1. Mɩnla ndwokɔzɩzɩbɛ yɛ ye nu sʋ̃maa yiyia a?

 ASƲ̃ ɛva sunzuma ɔfʋã nu bʋtayɩ be ziye wʋ anyɩ zʋ kyɩ̃ mɔɔ nɩ ɩyɛ sɩ ɩma wʋ kɛɛ okodwu nwʋmɔ a? b Sɛ ɔzɔ a, kɛ wʋzawʋ nkʋ̃ a. Kɛ ndianwʋ nɩ, nɩ Philip pɛ kɛɛ ɩbɔ mpayɩ eɣile bela na ɩma itu mpʋnɩ sʋ̃, naasʋ̃ nɩ iányia alagyɩ ɩbɔ mpayɩ. Erika sʋ̃, nɩ ɩábɛ kɛɛ ɩkalɩ aɣinzi wɔ dɩyɛzumanlɛ nɩɩ dasɩlɛlilɛ ayiyialɩyɛ tʋ, naasʋ̃ nɩ ɩta ɩkalɩ aɣinzi wɔ ayiyialɩyɛ bela tʋ. Tomáš wɔlɩ mmɔdɩnɩ mbɔmɩ sʋ̃maa kɛɛ ɩkɛɣɩnga Bayɩbʋlʋ yɩ munli munwala. Ɩhanlɩ kɛɛ: “Mɔɔ ɩdɩ yɛ lɛ kɛɛ, nɩ Bayɩbʋlʋ yɩ ɛɣɩngalɛ ɩáyɛ mɩ fɛ. Mudweli mihilalɩ mbɔmɩ asã, naasʋ̃ yɩ munwala nu nɩ, sɛ mutwu Lɛvitikɔsʋ pɛ nɩ miyiaki.”

2. Sɛ yelótwuli ye sunzuma ɔfʋã nu bʋtayɩ nwʋ sɩkalɛpɛyɩ po a, mɩnla ti mɔɔ íni kɛɛ yɛ padi kolɔ a?

² Sɛ ɔwɔ bʋtayɩ be na olótwuli nwʋmɔ sɩkalɛpɛyɩ po a, máma wʋ padi kolɔ. Ansaana yɛkɔhʋla kodwu bʋtayɩ ngyɩkɩ̃ɩ̃ ngyɩkɩ̃ɩ̃ po nwʋ nɩ, ide mmɩlɩ nɩɩ anwʋzɩzɩbɛ. Mmɔdɩnɩ mɔɔ ɔbɔɔ kɛɛ okodwu wʋ bʋtayɩ yɩ nwʋ nɩ kile kɛɛ, ɛ nɩɩ Gyehova avinli abusunwawɔlɛ yɩ nwʋ hyinyia wʋ na ɛpɛ kɛɛ ɛyɛ mɔɔ ɔkɔhʋla bela ɛfa ɔsʋ̃mɩ yɩ. Gyehova anyɩ sɔ wʋ mmɔdɩnɩwɔlɛ nɩ paa. Kakɛ kɛɛ, Gyehova iáhila ɔhʋanɩ kɛɛ ɛkɛyɛ mɔɔ ɩbʋlʋ wʋ anwʋzɩzɩbɛ zʋ kʋlaa. (Ndw. 103:14; Mik. 6:8) Meti fa bʋtayɩ mɔɔ ɔkɔhʋla kodwu nwʋmɔ siye wʋ anyɩ zʋ. Sɛ ɛfa siye wʋ anyɩ zʋ owie a, kɛ ɛkɛyɛ na wʋadwu nwʋmɔ a? Má yezunzu adwɩnɩhilelɛ azʋlɔtʋ be mɔɔ ɩkɔhʋla kɔwʋwa nwʋ.

3. Mɩnla ti mɔɔ ɛpɛ mɔɔ numɔ yɛ sɩ nwʋ hyinyia paa a?

³ Sɛ ɔkɔhʋla kodwu sunzuma ɔfʋã nu bʋtayɩ nwʋ a, nwʋmɔ hyinyia paa kɛɛ enyia ɛpɛ mɔɔ numɔ yɛ sɩ. Sɛ abiye wɔ ɛpɛ a, ɩhyɛ yɩ ɛzɩzɩbɛ ma iminyia yɩ nwʋ ɩyɛ yɩ bʋtayɩ yɩ nwʋ egyima. Ɛpɛ mɔɔ numɔ yɛ sɩ nɩ, ɩdɩ kɛɛ anwʋma mɔɔ ipinyia ɛlɛnɩ mɔɔ ɩwɔ nzulo zʋ ɩkɔ dɩka mɔɔ ɩkɔɔ nɩ. Sɛ anwʋma yɩ kɔ zʋlɔ bɔ a, yɛ ɛlɛnɩ yɩ ɩkʋla ɩkɔ itwu dɩka mɔɔ ɩkɔɔ nɩ a. Sɛ anwʋma yɩ munwa yɛ sɩ a, ɛlɛnɩ yɩ ɩkʋla itwu dɩka mɔɔ ɩkɔɔ nɩ ndɛndɛ. Ɔzɔ la yɛ sɛ ɛpɛ mɔɔ yɛwɔ nɩ numɔ yɛ sɩ a, ɩma yɛkʋla yetwu ye bʋtayɩ nwʋ ndɛndɛ. Eliyema David mɔɔ ɩwɔ El Salvador nɩ hanlɩ kɛɛ, “Sɛ enyia ɛpɛ mɔɔ numɔ yɛ sɩ a, ɩma ɔkɔ zʋlɔ eminyia wʋ nwʋ. Ɔbɔ mmɔdɩnɩ kɛɛ ɛlɛ́ma dɩyɛ bela kezi wʋ ɔhʋanɩ na ama wʋahʋla wʋadwu wʋ bʋtayɩ nwʋ.” Meti kɛ ɛkɛyɛ na wʋanyia ɛpɛ mɔɔ numɔ yɛ sɩ a?

