1. Kɛmɔ 1 Pita 5:2 kã nɩ, mɩnla egyima yɛ iwula asafʋ nu mbanimbani bɛ sa a?

 GYEHOVA va wula asafʋ nu mbanimbani bɛ sa kɛɛ behilá yi mmuwuanɩ mɔɔ bɔtʋ bʋlɔ bɛma yɩ nɩ. Mmenyia nɔhʋanlɛmaa eyimmɔ bɛ anyɩ sɔ ɔnwʋmɔ ɔhʋanɩ mɔɔ bɛfa bɔsʋ̃mɩ be mmeliyema nɩ na bɛyɛ egyima ɛzɩzɩbɛ kɛɛ “mmuwuanɩzʋhilalɛmaa mɔɔ bekila bɔ zʋ bʋwɔ.” (Gyɛ. 23:4; kɩnga 1 Pita 5:2.) Yɛ anyɩ sɔ kɛɛ yɛwɔ mmenyia eyimmɔ wɔ yɛ asafʋ azʋlɔtʋ yɩ nu!

2. Mɩnla ndwokɔzɩzɩbɛ yɛ asafʋ nu mbanimbani kɔhʋla keyiyia a?

² Sɛ asafʋ nu mbanimbani bedii bɛ asɛdɩ nwʋ egyima a, beyiyia ndwokɔzɩzɩbɛ sʋ̃maa. Nɔhʋanlɛ odwokɔ yɛ lɛ kɛɛ, ɩsɛ kɛɛ asafʋ nu mbanimbani yɛ egyima ɛzɩzɩbɛ na bɛava bɛahila asafʋ yɩ. Tony dɩ asafʋ nu ebani wɔ United States, ɩɣa ɩnwʋnlɩ kɛɛ sɛ ɩba yɩ nɩ asɛdɩ azʋlɔtʋ a, ɩsɛ kɛɛ ɩnwʋ mɔɔ yɩ anwʋzɩzɩbɛ kɔhʋla kɛyɛ. Ikile numɔ kɛɛ: “Wɔ COVID-19 adimakɛlɛ yɩ tʋwɔlɛ nɩ, mʋwɔlɩ mmɔdɩnɩ kɛɛ mɩkɛyɛ egyima sʋ̃maa mɩkɛva mɩkɛyɛ dɩyɛzumanlɛ nɩɩ dasɩlɛlilɛ nwʋ nhyɩhyɛlɩyɛ. Naasʋ̃ ɩávalɩ nwʋmɔ mmɔdɩnɩ bela mɔɔ mʋwɔlɩ nɩ, nɩ egyima sʋ̃maa lanwʋ la wɔ kɛ. Mɩ anyɩ ɣalɩ mʋ nwʋ zʋ nɩ, nɩ mɩ Bayɩbʋlʋ ɛɣɩngalɛ, mɩzamɩ mɩ dɩyɛzumanlɛ nɩɩ mpayɩwɔlɛ ɩyɛɛ ɩkɔdɔ nzulo nu.” Ilir dɩ asafʋ nu ebani wɔ Kosovo, mɛyɩ sʋ̃ iyiyialɩ ndwokɔzɩzɩbɛ fʋlɔ be. Nɩ ɩda dɩka mɔɔ kʋnɛ ɩkɔlɩ zʋ, meti nɩ ɩyɛ sɩ ɩma yɩ kɛɛ ɩkɛva asafʋ yɩ ɔhʋanɩhilelɛ ɩkɛyɛ egyima. Ɩhanlɩ kɛɛ: “Mmɩlɩ mɔ Bɛtɩlɩ va wulalɩ mɩ sa kɛɛ mʋwʋwa mmeliyema mɔɔ bɛda nnɩka mɔɔ ɛkɛnɩ yɛ ɛyɛlɛ nɩ, idweli mɩ akɛnɣazɩzɩbɛ ihilalɩ paa. Nɩ mu kunlu du na mʋnwʋnlɩ kɛɛ ntɩyasɩ íni ɔhʋanɩhilelɛ mɔɔ bɛva bɛmanlɩ mɩ nɩ nu.” Tim dɩ odwokɔbadɛlɛlɛvʋlɔ wɔ Asia, nɩ ɩyɛ sɩ ɩma yɩ kɛɛ ɩkɔhɔlɩ zʋlɔ ɩkɛyɛ nninyeni mɔɔ nɩ eɣile bela ɩsɛ kɛɛ ɩyɛ nɩ. Ɩhanlɩ kɛɛ: “Ɩyɛ a, nɩ mɩtɩ nɣanlɩ kɛɛ egyima yɩ ma mɩvɛ paa.” Mɩnla yɛ ɩkɔwʋwa asafʋ nu mbanimbani mɔɔ beyiyiaa ndwokɔzɩzɩbɛ eyimmɔ be a?

