1-2. Sɛ abiye numa a mɩnla yɛ isi a, na mɩnla yɛ ɩsɛ kɛɛ osunzu nwʋmɔ a?

 ƆNWƲ onlumanlɛmaa mɔɔ bo onlumanlɛ mmɩlɩ idwu kyɩ̃ a? Ɔnwʋ kɛɛ bɛfa anyɩnlɩlelɛ bɛyɩ ndwokɔɣizialɛ anwɩ̃ yi munwa ansaana bɛanluma bɛ. Ɔnwʋ bo mmusunwamaa nɩɩ bɔ ɔhɔnwʋmmɔ kɛɛ bɛ anyɩ ile ɩma bɛ. Na sɛ onlumanlɛvʋlɔ yɩ zʋ̃ nzulo yi nu finde a, bɔbɔ salɛ nu bɛma yɩ na ɔkʋla nwʋ wɔ yɩ anyunu kɛɛ yɩ anyɩ ile baaba. Dapɛnɩ bela mmenii kɛyɛ abʋmɩ yila bɔ nnwʋanlɩ zʋ ma Gyehova na bonuma bɛba bɛyɛ yɩ Dasɩvʋlɔmaa.

² Wʋzawʋ sʋ̃ ɛ? Sɛ osunzuu nwʋmɔ kɛɛ okonluma a, mɛyɩ nɩ ɛdɩ sʋnʋnkʋ̃ wɔ oyuwadɩ tanɩ eyi nu iluwakɛɛ “ɛpɩbɛɛ Gyehova.” (Ndw. 14:1, 2) Dɩyɛzumanlɛ eyi ɩkɔ ɩma ye munwala, kɛ yɛdɩ nnwuakula anzɛnyɩɩ mbanimbani nɩ. Naasʋ̃ amɩyɛ mɔɔ yenluma daada nɩ, yɛpɛ kɛɛ yɛhyɛ yɛ kɛnɣa mɔɔ yezi kɛɛ yɛkɔzʋ̃mɩ Gyehova daabaa nɩ nu ɛzɩzɩbɛ. Sianti sʋ̃maa ti yɛ yɛpɛ kɛɛ yɛsʋ̃mɩ Gyehova a. Bɛmá yezunzu numɔ asã pɛ nwʋ.

3. Mɩnla ti mɔɔ Gyehova azʋ̃mɩvʋlɔ bɔdɔ nɔhʋanlɛ nɩɩ ɛdɩnɣɛlɛ a? (Ndwomi 119:128, 163)

³ Gyehova ɩhanlɩ ihileli yɩ mmenii kɛɛ “bɔlɔ́ nɔhʋanlɛ.” (Zak. 8:19) Gyisɛsɩ sʋ̃ hyɛlɩ yɩ mmɛdalilɛmaa nɩ ɛzɩzɩbɛ kɛɛ bɛbɩbɛ́ ɛdɩnɣɛlɛ. (Mt. 5:6) Eyi kile kɛɛ ɩsɛ kɛɛ abiyela nyia ɛpɛ mɔɔ numɔ yɛ sɩ kɛɛ ɩkɛyɛ mɔɔ ɩtɩnɣɛ, mɔɔ ɩdɩ baaba na ɔnwʋmɔ ɩtɩ wɔ Nyamɩnlɩ anyɩ zʋ. Asʋ̃ ɔdɔ nɔhʋanlɛ nɩɩ ɛdɩnɣɛlɛ a? Yede yedi kɛɛ ɔdɔ nɔhʋanlɛ nɩɩ ɛdɩnɣɛlɛ. Ekyi awohwililɛ nɩɩ dɩyɛ tanɩ bela. (Kɩnga Ndwomi 119:128, 163.) Sɛ abiye di awohwi a, nɩ isumazumaa Setanɩ mɔɔ idii oyuwadɩ  yɩ zʋ nɩ. (Dwɔ. 8:44; 12:31) Setanɩ yɩ bʋtayɩ ɔkʋ̃ yɛ lɛ kɛɛ ɩkɛzɩkɛ Gyehova yi dima nwanzanwanza yɩ. Setanɩ ɩhɔ zʋlɔ ɩzɩkɛ Nyamɩnlɩ yi dima ɔzʋmɩ Ɛdɩnɩ Toolo yi nu. Ɩbɔ mmɔdɩnɩ kɛɛ ɩkɛma mmenii kenyia adwɩnɩ kɛɛ Gyehova ɩdwɩnɩ yɩzayɩ nkʋ̃ yɩ nwʋ, yi ti nu yɛ sɩ na ɩfa dɩyɛ baaba isiye mmenii. (Gyn. 3:1, 4, 5) Awohwi mɔɔ Setanɩ ili ɩvalɩ Gyehova nwʋ nɩ ɩma mmenii nyia adwɩnɩ mɔɔ ɩávata wɔ Gyehova nwʋ. Sɛ mmenii si pɔkɔ kɛɛ “bɔlɔ́dɔ nɔhʋanlɛ” a, Setanɩ kɔhʋla kɛlahɩlɩlahɩlɩ bɛ ma bɛkɛyɛ nninyeni tanɩ.—Wul. 1:25-31.

