1. Sɛ yekenyia nnwʋanlɩ wɔ Gyehova yɩ eɣile yi nu a, mɩnla yɛ ɩsɛ kɛɛ yɛyɛ a?

 SƐ BAYƖBƲLƲ kã “Gyehova yɩ eɣile” a, ikile eɣile mɔɔ Gyehova ɩfa ɩsɩkɛ yɩ adamvʋlɔ na ide yi mmenii. Ɔwɔkɩ mmɩlɩ nu nɩ, Gyehova zɩkɛlɩ amanlɩ azʋlɔtʋ be. (Ayɩ. 13:1, 6; Izi. 13:5; Zɛf. 1:8) Wɔ yɛ mmɩlɩ yɩ nu nɩ, “Gyehova yɩ eɣile” yi kɔwɔ yɩ tʋ mmɩlɩ mɔ bɔdʋ bɛhyɛ Babilɔnʋ Kezile yi zʋ na ɩahɔ iawieli Amagadɔnʋ kʋnɛ yɩ nu. Sɛ yekenyia nnwʋanlɩ wɔ ɔzɔ “eɣile” yi a, ɩsɛ kɛɛ yesiyeziye yɛ nwʋ sikalɛyɩ la. Gyisɛsɩ hilehileli kɛɛ mmɩlɩ mɔ yɛmaa “anwʋhyɩlɩyɛ kezile yi” kɔwʋwa yɛ adwɩnɩ nu nɩ, ɩsɛ kɛɛ yesiyeziye yɛ nwʋ sʋ̃ yɛma eɣile yi.—Mt. 24:21; Lk 12:40.

2. Mɩnla ti mɔɔ yɛkɔhʋla yekenyia 1 Tɛsalonikamaa yɩ zʋ mfasʋ a?

² Wɔ kɛlɛta mɔɔ ili bɔmʋnlɩ mɔɔ sunzuma hanlɩ sʋ̃mavʋlɔ Pɔɔlʋ ma ɩhɛlɛlɩ ɩhɔ ɩmanlɩ Tɛsalonikamaa yɩ nu nɩ, ɩvalɩ ndianwʋ azʋlɔtʋ be ilili egyima ɩva ɩwʋwalɩ Kilisinyiamaa kɛɛ, ɩsɛ kɛɛ besiyeziye bɔ nwʋ bɛma Gyehova yɩ ndɛnɩwuwalɛ eɣile kezile mɔɔ ɩbaa yɩ. Nɩ Pɔɔlʋ zi kɛɛ Gyehova yɩ eɣile yi nɩ ɩlɛ́ba wɔ ɔzɔ mmɩlɩ yɩ. (2 Tɛs. 2:1-3) Naasʋ̃, ɩhyɛlɩ yi mmeliyema ɛzɩzɩbɛ kɛɛ beziyeziyé bɔ nwʋ bɛma ɔzɔ eɣile nɩ dɩkɛɛ mɔɔ sɛ awulo kyɩ̃ la pɛ a ɩbaa. Na amɩyɛ sʋ̃, sa yɛkʋla yɛfa ɔzɔ fʋlɔdulɛ yɩ yɛyɛ egyima. Bɛmá yezunzu kezimɔ ihileli ndwokɔ eyimmɔ nu nɩ nwʋ: (1) kezimɔ Gyehova yɩ eɣile yi kɛɣa, (2) bɛzabɛ mɔɔ belényia nnwʋanlɩ wɔ ɔzɔ eɣile yi, nɩɩ (3) kezimɔ yekeziyeziye yɛ nwʋ na yeanyia nnwʋanlɩ.

