1. Kɛmɔ Hibulumaa 12:1 kile nɩ, mɩnla yɛ ɩsɛ kɛɛ yɛyɛ na ama yɛahʋla yeadu nnwʋanlɩ nwʋ tɔlɔnwa nɩ yeawie a?

 BAYƖBƲLƲ yɩ fa yɛ ɛbɩlawɔlɛ kɛɛ Kilisinyiamaa nɩ tindiã tɔlɔnwadulɛ nwʋ. Bɛzabɛ mɔɔ bokodu nnwʋanlɩ nwʋ tɔlɔnwa yɩ bokowie nɩ, bekenyia nnwʋanlɩ mɔɔ íni awielɩyɛ. (2 Tim. 4:7, 8) Ɩsɛ kɛɛ yɛyɛ mɔɔ yɛkɔhʋla bela yɛkɔ zʋlɔ yetu tɔlɔnwa yɩ, iluwakɛɛ ɩlɛ́kyɛ na tɔlɔnwadulɛ yɩ ɩaɣa awielɩyɛ. Sʋ̃mavʋlɔ Pɔɔlʋ mɔɔ ɩhʋla iduli yɩ nnwʋanlɩ nwʋ tɔlɔnwa yɩ iwieli nɩ, ɩhanlɩ nninyeni be mɔɔ ɩkɔhʋla kɔwʋwa yɛ ma yekeli nkunimi nwʋ odwokɔ. Ɩhanlɩ kɛɛ, ‘bɛmá yɛyɩ dɩyɛ bela mɔɔ ɩtʋndʋnlɩ yɛ agyia nu nɩ yegua. Bɛmá yeminyia yɛ nwʋ baaba yeɣiandi eɣiandinlɛ nɩ mɔɔ igyĩ yɛ anyunu nɩ yɛhɔ awielɩyɛ.’—Kɩnga Hibulumaa 12:1.

2. Sɛ bɛkã kɛɛ “yɛyɩ́ dɩyɛ bela mɔɔ ɩtʋndʋnlɩ yɛ agyia nu nɩ yegua” a, kɛ yɩ tʋ kile a?

² Mmɩlɩ mɔ Pɔɔlʋ hanlɩ kɛɛ “yɛyɩ́ dɩyɛ bela mɔɔ ɩtʋndʋnlɩ yɛ agyia nu nɩ yegua” nɩ, asʋ̃ nɩ ɩpɛɛ ikehile kɛɛ Kilisinyianii ɩlɔ́sʋwa adɩsʋwa bela anzɛnyɩɩ? Anhã. Kɛ ɔzɔ yɛ nɩ ɩpɛɛ ikehile a. Mfomi nɩ ɩpɛɛ ikehile kɛɛ, yɛyɩ́ dɩyɛ bela mɔɔ nwʋmɔ iáhyinyia mɔɔ ɩkɔhʋla kɔdʋndʋnlɩ yɛ agyia nu nɩ yegua. Nninyeni eyimmɔ kɔhʋla kɛma yɛ padi kogolɔ na yeayiaki nnwʋanlɩ nwʋ tɔlɔnwadulɛ yɩ. Sɛ yɛkɔhɔ zʋlɔ kodu tɔlɔnwa yɩ a, ɩsɛ kɛɛ yɛnwʋ nninyeni mɔɔ nwʋmɔ iáhyinyia mɔɔ ɩkɔhʋla kɔdʋndʋnlɩ yɛ agyia nu nɩ na yɛyɩ yɩ kɛ ndɛndɛ. Mmɩlɩ ɔkʋ̃ yɩ nu la sʋ̃, íni kɛɛ yeyiaki adɩsʋwa mɔɔ ɩsɛ kɛɛ yɛsʋwa nɩ yekua  kɛ. Kɛ zɔ a, yɛlɔ́kʋla kodu nnwʋanlɩ nwʋ tɔlɔnwa yɩ yekowie. (2 Tim. 2:5) Mɩnla adɩsʋwa yɛ ɩsɛ kɛɛ yɛsʋwa a?

3. (a) Kɛmɔ Galatiyiamaa 6:5 kile nɩ, mɩnla yɛ ɩsɛ kɛɛ yɛsʋwa a? (b) Mɩnla yɛ yekozunzu nwʋmɔ wɔ dɩyɛzumanlɛ eyi nu a, na mɩnla ti a?

