1. Ɔwɔlɩ yɩ tʋ kɛɛ osumaa Bayɩbʋlʋ nɩ, mɩnla nɔhʋanlɛ odwokɔ yɛ ɔnwʋnlɩ yɩ a?

 MMƖLƖ mɔ ɔwɔlɩ yɩ tʋ kɛɛ osumaa Bayɩbʋlʋ nɩ, ɛkakɛ mɔɔ ozumanlɩ nɩ be a? Ebiye a, ɩyɛlɩ wʋ nnwʋánlɩ mmɩlɩ mɔ ɔnwʋnlɩ kɛɛ Nyamɩnlɩ wɔ dima nɩ. Akʋ̃ sʋ̃, ebiye a mmɩlɩ mɔ ɔnwʋnlɩ kɛɛ Nyamɩnlɩ ɩáyɛ mmenii ayɛkwa wɔ Abɔnsamɩ sɩnɩ nu nɩ ɩmanlɩ wʋ ahʋnlɩnɩ dɔlɩ wu kunlu. Na mmɩlɩ mɔ ɔnwʋnlɩ kɛɛ ɔkɔhʋla kɔnwʋ wʋ alɔvʋlɔ mɔɔ bowuwu nɩ ebiyekʋ̃ na ɛ nɩɩ bɛ bɛawʋwa azɩ daabaa wɔ Paladayɩsɩ azɩlɛ yɩ zʋ nɩ, wʋ anyɩ leli baaba.

2. Bayɩbʋlʋ nu nɔhʋanlɛ mɔɔ ozumanlɩ yɩ mɛda nɩ, mɩnla anyunumihɔlɛ fʋlɔ yɛ enyianlɩ a? (Ɛfɩsɛsɩmaa 5:1, 2)

² Mmɩlɩ mɔ nɩ osumaa Nyamɩnlɩ nwʋ dɩyɛ nɩ, ɔlɔlɛ mɔɔ ɔwɔ ma Gyehova nɩ hɔlɩ zʋlɔ nyinli. Ɔzɔ ɔlɔlɛ nɩ hanlɩ wʋ ma ɛvalɩ mɔɔ osumaa nɩ ɛyɛlɩ egyima. Egyinanlɩ Bayɩbʋlʋ nu egyinalɛzʋ-ndwokɔ zʋ ezizili abɔkɔba. Na iluwakɛɛ ɛpɛ kɛɛ ɔsɔ Nyamɩnlɩ anyɩ ti, ɛzɩnzanlɩ wu subanɩ nɩɩ nyɛlɩyɛ azʋlɔtʋ. Kɛmɔ kuakula sumazuma yɩ awʋvʋlɔ mɔɔ bɔwɔ ɔlɔlɛ nɩ, nɩ osumazumaa wʋ Zɩ mɔɔ ɩwɔ sʋlɔ nɩ.—Kɩnga Ɛfɩsɛsɩmaa 5:1, 2.

3. Mɩnla ndwokɔ yɛ yɛkɔhʋla yekeɣizia yɛ nwʋ a?

³ Ebiye a, yekeɣizia yɛ nwʋ kɛɛ: ‘Asʋ̃ ɔlɔlɛ mɔɔ mʋwɔ mɩma Gyehova kakɩ nɩ, ɩdɩ kezi ɩtɛla ahyɛasɩ mɔɔ munlumanlɩ yɩ a? Ɔzʋmɩ kɛɛ munlumanlɩ nɩ, asʋ̃ mɩyɛ mɩ dɩyɛ kɛɛ Gyehova wɔ  kezimɔ mɩda ɔlɔlɛ ali mikile mi mmeliyema nɩ nu a?’ Sɛ ɔnwʋ kɛɛ “ɔlɔlɛ mɔɔ bɔmʋnlɩ nɩ” nɩ ɔwɔ ma Gyehova nɩɩ wu mmeliyema nɩ ɩhã azɩ po a, áma wʋ padi kolɔ. Eyi be dʋlɩ ɔwɔkɩ Kilisinyiamaa nɩ, naasʋ̃ Gyisɛsɩ ɩápʋ bɛ na ɔzɔ la yɛ ɩlɔ́pʋ amɩyɛ sʋ̃ a. (Yik. 2:4, 7) Izi kɛɛ sa yɛkʋla yenyia ɔlɔlɛ mɔɔ yenyianlɩ wɔ mmɩlɩ mɔ yezumanlɩ nɔhʋanlɛ yɩ fʋlɔ nɩ.

