ nɩ.

9. Sianti mɔɔ ɩsɛ kɛɛ yɛma yɛ anyɩ da kɛnɩ wɔ nhyɛ nwʋ nɩ, ma nwʋmɔ ndianwʋ.

⁹ Anyɩnlɩdɩlɛ ɔhʋanɩ zʋ nhyɛ. Odwodwudiyialɛ la ahanlɩ a, Setanɩ duwa “anyɩnlɩdɩlɛ ɔhʋanɩ” zʋ ɩfa nhyɛ ɩba yɛ zʋ. (Ɛfɩ. 6:11) Bɛmá yehila mɔɔ ɩdʋlɩ eliyema Bob. Nɩ ɩsɛ kɛɛ bɛyɛ yɩ opilehyɛnɩ kezile be. Ɩhã ihileli dɔkɩtamaa nɩ kɛɛ iléde mmegyia kyɩ̃. Dɔkɩta mɔɔ ɩkɛyɛ yɩ opilehyɛnɩ nɩ leli dianlɩ numɔ kɛɛ ɩlɛ́ma mmegyia yɩ. Naasʋ̃ ohunluma mɔɔ ansaana bɛkɛyɛ Bob opilehyɛnɩ nɩ, dɔkɩta fʋlɔ be ɣalɩ yɩ pɛ wɔ mmɩlɩ mɔ nɩ Bob yi mmusunwamaa bɔhɔ awudo nɩ. Ɩhã ihileli Bob kɛɛ bɛlɛ́hyɛda bɛkɛma mmegyia yɩ naasʋ̃ sa bɛpɛ ebiye besiye kɛ na sɛ nwʋmɔ ba hyinyia a, bɛava bɛama yɩ. Ebiye a nɩ dɔkɩta yɩ sunzu kɛɛ iluwakɛɛ nɩ Bob yi mmusunwamaa yɩ béni kɛ ti, ɩkɛzɩnza yɩ adwɩnɩ. Naasʋ̃ Bob gyinanlɩ pindinyii, na ɩhanlɩ kɛɛ ɩávalɩ nwʋmɔ mɔɔ ikezi bela nɩ máma bɛma mmegyia yɩ.

10. Mɩnla ti mɔɔ enii yɩ nɣɛlɛbɛ ɩyɛ ɛyɛlɛ a? (1 Kɔlɛntɩmaa 3:19, 20)

¹⁰ Enii yɩ nɣɛlɛbɛ. Sɛ yesunzu nninyeni nwʋ dɩkɛɛ bɛzabɛ mɔɔ bɛáwu Gyehova yɩ mmɛla nɩ a, yɛkɔwɔ yɩ tʋ yekedindiã Gyehova nɩɩ yɩ mmɛla azɩ. (Kɩnga 1 Kɔlɛntɩmaa 3:19, 20.) Mbɔmɩ sʋ̃maa nɩ, “oyuwadɩ nɣɛlɛbɛ” ɩáma mmenii tiye Nyamɩnlɩ. Kilisinyiamaa ɛgyɩkɩ̃ɩ̃ mɔɔ nɩ bɔwɔ Pɛgamɩmɩ nɩɩ Tayitayɩla nɩ, bɛmanlɩ bɛzabɛ mɔɔ nɩ bodua bɔ nwʋ beyiyia nɩ bɛ awʋzʋmɩzʋ̃mɩnlɛ nɩɩ bɛ ɛbɩlazɩkɛlɛ nɩ nyianlɩ bɔ zʋ tumi. Iluwakɛɛ bɔzʋzɔlɩ ɛbɩlazɩkɛlɛ zʋ nɩ ti, Gyisɛsɩ valɩ fʋlɔdulɛ mɔɔ numɔ yɛ ɛhyɩmɛ hɔ manlɩ bɛ. (Yik. 2:14, 20) Nnɛ, bɛzabɛ mɔɔ bodua yɛ nwʋ beyiyia nɩ bɔ mmɔdɩnɩ kɛɛ bɛkɛhyɛ yɛ ma yekele adwɩnɩ mɔɔ ɩávata yekediã nu. Ye mmusunwamaa nɩɩ yɛ ɔhɔnwʋmmɔ kɔhʋla kɛma yɛkɛdɩ nɣanlɩ kɛɛ Gyehova mmɛla yɛ sɩ sʋ̃maa, meti yɛkʋla yebuli zʋ. Kɛ ndianwʋ nɩ, bɔkɔhʋla kɛhã kɛɛ, sɛ yɛfa yɛ nwʋ yewula ɛbɩlazɩkɛlɛ nu a, ɩáyɛ hwɩɩ na Bayɩbʋlʋ nu mmɛla sʋ̃ dua nu.