4. Mɩnla nwʋ mpayɩ yɛ yɛkɔhʋla kɔwɔ a? (Fɩlɩpɩmaa 2:13) (Kila mfonyini yi sʋ̃.)

⁴ Bɔ́ mpayɩ fa pɩbɛ ɛpɛ mɔɔ numɔ yɛ sɩ. Gyehova kɔhʋla koluwa yɩ sunzuma nwanzanwanza yɩ zʋ kɔwʋwa wʋ ma okodwu wʋ bʋtayɩ nwʋ. (Kɩnga Fɩlɩpɩmaa 2:13.) Ɩyɛ a, yɛfa bʋtayɩ be yesiye yɛ anyɩ zʋ iluwakɛɛ yezi kɛɛ ɩsɛ kɛɛ yɛyɛ ɔzɔ ti, na ɩdɩ yɩ ɔhʋanɩ zʋ sʋ̃. Naasʋ̃, ebiye a nɩ yéni ɛpɛ ankasa kɛɛ yekodwu bʋtayɩ nɩ nwʋ. Eyi be dʋlɩ eliyema baalɛ Norina mɔɔ ɩwɔ Uganda nɩ. Ɩva ɩyɛlɩ yɩ bʋtayɩ kɛɛ ɩkɛyɛ Bayɩbʋlʋ dɩyɛzumanlɛ, naasʋ̃ nɩ ɛpɛ mɔɔ ɩwɔ nɩ nu ɩáyɛ sɩ iluwakɛɛ nɩ ɩtɩ nɣanlɩ kɛɛ ízi kilehile. Mɩnla yɛ ɩwʋwalɩ yɩ a? Ɩhanlɩ kɛɛ: “Mʋwɔlɩ yɩ tʋ mizianlɩ Gyehova kɛɛ ɩma minyia ɛpɛ mɔɔ numɔ yɛ sɩ kɛɛ mɩkɛyɛ Bayɩbʋlʋ dɩyɛzumanlɛ. Na mɔɔ ɩkɛyɛ na mɩayɛ mɩ mpayɩ yɩ nwʋ egyima nɩ, mɩyɛlɩ kezimɔ mukodu mpʋnɩ wɔ mɩ ehilehilelɛ nu nwʋ egyima. Aziyianɩ ɛgyɩkɩ̃ɩ̃ be mɛda nɩ, mɩɣa mʋnwʋnlɩ kɛɛ nɩ ɛpɛ mɔɔ mʋwɔ nɩ nu ɩɣa ɩyɛ sɩ paa. Ɔzɔ ɔlʋbɔ yɩ nu la, mʋwɔlɩ Bayɩbʋlʋ dɩyɛzumanlɛ anwɩ̃ tʋ.”

5. Mɩnla yɛ sɛ yɛdwɩnɩndwɩnɩ nwʋmɔ a, ɩkɛma ɛpɛ mɔɔ yɛwɔ nɩ kɛyɛ kezi a?

⁵ Dwɩnɩndwɩnɩ mɔɔ Gyehova ɩyɛ ɩma wʋ nɩ nwʋ. (Ndw. 143:5) Mmɩlɩ mɔ sʋ̃mavʋlɔ Pɔɔlʋ dwɩnɩndwɩnlɩ adʋmɩ mɔɔ Gyehova lalɩ yɩ ali hileli yɩ nwʋ nɩ, ɩwʋwalɩ yɩ ma iminyianlɩ yɩ nwʋ ɩyɛlɩ egyima ɩmanlɩ Gyehova. (1 Kɔl. 15:9, 10; 1 Tim. 1:12-14) Ɔzɔ la yɛ sɛ ɔdwɩnɩndwɩnɩ mɔɔ Gyehova ɩyɛ ɩma wʋ nɩ nwʋ a, ɩkɛhyɛ wʋ ɛzɩzɩbɛ ma ekeminyia wʋ nwʋ kodwu wʋ bʋtayɩ yɩ nwʋ a. (Ndw. 116:12) Nɩ eliyema baalɛ be mɔɔ ɩwɔ Honduras pɛ kɛɛ ɩyɛ ɔhʋanɩbukolɛvʋlɔ, kila mɔɔ ɩwʋwalɩ yɩ ma ɩhʋla idwuli ɔzɔ bʋtayɩ yɩ nwʋ. Ɩhanlɩ kɛɛ: “Mʋdwɩnɩndwɩnɩnlɩ kezimɔ Gyehova dɔ mɩ nɩ nwʋ. Ɩva mɩ ɩɣa ɩhɩnla yɩ mmenii nwʋ. Isia sʋ̃ ikila mɩ na ɩbɔ mʋ nwʋ banɩ. Eyimmɔ mɔɔ mʋdwɩnɩndwɩnɩnlɩ nwʋmɔ nɩ manlɩ ɔlɔlɛ mɔɔ mʋwɔ mɩma Gyehova nɩɩ ɛpɛ mɔɔ mʋwɔ nɩ yɛlɩ kezi na mʋwɔlɩ ɔhʋanɩbukolɛ egyima yɩ tʋ.”

