1. Mɩnla yɛ awʋvʋlɔ bɛpɩbɛɛ bɛkɛma bo nnwuakula a?

 AWƲVƲLƆ, yezi kɛɛ bɛpɛ kɛɛ bɔbʋwa bo nnwuakula ma bɛba bɔnwʋ Gyehova na bɔdɔ yɩ. Naasʋ̃ yɛlɔ́kʋla yɛkɛva yɛ anyɩ yɛkɔnwʋ Nyamɩnlɩ. Sɛ ɔzɔ a, kɛ ɛkɛyɛ na wʋawʋwa wu nnwuakula ma bɛanwʋ yɩ kɛɛ ɩdɩ abiye mɔɔ ɩwɔ kɛnɩ ankasa na bɛahwɩ̃ bɛaɣike yɩ a?—Gye. 4:8.

2. Kɛ ɩkɛyɛ na awʋvʋlɔ bɛahile bo nnwuakula Gyehova yi subanɩ nwʋ dɩyɛ a?

² Ɔhʋanɩ ɔkʋ̃ mɔɔ ɔkɔhʋla okoluwa zʋlɔ kɔwʋwa wu nnwuakula ma bekeɣike Gyehova yɛ lɛ kɛɛ ɛ nɩɩ bɛ kozuma Bayɩbʋlʋ yɩ. (2 Tim. 3:14-17) Naasʋ̃, Bayɩbʋlʋ yɩ ɩma yɛnwʋ ɔhʋanɩ ɔkʋ̃ sʋ̃ mɔɔ nnwuakula kɔhʋla koluwa zʋlɔ kozuma Gyehova nwʋ dɩyɛ. Wɔ Ɛɣɛlɛwulɛ buuku yi nu nɩ, ɛzɩlɛ be hakɛlɩ yɩ ɣa kɛɛ áma ɩyɩ yɩ anyɩ wɔ Gyehova yi subanɩ mɔɔ ɩda ali wɔ abɔdɩ nu nɩ zʋ. (Ɛɣɛ. 3:19-21) Yɛbahila ɔhʋanɩ azʋlɔtʋ mɔɔ awʋvʋlɔ kɔhʋla koluwa abɔdɩ zʋ kɔwʋwa bo nnwuakula ma bokozuma Gyehova yi subanɩ nwʋ dɩyɛ.

3. Mɩnla mmʋwalɩyɛ yɛ ɩsɛ kɛɛ awʋvʋlɔ fa ma bo nnwuakula a?

³ Bayɩbʋlʋ yɩ kã kɛɛ “Ɔzʋmɩ kɛɛ Nyamɩnlɩ ɩwɔlɩ oyuwadɩ nɩ, yɛ ɩwɔlɩ yɩ tʋ kɛɛ ɩyɩɩ yi subanɩ nɩ mɔɔ bɛánwʋ yɩ nɩ ali ikehile mmenii a.” (Wul. 1:20) Awʋvʋlɔ, yede yedi kɛɛ bɛ anyɩ de kɛɛ bɛ nɩɩ bo nnwuakula kodu mpasa. Sɛ ɛ nɩɩ wu nnwuakula botuu mpasa a, bʋwa bɛ ma bɔnwʋ kezimɔ “nninyeni mɔɔ Nyamɩnlɩ ɩwɔ nɩ” ɩda yi subanɩ ngɩnlɩma nɩ mmɔ ali. Bɛmá yehila kezimɔ awʋvʋlɔ kɔhʋla kozuma debe wɔ kezimɔ Gyisɛsɩ ihilehileli nɩ nu.

