1. Mɩnla ti mɔɔ Babilɔnʋmaa nɩ bɛ anyɩ ɣa lelili nkɔmɩhyɛnii Danɩyɛlɩ nwʋ a?

 MMƖLƖ mɔ Babilɔnʋmaa nɩ ɣa valɩ nkɔmɩhyɛnii Danɩyɛlɩ wɔ Gyelusalamɩ bɔhɔlɩ akɛlɛzʋ̃mɩnlɛ nu wɔ bo twonwa zʋ nɩ, nɩ ɩdɩ abɩlantɩyɛ. Naasʋ̃ bɔnwʋnlɩ debe wɔ Danɩyɛlɩ nwʋ. Bɔnwʋnlɩ kɛɛ Danɩyɛlɩ nwʋ yɛ pɩkɛ na ɩzʋ̃ abusunwa titili be nu sʋ̃. (1 Sa. 16:7) Meti, Babilɔnʋmaa nɩ dɩdɩlɩ yɩ ma ɩhɔ ɩzʋ̃mɩnlɩ wɔ bɛ ahɩmfiye kɛ.—Da. 1:3, 4, 6.

2. Mɩnla yɛ ɩmanlɩ Gyehova bɛlɩ Danɩyɛlɩ yi odwokɔ a? (Izikɩyɛlɩ 14:14)

² Kɛ Danɩyɛlɩ yɩ anwʋpɩkɛ anzɛnyɩɩ yi dibilɛ ti mɔɔ Gyehova lɔlɩ yɩ be a, mfomi kezimɔ ɩyɛlɩ yɩ dɩyɛ ti a. Mmɩlɩ mɔ Nyamɩnlɩ wɔlɩ Danɩyɛlɩ yi dima hɩnlanlɩ Nowa nɩɩ Dwoobu mɔɔ bɛdɩ mmenyia mɔɔ bɛ nɩɩ Nyamɩnlɩ luwa hyɛ na benyia dimaba wɔ yɩ anyunu nwʋ nɩ, ɩkɛyɛ kɛɛ nɩ Danɩyɛlɩ inyia kɛyɛ alʋbɔ 20 pɛ. (Gyn. 5:32; 6:9, 10; Dwb. 42:16, 17; kɩnga Izikɩyɛlɩ 14:14.) Na Gyehova hɔlɩ zʋlɔ lɔlɩ Danɩyɛlɩ wɔ yɩ nnwʋanlɩ eɣile munwatĩĩ nu.—Da. 10:11, 19.

3. Mɩnla yɛ yɛbazuma a?

³ Wɔ dɩyɛzumanlɛ eyi nu nɩ, yekozunzu Danɩyɛlɩ yi subanɩ anwɩ̃ be mɔɔ ɩmanlɩ ɩdʋlɩ bʋlɔ wɔ Gyehova anyɩ zʋ nɩ nwʋ. Yekeli bɔmʋnlɩ yekehila subanɩ yɩ numɔ ɔkʋ̃ bela nɩɩ kezimɔ ɩlalɩ yɩ ali. Mɛyɩ mɛda nɩ, yekehila mɔɔ ɩwʋwalɩ yɩ ma inyianlɩ ɔzɔ subanɩ yɩ. Awielɩyɛ kʋlaa nɩ, yekehila kezimɔ yekozumazuma yɩ. Ɩwɔ numɔ kɛɛ bɛhɛlɛlɩ dɩyɛzumanlɛ eyi bɛmanlɩ mmɩlantɩyɛ nɩɩ nɣɛdɛkɛ dɩyɛ, naasʋ̃ sa ye munwala yɛkʋla yesuma debe wɔ Danɩyɛlɩ yi ndianwʋ yɩ nu.