6. Mɩnla ebiyekʋ̃ yɛ ɩkɔhʋla kɔwʋwa ma ɛpɛ mɔɔ yɛwɔ nɩ kɛyɛ kezi a?

⁶ Fá wʋ adwɩnɩ siye mfasʋ mɔɔ ekenyia nɩ zʋ. Ma yehilá mɔɔ ɩwʋwalɩ Erika mɔɔ yɛhanlɩ yɩ  nwʋ odwokɔ kɛɛ ɩábɛ kɛɛ ɩkalɩ aɣinzi wɔ ayiyialɩyɛ tʋ nɩ. Ɩhanlɩ kɛɛ: “Mɩɣa mʋnwʋnlɩ kɛɛ, sɛ mɩákɔ dasɩlɛlilɛ ayiyialɩyɛ tʋ ndɛ a, nɩ mutwulaa mʋ nwʋ paa. Naasʋ̃ sɛ mʋkɔ ndɛ a, mʋkʋla misema mmeliyema yɩ na mɩ nɩɩ bɛ bɔ nkɔmmɔ sʋ̃. Na minyia adwɩnɩhilelɛ ngɩnlɩma wɔ dasɩlɛlilɛ ayiyialɩyɛ yɩ tʋ mɔɔ ɩma mutu mpʋnɩ na mɩ anyɩ de wɔ dasɩlɛlilɛ egyima yɩ nu sʋ̃.” Mmɩlɩ mɔ Erika valɩ yɩ adwɩnɩ ziyeli mfasʋ mɔɔ ikenyia yɩ zʋ nɩ, ɩwʋwalɩ yɩ ma idwuli yɩ bʋtayɩ yɩ nwʋ. Mɩnla mfasʋ yɛ ɔkɔhʋla kɛva wʋ adwɩnɩ keziye zʋ a? Sɛ wʋ bʋtayɩ yɩ falɩ Bayɩbʋlʋ ɛɣɩngalɛ anzɛnyɩɩ mpayɩwɔlɛ nwʋ a, dwɩnɩndwɩnɩ kezimɔ ɩkɛhyɛ ɛ nɩɩ Gyehova avinli abusunwawɔlɛ nu ɛzɩzɩbɛ nwʋ. (Ndw. 145:18, 19) Sɛ ɩfalɩ kezimɔ ekenyia subanɩ azʋlɔtʋ mɔɔ ɩfata Kilisinyianii nwʋ sʋ̃ a, fa wʋ adwɩnɩ siye kezimɔ ɩkɛma ɛ nɩɩ mmenii mvʋlɔ kɔwʋwa azʋ̃nudwolɩyɛ nu nɩ zʋ. (Kol. 3:14) Sa ɔkʋla kɛlɛ sianti azʋlɔtʋ ti mɔɔ ɛpɛ kɛɛ otwu bʋtayɩ pɔkyɩɩ be nwʋ nɩ tiã kɛ, ɩwɔ numɔ la nɩ ɔhɔ ehila. Tomáš mɔɔ yeli bɔmʋnlɩ yɛhã yɩ odwokɔ nɩ hanlɩ kɛɛ: “Sɛ minyia sianti azʋlɔtʋ ti mɔɔ mɩpɛ kɛɛ mutwu mʋ bʋtayɩ yɩ nwʋ a, ɩma ɩyɛ sɩ kɛɛ mɩ padi kogolɔ.”