4. Mɩnla ɔhʋanɩ zʋ yɛ Gyisɛsɩ luwalɩ abɔdɩ zʋ ihilehileli yɩ adʋwavʋlɔ yɩ a? (Luuku 12:24, 27-30)

 ⁴ Yɛ kezimɔ Gyisɛsɩ luwalɩ abɔdɩ zʋ hilehileli nɩ ndwɩ. Eɣile ɔkʋ̃ be ɩhã ihileli yɩ adʋwavʋlɔ nɩ kɛɛ behila ahwanzɩlɛ nɩɩ fɩlawɛsɩ. (Kɩnga Luuku 12:24, 27-30.) Ankɩ Gyisɛsɩ kɔhʋla kɛhã ɛnlamɩ anzɛnyɩɩ nnuwalɩba mvʋlɔ nwʋ odwokɔ naasʋ̃ ɩhanlɩ anlʋma nɩɩ fɩlawɛsɩ mɔɔ yɩ adʋwavʋlɔ yɩ zi paa nɩ nwʋ odwokɔ. Ɩkɛyɛ kɛɛ nɩ adʋwavʋlɔ yɩ nwʋ ahwanzɩlɛ kɛɛ bodu boluwaa oyumi nɩɩ fɩlawɛsɩ kɛɛ bobukobuko wɔ ndibe yi nu. Mɔwʋ tua nwʋmɔ mfonyini kila kɛɛ Gyisɛsɩ ɩtɩndɛɛ yɩ munwala nɩ ɩtɩnyɛdɩnyɛ yɩ sa wɔ ahwanzɩlɛ nɩɩ fɩlawɛsɩ nɩ mmɔ zʋ. Mmɩlɩ mɔ ɩhanlɩ nninyeni eyimmɔ nwʋ odwokɔ iwieli nɩ, mɩnla yɛ ɩyɛlɩ a? Ihileli yɩ adʋwavʋlɔ yɩ ozumalɛdɩyɛ kezile be mɔɔ ɩfalɩ bɔ sʋlɔ Ɛzɩlɛ yɩ kunlumiba nɩɩ yɩ baabayɛlɛ nwʋ: Ɩmanlɩ bɔnwʋnlɩ kɛɛ Gyehova kɛma yɩ azʋ̃mɩvʋlɔ nɔhʋanlɛmaa alɩyɛ nɩɩ ntalɩ kɛmɔ ɩyɛ ɩma ahwanzɩlɛ nɩɩ fɩlawɛsɩ nɩ.

5. Mɩnla abɔdɩ nu nninyeni yɛ awʋvʋlɔ kɔhʋla kɛva kehilehile bo nnwuakula Gyehova nwʋ dɩyɛ a?

⁵ Awʋvʋlɔ, kɛ ɩkɛyɛ na bɛazumazuma Gyisɛsɩ mmɩlɩ mɔ bekilehilee bo nnwuakula nɩ a? Ebiye a, sa ɔkʋla ɛkã debe mɔɔ wʋ anyɩ deli nwʋmɔ wɔ abɔdɩ nu dɩkɛɛ ɛnlamɩ anzɛnyɩɩ nnuwalɩba nwʋ odwokɔ ekile wu nnwuakula. Mmɩlɩ mɔ ɛyɛɛ zɔ nɩ ma bɔnwʋ mɔɔ ikilehile yɛ ɩfalɩ Gyehova nwʋ. Owie yɩ a, ma yɩzayɩ sʋ̃ ɩhã ɛnlamɩ anzɛnyɩɩ nnuwalɩba mɔɔ yɩ anyɩ deli nwʋmɔ paa nwʋ odwokɔ ihile wʋ. Sɛ ɛ nɩɩ wʋ ɣa yɩ bɔ nninyeni mɔɔ yɩ anyɩ deli nwʋmɔ wɔ abɔdɩ nu nwʋ nkɔmmɔ a, ɩkɛma wʋ ɣa nɩ kediye wʋ mmɩlɩ mɔ ekilehilee yɩ Gyehova nwʋ dɩyɛ nɩ.