4. Mɩnla ɔhʋanɩ zʋ yɛ Danɩyɛlɩ lalɩ akɛnɣazɩzɩbɛ ali a? Ma nwʋmɔ ndianwʋ.

⁴ Bɔlɔ kʋla kã bɛzabɛ mɔɔ bɔwɔ akɛnɣazɩzɩbɛ nɩ, naasʋ̃ bɛáma isi bɛ ɔhʋanɩ kɛɛ bɛkɛyɛ mɔɔ ɩtɩnɣɛ. Nɩ Danɩyɛlɩ dɩ abɩlantɩyɛ mɔɔ ɩwɔ akɛnɣazɩzɩbɛ paa. Bɛmá yehila bʋwabɩlɛ anwɩ̃ be mɔɔ ɩlalɩ akɛnɣazɩzɩbɛ ali wɔ nu. Ɩkɛyɛ kɛɛ mɔɔ ili bɔmʋnlɩ nɩ zili mmɩlɩ mɔ Babilɔnʋmaa zɩkɛlɩ Gyelusalamɩ kɛyɛ alʋbɔ anwɩ̃ mɛda nɩ. Babilɔnʋ Bulombunli Nebukadineza hʋnlɩ ɛlalɩyɛ ɛyɛlɛ ɛyɛlɛ be mɔɔ ɩfalɩ aboduwaba kezile be nwʋ. Ɩhã ihileli yɩ nɣɛlɛbɛmaa mɔɔ Danɩyɛlɩ kɩnla nwʋmɔ nɩ kɛɛ, sɛ bɛákã ɛlalɩyɛ yɩ nɩɩ yɩ tʋhilelɛ bekile yi a, sa ikũ bo munwala. (Da. 2:3-5) Nɩ sɛ Danɩyɛlɩ ɩáyɛ nwʋmɔ debe ndɛndɛ a, bokohũhũ mmenii sʋ̃maa. Ɩhɔ “izianlɩ bulombunli yi kɛɛ ɩmá mmɩlɩ ɛgyɩkɩ̃ɩ̃ yɩ na ɩva ihile ɛlalɩyɛ yɩ tʋ.” (Da. 2:16) Nɩ eyi kile kɛɛ Danɩyɛlɩ wɔ akɛnɣazɩzɩbɛ nɩɩ dedi. Nɩ dasɩlɛ bela íni kɛnɩ mɔɔ ikile kɛɛ Danɩyɛlɩ ihile ɛlalɩyɛ tʋ kyɩ̃. Ɩhã ihileli yɩ ɔhɔnwʋmmɔ mɔɔ bɛ Babilɔnʋ anlima yɛ lɛ Hyadɩlakɩ, Mɛhyakɩ, nɩɩ Abɛdinego nɩ kɛɛ “bɔwɔ́ sʋlɔ Nyamɩnlɩ nɩ mpayɩ na ɩnwʋ́ bɛ nwɔkɛ wɔ ɛɣɩntanlɛ odwokɔ eyi nwʋ.” (Da. 2:18) Gyehova diyeli bɛ mpayɩ na ɩwʋwalɩ Danɩyɛlɩ ma ihileli Nebukadineza yɩ ɛlalɩyɛ yɩ tʋ. Eyi ti bɛákũ Danɩyɛlɩ nɩɩ yɩ ɔhɔnwʋmmɔ yɩ.

5. Akɛnɣazɩzɩbɛ nwʋ odwohilalɛ fʋlɔ ɛhɩnla dɩyɛ yɛ Danɩyɛlɩ yiyialɩ a?

⁵ Danɩyɛlɩ hileli aboduwaba kezile yi nwʋ ɛlalɩyɛ yɩ tʋ mɛda nɩ, izia iyiyialɩ akɛnɣazɩzɩbɛ nwʋ odwohilalɛ fʋlɔ. Nebukadineza zialɩ hʋnlɩ ɛlalɩyɛ fʋlɔ be, eyi mɛyɩ nɩ ɩfalɩ owudo kezile be nwʋ. Danɩyɛlɩ zʋ akɛnɣazɩzɩbɛ nu hileli ɛlalɩyɛ yɩ tʋ na ɩmanlɩ bulombunli yi nwʋnlɩ kɛɛ, ɩkɔwɔ ɛlamɩ na yi bulombunlililɛ kevi yɩ sa wɔ mmɩlɩ dʋdʋ be nu. (Da. 4:25) Ankɩ bulombunli yi kɔhʋla kenyia adwɩnɩ kɛɛ Danɩyɛlɩ itwodwu ikediyia yɩ, na ankɩ sa ɩkʋla ikũ Danɩyɛlɩ po. Naasʋ̃ Danɩyɛlɩ lalɩ akɛnɣazɩzɩbɛ ali na ihileli ɛlalɩyɛ yɩ tʋ.