7. Mɩnla yɛ ɩwʋwalɩ Julio nɩɩ yɩ yɩ ma bodwuli bo bʋtayɩ yɩ nwʋ a?

⁷ Fa bɛzabɛ mɔɔ bɛkɛhyɛ wʋ ɛzɩzɩbɛ nɩ ɔhɔnwʋ. (Ɛɣɛ. 13:20) Nɩ ɩdɩ Julio nɩɩ yɩ yɩ bɛ bʋtayɩ kɛɛ bɛkɛdɛlɛ bɔ ɔzʋ̃mɩnlɛ nu, kila mɔɔ ɩwʋwalɩ bɛ. Ɩhanlɩ kɛɛ: “Bɛzabɛ mɔɔ bɔkɔhʋla kɛhyɛ yɛ ɛzɩzɩbɛ ma yekodwu yɛ bʋtayɩ yɩ nwʋ nɩ, bɔnlʋmmɔ yɛ yɛvalɩ bɛ ɔhɔnwʋ a, na ɩyɛ a nɩ yɛ nɩɩ bɛ bɔ yɛ bʋtayɩ yɩ nwʋ nkɔmmɔ. Nɩ yɛ ɔhɔnwʋmmɔ eyimmɔ bo nu sʋ̃maa bodwu ɔzɔ bʋtayɩ yɩ nwʋ daada, meti nɩ bɔkʋla bɛfa adwɩnɩhilelɛ mɔɔ ɩfata paa bɛma yɛ. Ɩwɔ nu la a, nɩ beɣiziá kezimɔ yɛ nhyɩhyɛlɩyɛ yɩ ɩkɔɔ na sɛ yehyinyia ɛzɩzɩbɛhyɛlɛ sʋ̃ a nɩ bɛfa bɛma yɛ.”

8. Sɛ yɛyɛ yɛ bʋtayɩ nwʋ egyima wɔ mmɩlɩ mɔ yenyia ɛpɛ yɩ nkʋ̃ la a, mɩnla yɛ ɩkɔhʋla kezi a? (Kila mfonyini yi sʋ̃.)

⁸ Nɔhʋanlɛ, wɔ ye munwala yɛ ɔfʋã nu nɩ, ɩwɔ numɔ la a nɩ ye padi golɔ. Naasʋ̃ asʋ̃ eyi kile kɛɛ yɛlɔ́kʋla kodwu yɛ bʋtayɩ nwʋ a? Anhã. Sɛ yɛkɛyɛ ndianwʋ a: Anwʋma mɔɔ yɩ munwa yɛ sɩ kʋla ma ɛlɛnɩ be kʋla twu dɩka mɔɔ ɩkɔɔ nɩ ndɛndɛ. Naasʋ̃, ɔsʋnɩ kezimɔ anwʋma bela yɩ munwa ɛzɩzɩbɛ dɩ. Itwu eɣile be po a, anwʋma ɩáwɔ kʋlaa. Asʋ̃ eyi kile kɛɛ, iluwakɛɛ anwʋma ɩáwɔ nɩ ti, enii mɔɔ ɩkãã ɛlɛnɩ yɩ ikegyina dɩka ɔkʋ̃ wɔ nzulo yɩ zʋ a? Anhã. Iluwakɛɛ ɛlɛnɩ be wɔ kɛ a bɛfa moto anzɛnyɩɩ tabʋnlɩ bedi egyima. Sa ɩkʋla iduwa nninyeni eyimmɔ zʋ ɩma ɛlɛnɩ yɩ kotwu dɩka mɔɔ ɩkɔɔ nɩ. Sa yɛkʋla yɛfa ɛpɛ mɔɔ yɛwɔ nɩ yetindiã anwʋma yɩ nwʋ; kile kɛɛ ɩyɛ a ɛpɛ mɔɔ yɛwɔ nɩ kɔhʋla kɔhɔ azɩ. Na itwu eɣile be sʋ̃ a, ye padi kogolɔ kɛɛ yɛkɛyɛ yɛ bʋtayɩ yɩ nwʋ egyima. Meti sɛ yɛyɛ yɛ bʋtayɩ nwʋ egyima wɔ mmɩlɩ mɔ yenyia ɛpɛ yɩ nkʋ̃ la a, yɛlɔ́kʋla yekodwu yɛ bʋtayɩ yɩ nwʋ kyɩ̃. Naasʋ̃ kɛmɔ enii mɔɔ ɩkãã ɛlɛnɩ yɩ nɩ duwa ahʋanɩ mvʋlɔ zʋ twu dɩka mɔɔ ɩkɔɔ nɩ, sɛ ye padi kolɔ po a, sa yɛkʋla yɛkɔ ɔzʋlɔ yɛyɛ yɛ bʋtayɩ yɩ nwʋ egyima. Ɩwɔ numɔ, eyi yɩ ɛyɛlɛ ɩ́la azɩ, naasʋ̃ sɛ ɔbɔ mmɔdɩnɩ otwu wʋ bʋtayɩ  yɩ nwʋ a, wʋ anyɩ kele baaba. Ansaana yekozunzu mɔɔ yɛkɔhʋla yɛkɛyɛ nwʋ nɩ, bɛmá yehila odwokɔɣizialɛ be mɔɔ ɩkɔhʋla kɛɣa yɛ adwɩnɩ nu.