6. Mɩnla yɛ yɛkɔhʋla yekozuma wɔ Christopher yɩ maamɩ yɩ ndianwʋ yi nu a?

⁶ Asʋ̃ ɩsɛ kɛɛ awʋvʋlɔ de mmɩlɩ yɛ ɛbɩbɛlɛnu falɩ ɛnlamɩ anzɛnyɩɩ nnuwalɩba pɔkyɩɩ be nwʋ ansaana bɛ nɩɩ bo nnwuakula bɛazunzu mɔɔ ikilehile yɛ ɩfalɩ Gyehova nwʋ a? Ɩáhyɛda ihyinyia. Iluwakɛɛ Gyisɛsɩ ɩákã debe tɩndɩnlɩ bela falɩ kezimɔ ahwanzɩlɛ di alɩyɛ nɩɩ kezimɔ fɩlawɛsɩ nyi nɩ nwʋ. Ebiye a ɩwɔ numɔ la a, wʋ ɣa nɩ yɩ anyɩ keleli nwʋmɔ kɛɛ ikozuma abɔdɩ nwʋ nninyeni ɩkɔhɔ aɣinzi, naasʋ̃ ɩyɛ a odwokɔ ɛgyɩkɩ̃ɩ̃ be mɔɔ ɛkɛhã nɩ yɛ ɩkɛma ɩkɛdɩ mɔɔ ekilee nɩ tʋ a. Eliyema benyia be mɔɔ bɔfʋlɔ yɩ Christopher kakɛ mɔɔ izili wɔ yɩ nnwuakula nu. Ɩhanlɩ kɛɛ: “Nɩ mɩ maamɩ hyɛda kã ndwokɔ be mɔɔ ɩbʋwa ma yesuma debe wɔ abɔdɩ mɔɔ idua yɛ nwʋ iyiyia nɩ nu. Kɛ ndianwʋ nɩ, sɛ yɛkɔ dɩka mɔɔ avile wɔ a, nɩ ɩkã kɛɛ: ‘Kila kezimɔ avile yɩ ɩdɩdɩ nɣezi na ɩyɛ kɩnlɩma! Wʋánwʋ kɛɛ Gyehova yɩ nwʋ yɛ nnwʋánlɩ a?’ Anzɛnyɩɩ sɛ yɛkɔ ngyemvile munwa a, nɩ ɩkã kɛɛ: ‘Kila kezimɔ azʋlɔkɩ yɩ ɩbɔɔ ɛzɩzɩbɛ ɛzɩzɩbɛ! Wʋánwʋ kɛɛ Nyamɩnlɩ yi tumi dɩ kezi a?’” Christopher ɩhanlɩ kɛɛ: “Nɩ ɔzɔ ndwokɔ yɩ ɩma yesunzu nninyeni nwʋ yɛkɔ aɣinzi na inyianlɩ yɛ zʋ tumi baaba.”

7. Mɩnla ɔhʋanɩ zʋ yɛ ɔkɔhʋla kehilehile wu nnwuakula ma bokozunzu abɔdɩ nwʋ a?

⁷ Mmɩlɩ mɔ wu nnwuakula benyii nɩ sa ɔkʋla ɔbʋwa bɛ ma bɛzabɛ bosunzu abɔdɩ nwʋ na bɛava bɛazuma Gyehova nwʋ dɩyɛ. Sa ɔkʋla kã Gyehova yɩ abɔdɩ nwʋ odwokɔ na wʋaɣizia nnwuakula yɩ kɛɛ, “Mɩnla yɛ eyi ikilehile wʋ ɩfalɩ Gyehova nwʋ a?” Mɔɔ ebiye a bɛkɛhã bekehile wʋ nɩ sa ɩyɛ wʋ asibɔnwʋ.—Mt. 21:16.   

8. Mɩnla ɔnwʋmɔ ɔhʋanɩ yɛ nɩ Yizilayamaa awʋvʋlɔ bɔwɔ mmɩlɩ mɔ boluwaa “ɔhʋanɩ zʋ” a?

⁸ Bɛhã behileli Yizilayamaa awʋvʋlɔ kɛɛ bɛvá ndwokɔ mɔɔ ɩwɔ Gyehova yɩ mmɛla yi nu behilehile bo nnwuakula “mmɩlɩ mɔ boluwaa ɔhʋanɩ zʋ.” (Dit. 11:19) Nɩ ahʋanɩ sʋ̃maa lɩla Yizilaya nzuwalɩyɛ. Sɛ nɩ oluwaa ɔhʋanɩ  yi nu a nɩ ɔnwʋ nnamɩ, nnʋma nɩɩ fɩlawɛsɩ azʋlɔtʋ. Meti sɛ nɩ Yizilayamaa mmusunwa be boluwaa ahʋanɩ eyimmɔ zʋ a, nɩ awʋvʋlɔ yɩ benyia ɔnwʋmɔ ɔhʋanɩ mɔɔ bɛkɛva bɛkɛhã Gyehova yɩ abɔdɩ nwʋ odwokɔ bekehile bo nnwuakula. Mʋnlʋmmɔ awʋvʋlɔ sʋ̃ bɔwɔ ɔnwʋmɔ ɔhʋanɩ ɔkʋ̃ yɩ la kɛɛ bokoluwa abɔdɩ zʋ bekehilehile bo nnwuakula. Kila kezimɔ awʋvʋlɔ be bɔhʋla bɛyɛ zɔ.

