• “Mɩdɩlɩ nɣanlɩ kɛɛ mu hũ zɩkɛ agyiahʋnlɩ ɩdʋwadʋwa zʋlɔ mbɔmɩ sʋ̃maa.”

• “Mɩdɩlɩ nɣanlɩ kɛɛ mɩ anyunu gua azɩ, mʋ nwʋ ɩáyɛ akɔnɔ na mfasʋ íni mʋ zʋ.”

• “Mɩákʋla mɩkã nwʋmɔ odwokɔ mikile abiyela. Mɩvalɩ ɛyɛkɛ mɔɔ midii nɩ muwulalɩ mʋ nwʋ.”

• “Mɩdɩlɩ nɣanlɩ kɛɛ Gyehova ɩádwɩnɩ mʋ nwʋ.”

Ndwokɔ eyimmɔ ma yɛnwʋ kezimɔ sɛ ohunɛ be kila ponogɩlafi a, ɩma yɩ yɩ idi ɛyɛkɛ. Na sɛ ohunɛ yɩ fa aziyianɩ anzɛnyɩɩ alʋbɔ sʋ̃maa yɛ zɔ wɔ ɛɣɩntanlɛ nu a, ebiye a ɛyɩlɛ yɩ kɛdɩ nɣanlɩ kɛɛ ɩlɔ́kʋla ikele yi ikeli dɔkʋ̃. Ɛyɩlɛ be hanlɩ kɛɛ, “Mɩdɩlɩ nɣanlɩ kɛɛ mízi mu hũ bʋwɔ. Asʋ̃ dɩyɛ fʋlɔ be wɔ kɛnɩ mɔɔ ɩva iziye mɩ a?”

Bɛhɛlɛlɩ odwokɔ eyi bɛmanlɩ ɛyɩlɛmaa mɔɔ bo hũmmɔ kila ponogɩlafi nɩ. a Ɩkɛhã Bayɩbʋlʋ nu egyinalɛzʋ-ndwokɔ mɔɔ ɩkɛyɩkyɩ ɛyɩlɛ yɩ ɛɣɛɛlɛ, ianyia anwʋlazʋ kɛɛ Gyehova pɛ kɛɛ ɩbʋwa yɩ, na yɩ azʋ̃ nu iadwe yi ma ɩahɔ zʋ ɩazʋ̃mɩ Gyehova. b

Ɩwɔ numɔ kɛɛ ɔlɔ́kʋla ekezi mɔɔ wu hũ yɛ munwala ɔhʋanɩ dɩyɛ, naasʋ̃ sa ɔkʋla ɛyɛ nninyeni be mɔɔ ɩkɛma wʋ azʋ̃ nu kodwe wʋ. Sunzú nninyeni eyimmɔ nwʋ kila.

Áma obu wʋ nwʋ ɔfɔ. Alice c dɩlɩ nɣanlɩ kɛɛ, ɩkɛyɛ kɛɛ yɩ nwʋ ɩáyɛ yi hũ akɔnɔ. Nɩ ibizia yɩ nwʋ kɛɛ, ‘Mɩnla ti mɔɔ mmaalɛ mvʋlɔ mfomi yɛ bɔ nwʋ yɛ mu hũ akɔnɔ a?’ Ɛyɩlɛmaa be bu bɔ nwʋ ɔfɔ wɔ kezimɔ bɛyɛ bɛ dɩyɛ wɔ bo hũ yɩ nyɛlɩyɛ yɩ nwʋ, na bɛtɩ nɣanlɩ kɛɛ bɔnlʋmmɔ mfomi yɛ bɛsɩkɛɛ odwokɔ yi a. Danielle hanlɩ kɛɛ, “Eyi manlɩ mɩvalɩ ɛya na nninyeni hyɛlɩ mʋ zʋ baaba, na ɩmanlɩ mɩdɩlɩ nɣanlɩ kɛɛ ebiye a mɩ nyɛlɩyɛ yɛ ɩmanlɩ nninyeni leli salɛ nu a.”

Sɛ ɔzɔ yɛ wʋzawʋ sʋ̃ ɛtɩ nɣanlɩ a, nwʋ yɩ kɛɛ Gyehova ɩlɛ́fa wu hũ yɩ nyɛlɩyɛ yɩ nwʋ ɔzʋnɩ ikediã wʋ zʋ. Gyemisi 1:14 kã kɛɛ: “Enii yɩzayɩ yɩ nnwʋnlamɩ akɔnɔ tanɩ tanɩ nɩ mmɔ yɛ ɩma ɩyɛ tanɩ a.” (Wul. 14:12; Fɩl. 2:12) Kɛ ankɩ Gyehova kowu wʋ ɔfɔ nɩ, yɩ anyɩ sɔ wʋ nɔhʋanlɛlilɛ mfomi.—2 Mm. 16:9.