3. Sɛ yesunzu Gidiyɔnʋ yɩ ndianwʋ yɩ nwʋ a, kɛ ɩkɔwʋwa yɛ ikeze a?

 ³ Asafʋ nu mbanimbani kɔhʋla kozumazuma Ndɛnɩwuwalɛvʋlɔ Gidiyɔnʋ yɩ ndianwʋ yɩ. (Hib. 6:12; 11:32) Ihilalɩ Nyamɩnlɩ yi mmenii zʋ na ɩwɔlɩ bɔ nwʋ banɩ. (Ndɛ. 2:16; 1 Mm. 17:6) Dɩkɛɛ Gidiyɔnʋ nɩ, bɛyɩ asafʋ nu mbanimbani kɛɛ behilá Nyamɩnlɩ yɩ mmenii zʋ wɔ mmɩlɩ mɔ numɔ yɛ sɩ eyi nu. (Egy. 20:28; 2 Tim. 3:1) Nɩ Gidiyɔnʋ zi mɔɔ yɩ anwʋzɩzɩbɛ kɔhʋla kɛyɛ, nɩ ɩkã yɩ nwʋ azɩ na ɩyɛ sutiye. Yɛkɔhʋla yekozuma debe wɔ yɩ ndianwʋ yɩ nu. Bodweli yɩ pindinyiigyinanlɛ behilalɩ wɔ mmɩlɩ mɔ idii yɩ asɛdɩ nwʋ egyima nɩ. Kɛ yɛdɩ asafʋ nu mbanimbani anzɛnyɩɩ yɛ́dɩ zɔ nɩ, sa yɛkʋla yɛma anyɩnlɩzɔlɛ mɔɔ yɛwɔ yɛma mbanimbani nɩ yɛ kezi. Sa yɛkʋla yɛbʋwa mmenyia eyimmɔ mɔɔ bɛyɛ egyima ɛzɩzɩbɛ bɛfa bekila yɛ zʋ nɩ.—Hib. 13:17.

4. Mɩnla ɔhʋanɩ zʋ yɛ Gidiyɔnʋ lalɩ yɩ ali kɛɛ ɩkã yɩ nwʋ azɩ a?

⁴ Nɩ Gidiyɔnʋ kã yɩ nwʋ azɩ na izi mɔɔ yɩ anwʋzɩzɩbɛ kɔhʋla kɛyɛ. b Mmɩlɩ mɔ Gyehova luwalɩ yɩ bɔvʋlɔ zʋ hanlɩ hileli Gidiyɔnʋ kɛɛ bɛyɩ yɩ kɛɛ ɩhɔ ile Yizilayamaa wɔ Midiyianɩmaa bɛ sa nu nɩ, ɩzʋ̃ kãnwʋazɩ nu ɩhanlɩ kɛɛ: “Mɩ abusunwa yɛ ɩdɩ ɛgyɩkɩ̃ɩ̃ kʋlaa wɔ Manasɛ abusunwa yɩ nu a, na mɩ papa yɩ awudo sʋ̃ mamɩ yɛ mɩázɛlɩ hwɩɩ a.” (Ndɛ. 6:15). Ɩdɩlɩ nɣanlɩ kɛɛ ɩávata naasʋ̃ nɩ Gyehova zi kɛɛ sa ɩkʋla ɩyɛ. Gyehova yɩ mmʋwalɩyɛ zʋ nɩ, Gidiyɔnʋ iwieli yi egyimalilɛ yɩ pɛpɛɛpɛ.

5. Mɩnla mmɩlɩ yɛ ɩkɔhʋla ɩkɛyɛ sɩ ɩkɛma asafʋ nu ebani be kɛɛ ɩkɛhã yɩ nwʋ azɩ a?

⁵ Asafʋ nu mbanimbani bɔ mmɔdɩnɩ kɛɛ bɛkɛhã bɔ nwʋ azɩ wɔ dɩyɛ bela nu. (Mik. 6:8; Egy. 20:18, 19) Bɛáva mɔɔ bɔkʋla bɛyɛ nɩ botu bɔ nwʋ na sɛ bedi mfʋmɩ a, bɛáwu bɔ nwʋ kɛɛ bɛázɛlɩ hwɩɩ. Naasʋ̃ ɩyɛ a, sa ɩkʋla ɩyɛ sɩ kɛɛ asafʋ nu ebani be kɛhã yɩ nwʋ azɩ. Kɛ ndianwʋ nɩ, ebiye a, ikele egyima sʋ̃maa ikogua yɩ zʋ mɔɔ ɩlɔ́kʋla ikeli yi munwatĩĩ nwʋ egyima. Akʋ̃ sʋ̃, sɛ bɛtɩndɛ betiyia yɩ anzɛnyɩɩ bɛkamvʋ yɩ wɔ yi egyimalilɛ be nwʋ a, sa ɩkʋla itwe yɩ kãnwʋazɩ ikila. Mɩnla yɛ asafʋ nu mbanimbani kɔhʋla kozuma wɔ Gidiyɔnʋ kɛ wɔ bʋwabɩlɛ mɔɔ ɩdɩdɩ zɔ nu a?

