Nɩ mɩ papa dɩ asɔlɩ ebani wɔ United Church of Canada, meti dapɛnɩ bela nɩ ɩma mɩ nɩɩ mɩ anlima baalɛ yɩ kɔ Sunday sukuulu na bɔbɔ nwɔnɩ 11 a, nɩ ɩma yɛhɔ yɛhɩnla yɩ nwʋ ma bɛyɛ asɔlɩ. Sɛ itwu oyuwa sʋ̃ a, nɩ yɛ nɩɩ yɛ maamɩ kɔ Kɩndɔm Hɔɔlʋ. Nɩ yɛkʋla yɛnwʋ kɛɛ sʋnʋnkʋ̃ wɔ ɔzʋ̃mɩnlɛ anwɩ̃ yɩ bɛ avinli.

Mɩ maamɩ hanlɩ mɔɔ isumaa yɩ nwʋ odwokɔ ihileli yɩ ɔhɔnwʋmmɔ Bob nɩɩ Marion Hutcheson, na bɔnlʋmmɔ sʋ̃ bɛɣa beleli nɔhʋanlɛ yɩ. Wɔ 1958 nɩ, Hutcheson abusunwa yɩ valɩ mɩ hɩnlanlɩ bo nnwuakula mmenyia asã yɩ nwʋ ma yɛhɔlɩ aɣile-awɔtwɛ Divine Will Amanlɩ Amanlɩ Ayiyialɩyɛ wɔ New York City. Mɩɣa mʋnwʋ kɛɛ nɩ ɩ́la azɩ ɩma bɛ kɛɛ bɛ nɩɩ mɩ kɔhɔ, naasʋ̃ ɔzɔ ayiyialɩyɛ yɩ dɩ dɩyɛ ɔkʋ̃ mɔɔ mɩ ɛɣɛɛlɛ iléfi kyɩ̃ wɔ mɩ ɛbɩlawɔlɛ nu.

Wɔ mɩ mmɩlantɩyɛ mmɩlɩ nu nɩ, nɩ yɛsʋ̃ nnamɩ wɔ dɩka mɔɔ nɩ yɛda yɩ. Nɩ mɩ anyɩ deli ɔzɔ egyima yɩ nwʋ. Nɩ mɩpɛ paa kɛɛ mɩba mɩyɛ dɔkɩta mɔɔ ikila nnamɩ. Mɩ maamɩ hanlɩ eyi nwʋ odwokɔ hileli asafʋ nu ebani be. Asafʋ nu ebani yi hanlɩ hileli mɩ kɛɛ yɛda “mmɩlɩ mɔɔ ili awielɩyɛ nɩ” nu na sɛ mɩfa alʋbɔ sʋ̃maa mʋkɔ yunivɛsiti a, sa ɩkʋla ɩkã mɩ nɩɩ Gyehova avinli abusunwawɔlɛ. (2 Tim. 3:1) Meti mizili pɔkɔ kɛɛ mʋlɔ́kɔ yunivɛsiti.

 Naasʋ̃ nɩ mʋdwɩnɩ mɔɔ muwie sukuulu a mɩkɛyɛ nwʋ. Ɩwɔ numɔ kɛɛ nɩ dapɛnɩ awielɩyɛ bela mʋkɔ dasɩlɛlilɛ dɩyɛ, naasʋ̃ nɩ mɩ anyɩ ɩáhyɛda ideli dasɩlɛlilɛ nwʋ na mɩahã po kɛɛ mɩbayɛ ɔhʋanɩbukolɛvʋlɔ. Ɔzɔ mmɩlɩ yɩ nu la, nɩ mɩ papa nɩɩ mɩ ankɩlɩ bɛhyɛɛ mɩ kɛɛ mʋhɔ mɩyɛ egyima wɔ insurance kɔmpeni kezile be nu wɔ Toronto. Nɩ mɩ ankɩlɩ dɩ ebani wɔ ɛkɛnɩ meti mileli midianlɩ nu.

