Mmenii ɛgyɩkɩ̃ɩ̃ bela yɛ bɛda subanɩ baaba ali a. Bɛzabɛ mɔɔ bɔkɔ asʋpiti kɛɛ bɛkɛbɩbɛ awudoyɛlɛ nɩ, bo nu sʋ̃maa tɩnyɩadɩnyɩa alɔkɩtamaa, mmenii mɔɔ bɔkɔ bedi alɩyɛ wɔ restaurant nɩ bɛáwu egyimayɛlɛmaa mɔɔ bɔwɔ kɛnɩ nɩ; ɔhʋanɩdulɛmaa mɔɔ béni subanɩ nɩ, bɛ nɩɩ mmenii mɔɔ bɛyɛ egyima wɔ alopileni nu nɩ kʋ̃; nnwuakula mɔɔ bɛ azʋ̃ yɛ sɩ di bɛ tikyamaa bɔ nwʋ nwɔwɩ, bonwulanwula bɛ na bɛ nɩɩ bɛ kʋ̃ po; manlɩwulɛmaa be sʋ̃ fa bɔ nwʋ wula nyɛlɩyɛ tanɩ azʋlɔtʋ be nu na bo nu be sʋ̃ bu bɔ nwʋ kɛɛ bo subanɩ dɩ baaba tɛla mbiyemmɔ.

 Bayɩbʋlʋ yɩ la yɛ ɩma yɛnwʋ mɔɔ subanɩba kile ankasa a. Akʋ̃ sʋ̃, ɩma yɛnwʋ sianti mɔɔ nnɛ, mmenii bɛála subanɩba ali nɩ.

 Mmenii bo subanɩ ɩsɩkɛɛ wɔ oyuwadɩ munwala.

•   America maa be mɔɔ beɣiziaɣizialɩ ndwokɔ bɛ aɣile-asã yɩ hanlɩ kɛɛ nnɛ, mmenii mɔɔ bɔwɔ United States nɩ bo subanɩ zɩkɛ dɛla alʋbɔ 22 mɔɔ ɩɣa ɩzɩ̃ ɩhɔ nɩ.

•   Bezialɩ beɣiziaɣizialɩ mmenii 32,000 mɔɔ bɔwɔ amanlɩ 28 nu ndwokɔ, na bo yaalɛ nu nkyɛnu 65 hanlɩ kɛɛ, nnɛ mmenii bo subanɩ zɩkɛ dɛla mmɩlɩ bela mɔɔ ɩɣa ɩzɩ̃ ɩhɔ.

 Bayɩbʋlʋ yɩ hanlɩ subanɩ mɔɔ mmenii bɛdaa yɩ ali wɔ nnɛ nɩ nwʋ odwokɔ dianlɩ kɛ.

•   ‘Awielɩyɛ mmɩlɩ yi nu nɩ, mmɩlɩ mɔ numɔ yɛ sɩ kɛɣa. Mmenii kɛyɛ angʋmidi, ozukua nwʋ anyɩnlɩbʋlʋ, apigyiabigyiabɔnwʋ, ahantanɩ, bɔkɔwʋdʋwʋdʋ mmenii mvʋlɔ, belétiye bɛ awʋvʋlɔ, boniayɛmaa, belényia ɔlɔlɛ bɛkɛma bɔ ɔhɔnwʋ, [yɛɛ] bɛ anyɩ ilédeli baabayɛlɛ nwʋ.’—2 Timoti 3:1-3.

 Sɛ ɛpɛ kɛɛ ɔnwʋ kezimɔ nkɔmɩhyɛ eyi ɣa numɔ nwʋ ndwokɔ sʋ̃maa a, kɩnga odwokɔ mɔɔ ise “Did the Bible Predict the Way People Think and Act Today?”

 Wɔ oyuwadɩ eyi nu mɔɔ mmenii bo subanɩ zɩkɛ nɩ, mmenii abʋmɩ abʋmɩ sʋ̃maa ɣa nwʋ yɩ kɛɛ, Bayɩbʋlʋ yɩ nɩ wʋwa bɛ ma bɔhʋla bɛla subanɩba ali. Sa ɔkʋla fa fʋlɔdulɛ mɔɔ ɩwɔ numɔ nɩ ɔbɔ wʋ ɛbɩla “nnɛ nɩɩ daabaa.” (Ndwomi 111:8) Kila nwʋmɔ ndianwʋ azʋlɔtʋ be:

•   Mɔɔ Bayɩbʋlʋ yɩ kã: “Dɩyɛ bela mɔɔ bɛpɛ kɛɛ abiyemmɔ bɛyɛ bɛma mʋnlʋmmɔ nɩ, bɛzabɛ sʋ̃ bɛyɛ́ ɔzɔ la bɛma bɛ.”—Matiyu 7:12.

   Mɔɔ ikile: Mbɔmɩ sʋ̃maa nɩ, yɛpɛ kɛɛ mmenii mvʋlɔ da kunlumiba nɩɩ annidi ali kile yɛ, na ɔzɔ la yɛ ɩsɛ kɛɛ yɛyɛ yɛma bɛ a.

•   Mɔɔ Bayɩbʋlʋ yɩ kã: “Máma bedi awohwi ebiyekʋ̃; abiyela ɩhã nɔhʋanlɛ ihile yɩ ɔhɔnwʋ.”—Ɛfɩsɛsɩmaa 4:25.

   Mɔɔ ikile: Ɩsɛ kɛɛ ye munwa ndwokɔ nɩɩ yɛ nyɛlɩyɛ da yɩ ali kɛɛ yedi nɔhʋanlɛ.

 Sɛ ɛpɛɛ odwokɔtile eyi nwʋ ndwokɔ sʋ̃maa a, yesiãã wʋ kɩnga:

•   Ɔwɩɛnɩlɛ Aɣanɩ mɔɔ yi odwokɔtile se “Papa Ne Bɔne—Akwankyerɛ a Wubetumi De Wo Ho Ato So.”

•   Odwokɔ mɔɔ ise “Tolerance—How the Bible Can Help.”