 Ɛyɩlɛ be kɔhʋla kɛdɩ nɣanlɩ kɛɛ iluwakɛɛ mɛyɩ ɛyɩlɛ yɩ nwʋ ɩáyɛ pɩkɛ sʋ̃maa nɩ ti yɛ yi hũ kila ponogɩlafi a, naasʋ̃ ɩ́dɩ zɔ kʋlaa. Nnimidimaa kile kɛɛ sɛ abiye kila ponogɩlafi a, ɩma inyia nna nwʋ akɔnɔ ɛzɩzɩbɛ ɛzɩzɩbɛ be mɔɔ baalɛ bela ɩlɔ́kʋla ikegyina yi munwa.

Áma ɛma adwɩnɩndwɩnɩ hyɛ wʋ zʋ. Catherine hanlɩ kɛɛ, mɔɔ nɩ ɩdwɩnɩ nwʋmɔ eɣile bela yɛ lɛ ponogɩlafi mɔɔ nɩ yi hũ kila nɩ. Frances sʋ̃ hanlɩ kɛɛ: “Sɛ mɩánwʋ dɩka mɔɔ mu hũ wɔ a, nɩ ɩdʋ mɩ adwɩnɩndwɩnɩ. Ɩma ɔzɔ eɣile yi munwala mɩyɛ basaa.” Ɛyɩlɛmaa be sʋ̃ kã kɛɛ, sɛ bɛ nɩɩ be mmeliyema Kilisinyiamaa mɔɔ bezi bo hũ yɩ ɔhawʋ yɩ nwʋ odwokɔ yiyia a, nɩ ɩma bɛ anyɩ ɩdʋ̃. Mvʋlɔ kã kɛɛ bɛyɛ ankʋnamɩ, iluwakɛɛ bɛtɩ nɣanlɩ kɛɛ abiyela ɩádɩ bɔ bʋwabɩlɛ yɩ tʋ.

Sɛ ɛtɩ nɣanlɩ zɔ a, ɩdɩ yɩ ɔhʋanɩ zʋ. Naasʋ̃, sɛ ɔkɔ zʋlɔ dwɩnɩndwɩnɩ nwʋ a, wʋ adwɩnɩ kodu kɔvʋla. Bɔ mmɔdɩnɩ kɛɛ ɛkɛva wʋ adwɩnɩ keziye ɛ nɩɩ Gyehova avinli abusunwawɔlɛ zʋ mfomi. Eyi kɛma ekenyia anwʋzɩzɩbɛ mɔɔ ɛkɛva kegyina yi munwa.—Ndw. 62:2; Ɛfɩ. 6:10.

Wɔ Bayɩbʋlʋ nu nɩ, mmaalɛ be wɔ kɛnɩ mɔɔ bɛ adwɩnɩ duli vʋlalɩ na bɔwɔlɩ Gyehova mpayɩ bɛva bɛbɩbɛlɩ ɛɣɛɛlɛyɩkyɩlɛ, sɛ ɛkɩnga bɔ nwʋ ndwokɔ na ɔdwɩnɩndwɩnɩ nwʋ a, ɩkɔwʋwa wʋ. Kɛ mmɩlɩ munwala yɛ ɩyɩlɩ bɔ ɔhawʋ nɩ kɛnɩ dɩyɛ, naasʋ̃ ɩmanlɩ bɛ azʋ̃ nu dweli bɛ. Kɛ ndianwʋ nɩ, bʋwabɩlɛ be mɔɔ Hana hɔlɩ numɔ nɩ manlɩ “ilili alɔbɔ kezile.” Naasʋ̃ “ɩvalɩ mmɩlɩ tɩndɩnlɩ ɩwɔlɩ Gyehova mpayɩ.” Na ɩávalɩ nwʋmɔ kɛɛ nɩ ízi kezimɔ nninyeni kɔhɔ kowie nɩ, yɩ azʋ̃ nu dweli yi.—1 Sa. 1:10, 12, 18; 2 Kɔl. 1:3, 4.