6. Mɩnla yɛ asafʋ nu mbanimbani kɔhʋla kozuma kɛvalɩ kãnwʋazɩ nwʋ wɔ Gidiyɔnʋ kɛ a? (Kila mfonyini yi sʋ̃.)

⁶ Má mvʋlɔ bɔwʋwa wʋ. Abiye mɔɔ ɩkã yɩ nwʋ azɩ nɩ, izi mɔɔ yɩ anwʋzɩzɩbɛ kɔhʋla kɛyɛ. Gidiyɔnʋ manlɩ mmenii mvʋlɔ wʋwalɩ yɩ va hileli kɛɛ ɩkã yɩ nwʋ azɩ. (Ndɛ. 6:27, 35; 7:24) Ɔzɔ la yɛ asafʋ nu mbanimbani mɔɔ bɛyɛ bɛ dɩyɛ  wɔ nɣɛlɛbɛ nu nɩ yɛ a. Tony mɔɔ yɛhã yɩ nwʋ odwokɔ daada nɩ hileli numɔ kɛɛ: “Iluwa kezimɔ bɛdɩdɩlɩ mɩ nɩ ti, ɩma mide egyima sʋ̃maa mɔɔ mʋlɔ́kʋla mɩkɛyɛ po mʋbɔ mʋ zʋ. Meti mizili pɔkɔ kɛɛ yekozunzu kãnwʋazɩ nwʋ wɔ yɛ abusunwazʋ̃mɩnlɛ tʋ na miadiye mɩ yɩ sʋ̃ yɩ adwɩnɩhilelɛ. Akʋ̃ sʋ̃ mihilalɩ jw.org zʋ vidiyo mɔɔ ise Bɛdɩdɩ́ Mvʋlɔ, Benyiá Bo Nu Anwʋlazʋ Na Bɛvá Asɛdɩ Bowula Bɛsa Kɛmɔ Gyisɛsɩ Yɛlɩ Nɩ.” Tony wɔlɩ yɩ tʋ kɛɛ ɩmaa mmenii mvʋlɔ kɛyɛ yi egyima yɩ be kɔwʋwa yɩ. Mɩnla yɛ ɩzʋ̃ numɔ ɩɣalɩ a? Tony hanlɩ kɛɛ: “Asafʋ yɩ nu egyima ɩkɔlɩɩ zʋlɔ, na minyia mmɩlɩ sʋ̃maa mɩfa mɩhyɛ mɩ nɩɩ Gyehova avinli abusunwawɔlɛ yɩ nu ɛzɩzɩbɛ.”

7. Sɛ bɛtɩndɛ betiyia asafʋ nu ebani be a, kɛ ɩkɛyɛ na yɛazumazuma Gidiyɔnʋ a? (Gyemisi 3:13)

⁷ Bɛtɩndɛ betiyia wʋ a, áma ɛfa ɛya. Dɩyɛ fʋlɔ mɔɔ ɩkɔhʋla ikodwe mbanimbani ikehila yɛ lɛ mmɩlɩ mɔ abiye ɩdɩndɛ idiyia bɛ nɩ. Eyi nu sʋ̃, Gidiyɔnʋ yɩ ndianwʋ yɩ kɔhʋla kɔwʋwa. Nɩ Gidiyɔnʋ zi kɛɛ iáli munli meti mmɩlɩ mɔ Efilemimaa nɩ dɩndɛlɩ diyialɩ yɩ nɩ, ɩzʋ̃ abʋtalɩ nu ɩ nɩɩ bɛ dɩndɛlɩ. (Ndɛ. 8:1-3) Ɩ nɩɩ bɛ ɩátɩndɛ wɔ ɛya zʋ, mfomi ihileli kɛɛ ɩkã yɩ nwʋ azɩ. Ɩyɛlɩ azʋnlɩ idiyeli mɔɔ nɩ mmenii nɩ pɛ kɛɛ bɛkã na kezimɔ ɩzʋ̃ abʋtalɩ nu ɩ nɩɩ bɛ dɩndɛlɩ nɩ, ɩmanlɩ akasakasa mɔɔ ankɩ ɩbaa nɩ dɩlɩ hɔlɩ. Asafʋ nu mbanimbani mɔɔ bɛyɛ bɛ dɩyɛ wɔ nɣɛlɛbɛ nu nɩ sumazuma Gidiyɔnʋ na sɛ bɛlɛ fʋlɔdulɛ mɔɔ ɩáyɛ fɛ bɛmaa bɛ po a, bɛyɛ azʋnlɩ betiye na bɔzʋ̃ abʋtalɩ nu bɛtɩndɛ. (Kɩnga Gyemisi 3:13.) Meti bɔbʋwa ma azʋ̃nudwolɩyɛ kɔ zʋlɔ bʋwa asafʋ yi nu.