11. Mɩnla yɛ íni kɛɛ yɛyɛ na ama yɛahɔ zʋ yeagyina pindinyii a?

¹¹ Ɩyɛ a sa yɛkʋla yenyia adwɩnɩ kɛɛ, ɔhʋanɩhilelɛ mɔɔ Gyehova fa ma yɛ nɩ, numɔ ɩála ɛkɛnɩ baaba. Yɛákila yɩ bʋwɔ a, sa yɛkʋla yɛyɛ dɩyɛ ma “ɩtɛla mɔɔ bɛhɛlɛ po.” (1 Kɔl. 4:6, NWT) Ɔzɔ yɛ nɩ nyamɩnlɩzʋ̃mɩnlɛ nu mbanimbani mɔɔ bɔwɔ Gyisɛsɩ yɩ mmɩlɩ zʋ nɩ bɛyɛ bɛ dɩyɛ a. Na nɩ bɛfa bɛzabɛ bɛ adwɩnɩ bɛhyɩhyɛ mmɛla yɩ be bɛkɩnla nwʋ, meti nɩ ɩma ɩyɛ sɩ kɛɛ mmenii yi bekelili zʋ. (Mt. 23:4) Gyehova duwa Bayɩbʋlʋ yɩ nɩɩ yɩ ahyɩhyɛdɩ yɩ zʋ ɩma ɔhʋanɩhilelɛ mɔɔ numɔ la kɛnɩ yɛ. Meti íni kɛɛ yɛfa ebiye yɛkɩnla nwʋ. (Ɛɣɛ. 3:5-7) Íni kɛɛ yɛyɛ dɩyɛ ma ɩtɛla mɔɔ bɛhɛlɛ wɔ Bayɩbʋlʋ yɩ nu anzɛnyɩɩ yɛhyɩhyɛ mmɛla wɔ nninyeni mɔɔ ɩsɛ kɛɛ abiyela yɩzayɩ isi nwʋmɔ pɔkɔ nɩ nwʋ yɛma ye mmeliyema.

12. Mɩnla ɔhʋanɩ zʋ yɛ Setanɩ fa “nnahɩlɩbɛ” di egyima a?

¹² Nnahɩlɩbɛ. Setanɩ iluwa “nnahɩlɩbɛ” nɩɩ “nɣɛlɛbɛ mɔɔ ɩzʋ̃ oyuwadɩ yɩ nu adumivʋlɔ” bɛ kɛnɩ zʋ ɩdahɩlɩɩ mmenii na ɩma bo nu kyɩkyɛ. (Kol. 2:8) Nɩ eyi kɔlɩ zʋ wɔ ɔwɔkɩ mmɩlɩ nu paa. Ebiye yɛ lɛ enii nɣɛlɛbɛ, Dwuumaa bɛ ehilehilelɛ mɔɔ ígyĩ Bayɩbʋlʋ yɩ zʋ nɩɩ ɛhanlɛ mɔɔ nɩ bɛkã kɛɛ ɩsɛ kɛɛ Kilisinyiamaa munwala di Mosisi Mmɛla yɩ zʋ nɩ. Nɩ eyi dɩ nnahɩlɩbɛ iluwakɛɛ ɩyɩlɩ mmenii bɛ adwɩnɩ wɔ Gyehova mɔɔ nɣɛlɛbɛ zʋ̃ yɩ kɛnɩ nɩ zʋ. Setanɩ iluwa intanɛtɩ nɩɩ sohyiya midiya zʋ ɩpɩndɩɩ awohwi ndwokɔ mɔɔ íni dasɩlɛ bela nɩɩ amanɩyɛwɔlɛ mɔɔ ɩ́dɩ nɔhʋanlɛ mɔɔ manlɩwulɛ mbanimbani bɛfa betiã kua nɩ. Yɛdɩlɩ awohwi  ndwokɔ eyi sʋ̃maa wɔ mmɩlɩ mɔ COVID-19 adimakɛlɛ yɩ ɣalɩ nɩ. c Gyehova Dasɩvʋlɔmaa mɔɔ bediyeli ɔhʋanɩhilelɛ mɔɔ ɩzʋ̃ ahyɩhyɛdɩ yɩ kɛnɩ nɩ, adwɩnɩndwɩnɩ sʋ̃maa ɩáhyɛ bɔ zʋ dɩkɛɛ bɛzabɛ mɔɔ bediyeli awohwi ndwokɔ nɩ.—Mt. 24:45.