³ Kɩnga Galatiyiamaa 6:5. Pɔɔlʋ hanlɩ debe mɔɔ ɩsɛ kɛɛ yɛsʋwa nwʋ odwokɔ. Ɩhanlɩ kɛɛ “abiyela ɩbazʋwa yɩzayɩ yɩ adɩsʋwa.” Wɔ ɛkɩ nɩ, nɩ Pɔɔlʋ ɩkãã mɔɔ Nyamɩnlɩ pɩbɛ wɔ yɩ sʋ̃mɩvʋlɔ bela kɛnɩ, mɔɔ abiye ɩlɔ́kʋla ɩkɛyɛ ɩkɛma yɛ nɩ nwʋ odwokɔ. Wɔ dɩyɛzumanlɛ eyi nu nɩ, yɛkɔnwʋ nninyeni be mɔɔ ɩdɩ yɛzayɛ yɛ “adɩsʋwa” mɔɔ ɩsɛ kɛɛ yɛsʋwa nɩɩ kezimɔ yɛkɔzʋwa yɩ. Akʋ̃ sʋ̃, yɛkɔnwʋ nninyeni be mɔɔ nwʋmɔ iáhyinyia mɔɔ ebiye a yɛzʋwa, na yeazuma kezimɔ yɛkɛyɩ yekogua. Yɛzayɛ yɛ adɩsʋwa mɔɔ yɛkɔzʋwa na yɛayɩ nninyeni mɔɔ nwʋmɔ iáhyinyia nɩ yeagua nɩ, ɩkɔwʋwa ma yekodu nnwʋanlɩ nwʋ tɔlɔnwa nɩ yekowie.

4. Mɩnla ti mɔɔ ɩáyɛ sɩ kɛɛ yekeli yɛnwʋzʋyilalɛ nwʋ anʋhʋba yɩ zʋ a? (Kila mfonyini yi sʋ̃.)

⁴ Yɛnwʋzʋyilalɛ nwʋ anʋhʋba. Mmɩlɩ mɔ yeyilalɩ yɛ nwʋ zʋ yɛmanlɩ Gyehova nɩ, yɛwɔlɩ  anʋhʋba kɛɛ yɛkɔzʋ̃mɩ yɩ na yɛayɛ yɩ apɛdɩ. Ɩsɛ kɛɛ yedidili ɔzɔ anʋhʋba yɩ zʋ. Kɛ yɛkɔwɔ yɛ ɛbɩla ma ɩ nɩɩ yɛnwʋzʋyilalɛ nwʋ anʋhʋba yɩ keyiyia nɩ, ɩdɩ asɛdɩ mɔɔ numɔ yɛ ɔnlʋmɔ, naasʋ̃ ɩáyɛ sɩ sʋ̃maa iluwakɛɛ Gyehova wɔlɩ yɛ kɛɛ yɛyɛ́ yɩ apɛdɩ. (Yik. 4:11) Ɩwɔlɩ yɛ wɔ ɔhʋanɩ be zʋ mɔɔ ɩma yenyia ɛpɛ kɛɛ yɛkɔnwʋ yɩ na yɛazʋ̃mɩ yɩ, na ɩwɔlɩ yɛ sʋ̃ wɔ yi subanɩ zʋ. Iluwa eyi ti, yɛkʋla yebike yi na sɛ yetiye yi a, yɛ anyɩ de. (Ndw. 40:8) Akʋ̃ sʋ̃ sɛ yɛyɛ Nyamɩnlɩ yɩ apɛdɩ na yesumazuma yɩ Ɣa yɩ a, ɩma yɛzayɛ yɛ ahʋnlɩnɩ ɩtɔ ye kunlu.—Mt. 11:28-30.