4. Mɩnla ɔhʋanɩ zʋ yɛ Gyehova ihile kɛɛ ɩdɩ ‘Nyamɩnlɩ mɔɔ ɩkã nɔhʋanlɛ a’? (Kila mfonyini yi sʋ̃.)

⁴ Gyehova ɩdɩ ‘Nyamɩnlɩ mɔɔ ɩkã nɔhʋanlɛ’ na ɩzʋ̃ yɩ pɛ nu ikilehile mmenii mɔɔ bɔdɔ yɩ nɩ nɔhʋanlɛ yɩ. (Ndw. 31:5) Ɔzɔ mɔɔ ɩyɛ nɩ, ɩbʋwa bɛ ma bede bɔ nwʋ wɔ Setanɩ yɩ awohwi nɩ mmɔ nwʋ. Akʋ̃ sʋ̃ Gyehova kilehile yɩ azʋ̃mɩvʋlɔ kɛɛ belí nɔhʋanlɛ na bɛyɛ mɔɔ ɩtɩnɣɛ. Eyi ɩma bɛ azʋ̃ nu itwe bɛ na mvʋlɔ sʋ̃ bu bɛ. (Ɛɣɛ. 13:5, 6) Ɔwɔlɩ yɩ tʋ kɛɛ osumaa Bayɩbʋlʋ yɩ, ɔnwʋ kɛɛ Gyehova yɛ debe mɔɔ ɩdɩ zɔ ɩma wʋ a? Ozuma kɛɛ Gyehova yɩ ɔhʋanɩhilelɛ ɩdɩ baaba ɩma wʋzawʋ nɩɩ mmenii munwala. (Ndw. 77:13) Eyi ti ɛpɛ kɛɛ ɛyɛ mɔɔ ɩtɩnɣɛ wɔ Nyamɩnlɩ yɩ anyɩ zʋ. (Mt. 6:33) Ɛpɛ kɛɛ ɛkã nɔhʋanlɛ yɩ nwʋ odwokɔ ekile mmenii mvʋlɔ ama bɛanwʋ kɛɛ mɔɔ Setanɩ ɩhã ɩvalɩ Gyehova Nyamɩnlɩ nwʋ nɩ ɩdɩ awohwi. Kɛ ɛkɛyɛ na wʋahʋla wʋayɛ zɔ a?

5. Kɛ ɛkɛyɛ na wʋahile kɛɛ egyĩ nɔhʋanlɛ nɩɩ ɛdɩnɣɛlɛ mɛda a?

⁵ Sa ɔkʋla ɔbɔ wʋ ɛbɩla wɔ ɔhʋanɩ be zʋ mɔɔ abiyela kɔnwʋ kɛɛ ɔbʋ Setanɩ yɩ awohwililɛ yɩ na egyĩ nɔhʋanlɛ yɩ mɛda na wʋahile kɛɛ Gyehova yɛ ɩdɩ wʋ Nyamɩnlɩ a, na ɛpɛ kɛɛ ɛyɛ mɔɔ ɩtɩnɣɛ wɔ yɩ anyɩ zʋ. Kɛ ɛkɛyɛ na wʋahʋla wʋayɛ eyi a? Bɔ́ mpayɩ fa yila wʋ nwʋ zʋ ma Gyehova na numa. Sɛ yɛdɔ nɔhʋanlɛ yɩ nɩɩ mɔɔ ɩtɩnɣɛ a, ɩkɛhã yɛ ma yekezi pɔkɔ kɛɛ yekonluma.