9. Mɩnla yɛ ɔkɔhʋla kozuma wɔ Punitha nɩɩ Katya bɛ kɛ a?

⁹ Punitha dɩ enlinlɛ be mɔɔ ɩda twonwa kezile be nu wɔ India. Ɩhanlɩ kɛɛ: “Sɛ yɛkɔ yekyela ye mmusunwamaa wɔ suwa yɩ a, yebu yɩ kɛɛ ɩdɩ ɔnwʋmɔ ɔhʋanɩ mɔɔ yɛkɔhʋla yɛkɛva yekehilehile ye nnwuakula Gyehova yɩ abɔdɩ mɔɔ ɩyɛ nnwʋánlɩ nɩ nwʋ dɩyɛ. Mɩtɩ nɣanlɩ kɛɛ sɛ mu nnwuakula yɩ bɔzʋ twonwa kezile mɔɔ nnɔmɩ yɛ numɔ manlɩ yi nu bɛyɩ bɔ nwʋ ɛgyɩkɩ̃ɩ̃ a, ɩbʋwa bɛ ma bɛtɩ abɔdɩ tʋ bʋwɔ.” Awʋvʋlɔ, sɛ bɛ nɩɩ bo nnwuakula bo numɔ kɔ dɩka mɔɔ abɔdɩ mɔɔ ɩyɛ pɩkɛ wɔ a, bɛ ɛɣɛɛlɛ iléfi kyɩ̃. Eliyema baalɛ Katya mɔɔ ɩzʋ̃ Moldova nɩ hanlɩ kɛɛ: “Mɔɔ mɩkakɛ wɔ mu nnwuakula nu paa yɛ lɛ mmɩlɩ mɔ mɩ nɩɩ mɩ awʋvʋlɔ hɔlɩ suwa yɩ nɩ. Ɩyɛ mɩ fɛ paa kɛɛ mɩ awʋvʋlɔ hilehileli mɩ wɔ mu nnwuakula nu kɛɛ ɩyɛ a, migyina na muzunzu Gyehova yɩ abɔdɩ nwʋ na ama mɩanwʋ yi subanɩ azʋlɔtʋ nɩ.”

10. Sɛ ɩyɛ sɩ ɩma awʋvʋlɔ kɛɛ bɔkɔhɔ bekegyela nnɩka mvʋlɔ a, mɩnla yɛ bɔkɔhʋla bɛkɛyɛ a? (Kila alɩka mɔɔ ise “ Mmʋwalɩyɛ Ma Awʋvʋlɔ.”)