13. Mɩnla ti mɔɔ ɩsɛ kɛɛ yɛma yɛ anyɩ da kɛ a?

¹³ Ma wʋ anyɩ ɩla kɛ. Ɩsɛ kɛɛ yɛma yɛ adwɩnɩ kɔ “nninyeni mɔɔ nwʋmɔ hyinyia” nɩ zʋ. (Fɩl. 1:9, 10, NWT) Sɛ yɛáma yɛ anyɩ ɩda kɛ a, yɛkɛzɩkɛ yɛ mmɩlɩ nɩɩ yɛ anwʋzɩzɩbɛ. Sɛ yɛma nninyeni mɔɔ yɛyɛ yɩ eɣile bela dɩkɛɛ alɩyɛlilɛ, nzanlʋnlɛ, anyɩnlɩlelɛdɩyɛ nɩɩ ye egyima ɩba ɩyɛ dɩyɛ mɔɔ nwʋmɔ hyinyia yɛ paa wɔ yɛ ɛbɩlawɔlɛ nu a, ɩkɛma ɩkɛyɛ sɩ kɛɛ yɛ anyɩ kɛla kɛ. (Lk. 21:34, 35) Akʋ̃ sʋ̃, eɣile bela yɛtɩ bɛsabɛsayɛlɛ nɩɩ manlɩwulɛndwokɔ mɔɔ ɩkɔlɩɩ zʋlɔ nɩ. Ɩsɛ kɛɛ yekila kɛɛ yɛlɛ́ma nninyeni eyimmɔ kɛyɩ yɛ adwɩnɩ wɔ nninyeni mɔɔ nwʋmɔ hyinyia nɩ zʋ. Kɛ zɔ a, yekegyina ɔfʋã be mɛda wɔ yɛ adwɩnɩ nɩɩ yɛ ahʋnlɩnɩ nu. Setanɩ yɩ bʋtayɩ yɛ lɛ kɛɛ ikoluwa ahʋanɩ eyimmɔ zʋ ɩkɛzɩkɛ yɛ adwɩnɩ mɔɔ yezi yi pi kɛɛ yɛkɛyɛ mɔɔ ɩtɩnɣɛ nɩ. Bɛmá yehila mɔɔ yɛkɔhʋla kɛyɛ kɔhʋ̃ kediyia yɩ na yɛahɔ zʋ yeagyina pindinyii.