5. Mɩnla yɛ ɩkɔwʋwa wʋ ma ekeli wʋnwʋzʋyilalɛ nwʋ anʋhʋba yɩ zʋ a? (1 Dwɔɔnʋ 5:3)

⁵ Kɛ ɩkɛyɛ na wʋazʋwa adɩsʋwa eyi a? Nninyeni anwɩ̃ eyi kɔhʋla kɔwʋwa. Mɔɔ ili bɔmʋnlɩ, kɔ zʋlɔ hyɛ ɔlɔlɛ mɔɔ ɔwɔ ma Gyehova yɩ nu ɛzɩzɩbɛ. Sɛ ɔdwɩnɩndwɩnɩ nninyeni mɔɔ ɩyɛ ɩma wʋ nɩɩ nyilalɛ mɔɔ ɩkɛva ɩkɛma wʋ wɔ eɣile be nɩ nwʋ a, sa ɩkʋla ɩbʋwa wʋ ma ɛyɛ zɔ. Sɛ ɔlɔlɛ mɔɔ ɔwɔ ma Nyamɩnlɩ nɩ yɛ kezi a, ɩkɛyɛ mɛlɛkɛ kɛɛ ekediye yi. (Kɩnga 1 Dwɔɔnʋ 5:3.) Mɔɔ ɩtɔ zʋlɔ anwɩ̃, sumazumá Gyisɛsɩ. Ɩhʋla ɩyɛlɩ Nyamɩnlɩ yɩ apɛdɩ iluwakɛɛ ɩwɔlɩ mpayɩ izianlɩ Gyehova yɩ mmʋwalɩyɛ na ɩvalɩ yɩ adwɩnɩ iziyeli yɩ akatuwa yɩ zʋ. (Hib. 5:7; 12:2) Dɩkɛɛ Gyisɛsɩ nɩ, bɔ́ Gyehova mpayɩ fa siã yɩ mmʋwalɩyɛ eɣile bela na kɔ zʋlɔ dwɩnɩndwɩnɩ nnwʋanlɩ mɔɔ íni awielɩyɛ nwʋ anyɩnlɩlazʋ yɩ nwʋ. Sɛ ɔlɔlɛ mɔɔ ɔwɔ ma Nyamɩnlɩ nɩ yɛ kezi na osumazuma yɩ Ɣa yɩ a, ɩkɔhʋla kɛma ekeli wʋnwʋzʋyilalɛ nwʋ anʋhʋba yɩ zʋ.

6. Mɩnla ti mɔɔ ɩsɛ kɛɛ yedi yɛ abusunwa nu asɛdɩ nwʋ egyima a? (Kila mfonyini yi sʋ̃.)

⁶ Yɛ abusunwa nu asɛdɩ. Wɔ yɛ nnwʋanlɩ nwʋ tɔlɔnwadulɛ eyi nu nɩ, ɩsɛ kɛɛ yɛdɔ Gyehova nɩɩ Gyisɛsɩ yɛtɛla ye mmusunwamaa. (Mt. 10:37) Naasʋ̃ eyi iáhile kɛɛ ɩsɛ kɛɛ yebu yɛ anyɩ yekua yɛ abusunwa nu asɛdɩ zʋ, iluwakɛɛ sɛ yɛkɛvata wɔ Nyamɩnlɩ nɩɩ Kɩlayɩsɩ bɛ anyɩ zʋ a, ɩsɛ kɛɛ yedi yɛ abusunwa nu asɛdɩ nwʋ egyima. (1 Tim. 5:4, 8) Sɛ yɛyɛ zɔ a, yɛ anyɩ kele. Gyehova zi kɛɛ, sɛ agyiahʋnlɩmaa da ɔlɔlɛ nɩɩ annidi ali kile bɔ nwʋ, na awʋvʋlɔ tɩdɩ bo nnwuakula na bɔdɔ bɛ na nnwuakula sʋ̃ tiye bɛ awʋvʋlɔ a, ɩkɛma abusunwamaa yɩ munwala bɛ anyɩ kele paa.—Ɛfɩ. 5:33; 6:1, 4.