6. Kɛmɔ Ndwomi 45:4 kã nɩ, mɩnla ti mɔɔ ɔdɔ Gyisɛsɩ Kɩlayɩsɩ a?

⁶ Mɩnla ti mɔɔ ɔdɔ Gyisɛsɩ Kɩlayɩsɩ a? Ndwomi 45:4 (Kɩnga.) kã sianti baaba be ti mɔɔ ɔdɔ yɩ. Gyisɛsɩ di nɔhʋanlɛ, ɩkã yɩ nwʋ azɩ, na ɩtɩnɣɛ sʋ̃. Sɛ ɔdɔ nɔhʋanlɛ nɩɩ ɛdɩnɣɛlɛ a, mɛyɩ nɩ ntɩyasɩ wɔ numɔ kɛɛ ɔdɔ Gyisɛsɩ Kɩlayɩsɩ. Gyisɛsɩ ɩvalɩ akɛnɣasɩ gyinanlɩ nɔhʋanlɛ nɩɩ ɛdɩnɣɛlɛ mɛda. (Dwɔ. 18:37) Naasʋ̃ mɩnla ɔhʋanɩ zʋ yɛ Gyisɛsɩ ɩkã yɩ nwʋ azɩ a?

7. Mɩnla yɛ wʋ anyɩ deli nwʋmɔ wɔ Gyisɛsɩ yɩ kãnwʋazɩ nwʋ a?

 ⁷ Gyisɛsɩ iluwalɩ yɩ nyɛlɩyɛ zʋ ihileli kɛɛ ɩwɔ kãnwʋazɩ. Kɛ ndianwʋ nɩ, iáde animinyiamɩ bela ma yɩ nwʋ, ɩvalɩ yi munwala ɩmanlɩ yɩ Zɩ. (Mk. 10:17, 18; Dwɔ. 5:19) Kɛ Gyisɛsɩ yɩ kãnwʋazɩ nɩ ɩma ɛtɩ nɣanlɩ ese a? Pɩlazunɛ bela íni nwʋmɔ kɛɛ eyi ɩkã wʋ ma ɔdɔ Nyamɩnlɩ Ɣalɛ yɩ na edi yɩ mɛda. Mɩnla ti mɔɔ Gyisɛsɩ ɩkã yɩ nwʋ azɩ a? Iluwakɛɛ ɩdɔ yɩ Zɩ mɔɔ ɩkã yɩ nwʋ azɩ nɩ na isumazuma yɩ. (Ndw. 18:35; Hib. 1:3) Kezimɔ Gyisɛsɩ ɩda Gyehova yɩ subanɩ azʋlɔtʋ nɩ ali pɛpɛɛpɛ nɩ, asʋ̃ ɩáhã wʋ ma ɔtwɩ̃ bike yɩ a?

8. Mɩnla ti mɔɔ yɛ anyɩ de kɛɛ Gyisɛsɩ dɩ yɛ Bulombunli a?

⁸ Yɛ anyɩ de kɛɛ Gyisɛsɩ dɩ yɛ Bulombunli iluwakɛɛ mɛyɩ yɛ ɩfata kɛɛ idi yɛ zʋ a. Gyehova yɩzayɩ yɛ ɩdɩdɩlɩ yɩ Ɣa yɩ na ɩyɩlɩ yɩ kɛɛ ili tumi a. (Ayɩ. 50:4, 5) Mɔwʋ kila kezimɔ Gyisɛsɩ ɩzʋ̃ ɔlɔlɛ nu ɩva yɩ nwʋ ɩwɔ afɔlɩ ɩma yɛ. (Dwɔ. 13:1) Gyisɛsɩ ɩdɩ yɛ Bulombunli meti ɩfata kɛɛ yɛdɔ yɩ. Ihilelihileli numɔ kɛɛ bɛzabɛ mɔɔ bɛdɩ yɩ ɔhɔnwʋmmɔ nɩ, bedi yɩ ahyɛdɩ zʋ bɛfa bekile kɛɛ bɔdɔ yɩ. (Dwɔ. 14:15; 15:14, 15) Ɩdɩ animinyiamɩhyɛlɛ kezile kɛɛ yɛdɩ Gyehova yɩ Ɣa yɩ ɔhɔnwʋmmɔ!