4. Mɩnla yɛ yɛbazuma a?

⁴ Yekozuma kezimɔ yekenyi wɔ ɔlɔlɛ mɔɔ yɛwɔ yɛma Gyehova nɩɩ mmenii mvʋlɔ wɔ dɩyɛzumanlɛ eyi nu. Akʋ̃ sʋ̃, yekehila nyilalɛ azʋlɔtʋ mɔɔ yɛ nɩɩ mmenii mvʋlɔ kenyia mmɩlɩ mɔ yenyia ɔlɔlɛ kezile yɛma Gyehova nɩɩ mmenii mvʋlɔ nɩ.

5-6. (a) Mɩnla ndwokɔzɩzɩbɛ yɛ Pɔɔlʋ yiyialɩ wɔ yɩ ɔzʋ̃mɩnlɛ egyima yi nu a? (b) Mɩnla yɛ ɩhyɛlɩ yɩ ɛzɩzɩbɛ ma ɩhɔlɩ zʋlɔ ɩzʋ̃mɩnlɩ Gyehova a?

⁵ Nɩ sʋ̃mavʋlɔ Pɔɔlʋ yɩ anyɩ deli nwʋmɔ paa kɛɛ ɩsʋ̃mɩɩ Gyehova, naasʋ̃ nɩ ɩ́la azɩ ɩma yɩ. Nɩ Pɔɔlʋ ɩta itudu ɔhʋanɩ ndɩndɩnlɩ naasʋ̃ wɔ ɔzɔ mmɩlɩ yɩ, nɩ ɔhʋanɩdulɛ ɩ́la azɩ. Nɩ ɩyɛ a, Pɔɔlʋ iyiyia asianɩ sʋ̃maa mɔɔ ebiye yɛ lɛ ‘nzuloyilɛ nɩɩ nnwulomaa.’ Nɩ ɩyɛ a adamvʋlɔ kyĩ yi paa. (2 Kɔl. 11:23-27) Akʋ̃ sʋ̃, kɛ mmɩlɩ munwala yɛ Pɔɔlʋ yi mmeliyema Kilisinyiamaa nɩ hileli kɛɛ bɛ anyɩ sɔ mɔɔ nɩ ɩyɛ ɩma bɛ nɩ.—2 Kɔl. 10:10; Fɩl. 4:15.

⁶ Mɩnla yɛ ɩwʋwalɩ Pɔɔlʋ ma ɩhɔlɩ zʋlɔ ɩzʋ̃mɩnlɩ Gyehova a? Pɔɔlʋ zumanlɩ Gyehova yi subanɩ nwʋ dɩyɛ sʋ̃maa wɔ Ɛhɛlɛlɛ yɩ nɩɩ yɩzayɩ yi ozumanlɛnwʋnlɛ nu. Pɔɔlʋ ɣa nwʋnlɩ kɛɛ Gyehova dɔ yɩ paa na eyi ɩmanlɩ inyianlɩ ɔlɔlɛ kezile ɩmanlɩ Gyehova. (Wul. 8:38, 39; Ɛfɩ. 2:4, 5) Pɔɔlʋ hɔlɩ zʋlɔ zʋ̃mɩnlɩ “mmeliyema mɔɔ bɔdʋwa Gyisɛsɩ Kɩlayɩsɩ nɩ” ɩva ihileli kɛɛ ɩdɔ Gyehova.—Hib. 6:10.