9. Asʋ̃ ɩdɩ yɩ ɔhʋanɩ zʋ kɛɛ yɛkɔhɔ zʋ yɛkɛyɛ yɛ bʋtayɩ nwʋ egyima mmɩlɩ mɔ yéni ɛpɛ yɩ ankasa nɩ a? Kilehile nu.

⁹ Gyehova pɛ kɛɛ yɛzʋ̃ yɛ ɛpɛ nu yɛfa anyɩnlɩlelɛ yɛsʋ̃mɩ yɩ. (Ndw. 100:2; 2 Kɔl. 9:7) Meti, ɩdɩ yɩ ɔhʋanɩ zʋ kɛɛ yɛkɔhɔ zʋ yɛkɛyɛ yɛ sunzuma ɔfʋã nu bʋtayɩ nwʋ egyima mmɩlɩ mɔ yéni ɛpɛ yɩ ankasa nɩ a? Sunzú sʋ̃mavʋlɔ Pɔɔlʋ yɩ ndianwʋ yɩ nwʋ kila. Ɩhanlɩ kɛɛ: “Mɩhyɛ mʋ nwʋ zʋ baaba.” (1 Kɔl. 9:25-27) Pɔɔlʋ hyɛlɩ yɩ nwʋ zʋ na ama ɩayɛ mɔɔ ɩdɩ baaba ɩávalɩ nwʋmɔ kɛɛ nɩ íni ɛpɛ kɛɛ ɩkɛyɛ zɔ nɩ. Asʋ̃ Gyehova leli Pɔɔlʋ yɩ ɔzʋ̃mɩnlɛ dianlɩ nu a? Ileli idianlɩ numɔ paa! Na Gyehova yilalɩ yɩ mmɔdɩnɩwɔlɛ yɩ zʋ.—2 Tim. 4:7, 8.

10. Sɛ yɛyɛ yɛ bʋtayɩ be nwʋ egyima mmɩlɩ mɔ yéni ɛpɛ nɩ po a, mɩnla mfasʋ yɛ yekenyia wɔ zʋ a?

¹⁰ Ɔzɔ la yɛ sɛ Gyehova nwʋ kɛɛ yɛbɔɔ mmɔdɩnɩ kɛɛ yekodwu bʋtayɩ be nwʋ mmɩlɩ mɔ yéni ɛpɛ mɔɔ numɔ yɛ sɩ po a, yɩ anyɩ sɔ paa. Iluwakɛɛ Gyehova zi kɛɛ ebiye a, kɛ mmɩlɩ munwala yɛ anyɩ deli egyima pɔkyɩɩ mɔɔ yɛyɛɛ yɩ nwʋ dɩyɛ, naasʋ̃ izi kɛɛ ɔlɔlɛ mɔɔ yɛwɔ yɛma yɩ ti mɔɔ yɛyɛɛ a. Kɛmɔ Gyehova yilalɩ Pɔɔlʋ nɩ, ikeyila amɩyɛ sʋ̃ yɛ mmɔdɩnɩwɔlɛ zʋ. (Ndw. 126:5) Na sɛ yɛba yɛnwʋ kɛɛ Gyehova iyilaa ye egyima yɩ zʋ a, ebiye a yɛkɔwɔ yɩ tʋ po yekenyia ɛpɛ mɔɔ numɔ yɛ sɩ. Eliyema baalɛ Lucyna mɔɔ ɩzʋ̃ Poland hanlɩ kɛɛ: “Ɩyɛ a, nɩ mɩábɛ kɛɛ mʋkɔhɔ dasɩlɛlilɛ, titili mmɩlɩ mɔ mɩvɛ nɩ. Naasʋ̃ sɛ mʋbɔ mmɔdɩnɩ mʋkɔ na mʋpɔ mɩba awudo a, kezimɔ mɩ anyɩ de nɩ, ɩ́dɩ dɩyɛ ɛɣalɛ.” Meti bɛmá yehila mɔɔ yɛkɔhʋla yɛkɛyɛ mmɩlɩ mɔ yéni ɛpɛ nɩ.

11. Kɛ Gyehova kɔhʋla kɔwʋwa yɛ ma yɛkɛhyɛ yɛ nwʋ zʋ yekeze a?

¹¹ Bɔ́ mpayɩ fa pɩbɛ bɔnwʋzʋhyɛlɛ. Mbɔmɩ sʋ̃maa nɩ adwɩnɩ mɔɔ ɩwɔ bɔnwʋzʋhyɛlɛ mɛda yɛ lɛ kɛɛ yɛkɔhwɩ̃ yɛ nwʋ wɔ dɩyɛ tanɩ yɩ ɛyɛlɛ nwʋ. Naasʋ̃, bɔnwʋzʋhyɛlɛ nwʋ hyinyia na ama yɛayɛ dɩyɛ baaba, titili mmɩlɩ mɔ egyimalilɛ be yɩ ɛyɛlɛ yɛ sɩ anzɛnyɩɩ yéni ɛpɛ kɛɛ yɛkɛyɛ dɩyɛ kʋ̃ nɩ yɩ nɩ. Kakɛ́ kɛɛ, bɔnwʋzʋhyɛlɛ kɩnla sunzuma mma yɩ nwʋ, meti siã Gyehova ma ɩva sunzuma nwanzanwanza nɩ ɩwʋwa wʋ ma ɔhʋla ɛla subanɩ mɔɔ nwʋmɔ hyinyia eyi be ali. (Lk. 11:13; Gal. 5:22, 23) David mɔɔ yeli bɔmʋnlɩ yɛhã yi odwokɔ nɩ hanlɩ kezimɔ mpayɩwɔlɛ wʋwalɩ yɩ nwʋ odwokɔ. Nɩ ɩábɛ kɛɛ itindiã yɩzayɩ yɩ dɩyɛzumanlɛ nu. Ɩhanlɩ kɛɛ: “Nɩ misiã Gyehova kɛɛ ɩwʋwa mɩ ma mʋhʋla mɩhyɛ mʋ nwʋ zʋ. Na iluwa yɩ mmʋwalɩyɛ zʋ nɩ, mʋhʋla mʋwɔlɩ yɩ tʋ kɛɛ musumaa mɩzamɩ mɩ dɩyɛ mɔɔ miádindiã nu.”