9. Mɩnla nsɛlilɛ yɛ ɩwɔ Kilisinyiamaa bo onlumanlɛ nɩɩ Kɩlayɩsɩ yɩ onlumanlɛ yɩ nu a?

⁹ Gyisɛsɩ yɩ ahyɛdɩ ɔkʋ̃ yɛ lɛ kɛɛ ɩsɛ kɛɛ yɩ mɛdalilɛmaa bonuma. (Mt. 28:19, 20) Ɩyɛlɩ eyi nwʋ ndianwʋ. Wɔ ɔhʋanɩ be zʋ nɩ yɩ onlumanlɛ dɩyɛ nɩ ɩdɩ sʋnʋnkʋ̃ wɔ yɩ mɛdalilɛmaa bɛ dɩyɛ yɩ nwʋ. (Kila alɩka mɔɔ ise “ Kezimɔ Gyisɛsɩ Yɩ Onlumanlɛ Dɩ Sʋnʋnkʋ̃ Wɔ Yɩ Mɛdalilɛmaa Bɛ Dɩyɛ Nwʋ.”) Naasʋ̃, nsɛlilɛ wɔ numɔ wɔ ɔhʋanɩ be zʋ. Mmɩlɩ mɔ Gyisɛsɩ inlumanlɩ nɩ, nɩ ɩlɛ yɩ nwʋ ɩma yɩ Zɩ kɛɛ ɩkɛyɛ yɩ apɛdɩ. (Hib. 10:7) Ɔzɔ la yɛ Kɩlayɩsɩ yɩ mɛdalilɛmaa numa a, bɛfa bɛda yɩ ali wɔ bagua nu kɛɛ beyila bɔ nwʋ zʋ bɛma Gyehova Nyamɩnlɩ. Kakɩ yɩ, mɔɔ ɔnwʋmɔ hyinyia bɛ paa yɛ lɛ kɛɛ bɛkɛyɛ Nyamɩnlɩ yɩ apɛdɩ na kɛ mɔɔ bɛzabɛ bɛpɛ a. Meti bedii bɛ Niibenyia yɩ ndianwʋ mɛda.

10. Mɩnla ti mɔɔ ɩsɛ kɛɛ Gyisɛsɩ nwʋ ɔlɔlɛ ɩkã wʋ ma onuma a?

¹⁰ Ede di kɛɛ Gyisɛsɩ dɩ Gyehova yɩ Ɣa ɔkʋ̃tɩnyɩɩ na ɩyɛ wʋ fɛ kɛɛ mɛyɩ yɛ ɩdɩ Bulombunli mɔɔ Nyamɩnlɩ ɩyɩ yɩ kɛɛ ili yɛ zʋ a. Ɔnwʋ Gyisɛsɩ kɛɛ abiye mɔɔ ɩkã yɩ nwʋ azɩ na ɩda yɩ Zɩ yi subanɩ ali pɛpɛɛpɛ. Ozuma kɛɛ ɩmanlɩ mmenii sʋ̃maa alɩyɛ, ɩyɩkyɩlɩ bɛ ɛɣɛɛlɛ na ɩzɩalɩ bɛ adimakɛlɛ po. (Mt. 14:14-21) Ɔnwʋ kezimɔ idi yɩ asafʋ yɩ anyunu nnɛ. (Mt. 23:10) Na ezi kɛɛ, kɛ Nyamɩnlɩ Bulombunlililɛ zʋ Bulombunli nɩ ɩkɛyɛ nninyeni baaba sʋ̃maa ɩkɛma yɛ wɔ eɣile be. Kɛ ɛkɛyɛ na wʋahile kɛɛ ɔdɔ yɩ a? Ɩsɛ kɛɛ osumazuma yɩ ndianwʋ yɩ. (Dwɔ. 14:21) Dɩyɛ mɔɔ ili bɔmʋnlɩ mɔɔ ɔkɔhʋla kɛyɛ yɛ lɛ kɛɛ, ekeyila wʋ nwʋ zʋ kɛma Gyehova na wʋanluma.