Iluwakɛɛ nɩ mɩfa mmɩlɩ sʋ̃maa mɩyɛ egyima na mɩ nɩɩ bɛzabɛ mɔɔ bɛázʋ̃mɩ Gyehova bɔ sʋ̃maa nɩ ti, mʋwɔlɩ yɩ tʋ kɛɛ mitindiãã dɩyɛzumanlɛ nɩɩ dasɩlɛlilɛ nu. Ahyɛasɩ yɩ, nɩ mɩda mɩ nla benyia mɔɔ ɩ́dɩ dasɩvʋlɔ yɩ awudo naasʋ̃ wɔ yi owulo mɛda nɩ, nɩ ɩsɛ kɛɛ mɩpɛ dɩka fʋla mʋbʋwa.

Hutcheson abusunwa yɩ mɔɔ bɛ nɩɩ mɩ hɔlɩ 1958 ayiyialɩyɛ nɩ, bɛvalɩ mɩ kɛɛ bɛ ɣa. Bɛmanlɩ mɩɣa mʋwʋwalɩ bɛ awudo na bɔwʋwalɩ mɩ ma minyinli wɔ sunzuma ɔfʋã nu. Wɔ 1960 nɩ, mɩ nɩɩ bɛ ɣa John wɔlɩ numɔ nlumanlɩ. John wɔlɩ ɔhʋanɩbukolɛ egyima yɩ tʋ, eyi hanlɩ mɩ ma miminyianlɩ mʋ nwʋ wɔ dasɩlɛlilɛ egyima yi nu. Asafʋ nu mbanimbani yi nwʋnlɩ mɩ anyunumihɔlɛ yɩ na bɛvalɩ ɔnwʋmɔ ɔhʋanɩ mɔɔ nnɛ bɔfʋlɔ yɩ Ɛbɩlawɔlɛ Nɩɩ Dasɩlɛlilɛ Ayiyialɩyɛ zʋ ehilalɛvʋlɔ nɩ bɛmanlɩ mɩ.

Wɔ 1966 nɩ, migyialɩ ɔhʋanɩbukolɛvʋlɔ be mɔɔ ɩbɔ ɛhyɩmɛ mɔɔ bɔfʋlɔ yɩ Randi Berge. Nɩ yɩ anyɩ deli nwʋmɔ kɛɛ ɩkɔhɔ ɩkɔzʋ̃mɩ wɔ dɩka mɔɔ mmʋwalɩyɛ nwʋ hyinyia. Yɛ mansini zʋ ehilalɛvʋlɔ yɩ nyianlɩ mmɩlɩ manlɩ yɛ na ɩhyɛlɩ yɛ ɛzɩzɩbɛ kɛɛ yɛhɔ yɛwʋwa asafʋ mɔɔ ɩwɔ Orillia wɔ Ontario. Meti yeduli yɛhɔlɩ.

Yɛhɔ yedwuli Orillia la pɛ, mɩɣa mɩyɛlɩ ɔhʋanɩbukolɛvʋlɔ. Kezimɔ nɩ Randi yɩ anyɩ de wɔ egyima yɩ nu nɩ, mɩzamɩ sʋ̃ mɩɣa minyianlɩ ebiye. Mmɩlɩ mɔ mɩvalɩ mʋ nwʋ munwala muwulalɩ ɔhʋanɩbukolɛ egyima yɩ nu, na mʋnwʋnlɩ kezimɔ mmenii bɛtɩɩ mɔɔ yekilehile bɛ yɩ tʋ nɩ, mɩ anyɩ leli paa. Yɛ anyɩ leli kɛɛ yɛwʋwalɩ agyiahʋnlɩmaa be wɔ Orillia ma bɛyɛlɩ nzɩnzanlɩyɛ wɔ bɛ ɛbɩlawɔlɛ nu na bɛɣa bɔzʋ̃mɩnlɩ Gyehova.

Mmɩlɩ mɔ yɛhɔlɩ Toronto nɩ, miyiyialɩ Eliyema Arnold MacNamara mɔɔ nɩ ɩwɔ Bɛtɩlɩ nɩ. Iɣizialɩ yɛ kɛɛ yɛkɛbɛ kɛɛ yɛkɔzʋ̃mɩ kɛɛ ɔhʋanɩbukolɛmaa aditili a. Ndɛndɛ la mɩhanlɩ kɛɛ: “Nyɛ! Sa yɛkɔ dɩka bela naasʋ̃ yɛábɛ Quebec!” Nɩ Canada maa mɔɔ bɛkã Bʋlɔfʋlɔ nɩ, nɩ bɛábɛ Quebec maa mɔɔ bɛkã French nɩ bo odwokɔ, iluwakɛɛ nɩ bɛsabɛsayɛlɛ be ɩkɔlɩɩ zʋlɔ wɔ ɛkɛnɩ na eyi nyianlɩ mʋ zʋ tumi. Ɔzɔ mmɩlɩ yɩ, nɩ mmenii mɔɔ bɛda Quebec nɩ bɛpɩɩ kɛɛ bɛkɛdɩ bɔ nwʋ wɔ Canada nwʋ.