6. Mɩnla yɛ ɩkɛyɛ kɛɛ ɩwʋwalɩ Danɩyɛlɩ ma inyianlɩ akɛnɣazɩzɩbɛ a?

⁶ Mɩnla yɛ ɩkɛyɛ kɛɛ ɩwʋwalɩ Danɩyɛlɩ ma inyianlɩ akɛnɣazɩzɩbɛ wɔ yɩ nnwʋanlɩ eɣile munwala nu a? Sa yɛkʋla yɛkã kɛɛ Danɩyɛlɩ yɩ maamɩ nɩɩ yɩ papa yɛlɩ ndianwʋba manlɩ yɩ mmɩlɩ mɔ nɩ ɩdɩ kuakula nɩ. Pɩlazunɛ bela íni nwʋmɔ kɛɛ, bediyeli Gyehova yɩ ɔhʋanɩhilelɛ mɔɔ ɩva ɩmanlɩ Yizilayamaa awʋvʋlɔ yɩ na  bɛvalɩ Nyamɩnlɩ mmɛla behilehileli bɛ ɣa yɩ. (Dit. 6:6-9) Kɛ Mmɛla Bunlu yi la yɛ nɩ Danɩyɛlɩ izi a, mfomi nɩ izi mmɛla mɔɔ ɩfalɩ alɩyɛ mɔɔ Yizilayanii kɔhʋla keli nɩɩ mɔɔ ɩlɔ́kʋla ikeli nwʋ. b (Lɛv. 11:4-8; Da. 1:8, 11-13) Akʋ̃ sʋ̃, nɩ Danɩyɛlɩ izuma Nyamɩnlɩ yi mmenii bɛ abakɔsɛmɩ nwʋ dɩyɛ na izi mɔɔ ɩdʋlɩ bɛzabɛ mɔɔ bɛátiye Gyehova nɩ sʋ̃. (Da. 9:10, 11) Mɔɔ izizili wɔ Danɩyɛlɩ yɩ ɛbɩlawɔlɛ nu nɩ ɩmanlɩ ɩnwʋnlɩ kɛɛ, Gyehova nɩɩ yɩ awɔvʋlɔ mɔɔ bɔwɔ tumi nɩ kɔwʋwa yɩ.—Da. 2:19-24; 10:12, 18, 19.

7. Mɩnla dɔkʋ̃ yɛ ɩwʋwalɩ Danɩyɛlɩ ma inyianlɩ akɛnɣazɩzɩbɛ a? (Kila mfonyini yi sʋ̃.)

⁷ Danɩyɛlɩ zumanlɩ ndwokɔ mɔɔ Nyamɩnlɩ yɩ nkɔmɩhyɛmaa hɛlɛlɩ, mɔɔ Gyɛlɩmaya nkɔmɩhyɛ yɩ kɩnla nwʋmɔ nɩ. Mmɩlɩ mɔ isumaa ɔzɔ nkɔmɩhyɛ yɩ, ɩɣa ɩnwʋnlɩ kɛɛ ɩlɛ́kyɛ na Dwuumaa nɩ bɛayɩ bɔ nwʋ wɔ akɛlɛzʋ̃mɩnlɛ nu wɔ Babilɔnʋ. (Da. 9:2) Mmɩlɩ mɔ Danɩyɛlɩ nwʋnlɩ kɛɛ Bayɩbʋlʋ nkɔmɩhyɛ eyimmɔ ɣa numɔ nɩ, ɩhyɛlɩ dedi mɔɔ ɩwɔ wɔ Gyehova nu nɩ ɛzɩzɩbɛ, na bɛzabɛ sʋ̃ mɔɔ bɔwɔ Nyamɩnlɩ nu dedi kezile nɩ bɔkʋla benyia akɛnɣazɩzɩbɛ kezile paa. (Fa tindiã Wulomimaa 8:31, 32, 37-39 nwʋ.) Mɔɔ ihyinyia paa nɩ, nɩ Danɩyɛlɩ ɩta ɩbɔ yɩ sʋlɔ Ɛzɩlɛ nɩ mpayɩ. (Da. 6:10) Ɩhanlɩ yɩ tanɩ nɩɩ kezimɔ ɩtɩ nɣanlɩ nɩ ihileli Gyehova. Na izianlɩ yɩ kɛnɩ mmʋwalɩyɛ. (Da. 9:4, 5, 19) Nɩ Danɩyɛlɩ ɩdɩ kɛɛ amɩyɛ la, meti bɛáfa akɛnɣazɩzɩbɛ bɔwʋ yɩ. Mfomi inyianlɩ ɔzɔ subanɩ yɩ iluwa dɩyɛzumanlɛ nɩɩ mpayɩwɔlɛ nɩɩ yɩ nwʋ mɔɔ ɩva idianlɩ Gyehova zʋ nɩ.

