1-2. Dɩkɛɛ Lɔɔtʋ nɩ, mɩnla ndwokɔzɩzɩbɛ yɛ Kilisinyiamaa beyiyia wɔ nnɛ a?

 SƐ YƐNWƲ ɛbɩla tanɩ mɔɔ mmenii bɔbɔɔ a, yɛtɩ nɣanlɩ dɩkɛɛ Lɔɔtʋ la. Nɩ “idi tanɩyɛlɛmaa bɛ ɛbɩla mbʋanlɩ mbʋanlɩwɔlɛ nwʋ ɛyɛkɛ,” iluwakɛɛ nɩ izi kɛɛ yɛ sʋlɔ Ɛzɩlɛ nɩ kyi ɛbɩla tanɩ. (2 Pit. 2:7, 8) Iluwakɛɛ nɩ Lɔɔtʋ wɔ annidi nɩɩ ɔlɔlɛ ma Nyamɩnlɩ ti, nɩ ikyi ɛbɩla tanɩ mɔɔ bɛzabɛ mɔɔ bodua yɩ nwʋ beyiyia nɩ bɔ nɩ. Ɔzɔ la yɛ amɩyɛ sʋ̃ mmenii mɔɔ bɛáwu Gyehova yɩ mmɛla bodua yɛ nwʋ beyiyia a, naasʋ̃ sɛ yɛkɔ zʋ yenyia ɔlɔlɛ nɩɩ Nyamɩnlɩ nwʋ bɔlɔ mɔɔ ɩfata a, sa ɩbʋwa yɛ ma yɛ ɛbɩlawɔlɛ nwʋ kɔ zʋlɔ tɩ.—Ɛɣɛ. 14:2.

² Na Gyehova luwa ɛzɩzɩbɛhyɛlɛ ndwokɔ mɔɔ ɩwɔ Ɛɣɛlɛwulɛ buuku yi nu nɩ zʋ ɩbʋwaa yɛ ma yɛkɛyɛ zɔ. Kilisinyiamaa munwala, mmenyia nɩɩ mmaalɛ, nnwuakula nɩɩ mbanimbani kɔhʋla kenyia fʋlɔdulɛ mɔɔ nɣɛlɛbɛ wɔ numɔ mɔɔ ɩwɔ Ɛɣɛlɛwulɛ buuku yi nu zʋ mfasʋ.

3. Kɛmɔ Ɛɣɛlɛwulɛ 17:3 kã nɩ, mɩnla ti mɔɔ ihyinyia kɛɛ yɛbɔ yɛ ahʋnlɩnɩ nwʋ banɩ a? (Kila mfonyini yi sʋ̃.)

³ Sianti mɔɔ ihyinyia kɛɛ yɛbɔ yɛ ahʋnlɩnɩ nwʋ banɩ yɛ lɛ kɛɛ, Gyehova pɩbɛlɩ yɛ ahʋnlɩnɩ nu. Eyi kile kɛɛ iáhila kezimɔ yɛdɩ wɔ mmenii anyɩ zʋ, mfomi ikila kezimɔ yɛdɩ ankasa wɔ yɛ ahʋnlɩnɩ nu. (Kɩnga Ɛɣɛlɛwulɛ 17:3.) Sɛ yɛdwɩnɩndwɩnɩ yɩ fʋlɔdulɛ mɔɔ ɩma nnwʋanlɩ nɩ nwʋ a, sa ɩdɔ yɛ. (Dwɔ. 4:14) Na eyi ɩlɛ́ma mmenii bɛ ɛbɩla ngyɛpɛlɛ ngyɛpɛlɛ nɩɩ Setanɩ yɩ awohwi ndwokɔ kenyia yɛ zʋ tumi. (1 Dwɔ. 5:18, 19) Mmɩlɩ mɔ yɛtwɩ̃ɩ̃ yebike Gyehova nɩ, ɔlɔlɛ nɩɩ annidi mɔɔ yɛwɔ yɛma yɩ nɩ kɛyɛ kezi. Na iluwakɛɛ yɛábɛ kɛɛ yɛ Zɩ di ɛyɛkɛ ti, yɛlɔ́sʋzɔ  tanɩ zʋ wɔ yɛ ahʋnlɩnɩ nu po. Sɛ ɩyɛ yɛ kɛɛ yɛyɛ tanɩ be a, yekeɣizia yɛ nwʋ kɛɛ, ‘Kɛ ɩkɛyɛ na mɩahyɛda mɩayɛ debe miadiyia enii mɔɔ ɩdɔ mɩ zɛ yɩ a?’ —1 Dwɔ. 4:9, 10.