14. Mɩnla yɛ ɩkɔwʋwa yɛ ma yɛkɔhɔ zʋ yekegyina Gyehova yɩ ɔfʋã pindinyii a?

¹⁴ Dwɩnɩndwɩnɩ sianti mɔɔ eyilalɩ wʋ nwʋ zʋ na onlumanlɛ nɩ nwʋ. Oduli ɔzɔ agyiakɛ yɩ iluwakɛɛ ɛpɛ kɛɛ ekyina Gyehova yɩ ɔfʋã. Dwɩnɩndwɩnɩ mɔɔ ɩwʋwalɩ wʋ ma eleli lili kɛɛ ɔnwʋ nɔhʋanlɛ yɩ nwʋ. Ozumanlɩ Gyehova nwʋ nɔhʋanlɛ odwokɔ na ɛɣa enyianlɩ annidi nɩɩ ɔlɔlɛ ɛmanlɩ wʋ sʋlɔ Ɛzɩlɛ yɩ. Enyianlɩ yi nu dedi na eyi hanlɩ wʋ ma ɛyɛlɩ nzɩnzanlɩyɛ wɔ wʋ ɛbɩlawɔlɛ nu, ɔhwɩnlɩ wʋ nwʋ wɔ ɛbɩlatanɩ nwʋ na ɔwɔlɩ yɩ tʋ kɛɛ ɛyɛɛ nninyeni mɔɔ Gyehova pɛ yɩ. Mmɩlɩ mɔ ɛɣa ɔnwʋnlɩ kɛɛ Nyamɩnlɩ va wʋ tanɩ hyɛ wʋ nɩ, ɩmanlɩ wʋ ahʋnlɩnɩ dɔlɩ wu kunlu. (Ndw. 32:1, 2) Ɔwɔlɩ yɩ tʋ kɛɛ ɔkɔɔ dɩyɛzumanlɛ na ɛhanlɩ mɔɔ osumaa nɩ nwʋ odwokɔ ehileli mmenii mvʋlɔ. Na kɛ Kilisinyianii mɔɔ eyila wʋ nwʋ zʋ na  onluma nɩ, kakɩ yɩ, oluwa nnwʋanlɩ ɔhʋanɩ yɩ zʋ na ezi wʋ kɛnɣa kɛɛ ɔzʋ zʋlɔ ɛlɛ́yɩ.—Mt. 7:13, 14.

15. Mɩnla ti mɔɔ dɩyɛ mɔɔ yekozuma na yɛadwɩnɩndwɩnɩ nwʋmɔ nɩ nwʋ hyinyia a?

¹⁵ Nyamɩnlɩ Odwokɔ mɔɔ yekozuma na yɛadwɩnɩndwɩnɩ nwʋ. Kɛmɔ owudo mɔɔ ɩzʋzɔ ndɩnɩ baaba kʋla kyina pindinyii nɩ, sɛ amɩyɛ sʋ̃ yɛwɔ Gyehova nu dedi kezile a, yɛkɔhʋla yekegyina pindinyii. Mmɩlɩ mɔ owudo be inyii nɩ, yɩ ndɩnɩ kɔ azɩlɛ yɩ nu na ɩtɛlɛdɛlɛ. Ɔzɔ la yɛ sɛ yesuma dɩyɛ yɛdwɩnɩndwɩnɩ nwʋ a, ɩhyɛ ye dedi ɛzɩzɩbɛ na yenyia anwʋlazʋ kezile kɛɛ Gyehova yɩ ɔhʋanɩ la yɛ ɩdɩ baaba a. (Kol. 2:6, 7) Dwɩnɩndwɩnɩ kezimɔ Gyehova yɩ fʋlɔdulɛ nɩɩ yɩ ɔhʋanɩhilelɛ wɔlɩ yɩ azʋ̃mɩvʋlɔ nwʋ banɩ wɔ ɔwɔkɩ nɩ nwʋ. Kɛ ndianwʋ nɩ, mmɩlɩ mɔ bɔvʋlɔ be isunzuu asɔlɩ pika yɩ wɔ anyɩnlɩzʋdɩyɛnwʋnlɛ yɩ nu nɩ, Izikɩyɛlɩ diyeli yi bʋwɔ paa. Anyɩnlɩzʋdɩyɛnwʋnlɛ yɩ hyɛlɩ Izikɩyɛlɩ ɛzɩzɩbɛ, na ɩma yɛnwʋ kezimɔ yɛkɔhʋla yekelili Gyehova yɩ mmɛla mɔɔ ɩfalɩ nɔhʋanlɛ ɔzʋ̃mɩnlɛ nwʋ nɩ zʋ. d (Izi. 40:1-4; 43:10-12) Sɛ yenyia alagyɩ yesuma na yɛdwɩnɩndwɩnɩ Bayɩbʋlʋ nu ndwokɔ mɔɔ numɔ dɔ nwʋ a, yenyia zʋlɔ mfasʋ sʋ̃maa.