7. Kɛ ɩkɛyɛ na wʋali asɛdɩ mɔɔ ɔwɔ wɔ abusunwa yɩ nu nɩ nwʋ egyima a?

⁷ Kɛ ɩkɛyɛ na wʋazʋwa adɩsʋwa eyi a? Sɛ ɛdɩ ohunɛ, ɛyɩlɛ anzɛnyɩɩ kuakula a, fá Bayɩbʋlʋ nu fʋlɔdulɛ yɛ egyima. Na áma ekyina wʋ nɣanlɩdɩlɛ, amamɩlɛ anzɛnyɩɩ mɔɔ nnimidimaa bɛkã nɩ zʋ ɛyɛ dɩyɛ. (Ɛɣɛ. 24:3, 4) Fá yɛ Bayɩbʋlʋ nwʋ awuuku azʋlɔtʋ yɩ di egyima. Awuuku eyimmɔ bʋwa yɛ ma yɛnwʋ kezimɔ yɛkɛva Bayɩbʋlʋ nu egyinalɛzʋ-ndwokɔ yɛkɛyɛ egyima. Kɛ ndianwʋ nɩ, Wʋ Abusunwa Kɔhʋla Kenyia Anyɩnlɩlelɛ blohyʋɔ yɩ nɩɩ Sa Ɔkʋla Enyia Anyɩnlɩlelɛ Daabaa! buuku yi ozumalɛdɩyɛ 49 nɩɩ 50 fa egyinalɛzʋ-ndwokɔ mɔɔ ɩkɔhʋla kɔwʋwa agyiahʋnlɩmaa, awʋvʋlɔ, nɩɩ nnwuakula ɩma. b Sɛ abusunwamaa yɩ be bɛáva mɔɔ Bayɩbʋlʋ kã nɩ bɛyɛ egyima po a, sí wʋ kɛnɣa kɛɛ mɔwʋ mɛyɩ ɛkɛva ɛkɛyɛ egyima. Sɛ ɛyɛ zɔ a, wʋ abusunwa yɩ kenyia zʋlɔ mfasʋ na Gyehova keyila wʋ.—1 Pit. 3:1, 2.

8. Mɩnla ɔhʋanɩ zʋ yɛ yɛ pɔkɔzilɛ azʋlɔtʋ kɔhʋla kɛhã yɛ a?

⁸ Mɔɔ ɩzʋ̃ yɛ pɔkɔzilɛ azʋlɔtʋ nu ɩba. Gyehova ɩva ye nu bela yɩ pɛ ɩma yɩ, na ɩpɛ kɛɛ yesizi  abɔkɔ baaba na yɛ anyɩ iale. Naasʋ̃ mɔɔ ɩzʋ̃ abɔkɔ tanɩ mɔɔ yesizi yi nu ɩba mɛyɩ, ɩáwɔ yɛ nwʋ banɩ wɔ nwʋmɔ. (Gal. 6:7, 8) Eyi ti, sɛ yesizi abɔkɔ tanɩ, yɛkã ndwokɔ anzɛnyɩɩ yɛyɛ nyɛlɩyɛ tanɩ be na yetuaa zʋlɔ mma a, ɩsɛ kɛɛ yede yetiã nu. Mɔɔ yɛyɛlɩ nɩ kɔhʋla kɛma ye ti ɔwʋwaba kowu yɛ ɔfɔ. Naasʋ̃ sɛ yede yetiã numɔ kɛɛ yɛási pɔkɔba a, ɩkɛhã yɛ ma yɛkɛhã yɛ tanɩ, yɛkɛzɩnza yɛ ɔhʋanɩ na yɛálili ɔzɔ mfʋmɩ yɩ dɔkʋ̃. Sɛ yɛyɛ zɔ a, ɩkɔwʋwa yɛ ma yɛkɔhɔ zʋlɔ yekoluwa nnwʋanlɩ ɔhʋanɩ yɩ zʋ.

9. Sɛ ezi pɔkɔ tanɩ be a, mɩnla yɛ ɔkɔhʋla kɛyɛ a? (Kila mfonyini yi sʋ̃)

⁹ Kɛ ɩkɛyɛ na wʋazʋwa adɩsʋwa eyi a? Sɛ ɔlɔ́kʋla kɛyɛ pɔkɔ tanɩ mɔɔ ezili yi nwʋ hwɩɩ a, de mɔɔ ɩzʋ̃ numɔ ɩɣa yɩ nɩ tiã nu. Nwʋ yɩ kɛɛ ɔlɔ́kʋla kɛzɩnza mɔɔ ɛyɛ dua numɔ yɩ. Áma ɔbɔ mmɔdɩnɩ kɛɛ okowu wʋ nwʋ bɩ̃, anzɛnyɩɩ ɛkɛva wʋ pɔkɔ tanɩ yɩ nwʋ ɔzʋnɩ ekediã mmenii mvʋlɔ zʋ. Mfomi, de wʋ mfʋmɩ yɩ tiã numɔ, na bɔ mmɔdɩnɩ yɛ mɔɔ ɔkɔhʋla kakɩ yɩ. Sɛ wʋ ti ɔwʋwaba ibuu wʋ ɔfɔ wɔ mfʋmɩ be mɔɔ eli nwʋ a, ɔzʋ̃ kãnwʋazɩ nu bɔ Gyehova mpayɩ, kã wʋ tanɩ kile yi na siã yɩ kɛɛ ɩvá ɩhyɛ wʋ. (Ndw. 25:11; 51:3, 4) Bɛzabɛ mɔɔ wʋ nyɛlɩyɛ yɩ lileli bɛ nɩ, pa kyɛbɛ bɛ na sɛ nwʋmɔ kehyinyia a, pɩbɛ asafʋ nu mbanimbani yi bɔ mmʋwalɩyɛ. (Gye. 5:14, 15) Sumá debe wɔ wʋ mfʋmɩ yɩ nu na bɔ́ mmɔdɩnɩ kɛɛ ɛlɛ́yɛ dɔkʋ̃. Sɛ ɛyɛ zɔ a, ɔkɔhʋla kenyia anwʋlazʋ kɛɛ Gyehova kɔnwʋ wʋ nwɔkɛ na ɩawʋwa wʋ.—Ndw. 103:8-13.