¹⁰ Na sɛ ɔlɔ́kʋla okodu ɔhʋanɩ ɔkɔhɔ suwa yɩ sʋ̃ ɛ? Amol mɔɔ mɛyɩ sʋ̃ ɩda India nɩ hanlɩ kɛɛ: “Dɩka mɔɔ mɩda nɩ ɩsɛ kɛɛ awʋvʋlɔ fa dɔnɩhwɩlɩ sʋ̃maa yɛ egyima, na sɛ abiye kã kɛɛ ituu ɔhʋanɩ kɔhɔ suwa yɩ a, kakɛ nkʋ̃. Naasʋ̃ sɛ yenyia paakɩ ɛgyɩkɩ̃ɩ̃ be zʋ yɛkɔ yɛbʋwa a, yɛkʋla yekila abɔdɩ na yɛkã Gyehova yi subanɩ nwʋ odwokɔ.” Sɛ etiã wʋ anyɩ azɩ a, ebiye a ɔkɔnwʋ abɔdɩ nu nninyeni sʋ̃maa wɔ wʋ apaa yi nu mɔɔ ɔkɔhʋla kɛva kehilehile wu nnwuakula. (Ndw. 104:24) Ebiye a, ɔkɔnwʋ nnʋma, mmʋwaba ngyɩkɩ̃ɩ̃ ngyɩkɩ̃ɩ̃, nnuwalɩba nɩɩ mɔɔ  ɩkɩnlahɩnla nwʋ. Karina mɔɔ ɩzʋ̃ Germany nɩ hanlɩ kɛɛ: “Mɩ maamɩ yɩ anyɩ deli fɩlawɛsɩ nwʋ paa, meti mɩdɩ kuakula nɩ, sɛ nɩ yetuu mpasa na ɩnwʋ fɩlawɛsɩ be mɔɔ ɩyɛ pɩkɛ a, nɩ ɩkã kɛɛ mihilá.” Awʋvʋlɔ, sa bɔkʋla bɛfa vidiyo azʋlɔtʋ nɩɩ awuuku mɔɔ ɩfalɩ abɔdɩ nwʋ mɔɔ ahyɩhyɛdɩ nɩ ɩyɛ nɩ bekilehile bo nnwuakula. Nyɛ, dɩka mɔɔ ɛda bela nɩ, sa ɔkʋla bʋwa wu nnwuakula ma bosunzu Nyamɩnlɩ yɩ abɔdɩ nwʋ. Kakɩ yɩ, bɛmá yezunzu Gyehova yi subanɩ azʋlɔtʋ mɔɔ sa ɔkʋla ɔtwɩ̃ wu nnwuakula yɩ bɛ adwɩnɩ esiye zʋlɔ nɩ be nwʋ.

11. Kɛ ɩkɛyɛ na awʋvʋlɔ bɛahilehile bo nnwuakula ma bɛanwʋ kɛɛ Gyehova dɔ yɛ a?

¹¹ Mɔɔ ɩkɛyɛ na wʋawʋwa wu nnwuakula ma bɛanwʋ Gyehova yɩ ɔlɔlɛ nɩ, sa ɔkʋla ɔtwɩ̃ bɛ adwɩnɩ esiye kezimɔ nnamɩ zʋ̃ ɔlɔlɛ nu kila bo nnwuakula nɩ zʋ. (Mt. 23:37) Sa ɔkʋla sʋ̃ kã abɔdɩ nu nninyeni azʋlɔtʋ mɔɔ yɛwɔ nɩ nwʋ odwokɔ ekile bɛ. Karina mɔɔ yeli bɔmʋnlɩ yɛhã yɩ odwokɔ yɩ hanlɩ kɛɛ: “Sɛ mɩ nɩɩ mɩ maamɩ yetuu mpasa a, nɩ ɩhyɛ mɩ ɛzɩzɩbɛ kɛɛ migyina na mihilá kezimɔ fɩlawɛsɩ bela dɩ sʋnʋnkʋ̃ na yɩ pɩkɛ da Gyehova yɩ ɔlɔlɛ ali nɩ. Alʋbɔ sʋ̃maa dua nu naasʋ̃ mɩlanwʋ la mitiã mɩ anyɩ azɩ mikila fɩlawɛsɩ azʋlɔtʋ nɩɩ kezimɔ ɩyɛ pɩkɛ nɩ. Ɩkɔ zʋ ɩkakɛ mɩ kɛɛ Gyehova dɔ yɛ paa.”