4. Mɩnla ɔhʋanɩ zʋ yɛ Gyehova yɩ nwʋ bɔlɔ wɔlɩ eliyema baalɛ be nwʋ banɩ wɔ tanɩyɛlɛ nwʋ a?

⁴ Eliyema baalɛ Marta mɔɔ ɩwɔ Croatia mɔɔ iyiyialɩ ɛbɩlazɩkɛlɛ nwʋ odwohilalɛ nɩ hɛlɛlɩ kɛɛ: “Nɩ ɩyɛ sɩ ɩma mɩ kɛɛ mɩkɛhyɛ mʋ nwʋ zʋ wɔ mmɩlɩ sikalɛ nu anyɩnlɩlelɛ mɔɔ mikenyia wɔ tanɩ nu nɩ nwʋ. Naasʋ̃ Gyehova nwʋ bɔlɔ wɔlɩ mʋ nwʋ banɩ.” b Mɩnla ɔhʋanɩ zʋ yɛ Nyamɩnlɩ nwʋ bɔlɔ kʋla yɛ zɔ a? Marta hanlɩ kɛɛ, ɩdwɩnɩndwɩnlɩ mɔɔ ɩzʋ̃ tanɩ mɔɔ ɩkɛyɛ yɩ nu ɩkɛɣa nɩ nwʋ. Amɩyɛ sʋ̃, sa yɛkʋla yɛyɛ zɔ. Mɔɔ ɩdɩbɛ kʋlaa mɔɔ ɩkɔhʋla ɩkɔzʋ̃ numɔ ɩkɛɣa yɛ lɛ kɛɛ yɛkɛma Gyehova yɩ ɛɣɛɛlɛ kɔwɔ, na awielɩyɛ kʋlaa nɩ yelényia nnwʋanlɩ.—Gyn. 6:5, 6.

5. Mɩnla yɛ ɔkɔhʋla kozuma wɔ Leo yɩ ozumanlɛnwʋnlɛ yɩ nu a?

⁵ Sɛ ye kunlu tuli Gyehova nwʋ a, yɛlɛ́fa bɛzabɛ mɔɔ bɔbɔ ɛbɩla tanɩ nɩ ɔhɔnwʋ. Mɔɔ yɛkãã yɩ be dʋlɩ Leo mɔɔ ɩda Congo nɩ. Yi onlumanlɛ mɛda alʋbɔ anla nɩ, ɩvalɩ bɛzabɛ mɔɔ bo subanɩ dɩbɛ nɩ ɔhɔnwʋ. Yɩ adwɩnɩ yɛlɩ yɩ kɛɛ iluwakɛɛ ɩáyɛ nninyeni tanɩ yɩ be ti, sɛ ɩ nɩɩ bo duwa a ɩáyɛ hwɩɩ. Ɩákyɛ, yɩ ɔhɔnwʋmmɔ yɩ nyianlɩ yɩ zʋ tumi na ɩwɔlɩ yɩ tʋ kɛ ɩpɩzaa nzã na ɩwɔlɩ adwomanlɩ. Akʋ̃ ɩwɔlɩ yɩ tʋ kɛɛ ɩdwɩnɩndwɩnɩ mɔɔ yɩ awʋvʋlɔ hilehileli yi nɩɩ kezimɔ nɩ yɩ anyɩ de mmɩlɩ mɔ nɩ ɩsʋ̃mɩ Gyehova nɩ nwʋ. Mɩnla yɛ ɩzʋ̃ numɔ ɩɣalɩ a? Yɩ anyɩ ɣalɩ yɩ nwʋ zʋ. Asafʋ nu mbanimbani wʋwalɩ yɩ ma izia ɩɣalɩ Gyehova yɩ pɛ. Kakɩ yɩ ɩlɛ anyɩnlɩlelɛ ɩsʋ̃mɩɩ kɛɛ asafʋ nu ebani nɩɩ ɔhʋanɩbukolɛvʋlɔ titili.