8. Sɛ bɛkamvʋ asafʋ nu mbanimbani a, kɛ ɩsɛ kɛɛ bɛyɛ bɛ dɩyɛ bese a? Ma nwʋmɔ ndianwʋ.

⁸ Fa ayɛlɛyɩlɛ munwala ma Gyehova. Mmɩlɩ mɔ Gidiyɔnʋ lili Midiyianɩmaa zʋ nkunimi nɩ bɛhamvʋlɩ yɩ, naasʋ̃ ɩvalɩ animinyiamɩ munwatĩĩ ɩmanlɩ Gyehova. (Ndɛ. 8:22, 23) Mɩnla ɔhʋanɩ zʋ yɛ asafʋ nu mbanimbani kɔhʋla kozumazuma Gidiyɔnʋ a? Ɩsɛ kɛɛ bɛfa mɔɔ bɔkʋla bɛyɛ nwʋ animinyiamɩ bɛma Gyehova. (1 Kɔl. 4:6, 7) Kɛ ndianwʋ nɩ, sɛ bɛkamvʋ asafʋ nu ebani be wɔ yi ehilehilelɛ nwʋ a, sa ɩkʋla ɩkã kɛɛ ehilehilelɛ nɩ ɩzʋ̃ Nyamɩnlɩ Odwokɔ yɩ nɩɩ yɩ ahyɩhyɛdɩ yɩ kɛ. Ɩsɛ kɛɛ asafʋ nu mbanimbani sunzu kezimɔ bekilehile nɩ nwʋ bekila kɛɛ bɔtwɩ̃ adwɩnɩ bɛba bɔ zʋ anzɛnyɩɩ bɛfa bɛhyɛ Gyehova animinyiamɩ a. Sunzu asafʋ nu ebani be mɔɔ bɔfʋlɔ yɩ Timothy nwʋ kila. Bɛyɩlɩ yɩ kɛɛ asafʋ nu ebani fʋlɔ nɩ, nɩ yɩ anyɩ deli nwʋmɔ kɛɛ ɩkɛma bagua nu ndɛnɩ. Ɩkã kɛɛ: “Nɩ mɩmaa ndɛnɩ a, mɩma anyunumiyɩlɛ odwokɔ yɩ walɩ na mɩfa ndianwʋ mɔɔ numɔ yɛ sɩ midi egyima. Nɩ eyi ɩma mmeliyema nɩ kamvʋ mɩ paa. Naasʋ̃ kɛ ankɩ ediyelɛmaa nɩ kɛva bɛ adwɩnɩ keziye Bayɩbʋlʋ yɩ anzɛnyɩɩ Gyehova zʋ nɩ, nɩ bɛfa besiye mʋ zʋ mfomi.” Aɣinzi yi, Timothy nwʋnlɩ kɛɛ ihyinyia kɛɛ ɩyɛ nzɩnzanlɩyɛ wɔ kezimɔ ikilehile nɩ nu na iyiaki kɛɛ ɩkɔhwɩ̃ adwɩnɩ ɩkɛɣa yɩ nwʋ zʋ sʋ̃maa. (Ɛɣɛ. 27:21) Mɩnla yɛ ɩzʋ̃ numɔ ɩɣalɩ a? Ɩkã kɛɛ: “Kakɩ yɩ mmeliyema kã kɛɛ, kezimɔ mɩma ndɛnɩ nɩ ɩwʋwa bɛ ma beli ɔhawʋ be nwʋ egyima, begyina odwohilalɛ munwa na beɣike Gyehova sʋ̃. Sɛ mɩtɩ ndwokɔ mɔɔ ɩdɩ zɔ a, ɩma mɩ anyɩ de paa tɛla mmɩlɩ mɔ nɩ bɛfa animinyiamɩhyɛlɛ bɛma mɩ nɩ.”

9. Mɩnla ɔhʋanɩ zʋ yɛ bodweli Gidiyɔnʋ yi sutiyeyɛlɛ nɩɩ yɩ akɛnɣazɩzɩbɛ behilalɩ a? (Kila Ɔwɩɛnɩlɛ Aɣanɩ yɩ anyunu mfonyini yi.)