10. Mɩnla ti mɔɔ sɛ yɛfa yɛ adwɩnɩ yesiye mɔɔ yɛlɔ́kʋla kɛyɛ zʋ a, ɩkɔhʋla ɩkɛyɛ adɩsʋwa ɔnlʋmɔ a? (Galatiyiamaa 6:4)

¹⁰ Áma ɛfa wʋ adwɩnɩ esiye mɔɔ ɔlɔ́kʋla kɛyɛ zʋ. Sɛ yɛfa yɛ nwʋ yetindiã mmenii mvʋlɔ nwʋ a, ɩkɔhʋla ɩkɛva nninyeni mɔɔ yɛlɔ́kʋla kɛyɛ nwʋ adɩsʋwa ikediã yɛ zʋ. (Kɩnga Galatiyiamaa 6:4.) Sɛ yɛta yɛfa yɛ nwʋ yetindiã mvʋlɔ a, ɩkɛma yɛ anyɩ kɔwʋlʋ bɛ na yɛ nɩɩ bɛ abʋmɩ zʋ. (Gal. 5:26) Sɛ yɛpɩɩ kɛɛ yɛkɛyɛ mɔɔ mmenii mvʋlɔ bɛyɛ mmɩlɩ mɔ yéni nwʋmɔ anwʋzɩzɩbɛ a, nɩ yepilaa amɩyɛzayɛ yɛ nwʋ. Akʋ̃ sʋ̃, Bayɩbʋlʋ yɩ ma yɛnwʋ kɛɛ, sɛ yɛdɩkɛɛ debe na ɩkyɛɛ a, ɩkʋla ɩma yɛ padi kolɔ. Meti nɣɛlɛbɛ bela íni numɔ kɛɛ yɛkɛbɩ kɛɛ yɛyɛɛ debe mɔɔ yɛlɔ́kʋla yɛkɛyɛ kyɩ̃ nɩ! (Ɛɣɛ. 13:12) Sɛ yɛyɛ zɔ a, ɩkɛma yɛ anwʋzɩzɩbɛ zʋ kɛdɩ na yekogugo yɛ nwʋ wɔ nnwʋanlɩ nwʋ tɔlɔnwadulɛ yɩ nu.—Ɛɣɛ. 24:10.

