Wɔ October 9, 2024 nɩ, egyima okuwu be mɔɔ bekila nnamɩ nwʋ ndwokɔ zʋ (World Wildlife Fund) valɩ amanɩyɛwɔlɛ be mɔɔ ɩyɛ atɩɩtɩɩ dianlɩ kua kɛɛ, mmenii bɛ nyɛlɩyɛ ɩkãã nnamɩ. Ɩmanlɩ ɩlalɩ ali kɛɛ “wɔ alʋbɔ 50 mɔɔ ɩɣa ɩzɩ̃ ɩhɔ nɩ (1970-2020), nnamɩ zʋ ɩtɩɩ paa na bɔ dʋdʋ iádwu mɔɔ nɩ bɔwɔ kɛnɩ nɩ yɩ ɔfʋã po.” Amanɩyɛwɔlɛ yɩ wɔlɩ kɔkɔ kɛɛ: “Yɛkɔhʋla yɛkɛhã paa kɛɛ, mɔɔ yɛkɛyɛ wɔ alʋbɔ anlu mɔɔ ɩbaa nɩ yɛ ikehile nnamɩ mɔɔ bɔwɔ Azɩlɛ yɩ zʋ nɩ be eɣile be a.”

 Amanɩyɛwɔlɛ eyi dɔ mmenii sʋ̃maa zʋ, na ntɩyasɩ wɔ numɔ sʋ̃. Yɛ anyɩ deli yɛ azɩlɛ yɩ nwʋ paa, na sɛ yɛnwʋ kɛɛ ɔzʋlɔ nnamɩ bɔnwʋʋ amanɩyɛ a, ɩyɛ ɛyɛkɛ yɛ. Sɛ yɛtɩ nɣanlɩ zɔ a nɩ ɩfata, iluwakɛɛ Nyamɩnlɩ wɔlɩ yɛ kɛɛ yehilá nnamɩ yɩ zʋ.—Gyɛnɛsɩsɩ 1:27, 28; Ɛɣɛlɛwulɛ 12:10.

 Ebiye a ekeɣizia kɛɛ, ‘Asʋ̃ yɛkɔhʋla kɔwɔ azɩlɛ yɩ zʋ nnamɩ nwʋ banɩ a? Mɩnla yɛ Bayɩbʋlʋ yɩ kã a?’

 Ɩávalɩ nwʋmɔ mmɔdɩnɩ bela mɔɔ yɛbɔɔ kɛɛ yɛkɔwɔ nnamɩ nwʋ banɩ nɩ, Gyehova yɩzayɩ nkʋ̃ la yɛ ɩkɔhʋla kɔwɔ bɔ nwʋ banɩ bʋwɔ a. Bayɩbʋlʋ yɩ kã wɔ Yikile 11:18 kɛɛ, Nyamɩnlɩ ‘kɛzɩkɛ bɛzabɛ mɔɔ bɛsɩkɛ azɩlɛ yɩ nɩ.’ Eyi ma yɛnwʋ nninyeni anwɩ̃ be:

1.  1. Nyamɩnlɩ lɛ́ma ɔhʋanɩ ma mmenii kɛzɩkɛ azɩlɛ yɩ kʋlakʋla.

2.  2. Ɩlɛ́kyɛ na Nyamɩnlɩ ɩayɛ nwʋmɔ debe. Kɛ ɩyɛ mɔɔ yɛnwʋ yɩ a? Iluwakɛɛ nnɛ adasamaa bɛ nyɛlɩyɛ kile kɛɛ, kezimɔ nnamɩ bɔ nnwʋanlɩ ɣa la asianɩ nu nɩ dɛla mmɩlɩ bela mɔɔ ɩɣa ɩzɩ̃ ɩhɔ.

 Mɩnla yɛ Nyamɩnlɩ kɛyɛ kɛva keli eyi nwʋ egyima a? Ɩkɛma yɩ sʋlɔ aɣanɩ anzɛnyɩɩ Bulombunlililɛ nɩ kɛɣa keli azɩlɛ yɩ munwala zʋ tumi. (Matiyu 6:10) Ɔzɔ aɣanɩ nɩ kehilehile adasamaa mɔɔ bɛyɛ sutiye nɩ ma bɔkɔnwʋ mɔɔ ɩsɛ kɛɛ bɛyɛ bɛfa bɔbɔ nnamɩ nwʋ banɩ.—Ayɩzaya 11:9.