⁹ Mmɩlɩ mɔ bɛyɛlɩ Gidiyɔnʋ ndɛnɩwuwalɛvʋlɔ yɩ mɛda nɩ, nɩ ihyinyia kɛɛ ɩyɛ sutiye na ɩda akɛnɣazɩzɩbɛ ali. Bɛvalɩ egyima be mɔɔ nɩ ɩyɛ ɛyɛlɛ paa bɛmanlɩ yɩ, kɛɛ ɩzɩkɛ́ yɩ papa yɩ afɔlɩbukulo mɔɔ nɩ ɩfa ɩsʋ̃mɩ Baalɩ nɩ. (Ndɛ. 6:25, 26) Aɣinzi yi, mmɩlɩ mɔ ihunwahunwanlɩ yɩ azogyiamaa bo munwa iwieli nɩ, Gyehova hanlɩ hileli yɩ kɛɛ, ɩdɩ́ azogyiamaa ɔlɔmɩ yɩ zʋ ma bɛha ɛgyɩkɩ̃ɩ̃ be. (Ndɛ. 7:2-7) Awielɩyɛ kʋlaa nɩ, bɛhã behileli yɩ kɛɛ, ɩhɔ ɩdʋ ɩhyɛ yɩ adamvʋlɔ zʋ wɔ ohunluma dasuwonu.—Ndɛ. 7:9-11.

10. Mɩnla mmɩlɩ yɛ ebiye a, ɩkɛyɛ sɩ ɩkɛma asafʋ nu ebani be kɛɛ ɩkɛyɛ sutiye a?

 ¹⁰ Ɩsɛ kɛɛ asafʋ nu mbanimbani siyeziye bɔ nwʋ kɛɛ bɛkɛyɛ sutiye. (Gye. 3:17) Asafʋ nu ebani mɔɔ ɩyɛ sutiye nɩ, isiyeziye yɩ nwʋ kɛɛ ɩkɛva mɔɔ Ɛhɛlɛlɛ Odwokɔ yɩ kã nɩɩ mɔɔ Nyamɩnlɩ yɩ ahyɩhyɛdɩ yɩ kã nɩ ɩkɛyɛ egyima. Ɩyɛ zɔ ɩfa ɩyɛ ndianwʋba ɩma mmenii mvʋlɔ. Naasʋ̃ itwu eɣile be a, sa ɩkʋla ɩyɛ sɩ ɩma yɩ kɛɛ ɩkɛyɛ sutiye. Kɛ ndianwʋ nɩ, ɔhʋanɩhilelɛ sʋ̃maa anzɛnyɩɩ nzɩnzanlɩyɛ kɔhʋla kɛɣa aɣilemvile nu mɔɔ sa ɩkʋla ɩyɛ sɩ kɛɛ ɩkɛva ɩkɛyɛ egyima. Ɩyɛ sʋ̃ a, sa ɩkʋla ɩtɩ nɣanlɩ kɛɛ ntɩyasɩ íni ɔhʋanɩhilelɛ be mɔɔ bɛva bɛɣa nɩ nu. Anzɛnyɩɩ ebiye a bɛkɛhã bekehile yɩ kɛɛ ɩyɛ egyima be mɔɔ sa ɩkʋla ɩma bɛkyɩ yɩ betiã fiyiadɩ. Kɛ ɩkɛyɛ na mbanimbani bɛazumazuma Gidiyɔnʋ yɩ sutiyeyɛlɛ wɔ bʋwabɩlɛ mɔɔ ɩdɩdɩ zɔ nu a?

11. Mɩnla yɛ ɩkɔhʋla ɩkɔwʋwa mbanimbani ma bɛkɛyɛ sutiye a?

¹¹ Tiye ɔhʋanɩhilelɛ bʋwɔ na fa yɛ egyima. Nyamɩnlɩ hileli Gidiyɔnʋ kezimɔ ɩzɩkɛ́ yɩ papa yɩ afɔlɩbukulo yɩ, dɩka mɔɔ igyiná afɔlɩbukulo fʋlɔ ɩma Gyehova nɩɩ ɛnlamɩ kʋ̃ mɔɔ ɩvá ɩwɔ afɔlɩ. Gidiyɔnʋ ɩáyɩyɩ munwanɩ, ɩyɛlɩ mɔɔ Gyehova hanlɩ nɩ pɛpɛɛpɛ. Nnɛ sʋ̃, Gyehova yɩ ahyɩhyɛdɩ yɩ iduwa kɛlɛtahɛlɛlɛ nɩɩ amanɩyɛwɔlɛ azʋlɔtʋ zʋ ɩfa ɔhʋanɩhilelɛ mɔɔ ɩkɔwɔ yɛ nwʋ banɩ na ɩawʋwa yɛ ma yɛaɣike Gyehova nɩ ɩma asafʋ nu mbanimbani. Yɛdɔ mbanimbani yi paa, iluwakɛɛ bɔzʋ̃ nɔhʋanlɛlilɛ nu bɛfa ɔhʋanɩhilelɛ bɛyɛ egyima. Sɛ ɩba yɩ zɔ a, asafʋ yɩ munwala nyia zʋlɔ mfasʋ.—Ndw. 119:112.