Arnold wuwalɩ kɛɛ, “Quebec sʋ̃ la yɛ kakɩ yɩ Bɛtɩlɩ ɩsʋ̃maa ɔhʋanɩbukolɛmaa aditili ma bɔkɔhɔ kɛ a.” Nɩ mizi daada kɛɛ mɩ yɩ Randi pɛ kɛɛ ɩkɔ ɩsʋ̃mɩ wɔ kɛnɩ. Aɣinzi yi, mɩɣa mʋnlɩ kɛɛ ɩdɩ baaba paa kɛɛ yezili pɔkɔ yeduli yɛhɔlɩ kɛ!

Yɛvalɩ dapɛnɩ anlu yezumanlɩ French ndɛnɩ yewieli nɩ, mɩ nɩɩ Randi nɩɩ agyiahʋnlɩmaa mvʋlɔ be dualɩ ɔhʋanɩ kɛyɛ kilomita 540 (336 mayɛlɩ) yɛhɔlɩ Rimouski, wɔ Montreal tisʋlɔ ɔfʋã nu . Mmɩlɩ mɔ mɩɣɩnganlɩ amanɩyɛwɔlɛ be wɔ ayiyialɩyɛ tʋ nɩ, mɩɣa mʋnwʋnlɩ kɛɛ yɛwɔ nninyeni sʋ̃maa suma. Kɛ ankɩ mɩkɛɣɩnga kɛɛ ayiyialɩyɛ mɔɔ yɛbahɔ yɩ Austria maa sʋ̃maa kɛɣa nɩ, mʋhɔ mɩhanlɩ odwokɔ be mɔɔ ikile kɛɛ nnʋma nɣezile be kɛɣa ayiyialɩyɛ yɩ tʋ.

Wɔ Rimouski nɩ, mmeliyema mmaalɛ asigyiamaa anla, eliyema Huberdeau nɩɩ yɩ yɩ nɩɩ bo nnwuakula mmaalɛ anwɩ̃ sʋ̃ bɛɣa bɛhɩnlanlɩ yɛ nwʋ. Huberdeau abusunwa yɩ bɛhayɩlɩ aliyia be mɔɔ nɩ iwula numɔ asunwa. Nɩ yɛwɔ numɔ kɛyɛ mmenii 12 mɔɔ ɩlɛ ɩkɔɔ 14 yɛ yɛda kɛ, na nɩ yɛbʋwa ma botuwa aliyia yɩ nwʋ kakɛ. Nɩ yɛfʋlɔ aliyia yɩ White House iluwakɛɛ nɩ bebenti nwʋmɔ fuvulo. Kɛ ɔhʋanɩbukolɛmaa aditili nɩ, nɩ mɩ nɩɩ Randi kɔ dasɩlɛlilɛ nwɔnɩ, oyuwa nɩɩ nunuma, meti nɩ yɛ anyɩ de kɛɛ yenyia mmenii ma bɛ nɩɩ yɛ kɔ dasɩlɛlilɛ mmɩlɩ munwala, wɔ mmɩlɩ po mɔ ɛyɛbɛ wɔ numɔ nɩ.

Yɛ nɩɩ ɔhʋanɩbukolɛmaa nɔhʋanlɛmaa eyimmɔ ɣa yɛlɩ kɛɛ abusunwa ɔkʋ̃. Nɩ itwu eɣile be a, yɛtɩ sɩnɩ yɛbɔ numɔ na yɛyɛ alɩyɛ yɛbɔ nu. Nɩ eliyema ɔkʋ̃ yɛ dɩyɛ wɔ ndwomi nwʋ, meti nɩ Fʋlɔ nunuma bela yɛtʋ ndwomi yesi.

