1. Mɩnla ɔhʋanɩ zʋ yɛ ɩsɛ kɛɛ Kilisinyiamaa bɛyɛ kɛɛ owudo a? (Kila mfonyini yi sʋ̃.)

 ASƲ̃ ɔnwʋ kezimɔ kuko owudo yɛ yɩ dɩyɛ mmɩlɩ mɔ ahũmi ituu nɩ a? Ɩkyɩyɩa naasʋ̃ iáwu. Eyi ma yɛnwʋ kɛɛ sɛ anwʋma kezile be bɔ na owudo be kɔhʋla kegyina yi munwa a, ɩsɛ kɛɛ ɩyɛ bɛtɛɛ sʋ̃. Ɔzɔ la yɛ amɩyɛ sʋ̃, sɛ yɛkɔhʋla yɛkɔhɔ zʋ yɛkɛva anyɩnlɩlelɛ yɛkɔzʋ̃mɩ Gyehova a, ihyinyia kɛɛ yɛyɛ bɛtɛɛ, kile kɛɛ, yesiyeziye yɛ nwʋ kɛɛ yɛkɛyɛ nzɩnzanlɩyɛ. Mɩnla ɔhʋanɩ zʋ a? Ɩsɛ kɛɛ yɛda ntɩyasɩ ali na yɛyɛ nzɩnzanlɩyɛ mmɩlɩ mɔ yɛ bʋwabɩlɛ ɩzɩnza nɩ. Na akʋ̃ sʋ̃, íni kɛɛ yɛtɩndɛ yetiyia mmenii mvʋlɔ bɛ adwɩnɩhilelɛ nɩɩ bɔ pɔkɔzilɛ.

2. Sɛ yɛ bʋwabɩlɛ sɩnza a, mɩnla subanɩ yɛ ɩkɔwʋwa yɛ ma yekegyina yi munwa a, na mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Kɛ Gyehova azʋ̃mɩvʋlɔ nɩ, yɛpɛ kɛɛ yɛda ntɩyasɩ ali. Akʋ̃ sʋ̃, yɛpɛ kɛɛ yɛkã yɛ nwʋ azɩ na yɛda kunlumiyɩbalɛ ali. Wɔ dɩyɛzumanlɛ eyi nu nɩ, yekehila kezimɔ subanɩ eyimmɔ wʋwalɩ Kilisinyiamaa be ma bɔhʋla begyinanlɩ wɔ mmɩlɩ mɔ bɔ bʋwabɩlɛ zɩnzanlɩ nɩ. Yekehila kezimɔ subanɩ eyimmɔ kɔwʋwa amɩyɛ sʋ̃. Naasʋ̃ bɛmá yeli bɔmʋnlɩ yezuma debe wɔ Gyehova nɩɩ Gyisɛsɩ mɔɔ bɛyɛ ntɩyasɩ mɔɔ yɛkɛla yɩ ali nwʋ ndianwʋba bɛma yɛ nɩ kɛ.

3. Kɛ ɩyɛ mɔɔ yɛnwʋ kɛɛ Gyehova da ntɩyasɩ ali a?

³ Bɔfʋlɔ Gyehova kɛɛ “Bʋlɔdanɩ nɩ” iluwakɛɛ igyĩ pindinyii na iáhimahima. (Dit. 32:4) Naasʋ̃ ɩda ntɩyasɩ ali baaba. Mmɩlɩ mɔ oyuwadɩ ɩsɩnzaa nɩ, Gyehova sʋ̃ sɩnza nninyeni nu na ama yi tile nu pɔkɔ ɩaɣa nu. Gyehova wɔlɩ yɛ wɔ yi subanɩ zʋ, meti ɩma amɩyɛ sʋ̃ sɛ bʋwabɩlɛ yɩ zɩnza a yɛkʋla yɛyɛ nzɩnzanlɩyɛ yɛ nwʋ. Yenyia Bayɩbʋlʋ nu egyinalɛzʋ-ndwokɔ sʋ̃maa mɔɔ ɩbʋwa ma yesizi abɔkɔba ɩávalɩ nwʋmɔ ndwokɔzɩzɩbɛ bela mɔɔ yekeyiyia  nɩ. Gyehova yɩzayɩ yi ndianwʋ nɩɩ egyinalɛzʋ-ndwokɔ mɔɔ ɩva ɩma yɛ nɩ di dasɩlɛ kɛɛ, ɩávalɩ nwʋmɔ kɛɛ ɩdɩ “Bʋlɔdanɩ nɩ,” ɩda ntɩyasɩ ali paa.