12. Sɛ nzɩnzanlɩyɛ be ba a, mɩnla ɔhʋanɩ zʋ yɛ asafʋ nu mbanimbani kɔhʋla kɛva Hibulumaa 13:17 kɛyɛ egyima a?

¹² Nyia ɛpɛ kɛɛ ɛkɛyɛ nzɩnzanlɩyɛ. Kakɛ kɛɛ Gyehova hanlɩ hileli Gidiyɔnʋ kɛɛ ɩdɩ́ yɩ azogyiamaa yɩ zʋ ma bɛha ɛgyɩkɩ̃ɩ̃ be. (Ndɛ. 7:8) Ebiye a, iɣizialɩ yɩ nwʋ kɛɛ, ‘Asʋ̃ nzɩnzanlɩyɛ eyi nwʋ hyinyia a? Asʋ̃ ɩkɔwʋwa la dɩ a?’ Naasʋ̃ Gidiyɔnʋ yɛlɩ sutiye. Nnɛ sʋ̃, sɛ ahyɩhyɛdɩ yɩ yɛ nzɩnzanlɩyɛ wɔ ɔhʋanɩhilelɛ be nu a, mbanimbani yi tiye fa sumazuma Gidiyɔnʋ. (Kɩnga Hibulumaa 13:17.) Kɛ ndianwʋ nɩ, wɔ 2014 nɩ, Ɔhʋanɩhilelɛ Okuwu yɩ yɛlɩ nzɩnzanlɩyɛ wɔ kezimɔ botuwa Kɩndɔm Hɔɔlʋ nɩɩ Ayiyialɩyɛ Nnɩka mɔɔ bekyina yɩ nwʋ kakɛ nɩ nu. (2 Kɔl. 8:12-14) Bɔmʋnlɩ nɩ, nɩ ahyɩhyɛdɩ yɩ bɔ bʋsɩya wɔ asafʋ yɩ ma ɩfa ikyina Kɩndɔm Hɔɔlʋ na bowie yɩ a, asafʋ yɩ iaduwa yɩ ngyɩkɩ̃ɩ̃ ngyɩkɩ̃ɩ̃. Naasʋ̃ nzɩnzanlɩyɛ ɣalɩ kɛɛ, dɩka mɔɔ behyinyia asafʋ nniyia azʋlɔtʋ nɩ, fʋtʋlɔ mɔɔ mmeliyema yɩ wɔ oyuwadɩ munwala nɩ be yɛ bɛkɛva bekegyina a. Mmɩlɩ mɔ José dɩlɩ nzɩnzanlɩyɛ yɩ nwʋ odwokɔ nɩ, nɩ isunzu kɛɛ ɩlɛ́yɛ bʋwɔ, nɩ yɩ adwɩnɩ yɛ yɩ kɛɛ: ‘Bɔlɔ́kʋla bekegyina Kɩndɔm Hɔɔlʋ ɔkʋ̃ po. Nhyɩhyɛlɩyɛ eyi ɩlɛ́yɛ egyima.’ Mɩnla yɛ ɩwʋwalɩ José ma ileli nhyɩhyɛlɩyɛ eyi idianlɩ nu a? Ɩhanlɩ kɛɛ: “Ndwokɔ mɔɔ ɩwɔ Ɛɣɛlɛwulɛ 3:5, 6 yɩ manlɩ mɩ hakɛlɩ kɛɛ ɩsɛ kɛɛ mɩfa mʋ nwʋ mitiã Gyehova zʋ. Na mɔɔ ɩzʋ̃ numɔ ɩɣa nɩ yɛ nnwʋánlɩ baaba paa! Kɩndɔm Hɔɔlʋ sʋ̃maa mɔɔ yekyinagyina yɩ la ahanlɩ a, yezuma kɛɛ yɛkɔwʋwa wɔ ɔhʋanɩ mvʋlɔ sʋ̃ nu na ama ebiye sʋ̃ iadwu mmeliyema mvʋlɔ zʋ.”

13. (a) Mɩnla anwʋlazʋ yɛ nɩ Gidiyɔnʋ wɔ a? (b) Kɛ ɩkɛyɛ na asafʋ nu mbanimbani bɛazumazuma yɩ a? (Kila mfonyini yi sʋ̃.)

