“Eɣile bela debe twe agyiahʋnlɩmaa bɛ abʋtalɩ kila. Sɛ elékyialɩ a, ɔlɔ́nwʋ abʋtalɩ kɛɛ debe mɔɔ nwʋmɔ hyinyia naasʋ̃ sa ekyia a, yɛ ɔnwʋ kɛɛ nwʋmɔ hyinyia na ama agyiahʋnlɩ be ɩahɔ bʋwa a.”—John.

•  Mɩnla ti mɔɔ ehyinyia abʋtalɩ a?

•  Kɛ ɛkɛyɛ na wʋala abʋtalɩ ali a?

•  “Abʋtalɩ dɩ subanɩ mɔɔ nwʋmɔ hyinyia”

•   Agyiahʋnlɩ kɔhʋla kɛma ɔkɔnwʋ wʋ nwʋkãvʋlɔ yɩ mfʋmɩ azʋlɔtʋ yɩ bʋwɔ.

   “Mmɩlɩ mɔ egyia ma mmɩlɩ ɛgyɩkɩ̃ɩ̃ gua numɔ nɩ yɛ akʋ̃ ɔnwʋ wʋ nwʋkãvʋlɔ yɩ subanɩ azʋlɔtʋ mɔɔ wʋ anyɩ iáleli nwʋmɔ a. Sɛ ɔzɔ bʋwabɩlɛ yɩ twodwu a, ɩkɔhʋla ikodwe wʋ abʋtalɩ ikehila.”—Jessena.

•   Sɛ wʋányia abʋtalɩ a, ɔkɔhʋla kɛhã debe mɔɔ ɔlɔ́dwɩnɩ nwʋ ansaana wʋahã.

   “Ɩyɛ a, mɩpɩlɩ mʋ nwʋ mɩkã kezimɔ mɩtɩ nɣanlɩ wɔ nninyeni be nwʋ nkʋ̃ʋ̃ ma ɩyɛ po a, mɩkã ndwokɔ mɔɔ íni kɛɛ mɩkã. Sɛ minyianlɩ abʋtalɩ a, ankɩ mʋkɔhʋla mikehila kɛɛ mɔɔ mɩbahã nɩ nwʋ hyinyia a, ansaana mɩahã.”—Carmen.

   Bayɩbʋlʋ yɩ kã kɛɛ: “Ɔlɔlɛ ɩdɩ abʋtalɩ, yi ti nu iko.” (1 Kɔlɛntɩmaa 13:4) Ntɩyasɩ wɔ nu kɛɛ mmenii anwɩ̃ mɔɔ bɔdɔ bɔ nwʋ nɩ kɛla abʋtalɩ ali kehile bɔ nwʋ. Naasʋ̃ eyi ɩáda isi. John mɔɔ yeli bɔmʋnlɩ yɛhã yɩ nwʋ odwokɔ nɩ hanlɩ kɛɛ, “Dɩkɛ subanɩba bela nɩ, ɩ́la azɩ kɛɛ abiye kɛla abʋtalɩ ali, ide mmɔdɩnɩwɔlɛ.”

•   Mmɩlɩ mɔ debe dwe wʋ abʋtalɩ hila.

   Kɛ ndianwʋ: Mmɩlɩ mɔ wʋ nwʋkãvʋlɔ hã odwokɔ be mɔɔ wʋ anyɩ iáleli nwʋmɔ ihile wʋ. Ebiye a, ekezi pɔkɔ kɛɛ wʋzawʋ sʋ̃ ɛkɛhã biye kehile yi.

   Bayɩbʋlʋ egyinalɛzʋ-odwokɔ: “Máfa ɛya ndɛndɛ iluwakɛɛ ahwasɩya yɛ bɛfa ɛya a.”—Odwokɔhanlɛvʋlɔ 7:9.

   Kezimɔ ɛkɛla abʋtalɩ ali: Kyina ɛgyɩkɩ̃ɩ̃. Ansaana mɔɔ ɛkɛyɛ debe anzɛnyɩɩ ɛkɛdɩndɛ nɩ, kã kile wʋ nwʋ kɛɛ, ɩáhyɛda kɛɛ ɩtɩndɛɛ ikediyia mɩ. Buuku be mɔɔ bɔfʋlɔ yɩ Fighting for Your Marriage nɩ hanlɩ kɛɛ, “Ye nu sʋ̃maa fa yɛ adwɩnɩ siye kezimɔ yɛtɩ odwokɔ mɔɔ yɛ nwʋkãvʋlɔ ɩhã nɩ zʋ tɛla kɛɛ yɛkɛva yɛ adwɩnɩ yekeziye mɔɔ ɩpɛɛ ikehile ankasa nɩ zʋ.”