3. Mɩnla ɔhʋanɩ zʋ yɛ Gyehova yɩ eɣile yi kɛɣa kɛɛ awulo a? (Kila mfonyini yi sʋ̃.)

³ “Kɛmɔ awulo ɩba iwuwa dɩyɛ aɣilemvile nu ohunluma nɩ.” (1 Tɛs. 5:2) Eyi yɛ ɩdɩ ndianwʋ mɔɔ ili bɔmʋnlɩ mɔɔ bɛva behilehile  kezimɔ Gyehova yɩ eɣile yi kɛɣa yi nu a. Nnwulo ta yɛ bɛ dɩyɛ ndɛndɛ wɔ anwunzumi nu na bowuwa mmenii wɔ mmɩlɩ mɔ bɛ anyɩ ɩála. Gyehova yɩ eɣile yi sʋ̃ kɛɣa aɣilemvile nu, wɔ mmɩlɩ mɔ mmenii sʋ̃maa bɛ anyɩ ɩála. Kezimɔ nninyeni kezizi ndɛndɛ nɩ ɩkɛyɛ nɔhʋanlɛ Kilisinyiamaa po nnwʋánlɩ. Naasʋ̃ sɛ bɛsɩkɛɛ tanɩyɛlɛmaa nɩ a, bɛlɛ́sɩkɛ yɛ.

4. Mɩnla ɔhʋanɩ zʋ yɛ Gyehova yɩ eɣile yi ɩdɩ kɛɛ awʋbɔ nu ɛyɛkɛ a?

⁴ Kɛmɔ aɣilemvile nu ɛyɛkɛ ɩba baalɛ mɔɔ awʋbɔ ɩhã yɩ zʋ nɩ. (1 Tɛs. 5:3) Sɛ baalɛ ɩɣɩnzɛ a, ízi mmɩlɩ pɔkyɩɩ mɔ awʋbɔ kɛhã yɩ. Naasʋ̃ izi petee kɛɛ ɩyɛ bela a, sa ɩwʋ. Awʋbɔ kɛhã yɩ aɣilemvile nu, ɩkɛdɩ ɛyɛkɛ na ɩlɔ́kʋla kɛyɛ nwʋmɔ hwɩɩ. Ɔzɔ la yɛ yézi eɣile nɩɩ dɔnɩhwɩlɩ kʋ̃ mɔɔ Gyehova yɩ eɣile yi kɔwɔ yɩ tʋ a. Naasʋ̃ yezi paa kɛɛ ɩbaa na Nyamɩnlɩ kowuwa tanɩyɛlɛmaa ndɛnɩ mɔɔ bɔlɔ́kʋla bekeɣiandi.

5. Mɩnla ɔhʋanɩ zʋ yɛ anwʋhyɩlɩyɛ kezile yi nɩ ɩdɩ kɛɛ awulobahyɩ̃ a?

⁵ Dɩkɛɛ awulobahyɩ̃. Pɔɔlʋ yɩ ndianwʋ mɔɔ ɩtɔ zʋlɔ asã yɩ nu nɩ, izia ɩhanlɩ nnwulo mɔɔ bowuwa dɩyɛ ohunluma nɩ nwʋ odwokɔ. Naasʋ̃ eyi nu mɛyɩ, nɩ Pɔɔlʋ ɩlɛ Gyehova yɩ eɣile yi itindiãã awulobahyɩ̃ nwʋ. (1 Tɛs. 5:4) Nnwulo mɔɔ bowuwa dɩyɛ ohunluma nɩ sɛ benyia nninyeni na bowuwaa a, ɩyɛ a bɛ adwɩnɩ ɩáɣa zʋ kɛɛ awulo ɩkyɩ̃ɩ̃. Bɛ anyɩ kɛɣa bɔ nwʋ zʋ nɩ, nɩ awulo hyɩ̃ ma bɛhyɩ bɛ. Ɔzɔ la yɛ anwʋhyɩlɩyɛ kezile yi mɔɔ ɩbaa yɩ, bɛzabɛ mɔɔ bɛdɩ kɛɛ nnwulo mɔɔ bɔkɔ zʋ bɛyɛ nninyeni mɔɔ Nyamɩnlɩ kyi wɔ anwunzumi tʋ nɩ, bɔ nwʋ kɛla ali a. Naasʋ̃ amɩyɛ mɛyɩ, sa yɛkʋla yesiyeziye yɛ nwʋ iluwa nninyeni mɔɔ Gyehova kyi mɔɔ yɛlɛ́yɛ na yɛahɔ zʋ yɛala “baabayɛlɛ, pɛlɩpɛlɩlilɛ nɩɩ nɔhʋanlɛlilɛ” ali nɩ. (Ɛfɩ. 5:8-12) Akʋ̃, Pɔɔlʋ izia ɩvalɩ ndianwʋ anwɩ̃ be ilili egyima ɩhanlɩ bɛzabɛ mɔɔ belényia nnwʋanlɩ nɩ nwʋ odwokɔ.

