Sɛ yɛkɩngaa Bayɩbʋlʋ yɩ a, sa yɛkʋla yɛyɛ ɛbɩbɛlɛnu na ama yɛadɩ mɔɔ yesumaa nɩ tʋ. Naasʋ̃ kɛ Bayɩbʋlʋ nu nnimidi sʋ̃maa mɔɔ yɛpɛ kɛɛ yenyia ti mɔɔ yɛyɛ ɛbɩbɛlɛnu a. Yɛpɛ kɛɛ yɛpɩbɛ sʋ̃maa yɛfalɩ Gyehova yi subanɩ azʋlɔtʋ nwʋ na ama ɔlɔlɛ mɔɔ yɛwɔ yɛma yɩ nɩ ɩayɛ kezi. Mɔɔ ɩkɔwʋwa yɛ nɩ, sa yɛkʋla yebizia yɛ nwʋ kɛɛ, ‘Mɩnla yɛ Bayɩbʋlʋ nu odwokɔ eyi ɩma musuma mɩfalɩ Gyehova nwʋ a?’

Kɛ ndianwʋ nɩ, sa ɔkʋla ɛpɩbɛ sʋ̃maa falɩ kezimɔ Gyehova lalɩ yi subanɩ azʋlɔtʋ be dɩkɛɛ ɔlɔlɛ, nɣɛlɛbɛ, pɛlɩpɛlɩlilɛ, nɩɩ tumi ali nɩ nwʋ. Naasʋ̃, kɛ subanɩ eyimmɔ la yɛ Gyehova wɔ a. Sa ɔkʋla osuma yi subanɩ ngɩnlɩma mvʋlɔ nwʋ dɩyɛ. Kɛ ɩkɛyɛ na wʋanwʋ ndwokɔ sʋ̃maa wʋavalɩ subanɩ eyimmɔ nwʋ a?

Sɛ ɔkɔ Watch Tower Publications Index yi nu a, ɔkɔnwʋ odwokɔtile mɔɔ ise “Gyehova,” wɔ mɛyɩ tʋ nɩ ɔkɔnwʋ odwokɔtile ɛgyɩkɩ̃ɩ̃ mɔɔ ise “Qualities by Name.” Ɔkɔnwʋ subanɩ azʋlɔtʋ mvʋlɔ mɔɔ ɩbʋ 50 wɔ kɛ. Sa ɔkʋla ɛyɛ ɛbɩbɛlɛnu wɔ kɛ ɛfalɩ subanɩ ɔkʋ̃ mɔɔ ɛkɩngaa nwʋmɔ odwokɔ wɔ Bayɩbʋlʋ yɩ nu nɩ nwʋ. (Sɛ Buuku Mɔɔ Gyehova Dasɩvʋlɔmaa Bɛfa Bɛyɛ Ɛbɩbɛlɛnu nkʋ̃ la yɛ ɔwɔ a, kila odwokɔtile mɔɔ ise “Gyehova Nyamɩnlɩ” nɩ tʋ na buko odwokɔtile ɛgyɩkɩ̃ɩ̃ mɔɔ ise “Gyehova Yi Subanɩ Azʋlɔtʋ.”)