12. Kɛ ɩkɛyɛ na awʋvʋlɔ bɛawʋwa bo nnwuakula ma bɛanwʋ Nyamɩnlɩ nɣɛlɛbɛ a? (Ndwomi 139:14) (Kila mfonyini yi sʋ̃.)

¹² Bʋwa wu nnwuakula ma bɔnwʋ Nyamɩnlɩ yɩ nɣɛlɛbɛ. Gyehova izi nɣɛlɛbɛ ɩtɛla yɛ kʋlaa kʋlaa. (Wul. 11:33) Kɛ ndianwʋ nɩ, sa ɔkʋla ɔtwɩ̃ bɛ adwɩnɩ esiye kezimɔ nzulo danɩ mununkumi wɔ oyumi nɩɩ kezimɔ ɔzɔ mununkumi yi kodi dɩka fʋlɔ mɔɔ ɩávɛ kʋlaa nɩ zʋ. (Dwb. 38:36, 37) Sa ɔkʋla sʋ̃ kã kezimɔ bɛhyɩhyɛ ye eniiwudo yi wɔ nnwʋánlɩ ɔhʋanɩ zʋ nwʋ odwokɔ (Kɩnga Ndwomi 139:14.) Kila kezimɔ Ɛzɩlɛ be mɔɔ bɔfʋlɔ yɩ Vladimir yɛlɩ zɔ. Ɩhanlɩ kɛɛ: “Eɣile ɔkʋ̃ be, nɩ yɛ ɣa benyia itwuu baskɩlɩ yɛ ɩdɔlɩ azɩ ibilalɩ a. Aɣile ɛgyɩkɩ̃ɩ̃ be mɛda nɩ yɩ ɛhamɛ nɩ hɔlɩ. Mɩ nɩɩ mɩ yɩ hilehileli numɔ hileli yɩ kɛɛ, kezimɔ Gyehova wɔlɩ ye eniiwudo yɩ nɩ ɩma yɩzayɩ ɩkʋla isiyeziye yɩ nwʋ. Akʋ̃ yɛhwɩnlɩ yɩ adwɩnɩ yeziyeli zʋlɔ kɛɛ yɛánwʋ eyi numɔ bela wɔ nninyeni mɔɔ adasamaa bɛyɛ nɩ nu. Kɛ ndianwʋ nɩ, sɛ kaalɩ bɛ nyia asɩdɛntɩ a, yɩzayɩ ɩáhʋla  isiyeziye yɩ nwʋ. Eyi ɩwʋwalɩ yɛ ɣa yɩ ma ɩdɩlɩ Gyehova nɣɛlɛbɛ tʋ.”

13. Kɛ ɩkɛyɛ na awʋvʋlɔ bɛawʋwa bo nnwuakula ma bɛanwʋ Nyamɩnlɩ yi tumi a? (Ayɩzaya 40:26)

¹³ Gyehova kã kile yɛ kɛɛ yebigyia yɛ anyɩ na yehila sʋlɔ na yɛdwɩnɩndwɩnɩ kezimɔ yi tumi mɔɔ ɩyɛ nnwʋánlɩ nɩ ɩbʋwa ma nninyeni kɔlɩ ɔzʋlɔ wɔ amansɔnɩ yi nu. (Kɩnga Ayɩzaya 40:26.) Sa ɔkʋla ɛhyɛ wu nnwuakula ɛzɩzɩbɛ ma bekila oyumi na bɛadwɩnɩndwɩnɩ mɔɔ bɔnwʋ yɩ nɩ nwʋ. Eliyema baalɛ be mɔɔ ɩzʋ̃ Taiwan mɔɔ bɔfʋlɔ yɩ Tingting kakɛ mɔɔ izili wɔ yɩ nnwuakula nu. Ɩhanlɩ kɛɛ: “Eɣile ɔkʋ̃ nunuma mɩ nɩɩ mɩ maamɩ vindenli hɔ hilalɩ ahɔnlɔnwa yɩ. Nɩ twonwa yi nu ahɩnlanɩyɛ bela íni kɛnɩ, meti nɩ yɛkʋla yɛnwʋ ahɔnlɔnwa yɩ bʋwɔ. Ɔzɔ mmɩlɩ yɩ, nɩ mɩáhʋla mʋnwʋ yɩ kɛɛ sɛ mʋkɔhʋla mʋkɔzʋ̃mɩ Gyehova wɔ nɔhʋanlɛ nu a, iluwakɛɛ nɩ mɩ atipɛnɩmaa bɛhyɛɛ mʋ zʋ. Mɩ maamɩ hanlɩ kɛɛ mʋdwɩnɩndwɩnɩ tumi kezile mɔɔ Gyehova ɩva ɩwɔlɩ ɔzɔ ahɔnlɔnwa yɩ munwala nwʋ na mɩhakɛ́ kɛɛ, sa ɩkʋla ɩfa ɔzɔ tumi nɩ ɩbʋwa mɩ ma mikyina odwohilalɛ bela munwa. Muzunzunli abɔdɩ nwʋ muwieli wɔ ɔzɔ eɣile yɩ nɩ, ɩhanlɩ mɩ ma mʋnwʋnlɩ Gyehova bʋwɔ na mɩhyɛlɩ mɩ kɛnɣa mɔɔ mizi kɛɛ mʋkɔzʋ̃mɩ yi nu ɛzɩzɩbɛ.”