6. Mɩnla ɔhʋanɩ zʋ yɛ mmenii sʋ̃maa bɛlɩla a? (1 Tɛsalonikamaa 5:6, 7)

⁶ ‘Mmenii mɔɔ bɛda.’ (Kɩnga 1 Tɛsalonikamaa 5:6, 7.) Pɔɔlʋ valɩ bɛzabɛ mɔɔ belényia nnwʋanlɩ wɔ Gyehova yɩ eɣile yi nu nɩ idindianlɩ mmenii mɔɔ bɛla nwʋ. Sɛ abiye da a, ízi mɔɔ ɩkɔlɩɩ zʋlɔ na ízi kɛɛ mmɩlɩ ɩkɔɔ. Meti sɛ nninyeni be mɔɔ nwʋmɔ hyinyia ɩkɔlɩɩ zʋ a, ɩánwʋ yɩ na ɩáhʋla ɩyɛ nwʋmɔ hwɩɩ. Nnɛ, mmenii sʋ̃maa bɛlɩla wɔ sunzuma ɔfʋã nu. (Wul. 11:8) Bɛánwʋ dasɩlɛ bela mɔɔ ikile kɛɛ yɛda “awielɩyɛ mmɩlɩ yɩ” nu na ɩlɛ́kyɛ na anwʋhyɩlɩyɛ kezile yi ɩawɔ yɩ tʋ. Sɛ ndwokɔ nɣezile be sizi wɔ oyuwadɩ a, ɩkʋla itunwo bo nu be wɔ nna nu ma betiye Odwokɔba yɩ. Naasʋ̃ kɛ ankɩ bɔkɔwɩɛnɩ nɩ, bo nu sʋ̃maa besia bɛda. Bɛzabɛ mɔɔ bede ndɛnɩwuwalɛ eɣile yi bedi po nɩ sunzu kɛɛ, ilényianlɩ nwʋmɔ ɩlɛ́balɩ. (2 Pit. 3:3, 4) Naasʋ̃, yɛnwʋ kɛɛ nwʋmɔ hyinyia paa kɛɛ eɣile bela yɛkɔ zʋlɔ yɛwɩɛnɩ.

7. Mɩnla ɔhʋanɩ zʋ yɛ bɛzabɛ mɔɔ Nyamɩnlɩ kɛzɩkɛ bɛ nɩ, bɛdɩ kɛɛ mmenii mɔɔ benyia a?

⁷ ‘Mmenii mɔɔ bɔnʋ nzã benyia.’ Sʋ̃mavʋlɔ Pɔɔlʋ valɩ bɛzabɛ mɔɔ Nyamɩnlɩ kɛzɩkɛ bɛ nɩ idindianlɩ nzanyianlɛmaa nwʋ. Sɛ abiye nʋ̃ nzã nyia a, ɩáhʋla ɩyɛ mɔɔ ɩkɔlɩɩ zʋlɔ wɔ yɩ nwʋ nɩ nwʋ hwɩɩ na ɩáhʋla isizi abɔkɔ baaba sʋ̃. Ɔzɔ la yɛ tanɩyɛlɛmaa bɛáhʋla bɛyɛ Nyamɩnlɩ yɩ kɔkɔwɔlɛ yɩ nwʋ hwɩɩ a. Bɔbɔ ɛbɩla mɔɔ ɩkɛva bɛ ɩkɔhɔ ɛzɩkɛlɛ nu. Naasʋ̃ bɛhã behile Kilisinyiamaa kɛɛ bɔwɩɛnɩ́ na bɛva bɛ adwɩnɩ bɛyɛ egyima. (1 Tɛs. 5:6) Bayɩbʋlʋ nwʋ nnimidivʋlɔ be hilehileli yɛ adwɩnɩ mɔɔ yɛkɛva yɛkɛyɛ egyima yi nu kɛɛ sɛ abiye yɩ adwɩnɩ yɛ egyima a, “ikile kɛɛ isi pi, na yi kunlu iádu na ɩkʋla isunzu nninyeni nwʋ bʋwɔ isi pɔkɔba.” Mɩnla ti mɔɔ ɩsɛ kɛɛ yesi pi na íni kɛɛ yɛma ye kunlu tu a? Ama yɛávalɩ yɛ nwʋ yɛáwulawulalɩ manlɩwulɛndwokɔ nu. Nhyɛ mɔɔ ɩkɛɣa yɛ zʋ kɛɛ yɛvá yɛ nwʋ yewula ndwokɔ eyimmɔ nu nɩ kɛyɛ kezi mmɩlɩ mɔ Gyehova yɩ eɣile yi ibikee nɩ. Naasʋ̃, íni kɛɛ yɛma kezimɔ yɛkɛyɛ yɛ dɩyɛ wɔ nwʋmɔ nɩ tʋ yɛ adwɩnɩndwɩnɩ. Nyamɩnlɩ yi sunzuma nɩ kɔhʋla kɔwʋwa yɛ ma yɛ adwɩnɩ kegyina na ama yeazi pɔkɔba.—Lk. 12:11, 12.  