11. Mɩnla ti mɔɔ ihyinyia paa kɛɛ yenuma a?

¹¹ Mɩnla ti mɔɔ ihyinyia paa kɛɛ yenuma a? Gyisɛsɩ ɩmanlɩ yɛnwʋnlɩ Nyamɩnlɩ yɩ ahyɛdɩ mɔɔ ɩdɩ kezile paa nɩ. Ɩhanlɩ kɛɛ: “Ɩsɛ kɛɛ ɛfa wʋ ahʋnlɩnɩ munwatĩĩ nɩɩ wʋ ɛkɛla munwatĩĩ nɩɩ wʋ adwɩnɩ munwatĩĩ nɩɩ wʋ anwʋzɩzɩbɛ munwatĩĩ ɔdɔ Gyehova wʋ Nyamɩnlɩ.” (Mk. 12:30) Asʋ̃ ɔzɔ yɛ ɔlɔlɛ mɔɔ ɔwɔ ma Nyamɩnlɩ yi nu yɛ sɩ a?

12. Mɩnla ti mɔɔ ɔdɔ Gyehova a? (Kila mfonyini yi sʋ̃.)

¹² Sianti sʋ̃maa ti yɛ ɔdɔ Gyehova a. Kɛ ndianwʋ nɩ, ɛɣa ɔnwʋ yɩ kɛɛ yɩ kɛnɩ yɛ “nnwʋanlɩ ɩzʋ̃ a” na “akyɛdɩ baaba nɩɩ akyɛdɩ mɔɔ idi munli bela zʋ̃” yɩ kɛnɩ. (Ndw. 36:9; Gye. 1:17) Dɩyɛ baaba bela mɔɔ wʋ sa ɩhã yɩ wɔ azɩlɛ yɩ zʋ nɩ ɩzʋ̃ yɛ Nyamɩnlɩ mɔɔ ɩwɔ ɔlɔlɛ nɩ kɛ.

13. Mɩnla ti mɔɔ elelɛdɩyɛ nɩ ɩdɩ akyɛdɩ sʋnʋnkʋ̃ yɩ a?

 ¹³ Elelɛdɩyɛ nɩ ɩdɩ akyɛdɩ sʋnʋnkʋ̃ mɔɔ Gyehova ɩva ɩma yɛ. Mɩnla ti mɔɔ yɛkãã zɔ a? Mɔwʋ dɩyɛ dwɩnɩndwɩnɩ ɔhɔnwʋvalɛ mɔɔ ɩwɔ Gyehova nɩɩ ɩ Ɣa nɩ bɛ avinli nɩ nwʋ kila. Gyisɛsɩ hanlɩ kɛɛ: “Ɛzɩlɛ nɩ dɔ mɩ” na “Mʋdɔ Ɛzɩlɛ nɩ.” (Dwɔ. 10:17; 14:31) Iluwakɛɛ bɛva alʋbɔ abʋmɩ abʋmɩ sʋ̃maa bɔwʋwa nɩ ti ɔhɔnwʋvalɛ mɔɔ ɩwɔ bɛ avinli nɩ nu yɛlɩ ɛzɩzɩbɛ. (Ɛɣɛ. 8:22, 23, 30) Kila kezimɔ Nyamɩnlɩ kɛdɩ ɛyɛkɛ mmɩlɩ mɔ ɩmanlɩ yɩ Ɣa nɩ ɩɣa ɩnwʋnlɩ amanɩyɛ na iwuli nɩ. Gyehova dɔ adasamaa na ɩdɔ wʋzawʋ sʋ̃, meti mɔɔ ɩvalɩ yɩ Ɣa ɔkʋ̃ kyeinyii ɩwɔlɩ afɔlɩ na ama ɛ nɩɩ mmenii mvʋlɔ bɛahʋla bɛawʋwa azɩ daabaa yɩ a. (Dwɔ. 3:16; Gal. 2:20) Eyi ti mɔɔ yɛdɔ Nyamɩnlɩ yɩ a.    