14. Kɛ ɩkɛyɛ na awʋvʋlɔ bɛaluwa abɔdɩ zʋ bɛahilehile bo nnwuakula ma bɛanwʋ yɩ kɛɛ Gyehova dɩ anyɩnlɩlelɛ Nyamɩnlɩ a?

¹⁴ Nninyeni mɔɔ Gyehova ɩwɔ nɩ idi dasɩlɛ kɛɛ yɩ anyɩ de na ɩpɛ kɛɛ amɩyɛ sʋ̃ yɛ anyɩ de. Sayɩnsɩmaa nwʋ kɛɛ nnamɩ sʋ̃maa di ɛɣɛlɛ, mɔɔ nnʋma nɩɩ egyeni sʋ̃ kɩnla nwʋmɔ. (Dwb. 40:20)Sɛ wu nnwuakula nwʋ kɛɛ ɛnlamɩ be idii ɛɣɛlɛ a ɩyɛ a bɛsɩlɩ a? Ebiye a bɔnwʋ yɩ kyɩ̃ kɛɛ nhyʋwa mmalɛ anwɩ̃ anzɛnyɩɩ kuusu bedii ɛɣɛlɛ. Eɣile fʋlɔ mɔɔ ɔkɔnwʋ kɛɛ wu nnwuakula bɛsɩlɩɩ mmɩlɩ mɔ nnamɩ be bedii ɛɣɛlɛ nɩ, bʋwa bɛ ma bɔnwʋ kɛɛ yɛsʋ̃mɩ anyɩnlɩlelɛ Nyamɩnlɩ.—1 Tim. 1:11.

15. Mɩnla yɛ ɩkɔwʋwa awʋvʋlɔ ma bɔkɔnwʋ mɔɔ ɩwɔ bo nnwuakula bɛ adwɩnɩ nu a? (Ɛɣɛlɛwulɛ 20:5) (Kila mfonyini yi sʋ̃.)

¹⁵ Ɩyɛ a ɩyɛ sɩ ɩma awʋvʋlɔ kɛɛ bɛ nɩɩ bo nnwuakula kɔwɔ ɔhawʋ mɔɔ beyiyiaa nwʋ nkɔmmɔ. Sɔ ɔzɔ yɛ ɩdɩ wɔ wʋ ɔfʋã nu a, ikehyinyia kɛɛ okodwu wu nnwuakula bɛ ahʋnlɩnɩ nu.  (Kɩnga Ɛɣɛlɛwulɛ 20:5.) Awʋvʋlɔ be nwʋ kɛɛ sɛ bɛ nɩɩ bo nnwuakula bo numɔ kila abɔdɩ a, ɩáyɛ sɩ kɛɛ bɛ nɩɩ bo kozunzu nninyeni nwʋ. Mɩnla ti a? Sianti ɔkʋ̃ yɛ lɛ kɛɛ, wɔ ɔzɔ mmɩlɩ nɩ nninyeni sʋ̃maa ɩáhwɩnhwɩ nnwuakula nɩɩ awʋvʋlɔ yɩ bɛ adwɩnɩ. Ɛzɩlɛ be mɔɔ ɩwɔ Taiwan mɔɔ bɔfʋlɔ yɩ Masahiko hanlɩ sianti fʋlɔ be. Ɩhanlɩ kɛɛ: “Sɛ yɛ nɩɩ nnwuakula yɩ finde kɔ tu mpasa anzɛnyɩɩ yɛkɔ yeduwaduwa ngyemvile yi munwa a, ɩma bɛ ahʋnlɩnɩ tɔ bo kunlu. Meti ɩáyɛ sɩ kɛɛ yɛ nɩɩ bo kozunzu nninyeni nwʋ na yɛanwʋ mɔɔ ɩwɔ bɛ adwɩnɩ nu.” Katya, mɔɔ yeli bɔmʋnlɩ yɛhã yɩ odwokɔ nɩ hanlɩ kɛɛ: “Sɛ mʋpɔ sukuulu a, nɩ mɩ maamɩ fa mʋ kɔ paakɩ kɩnlɩma be zʋ. Sɛ yɛkɔ dɩka kɩnlɩma be zɔ a, ɩáyɛ sɩ ɩma mɩ kɛɛ mɩkɛhã mɔɔ ɩhɔlɩ zʋlɔ wɔ sukuulu nu anzɛnyɩɩ mɔɔ ididee mɩ nwʋ odwokɔ mikehile yɩ.”       