8. Subanɩ azʋlɔtʋ mɔɔ ɩkɔwʋwa yɛ ma yɛkɔwɩɛnɩ na yɛ anyɩ ɩala ɛkɛnɩ nɩ, kɛ 1 Tɛsalonikamaa 5:8 hanlɩ nwʋmɔ odwokɔ zeli a? (Kila mfonyini yi sʋ̃.)

⁸ ‘Yɛvá bulalɛ atalɩ yewutuli yɛ kɛnɣa zʋ na yɛvá bulalɛ kyɛbɛ yɛzʋwa.’ Pɔɔlʋ valɩ yɛ dindianlɩ azogyiamaa mɔɔ beziyeziye bɔ nwʋ bɛma kʋnɛ nwʋ. (Kɩnga 1 Tɛsalonikamaa 5:8.) Bekila ɔhʋanɩ kɛɛ sogyianii keziyeziye yɩ nwʋ ɩkɛma kʋnɛ wɔ mmɩlɩ bela nu. Ɔzɔ la sʋ̃ yɛ ɩdɩ wɔ yɛ ɔfʋã nu a. Yɛfa dedi nɩɩ ɔlɔlɛ yɛyɛ bulalɛ atalɩ yebutuli yɛ kɛnɣa zʋ, na yɛfa anyɩnlɩlazʋ yɛyɛ bulalɛ kyɛbɛ yewula yɛfa yesiyeziye yɛ nwʋ yɛma Gyehova yɩ eɣile yi. Subanɩ eyimmɔ bʋwa yɛ paa.

9. Mɩnla ɔhʋanɩ zʋ yɛ ye dedi bɔ yɛ nwʋ banɩ a?

⁹ Nɩ bulalɛ atalɩ bɔ sogyianii yɩ ahʋnlɩnɩ nwʋ banɩ. Dedi nɩɩ ɔlɔlɛ bɔ yɛ sɛnkyɩlɛdɩ ɔhʋanɩ zʋ ahʋnlɩnɩ yɩ nwʋ banɩ. Bɔbʋwa yɛ ma yɛkɔ zʋ yɛsʋ̃mɩ Nyamɩnlɩ na yedi Gyisɛsɩ mɛda. Dedi ɩma yenyia anwʋlazʋ kɛɛ sɛ yɛfa yɛ ahʋnlɩnɩ munwala yɛpɩbɛ Gyehova a, ikeyila yɛ. (Hib. 11:6) Sɛ bʋwabɩlɛ yɩ nu yɛ sɩ kɛɛ mɩnla la po a, ɩkɛhã yɛ ma yekeli Gyisɛsɩ nɔhʋanlɛ. Nnɛ, mmenii mɔɔ bɔhʋla beli nɔhʋanlɛ ɩávalɩ nwʋmɔ odwodwudiyialɛ nɩɩ ozukuasɛmɩ nu anwʋkyɩlɩ nɩ, sa yɛkʋla yesumazuma bɛ na yɛava yɛahyɛ ye dedi ɛzɩzɩbɛ. Na sa yɛkʋla yɛtwɩ̃ yɛ nwʋ wɔ asianɩ mɔɔ ozukua anyɩnlɩbʋlʋ fa ba nɩ nwʋ, iluwa bɛzabɛ mɔɔ bɛdɩdɩ nninyeni zʋ wɔ bɛ ɛbɩlawɔlɛ nu na bɛva  Bulombunlililɛ yɩ beli bɔmʋnlɩ mɔɔ yekozumazuma bɛ nɩ. b