Rimouski azɩlɛ-sini yi zoli mma! Wɔ alʋbɔ anlu nu nɩ, yɛnwʋnlɩ kɛɛ Bayɩbʋlʋ zumanlɛmaa sʋ̃maa benyiaa anyunumihɔlɛ na bonumaa. Yenyianlɩ ɛlawulowɔlɛmaa 35 wɔ asafʋ yɩ nu nɩ, yɛ anyɩ leli baaba.

Bɛdɩdɩlɩ yɛ kɛɛ odwokɔbadɛlɛlɛmaa wɔ Quebec. Yɛnwʋnlɩ kezimɔ Gyehova wʋwalɩ yɛ wɔ dasɩlɛlilɛ egyima yɩ nu na ɩmanlɩ yɛ sa hanlɩ yɛ nnwʋnlamɩ ɔfʋã nu nninyeni nɩ. Akʋ̃ sʋ̃, yɛɣa yenyianlɩ ɔlɔlɛ yɛmanlɩ bɛzabɛ mɔɔ bɛkã French, bɛ ndɛnɩ nɩɩ bɛ ammamu. Ɩmanlɩ yenyianlɩ ɔlɔlɛ yɛmanlɩ ammamu mvʋlɔ sʋ̃.—2 Kɔl. 6:13.

Aɣilemvile nu la, bɛtɩlɩ hanlɩ hileli yɛ kɛɛ yedu yɛhɔ Tracadie mɔɔ ɩwɔ New Brunswick avindelɩyɛ ɔfʋã nu. Nɩ eyi ɩyɛlɛ ɩ́la azɩ iluwakɛɛ nɩ yɛhayɩlɩ aliyia yeduwalɩ yɩ kakɛ a ɩlɛ́kyɛlɩ, na nɩ mɩfa mɩ mmɩlɩ yɩ be mikile dɩyɛ wɔ sukuulu be nu sʋ̃. Nɩ yɛ Bayɩbʋlʋ zumanlɛmaa yɩ be bɛɣa bɛyɛ ɛlawulowɔlɛmaa, na nɩ yegua zʋ yekyinaa Kɩndɔm Hɔɔlʋ po.

Yɛwɔlɩ mpayɩ ɔzɔ dapɛnɩ yɩ awielɩyɛ yɩ munwala na yɛhɔ yehilalɩ Tracadie, nɩ ɛkɛnɩ ɩ́dɩ kɛɛ Rimouski kʋlaa. Naasʋ̃ yezili pɔkɔ kɛɛ iluwakɛɛ Gyehova pɛ kɛɛ yɛkɔ ɛkɛnɩ nɩ ti sa yɛkɔ. Yedweli Gyehova yehilalɩ na yɛnwʋnlɩ kezimɔ ilili ye ndwokɔzɩzɩbɛ nwʋ egyima ɩmanlɩ yɛ nɩ. (Mal. 3:10) Iluwakɛɛ nɩ Randi dɔ Gyehova, ɩádwɩnɩ yɩzayɩ nkʋ̃ yɩ nwʋ, na yɩ nwʋ yɛ anyɩnlɩlelɛ ti, ɩáma ye odulɛ yɩ sɩ.

 Robert Ross nkʋ̃ la yɛ nɩ ɩdɩ asafʋ nu ebani wɔ yɛ asafʋ fʋlɔ yɩ nu a. Ɩ nɩɩ yɩ yɩ Lɩnda hɔ yɛlɩ ɔhʋanɩbukolɛ egyima yɩ wɔ kɛ na mmɩlɩ mɔ bɔwʋlɩ bɛ ɣa mɔɔ ili bɔmʋnlɩ nɩ, bezili pɔkɔ kɛɛ bɔkɔhɔ zʋ bɔkɔwʋwa ɛkɛnɩ. Ɩwɔ numɔ kɛɛ nɩ bekilaa bɛ ɣa ɛgyɩkɩ̃ɩ̃ yɩ dɩyɛ, naasʋ̃ kezimɔ beleli mɩ nɩɩ Randi, bɛ pindinyiigyinanlɛ nɩɩ ɛhyɩmɛ mɔɔ bɛfa bɛyɛ dasɩlɛlilɛ egyima yɩ hyɛlɩ yɛ ɛzɩzɩbɛ.