 ¹³ Fá akɛnɣazɩzɩbɛ yɛ Gyehova yɩ apɛdɩ. Gidiyɔnʋ diyeli Gyehova ɩávalɩ nwʋmɔ kɛɛ nɩ yi kunlu tu na yi egyima yɩ yɛ ɛyɛlɛ nɩ. (Ndɛ. 9:17) Gyehova hyɛlɩ yɩ ɛzɩzɩbɛ wieli nɩ, inyianlɩ anwʋlazʋ kɛɛ Nyamɩnlɩ kɔwɔ yi mmenii nwʋ banɩ. Mbanimbani mɔɔ bɛda nnɩka mɔɔ bɛva salɛ bediã ye egyima yɩ zʋ nɩ sumazuma Gidiyɔnʋ. Bɔzʋ̃ akɛnɣazɩzɩbɛ nu bedi dɩyɛzumanlɛ nɩɩ dasɩlɛlilɛ egyima yi anyunu ɩávalɩ nwʋmɔ kɛɛ sa bɔkʋla bɛkyɩ bɛ bebiziabizia ndwokɔ bɛ, be egyima kɔhʋla kevi bɛ sa anzɛnyɩɩ bɛkɛyɛ bɛ bɛsabɛsa nɩ. c Wɔ anwʋhyɩlɩyɛ kezile yi nu nɩ, asafʋ nu mbanimbani kehyinyia akɛnɣazɩzɩbɛ paa na bɛáhʋla bɛáva ɔhʋanɩhilelɛ mɔɔ bɛ sa kɛhã nɩ bɛayɛ egyima ɩávalɩ nwʋmɔ asianɩ mɔɔ ɩwɔ numɔ nɩ. Kɛ ndianwʋ nɩ, ebiye a ɔhʋanɩhilelɛ yɩ be kɛvalɩ kezimɔ yɛkɛhã ndɛnɩwuwalɛ odwokɔ mɔɔ yi munwa yɛ ɛhyɩmɛ yɩ nɩɩ mɔɔ yɛkɛyɛ na ama yeanyia yeti yealili numɔ wɔ mmɩlɩ mɔ Gɔgʋ mɔɔ ɩzʋ̃ Magɔgʋ ɩdʋ ɩhyɛ yɛ zʋ nɩ.—Izi. 38:18; Yik. 16:21.

14. Mɩnla ɔhʋanɩ zʋ yɛ bodweli Gidiyɔnʋ yɩ pindinyiigyinanlɛ behilalɩ a?

¹⁴ Nɩ ide egyima ɛzɩzɩbɛ paa na ama Gidiyɔnʋ ɩayɛ yi egyima kɛɛ ndɛnɩwuwalɛvʋlɔ. Ohunluma nɩ mɔɔ Midiyianɩmaa ɣiandinli wɔ kʋnɛ yɩ yi nu nɩ, Gidiyɔnʋ dʋwalɩ bɛ nkʋ̃ʋ̃ ɔzʋmɩ Gyɛzɩlɛlɩ Bɔnka yi nu ɩhɔ idwuli Baka Dwɔdanɩ mɔɔ nɩ ɩkɛyɛ kɛɛ ndibe adɩndɩnlɩ idua nwʋmɔ iyiyia nɩ nwʋ. (Ndɛ. 7:22) Asʋ̃ Gidiyɔnʋ dwuli kɛnɩ nɩ, izialɩ yɩ mɛda a? Anhã! Ɩwɔ numɔ, nɩ Gidiyɔnʋ nɩɩ yɩ mmenyia 300 nɩ bɛvɛ dɩyɛ, naasʋ̃ bodualɩ baka yɩ bɔdʋwalɩ mmenii yi. Awielɩyɛ kʋlaa nɩ, bɔhɔ bɔdʋlɩ Midiyianɩmaa nɩ na belili bɔ zʋ nkunimi.—Ndɛ. 8:4-12.

15. Mɩnla bʋwabɩlɛ nu yɛ ebiye a, ɩkɛyɛ sɩ kɛɛ asafʋ nu ebani be kegyina pindinyii a?

¹⁵ Ebiye a, asafʋ nɩɩ abusunwa nu asɛdɩ azʋlɔtʋ be ti, asafʋ nu ebani be kɔhʋla kɛdɩ nɣanlɩ kɛɛ ɩvɛ paa. Wɔ bʋwabɩlɛ azʋlɔtʋ mɔɔ ɩdɩ zɔ nu nɩ, mɩnla ɔhʋanɩ zʋ yɛ asafʋ nu mbanimbani kɔhʋla kozumazuma Gidiyɔnʋ a?

16-17. Mɩnla yɛ ɩwʋwalɩ Gidiyɔnʋ ma igyinanlɩ pindinyii a, na mɩnla anwʋlazʋ yɛ asafʋ nu mbanimbani kɔhʋla kenyia a? (Ayɩzaya 40:28-31) (Kila mfonyini yi sʋ̃.)