14. Bʋtayɩ mɔɔ ɩtɛla ebiyela mɔɔ ɔkɔhʋla kɛva keziye wʋ anyɩ zʋ wɔ wʋ ɛbɩlawɔlɛ nu yɛ lɛ mɩnla a?

¹⁴ Iluwakɛɛ ozuma Gyehova nwʋ dɩyɛ sʋ̃maa nɩ ti ɔlɔlɛ mɔɔ ɔwɔ ma yɩ nɩ ɩyɛ kezi. Pɩlazunɛ bela íni nwʋmɔ kɛɛ ɛpɛ kɛɛ ɔtwɩ̃ bike yɩ eɣile bela. Na sa ɔkʋla ɛyɛ zɔ sʋ̃. Ɩzʋ̃ kunlumiba nu ɩhyɛ wʋ ɛzɩzɩbɛ kɛɛ ma yɩ ahʋnlɩnɩ ili fɛlɛkʋ̃. (Ɛɣɛ. 23:15, 16) Kɛ wu munwa kɛkɛ yɛ ɛkɛva kɛyɛ ɔzɔ a, wʋ nyɛlɩyɛ sʋ̃ kɩnla nwʋmɔ baaba. Kezimɔ ɔbɔ wʋ ɛbɩla nɩ kehile kɛɛ ɔdɔ Gyehova amba. (1 Dwɔ. 5:3) Eyi yɛ ɩdɩ bʋtayɩ mɔɔ ɩtɛla ebiyela mɔɔ ɔkɔhʋla kɛva keziye wʋ anyɩ zʋ wɔ wʋ ɛbɩlawɔlɛ nu a.

15. Kɛ ɛkɛyɛ na wʋahile kɛɛ ɔdɔ Gyehova a?

 ¹⁵ Kɛ ɛkɛyɛ na wʋahile kɛɛ ɔdɔ Gyehova a? Mɔɔ ili bɔmʋnlɩ nɩ, ɔbɔ mpayɩ sʋnʋnkʋ̃ ɛfa yila wʋ nwʋ zʋ ɛma nɔhʋanlɛ Nyamɩnlɩ ɔkʋ̃ kyeinyii nɩ. (Ndw. 40:8) Akʋ̃, onuma wɔ bagua nu fa kile kɛɛ eyila wʋ nwʋ zʋ ɛma Gyehova. Kɛmɔ yeli bɔmʋnlɩ yɛhã wɔ dɩyɛzumanlɛ eyi nu nɩ, wʋ onlumanlɛ dɩ anyɩnlɩlelɛ mmɩlɩ mɔ nwʋmɔ hyinyia paa wɔ wʋ ɛbɩlawɔlɛ nu. Ɔbɔ ɛbɩla fʋlɔ tʋ, mɔɔ mɛyɩ yɛ lɛ kɛɛ ɛkɛyɛ Gyehova yɩ apɛdɩ na kɛ mɔɔ wʋzawʋ ɛpɛ a. (Wul. 14:8; 1 Pit. 4:1, 2) Na nɔhʋanlɛ, eyi dɩ pɔkɔzilɛ kezile paa naasʋ̃ mɛyɩ yɛ ɩkɛma wʋ anyɩ kele wɔ wʋ ɛbɩlawɔlɛ nu a. Mɩnla ɔhʋanɩ zʋ a?