16. Mɩnla ɔhʋanɩ zʋ yɛ Bob yɩ ahʋnlɩnɩ mɔɔ ɩmanlɩ igyinanlɩ pindinyii nɩ wɔlɩ yɩ nwʋ banɩ a? (Ndwomi 112:7)

¹⁶ Ma wʋ ahʋnlɩnɩ igyina pindinyii. Bulombunli Devidi hanlɩ yɩ ɔlɔlɛ mɔɔ ɩwɔ ɩma Gyehova yɩ nwʋ odwokɔ wɔ yɩ ndwomi be nu kɛɛ: “Mɩ ahʋnlɩnɩ gyĩ pindinyii, O Nyamɩnlɩ.” (Ndw. 57:7) Amɩyɛ sʋ̃, sɛ yɛfa yɛ nwʋ yetiã Gyehova zʋ a, yɛ ahʋnlɩnɩ kegyina pindinyii. (Kɩnga Ndwomi 112:7.) Ma yehilá kezimɔ eyi wʋwalɩ Bob mɔɔ yeli bɔmʋnlɩ yɛhã yɩ nwʋ odwokɔ nɩ. Mmɩlɩ mɔ bɛhã behileli yi kɛɛ sa bɛpɛ mmegyia yɩ be besiye ahanlɩ na sɛ nwʋmɔ ɩba ihyinyia a bɛava bɛama yɩ nɩ, ndɛndɛ la yɛ iwuwalɩ kɛɛ, sɛ bɛyɛ bɛ adwɩnɩ kɛɛ bɛkɛma mmegyia yɩ a, mɛyɩ nɩ ɩkɔhɔ asʋpiti fʋlɔ mfomi. Aɣinzi yi Bob hanlɩ kɛɛ, “Mɩ adwɩnɩ ɩáyɛ mɩ anwɩ̃ anwɩ̃, nɩ mu kunlu iádu kʋlaa.”

17. Mɩnla yɛ yɛkɔhʋla kozuma wɔ Bob yɩ odwokɔ yɩ nu a?(Kila mfonyini yi sʋ̃.)

¹⁷ Bob gyinanlɩ pindinyii, iluwakɛɛ izili mɔɔ ɩkɛyɛ nwʋ pɔkɔ daada ansaana ɩbahɔ ɩkɛla asʋpiti. Mɔɔ ili bɔmʋnlɩ, nɩ ɩpɛ kɛɛ ɩma Gyehova  anyɩ de. Mɔɔ ɩtɔ zʋlɔ anwɩ̃, ileli mmɩlɩ izumanlɩ Bayɩbʋlʋ yɩ nɩɩ asafʋ awuuku mɔɔ ɩfalɩ kezimɔ nnwʋanlɩ nɩɩ mmegyia dɩ nwanzanwanza nɩ nwʋ. Asã, nɩ ide idi kɛɛ sɛ ɩfa Gyehova yɩ mmɛla ɩyɛ egyima a, Gyehova keyila yɩ daabaa. Amɩyɛ sʋ̃, ɩávalɩ nwʋ odwohilalɛ bela mɔɔ yekeyiyia nɩ, sa yɛkʋla yekyina pindinyii.

18. Mɩnla ɔhʋanɩ zʋ yɛ Balakɩ yɩ odwokɔ yɩ ma yɛnwʋ kɛɛ ɩsɛ kɛɛ yɛfa yɛ nwʋ yetiã Gyehova zʋ a? (Kila Ɔwɩɛnɩlɛ Aɣanɩ yɩ anyunu mfonyini yi.)