7. Mɩnla ɔhʋanɩ ɔkʋ̃ yɛ yekoluwa zʋlɔ yekenyi wɔ ɔlɔlɛ mɔɔ yɛwɔ yɛma Gyehova nɩ nu a?

⁷ Sɛ yesuma Nyamɩnlɩ Odwokɔ nɩ ɛzɩzɩbɛ ɛzɩzɩbɛ a, ɩkɛma ɔlɔlɛ mɔɔ yɛwɔ yɛma yɩ nɩ kɛyɛ kezi. Mmɩlɩ mɔ ɛkɩngaa Bayɩbʋlʋ yɩ ɔfʋã be nɩ, kila kɛɛ ɔkɔnwʋ mɔɔ ikilehile wʋ ɩfalɩ Gyehova nwʋ a. Bizia wʋ nwʋ kɛɛ: ‘Mɩnla ɔhʋanɩ zʋ yɛ odwokɔ eyi da yɩ ali kɛɛ Gyehova dɔ mɩ a? Mɩnla yɛ mʋnwʋ yɩ mɔɔ meti ɩsɛ kɛɛ mɩzamɩ sʋ̃ mʋdɔ yɩ a?’

8. Mɩnla ɔhʋanɩ zʋ yɛ mpayɩwɔlɛ ɩbʋwa ma yenyia ɔlɔlɛ kezile yɛma Nyamɩnlɩ a?

⁸ Ɔhʋanɩ fʋlɔ mɔɔ yekoluwa zʋlɔ yekenyia ɔlɔlɛ kezile yɛkɛma Gyehova yɛ lɛ kɛɛ, yɛkɛhã yɛ ahʋnlɩnɩ nu ndwokɔ yekehile yi eɣile bela wɔ mpayɩwɔlɛ nu. (Ndw. 25:4, 5) Gyehova sʋ̃ kediye yɛ mpayɩwɔlɛ. (1 Dwɔ. 3:21, 22) Eliyema baalɛ Khanh mɔɔ ɩwɔ Asia nɩ hanlɩ kɛɛ: “Ahyɛasɩ yɩ nɩ mʋdɔ Gyehova iluwa mɔɔ muzumanlɩ mɩvalɩ yɩ nwʋ nɩ ti, naasʋ̃ mmɩlɩ mɔ mʋnwʋnlɩ kɛɛ ibuwa mɩ mpayɩwɔlɛ nɩ ɩmanlɩ ɔlɔlɛ mɔɔ mʋwɔ mɩma yɩ nɩ yɛlɩ kezi. Eyi ɩmanlɩ mɩbɛlɩ kɛɛ mɩkɛyɛ nninyeni mɔɔ ɩkɛma yɩ anyɩ kele.” b

9. Mɩnla yɛ ikile kɛɛ nɩ Timoti inyii wɔ ɔlɔlɛ nu a?

⁹ Mmɩlɩ mɔ Pɔɔlʋ ɩɣa yɛlɩ Kilisinyianii mɛda nɩ, iyiyialɩ abɩlantɩyɛ be mɔɔ bɔfʋlɔ yɩ Timoti. Nɩ Timoti dɔ Gyehova na nɩ ɩdɔ mmenii sʋ̃. Alʋbɔ be mɛda nɩ, Pɔɔlʋ hanlɩ hileli Fɩlɩpɩmaa nɩ kɛɛ: “Míni abiye mɔɔ ɩkɔdwɩnɩ mʋnlʋmmɔ bɔ nwʋ baaba kɛɛ mɩzamɩ, sa Timoti la; yɛɛ yɩzayɩ sʋ̃ la yɛ ɩkɔdwɩnɩ mʋnlʋmmɔ bɔ nwʋ a.” (Fɩl. 2:20) Wɔ ɛkɩ nɩ, nɩ Pɔɔlʋ ɩlɛ́kã kezimɔ Timoti ma ndɛnɩ nwʋ odwokɔ, mfomi nɩ ɩkãã kezimɔ Timoti dɔ mmeliyema yɩ baaba nɩ nwʋ odwokɔ. Ɩáyɛ  nnwʋánlɩ kɛɛ asafʋ azʋlɔtʋ mɔɔ nɩ Timoti kɔ sʋ̃mɩ bɛ nɩ bekila Timoti yɩ egyelalɛ yɩ ɔhʋanɩ.—1 Kɔl. 4:17.