12. Mɩnla ɔhʋanɩ zʋ yɛ Odwokɔhanlɛvʋlɔ 11:4 kɔhʋla kɔwʋwa yɛ ma yekodwu ye sunzuma ɔfʋã nu bʋtayɩ nwʋ a?

¹² Áma ɛdɩkɛ kɛɛ dɩyɛ bela kɔhɔ bʋwɔ. Wɔ oyuwadɩ eyi nu mɛyɩ, yelényia mmɩlɩ mɔ dɩyɛ bela kɔhɔ bʋwɔ nkʋ̃ʋ̃ kɔhɔ kɔbʋmɩ awielɩyɛ. Meti sɛ yɛkã kɛɛ yɛdɩkɛɛ a, yɛlɔ́kʋla kodwu yɛ bʋtayɩ nwʋ kyɩ̃. (Kɩnga Odwokɔhanlɛvʋlɔ 11:4.) Eliyema be mɔɔ bɔfʋlɔ yɩ Dayniel hanlɩ kɛɛ: “Mmɩlɩ baaba bela íni kɛ. Meti íni kɛɛ yɛdɩkɛ, mɛyɩ yɛ lɛ kɛɛ yekodu agyiakɛ.” Eliyema Paul mɔɔ ɩwɔ Uganda sʋ̃ hanlɩ sianti fʋlɔ be ti mɔɔ íni kɛɛ yetu mɔɔ ɩsɛ kɛɛ yɛyɛ nɩ yewula mmɩlɩ fʋlɔ. Ɩhanlɩ kɛɛ: “Sɛ bʋwabɩlɛ yɩ yɛ sɩ po na yetu nwʋmɔ agyiakɛ a, Gyehova kɔwʋwa yɛ.”—Mal. 3:10.

13. Sɛ yɛfa bʋtayɩ ngyɩkɩ̃ɩ̃ ngyɩkɩ̃ɩ̃ yɛbɔ yɩ tʋ a, mɩnla mfasʋ yɛ ɩwɔ zʋ a?

¹³ Fa bʋtayɩ ngyɩkɩ̃ɩ̃ ngyɩkɩ̃ɩ̃ bɔ yɩ tʋ. Sɛ ɩkɔ ɩyɛ kɛɛ mɔɔ bʋtayɩ yɩ dɩ kezi a, ɩkɛyɛ sɩ kɛɛ yekenyia ɛpɛ mɔɔ numɔ yɛ sɩ kɛɛ yekodwu nwʋmɔ. Sɛ ɔzɔ yɛ ɩdɩ wɔ wʋ ɔfʋã nu a, mɩnla ti mɔ wʋava bʋtayɩ ngyɩkɩ̃ɩ̃ ngyɩkɩ̃ɩ̃ siye wʋ anyɩ zʋ mfomi a? Kɛ ndianwʋ nɩ, sɛ ɩdɩ wʋ bʋtayɩ kɛɛ ɛkɛla Kilisinyianɩ subanɩba be ali a, mɩnla ti mɔɔ wʋábɩbɛ ahʋanɩ ngyɩkɩ̃ɩ̃ ngyɩkɩ̃ɩ̃ mɔɔ ɔkɔhʋla koluwa zʋ kɛla ɔzɔ subanɩ yɩ ali a? Sɛ ɩdɩ Bayɩbʋlʋ yɩ munwala yɛ ɛpɛ kɛɛ ɛkɩnga  sʋ̃ a, mɩnla ti mɔɔ wʋáyɛ nhyɩhyɛlɩyɛ kɛɛ ɛkɛva mmɩlɩ ɛgyɩkɩ̃ɩ̃ ɛkɛɣɩnga ɔfʋã ɛgyɩkɩ̃ɩ̃ be eɣile bela a? Tomáš mɔɔ yɛhanlɩ yɩ nwʋ odwokɔ yɩ, nɩ ɩpɛ kɛɛ ɩfa ɔlʋbɔ ɔkʋ̃ ɩkɩnga Bayɩbʋlʋ yɩ naasʋ̃ nɩ ɩyɛ sɩ ɩma yɩ. Ɩhanlɩ kɛɛ: “Mɩɣa mʋnwʋnlɩ kɛɛ, nɩ mɔɔ mɩkɩnga yɩ eɣile bela nɩ zʋ̃nɩ mamɩ sʋ̃maa. Meti mizili pɔkɔ kɛɛ mʋkɔwɔ yɩ tʋ dɔkʋ̃, naasʋ̃ eyi mɛyɩ mɩyɛlɩ kɛɛ eɣile bela mɩkɛɣɩnga nkyɩkyɛmi ɛgyɩkɩ̃ɩ̃ be la na mɩadwɩnɩndwɩnɩ nwʋ. Mɔɔ ɩzʋ̃ numɔ ɩɣalɩ yɛ lɛ kɛɛ, mɩ anyɩ ɣa leli ɛɣɩngalɛ yɩ nwʋ paa.” Iluwakɛɛ Tomáš’ yɩ anyɩ ɣa leli Bayɩbʋlʋ ɛɣɩngalɛ yɩ nwʋ ti, ɩwɔlɩ yɩ tʋ kɛɛ ɩlɛ mmɩlɩ sʋ̃maa ɩkɩngaa. Awielɩyɛ kʋlaa nɩ, ɩɣɩnganlɩ Bayɩbʋlʋ munli yi munwala. c