4. Ma ndianwʋ mɔɔ ikile kɛɛ Gyehova da ntɩyasɩ ali. (Lɛvitikɔsʋ 5:7, 11)

⁴ Gyehova yɩ ahʋanɩ di munli na ɩda ntɩyasɩ ali. Sɛ ɩ nɩɩ mmenii bedii a, ɩáyɛ kyɩngyɩ̃ɩ̃. Kɛ ndianwʋ nɩ, bɛmá yehila kezimɔ Gyehova lalɩ ntɩyasɩ ali mmɩlɩ mɔ ɩ nɩɩ Yizilayamaa yɩ bedii nɩ. Nɩ iáhila ɔhʋanɩ kɛɛ dɩyɛ mɔɔ ozukuanii kɛva kɔwɔ afɔlɩ nɩ, mɛyɩ la yɛ ehyinyianii sʋ̃ ɩvá ɩwɔ afɔlɩ a. Nɩ ɩyɛ a, ɩma ɔhʋanɩ ma abiyela kyina yɩ bʋwabɩlɛ zʋ ɩfa mɔɔ ɩwɔ nɩ ɩbɔ afɔlɩ.—Kɩnga Lɛvitikɔsʋ 5:7, 11.

5. Ma ndianwʋ mɔɔ ikile kɛɛ Gyehova kã yɩ nwʋ azɩ na ɩda kunlumiyɩbalɛ ali.

⁵ Gyehova yɩ kãnwʋazɩ nɩɩ yi kunlumiyɩbalɛ kã yɩ ma ɩda ntɩyasɩ ali. Gyehova hileli kɛɛ ɩkã yɩ nwʋ azɩ wɔ mmɩlɩ mɔ nɩ ɩbazɩkɛ tanɩyɛlɛmaa mɔɔ bɔwɔ Sodɔmɩ nɩ. Gyehova luwalɩ yɩ awɔvʋlɔ zʋ hanlɩ hileli ɛdɩnɣɛlɛnii Lɔɔtʋ kɛɛ, iɣiandí ɩhɔ avile nɩ mmɔ zʋ. Naasʋ̃ nɩ Lɔɔtʋ yi kunlu tu kɛɛ ɩkɔhɔ kɛ. Meti izianlɩ Gyehova kɛɛ ɩmá ɩ nɩɩ yɩ abusunwa yɩ beɣiandi bɔhɔ Zowa, twonwa ɛgyɩkɩ̃ɩ̃ be mɔɔ nɩ mɛyɩ sʋ̃ bɛbazɩkɛ yɩ nɩ nu. Ankɩ sa Gyehova kʋla hyɛ Lɔɔtʋ kyɩngyɩ̃ɩ̃ kɛɛ idiyé mɔɔ ɩkãã yɩ. Naasʋ̃, idiyeli Lɔɔtʋ na ɩmanlɩ ɔhʋanɩ ma bɔhɔlɩ Zowa mfomi. Eyi ti Gyehova ɩásɩkɛ Zowa. (Gyn. 19:18-22) Alʋbɔ sʋ̃maa be mɛda nɩ, Gyehova lalɩ kunlumiyɩbalɛ ali hileli Nɩnɩvɛmaa nɩ. Ɩzʋ̃manlɩ yɩ nkɔmɩhyɛnii Dwona kɛɛ, ɩhɔ́ ɩhã ihile Nɩnɩvɛmaa nɩ kɛɛ bɛbazɩkɛ bɛ nɩɩ bo twonwa yɩ. Naasʋ̃ mmɩlɩ mɔ bonlunli bɔ nwʋ nɩ, Gyehova ɩásɩkɛ bɛ nɩɩ bo twonwa yɩ.—Dwn. 3:1, 10; 4:10, 11.