8. Kɛ ɩkɛyɛ na yeanyia akɛnɣazɩzɩbɛ a?

⁸ Sɛ yekenyia akɛnɣazɩzɩbɛ a, mɩnla yɛ ɩsɛ kɛɛ yɛyɛ a? Ebiye a yɛ awʋvʋlɔ kɛhyɛ yɛ ɛzɩzɩbɛ kɛɛ yɛmá yɛ kɛnɣa ɩyɛ sɩ, naasʋ̃ bɔlɔ́kʋla bɛkɛma akɛnɣazɩzɩbɛ yɛ. Akɛnɣazɩzɩbɛ mɔɔ yekenyia nɩ, ɩdɩ kɛɛ mɔɔ abiye isumaa dɩyɛ fʋlɔ be yɩ yɛlɛ. Ɔhʋanɩ ɔkʋ̃ mɔɔ okoluwa zʋ ɔkɔnwʋ yɩ yɛlɛ yɛ lɛ kɛɛ, ekehila kezimɔ enii mɔɔ ikilee wʋ nɩ ɩkɛyɛ yɩ nɩ na wʋazumazuma yi ndianwʋ yɩ. Ɔzɔ la sʋ̃ yɛ sɛ yekila kezimɔ mmenii mvʋlɔ bɛda subanɩ eyi ali na yesumazuma bɛ a, yekenyia akɛnɣazɩzɩbɛ. Meti, mɩnla yɛ yezuma wɔ Danɩyɛlɩ kɛ a? Ɩsɛ kɛɛ yɛnwʋ Nyamɩnlɩ Odwokɔ yɩ nu bʋwɔ dɩkɛɛ Danɩyɛlɩ. Ɩsɛ kɛɛ yɛta yɛbɔ Gyehova mpayɩ na yɛkã kezimɔ yɛtɩ nɣanlɩ nɩ yekile yi na yɛava yɛahyɛ yɛ nɩɩ yɩ avinli abusunwawɔlɛ yɩ nu ɛzɩzɩbɛ. Akʋ̃ sʋ̃, ɩsɛ kɛɛ yenyia yi nu anwʋlazʋ kɛɛ ɩkɔwʋwa yɛ eɣile bela. Eyi kɛma sɛ botwe ye dedi bekila a, yekenyia akɛnɣazɩzɩbɛ.

9. Sɛ yɛda akɛnɣazɩzɩbɛ ali a, mɩnla mfasʋ yɛ yenyia a?

⁹ Sɛ yɛda akɛnɣazɩzɩbɛ ali a, yenyia zʋlɔ mfasʋ sʋ̃maa. Bɛmá yehila Ben yi ozumalɛnwʋnlɛ yɩ. Sukuulu be mɔɔ ɩhɔlɩ wɔ Germany nɩ, nɩ abiyela de di kɛɛ dɩyɛ bela zʋ̃ ɛlanɩlanɩlɛ nu yɛ ɩɣalɩ a, na dɩyɛwɔlɛ nwʋ odwokɔ mɔɔ ɩwɔ Bayɩbʋlʋ nu nɩ ɩdɩ ndwondwo. Eɣile ɔkʋ̃ be, bɛmanlɩ Ben ɔnwʋmɔ ɔhʋanɩ kɛɛ igyiná kɩlasɩ yɩ bɛ anyunu na ihilehile sianti mɔɔ ide dɩyɛwɔlɛ idi nɩ nu. Ɩzʋ̃ akɛnɣazɩzɩbɛ nu ihilehileli yi dedi nu. Mɩnla yɛ ɩzʋ̃ numɔ ɩɣalɩ a? Ben hanlɩ kɛɛ, “Mɩ tikyia yɩ yɛlɩ dinyii diyeli mɩ, na ɩbɩlɩntɩlɩ ndwokɔ mɔɔ mɩva mihilehileli mu odwokɔ yɩ nu nɩ na ɩhyɛlɩ ɩmanlɩ mu sukuulumaa yɩ.” Kɛ Ben yi sukuulumaa yɩ yɛlɩ bɛ dɩyɛ zeli a? Ben hanlɩ kɛɛ, “Bo nu sʋ̃maa diyeli mu odwokɔ yɩ, na bɛhanlɩ kɛɛ bɛ anyɩ sɔ mɔɔ mɩyɛlɩ yɩ.” Ben yi ozumalɛnwʋnlɛ yɩ ɩma yɛnwʋ kɛɛ, bɛzabɛ mɔɔ bɛda akɛnɣazɩzɩbɛ ali nɩ mmenii ta bu bɛ paa. Akʋ̃ sʋ̃, sa  ɩkʋla ɩkã bɛzabɛ mɔɔ bɔwɔ ahʋnlɩnɩba nɩ ma bɛba bɔsʋ̃mɩ Gyehova. Meti, yɛwɔ sianti baaba azʋlɔtʋ ti mɔɔ ɩsɛ kɛɛ yɛda akɛnɣazɩzɩbɛ ali.

10. Sɛ bɛkã nɔhʋanlɛlilɛ a, ikile mɩnla a?

¹⁰ Sɛ bɛfa Hibulu odwokɔpɔkɔ “nɔhʋanlɛlilɛ” anzɛnyɩɩ “ɔlɔlɛ kanyɩɩ” bedi egyima wɔ Bayɩbʋlʋ yɩ nu a, ikile ɔlɔlɛ mɔɔ numɔ yɛ sɩ mɔɔ Nyamɩnlɩ wɔ ma yɩ azʋ̃mɩvʋlɔ. Bɛfa odwokɔpɔkɔ ɔkʋ̃ yɩ la bɛkã ɔlɔlɛ mɔɔ Nyamɩnlɩ mmenii bɔwɔ bɛma bɔ nwʋ bɔ nwʋ nɩ nwʋ odwokɔ. (2 Sa. 9:6, 7) Mmɩlɩ ɩkɔlɩɩ zʋlɔ nɩ, yɛ nɔhʋanlɛlilɛ nu kɛɣa kɛyɛ sɩ. Bɛmá yehila kezimɔ Danɩyɛlɩ yɩ nɔhʋanlɛlilɛ nu ɩɣa ɩyɛlɩ sɩ.