6. Mɩnla yɛ yɛbazunzu nwʋ a?

⁶ Bɛmá yezunzu Ɛɣɛlɛwulɛ yi ti 9 mɔɔ ɩkã  nɣɛlɛbɛ nɩɩ kwasɩya nwʋ odwokɔ kɛɛ bɛdɩ kɛɛ mmaalɛ anwɩ̃ be nɩ nwʋ. (Kila eyi nwʋ ndianwʋ fʋlɔ wɔ Wulomimaa 5:14; Galatiyiamaa 4:24.) Mmɩlɩ mɔ yesunzuu nwʋmɔ nɩ, ma ɩwʋwa wʋ adwɩnɩ nu kɛɛ ɛbɩlazɩkɛlɛ nɩɩ ponogɩlafi wuli zʋlɔ wɔ oyuwadɩ yɩ nu. (Ɛfɩ. 4:19) Meti ihyinyia paa kɛɛ yenyia Nyamɩnlɩ nwʋ bɔlɔ na yɛtwɩ̃ yɛ nwʋ wɔ tanɩ nwʋ. (Ɛɣɛ. 16:6) Kɛ yɛdɩ mmenyia anzɛnyɩɩ mmaalɛ nɩ, ye munwala kɔhʋla kenyia mɔɔ Ɛɣɛlɛwulɛ yi ti 9 kã nwʋmɔ odwokɔ nɩ zʋ mfasʋ. Bɛkã mmaalɛ yɩ nwʋ odwokɔ kɛɛ, bo nu bela dʋlɩ salɛ vʋlɔlɩ “bɛzabɛ mɔɔ bézi nɣɛlɛbɛ nɩ.” Sɛ yɛkɛhã a, nɩ ɩdɩ kɛɛ bo nu bela ɩkãã kɛɛ ‘Bɩla mɩ awudo bali alɩyɛ.’ (Ɛɣɛ. 9:1, 5, 6, 13, 16, 17) Naasʋ̃ bɛzabɛ mɔɔ beleli salɛdʋlɛ yɩ bedianlɩ numɔ nɩ, ɔsʋnɩ mɔɔ ɩdʋlɩ bo nu bela.

7. Kɛmɔ Ɛɣɛlɛwulɛ 9:13-18 ma yɛnwʋ yɩ nɩ, mɩnla yɛ ɩtʋ bɛzabɛ mɔɔ bede baalɛ kwasɩya yɩ salɛdʋlɛ yɩ betiã numɔ nɩ a? (Kila mfonyini yi sʋ̃.)

⁷ Bɛmá yezunzu “baalɛ kwasɩya” yɩ salɛdʋlɛ yɩ nwʋ. (Kɩnga Ɛɣɛlɛwulɛ 9:13-18.) Ɩdʋlɩ salɛ ɩvʋlɔlɩ abiyela mɔɔ ɩdɩ asili nɩ kɛɛ, “Ɩɣɩla ɛkɩ” na ɩɣa ili alɩyɛ. Mɩnla yɛ ɩdʋlɩ bɛ a? “Bɛzabɛ mɔɔ bowu mɔɔ bɛáhʋla bɛyɛ hwɩɩ yɛ bɔwɔ ɛkɛ a.” Ebiye a, ɛkakɛ kɛɛ Ɛɣɛlɛwulɛ buuku yi ili bɔmʋnlɩ ɩhã ndwokɔ be mɔɔ ɩdɩdɩ zɔ. Ɛkɛnɩ bɔ yɛ kɔkɔ wɔ “baalɛ mɔɔ ɩmankɛ” nɩɩ “baalɛ adwomanlɩwɔlɛvʋlɔ” nwʋ. Ɩkã kɛɛ: “Yɩ awudo imĩ ɩkɔ owulo nu.” (Ɛɣɛ. 2:11-19) Ɛɣɛlɛwulɛ 5:3-10 bɔ yɛ kɔkɔ wɔ baalɛ fʋlɔ be mɔɔ “ɩmankɛ” mɔɔ yɩ “agyia tʋlʋ kɔ owulo nu” nɩ nwʋ.