6. Ma ndianwʋ mɔɔ ikile kɛɛ Gyisɛsɩ zumazumanlɩ kezimɔ Gyehova da ntɩyasɩ ali nɩ.

⁶ Gyisɛsɩ zumazumanlɩ kezimɔ Gyehova da ntɩyasɩ ali nɩ. Bɔzʋ̃manlɩ yɩ kɛɛ, ɩɣɩla ɩhã odwokɔba yɩ ihile ‘Yizilayamaa mɔɔ bɛdɩ kɛɛ mmuwuanɩ mɔɔ beminli nɩ.’ Naasʋ̃ mmɩlɩ mɔ ɩkãã odwokɔba yɩ nɩ, ɩlalɩ ntɩyasɩ ali. Mɩnla ɔhʋanɩ zʋ a? Eɣile ɔkʋ̃ be, baalɛ be mɔɔ ɩ́dɩ Yizilayanii zianlɩ yɩ kɛɛ, idú ‘sunzuma evinli be mɔɔ ɩwɔ yɩ ɣa baalɛ yi nu mɔɔ ididee yi nɩ ɩma yɩ.’ Gyisɛsɩ ɩzʋ̃ kunlumiyɩbalɛ nu ɩyɛlɩ mɔɔ baalɛ yɩ ɣizialɩ yɩ nɩ na ɩzalɩ yɩ ɣa yɩ adimakɛlɛ (Mt. 15:21-28) Ma yehila ndianwʋ fʋlɔ sʋ̃. Gyisɛsɩ wɔlɩ yɩ ɔzʋ̃mɩnlɛ egyima yɩ tʋ mmɩlɩ be mɛda nɩ, ɩhanlɩ kɛɛ: ‘Abiyela mɔɔ ɩkɔbʋ mɩ nɩ, mamɩ sʋ̃ mʋkɔbʋ yɩ.’ (Mt. 10:33) Naasʋ̃ mmɩlɩ mɔ Pita bʋlɩ yɩ mbɔmɩ asã nɩ, ɩbʋlɩ Pita a? Anhã, ɩápʋ yɩ. Nɩ Gyisɛsɩ zi kɛɛ Pita inlu yɩ nwʋ na ɩdɩ benyia nɔhʋanlɛvʋlɔ sʋ̃. Wɔ Gyisɛsɩ yɩ awudunwolɩyɛ mɛda nɩ, ɩyɩlɩ yɩ nwʋ ali ihileli Pita na ɩkɛyɛ kɛɛ ɩmanlɩ ɩnwʋnlɩ kɛɛ ɩva ɩhyɛ yɩ na ɩdɔ yɩ.—Lk. 24:33, 34.

7. Kɛmɔ Fɩlɩpɩmaa 4:5 kile nɩ, kɛ yɛpɛ kɛɛ mmenii bu yɛ se a?

⁷ Yɛɣa yɛnwʋ kɛɛ Gyehova Nyamɩnlɩ nɩɩ Gyisɛsɩ Kɩlayɩsɩ da ntɩyasɩ ali. Na amɩyɛ sʋ̃ ɛ? Gyehova kila ɔhʋanɩ kɛɛ yɛkɛla ntɩyasɩ ali. (Kɩnga Fɩlɩpɩmaa 4:5, NWT.) Bayɩbʋlʋ fʋlɔ kile Fɩlɩpɩmaa 4:5 yɩ tʋ kɛɛ: “Bɛmá mmenii  nwʋ bɛ kɛɛ bɔwɔ ntɩyasɩ.” Sa yɛkʋla yebizia yɛ nwʋ kɛɛ: ‘Asʋ̃ mmenii nwʋ mɩ kɛɛ mɩda ntɩyasɩ ali a? Anzɛnyɩɩ bɔnwʋ mɩ kɛɛ mɩyɛ kyɩngyɩ̃ɩ̃ na mu odwokɔ yɛ sɩ a? Sɛ mɩ nɩɩ mmenii yesunzuu odwokɔ nwʋ a, mɩhyɛ bɛ kyɩngyɩ̃ɩ̃ kɛɛ mɩ adwɩnɩhilelɛ mfomi yɛ bɛva bɛyɛ egyima a? Anzɛnyɩɩ ɩyɛ a mitiye bɛ na mide bɛ adwɩnɩhilelɛ mitiã nu a?’ Sɛ yɛda ntɩyasɩ ali a, nɩ yesumazumaa Gyehova nɩɩ Gyisɛsɩ. Bɛmá yehila bʋwabɩlɛ anwɩ̃ be mɔɔ nwʋmɔ kehyinyia kɛɛ yɛda ntɩyasɩ ali wɔ nu. Ɔkʋ̃, mmɩlɩ mɔ yɛ bʋwabɩlɛ ɩzɩnza. Anwɩ̃, mmɩlɩ mɔ mmenii mvʋlɔ bɛ adwɩnɩhilelɛ nɩɩ bɔ pɔkɔzilɛ ɩ nɩɩ yɛ dɩyɛ iáyiyia nɩ.