11. Danɩyɛlɩ yɛlɩ alɩɣa nɩ, mɩnla ɔhʋanɩ zʋ yɛ ihileli kɛɛ idi nɔhʋanlɛ a? (Kila Ɔwɩɛnɩlɛ Aɣanɩ yɩ anyunu mfonyini yi.)

¹¹ Danɩyɛlɩ yiyialɩ bʋwabɩlɛ sʋ̃maa wɔ yɩ ɛbɩlawɔlɛ nu mɔɔ idweli yɩ nɔhʋanlɛlilɛ ihilalɩ. Naasʋ̃ ilili alʋbɔ 90 mɔɔ ɩkɔɔ nɩ, iyiyialɩ odwohilalɛ be mɔɔ numɔ yɛ sɩ paa. Ɔzɔ mmɩlɩ yɩ, nɩ Medisimaa nɩɩ Pɛhyɩyamaa beli Babilɔnʋ zʋ nkunimi ma Bulombunli Dalɩyɔsʋ yɛ idii tumi a. Nɩ ahɩmfiye mbanimbani yi bɛtanɩ Danɩyɛlɩ na bɛáwu Nyamɩnlɩ mɔɔ nɩ ɩsʋ̃mɩ yɩ nɩ. Meti bɛvalɩ Danɩyɛlɩ yi ti zʋ apamɩ kɛɛ bokohũ yi. Bɛmanlɩ bulombunli yi valɩ yɩ sa wulalɩ mmɛla be tʋ mɔɔ ikodwe Danɩyɛlɩ ikehila kɛɛ idi nɔhʋanlɛ ɩma yɩ Nyamɩnlɩ anzɛnyɩɩ bulombunli yi mfomi. Mɔɔ nɩ Danɩyɛlɩ ɩkɛyɛ kɛva kehile kɛɛ idi nɔhʋanlɛ ɩma bulombunli yi na bɛáhwɩnlɩ yɩ azʋ̃ yɛ lɛ kɛɛ, ɩlɔ́bɔ Gyehova mpayɩ aɣile 30. Naasʋ̃ Danɩyɛlɩ lili Gyehova nɔhʋanlɛ. Eyi ti, bɔdʋlɩ yɩ bedianlɩ gyata bo kuma yɩ nu. Naasʋ̃ iluwa Danɩyɛlɩ yɩ nɔhʋanlɛlilɛ ti Gyehova yilalɩ yɩ na ileli yi wɔ Gyata yɩ bo munwa nu. (Da. 6:12-15, 20-22) Kɛ ɩkɛyɛ na yɛali Gyehova nɔhʋanlɛ dɩkɛɛ Danɩyɛlɩ a?

12. Mɩnla yɛ ɩhanlɩ Danɩyɛlɩ ma ilili Gyehova nɔhʋanlɛ a?

¹² Kɛmɔ yeli bɔmʋnlɩ yɛhã nɩ, sɛ yɛkɔhʋla yekeli Gyehova nɔhʋanlɛ a gyɩsɛ yenyia ɔlɔlɛ mɔɔ numɔ yɛ sɩ yɛma yɩ. Danɩyɛlɩ hɔlɩ zʋlɔ ilili nɔhʋanlɛ ɩmanlɩ Gyehova iluwakɛɛ nɩ ɩdɔ yɩ sʋlɔ Ɛzɩlɛ yɩ baaba. Pɩlazunɛ bela íni nwʋmɔ kɛɛ, Danɩyɛlɩ lili Gyehova nɔhʋanlɛ iluwakɛɛ ɩdwɩnɩndwɩnɩnlɩ Gyehova yi subanɩ nɩɩ kezimɔ ɩda yɩ ali nɩ nwʋ. (Da. 9:4) Akʋ̃ sʋ̃, Danɩyɛlɩ dwɩnɩndwɩnɩnlɩ nninyeniba mɔɔ  Gyehova yɛlɩ manlɩ mɛyɩ nɩɩ yi mmenii nwʋ na ihileli nwʋmɔ anyɩnlɩzɔlɛ.—Da. 2:20-23; 9:15, 16.