Mmɩlɩ mɔ yɛvalɩ alʋbɔ anwɩ̃ yɛyɛlɩ ɔhʋanɩbukolɛ egyima yɩ wɔ Tracadie nɩ, aɣilemvile nu la bɛhanlɩ kɛɛ yɛhɔ yɛyɛ́ mansini egyima. Yɛvalɩ alʋbɔ asunwa yɛzʋ̃mɩnlɩ wɔ mansini mɔɔ bɛkã Bʋlɔfʋlɔ ndɛnɩ nu, na mɛyɩ mɛda nɩ bɛ nɩɩ yɛ hɔlɩ French mansini nu wɔ Quebec. Nɩ Léonce Crépeault mɔɔ ɩdɩ yɛ manlɩ-avinli zʋ ehilalɛvʋlɔ yɩ kamvʋ mɩ wɔ mɩ ndɛnɩmanlɛ nwʋ. Naasʋ̃ iwie yi a nɩ ibizia mɩ kɛɛ, “Kɛ ɩkɛyɛ na bɛadɩ yɩ tʋ bʋwɔ a?” a Kezimɔ inyianlɩ mʋ nwʋ alagyɩ nɩ wʋwalɩ mɩ ma mihilalɩ kezimɔ mɩkɛma mɩ ehilehilelɛ nu kɛla kɛ na ɩayɛ mɛlɛkɛ kɛɛ abiyela kɛdɩ yɩ tʋ.

Dɩyɛ ɔkʋ̃ mɔɔ mɩ ɛɣɛɛlɛ iléfi kyɩ̃ yɛ lɛ egyimalilɛ be mɔɔ minyianlɩ wɔ 1978 “Victorious Faith” Amanlɩ-Amanlɩ Avinli Ayiyialɩyɛ wɔ Montreal nɩ. Mɩyɛlɩ egyima wɔ dɩka mɔɔ bɛyɛ alɩyɛ. Nɩ yekilaa mmenii 80,000 ɔhʋanɩ, nɩ yenyia nhyɩhyɛlɩyɛ fʋlɔ mɔɔ yɛkɛva yɛkɛma alɩyɛ bɛ. Nɩ nninyeni mɔɔ yɛkɛva yɛkɛyɛ alɩyɛ, alɩyɛ yɩ, nɩɩ kezimɔ yɛkɛyɛ yɩ sʋ̃ dɩ fʋlɔ kʋlaa. Nɩ yɛwɔ kaalɩ nɣezile kɛyɛ 20 mɔɔ fɩlɩgyɩ wɔ nu, naasʋ̃ nɩ itwu eɣile be a, ɩáyɛ egyima. Ankɩ ɩsɛ kɛɛ yɛkɔ yesiyeziye paakɩ kɛnɩ ansaana yɛawɔ ayiyialɩyɛ yɩ eɣile mɔɔ ili bɔmʋnlɩ yɩ tʋ, naasʋ̃ iluwa ɛɣɛlɛlilɛ be mɔɔ ɩhɔlɩ zʋ wɔ ɛkɛnɩ nɩ ti, dasuwonu yɛ yenyianlɩ ɔhʋanɩ yɛhɔ yeziyeziyeli kɛ a. Na nɩ ɩsɛ kɛɛ yɛyɛ nwɔnɩ alɩyɛ sʋ̃ ansaana awulo ɩahyɩ̃! Nɩ yɛvɛ paa naasʋ̃ muzumanlɩ sʋ̃maa wɔ kezimɔ mmeliyema yɩ yɛlɩ egyima ɛzɩzɩbɛ, bo subanɩba, nɩɩ anyɩnlɩlelɛ mɔɔ bɛlalɩ yɩ ali nɩ nu. Yɛɣa yɛyɛlɩ ɔhɔnwʋmmɔ paa, na nnɛ munwala yɛdɩ ɔhɔnwʋmmɔ. Yɛ anyɩ leli kɛɛ yɛhɔlɩ ayiyialɩyɛ sʋnʋnkʋ̃ eyi wɔ Quebec, dɩka mɔɔ nɩ botwodwu betiyia mmeliyema ɛzɩzɩbɛ ɛzɩzɩbɛ wɔ 1940 mɔɔ ɩkɔɔ 1960 nu nɩ!