8. Mɩnla pɔkɔ yɛ ɩsɛ kɛɛ yesi a?

⁸ Bɛzabɛ mɔɔ bɛtɩ “baalɛ kwasɩya” yɩ salɛdʋlɛ nɩ, ɩsɛ kɛɛ besi pɔkɔ kɛɛ bekele bekediã nu anzɛnyɩɩ beléde bekediã nu. Ebiye a, ɩsɛ kɛɛ amɩyɛ sʋ̃ yesi pɔkɔ mɔɔ ɩdɩ zɔ. Sɛ abiye pɛ kɛɛ yɛfa yɛ nwʋ yewula ɛbɩlazɩkɛlɛ nu anzɛnyɩɩ yɛkɔ yefindeli ponogɩlafi zʋ aɣilemvile nu wɔ intanɛtɩ zʋ a, mɩnla yɛ yɛkɛyɛ a? 

9-10. Sianti mɔɔ ɩsɛ kɛɛ yɛtwɩ̃ yɛ nwʋ wɔ ɛbɩlazɩkɛlɛ nwʋ nɩ ebiye yɛ lɛ mɩnla?

⁹ Sianti baaba be ti yɛ ɩsɛ kɛɛ yɛtwɩ̃ yɛ nwʋ wɔ ɛbɩlazɩkɛlɛ nwʋ a. Nɩ “baalɛ kwasɩya” yɩ ɩkãã kɛɛ: “Nzulo mɔɔ bowuwa yɛ fɛ.” Mɩnla yɛ lɛ “nzulo mɔɔ bowuwa” a? Bayɩbʋlʋ yɩ fa nna mɔɔ ɩkɔlɩ zʋlɔ wɔ agyiahʋnlɩmaa bɛ avinli nɩ tindiã nzulo mɔɔ ɩma abiye yɩ ahʋnlɩnɩ tɔ yi kunlu nɩ nwʋ. (Ɛɣɛ. 5:15-18) Benyia nɩɩ baalɛ mɔɔ begyia wɔ mmɛla ɔhʋanɩ zʋ nɩ, bɔkʋla bɛ nɩɩ bɔ nwʋ da. Na “nzulo mɔɔ bowuwa” yɩ sʋ̃ ɛ? Ɩdɩ nna nu nkitanwʋlilɛ mɔɔ ɩ́dɩ yɩ ɔhʋanɩ zʋ. Mbɔmɩ sʋ̃maa nɩ eyi kɔlɩ zʋlɔ wɔ ɛɣɩntanlɛ  nu kɛmɔ awulo ba wuwa dɩyɛ wɔ ɛɣɩntanlɛ nu nɩ. Bɛzabɛ mɔɔ bɔbɔ ɛbɩla tanɩ nɩ, bɛtɩ nɣanlɩ kɛɛ “nzulo mɔɔ bowuwa” nɩ yɛ fɛ mmɩlɩ mɔ bosunzu kɛɛ abiyela ɩlɔ́nwʋ bɛ mɛda nɩ. Naasʋ̃ bɛdahɩlɩ bɔ nwʋ! Iluwakɛɛ Gyehova nwʋ yɩ munwala. Sɛ yɛ nɩɩ Gyehova avinli sɩkɛ a, ɩyɛ ɛyɛkɛ ɩtɛla dɩyɛ bela wɔ oyuwadɩ. (1 Kɔl. 6:9, 10) Nninyeni mvʋlɔ sʋ̃ wɔ kɛnɩ mɔɔ sa ɩkʋla ɩtʋ yɛ.