13. (a) Mɩnla nɔhʋanlɛlilɛ nwʋ odwohilalɛ yɛ ye nnwuakula yiyia a? Ma nwʋmɔ ndianwʋ. (Kila mfonyini yi sʋ̃.) (b) Sɛ abiye bizia kɛɛ asʋ̃ Gyehova Dasɩvʋlɔmaa bede mmenyia nɩɩ mmenyia, nɩɩ mmaalɛ nɩɩ mmaalɛ mɔɔ bɛ nɩɩ bɔ nwʋ da nɩ betiã nu a, mɩnla yɛ ɔkɔhʋla ɛkɛhã a? (Kila vidiyo mɔɔ ɩwɔ jw.org mɔɔ ise “Azʋ̃nudwolɩyɛ Zʋ̃ Ɛdɩnɣɛlɛ Kanyɩɩ Nu Kɛɣa.”)

¹³ Dɩkɛɛ Danɩyɛlɩ nɩ, mmenii mɔɔ bɛáwu Gyehova nɩɩ yɩ mmɛla bodua ye nnwuakula nwʋ beyiyia. Ɔzɔ mmenii yi, bɛábɛ abiyela mɔɔ ɩdɔ Nyamɩnlɩ nɩ yɩ odwokɔ. Bo nu be po bɔ mmɔdɩnɩ kɛɛ bɛlɛ́ma ye nnwuakula yɩ keli nɔhʋanlɛ kɛma Gyehova. Kɛ ndianwʋ nɩ, kila mɔɔ ɩdʋlɩ abɩlantɩyɛ be mɔɔ bɔfʋlɔ yɩ Graeme, mɔɔ ɩda Australia nɩ. Mmɩlɩ mɔ nɩ ɩwɔ sukuulu nɩ, iyiyialɩ bʋwabɩlɛ be mɔɔ numɔ yɛ sɩ. Bɛ tikyia yɩ ɣizialɩ bɛ kɛɛ, sɛ bɔ ɔhɔnwʋ benyia be kã kile bɛ kɛɛ ɩ nɩɩ yɩ ɔhɔnwʋmmɔ mmenyia da a, mɩnla yɛ bɛkɛyɛ a? Akʋ̃ tikyia yɩ hanlɩ hileli bɛ kɛɛ, bɛzabɛ mɔɔ bekele bɔ ɔhɔnwʋ nɩ yɩ nyɛlɩyɛ yɩ bekediã nu nɩ, begyiná ɔfʋã ɔkʋ̃; na bɛzabɛ mɔɔ beléde bekediã nu sʋ̃ begyiná ɔfʋã ɔkʋ̃. Graeme hanlɩ kɛɛ, “Sɛ ɛyɩ mɩ nɩɩ Dasɩvʋlɔ ɔkʋ̃ be mɔɔ nɩ ɩwɔ kɩlasɩ kɛnɩ esiye ahanlɩ a, sukuulumaa yɩ munwala hɔ gyinanlɩ ɔfʋã mɔɔ ikile kɛɛ bede betiã numɔ yɩ.” Mɔɔ izili wɔ eyi mɛda nɩ dweli Graeme yɩ nɔhʋanlɛlilɛ ma Gyehova nɩ ihilalɩ. Ɩhanlɩ kɛɛ, “Akʋ̃ mmɩlɩ mɔ ɩha mɔɔ yɛkɛva yekozuma dɩyɛ nɩ, sukuulumaa yɩ nɩɩ tikyia yɩ va wʋdʋlɩwʋdʋlɩ yɛ nkʋ̃ʋ̃. Mʋwɔlɩ mmɔdɩnɩ kɛɛ mʋzʋ̃ abʋtalɩ nu mikehilehile mi dedi nu, naasʋ̃ bɛátiye mɩ.” Kɛ eyi manlɩ Graeme dɩlɩ nɣanlɩ zeli a? Ɩhanlɩ kɛɛ, “Nɩ mɩ anyɩ iáleli nwʋmɔ kɛɛ bɛkɛva bɛ anyɩ bekeziye mʋ nwʋ bɔkɔwʋdʋwʋdʋ mɩ, naasʋ̃ mɩ anyɩ leli iluwakɛɛ milili nɔhʋanlɛ mɩmanlɩ Gyehova, na mʋhʋla mɩhanlɩ mi dedi nwʋ odwokɔ.”