8. Sɛ yɛ bʋwabɩlɛ sɩnza a, mɩnla yɛ ɩkɔwʋwa yɛ ma yɛkɛla ntɩyasɩ ali a? (Kila azɩkɛnɩ odwokɔ yɩ sʋ̃.)

⁸ Ntɩyasɩ mɔɔ yɛkɛla yɩ ali nɩ kile kɛɛ yɛkɛzɩnza nninyeni nu mmɩlɩ mɔ yɛ bʋwabɩlɛ zɩnza nɩ. Eyi kʋla fa anwʋkyɩlɩ mɔɔ yɛáhila yɩ ɔhʋanɩ ɩba. Kɛ ndianwʋ nɩ, ebiye a adimakɛlɛ kezile be kɔhʋla kɔwɔ yɛ aɣilemvile nu. Anzɛnyɩɩ ebiye a manlɩ mɔɔ yɛda numɔ nɩ yi ozukuasɛmɩ kɛyɛ basaa anzɛnyɩɩ nzɩnzanlɩyɛ kɛɣa aɣanɩ yi nu mɔɔ ɩkɛma yɛ ɛbɩlawɔlɛ nu kɛyɛ sɩ. (Odw. 9:11; 1 Kɔl. 7:31) Sɛ bɛsɩnza ye egyimalilɛ mɔɔ iwula yɛ sa wɔ asafʋ yɩ nu sʋ̃ a, ɩkʋla ɩma nninyeni nu yɛ sɩ ma yɛ. Ɩávalɩ nwʋmɔ mɔɔ yekeyiyia bela nɩ, sɛ yɛyɛ nninyeni anla eyimmɔ a sa ɩbʋwa yɛ ma yɛyɛ nzɩnzanlɩyɛ na ama yɛahʋla yeagyina bʋwabɩlɛ nɩ yi munwa: (1) de tiã nu kɛɛ nninyeni zɩnza, (2) dwɩnɩ mɔɔ ɔkɔhʋla kɛyɛ nwʋ, (3) nyia nninyeni nwʋ adwɩnɩba, (4) na bʋwa mmenii mvʋlɔ. b Bɛmá yehila kezimɔ ye mmeliyema be benyiaa nninyeni eyi mɔɔ bɛyɛlɩ yɩ zʋ mfasʋ.

9. Kɛ ɩyɛlɩ mɔɔ agyiahʋnlɩmaa be mɔɔ bɛdɩ odwokɔbadɛlɛlɛmaa lili bʋwabɩlɛ be mɔɔ bɛáhila yɩ ɔhʋanɩ zʋ a?

⁹ De tiã nu kɛɛ nninyeni zɩnza. Emanuele nɩɩ Francesca hɔ zʋ̃mɩnlɩ wɔ manlɩ fʋlɔ zʋ kɛɛ odwokɔbadɛlɛlɛmaa. Mmɩlɩ mɔ bɛbawɔ yɩ tʋ bokozuma ɛkɛnɩ ndɛnɩ na bɛanwʋ mmeliyema yɩ bʋwɔ la pɛ, yɛ COVID-19 adimakɛlɛ yɩ ɣalɩ a. Meti, nɩ ihyinyia kɛɛ bɛfa bɔ nwʋ besiye. Akʋ̃ sʋ̃, Francesca yɩ maamɩ wuli aɣilemvile nu. Nɩ Francesca pɛ paa kɛɛ ɩkɔ ikila yi mmusunwamaa yɩ, naasʋ̃ iluwa adimakɛlɛ yɩ ti nɩ ɩlɔ́kʋla ikodu ɔhʋanɩ. Mɩnla yɛ ɩwʋwalɩ yɩ ma igyinanlɩ ndwokɔzɩzɩbɛ eyimmɔ munwa a? Mɔɔ ili bɔmʋnlɩ, bɔwɔlɩ mpayɩ bezianlɩ nɣɛlɛbɛ na ama bɛahʋla bɛagyina bʋwabɩlɛ yɩ munwa eɣile ɔkʋ̃ bela na adwɩnɩndwɩnɩ ɩáhyɛlɩ bɔ zʋ. Gyehova luwalɩ yɩ ahyɩhyɛdɩ yɩ zʋ idiyeli bɛ mpayɩ wɔ yɩ mmɩlɩ nu. Kɛ ndianwʋ nɩ, eliyema be yi odwokɔ mɔɔ ɩhanlɩ wɔ vidiyo be nu nɩ hyɛlɩ bɛ ɛzɩzɩbɛ. Ɩhanlɩ kɛɛ: “Sɛ yede nzɩnzanlɩyɛ mɔɔ ɩba nɩ yetiã numɔ ndɛndɛ zʋ a, ɩáhyɛ nɩ yɛ anyɩnlɩlelɛ izia ɩɣa na ama yɛayɛ mɔɔ yɛkɔhʋla wɔ yɛ bʋwabɩlɛ fʋlɔ yɩ nu.” c Mɔɔ ɩtɔ zʋlɔ anwɩ̃, bezili pɔkɔ kɛɛ bokozuma kezimɔ bɛfa foonu bedi dasɩlɛ bʋwɔ, na bɔhʋla bɔwɔlɩ Bayɩbʋlʋ dɩyɛzumanlɛ tʋ po. Mɔɔ ɩtɔ zʋlɔ asã, bɛmanlɩ mmeliyema yɩ wʋwalɩ bɛ na behileli kɛɛ bɛ anyɩ sɔ ɔlɔlɛ mɔɔ bɛla yɩ ali behile bɛ nɩ. Eliyema baalɛ ɔkʋ̃ be mɛyɩ nɩ ɩfa Bayɩbʋlʋ nu ndwokɔ ɩsɛndɩ bɛ eɣile bela, na ɩyɛlɩ zɔ nkʋ̃ʋ̃ ɔlʋbɔ ɔkʋ̃. Meti sɛ amɩyɛ sʋ̃ yede yɛ bʋwabɩlɛ mɔɔ ɩzɩnza nɩ yetiã nu a, yekenyia anyɩnlɩlelɛ wɔ mɔɔ yɛkʋla yɛyɛ bela nu.