10. Mɩnla yɛ Anna nɩɩ yi hũ yɛlɩ va hileli kɛɛ bɔdɔ mmeliyema yɩ a?

¹⁰ Amɩyɛ sʋ̃ yɛpɩbɛ ɔhʋanɩ mɔɔ yekoluwa zʋ yɛkɔwʋwa ye mmeliyema Kilisinyiamaa. (Hib. 13:16) Ma yehila Anna mɔɔ yɛhã yɩ nwʋ odwokɔ wɔ dɩyɛzumanlɛ mɔɔ idua numɔ nɩ yɩ ozumanlɛnwʋnlɛ yɩ. Mmɩlɩ mɔ ahumi kezile be duli mɛda nɩ, ɩ nɩɩ yi hũ hɔ gyelalɩ mmeliyema be na bɔnwʋnlɩ kɛɛ ahumi yi ɩzɩkɛ bɛ aliyia yɩ zʋ ayɩansɩ yɩ. Nɩ ahumi yi ma abusunwa yɩ bɛ ntalɩ munwala yɛ evinli. Anna hanlɩ kɛɛ: “Yɛhɔ yɛbɩdalɩ bɛ ntalɩ yɩ yɛdʋlɩ na yewuwuli yɛɣɩlɛlɩ bɛ. Amɩyɛ mɛyɩ nɩ ɩ́dɩ egyima bela ɩma yɛ naasʋ̃ ɔzɔ mɔɔ yɛyɛlɩ nɩ, ɩma yɛyɛ ɔhɔnwʋmmɔ ɣa bʋmɩ nnɛ.” Ɔlɔlɛ mɔɔ Anna nɩɩ yi hũ wɔ ma mmeliyema nɩ hanlɩ bɛ ma bɛyɛlɩ debe bɔwʋwalɩ bɛ.—1 Dwɔ. 3:17, 18.

11. (a) Sɛ yɛda ɔlɔlɛ ali yekile mmenii mvʋlɔ a, kɛ ɩkã bɛ ise a? (b) Kɛmɔ Ɛɣɛlɛwulɛ 19:17 kã nɩ, sɛ yɛda ɔlɔlɛ ali a, kɛ ɩkã Gyehova ise a?

¹¹ Sɛ yɛda ɔlɔlɛ nɩɩ kunlumiba ali yekile mmenii mvʋlɔ a, ɩma bɔnwʋ kɛɛ yɛbɔɔ mmɔdɩnɩ kɛɛ yekozumazuma Gyehova. Na bekehile nwʋmɔ anyɩnlɩzɔlɛ. Khanh mɔɔ yeli bɔmʋnlɩ yɛhã yɩ odwokɔ nɩ hanlɩ bɛzabɛ mɔɔ bɔwʋwalɩ yɩ nwʋ odwokɔ kɛɛ: “Mɩ anyɩ sɔ mmeliyema mmaalɛ azʋlɔtʋ mɔɔ nɩ bɛ nɩɩ mɩ kɔ dasɩlɛlilɛ nɩ. Nɩ bɛba bɛfa mɩ ma yɛkɔ yedi alɩyɛ na yewie yɩ a nɩ bɔhɔ bodwula mɩ wɔ awudo. Mɩɣa mʋnlɩ kɛɛ nɩ ɩdɩ egyima kezile ɩma bɛ naasʋ̃ bɛyɛlɩ, iluwakɛɛ nɩ bɔdɔ mɩ.” Ɩwɔ numɔ, kɛ abiyela yɛ ikehile mɔɔ yɛyɛ yɛma bɛ nɩ nwʋ anyɩnlɩzɔlɛ a. Khanh hanlɩ kɛɛ: “Minyianlɩ a, ankɩ sa mɩyɛ debe mɩfa mikile kɛɛ mɩ anyɩ sɔ bɛ baabayɛlɛ yɩ munwala, naasʋ̃ kakɩ yɩ mízi dɩka mɔɔ bo munwala bɛda. Gyehova mɛyɩ izi na mʋbɔ mpayɩ kɛɛ  ikowula bɛ agyia nu ɩkɛma mɩ.” Khanh yɩ odwokɔ yɩ dɩ nɔhʋanlɛ. Sɛ yɛyɛ baaba yɛma mmenii na ɩdɩ ɛgyɩkɩ̃ɩ̃ kɛ mɩnla la po a, Gyehova nwʋ yɩ munwala. Ɩnwʋ yɩ kɛɛ ɩdɩ afɔlɩwɔlɛ nɩɩ bʋsɩnyɩa mɔɔ ikoduwa ɩkɛma bɛ.—Kɩnga Ɛɣɛlɛwulɛ 19:17.