16. Kɛmɔ Ndwomi 41:12 kã nɩ, mɩnla yɛ Gyehova ɩkɛyɛ ɩkɛma bɛzabɛ mɔɔ bɔsʋ̃mɩ yɩ nɩ a?

¹⁶ Gyehova ɩdɩ abiye mɔɔ yi kunlu ɩdɩyɛnɛ baaba. Sɛ ɛma debe yɩ a, isia ɩbɔ nwʋmɔ sʋ̃maa zɛ ɩma wʋ. (Mk. 10:29, 30) Wɔ oyuwadɩ tanɩ eyi po nu nɩ, ɩkɛma ekenyia ɛbɩlawɔlɛ mɔɔ ɩyɛ anyɩnlɩlelɛ na wʋ ahʋnlɩnɩ ɩadɔ wu kunlu. Eyi ɩdɩ nyilalɛ sʋ̃maa mɔɔ ɩwɔ ɩma wʋ nɩ numɔ ɛgyɩkɩ̃ɩ̃ be. Sɛ onuma a nɩ olówieli, sa ɔkʋla kɔ zʋlɔ sʋ̃mɩ wʋ Zɩ mɔɔ ɔdɔ yɩ nɩ daabaa. Ɔlɔlɛ mɔɔ ɩwɔ ɛ nɩɩ wʋ Zɩ bɛ avinli nɩ kɔhɔ zʋlɔ kɛyɛ kezi, na ɔkɔwʋwa azɩ daabaa kɛmɔ yɩzayɩ sʋ̃ ɩda azɩ daabaa nɩ.—Kɩnga Ndwomi 41:12.

17. Mɩnla yɛ Gyehova íni mɔɔ ɔkɔhʋla kɛva kɛma yɩ a?

¹⁷ Sɛ eyila wʋ nwʋ zʋ na onuma a, nɩ ɛlɛ debe mɔɔ ɩtʋ bʋlɔ paa ɛmaa wʋ Zɩ. Dɩyɛ baaba bela nɩɩ dɩyɛ bela mɔɔ ɩma wʋ anyɩ de mɔɔ wʋ sa hã nɩ, mɛyɩ yɛ ɩva ɩmanlɩ wʋ a. Meti wʋzawʋ sʋ̃ sa ɔkʋla ɛfa debe mɔɔ sʋlɔ nɩɩ azɩlɛ Niibenyia yɩ íni nɩ ɛma yɩ. Mɛyɩ yɛ lɛ wʋ pɛ nu mɔɔ ɔzʋ̃ kɛva nɔhʋanlɛlilɛ kɔzʋ̃mɩ yɩ nɩ. (Dwb. 1:8; 41:11; Ɛɣɛ. 27:11) Eyi dɩ ɔhʋanɩba mɔɔ ɩtɛla ebiyela mɔɔ ɔkɔhʋla koluwa zʋlɔ kɔwʋwa azɩ. Pɩlazunɛ bela íni nwʋmɔ kɛɛ ɔlɔlɛ mɔɔ ɔwɔ ma Gyehova nɩ yɛ ɩdɩ dɩyɛ titili mɔɔ ɩkã wʋ ma onuma.

18. Mɩnla ndwokɔɣizialɛ yɛ ɔkɔhʋla keɣizia wʋ nwʋ a?

¹⁸ Kɛ ɛkɛyɩ odwokɔɣizialɛ eyi yi munwa keze a, Asʋ̃ okonluma a? Gyɩsɛ wʋzawʋ na  wʋahʋla wʋayɩ yi munwa. Naasʋ̃ sɛ ebizia wʋ nwʋ kɛɛ, ‘Mɩnla ti mɔɔ mɩdɩkɛɛ a?’ sa ɩkʋla ɩbʋwa wʋ. (Egy. 8:36) Dwɩnɩndwɩnɩ sianti asã mɔɔ yezunzu nwʋmɔ nɩ nwʋ. Mɔɔ ili bɔmʋnlɩ, ɔdɔ nɔhʋanlɛ nɩɩ ɛdɩnɣɛlɛ. Bizia wʋ nwʋ kɛɛ, ‘Asʋ̃ mikilaa ɔhʋanɩ kɛɛ mmɩlɩ be kɛɣa mɔɔ abiyela kɛhã nɔhʋanlɛ na ɩayɛ mɔɔ ɩtɩnɣɛ a?’ Mɔɔ ɩtɔ zʋlɔ anwɩ̃, ɔdɔ Gyisɛsɩ Kɩlayɩsɩ. Bizia wʋ nwʋ kɛɛ, ‘Asʋ̃ mɩpɛ kɛɛ Nyamɩnlɩ yɩ Ɣa yɩ di mʋ zʋ Bulombunli na mɩpɛ kɛɛ musumazuma yɩ ndianwʋ yɩ a?’ Mɔɔ ɩtɔ zʋlɔ asã mɔɔ nwʋmɔ hyinyia paa nɩ, ɔdɔ Gyehova. Bizia wʋ nwʋ kɛɛ, ‘Asʋ̃ mɩpɛ kɛɛ Gyehova yɩ ahʋnlɩnɩ di fɛlɛkʋ̃ iluwa ɔzʋ̃mɩnlɛ mɔɔ mʋkɔzʋ̃mɩ yɩ zʋ a?’ Sɛ ɛyɩ ndwokɔɣizialɛ eyi yi munwa kɛɛ nyɛ a, mɛyɩ nɩ mɩnla ti mɔɔ olónumanlɩ a? Ɛdɩkɛɛ mɩnla?—Egy. 16:33.