¹⁰ Sɛ ɔbɔ adwomanlɩ a, sa ɩkʋla ɩma wʋ anyunu kua azɩ, ɛtɩ nɣanlɩ kɛɛ mfasʋ bela íni wʋ zʋ, ɛɣɩnzɛlɛ mɔɔ wʋáhila yɩ ɔhʋanɩ sʋ̃ kɔhʋla kɛɣa na sa ɩkʋla ɩsɩkɛ wʋ abusunwa sʋ̃. Meti nɣɛlɛbɛ wɔ numɔ pa kɛɛ yeléde baalɛ kwasɩya eyi yɩ salɛdʋlɛ yɩ yekediã nu. Bɛzabɛ mɔɔ bɔbɔ ɛbɩla tanɩ nɩ, bɛsɩkɛ bɛ nɩɩ Gyehova avinli abusunwawɔlɛ, akʋ̃ sʋ̃ bo nu sʋ̃maa nyia adimakɛlɛ mɔɔ ɩkʋla ikũ bɛ. (Ɛɣɛ. 7:23, 26) Ɛɣɛlɛwulɛ yi ti 9 yɩ nkyɩkyɛmi 18 yɩ fa ba awielɩyɛ kɛɛ: “Bɛzabɛ mɔɔ bɔkɔ yɩ pɛ nɩ bɔwɔ Siye yi nu.” Sɛ ɔzɔ a, mɛyɩ nɩ mɩnla ti mɔɔ mmenii sʋ̃maa de yɩ salɛdʋlɛ mɔɔ ɩkɔ iwieli owulo nu nɩ betiã nu a?—Ɛɣɛ. 9:13-18.

11. Mɩnla ti mɔɔ ɩ́dɩ baaba kɛɛ yekehila ponogɩlafi a?

¹¹ Dɩyɛ ɔkʋ̃ mɔɔ ɩsɛ kɛɛ yɛtwɩ̃ yɛ nwʋ wɔ nwʋmɔ yɛ lɛ ponogɩlafi. Abiyemmɔ tɩ nɣanlɩ kɛɛ sɛ bekila ponogɩlafi a ɩáyɛ hwɩɩ. Naasʋ̃ ídɩ nɔhʋanlɛ. Sɛ abiye kila ponogɩlafi a, ɩma kezimɔ ibu yɩ nwʋ nɩɩ mmenii mvʋlɔ nɩ kã azɩ na ɩyɛ sɩ kɛɛ ikeyiaki yi ehilalɛ. Sɛ abiye kila adwomanlɩwɔlɛ nwʋ mfonyini a, ɩyɛ sɩ kɛɛ yɩ ɛɣɛɛlɛ kevi. Akʋ̃ sʋ̃, ponogɩlafi ɩáma yɛyɩ akɔnɔ tanɩ wɔ ye nu mfomi ɩma ɩyɛ kezi. (Kol. 3:5; Gye. 1:14, 15) Nɔhʋanlɛ odwokɔ yɛ lɛ kɛɛ, bɛzabɛ mɔɔ bekila ponogɩlafi nɩ, ɩma bɛfa bɔ nwʋ bowula ɛbɩla mbʋanlɩ mbʋanlɩwɔlɛ nu.  

12. Kɛ ɩkɛyɛ na yɛahile kɛɛ yɛpɛ kɛɛ yɛtwɩ̃ yɛ nwʋ wɔ mfonyini mɔɔ ɩtwɩnhwɩ̃ nna nwʋ akɔnɔ nwʋ a?

¹² Kɛ Kilisinyiamaa nɩ, sɛ adwomanlɩwɔlɛ nwʋ mfonyini findenli yɛ foonu zʋ aɣilemvile nu a, mɩnla yɛ ɩsɛ kɛɛ yɛyɛ a? Ɩsɛ kɛɛ yɛyɩ yɩ kɛ ndɛndɛ. Sɛ yɛkakɛ kɛɛ yɛ nɩɩ Gyehova avinli abusunwawɔlɛ yɛ ɩdɩ dɩyɛ mɔɔ ɩtʋ bʋlɔ paa a, ɩkɛyɛ mɛlɛkɛ kɛɛ yɛkɛyɛ zɔ. Mfonyini azʋlɔtʋ be wɔ kɛnɩ mɔɔ ɩ́dɩ ponogɩlafi ankasa naasʋ̃ ɩkɔhʋla ikodunwo nna nwʋ akɔnɔ wɔ ye nu. Mɩnla ti mɔɔ íni kɛɛ yekila mfonyini mɔɔ ɩdɩ zɔ po a? Sianti yɛ lɛ kɛɛ yɛábɛ kɛɛ yɛdwɩnɩndwɩnɩ nninyeni mbʋanlɩ mbʋanlɩ nwʋ. (Mt. 5:28, 29) David mɔɔ ɩdɩ asafʋ nu ebani wɔ Thailand nɩ hanlɩ kɛɛ: “Mibizia mʋ nwʋ kɛɛ: ‘Ɩwɔ numɔ kɛɛ mfonyini yɩ ɩ́dɩ ponogɩlafi dɩyɛ, naasʋ̃ asʋ̃ Gyehova anyɩ keleli nwʋmɔ kɛɛ mʋkɔhɔ zʋlɔ mikehila a?’ Sɛ musunzu nninyeni nwʋ zɔ a, ɩma mɩyɛ mɩ dɩyɛ wɔ nɣɛlɛbɛ nu.”