10. Mɩnla ɔhʋanɩ zʋ yɛ ɔlɔlɛ mɔɔ yɛwɔ yɛma Nyamɩnlɩ nɩɩ mmenii mvʋlɔ nɩ bʋwa yɛ ma yɛkɔ zʋ yɛkã odwokɔba yɩ a?

¹⁰ Ɔlɔlɛ sʋ̃ nwʋ hyinyia na ama yɛahɔ zʋ yɛawɩɛnɩ na yɛama yɛ anyɩ ɩala kɛ. (Mt. 22:37-39) Nyamɩnlɩ nwʋ ɔlɔlɛ bʋwa yɛ ma yɛkã odwokɔba nɩ ɩávalɩ nwʋmɔ ndwokɔzɩzɩbɛ mɔɔ ɩkɛma yekeyiyia nɩ. (2 Tim. 1:7, 8) Mmenii mɔɔ bɛázʋ̃mɩ Gyehova po yɛdɔ bɛ, meti yɛkɔ zʋ yɛkã odwokɔba yɩ, yɛyɛ yɛ azɩlɛ-sini yi nu egyima na yeduwa foonu nɩɩ kɛlɛtahɛlɛlɛ zʋ yedi bɛ dasɩlɛ. Yɛwɔ anyɩnlɩlazʋ kɛɛ eɣile be mmenii kɛzɩnza na bɛawɔ yɩ tʋ bɛayɛ baaba.—Izi. 18:27, 28.

11. Ɔlɔlɛ mɔɔ yɛwɔ yɛma ye mmeliyema nɩ, kɛ ɩbʋwa yɛ ise a? (1 Tɛsalonikamaa 5:11)