10. Mɩnla yɛ eliyema baalɛ be yɛlɩ na ama ɩahʋla iagyina nzɩnzanlɩyɛ mɔɔ ɩɣalɩ yɩ ɛbɩlawɔlɛ nu nɩ yi munwa a?

¹⁰ Dwɩnɩ mɔɔ ɔkɔhʋla kɛyɛ nwʋ, na nyia nninyeni nwʋ adwɩnɩba. Eliyema baalɛ Christina dɩ Romanianii mɔɔ ɩda Japan. Mmɩlɩ mɔ boguli Bʋlɔfʋlɔ asafʋ mɔɔ ɩwɔ numɔ nɩ, nɩ ɩyɛ ɛyɛkɛ  yɩ paa. Naasʋ̃ ɩáfa yɩ adwɩnɩ isiye mɔɔ izili nɩ zʋ, mfomi izili pɔkɔ kɛɛ ɩkɔhɔ asafʋ mɔɔ bɛkã Japan ndɛnɩ nu, na ɩayɛ mɔɔ ɩkɔhʋla bele ɩava Japan ndɛnɩ ɩahã odwokɔba yɩ. Izianlɩ baalɛ be mɔɔ nɩ ɩ nɩɩ yɩ yɛ egyima kɛɛ, ɩwʋwá yɩ ma izuma Japan ndɛnɩ yɩ bʋwɔ. Baalɛ nɩ leli dianlɩ numɔ kɛɛ ɩkɛva Bayɩbʋlʋ yɩ nɩɩ Sa Ɔkʋla Enyia Anyɩnlɩlelɛ Daabaa! blohyʋɔ yɩ ikehile yi Japan ndɛnɩ yɩ. Meti Christina hʋlalɩ hanlɩ Japan ndɛnɩ yɩ bʋwɔ na mɔɔ ihyinyia paa nɩ, baalɛ nɩ yɩ anyɩ ɩɣa ilelili nwʋmɔ kɛɛ ikozuma Bayɩbʋlʋ yɩ. Sɛ yɛáfa yɛ adwɩnɩ yesiye mɔɔ izi nɩ zʋ na yenyia nninyeni nwʋ adwɩnɩba a, yɛkɔhʋla yekenyia nyilalɛ mɔɔ yɛáhila yɩ ɔhʋanɩ wɔ nzɩnzanlɩyɛ mɔɔ ɩɣa nɩ nu.

11. Mɩnla yɛ ɩwʋwalɩ agyiahʋnlɩmaa be mɔɔ beyiyialɩ ozukuasɛmɩ nu anwʋkyɩlɩ a?

¹¹ Bʋwa mmenii mvʋlɔ. Agyiahʋnlɩmaa be mɔɔ bɛda manlɩ be mɔɔ bɛva salɛ bediã ye egyima yɩ zʋ wɔ ɛkɛnɩ nɩ, bɔ nwʋ hyɩlɩlɩ bɛ wɔ ozukua ɔfʋã nu mmɩlɩ mɔ manlɩ yɩ yi ozukuasɛmɩ yɛlɩ basaa nɩ. Mɩnla yɛ ɩwʋwalɩ bɛ a? Mɔɔ ili bɔmʋnlɩ, bɔwɔlɩ mmɔdɩnɩ kɛɛ bɛkɛdɩdɩ nninyeni zʋ wɔ bɛ ɛbɩlawɔlɛ nu. Bezili pɔkɔ kɛɛ bɛkɛva bɛ mmɩlɩ sʋ̃maa bɛkɛyɛ dasɩlɛlilɛ egyima yɩ na bɛava bɛawʋwa mmenii. (Egy. 20:35) Ohunɛ yɩ hanlɩ kɛɛ: “Iluwakɛɛ yɛvalɩ mmɩlɩ sʋ̃maa yɛyɛlɩ dasɩlɛlilɛ egyima yi ti, ɩáma yɛfa yɛ adwɩnɩ yesiye yɛ ɔhawʋ yɩ zʋ sʋ̃maa, mfomi yɛvalɩ mmɩlɩ sʋ̃maa yɛyɛlɩ mɔɔ Nyamɩnlɩ pɛ kɛɛ yɛyɛ.” Sɛ yɛ bʋwabɩlɛ sɩnza a, ɩsɛ kɛɛ yɛkakɛ kɛɛ nwʋmɔ hyinyia paa kɛɛ yɛkɔwʋwa mmenii mvʋlɔ, titili wɔ dasɩlɛlilɛ nu.