11. Mɩnla yɛ ɩkɔwʋwa yɛ ma yɛkɛyɩ yɛ adwɩnɩ wɔ nninyeni mɔɔ yɛlɔ́kʋla yɛkɛyɛ zʋ a?

¹¹ Kɛ ɩkɛyɛ na wʋadʋ adɩsʋwa eyi wʋagua a? Áma ɛpɩ kɛɛ ɛkɛyɛ mɔɔ ɩbʋlʋ mɔɔ Gyehova zi kɛɛ wʋ anwʋzɩzɩbɛ kɔhʋla nɩ zʋ. Iáhila ɔhʋanɩ kyɩ̃ kɛɛ ɛkɛyɛ mɔɔ ɩbʋlʋ wʋ anwʋzɩzɩbɛ zʋ. (2 Kɔl. 8:12) Nyia anwʋlazʋ kɛɛ Gyehova ɩáva mɔɔ ɛyɛ nɩ tindiã mmenii mvʋlɔ bɛ dɩyɛ nwʋ. (Mt. 25:20-23) Yɩ anyɩ sɔ wʋ ɛkɛla nu munwala mɔɔ ɔzʋ̃ ɔsʋ̃mɩ yɩ, wʋ nɔhʋanlɛlilɛ, nɩɩ wu pindinyiigyinanlɛ. Ɔzʋ̃ kãnwʋazɩ nu de tiã numɔ kɛɛ wʋ ɔlʋbɔ, wʋ pɔkɔdɩlɛ, nɩɩ wʋ bʋwabɩlɛ kɔhʋla kɛhã mɔɔ ɔkɔhʋla kɛyɛ yɩ kakɩ nɩ. Dɩkɛɛ Bazɩlayɩ nɩ, sɛ wʋ pɔkɔdɩlɛ anzɛnyɩɩ wʋ ɔlʋbɔ mɔɔ ɩhɔ anyunumi ti, ɔlɔ́kʋla ekeli asɛdɩ be nwʋ egyima a, áma ede etiã wʋ nwʋ zʋ.(2 Sa. 19:35, 36) Dɩkɛɛ Mosisi nɩ, má mvʋlɔ bɔwʋwa wʋ na sɛ ɩkɛyɛ bʋwɔ a, fa egyima yɩ be wula bɛ sa. (Ɛkɩ. 18:21, 22) Kãnwʋazɩ mɔɔ ɩdɩ zɔ nɩ kɔwʋwa wʋ ma ɛlɛ́fa wʋ adwɩnɩ keziye nninyeni mɔɔ ɔlɔ́kʋla kɛyɛ nɩ zʋ, na ɩkɛma ɔkɔhɔ zʋ kodu nnwʋanlɩ nwʋ tɔlɔnwa yɩ.

12. Mɔɔ ɩzʋ̃ mmenii mvʋlɔ bɔ pɔkɔzilɛ tanɩ nu ɩba nɩ, ɩsɛ kɛɛ yɛma ɩyɛ adɩsʋwa ɩma yɛ a? Mɩnla ti a?

¹² Mmenii mvʋlɔ bɔ pɔkɔzilɛ tanɩ nwʋ ɔzʋnɩ mɔɔ yede yetiã yɛ nwʋ zʋ. Yɛlɔ́kʋla kezi pɔkɔ yɛkɛma mmenii mvʋlɔ; na sɛ besi pɔkɔ tanɩ  sʋ̃ a, mɔɔ ɩzʋ̃ numɔ ɩba nɩ, kɛ mmɩlɩ munwala yɛ yɛkɔhʋla kezi yi ɔhʋanɩ a. Kɛ ndianwʋ nɩ, kuakula be kɔhʋla kezi pɔkɔ kɛɛ iyiakii Gyehova zʋ̃mɩnlɛ, eyi kɔhʋla kɛma yɩ awʋvʋlɔ bɛ ɛɣɛɛlɛ kɔwɔ baaba. Sɛ awʋvʋlɔ yɩ tɩ nɣanlɩ kɛɛ bɛ ɣa yɩ pɔkɔzilɛ tanɩ yɩ zʋ̃ bɛzabɛ a, ɩkɔhʋla ɩkɛyɛ adɩsʋwa ɔnlʋmɔ ɩkɛma bɛ. Na Gyehova sʋ̃ iáhila ɔhʋanɩ kɛɛ bɛkɛva ɔzɔ adɩsʋwa yɩ bekediã bɔ nwʋ zʋ.—Wul. 14:12.