¹¹ Ɔlɔlɛ mɔɔ yekenyia yɛkɛma mmenii nɩ, ye mmeliyema Kilisinyiamaa kɩnla nwʋ. Sɛ ‘yesizi yɛ ɔhɔnwʋmmɔ bɛ kɛnɣa na yɛbʋwa bɛ nkʋ̃kʋ̃ nkʋ̃kʋ̃’ a, nɩ yɛdaa ɔzɔ ɔlɔlɛ nɩ ali. (Kɩnga 1 Tɛsalonikamaa 5:11.) Kɛmɔ azogyiamaa bʋwa bɔ nwʋ bɔ nwʋ wɔ kʋnɛ nu nɩ, ɔzɔ la yɛ yɛhyɛ yɛ nwʋ yɛ nwʋ ɛzɩzɩbɛ a. Ɩwɔ numɔ, sogyianii be kɔhʋla kebila yɩ ɔhɔnwʋ sogyianii wɔ kʋnɛ nu, naasʋ̃ ɩlɛ́hyɛda kɛyɛ zɔ kyɩ̃. Ɔzɔ la yɛ amɩyɛ sʋ̃, yɛlɛ́hyɛda yɛkɛyɛ debe mɔɔ ɩkɛma ye mmeliyema keli ɛyɛkɛ anzɛnyɩɩ yɛlɛ́fa tanɩ yekoduwa bɛ tanɩ zʋ kakɛ. (1 Tɛs. 5:13, 15) Sɛ yɛda annidi ali yekile mmeliyema mɔɔ bekila asafʋ yɩ zʋ a, nɩ yɛdaa yɛ ɔlɔlɛ ali. (1 Tɛs. 5:12) Mmɩlɩ mɔ bɛdɩlɩ Tɛsalonika asafʋ yɩ nɩ, iátwu ɔlʋbɔ ɔkʋ̃ yɛ Pɔɔlʋ hɛlɛlɩ kɛlɛta eyi hɔ manlɩ bɛ a. Nɩ numɔ asafʋ nu mbanimbani yi béni ozumanlɛnwʋnlɛ, meti ɩkɛyɛ kɛɛ belili mfʋmɩ sʋ̃maa. Naasʋ̃, nɩ ihyinyia kɛɛ asafʋ yɩ da annidi ali kile bɛ. Mmɩlɩ mɔ anwʋhyɩlɩyɛ kezile yi ibikee nɩ, ɩsɛ kɛɛ yetiye ɔhʋanɩhilelɛ mɔɔ asafʋ nu mbanimbani kɛva kɛma yɛ nɩ paa. Ebiye a, yɛ sa ɩlɛ́kã ɔhʋanɩhilelɛ wɔ mmeliyema mɔɔ bɔwɔ oyuwadɩ munwala egyimayɛlɛ dɩka yi ti anzɛnyɩɩ Bɛtɩlɩ kɛnɩ, meti yɛ nwʋmɔ hyinyia kɛɛ yɛda ɔlɔlɛ nɩɩ annidi ali yekile asafʋ nu mbanimbani wɔ nnɛ yɩ a. Ɩávalɩ nwʋmɔ mɔɔ ikezi bela nɩ, bɛmá yɛma yɛ anyɩ ɩla kɛ na máma yɛfa yɛ adwɩnɩ yesiye be  sinidɔlɛ zʋ, mfomi yɛvá yeziye kezimɔ Gyehova iluwa Gyisɛsɩ zʋ ikilee ɔzɔ mmenyia nɔhʋanlɛmaa yɩ ɔhʋanɩ nɩ.

12. Mɩnla ɔhʋanɩ zʋ yɛ yɛ anyɩnlɩlazʋ bɔ ye nzunzunlɩyɛ nwʋ banɩ a?

¹² Kɛmɔ bulalɛ kyɛbɛ bɔ sogyianii yi ti nwʋ banɩ nɩ, yɛ nnwʋanlɩlelɛ nwʋ anyɩnlɩlazʋ yɩ bɔ ye nzunzunlɩyɛ nwʋ banɩ. Anyɩnlɩlazʋ mɔɔ numɔ yɛ sɩ mɔɔ yɛwɔ nɩ, ɩma yɛnwʋ kɛɛ mfasʋ bela íni mɔɔ oyuwadɩ nɩ kɛva kɛma yɛ nɩ zʋ. (Fɩl. 3:8) Yɛ anyɩnlɩlazʋ yɩ bʋwa yɛ ma yekyina pindinyii na yɛ ahʋnlɩnɩ tɔ ye kunlu. Ɔzɔ pɛpɛɛpɛ yɛ Wallace nɩɩ Laurinda mɔɔ bɔsʋ̃mɩ wɔ Africa nɩ ɣa nwʋnlɩ yɩ a. Wɔ dapɛnɩ asã pɛ nu nɩ, ɔkʋ̃ yɩ maamɩ wuli yɛɛ ɔkʋ̃ sʋ̃ yɩ papa wuli a. Na iluwa COVID-19 adimakɛlɛ yɩ ti, bɛákʋla bɔkɔ awudo bɔkɔ bekyela bo mmusunwamaa. Wallace hɛlɛlɩ kɛɛ: “Awudunwolɩyɛ nwʋ anyɩnlɩlazʋ yɩ bʋwa mɩ ma mɩáva mɩ adwɩnɩ misiye kezimɔ nɩ bɔ bʋwabɩlɛ dɩ ansaana bɛbawu nɩ zʋ, mfomi mɩfa mɩ adwɩnɩ misiye kezimɔ bɔ bʋwabɩlɛ kɛyɛ wɔ oyuwadɩ fʋlɔ yi nu nɩ zʋ. Anyɩnlɩlazʋ eyi ma mɩ ahʋnlɩnɩ tɔ mu kunlu mmɩlɩ mɔ alɔbɔlilɛ hyɛ mʋ zʋ anzɛnyɩɩ mʋ dɔvʋlɔ be yi owulo nwʋ odwokɔ ɣa mi ti nu nɩ.”