14. Kɛ ɩkɛyɛ na yɛahɔ zʋ yɛali Gyehova nɔhʋanlɛ a?

¹⁴ Dɩkɛɛ Danɩyɛlɩ nɩ, sɛ yenyia ɔlɔlɛ kezile yɛma Gyehova a, sa ɩma yɛkɔ zʋ yedi yi nɔhʋanlɛ. Sɛ yesuma yi subanɩ nwʋ dɩyɛ a, ɩkɛma yekenyia ɔlɔlɛ kezile yɛkɛma yɩ. Kɛ ndianwʋ nɩ, sa yɛkʋla yesuma nninyeni mɔɔ ɩwɔ nɩ nwʋ dɩyɛ. (Wul. 1:20) Sɛ ɛpɛ kɛɛ ɛhyɛ ɔlɔlɛ nɩɩ annidi mɔɔ ɔwɔ ma Gyehova nɩ nu ɛzɩzɩbɛ a, sa ɔkʋla ɛkɩnga ndwokɔ mɔɔ ɩba ɩtʋwadʋwa zʋlɔ mɔɔ ise “Asʋ̃ Bɔwɔlɩ a?” anzɛnyɩɩ ekila vidiyo azʋlɔtʋ yɩ. Sa ɔkʋla sʋ̃ ɛkɩnga blohyʋɔ mɔɔ ise Was Life Created?⁠(Asʋ̃ Bɔwɔlɩ Nnwʋanlɩ a?) nɩɩ Mɔɔ Ɩyɛlɩ Mɔɔ Nnwʋanlɩ Ɣalɩ—Ndwokɔɣizialɛ Anlu Mɔɔ Mmenii Bɛta Bebizia. Kila mɔɔ eliyema baalɛ Esther mɔɔ ɩzʋ̃ Denmark hanlɩ valɩ awuuku eyimmɔ nwʋ: “Kezimɔ awuuku yi ikilehile ndwokɔ nu nɩ, numɔ la kɛnɩ. Blohyʋɔ yɩ iáhile wʋ mɔɔ ɩsɛ kɛɛ ede di; ɩma nɔhʋanlɛ yɩ da ali na wʋzawʋ wʋazi wʋ pɔkɔ.” Ben mɔɔ yɛhã yɩ nwʋ odwokɔ daada nɩ hanlɩ kɛɛ: “Awuuku yi hyɛ dedi ɛzɩzɩbɛ paa. Na ɩma mʋnwʋ kɛɛ Nyamɩnlɩ yɛ ɩwɔlɩ nnwʋanlɩ a.” Sɛ osuma awuuku eyimmɔ owie yɩ a, ebiye a, ɛ nɩɩ mɔɔ Bayɩbʋlʋ kã nɩ kɛyɛ adwɩnɩ kɛɛ: “Ye Niibenyia nɩɩ yɛ Nyamɩnlɩ! Ɛfata animinyiamɩ, nnililɛ nɩɩ tumi. Sianti yɛ lɛ kɛɛ, mɔwʋ yɛ ɔwɔlɩ nninyeni munwatĩĩ a.”—Yik. 4:11. c

15. Mɩnla ɔhʋanɩ fʋlɔ zʋ yɛ yɛkɔhʋla yɛ nɩɩ Gyehova kenyia ɔhɔnwʋvalɛ mɔɔ numɔ yɛ sɩ a?

¹⁵ Ɔhʋanɩ fʋlɔ mɔɔ sa yɛkʋla yeduwa zʋ yɛ nɩɩ Gyehova nyia ɔhɔnwʋvalɛ mɔɔ numɔ yɛ sɩ yɛ lɛ kɛɛ, yekozuma yɩ Ɣa Gyisɛsɩ yɩ ɛbɩlawɔlɛ nwʋ odwokɔ. Eliyema baalɛ be mɔɔ ɩwɔ Germany mɔɔ bɔfʋlɔ yɩ Samira yɛlɩ eyi. Ɩhanlɩ kɛɛ: “Iluwa Gyisɛsɩ zʋ nɩ, mɩɣa mʋnwʋnlɩ Gyehova bʋwɔ.” Mmɩlɩ mɔ nɩ Samira dɩ  kuakula nɩ, nɩ ɩánwʋ Gyehova kɛɛ abiye mɔɔ ɩwɔ ɔlɔlɛ. Naasʋ̃ nɩ izi kezimɔ Gyisɛsɩ tɩ nɣanlɩ. Ɩhanlɩ kɛɛ: “Nɩ mɩpɛ Gyisɛsɩ yi odwokɔ iluwakɛɛ ɩpɛ mmenii na ɩdɔ nnwuakula.” Mbɔmɩ sʋ̃maa mɔɔ izumanlɩ Gyisɛsɩ yɩ nwʋ dɩyɛ nɩ, ɩɣa inyianlɩ ɔlɔlɛ kezile ɩmanlɩ Gyehova. Mɩnla ɔhʋanɩ zʋ a? Ɩhanlɩ kɛɛ: “Ngyɩkɩ̃ɩ̃ ngyɩkɩ̃ɩ̃ la, mɩɣa mɩdɩlɩ yɩ tʋ kɛɛ Gyisɛsɩ da yɩ Zɩ yi subanɩ ali pɛpɛɛpɛ. Na ɩdɩ kɛɛ yɩ Zɩ la. Mɩɣa mʋnwʋnlɩ kɛɛ, eyi kɩnla nwʋmɔ ti yɛ Gyehova zʋ̃manlɩ Gyisɛsɩ ma ɩɣalɩ azɩlɛ yɩ zʋ yɩ a, mɔɔ ɩkɛyɛ mɔɔ mmenii kɔnwʋ Gyehova bʋwɔ.” (Dwɔ. 14:9) Sɛ ɛpɛ kɛɛ ɛhyɛ ɛ nɩɩ Gyehova bɔ ɔhɔnwʋvalɛ nu ɛzɩzɩbɛ a, mɩnla ti mɔɔ wʋále mmɩlɩ suma Gyisɛsɩ yɩ nwʋ dɩyɛ a? Sɛ ɛyɛ zɔ a, ɔlɔlɛ mɔɔ ɔwɔ ma Gyehova nɩɩ ɛpɛ mɔɔ ɔwɔ kɛɛ ekeli yɩ nɔhʋanlɛ nu kɛyɛ sɩ.