Muzumanlɩ nninyeni sʋ̃maa wɔ mʋ ɔhɔnwʋmmɔ mansini zʋ ehilalɛmaa bɛ ɛkɛnɩ wɔ ayiyialɩyɛ nɣezile mɔɔ yɛyɛlɩ wɔ Montreal nɩ. Wɔ ɔlʋbɔ ɔkʋ̃ be nu nɩ, David Splane mɔɔ kakɩ yɩ ɩsʋ̃mɩ kɛɛ ɔhʋanɩhilelɛ okuwu yi nu nii nɩ yɛ nɩ ɩdɩ ayiyialɩyɛ  yɩ zʋ ehilalɛvʋlɔ a. Wɔ ayiyialɩyɛ fʋlɔ be mɔɔ yɛyɛlɩ tʋ nɩ, bɛhanlɩ kɛɛ mamɩ yɛ mɩyɛ́ ɔzɔ egyima yɩ a, na David sʋ̃ wʋwalɩ mɩ baaba.

Mmɩlɩ mɔ nɩ yɛva alʋbɔ 36 yɛyɛ mansini egyima yɩ nɩ, bɔdʋlɩ salɛ bɔvʋlɔlɩ mɩ kɛɛ, mʋhɔ mihile dɩyɛ wɔ Sukuulu Mɔɔ Bɛyɛ Bɛma Asafʋ Nu Mbanimbani tʋ wɔ 2011. Wɔ alʋbɔ anwɩ̃ nu nɩ, mɩ nɩɩ Randi zɩnzanlɩ dɩka mɔɔ yɛda nu mbɔmɩ 75, naasʋ̃ ɩmanlɩ yenyianlɩ nyilalɛ sʋ̃maa. Nɩ dapɛnɩ bela ba awielɩyɛ a, asafʋ nu mbanimbani yi bɛ anyɩ de baaba, iluwakɛɛ nɩ bɛtɩ nɣanlɩ kɛɛ Ɔhʋanɩhilelɛ Okuwu yi dwɩnɩ bɛ nɩɩ Gyehova avinli abusunwawɔlɛ nwʋ.

Aɣinzi yi, mʋhɔ mihileli dɩyɛ wɔ Sukuulu Mɔɔ Bɛyɛ Bɛma Odwokɔbadɛlɛlɛmaa yɩ tʋ. Nɩ sukuulumaa yɩ bɛfa dɔnɩhwɩlɩ asunwa bosuma dɩyɛ, itwu nunuma a nɩ bɛfa dɔnɩhwɩlɩ asã bɛyɛ homework, na bɛyɛ egyimalilɛ kɛyɛ anla anzɛnyɩɩ anlu dapɛnɩ bela meti nɩ bɛfɛ baaba paa. Mɩ nɩɩ eliyema mɔɔ mɩ nɩɩ yɩ bɔ numɔ kile dɩyɛ nɩ hilehileli numɔ hileli bɛ kɛɛ sɛ Gyehova ɩábʋwa bɛ a, bɔlɔ́kʋla bɛkɛyɛ hwɩɩ. Kezimɔ sukuulumaa nɩ valɩ bɔ nwʋ dianlɩ Gyehova zʋ na bɔnwʋnlɩ kɛɛ ɩbʋwaa bɛ na ɩyɛlɩ bɛ nnwʋánlɩ nɩ, mɩ ɛɣɛɛlɛ iléfi kyɩ̃.

Kezimɔ mɩ maamɩ hileli yɩ Bayɩbʋlʋ zumanlɛmaa nwʋ anyɩnlɩlelɛ na inyianlɩ bɔ nwʋ alagyɩ nɩ, ɩwʋwalɩ bɛ ma benyianlɩ anyunumihɔlɛ na ɩwʋwalɩ mɩ papa sʋ̃ ma yɩ anyɩ ɣa leli nɔhʋanlɛ yɩ nwʋ. Mɩ maamɩ wuli aɣile asã mɛda nɩ, mɩ papa ɣa diyeli ndɛnɩ wɔ Kɩndɔm Hɔɔlʋ, eyi yɛlɩ yɛ asibɔnwʋ baaba. Na ɔzʋmɩ ɔzɔ mmɩlɩ yɩ, ɩdʋwalɩ zʋlɔ ɩhɔlɩ dɩyɛzumanlɛ nkʋ̃ʋ̃ alʋbɔ 26. Ɩwɔ numɔ kɛɛ mɩ papa iánuma dɩyɛ, naasʋ̃ asafʋ mbanimbani yi hã hileli mɩ kɛɛ, mɛyɩ yɛ nɩ idi bɔmʋnlɩ wɔ dɩyɛzumanlɛ tʋ dapɛnɩ bela a.