¹⁸ Fa wʋ nwʋ tiã Gyehova zʋ. Bɛmá yehila kezimɔ izili Balakɩ bʋwɔ iluwakɛɛ ɩvalɩ yɩ nwʋ idianlɩ Gyehova yɩ ɔhʋanɩhilelɛ zʋ ti. Ɩwɔ numɔ kɛɛ nɩ Yizilayamaa nɩ béni kʋnɛ nninyeni sʋ̃maa dɩyɛ, naasʋ̃ Gyehova hanlɩ hileli Balakɩ kɛɛ, ɩ nɩɩ Kenaanɩmaa bɛ azogyiamaa zʋ ebani Sisela nɩɩ yɩ azogyiamaa mɔɔ nɩ bɔwɔ kʋnɛ nninyeni sʋ̃maa nɩ bɔhɔ bɔhʋ̃. (Ndɛ. 5:8) Nkɔmɩhyɛnii baalɛ Dɛbola hanlɩ hileli Balakɩ kɛɛ bɔdʋlʋ bɔhɔ azɩlɛ tɛtɛlɛ yɩ zʋ bɔhɔ beyiyia Sisela nɩɩ yɩ awɔnkɔ hwiili 900 nɩ. Ɩwɔ numɔ kɛɛ nɩ Balakɩ zi kɛɛ, ɩkɛyɛ sɩ kɛɛ bɛ nɩɩ adamvʋlɔ mɔɔ bɛda awɔnkɔ hwiili nu kɔhʋ̃ wɔ azɩlɛ tɛtɛlɛ zʋ dɩyɛ, naasʋ̃ ɩyɛlɩ sutiye. Mmɩlɩ mɔ azogyiamaa yɩ dʋlʋlɩ File Tebɔ nɩ, Gyehova manlɩ nzulo kezile be dwuli. Sisela yɩ awɔnkɔ hwiili yi halɩlɩ ndɛdɛlɛ yɩ nu na Gyehova manlɩ Balakɩ lili nkunimi. (Ndɛ. 4:1-7, 10, 13-16) Ɔzɔ la yɛ amɩyɛ sʋ̃, sɛ yenyia anwʋlazʋ wɔ Gyehova nɩɩ ɔhʋanɩhilelɛ mɔɔ iduwa yɩ ahyɩhyɛdɩ yɩ zʋ ɩfa ɩma yɛ nɩ nu a, ɩkɛma yekeli nkunimi a.—Dit. 31:6.

19. Mɩnla ti mɔɔ ɛpɛ kɛɛ ɔkɔ zʋ kyina pindinyii a?

¹⁹ Mmɩlɩ tɩndɩnlɩ la mɔɔ yɛda oyuwadɩ tanɩ eyi nu mɛyɩ, ɩsɛ kɛɛ yeminyia yɛ nwʋ kɛɛ yɛkɔhɔ zʋ yekegyina pindinyii. (1 Tim. 6:11, 12; 2 Pit. 3:17) Ɩɣɩla kɛɛ, yɛlɛ́ma odwodwudiyialɛ, anyɩnlɩdɩlɛ ɔhʋanɩ zʋ nhyɛ, enii yɩ nɣɛlɛbɛ, nnahɩlɩbɛ nɩɩ nninyeni mɔɔ ɩtwɩnhwɩ̃ yɛ adwɩnɩ nɩ kɛzɩkɛ ye pindinyiigyinanlɛ. (Ɛfɩ. 4:14) Mfomi, bɛma yegyina pindinyii na yezí yɛ kɛnɣa kɛɛ yɛkɔhɔ zʋ yɛkɔlɔ Gyehova na yɛadiye yi mmɩlɩ munwala. Akʋ̃ sʋ̃, ɩsɛ kɛɛ yɛda ntɩyasɩ ali. Wɔ dɩyɛzumanlɛ mɔɔ ili kɛnɩ yɩ nu nɩ, yekozunzu kezimɔ Gyehova nɩɩ Gyisɛsɩ bɛyɛ ntɩyasɩ mɔɔ yɛkɛla yɩ ali nɩ nwʋ ndianwʋ baaba bɛma yɛ nɩ nwʋ.