13. Sɛ kuakula be si pɔkɔ tanɩ a, mɩnla yɛ awʋvʋlɔ yɩ kɔhʋla kɛyɛ a?

¹³ Kɛ ɩkɛyɛ na wʋadʋ adɩsʋwa eyi wʋagua a? Nwʋ yɩ kɛɛ Gyehova ɩva abiyela yɩ pɛ ɩma yɩ. Na ɩma ɔhʋanɩ ma abiyela si yɩ pɔkɔ, mɔɔ kɛ yɛkɔzʋ̃mɩ yɩ anzɛnyɩɩ yɛlɔ́sʋ̃mɩ yɩ kɩnla nwʋ. Gyehova zi kɛɛ, kɛ ɔwʋvʋlɔ nɩ wʋáli munli; mɔɔ ɩpɛɛ yɛ lɛ kɛɛ ɛkɛyɛ mɔɔ ɔkɔhʋla. Meti pɔkɔ mɔɔ wʋ ɣa yɩ kezi nɩ, ɩdɩ yɩzayɩ yɩ adɩsʋwa na kɛ mɔwʋ be a. (Ɛɣɛ. 20:11) Naasʋ̃ ebiye a, ɛkɛdɩ nɣanlɩ kɛɛ wʋáyɛ wʋ dɩyɛ bʋwɔ kɛ ɔwʋvʋlɔ. Sɛ ɔzɔ a, kã kezimɔ ɛtɩ nɣanlɩ nɩ kile Gyehova na siã yɩ kɛɛ ɩnwʋ wʋ nwɔkɛ. Izi kɛɛ ɔlɔ́kʋla kɛzɩnza mɔɔ izili nɩ. Akʋ̃ sʋ̃, iáhila ɔhʋanɩ kɛɛ ekezi mma tanɩ mɔɔ wʋ ɣa yɩ ituaa nɩ yi munwa. Kakɛ kɛɛ, sɛ wʋ ɣa yɩ bɔ mmɔdɩnɩ kɛɛ ikezia ɩkɛɣa Gyehova pɛ a, yɩzayɩ sʋ̃ iziyeziye yɩ nwʋ kɛɛ ikele yɩ.—Lk. 15:18-20.

14. Mɩnla ti mɔɔ íni kɛɛ yebu yɛ nwʋ fɔ sʋ̃maa a?

¹⁴ Yɛ nwʋ mɔɔ yebu yi fɔ sʋ̃maa. Sɛ yɛyɛ tanɩ a, ɩdɩ yɩ ɔhʋanɩ zʋ kɛɛ yekowu yɛ nwʋ fɔ. Naasʋ̃ íni kɛɛ yebu yɛ nwʋ fɔ sʋ̃maa. Ɩdɩ adɩsʋwa mɔɔ ɩsɛ kɛɛ yɛtʋ yekua. Mɩnla yɛ ikile kɛɛ abiye ibuu yɩ nwʋ fɔ sʋ̃maa a? Sɛ yɛkã yɛ tanɩ, yɛsɩnza na yɛyɛɛ mɔɔ yɛkɔhʋla bela kɛɛ yɛlɛ́yɛ yɩ ebiyekʋ̃ a, sa yɛkʋla yenyia anwʋlazʋ kɛɛ Gyehova ɩva ɩhyɛ yɛ. (Egy. 3:19) Mmɩlɩ mɔ yɛyɛ eyimmɔ munwala yewie nɩ, Gyehova ɩábɛ kɛɛ yɛkɔhɔ zʋ yekowu yɛ nwʋ fɔ, iluwakɛɛ izi kɛɛ sɛ yɛyɛ zɔ a, ɩkɛha yɛ paa. (Ndw. 31:10) Sɛ alɔbɔlilɛ hyɛ yɛ zʋ a, ɩkɔhʋla ɩkɛma yekeyiaki nnwʋanlɩ nwʋ tɔlɔnwadulɛ yɩ.—2 Kɔl. 2:7.

15. Mɩnla yɛ ɩkɔwʋwa wʋ na wʋáwuli wʋ nwʋ fɔ sʋ̃maa a? (1 Dwɔɔnʋ 3:19, 20) (Kila mfonyini yi sʋ̃)

 ¹⁵ Kɛ ɩkɛyɛ na wʋadʋ adɩsʋwa eyi wʋagua a? Sɛ tanɩ nwʋ ɔfɔlilɛ ɩhyɛ wʋ zʋ a, fá wʋ adwɩnɩ siye kezimɔ Nyamɩnlɩ fa “tanɩ kyɛ kʋlaa kʋlaa” nɩ zʋ. (Ndw. 130:4) Sɛ ɩfa tanɩ ɩkyɛ bɛzabɛ mɔɔ bonlu bɔ nwʋ ankasa nɩ a, ɩbɔ anʋhʋba kɛɛ: “Mɩlɛ́kakɛ bɛ tanɩ ebiyekʋ̃.” (Gyɛ. 31:34) Eyi kile kɛɛ, Gyehova ilékyina tanɩ mɔɔ ɩva ɩhyɛ wʋ nɩ zʋ ikowuwa wʋ fɔ. Meti áma enyia adwɩnɩ kɛɛ mma mɔɔ otuaa wɔ tanɩ mɔɔ ɛyɛ dua numɔ yɩ zʋ kakɩ nɩ kile kɛɛ Gyehova ɩlɛ́falɩ ɩlɛ́kyɛlɩ wʋ. Meti sɛ ɩba yɩ kɛɛ iluwa wʋ mfʋmɩ yɩ ti, asɛdɩ mɔɔ ɛlɛ wɔ asafʋ yɩ nu ivi wʋ sa po a, áma ɛfa wʋ nwʋ ɛya. Gyehova ɩáhɔ zʋlɔ ɩdwɩnɩndwɩnɩ wʋ tanɩ yɩ nwʋ, meti íni kɛɛ wʋzawʋ sʋ̃ ɛyɛ zɔ.—Kɩnga 1 Dwɔɔnʋ 3:19, 20.