12. Kɛ ɩkɛyɛ na mmeliyema mmenyia bɛahile kɛɛ bɔdɔ asafʋ yɩ a? (Kila mfonyini yi sʋ̃.)

¹² Sɛ ɛdɩ eliyema benyia a, mɩnla yɛ ɔkɔhʋla kɛyɛ kɛva kehile kɛɛ ɔdɔ mmenii mvʋlɔ a? Eliyema abɩlantɩyɛ be mɔɔ bɔfʋlɔ yɩ Jordan ɣizialɩ asafʋ nu ebani be mɔɔ ɩkɔhʋla kɛyɛ kɛva kɔwʋwa asafʋ yɩ. Asafʋ nu ebani yi hamvʋlɩ yɩ wɔ mɔɔ ɩyɛ daada nɩ nwʋ. Na ɩmanlɩ fʋlɔdulɛ yɩ mɔɔ ɩkɛma ɩkɛyɛ sʋ̃maa. Kɛ ndianwʋ nɩ, ɩhã ihileli yi kɛɛ, ɩwɔ́ mmɔdɩnɩ ɩɣɩlá Kɩndɔm Hɔɔlʋ ndɛ na izemazemá mmeliyema yɩ, ɩmá munwalɩyɛ wɔ dɩyɛzumanlɛ tʋ, ɩ nɩɩ yɩ dasɩlɛlilɛ okuwu nu maa yɩ bɛda bɔwɔ numɔ bɔhɔ dasɩlɛlilɛ na ɩbɩbɛ́ nninyeni mɔɔ ɩkɔhʋla ɩkɛyɛ ɩkɔwʋwa bɛ. Jordan yɛlɩ eyi nɩ, inyianlɩ anyunumihɔlɛ na inyianlɩ ɔlɔlɛ kezile ɩmanlɩ yɩ mmeliyema sʋ̃. Jordan ɣa zumanlɩ kɛɛ, sɛ abiye ɩ́dɩ asafʋ nu sʋ̃mɩvʋlɔ po a, ɩsɛ kɛɛ ɩbʋwa mmeliyema na sɛ ɩba ɩyɛ asafʋ nu sʋ̃mɩvʋlɔ a, ɩadʋwa zʋ ɩayɛ zɔ.—1 Tim. 3:8-10, 13.

13. Mɩnla ɔhʋanɩ zʋ yɛ ɔlɔlɛ hanlɩ Eliyema Christian ma izia ɩɣa ɩyɛlɩ asafʋ nu ebani ebiyekʋ̃ a?

¹³ Asʋ̃ ɔzʋ̃mɩ kɛɛ asafʋ nu sʋ̃mɩvʋlɔ anzɛnyɩɩ ebani kyɩ̃ a? Gyehova kakɛ egyima mɔɔ ɛyɛlɩ nɩɩ ɔlɔlɛ mɔɔ ɛlalɩ yɩ ali nɩ. (1 Kɔl. 15:58) Na ɩnwʋ ɔlɔlɛ mɔɔ ɛlanwʋ la ɛdaa yɩ ali nɩ. Mmɩlɩ mɔ ɔnwʋmɔ ɔhʋanɩ mɔɔ Eliyema Christian lɛ kɛɛ asafʋ nu ebani vili yɩ sa nɩ, ɩyɛlɩ yɩ ɛyɛkɛ baaba. Ɩhanlɩ kɛɛ, “Mizili pɔkɔ kɛɛ, sɛ mʋwɔ ɔnwʋmɔ ɔhʋanɩ be o, míni ɔnwʋmɔ ɔhʋanɩ bela o, mʋkɔhɔ zʋ mʋkɔzʋ̃mɩ Gyehova.” Aɣinzi yi, izia ɩɣa ɩyɛlɩ asafʋ nu ebani. Ɩhanlɩ kɛɛ: “Nɩ mʋtwɩnhwɩ̃ɩ̃  mɩ agyia azɩ kɛɛ mʋkɔzʋ̃mɩ kɛɛ asafʋ nu ebani dɔkʋ̃. Naasʋ̃ mizili pɔkɔ kɛɛ sɛ Gyehova pɛ kɛɛ mʋsʋ̃mɩ kɛɛ asafʋ nu ebani ebiyekʋ̃ a, sa mide mitiã nu, iluwakɛɛ mʋdɔ yɩ na mʋdɔ mmeliyema yɩ sʋ̃.”