12. Mɩnla ɔhʋanɩ zʋ yɛ sʋ̃mavʋlɔ Pɔɔlʋ yɩ ndianwʋ yɩ kɔhʋla kɔwʋwa yɛ ma yɛkɛyɛ nzɩnzanlɩyɛ wɔ yɛ dasɩlɛlilɛ egyima yi nu a?

¹² Wɔ yɛ dasɩlɛlilɛ egyima yɩ nu po, ɩsɛ kɛɛ yɛyɛ nzɩnzanlɩyɛ. Yeyiyia mmenii mɔɔ ɔsʋnɩ be dedi, bɛ amamɩlɛ, nɩɩ dɩka mɔɔ bɔzʋ̃. Nɩ sʋ̃mavʋlɔ Pɔɔlʋ sɩnza kezimɔ ɩkã odwokɔba yɩ nu, na sa yɛkʋla yesuma debe wɔ yɩ ndianwʋ yɩ nu. Gyisɛsɩ yɩlɩ Pɔɔlʋ kɛɛ ‘sʋ̃mavʋlɔ ma mmenii mɔɔ bɛ́dɩ Dwuumaa.’ (Wul. 11:13) Meti Pɔɔlʋ hanlɩ odwokɔba yɩ hileli Dwuumaa, Gilikimaa, mmenii mɔɔ bezi ɔnwʋma, nzuwalɩyɛmaa, aɣanɩ mbanimbani nɩɩ awulombunli. Mɔɔ ɩkɛyɛ na iadwu mmenii eyimmɔ bɛ ahʋnlɩnɩ nu nɩ, Pɔɔlʋ ‘ɩ nɩɩ mmenii munwatĩĩ yɛlɩ ɔkʋ̃.’ (1 Kɔl. 9:19-23) Izunzunli bɛ amamɩlɛ, dɩka mɔɔ bɔzʋ̃, nɩɩ be dedi nwʋ na eyi wʋwalɩ yɩ ma ɩzɩnzanlɩ yi ndwokɔ nu wɔ ɔhʋanɩ be zʋ mɔɔ ɩkɛma mmenii eyimmɔ munwala bekediye odwokɔba yɩ. Sɛ amɩyɛ sʋ̃, yɛsɩnza kezimɔ yɛkã odwokɔba nɩ nu na yɛdwɩnɩ kezimɔ yɛkɔwʋwa mmenii mɔɔ yiyia bɛ nɩ nwʋ a, ɩkɛma yɛ dasɩlɛlilɛ kodu mpʋnɩ.

13. Kɛmɔ bɛhã nwʋmɔ odwokɔ wɔ 1 Kɔlɛntɩmaa 8:9 nɩ, sɛ yɛátɩndɛ yetiyia mmenii mvʋlɔ bɔ pɔkɔzilɛ a, mɩnla yɛ yɛlɛ́ma ikezi a?

¹³ Sɛ yɛda ntɩyasɩ ali a, ɩbʋwa yɛ sʋ̃ ma yede mmenii mvʋlɔ bɔ pɔkɔzilɛ yetiã nu. Kɛ ndianwʋ nɩ, ye mmeliyema mmaalɛ yɩ be wɔ kɛnɩ a, bɛ anyɩ deli nwʋmɔ kɛɛ bokohwi bɛ anyunu nɩɩ bo munwa nwʋ, abiyemmɔ sʋ̃ bɛábɛ yɩ zɔ. Ye mmeliyema yɩ be sʋ̃ bɛ anyɩ deli nwʋmɔ kɛɛ bɔkɔnlʋ nzã ɛgyɩkɩ̃ɩ̃, naasʋ̃ bo nu be zi pɔkɔ kɛɛ bɔlɔ́nʋ nzã kʋlaa. Kilisinyiamaa munwala pɛ kɛɛ benyia pɔkɔdɩlɛ baaba, naasʋ̃ ɔsʋnɩ adimakɛlɛzalɛ mɔɔ ye nu bela ɩpɛ. Sɛ yenyia adwɩnɩ kɛɛ, kezimɔ yɛyɛ yɛ dɩyɛ nɩ yɛ ɩdɩ baaba paa meti abiyela ɩyɛ ebiye a, sa yɛkʋla yɛtʋndʋnlɩ abiyemmɔ bɛ agyia nu na yɛava nkyɩkyɛmi yɛaɣa asafʋ yi nu. Yɛábɛ kɛɛ yɛyɛ zɔ! (Kɩnga 1 Kɔlɛntɩmaa 8:9; 10:23, 24) Bɛmá yehila ndianwʋ anwɩ̃ be mɔɔ ɩkɛma yɛkɔnwʋ kezimɔ sɛ yɛfa Bayɩbʋlʋ nu egyinalɛzʋ-ndwokɔ yɛyɛ egyima a, ɩbʋwa yɛ ma yɛda ntɩyasɩ ali na ɩma azʋ̃nudwolɩyɛ ba.