16. Kɛ tɔlɔnwadulɛmaa nɩ, mɩnla yɛ ɩsɛ kɛɛ yɛnwʋ yɩ a?

¹⁶ Mmɩlɩ mɔ yetuu nnwʋanlɩ nwʋ tɔlɔnwa nɩ, ɩsɛ kɛɛ ‘yeminyia yɛnwʋ yeɣiandi baaba, na yeanyia nkunimililɛ akyɛdɩ nɩ.’ (1 Kɔl. 9:24) Naasʋ̃ sɛ yɛkɔhʋla yɛkɛyɛ zɔ a, gyɩsɛ yɛnwʋ adɩsʋwa mɔɔ ɩsɛ kɛɛ yɛsʋwa nɩɩ mɔɔ ɩsɛ kɛɛ yɛtʋ yekua. Wɔ dɩyɛzumanlɛ eyi nu nɩ, nninyeni mɔɔ ɩsɛ kɛɛ yɛsʋwa nɩɩ mɔɔ ɩsɛ kɛɛ yɛtʋ yekua nɩ, yezunzu numɔ ɛgyɩkɩ̃ɩ̃ be nwʋ, naasʋ̃ sʋ̃maa wɔ kɛ. Gyisɛsɩ hanlɩ kɛɛ, “alɩyɛ sʋ̃maa elilɛ nɩɩ nzanyianlɛ nɩɩ ɛbɩla eyi nwʋ adwɩnɩndwɩnɩ” kɔhʋla kɛhyɛ yɛ zʋ. (Lk. 21:34) Ɛhɛlɛlɛ ndwokɔ eyimmɔ nɩɩ ɛhɛlɛlɛ ndwokɔ mvʋlɔ kɔhʋla kɔwʋwa wʋ ma ɔkɔnwʋ nzɩnzanlɩyɛ mɔɔ ebiye a, ihyinyia kɛɛ ɛyɛ mmɩlɩ mɔ otuu nnwʋanlɩ nwʋ tɔlɔnwa nɩ.

17. Mɩnla ti mɔɔ yɛkɔhʋla kenyia anwʋlazʋ kɛɛ sa yɛkʋla yetu nnwʋanlɩ nwʋ tɔlɔnwa nɩ yewie a?

¹⁷ Sa yɛkʋla yenyia anwʋlazʋ kɛɛ yɛkɔhʋla kodu nnwʋanlɩ nwʋ tɔlɔnwa nɩ yekowie, iluwakɛɛ Gyehova kɛma yɛ anwʋzɩzɩbɛ mɔɔ yehyinyia. (Ayɩ. 40:29-31) Meti, áma okugo wʋ nwʋ! Sumazuma sʋ̃mavʋlɔ Pɔɔlʋ mɔɔ ɩyɛlɩ mɔɔ ɩkɔhʋla bela kɛɛ ikenyia nkunimililɛ akyɛdɩ nɩ. (Fɩl. 3:13, 14) Abiyela ɩlɔ́kʋla kodu tɔlɔnwa eyi ɩkma wʋ, naasʋ̃ Gyehova kɔhʋla kɔwʋwa wʋ ma okodu okowie. Gyehova kɔhʋla kɔwʋwa wʋ ma ɔkɔzʋwa nninyeni mɔɔ ɩsɛ kɛɛ ɔsʋwa nɩ, na wʋayɩ adɩsʋwa mɔɔ nwʋmɔ iáhyinyia nɩ wʋagua. (Ndw. 68:19) Iluwa Gyehova mmʋwalɩyɛ zʋ nɩ, sa ɔkʋla ekyina pindinyii na wʋadu nnwʋanlɩ nwʋ tɔlɔnwa nɩ wʋawie!