Ma asafʋ nu mbanimbani bɔwʋwá wʋ. Sa bɔkʋla bɛyɛ kɛɛ “ɛɣɩntanlɛdɩka wɔ anwʋma mmɩlɩ nu, eziyelɛdɩka wɔ ahũmidulɛ mmɩlɩ nu.” (Ayɩ. 32:2.) Sa bɔkʋla bɛkamvʋ eliyema baalɛ be mɔɔ ɔkɔhʋla kenyia yi nu anwʋlazʋ bekile wʋ, na wʋahã wʋ ɔhawʋ wʋahile yi ma ɩayɩkyɩ wʋ ɛɣɛɛlɛ.—Ɛɣɛ. 17:17.

Sa ɔkʋla ɔbʋwa wu hũ ma iyiaki ponogɩlafi hilalɛ a? Ebiye a. Bayɩbʋlʋ yɩ kã kɛɛ, “mmenii anwɩ̃ ɩdɩyɛnɛ ɩtɛla enii ɔkʋ̃” mmɩlɩ mɔ yɛbɔɔ mmɔdɩnɩ kɛɛ yekeli odwokɔzɩzɩbɛ be anzɛnyɩɩ tamvʋlɔ be mɔɔ yɩ nwʋ yɛ sɩ zʋ nkunimi nɩ. (Odw. 4:9-12) Nnimidimaa kile kɛɛ, sɛ agyiahʋnlɩmaa bɔ numɔ yɛ egyima kɛɛ bɔkɔwʋwa bo nu ɔkʋ̃ ma  ikeyiaki ponogɩlafi hilalɛ a, ɩbʋwa paa, na ɩma bɔkʋla bede bɔ nwʋ bedi dɔkʋ̃.

Amba, sʋ̃maa gyĩ mmɔdɩnɩ mɔɔ ohunɛ yɩ yɩzayɩ ɩkɔwɔ kɛɛ ikeyiaki ponogɩlafi hilalɛ nɩ zʋ. Asʋ̃ ɩwɔ mpayɩ iziã Gyehova yɩ kɛnɩ mmʋwalɩyɛ anzɛnyɩɩ ɩbɩbɛ asafʋ nu mbanimbani bɔ mmʋwalɩyɛ a? (2 Kɔl. 4:7; Gye. 5:14, 15) Asʋ̃ ɩyɛ nhyɩhyɛlɩyɛ be mɔɔ ɩkɔwʋwa yɩ ma ikeyiaki ponogɩlafi hilalɛ, dɩkɛɛ kezimɔ ɩkɛva yɩ foonu ikeli egyima nɩɩ yɩ nwʋ mɔɔ ikehila yɩ bʋwɔ wɔ bʋwabɩlɛ azʋlɔtʋ mɔɔ ɩkɔhwɩnhwɩ̃ yɩ ma ikehila ponogɩlafi nwʋ a? (Ɛɣɛ. 27:12) Asʋ̃ iziyeziye yɩ nwʋ kɛɛ ɩkɛma ɔkɔwʋwa yɩ, mɔɔ ɩlɛ́fa dɩyɛ bela ikeziye wʋ a? Sɛ ɔzɔ a, mɛyɩ nɩ ɔkɔhʋla ɔkɔwʋwa yɩ.

Mɩnla ɔhʋanɩ zʋ a? Kila ndianwʋ eyi. Felicia gyialɩ Ethan mɔɔ nɩ ponogɩlafi hilalɛ halɩ yɩ kɛnɩ ɔzʋmɩ yɩ nnwuakula nu. Felicia manlɩ ɩyɛlɩ mɛlɛkɛ ɩmanlɩ yi hũ kɛɛ sɛ inyia akɔnɔ kɛɛ ikehila ponogɩlafi a, ɩ nɩɩ yɩ kɔwɔ nwʋmɔ nkɔmmɔ. Ethan hanlɩ kɛɛ: “Mʋzʋ̃ mɩ ahʋnlɩnɩ munwala nu mɩkã kezimɔ mɩtɩ nɣanlɩ mikile mɩ yɩ. Ɩzʋ̃ ɔlɔlɛ nu ɩbʋwa mɩ ma mʋtwɩ̃ mʋ nwʋ wɔ bʋwabɩlɛ azʋlɔtʋ mɔɔ ɩkɔhʋla ɩkɛma mikehila ponogɩlafi nɩ nwʋ. Na ɩbʋwa mɩ ma mikila mʋ nwʋ bʋwɔ wɔ kezimɔ mɩkɛva intanɛtɩ mikeli egyima nɩ nwʋ.” Felicia di ɛyɛkɛ wɔ akɔnɔ mɔɔ Ethan nyia kɛɛ ikehila ponogɩlafi nɩ nwʋ, na ɩdɩ yɩ ɔhʋanɩ zʋ sʋ̃. Naasʋ̃ ɩhanlɩ kɛɛ, “ɛya mɔɔ mɩfa, nɩɩ ɛyɛkɛ mɔɔ midi nɩ, ɩáma ɩtwɩ̃ yɩ nwʋ wɔ subanɩ tanɩ eyi nwʋ. Mmɩlɩ mɔ yɛwɔlɩ bʋwabɩlɛ yɩ nwʋ nkɔmmɔ yewieli nɩ, nɩ iziyeziye yɩ nwʋ kɛɛ ɩkɔwʋwa mɩ ma mɩzamɩ sʋ̃ mikeli mɩ ɛyɛkɛlilɛ yɩ zʋ.”