19. Mɩnla ti mɔɔ íni kɛɛ ɔtwɩnhwɩ̃ wʋ agyia azɩ wɔ onlumanlɛ nwʋ a? Ma nwʋmɔ ndianwʋ. (Dwɔɔnʋ 4:34)

¹⁹ Sɛ ɔtwɩnhwɩ̃ɩ̃ wʋ agyia azɩ kɛɛ okonluma a, mɛyɩ nɩ sunzu Gyisɛsɩ yɩ ndianwʋ eyi nwʋ. (Kɩnga Dwɔɔnʋ 4:34.) Gyisɛsɩ valɩ yɩ Zɩ yɩ apɛdɩyɛlɛ idindianlɩ alɩyɛ nwʋ. Mɩnla ti a? Iluwakɛɛ alɩyɛ dɩ baaba ma yɛ. Nɩ Gyisɛsɩ izi kɛɛ dɩyɛ bela mɔɔ Gyehova kɛhã kɛɛ yɛyɛ nɩ ɩdɩ baaba ɩma yɛ. Gyehova ɩábɛ kɛɛ yɛkɛyɛ dɩyɛ bela mɔɔ ɩkɛma yekeli ɛyɛkɛ. Asʋ̃ Gyehova pɛ kɛɛ onuma a? Nyɛ. (Egy. 2:38) Mɛyɩ nɩ nyia anwʋlazʋ kɛɛ sɛ etiye ahyɛdɩ mɔɔ mɛyɩ yɛ lɛ kɛɛ yenlumá nɩ a, ɩkɔwʋwa wʋ. Sɛ bɛfa alɩyɛ mɔɔ ɩyɛ fɛ baaba paa bɛbɩlɛ wʋ a, kɛ sa edi? Mɛyɩ nɩ mɩnla ti mɔɔ ɔtwɩnhwɩ̃ɩ̃ wʋ agyia azɩ kɛɛ okonluma a?

20. Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ yi nu a?

²⁰ Mɩnla ti mɔɔ mmenii sʋ̃maa bolónumanlɩ yɩ a? Ebiye a abiyemmɔ kɛhã kɛɛ, “Mɩdɩkɛɛ ɛgyɩkɩ̃ɩ̃.” Nɔhʋanlɛ odwokɔ yɛ lɛ kɛɛ wʋ nwʋ zʋ mɔɔ ekeyila kɛma Gyehova na wʋanluma nɩ, ɩdɩ pɔkɔzilɛ mɔɔ nwʋmɔ hyinyia tɛla ebiyela. Meti ɩsɛ kɛɛ ede mmɩlɩ na ɔdwɩnɩ nwʋmɔ bʋwɔ ansaana wʋazi nwʋmɔ pɔkɔ. Naasʋ̃ sɛ ɔzʋ̃ wʋ ahʋnlɩnɩ munwala nu ɛpɛ kɛɛ onuma a, mɩnla yɛ ɔkɔhʋla kɛyɛ na wʋava wʋaziyeziye wʋ nwʋ a? Yekozunzu odwokɔɣizialɛ eyi nwʋ wɔ dɩyɛzumanlɛ mɔɔ ili kɛnɩ nɩ nu.