14. Mɩnla Bayɩbʋlʋ nu egyinalɛzʋ-odwokɔ yɛ ɩkɔwʋwa yɛ wɔ yɛ anwʋziyeziyelɛ nu a?

 ¹⁴ Ntalɩwulalɛ nɩɩ anwʋziyeziyelɛ. Gyehova ɩáva anwʋziyeziyelɛ nwʋ mmɛla pɔkyɩɩ ɩma yɛ, mfomi ɩva egyinalɛzʋ-ndwokɔ mɔɔ ɩkɔwʋwa yɛ ɩma yɛ. Ɩsɛ kɛɛ yesiyeziye yɛ nwʋ wɔ ɔhʋanɩ be zʋ mɔɔ ɩfata Nyamɩnlɩ yɩ azʋ̃mɩvʋlɔ, na yɛahile kɛɛ yɛda ntɩyasɩ ali, yɛkã yɛ nwʋ azɩ, na ‘yezi nɣɛlɛbɛ wɔ yɛ ndamɛviyialɛ nu.’ (1 Tim. 2:9, 10; 1 Pit. 3:3) Meti yɛábɛ kɛɛ yesiyeziye yɛ nwʋ wɔ ɔhʋanɩ be zʋ mɔɔ ɩkɔhwɩnhwɩ̃ mmenii bɛ adwɩnɩ ɩkɛɣa yɛ zʋ sʋ̃maa. Bayɩbʋlʋ nu egyinalɛzʋ-ndwokɔ sʋ̃ kɔwʋwa asafʋ nu mbanimbani na ama bɛáhyɩhyɛlɩ ntalɩwulalɛ nɩɩ eɣinliyɛlɛ nwʋ mmɛla bela. Kɛ ndianwʋ nɩ, nɩ asafʋ nu mbanimbani pɛ kɛɛ bɔbʋwa mmeliyema mmɩlantɩyɛ be mɔɔ bodua eɣinli fʋlɔ be mɔɔ ɩɣa zʋlɔ nɩ. Nɩ botua eɣinli yi ma ɩkɔ azɩ naasʋ̃ beyiaki yɩ sʋlɔ yɩ ma ɩyɛ bɛsabɛsa. Nɩ kɛ ɩkɛyɛ na mbanimbani yi bɛawʋwa bɛ wɔ mmɩlɩ mɔ bɛlɛ́hyɩhyɛ mmɛla bela bɛkɛma bɛ a? Bɛ mansini zʋ ehilalɛvʋlɔ yɩ duli asafʋ nu mbanimbani yi fʋlɔ kɛɛ bɛhã behile mmɩlantɩyɛ yɩ kɛɛ: “Sɛ begyĩ bamma yɩ zʋ na mmeliyema yɩ bɛ adwɩnɩ wɔ kezimɔ beziyeziye bɔ nwʋ yɩ zʋ tɛla odwokɔ mɔɔ bɛkãã yɩ a, mɛyɩ nɩ ikile kɛɛ odwokɔ wɔ bɛ anwʋziyeziyelɛ yɩ nwʋ.” Eyi wʋwalɩ mmɩlantɩyɛ yɩ ma bɔnwʋnlɩ mɔɔ ɩsɛ kɛɛ bɛyɛ mɔɔ nɩ iáhyinyia kɛɛ bɛhyɩhyɛ mmɛla bɛma bɛ. d

15. Mɩnla Bayɩbʋlʋ nu mmɛla nɩɩ egyinalɛzʋ-odwokɔ yɛ ɩkɔwʋwa yɛ mmɩlɩ mɔ yesii adimakɛlɛzalɛ be nwʋ pɔkɔ nɩ a? (Wulomimaa 14:5)