Sɛ bosunzu nninyeni nwʋ zɔ a, ɩbʋwa ohunɛ yɩ ma iyiaki ponogɩlafi hilalɛ na ɩbʋwa ma ɛyɩlɛ yɩ sʋ̃ nyia yi nu anwʋlazʋ dɔkʋ̃. Sɛ ohunɛ yɩ kã yɩ mɛlɛkɛyɛlɛ nwʋ odwokɔ, dɩka mɔɔ ɩkɔɔ, nɩɩ mɔɔ ɩyɛɛ ikile yɩ yɩ a, ɩma ide yi idi, iluwakɛɛ ɩáva dɩyɛ bela isiye yɩ ebiyekʋ̃.

Ekila a, ɔkɔhʋla kɔwʋwa wu hũ wɔ ɔzɔ ɔhʋanɩ yɩ zʋ a? Sɛ ɔzɔ a, sa ɔkʋla ɛ nɩɩ yɩ bo numɔ sunzu ndwokɔ eyi nwʋ. Ɩkɛma ɩkɛva kɛyɛ yɩ bʋtayɩ kɛɛ ikeyiaki ponogɩlafi hilalɛ na ama wʋanyia debe wʋagyina zʋ wʋale yi wʋali. Kɛ ankɩ yɩ ɔhawʋ nwʋ odwokɔ mɔɔ ɛkɛhã nɩ kɛma ɩkɛva ɛya nɩ, ɩsɛ kɛɛ ɩbɔ mmɔdɩnɩ ɩtɩ kezimɔ yɩ nyɛlɩyɛ nɩ ma ɛtɩ nɣanlɩ nɩ tʋ. Wʋ bʋtayɩ yɛ lɛ kɛɛ ɔkɔwʋwa yɩ wɔ mmɔdɩnɩ mɔɔ ɩbɔɔ kɛɛ ikeyiaki subanɩ tanɩ eyi nɩ na wʋahʋla wʋanyia yi nu anwʋlazʋ dɔkʋ̃. Ɩsɛ kɛɛ bo munwala bosunzu mɔɔ ɩma abiye tɩ nɣanlɩ kɛɛ ikehila ponogɩlafi nɩ nwʋ na bɔnwʋ kezimɔ bekeli ɔhawʋ yɩ nwʋ egyima. d

 Sɛ wu kunlu tu kɛɛ ɛ nɩɩ wʋ nwʋkãvʋlɔ bɔbɔɔ nwʋmɔ nkɔmmɔ a ɩkɛlanɩ mbevilelilɛ a, bɛmá asafʋ nu ebani be mɔɔ bɔwɔ yi nu anwʋlazʋ ɩhɩnlá bɔ nwʋ ma bozunzu nwʋmɔ. Kakɛ kɛɛ sɛ wʋ nwʋkãvʋlɔ yɩ iyiaki ponogɩlafi hilalɛ po a, ebiye a ɩkɛhyɛ ɛgyɩkɩ̃ɩ̃ ansaana wʋanyia yi nu anwʋlazʋ dɔkʋ̃. Áma wʋ padi kolɔ. Fa wʋ adwɩnɩ siye nzɩnzanlɩyɛ ngyɩkɩ̃ɩ̃ ngyɩkɩ̃ɩ̃ mɔɔ ɩyɛɛ nɩ zʋ. Nyia anwʋlazʋ kɛɛ mmɩlɩ ɩkɔlɩ zʋlɔ nɩ, sɛ bo munwala bɔkɔ zʋ bɛda abʋtalɩ ali a, bɛ agyiahʋnlɩ yɩ kɔzɔ dɔkʋ̃.—Odw. 7:8; 1 Kɔl. 13:4.