14. Mɩnla yɛ ɩkɔhʋla ɩkɛma ɩkɛyɛ sɩ kɛɛ okodwu wʋ bʋtayɩ yɩ nwʋ a?

¹⁴ Alɔbɔ odwokɔ yɛ lɛ kɛɛ, sɛ yɛhyɛ yɛ nwʋ zʋ anzɛnyɩɩ yenyia ɛpɛ mɔɔ numɔ yɛ sɩ kɛɛ mɩnla la po a, sa debe kʋla si mɔɔ ɩkɛma ɩkɛyɛ sɩ kɛɛ yekodwu yɛ bʋtayɩ nwʋ. Kɛ ndianwʋ nɩ, debe “mɔɔ yɛáhila yɩ ɔhʋanɩ” kɔhʋla kezi mɔɔ ɩlɛ́ma yekenyia mmɩlɩ mɔ yehyinyia na yɛava yɛayɛ yɛ bʋtayɩ nwʋ egyima. (Odw. 9:11) Yɛkɔhʋla keyiyia odwokɔzɩzɩbɛ be mɔɔ ɩkɛma yɛ padi kogolɔ anzɛnyɩɩ ɩkɛma yɛ anwʋzɩzɩbɛ zʋ kɛdɩ. (Ɛɣɛ. 24:10) Akʋ̃ sʋ̃, iluwakɛɛ yɛáli munli ti, yɛkɔhʋla keli mfʋmɩ be mɔɔ ɩkɛma ɩkɛyɛ sɩ kɛɛ yekodwu yɛ bʋtayɩ nwʋ. (Wul. 7:23) Anzɛnyɩɩ ɩyɛ po a, ɛvɛlɩyɛ kɔhʋla kɔlʋsa yɛ. (Mt. 26:43) Meti, sɛ debe si mɔɔ ɩma ɩyɛ sɩ kɛɛ yekodwu yɛ bʋtayɩ yɩ nwʋ a, mɩnla yɛ ɩkɔhʋla kɔwʋwa yɛ a?

15. Sɛ debe isii wʋ ɔhʋanɩ kɛɛ okodwu wʋ bʋtayɩ yɩ nwʋ a, asʋ̃ mɛyɩ kile kɛɛ ɩsɛ kɛɛ eyiaki a? Kilehile nu. (Ndwomi 145:14)

¹⁵ Kakɛ kɛɛ sɛ debe isii wʋ ɔhʋanɩ a, mɛyɩ iáhile kɛɛ tʋ wʋ adwɩnɩ nu. Bayɩbʋlʋ yɩ ma yɛnwʋ kɛɛ, ɩyɛ a sa yɛkɔ zʋlɔ yeyiyia ndwokɔzɩzɩbɛ. Naasʋ̃ isia sʋ̃ ɩma yɛnwʋ kɛɛ, iluwa Gyehova yɩ mmʋwalɩyɛ zʋ nɩ, sa yɛkʋla yɛbɔ mmɔdɩnɩ yetwu yɛ bʋtayɩ nwʋ. (Kɩnga Ndwomi 145:14.) Eliyema Philip mɔɔ yɛhanlɩ yɩ odwokɔ nɩ hanlɩ kɛɛ: “Mɩáva mɩ adwɩnɩ  misiye mbɔmɩ dʋdʋ mɔɔ mɩákʋla mutwu mʋ bʋtayɩ nwʋ nɩ zʋ, mfomi mɩfa misiye mmɩlɩ mɔ mʋwɔlɩ yɩ tʋ dɔkʋ̃ kɛɛ mukodwu bʋtayɩ yɩ nwʋ nɩ zʋ.” David sʋ̃ mɔɔ yɛhã yɩ odwokɔ nɩ hanlɩ kɛɛ: “Sɛ debe si mɔɔ ɩma ɩyɛ sɩ kɛɛ mukodwu mʋ bʋtayɩ nwʋ a, mubu yi kɛɛ ɩdɩ ɔnwʋmɔ ɔhʋanɩ mɔɔ mɩlɛ mikilee Gyehova kɛɛ mʋdɔ yɩ paa.” Nyɛ, sɛ ɩyɛ sɩ kɛɛ mɩnla la po na ɔkɔ zʋ bɔ mmɔdɩnɩ kɛɛ okodwu wʋ bʋtayɩ nwʋ a, nɩ ɛlɛ ekilee Gyehova kɛɛ ɛpɛ kɛɛ ɔsɔ yɩ anyɩ. Sɛ Gyehova nwʋ kɛɛ ɔbɔɔ mmɔdɩnɩ okodwu wʋ bʋtayɩ nwʋ a, yɩ anyɩ kele baaba!