14. Mɩnla yɛ osuma wɔ eliyema baalɛ mɔɔ ɩwɔ Georgia yi odwokɔ yɩ nu a?

¹⁴ Gyehova azʋ̃mɩvʋlɔ da ɔlɔlɛ ali kile bɛ apaa nu maa. (Mt. 22:37-39) Kɛ ndianwʋ nɩ, eliyema baalɛ Elena mɔɔ ɩwɔ Georgia nɩ hanlɩ kɛɛ: “Bɔmʋnlɩ yɩ, Gyehova nwʋ ɔlɔlɛ ti yɛ nɩ mʋkɔ dasɩlɛlilɛ a, naasʋ̃ mmɩlɩ mɔ ɔlɔlɛ mɔɔ mʋwɔ mɩma mʋ sʋlɔ Ɛzɩlɛ yɩ nɩ yɛlɩ kezi nɩ, ɔlɔlɛ mɔɔ mʋwɔ mɩma mmenii sʋ̃ yɛlɩ kezi. Mʋbɔ mmɔdɩnɩ mʋdwɩnɩndwɩnɩ ndwokɔzɩzɩbɛ mɔɔ beyiyiaa nɩɩ mɔɔ mɩ nɩɩ bɛ bɔ nwʋmɔ nkɔmmɔ wɔ dasɩlɛlilɛ nu a, bɛ anyɩ keleli nwʋmɔ nɩ nwʋ. Sɛ mʋdwɩnɩndwɩnɩ bɔ nwʋ zɔ a, ɩma minyia ɛpɛ kɛɛ mʋkɔwʋwa bɛ.”—Wul. 10:13-15.

15-16. Kɛmɔ mfonyini yi kile nɩ, sɛ yɛda ɔlɔlɛ ali yekile mmenii mvʋlɔ a, mɩnla nyilalɛ yɛ yekenyia a?

¹⁵ Sɛ yɛda ɔlɔlɛ ali yekile ye mmeliyema a, kɛ bɛzabɛ nkʋ̃ yɛ benyia zʋlɔ mfasʋ a. COVID-19 adimakɛlɛ yɩ ɣalɩ nɩ, eliyema be mɔɔ bɔfʋlɔ yɩ Paolo nɩɩ yɩ yɩ wʋwalɩ mmeliyema mmaalɛ mbanimbani ma bɔnwʋnlɩ kezimɔ bɛkɛva bɛ tabɩlɛtɩ nɩɩ bo foonu bekeli dasɩlɛ. Eliyema baalɛ be mɔɔ nɩ ɩánwʋ numɔ kʋlaa nɩ, aɣinzi yi ɩnwʋnlɩ kezimɔ ɩkɛva ɩkɛyɛ egyima. Ɩhʋla ɩva ɩdʋlɩ salɛ ɩvʋlɔlɩ yi mmusunwamaa  kɛɛ bɛɣɩla Ɛhakɛlɛlilɛ yɩ be. Na bo nu anwunluma ahyiã diyeli egyimalilɛ yɩ be wɔ vidiyo-kɔɔlʋ zʋ! Eliyema baalɛ yɩ nɩɩ yi mmusunwamaa munwala nyianlɩ Paolo nɩɩ yɩ yɩ bɔ mmʋwalɩyɛ zʋ mfasʋ. Aɣinzi yi, eliyema baalɛ yɩ hɛlɛlɩ hɔ manlɩ Paolo kɛɛ: “Yɛla wʋ asɩ kɛɛ ehilehile amɩyɛ mbanimbani yi na mɩ ɛɣɛɛlɛ iléfi kezimɔ Gyehova dwɩnɩ yɛ nwʋ nɩɩ egyima ɛzɩzɩbɛ mɔɔ bɛyɛlɩ bɛva bɔwʋwalɩ yɛ nɩ.”