16. Sɛ yedi nɔhʋanlɛ a, mɩnla mfasʋ yɛ yekenyia a? (Ndwomi 18:25; Mika 6:8)

¹⁶ Sɛ yedi nɔhʋanlɛ a, mbɔmɩ sʋ̃maa nɩ ɩma yenyia ɔhɔnwʋmmɔ mɔɔ bedi nɔhʋanlɛ mɔɔ bɔkɔvʋãmɩ yɛ nwʋ daabaa. (Wu. 1:14-17) Akʋ̃ sʋ̃, mmenii mɔɔ bedi Gyehova nɔhʋanlɛ nɩ, sa bɛ ahʋnlɩnɩ kʋla tɔ bo kunlu na bɛanyia azʋ̃nudwolɩyɛ. Mɩnla ti a? Iluwakɛɛ Gyehova wɔ anʋhʋba kɛɛ ikeli nɔhʋanlɛ ɩkɛma bɛzabɛ mɔɔ bedi yi nɔhʋanlɛ nɩ. (Kɩnga Ndwomi 18:25; Mika 6:8.) Dwɩnɩ nwʋmɔ kila, Dɩyɛwɔlɛvʋlɔ mɔɔ ɩdɩ tumi munwala niibenyia nɩ bɔ anʋhʋba yɛ kɛɛ ɩkɔlɔ yɛ eɣile bela! Meti, odwohilalɛ, odwodwudiyialɛmaa, nɩɩ owulo po ɩlɔ́kʋla ɩkɛdɩdɩ yɛ nɩɩ yɩ avinli. (Da. 12:13; Lk. 20:37, 38; Wul. 8:38, 39) Kila kezimɔ ihyinyia kɛɛ yesumazuma Danɩyɛlɩ na yɛkɔ zʋlɔ yedi Gyehova nɔhʋanlɛ!

17-18. Mɩnla dɔkʋ̃ yɛ yɛkɔhʋla yekozuma wɔ Danɩyɛlɩ kɛ a?

¹⁷ Wɔ dɩyɛzumanlɛ eyi nu nɩ, yɛɣa yezuma Danɩyɛlɩ yi subanɩ anwɩ̃ pɛ nwʋ dɩyɛ. Naasʋ̃, sʋ̃maa zɛ wɔ kɛnɩ mɔɔ sa yɛkʋla yesuma wɔ Danɩyɛlɩ kɛ. Kɛ ndianwʋ nɩ, Gyehova manlɩ Danɩyɛlɩ nyianlɩ anyɩnlɩzʋdɩyɛnwʋnlɛ na ɩhʋnlɩ ɛlalɩyɛ azʋlɔtʋ. Akʋ̃ sʋ̃, ɩmanlɩ inyianlɩ tumi mɔɔ ɩkɛva ikehilehile nkɔmɩhyɛ tʋ. Nkɔmɩhyɛ eyimmɔ nu sʋ̃maa ɣa nu. Mɔɔ ɩha mɔɔ ɩkɛɣa nu eɣile be nɩ, ɩkɛhã desanii bela wɔ azɩlɛ yɩ zʋ.

¹⁸ Wɔ dɩyɛzumanlɛ mɔɔ ili kɛnɩ yɩ nu nɩ, yekehila nkɔmɩhyɛ anwɩ̃ be mɔɔ Danɩyɛlɩ hɛlɛlɩ nɩ. Kɛ nnwuakula anzɛnyɩɩ mbanimbani nɩ, sɛ yɛtɩ nkɔmɩhyɛ eyimmɔ tʋ a ɩkɔwʋwa yɛ ma yekezizi abɔkɔ baaba wɔ nnɛ. Ɔzɔ nkɔmɩhyɛ azʋlɔtʋ yɩ kɔhʋla kɛma yɛ akɛnɣazɩzɩbɛ nɩɩ yɛ nɔhʋanlɛlilɛ nu kɛyɛ ɛzɩzɩbɛ, na iaziyeziye yɛ ɩama odwohilalɛ mɔɔ ɩlɛ́kyɛ yɛbayiyia nɩ.