16. Sɛ debe isii wʋ ɔhʋanɩ kɛɛ okodwu wʋ bʋtayɩ yɩ nwʋ a, mɩnla yɛ ɩkɔhʋla ɩkɛma okozuma a?

¹⁶ Sɛ debe isii wʋ ɔhʋanɩ a, suma debe wɔ nu. Dwɩnɩndwɩnɩ mɔɔ izili yɩ nwʋ, na bizia wʋ nwʋ kɛɛ, ‘Mɩnla yɛ mʋkɔhʋla mɩkɛyɛ na eyi iázili ebiyekʋ̃ a?’ (Ɛɣɛ. 27:12) Naasʋ̃ sɛ ɩyɛ sɩ kɛɛ okodwu bʋtayɩ be nwʋ a, ebiye a nɩ ikile kɛɛ, bʋtayɩ kʋ̃ nɩ ɩdɩ kezi ɩma wʋ. Sɛ ɩdɩ zɔ wɔ wʋ ɔfʋã nu a, mɛyɩ nɩ dwɩnɩndwɩnɩ bʋtayɩ yɩ nwʋ dɔkʋ̃ kila kɛɛ, ɩdɩ mɔɔ wʋ anwʋzɩzɩbɛ kɔhʋla kodwu nwʋ a. d Sɛ bʋtayɩ be dɩ kezi ma wʋ na mɛyɩ ti wʋákʋla twu nwʋmɔ a, Gyehova ɩlɛ́kã kɛɛ wʋábɔ wʋ nwʋ mmɔdɩnɩ.—2 Kɔl. 8:12.

17. Mɩnla ti mɔɔ íni kɛɛ yɛma yɛ ɛɣɛɛlɛ fi mɔɔ yɛhʋla yɛyɛ daada nɩ a?

¹⁷ Áma wʋ ɛɣɛɛlɛ fi mɔɔ ɔhʋla ɛyɛ daada nɩ. Bayɩbʋlʋ kã kɛɛ, “Nyamɩnlɩ ɩ́dɩ boniayɛ. Yɩ ɛɣɛɛlɛ iávi egyima mɔɔ mʋnlʋmmɔ bɛyɛ.” (Hib. 6:10) Meti wʋzawʋ sʋ̃, áma wʋ ɛɣɛɛlɛ fi bʋtayɩ mɔɔ ɔhʋla odwu nwʋmɔ nɩ. Ɩyɛ a nɩ ɔwʋwa azɩ ɔdwɩnɩndwɩnɩ nwʋmɔ. Kɛ ɩdɩ ɛ nɩɩ Gyehova yɩ avinli abusunwawɔlɛ mɔɔ ɛhyɛlɩ numɔ ɛzɩzɩbɛ, yɩ nwʋ odwokɔ mɔɔ ɛkã ekile mmenii mvʋlɔ anzɛnyɩɩ onlumanlɛ mɔɔ ɔhʋla odwu nwʋmɔ nɩ. Kɛmɔ ɔhʋla dwuli wu sunzuma ɔfʋã nu bʋtayɩ azʋlɔtʋ nwʋ mmɩlɩ be nɩ, ɔzɔ la yɛ ɔkɔhʋla kenyia anyunumihɔlɛ na wʋadwu bʋtayɩ mɔɔ iziye wʋ anyɩ zʋ kakɩ nɩ nwʋ a.—Fɩl. 3:16.

18. Mmɩlɩ mɔ yɛbɔɔ mmɔdɩnɩ kɛɛ yekodwu yɛ bʋtayɩ nwʋ nɩ, mɩnla yɛ ɩsɛ kɛɛ yɛkakɛ yɛyɛ a? (Kila mfonyini yi sʋ̃.)

¹⁸ Gyehova yɩ mmʋwalɩyɛ ti, sa ɔkʋla otwu wʋ bʋtayɩ nwʋ kɛmɔ enii mɔɔ ɩkãã ɛlɛnɩ wɔ nzulo zʋ nɩ kʋla twu dɩka mɔɔ ɩkɔɔ nɩ la. Naasʋ̃ kakɛ kɛɛ, bɛzabɛ mɔɔ bɛkã ɛlɛnɩ nɩ, bɛ anyɩ de mmɩlɩ mɔ ɛlɛnɩ yɩ ɩkɔɔ ɩávalɩ nwʋmɔ mɔɔ ikezi bela nɩ. Ɔzɔ la yɛ sɛ ɛfa wʋ adwɩnɩ siye kezimɔ Gyehova ɩbʋwaa wʋ nɩ zʋ a, ɩkɛma wʋ anyɩ kele mmɩlɩ mɔ ɔbɔɔ mmɔdɩnɩ kɛɛ okodwu wʋ bʋtayɩ nwʋ nɩ. (2 Kɔl. 4:7) Sɛ wʋáma wʋ padi kolɔ a, ekenyia nyilalɛ sʋ̃maa.—Gal. 6:9.