   Sɛ wʋ nwʋkãvʋlɔ yɛ debe anzɛnyɩɩ ɩkã odwokɔ be ma ɛfa ɛya na sɛ enyia yɩ nwʋ abʋtalɩ a, ɩkɔhʋla ɩkɔwʋwa wʋ ma ekeli bʋwabɩlɛ nɩ nwʋ egyima wɔ abʋtalɩ ɔhʋanɩ zʋ. Bayɩbʋlʋ yɩ kã kɛɛ “Sɛ ɛyɛnɩ íni kɛ a, sɩnɩ nu.”—Ɛɣɛlɛwulɛ 26:20.

   “Sɛ enyia adwɩnɩ kɛɛ wʋ yɩ dɩ wʋ tamvʋlɔ a, kyina ɛgyɩkɩ̃ɩ̃ na sunzu sianti mɔɔ ɔdɔ yɩ nɩ nwʋ na akʋ̃ bɔ mmɔdɩnɩ kɛɛ ɛkɛyɛ debe mɔɔ yɩ anyɩ deli nwʋmɔ paa ɛkɛma yɩ.”—Ethan.

   Dwɩnɩ eyi nwʋ:

  •  Sɛ wʋ nwʋkãvʋlɔ yɛ debe anzɛnyɩɩ ɩkã debe mɔɔ wʋ anyɩ iáleli nwʋ a, kɛ ɛyɛ wʋ dɩyɛ se a?

  •  Kɛ ɛkɛyɛ na wʋala abʋtalɩ ali mmɩlɩ mɔ wʋ nwʋkãvʋlɔ ɩyɛ debe mɔɔ ɩdɩ zɔ wɔ eɣile fʋlɔ nɩ a?

•   Mmɩlɩ mɔ wʋ nwʋkãvʋlɔ ta yɛ nninyeni mɔɔ wʋ anyɩ iáleli nwʋmɔ.

   Kɛ ndianwʋ: Wu hũ anzɛnyɩɩ wʋ yɩ ta yɛ late wɔ debela nwʋ na eyi ɩma ɛfa ɛya.

   Bayɩbʋlʋ egyinalɛzʋ-odwokɔ: “Mʋnlʋmmɔ bɔzʋzɔ́ bɔ nwʋ nkʋ̃ nkʋ̃, na sɛ abiye ɩlɛ yɩ ɔhɔnwʋ nwʋ ɛya a ɩvá ɩhyɛ yɩ.”—Kolosiyiamaa 3:13.

   Kezimɔ ɛkɛla abʋtalɩ ali: Ma wʋ nwʋkãvʋlɔ yɩ ahyinyiadɩ nwʋ hyinyia wʋ ɩdɛla wʋzawʋ wʋ dɩyɛ. Bizia wʋ nwʋ kɛɛ, ‘Sɛ mɩfa ɛya na mɩ nɩɩ mʋ nwʋkãvʋlɔ di mbevile a, asʋ̃ ɩkɔwʋwa yɛ agyiahʋnlɩ yɩ a?’ Akʋ̃ sʋ̃, kakɛ kɛɛ, “ye munwala yɛfʋ̃ wɔ nninyeni sʋ̃maa bɔ nwʋ.” (Gyemisi 3:2) Eyi kile kɛɛ wʋzawʋ sʋ̃ nninyeni be wɔ kɛnɩ mɔɔ ɩsɛ kɛɛ edi nwʋmɔ egyima.

   “Mbɔmɩ sʋ̃maa nɩ, mɩda abʋtalɩ ali mikile mʋ ɔhɔnwʋmmɔ mɩtɛla mu hũ. Musunzu kɛɛ kezimɔ mɩ nɩɩ yɩ wɔ hyɛ na mʋ nwʋ yɩ mfʋmɩ azʋlɔtʋ nɩ ti a. Naasʋ̃ sɛ mɩda abʋtalɩ ali a, ikile kɛɛ mʋ dɔ yɩ na mu bu yɩ sʋ̃.”—Nia.

   Dwɩnɩ eyi nwʋ:

  •  Asʋ̃ enyia wʋ nwʋkãvʋlɔ yɩ nwʋ abʋtalɩ a?

  •  Mɩnla yɛ ɔkɔhʋla kɛyɛ na wʋala abʋtalɩ kezile ali wɔ eɣile fʋlɔ a?