13. Mɩnla yɛ ɩbʋwa yɛ ma yɛyɛ yɛ dɩyɛ wɔ nɣɛlɛbɛ nu a?

¹³ Sɛ ye kunlu tu kɛɛ yɛkɛyɛ debe ma Gyehova yɩ ɛɣɛɛlɛ kɔwɔ a, ɩkɔwʋwa yɛ ma yɛkɛyɛ yɛ dɩyɛ wɔ nɣɛlɛbɛ nu. Nyamɩnlɩ nwʋ bɔlɔ yɛ lɛ “nyɛlɛbɛ yɩ tʋwɔlɛ.” (Ɛɣɛ. 9:10) Yɛnwʋ eyi wɔ Ɛɣɛlɛwulɛ yi ti 9 yɩ tʋwɔlɛ yɩ, ɛkɛnɩ yɛ bɛvalɩ “nɣɛlɛbɛ” bedindianlɩ baalɛ fʋlɔ be nwʋ yɩ a.

14. Mɩnla salɛdʋlɛ nwʋ odwokɔ fʋlɔ yɛ ɩwɔ Ɛɣɛlɛwulɛ 9:1-6 yɩ a?

¹⁴ Kɩnga Ɛɣɛlɛwulɛ 9:1-6. Salɛdʋlɛ eyi ɩzʋ̃ Gyehova yɛ Wɔlɛvʋlɔ yɩ mɔɔ nɣɛlɛbɛ munwala zʋ̃ yɩ kɛnɩ nɩ kɛ. (Ɛɣɛ. 2:6; Wul. 16:27) Ɩkã aliyia kezile be mɔɔ ɩlɛ pilɛsɩ asunwa nɩ nwʋ odwokɔ. Eyi ma yɛnwʋ kɛɛ Gyehova yi kunlu dɩyɛnɛ na bɛzabɛ mɔɔ bɛpɛ kɛɛ bɛfa yɩ nɣɛlɛbɛ bɛyɛ egyima nɩ, ɩpɛ kɛɛ bɛba yɩ pɛ.