13. Mɩnla yɛ yɛkɔhʋla yɛkɛyɛ na ama yeanyia sunzuma nwanzanwanza yɩ a?

¹³ “Máma mʋnlʋmmɔ bɛma Sunzuma Nwanzanwanza mɔɔ ɩwɔ mʋnlʋmmɔ bo nu nɩ inu.” (1 Tɛs. 5:19) Pɔɔlʋ hanlɩ kɛɛ sunzuma nwanzanwanza yɩ dɩ kɛɛ sɩnɩ be mɔɔ ɩwɔ ye nu. Sɛ yɛwɔ Nyamɩnlɩ yi sunzuma yɩ a, ɩma yɛfa ɛhyɩmɛ yɛyɛ mɔɔ ɩdɩ baaba na ɩma yenyia anwʋzɩzɩbɛ yɛfa yɛyɛ Gyehova yi egyima yɩ. (Wul. 12:11) Mɩnla yɛ yɛkɛyɛ na yeanyia sunzuma nwanzanwanza yɩ a? Sa yɛkʋla yɛbɔ mpayɩ, yesuma Nyamɩnlɩ Odwokɔ yɩ na yɛ nɩɩ yɩ ahyɩhyɛdɩ mɔɔ ɩfa yi sunzuma ikile yɩ ɔhʋanɩ nɩ bɔ. Sɛ yɛyɛ zɔ a, ɩkɔwʋwa yɛ ma yekenyia ‘sunzuma yɩ mma nɩ.’—Gal. 5:22, 23.

14. Sɛ yɛkɔhɔ zʋ yekenyia Nyamɩnlɩ yi sunzuma yɩ a, mɩnla yɛ íni kɛɛ yɛyɛ a? (Kila mfonyini yi sʋ̃.)

¹⁴ Sɛ Nyamɩnlɩ fa yi sunzuma nwanzanwanza yɩ ɩma yɛ a, ɩsɛ kɛɛ yekila bʋwɔ paa na ‘yɛánlumanlɩ sunzuma nwanzanwanza yɩ  sɩnɩ yɩ.’ Nyamɩnlɩ fa yi sunzuma yɩ ma bɛzabɛ mɔɔ bɛma bo nzunzunlɩyɛ nɩɩ bɛ nyɛlɩyɛ nwʋ tɩ nkʋ̃ la. Sɛ yɛdwɩnɩndwɩnɩ nninyeni mɔɔ nwʋmɔ ɩádɩ nwʋ na yɛfa yɛ nwʋ yewula nu a, ɩkɛyɩ yi sunzuma yɩ wɔ yɛ zʋ. (1 Tɛs. 4:7, 8) Akʋ̃ sʋ̃, ‘íni kɛɛ yebu nkɔmɩhyɛ azʋlɔtʋ kɛɛ ndwokɔ mbʋanlɩ.’ (1 Tɛs. 5:20) “Nkɔmɩhyɛ” kile ndwokɔ mɔɔ Nyamɩnlɩ luwa yi sunzuma yɩ zʋ ɩva ɩma yɛ, mɔɔ Gyehova yɩ eɣile yi nɩɩ kezimɔ ɩpɛɛ ndɛmɩ ɩkɛɣa yɩ sʋ̃ kɩnla nwʋmɔ. Yɛáwu yɛ anyɩ yekua Gyehova yɩ eɣile yi zʋ na yeányia adwɩnɩ kɛɛ Amagadɔnʋ ɩlɛ́ba wɔ yɛ mmɩlɩ zʋ. Mfomi yɛma ɩbʋwa yɛ adwɩnɩ nu kɛɛ ɩlɛ́kyɛ na yɩ eɣile yi ɩaɣa, iluwa yɛ ɛbɩlawɔlɛ mɔɔ yɛma nwʋmɔ tɩ nɩɩ yɛ nwʋ mɔɔ yetu yɛma ‘Nyamɩnlɩ yi egyima’ eɣile bela nɩ zʋ.—2 Pit. 3:11, 12.