Na sɛ ɩwɔ numɔ la na wu hũ isia ɩkɔ ikila ponogɩlafi dɔkʋ̃ ɛ? Asʋ̃ mɛyɩ kile kɛɛ ilónunli yɩ nwʋ na ɩlɔ́kʋla ikeyiaki kyɩ̃ a? Ɩ́dɩ zɔ ankasa. Mɔɔ ɩdɩ yɛ lɛ kɛɛ sɛ yi hilalɛ ɩhalɩ yɩ kɛ a, ɩkɔhʋla ɩkɛhyɛ paa ansaana iayiaki. Sɛ iyiaki yi hilalɛ po a, ebiye a ɩwɔ numɔ la a, ɩkɔhɔ ikehila dɔkʋ̃. Mɔɔ ɩkɛyɛ na iásia ɩkɔ ikila dɔkʋ̃ nɩ, ɩsɛ kɛɛ ɩyɛ nninyeni be mɔɔ ɩkɛma ɩkɛyɛ sɩ kɛɛ ikezia ikehila. Na sɛ iyiaki yi hilalɛ po a, ɩsɛ kɛɛ ɩkɔ zʋlɔ ɩhyɛ yɩ nwʋ zʋ. (Ɛɣɛ. 28:14; Mt. 5:29; 1 Kɔl. 10:12) Ɩsɛ kɛɛ ɩsɩnza “yɩ ahʋnlɩnɩ nɩɩ yɩ adwɩnɩ” na inyia subanɩ fʋlɔ na isuma kɛɛ ‘ikehyi tanɩ’ mɔɔ ponogɩlafi hilalɛ kɩnla nwʋmɔ nɩ. Akʋ̃ sʋ̃, ɩsɛ kɛɛ ɩtwɩ̃ yɩ nwʋ wɔ nyɛlɩyɛ evinli be dɩkɛɛ bɔ nwʋ mɔɔ bɔgʋlʋ ma bɔ nwʋ ba nɩ nwʋ. (Ɛfɩ. 4:23; Ndw. 97:10; Wul. 12:9) Asʋ̃ ɩbɔɔ mmɔdɩnɩ kɛɛ ɩzʋ̃ yɩ pɛ nu ɩkɛyɛ nzɩnzanlɩyɛ eyimmɔ a? Sɛ ɔzɔ a, mɛyɩ nɩ sa ɩkʋla iyiaki ponogɩlafi hilalɛ kʋlaa kʋlaa. e

Na sɛ dɩyɛ bela iáhile kɛɛ wʋ nwʋkãvʋlɔ yɩ pɛ kɛɛ ɩyɛ nzɩnzanlɩyɛ sʋ̃ ɛ? Ebiye a, ɩkɛma wʋ padi kogolɔ, ɛkɛva ɛya, na wʋadɩ nɣanlɩ kɛɛ ɩyɩ wʋ ɩma. Sɛ ɩba yɩ zɔ a, tʋ wʋ adwɩnɩndwɩnɩ munwala kua Gyehova zʋ na ekenyia azʋ̃nudwolɩyɛ. (1 Pit. 5:7) Kɔ zʋlɔ suma dɩyɛ, dwɩnɩndwɩnɩ nwʋmɔ, na kɔ zʋlɔ bɔ mpayɩ fa hyɛ ɛ nɩɩ Gyehova avinli abusunwawɔlɛ nu ɛzɩzɩbɛ. Mmɩlɩ mɔ ɛyɛɛ zɔ nɩ, nyia anwʋlazʋ kɛɛ yɩzayɩ sʋ̃ ɩkɔhwɩ̃ ikeɣike wʋ. Ayɩzaya 57:15 kã kɛɛ, Gyehova nɩɩ bɛzabɛ mɔɔ “bɛ ahʋnlɩnɩ iwuwu” nɩ yɛ bɛda a, na ɩpɛ kɛɛ ɩbʋwa bɛ ma benyia anyɩnlɩlelɛ dɔkʋ̃. Bɔ mmɔdɩnɩ kɛɛ ɛkɛyɛ Kilisinyianii baaba, pɩbɛ mmʋwalɩyɛ wɔ asafʋ nu mbanimbani bɛ kɛ, na kɔ zʋlɔ nyia anwʋlazʋ kɛɛ eɣile be, wu hũ zʋ̃ yɩ ahʋnlɩnɩ munwala nu kɛyɛ nzɩnzanlɩyɛ.—Wul. 2:4; 2 Pit. 3:9.