15. Mɩnla yɛ Nyamɩnlɩ pɛ kɛɛ yɛyɛ a?

¹⁵ Gyehova yi kunlu dɩyɛnɛ na ɩma yɛ sa kã mɔɔ yehyinyia ma ɩbʋlʋ zʋ. Baalɛ mɔɔ igyĩ kɛnɩ ɩma “nɣɛlɛbɛ” mɔɔ bɛhã yɩ nwʋ odwokɔ wɔ Ɛɣɛlɛwulɛ yi ti 9 yi nu nɩ, ɩma yɛnwʋ kɛɛ  Gyehova yi kunlu dɩyɛnɛ na ɩma nninyeniba sʋ̃maa yɛ. Nkyɩkyɛmi yi ma yɛnwʋ kɛɛ, baalɛ yɩ dʋlɩ salɛ vʋlɔlɩ mmenii kɛɛ bɛɣɩla yɩ awudo bɛɣa beli alɩyɛ mɔɔ ɩyɛ fɛ, na bɔnlʋ nzã mɔɔ iziyeziye. (Ɛɣɛ. 9:2, ad.) Akʋ̃ sʋ̃, kɛmɔ nkyɩkyɛmi  4 nɩɩ 5 yɩ kã nɩ: “Baalɛ mɔɔ igyĩ kɛnɩ ɩma nɣɛlɛbɛ nɩ hã hileli enii mɔɔ ízi nɣɛlɛbɛ nɩ kɛɛ: ‘Bɩla, bali mɩ alɩyɛ.’” Mɩnla ti mɔɔ ɩsɛ kɛɛ yede baalɛ eyi yɩ salɛdʋlɛ yɩ yetiã nu a? Gyehova pɛ kɛɛ yɩ nnwuakula nwʋ nyɛlɛbɛ na benyia banɩwɔlɛ sʋ̃. Ɩábɛ kɛɛ yɛkɛyɛ debe mɔɔ ɩkɛma yekeli ɛyɛkɛ. Meti mɔɔ “ɩva nɣɛlɛbɛ iziye ɩma ɛdɩnɣɛlɛmaa yɩ a.” (Ɛɣɛ. 2:7) Sɛ yɛwɔ Gyehova nwʋ bɔlɔ mɔɔ ɩfata a, yɛkɛbɛ yɩ kɛɛ yɛkɛyɛ mɔɔ ɩkɔzɔ yɩ anyɩ. Yetiye yɩ fʋlɔdulɛ mɔɔ nɣɛlɛbɛ wɔ nu nɩ, na yɛfa yɛyɛ egyima.—Gye. 1:25.

16. Mɩnla yɛ Nyamɩnlɩ nwʋ bɔlɔ hanlɩ Alain ma ɩyɛlɩ a, na mɩnla yɛ ɩzʋ̃ numɔ ɩɣalɩ a?

¹⁶ Bɛmá yehila kezimɔ Nyamɩnlɩ nwʋ bɔlɔ wʋwalɩ Alain ma izili pɔkɔ baaba. Alain dɩ asafʋ nu ebani na ɩdɩ tikya sʋ̃. Ɩhanlɩ kɛɛ, “Nɩ mi egyima nu maa bu ponogɩlafi kɛɛ bɛfa bekile nna nwʋ dɩyɛ.” Naasʋ̃ Alain mɛyɩ nɩ izi kɛɛ ɩdɩbɛ. Ɩhanlɩ kɛɛ, “Iluwakɛɛ mu kunlu tuli Gyehova nwʋ na mʋdɔ yɩ nɩ ti, mizili mɩ kɛnɣa kɛɛ milékila ɔzɔ fɩlɩmɩ yɩ be.” Mihilehileli sianti mɔɔ miáhila ebiye sʋ̃ nu mihileli bɛ.” Ɩvalɩ nɣɛlɛbɛ ɩyɛlɩ egyima “iluwalɩ ntɩyasɩ ɔhʋanɩ zʋ ɩhɔlɩ yɩ anyunu.” (Ɛɣɛ. 9:6) Pɔkɔba mɔɔ Alain zili nɩ ɩwʋwalɩ yɩ ɔhɔnwʋmmɔ tikyamaa nɩ be ma bɔwɔlɩ yɩ tʋ kɛɛ bosumaa Bayɩbʋlʋ yɩ na bɔkɔɔ Dɩyɛzumanlɛ sʋ̃.

17-18. Mɩnla nyilalɛ yɛ bɛzabɛ mɔɔ bede “nɣɛlɛbɛ” yɩ salɛdʋlɛ betiã nu nɩ bɛ sa kã yɩ a, na mɩnla nyilalɛ yɛ bekenyia yɩ eɣile be a? (Kila mfonyini yi sʋ̃.)

¹⁷ Gyehova luwalɩ mmaalɛ anwɩ̃ mɔɔ begyĩ kɛnɩ bɛma nɣɛlɛbɛ nɩɩ kwasɩya bɛ ndianwʋ yɩ zʋ ɩma yɛnwʋ kezimɔ yɛkɔhʋla yekenyia anyɩnlɩlelɛ wɔ eɣile be. Bɛzabɛ mɔɔ bede “baalɛ kwasɩya” yɩ salɛdʋlɛ yɩ betiã nu nɩ, bɛfa bɛ adwɩnɩ besiye mmɩlɩ sikalɛ nu anyɩnlɩlelɛ mɔɔ bekenyia wɔ ɛbɩlazɩkɛlɛ nu nɩ zʋ. Bézi kɛɛ mɔɔ bɛyɛɛ wɔ nnɛ nɩ ɩkɛhã be eɣile be, mɔɔ bɛyɛ nɩ ɩ nɩɩ bɛ kɔhɔ kowieli “Siye nu.”—Ɛɣɛ. 9:13, 17, 18.