15. Kɛ ɩkɛyɛ na azunzuma evinli bɛ awohwi ndwokɔ nɩɩ nnahɩlɩbɛ yɩ iányianlɩ yɛ a? (1 Tɛsalonikamaa 5:21)

¹⁵ Ɩlɛ́kyɛ bela, Nyamɩnlɩ yɩ adamvʋlɔ kɛhã kɛɛ “Akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ!” (1 Tɛs. 5:3) Azunzuma evinli kɛma awohwi ndwokɔ kɛhyɛ azɩlɛ yɩ zʋ manlɩ na boluwa zʋ bɛalahɩlɩ mmenii sʋ̃maa. (Yik. 16:13, 14) Na amɩyɛ sʋ̃ ɛ? Sɛ ‘yetwe nninyeni munwatĩĩ yekila’ a, ɩlɛ́ma bɛkɛlahɩlɩ yɛ. (Kɩnga 1 Tɛsalonikamaa 5:21.) Giliki odwokɔpɔkɔ mɔɔ bekile yɩ tʋ “bodwé behila nɩ,” nɩ bɛfa bedi egyima mmɩlɩ mɔ botwee goodu anzɛnyɩɩ dwɛtɛ bekehila kɛɛ ɩdɩ baaba nɩ. Meti ɩsɛ kɛɛ yetwé nninyeni mɔɔ yetiye nɩɩ mɔɔ yɛkɩnga nɩ yekila kɛɛ ɩdɩ baaba a. Nɩ ihyinyia paa kɛɛ Tɛsalonikamaa nɩ yɛ zɔ, na nwʋmɔ kehyinyia paa kɛɛ amɩyɛ sʋ̃ yɛyɛ zɔ titili mmɩlɩ mɔ yebikee anwʋhyɩlɩyɛ kezile yi nɩ. Kɛ ankɩ yekele ndwokɔ mɔɔ mmenii kã munwala yekeli nɩ, yɛfa yɛ adwɩnɩ yɛyɛ egyima mfomi. Yɛfa mɔɔ yɛkɩnga nɩɩ mɔɔ yɛtɩ nɩ yetindiã mɔɔ Bayɩbʋlʋ nɩɩ Gyehova ahyɩhyɛdɩ yɩ kã nɩ nwʋ. Sɛ yɛyɛ zɔ a, ɩlɛ́ma azunzuma evinli yi bɛ nnahɩlɩbɛ ndwokɔ yɩ kenyia yɛ kyɩ̃.—Ɛɣɛ. 14:15; 1 Tim. 4:1.

16. Mɩnla anyɩnlɩlazʋ yɛ yɛwɔ a, na mɩnla yɛ ɩma yesi yɛ kɛnɣa kɛɛ yɛkɛyɛ a?

¹⁶ Kɛ okuwu nɩ, yezi kɛɛ Gyehova kele yi mmenii wɔ anwʋhyɩlɩyɛ kezile yi nu. Naasʋ̃, kɛ mmenii nkʋ̃kʋ̃ nɩ yézi mɔɔ ikezi wɔ ɛhyɩ̃. (Gye. 4:14) Sɛ yekodua anwʋhyɩlɩlɛ kezile yi o, sɛ yekowu ansaana o, sɛ yɛkɔ zʋ yedi nɔhʋanlɛ a yekenyia nnwʋanlɩ mɔɔ íni awielɩyɛ. Bɛzabɛ mɔɔ bɔvɔ ngɔlɔ bɛ nɩ, bɛ nɩɩ Kɩlayɩsɩ kɔwʋwa sʋlɔ. Na mmuwuanɩ mvʋlɔ yɩ sʋ̃ kɔwʋwa paladayɩsɩ azɩlɛ yɩ zʋ. Ɩɣɩlá kɛɛ yɛkɛva yɛ adwɩnɩ yekeziye yɛ anyɩnlɩlazʋ kɩnlɩma yɩ zʋ na yɛaziyeziye yɛ nwʋ yɛama Gyehova yɩ eɣile yi!