Mɩ maamɩ yɛlɩ ndianwʋba manlɩ mɩ nɩɩ mɩ mmenlima mmaalɛ yɩ. Mɩ mmenlima mmalɛ asã yɩ, bɛ nɩɩ bo hũmmɔ bɛlɛ nɔhʋanlɛlilɛ bɔsʋ̃mɩɩ Gyehova. Bo nu anwɩ̃ bɔsʋ̃mɩɩ wɔ Portugal nɩɩ Haiti Bɛtɩlɩ.

Kakɩ yɩ, mɩ nɩɩ Randi yɛsʋ̃mɩɩ kɛɛ ɔhʋanɩbukolɛmaa aditili wɔ Hamilton mɔɔ ɩwɔ Ontario nɩ. Mmɩlɩ mɔ nɩ yɛwɔ mansini egyima yɩ nu nɩ, sɛ yɛ nɩɩ mmeliyema mvʋlɔ kɔ yɛ bɛ siakehila nɩɩ Bayɩbʋlʋ dɩyɛzumanlɛ a, nɩ yɛ anyɩ de paa. Naasʋ̃ sikalɛyɩ sɛ yɛnwʋ kɛɛ amɩyɛzayɛ yɛ Bayɩbʋlʋ zumanlɛmaa benyiaa anyunumihɔlɛ wɔ sunzuma ɔfʋã nu a, yɛ anyɩ de baaba paa. Mmɩlɩ mɔ yɛvalɩ mmeliyema mɔɔ bɔwɔ yɛ asafʋ fʋlɔ yɩ nu ɔhɔnwʋ na yɛnwʋnlɩ kezimɔ Gyehova wʋwalɩ bɛ wɔ mmɩlɩba nɩɩ mmɩlɩ tanɩ nu nɩ, ɩhyɛlɩ yɛ ɛzɩzɩbɛ paa.

Sɛ yɛkakɛ kezimɔ mmenii mvʋlɔ hileli yɛ nwʋ anyɩnlɩlelɛ nɩ a, yɛ anyɩ sɔ paa. Ɩma sikalɛyɩ, amɩyɛ sʋ̃ yɛbɔ mmɔdɩnɩ kɛɛ yekehile mvʋlɔ nwʋ anyɩnlɩlelɛ, yɛkɛhyɛ bɛ ɛzɩzɩbɛ na ama bɛadwu bo sunzuma ɔfʋã nu bʋtayɩ nwʋ. (2 Kɔl. 7:6, 7) Kɛ ndianwʋ nɩ, wɔ abusunwa ɔkʋ̃ be nu nɩ, nɩ ɛyɩlɛ yɩ, bɛ ɣa benyia nɩɩ bɛ ɣa baalɛ munwala dɩ ɔhʋanɩbukolɛmaa. Miɣizialɩ ohunɛ yɩ kɛɛ ɩdwɩnɩ nwʋmɔ kyɩ̃ kɛɛ ɩkɛyɛ ɔhʋanɩbukolɛvʋlɔ a. Iwuwalɩ mɩ kɛɛ ikilaa ɔhʋanɩbukolɛmaa asã. Meti miɣizialɩ yɩ kɛɛ, “Ɔkɔhʋla ekehila bɛ bʋwɔ kɛdɛla Gyehova a?” Mɩhyɛlɩ yɩ ɛzɩzɩbɛ kɛɛ ɩyɛ́ mɔɔ bɛyɛɛ yɩ be na yɩ anyɩ kele kɛɛ bɛzabɛ la. Aziyianɩ ahyiã mɛda nɩ, ɩɣa ɩyɛlɩ ɔhʋanɩbukolɛvʋlɔ.

Mɩ nɩɩ Randi kɔhɔ zʋlɔ kɛhã Gyehova yɩ “nnwʋánlɩ egyima” nwʋ odwokɔ yekehile “awʋbɔ sandɩnlɩ mɔɔ bɛkɛɣa nɩ.” Na yɛwɔ anwʋlazʋ kɛɛ, bɛ anyɩ kele wɔ Gyehova ɔzʋ̃mɩnlɛ nu kɛmɔ amɩyɛ sʋ̃ yɛ anyɩ ile nɩ.—Ndw. 71:17, 18.