16. Mɩnla ɔhʋanɩ zʋ yɛ mmusunwa kɔhʋla kɛva nninyeni mɔɔ Gyehova ɩwɔ nɩ kele bɛ anyɩ a?

¹⁶ Sɛ mmusunwamaa bɔ numɔ fa Gyehova yɩ abɔdɩ de bɛ anyɩ a, ɩkɛma bɛkɛhyɛ bɛ avinli abusunwawɔlɛ nu ɛzɩzɩbɛ. Bayɩbʋlʋ kã kɛɛ “mmɩlɩ mɔ bɛfa bɛsɩlɩ wɔ kɛ” yɛɛ “mmɩlɩ mɔ bɛfa bowuluwulu sʋ̃ wɔ kɛ.” (Odw. 3:1, 4, ad.) Gyehova ɩwɔ nnɩka ngɩnlɩma sʋ̃maa mɔɔ yɛkɔhʋla yekele yɛ anyɩ wɔ kɛ. Mmusunwa sʋ̃maa anyɩ deli nwʋmɔ kɛɛ bɔkɔhɔ nnɩka mɔɔ ɩyɛ pɩkɛ anzɛnyɩɩ bɔkɔhɔ bekele bɛ anyɩ wɔ ngyemvile munwa. Nnwuakula be anyɩ deli nwʋ kɛɛ bokodu tɔlɔnwa na bɛale bɛ anyɩ wɔ paakɩ zʋ, bo nu be sʋ̃ anyɩ deli nnamɩ nwʋ anzɛnyɩɩ kɛɛ bokoyuwa wɔ ngyemvile nu. Yɛwɔ nwʋmɔ ɔhʋanɩ sʋ̃maa mɔɔ yɛkɔhʋla yɛkɛva nninyeni mɔɔ Gyehova ɩwɔ nɩ yekele yɛ anyɩ!

17. Mɩnla ti mɔɔ ɩsɛ kɛɛ awʋvʋlɔ bʋwa bo nnwuakula ma bɛfa Nyamɩnlɩ abɔdɩ bede bɛ anyɩ a?

¹⁷ Wɔ Nyamɩnlɩ yɩ oyuwadɩ fʋlɔ yi nu nɩ, awʋvʋlɔ nɩɩ nnwuakula kenyia ɔhʋanɩ kɛva Gyehova yɩ abɔdɩ kele bɛ anyɩ baaba. Ɩlɛ́yɛ kɛɛ nnɛ mɔɔ ye kunlu tuli nnamɩ nwʋ na nnamɩ sʋ̃ bo kunlu tuli yɛ nwʋ nɩ. (Ayɩ. 11:6-9) Yɛkɛva nninyeni mɔɔ Gyehova ɩwɔ nɩ yekele yɛ anyɩ daabaa. (Ndw. 22:26) Meti awʋvʋlɔ, máma bɛdɩkɛ ɔzɔ mmɩlɩ nɩ ansaana, bɔwɔ́ yɩ tʋ bɔwʋwa bo nnwuakula ma bɛva abɔdɩ bele bɛ anyɩ sikalɛyɩ la. Mmɩlɩ mɔ ɔbʋwaa wu nnwuakula ma bokoluwa abɔdɩ zʋ bokozuma Gyehova nwʋ dɩyɛ nɩ, bɛ nɩɩ mɔɔ Bulombunli Devidi hanlɩ nɩ kɛyɛ adwɩnɩ kɛɛ: “O Gyehova, abiyela íni ɛkɛnɩ mɔɔ yi egyima nɩɩ wʋ dɩyɛ sɛ.”—Ndw. 86:8.