¹⁸ Naasʋ̃ bɛzabɛ mɔɔ bede baalɛ mɔɔ igyĩ kɛnɩ ɩma nɣɛlɛbɛ yɩ salɛdʋlɛ betiã nu nɩ, ikezi bɔ bʋwɔ baaba. Bɛ anyɩ de iluwakɛɛ nninyeni mɔɔ ɩkɔwʋwa bɛ ma bɔkɔhwɩ̃ bekeɣike Gyehova munwala nɩ bɛ sa kã yɩ. (Ayɩ. 65:13) Gyehova luwalɩ nkɔmɩhyɛnii Ayɩzaya zʋ hanlɩ kɛɛ: “Bɛyɛ́ azʋnlɩ bediye mɩ na beli alɩyɛba, na beli alɩyɛ mɔɔ ɩyɛ sɔkyɩɩ ma bɛ anyɩ ile.” (Ayɩ. 55:1, 2) Yɛbɔ mmɔdɩnɩ kɛɛ yɛkɔlɔ nninyeni mɔɔ Gyehova yɩ anyɩ deli nwʋ na yɛahyi mɔɔ ikyi nɩ. (Ndw. 97:10) Na yɛ anyɩ deli nwʋmɔ kɛɛ yɛkɔdʋ salɛ yɛkɔvʋlɔ mvʋlɔ ma  bekenyia “nɣɛlɛbɛ.” Yɛdɩ kɛɛ mmaawa mɔɔ “bɛtɩnyɩaa nu wɔ twonwa yɩ dɩka mɔɔ ɩwɔ sʋlɔ kɛɛ: ‘Ma abiyela mɔɔ ɩdɩ asili nɩ ɩɣɩla ɛkɩ.’” Mfasʋ mɔɔ yɛ nɩɩ bɛzabɛ mɔɔ bede salɛdʋlɛ yɩ betiã numɔ kenyia nɩ ɩ́dɩ mmɩlɩ sikalɛ nu dɩyɛ. Ɩwɔ kɛnɩ eɣile bela na ɩkɛma “yɛkɔwʋwa azɩ” daabaa mmɩlɩ mɔ “yeduwaa ntɩyasɩ ɔhʋanɩ zʋ yɛkɔhɔ yɛ anyunu nɩ.”—Ɛɣɛ. 9:3, 4, 6.

19. Kɛmɔ Odwokɔhanlɛvʋlɔ 12:13, 14 kã nɩ, mɩnla yɛ ɩsɛ kɛɛ yesi yɛ kɛnɣa kɛɛ yɛkɛyɛ a? (Kila alɩka mɔɔ ise “ Nyamɩnlɩ Nwʋ Bɔlɔ Bʋwa Yɛ.”)

¹⁹ Kɩnga Odwokɔhanlɛvʋlɔ 12:13, 14. Ɩɣɩla kɛɛ Nyamɩnlɩ nwʋ bɔlɔ kɔhɔ zʋlɔ kɔwɔ yɛ ahʋnlɩnɩ nwʋ banɩ na ɩawʋwa yɛ ma yɛ ɛbɩlawɔlɛ nwʋ ɩadɩ. Eyi kɔwʋwa yɛ ma yɛkɔhɔ zʋ yekeɣike Gyehova wɔ oyuwadɩ tanɩ eyi yɩ awielɩyɛ yɩ nu. Nyamɩnlɩ nwʋ bɔlɔ mɔɔ ɩfata eyi kɛhyɛ yɛ ɛzɩzɩbɛ ma yɛkɔhɔ zʋlɔ yɛkɔdʋ salɛ yɛkɔvʋlɔ mmenii sʋ̃maa na beanyia “nɣɛlɛbɛ” zʋ mfasʋ.