¹⁵ Adimakɛlɛzalɛ. Ɩsɛ kɛɛ Kilisinyianii bela si yɩ adimakɛlɛzalɛ nwʋ pɔkɔ. (Gal. 6:5) Bayɩbʋlʋ nu mmɛla ɛgyɩkɩ̃ɩ̃ be yɛ ɩkã Kilisinyianii be yɩ adimakɛlɛzalɛ nwʋ pɔkɔzilɛ a, dɩkɛɛ yɛ nwʋ mɔɔ yɛkɔhwɩ̃ wɔ mmegyia nɩɩ azunzuma ndwokɔ nwʋ. (Egy. 15:20; Gal. 5:19, 20) Ɛyɩ mɛyɩ esiye ahanlɩ a, mɔɔ ɩha yɩ dɩ  ye nu bela yɩ pɔkɔzilɛ. Abiyemmɔ pɛ asʋpiti adimakɛlɛzalɛ nkʋ̃ la, yɛɛ abiyemmɔ sʋ̃ duwa ɔhʋanɩ mvʋlɔ zʋ sa bɔ nwʋ adimakɛlɛ. Ɩávalɩ nwʋmɔ kɛɛ yɛ anyɩ deli adimakɛlɛzalɛ pɔkyɩɩ be nwʋ paa nɩ, íni kɛɛ yɛtɩndɛ yetiyia ye mmeliyema bɔ pɔkɔzilɛ falɩ adimakɛlɛzalɛ nwʋ. Eyi ti ɩsɛ kɛɛ yɛma nninyeni anla eyimmɔ bʋwa yɛ adwɩnɩ nu: (1) Nyamɩnlɩ Bulombunlililɛ yɩ nkʋ̃ la yɛ ɩkɛma yekenyia pɔkɔdɩlɛ mɔɔ idi munli a. (Ayɩ. 33:24) (2) Ɩsɛ kɛɛ Kilisinyianii bela nwʋ mɔɔ ɩdɩ baaba ɩma yɩ mmɩlɩ mɔ isii yɩ adimakɛlɛzalɛ nwʋ pɔkɔ nɩ. (Kɩnga Wulomimaa 14:5.) (3) Íni kɛɛ yebuwa ye mmeliyema ndɛnɩ anzɛnyɩɩ yɛyɛ debe mɔɔ ɩkɔdʋndʋnlɩ bɛ agyia nu. (Wul. 14:13) (4) Kilisinyiamaa da ɔlɔlɛ ali na bɛtɩ yɩ tʋ kɛɛ ɔkʋ̃yɛlɛ mɔɔ ɩwɔ asafʋ yɩ nu nɩ nwʋmɔ hyinyia kʋlaa tɛla nninyeni mɔɔ bɛzabɛ bɛpɛ. (Wul. 14:15, 19, 20) Sɛ yɛma ndwokɔ eyimmɔ bʋwa yɛ adwɩnɩ nu a, yɛ nɩɩ ye mmeliyema avinli kɛyɛ baaba na ɩkɔwʋwa ma azʋ̃nudwolɩyɛ kɔwʋwa asafʋ yɩ nu.

16. Sɛ asafʋ nu ebani be nɩɩ mbanimbani mvʋlɔ bosunzuu odwokɔ nwʋ a, kɛ ɩkɛyɛ na ɩala ntɩyasɩ ali a? (Kila mfonyini yi sʋ̃.)

¹⁶ Ɩsɛ kɛɛ asafʋ nu mbanimbani yɛ ndianwʋba wɔ ntɩyasɩ mɔɔ yɛkɛla yɩ ali nɩ nu. (1 Tim. 3:2, 3) Kɛ ndianwʋ nɩ, íni kɛɛ asafʋ nu ebani be nyia adwɩnɩ kɛɛ eɣile bela bɛkɛva mɛyɩ yɩ adwɩnɩhilelɛ bɛkɛyɛ egyima iluwakɛɛ yɩ anyɩ dɩ dɛla mbanimbani mɔɔ bɛha nɩ ti. Mfomi ɩsɛ kɛɛ ɩnwʋ yɩ kɛɛ, Gyehova yi sunzuma kɔhʋla kɛhã ebani bela ma ɩkɛhã debe mɔɔ ɩkɔwʋwa ma bekezi pɔkɔba. Na sɛ mbanimbani yi nu sʋ̃maa si pɔkɔ be na iádiyia Bayɩbʋlʋ egyinalɛzʋ-odwokɔ bela a, ɩda ntɩyasɩ ali na ide itiã numɔ ɩávalɩ nwʋmɔ kɛɛ ɩ nɩɩ bɛ adwɩnɩ iáyiyia nɩ.

17. Sɛ yɛda ntɩyasɩ ali a, mɩnla mfasʋ yɛ yenyia a?

¹⁷ Sɛ yɛda ntɩyasɩ ali a, yenyia mfasʋ sʋ̃maa. Ɩma yɛ nɩɩ ye mmeliyema avinli yɛ baaba na ɩma azʋ̃nudwolɩyɛ bʋwa asafʋ yɩ nu. Akʋ̃ sʋ̃, ɩávalɩ nwʋmɔ kezimɔ ye nu bela ɩdɩ nɩɩ yɛ amamɩlɛ nɩ, ɩma yɛfa anyɩnlɩlelɛ yɛsʋ̃mɩ Gyehova kɛɛ abusunwa mɔɔ ɔkʋ̃yɛlɛ wɔ nu. Mɔɔ ihyinyia paa nɩ, ɩyɛ yɛ fɛ kɛɛ yenyia ɔnwʋmɔ ɔhʋanɩ yesumazumaa yɛ Nyamɩnlɩ Gyehova, mɔɔ ɩda ntɩyasɩ ali nɩ.