 ¹⁶ Nyia dedi kɛɛ Gyehova kɛhyɛ wʋ ɛzɩzɩbɛ. Nɩ Gidiyɔnʋ de di kɛɛ Gyehova kɛma anwʋzɩzɩbɛ yɩ na ɩyɛlɩ zɔ ɩmanlɩ yɩ sʋ̃. (Ndɛ. 6:14, 34) Mmɩlɩ be, ɩ nɩɩ yɩ mmenyia yɩ dʋwalɩ Midiyianɩ awulombunli be, mmɩlɩ mɔ Gidiyɔnʋ mmɔ luwa azɩ nɩ ɩkɛyɛ kɛɛ nɩ awulombunli yi da afupɔnkɔ zʋ.(Ndɛ. 8:12, 21) Naasʋ̃ Nyamɩnlɩ wʋwalɩ Yizilayamaa nɩ ma bɔdʋlɩ awulombunli yi belili bɔ zʋ nkunimi. Ɔzɔ la yɛ asafʋ nu mbanimbani kɔhʋla kɛva bɔ nwʋ kediã Gyehova zʋ a, iluwakɛɛ “ɩávɛ kyɩ̃ na yɩ anwʋzɩzɩbɛ ɩázã.” Sa ɩma anwʋzɩzɩbɛ mɔɔ behyinyia wɔ yɩ mmɩlɩ nu.—Kɩnga Ayɩzaya 40:28-31.

¹⁷ Ma yehilá Matthew mɔɔ ɩkɩnla Asʋpiti Nkitanwʋlilɛ Kɔmitii yɩ nwʋ yi ozumanlɛnwʋnlɛ yɩ. Mɩnla yɛ ɩwʋwalɩ yɩ ma igyinanlɩ pindinyii a? Matthew hanlɩ kɛɛ: “Mʋnwʋ kɛɛ odwokɔ mɔɔ ɩwɔ Fɩlɩpɩmaa 4:13 yɩ dɩ nɔhʋanlɛ. Mbɔmɩ sʋ̃maa nɩ, sɛ mɩfɛ na mɩtɩ nɣanlɩ kɛɛ mʋlɔ́kʋla kɔdʋwa egyima yɩ zʋ a, mʋbɔ mpayɩ ɛzɩzɩbɛ ɛzɩzɩbɛ, misiã Gyehova kɛɛ ɩma minyia anwʋzɩzɩbɛ nɩɩ ɛpɛ mɔɔ mɩkɛva mʋkɔwʋwa mɩ mmeliyema. Ɩba yɩ zɔ a, mɩtɩ nɣanlɩ kɛɛ Gyehova ma anwʋzɩzɩbɛ fʋlɔ mɩ na ɩbʋwa mɩ ma mʋtʋwa mi egyima yɩ zʋ.” Dɩkɛɛ Gidiyɔnʋ nɩ, yɛ asafʋ nu mbanimbani yɛ egyima ɛzɩzɩbɛ fa kila Gyehova yi mmuwuanɩ yɩ zʋ ɩávalɩ nwʋmɔ kɛɛ ɩyɛ a ɩla azɩ ɩma bɛ nɩ. Naasʋ̃ ɩsɛ kɛɛ bɔnwʋ kɛɛ, kɛ dɩyɛ bela yɛ bɔkɔhʋla bɛkɛyɛ a. Sa bɔkʋla benyia anwʋlazʋ kɛɛ Gyehova kɔhʋla kɔwʋwa bɛ ma bekenyia anwʋzɩzɩbɛ bɔkɔdʋwa be egyima yɩ zʋ.—Ndw. 116:1; Fɩl. 2:13.

18. Sɛ yɛbɔɔ yɩ dɔkɔ a, mɩnla yɛ asafʋ nu mbanimbani kɔhʋla kozuma wɔ Gidiyɔnʋ kɛ a?

¹⁸ Asafʋ nu mbanimbani kɔhʋla kozuma nninyeni sʋ̃maa wɔ Gidiyɔnʋ kɛ. Ɩsɛ kɛɛ asafʋ nu mbanimbani kã bɔ nwʋ azɩ na bɔnwʋ mɔɔ bɔkɔhʋla kɛyɛ nɩɩ kezimɔ bɛkɛyɛ bɛ dɩyɛ mmɩlɩ mɔ bɛhamvʋ bɛ anzɛnyɩɩ bɛdɩndɛ bediyia bɛ nɩ. Ɩsɛ kɛɛ bɛyɛ sutiye na benyia akɛnɣazɩzɩbɛ titili mmɩlɩ mɔ oyuwadɩ eyi ɩkɔɔ yɩ awielɩyɛ nɩ. Na ɩsɛ kɛɛ benyia anwʋlazʋ kɛɛ, ɩávalɩ nwʋmɔ mɔɔ bekeyiyia bela nɩ, Nyamɩnlɩ kɔhʋla kɔwʋwa bɛ. Amba, yɛ anyɩ sɔ egyima ɛzɩzɩbɛ mɔɔ asafʋ nu mbanimbani yɛ nɩ, na ‘yedi mmenii mɔɔ bɛdɩ zɔ nɩ nni.’—Fɩl. 2:29.