¹⁶ Mɔɔ izili yi manlɩ Paolo ɣa zumanlɩ kɛɛ ɔlɔlɛ nwʋ hyinyia tɛla nnimidi anzɛnyɩɩ adʋmɩ akyɛdɩ. Ɩhanlɩ kɛɛ: “Nɩ mʋsʋ̃mɩ kɛɛ mansini zʋ ehilalɛvʋlɔ na mɩɣa mʋnwʋ kɛɛ ebiye a mmeliyema yɩ bɛáhakɛ ndɛnɩ azʋlɔtʋ mɔɔ mɩmanlɩ nɩ, naasʋ̃ mɔɔ mɩyɛlɩ mɩva mʋwʋwalɩ bɛ nɩ mɛyɩ, bɛlanwʋ la bɛkakɛ.”

17. Sɛ yɛda ɔlɔlɛ ali a, aninyiammɔ sʋ̃ yɛ bekenyia zʋlɔ mfasʋ a?

¹⁷ Sɛ yɛda ɔlɔlɛ ali a, yɛzayɛ yenyia zʋlɔ mfasʋ wɔ ɔhʋanɩ mɔɔ yɛ anyɩ ɩála zʋ kʋlaa. Jonathan mɔɔ ɩda New Zealand nɩ ɣa nwʋnlɩ kɛɛ eyi dɩ nɔhʋanlɛ. Fʋlɔ oyuwa ɔkʋ̃ be, ɩnwʋnlɩ kɛɛ ɔhʋanɩbukolɛvʋlɔ be yɩzayɩ nkʋ̃ ɩkɔɔ dasɩlɛlilɛ, meti izili pɔkɔ kɛɛ ɩ nɩɩ yɩ kɔhɔ dasɩlɛlilɛ wɔ Fʋlɔ oyuwa bela. Ɔzɔ mmɩlɩ yɩ mɛyɩ, nɩ yɩzayɩ ízi kezimɔ ikenyia kunlumiba mɔɔ ɩdaa yɩ ali nɩ zʋ mfasʋ. Jonathan hanlɩ kɛɛ, “Nɩ mɩ anyɩ iáleli dasɩlɛlilɛ nwʋ baaba. Naasʋ̃ mmɩlɩ mɔ mʋnwʋnlɩ kezimɔ ɔhʋanɩbukolɛvʋlɔ yɩ kilehile na yɩ dasɩlɛlilɛ egyima yɩ iso mma nɩ, ɩhanlɩ mɩ ma mɩ anyɩ ɣa lelili dasɩlɛlilɛ egyima yɩ nwʋ. Eliyema yɩ ɣa yɛlɩ mʋ ɔhɔnwʋ paa, ɩwʋwalɩ mɩ ma mɩ anyɩ ɣa lelili dasɩlɛlilɛ egyima yɩ nwʋ na mʋhwɩnlɩ miɣikeli Gyehova.”

18. Mɩnla yɛ Gyehova pɛ kɛɛ yɛyɛ a?

¹⁸ Gyehova pɛ kɛɛ yenyia ɔlɔlɛ kezile yɛma mɛyɩ nɩɩ mmenii mvʋlɔ. Kɛmɔ yɛɣa yezuma nɩ, sɛ yɛkɩnga Bayɩbʋlʋ yɩ na yɛdwɩnɩndwɩnɩ nwʋmɔ na yɛbɔ Gyehova mpayɩ eɣile bela a, ɩkɛma ɔlɔlɛ mɔɔ yɛwɔ yɛma yɩ nɩ kɛyɛ kezi. Sɛ yɛyɛ nninyeni be yɛbʋwa ye mmeliyema a, ɩkɛma ɔlɔlɛ mɔɔ yɛwɔ yɛma bɛ nɩ kɛyɛ kezi. Mmɩlɩ mɔ yɛ ɔlɔlɛ ɩyɛɛ kezi nɩ, ɩkɛma yekeɣike Gyehova nɩɩ ye mmeliyema. Na ɔhɔnwʋvalɛ mɔɔ ɩdɩ zɔ nɩ kɛma yɛ anyɩ kele eɣile bela!