Kɛ Nyamɩnlɩ yɛ ɩfa asianɩ mɔɔ isizii wɔ nnɛ nɩ ɩba a, naasʋ̃ ɩdwɩnɩ bɛzabɛ mɔɔ asianɩ dʋ bɛ nɩ nwʋ. Ɩlɛ́kyɛ, Nyamɩnlɩ yɩ Bulombunlililɛ kodu nninyeni mɔɔ ɩfa ɔhawʋ ɩba, mɔɔ asianɩ kɩnla nwʋ nɩ yɩ tʋ. Naasʋ̃ sikalɛyɩ, Nyamɩnlɩ kyɩkyɩ bɛzabɛ mɔɔ asianɩ dʋ bɛ nɩ bɛ ɛɣɛɛlɛ.​—2 Kɔlɛntɩmaa 1:3.

•  Mɩnla ti mɔɔ yɛkʋla yɛkã kɛɛ asianɩ ɩ́dɩ azʋ̃nlɩhwɩnlɛ mɔɔ ɩzʋ̃ Nyamɩnlɩ a?

•  Asʋ̃ asianɩ mɔɔ isizii nɩ kile kɛɛ yɛda awielɩyɛ mmɩlɩ yɩ nu a?

•  Mɩnla ɔhʋanɩ zʋ yɛ Nyamɩnlɩ bʋwa bɛzabɛ mɔɔ asianɩ dʋ bɛ nɩ a?

•  Asʋ̃ Bayɩbʋlʋ yɩ kɔhʋla kɔwʋwa yɛ ma yekeziyeziye yɛ nwʋ yɛkɛma asianɩ a?

•  Bayɩbʋlʋ nu nkyɩkyɛmi azʋlɔtʋ mɔɔ ɩkyɩkyɩ bɛzabɛ mɔɔ asianɩ dʋ bɛ nɩ bɛ ɛɣɛɛlɛ

 Kezimɔ asianɩ sizi nɩ, ɩ nɩɩ kezimɔ Nyamɩnlɩ valɩ tumi mɔɔ ɩwɔ abɔdɩ nu lili egyima wɔ ɔwɔkɩ mmɩlɩ nu nɩ dɩ ɔkʋ̃.

•   Asianɩ kʋla tʋ abiyela na ɩkʋla ikũ abiyela. Naasʋ̃ Bayɩbʋlʋ yɩ ma yɛnwʋ kɛɛ, tumi mɔɔ ɩwɔ abɔdɩ nu mɔɔ Nyamɩnlɩ va zɩkɛlɩ tanɩyɛlɛmaa nɩ, ɩáfa baabayɛlɛmaa ɩkɩnla nwʋ. Kɛ ndianwʋ nɩ, mmɩlɩ mɔ Nyamɩnlɩ zɩkɛlɩ Sɔdɔmɩ nɩɩ Gomola nɩ, ileli Lɔɔtʋ nɩɩ yɩ nnwuakula mmalɛ anwɩ̃ nɩ bɔ nnwʋanlɩ. (Gyɛnɛsɩsɩ 19:29, 30) Wɔ ɔzɔ mmɩlɩ yɩ nu nɩ, Nyamɩnlɩ hilalɩ bo nu bela yɩ ahʋnlɩnɩ nu, na ɩzɩkɛlɩ bɛzabɛ mɔɔ bɛyɛ tanɩ nɩ.​—Gyɛnɛsɩsɩ 18:23-32; 1 Samʋwɛlɩ 16:7.

•   Asianɩ be ibazi a, bɛkã nwʋmɔ odwokɔ ɛgyɩkɩ̃ɩ̃ bela anzɛnyɩɩ bɛáwɔ amanɩyɛ bela. Naasʋ̃, ansaana mɔɔ Nyamɩnlɩ kɛva tumi mɔɔ ɩwɔ abɔdɩ nu nɩ kɛzɩkɛ tanɩyɛlɛmaa nɩ, ɩwɔlɩ bɛ kɔkɔ. Bɛzabɛ mɔɔ bediyeli kɔkɔwɔlɛ nɩ nyianlɩ nnwʋanlɩ.​—Gyɛnɛsɩsɩ 7:1-5; Matiyu 24:38, 39.

•   Ɔhʋanɩ be zʋ nɩ, mmenii bɛ nyɛlɩyɛ kɩnla nwʋ yɛ ɩma asianɩ sizi a. Mɩnla ɔhʋanɩ zʋ a? Ebiye lɛ azɩlɛ yɩ mɔɔ bɛsɩkɛ yɩ, bekyina nniyia wɔ nnɩka mɔɔ azɩlɛwʋsʋlɛ kɔhʋla kezi, nnɩka mɔɔ nzulo twu a, iyi nɩɩ oyumi bʋwabɩlɛ mɔɔ bɛsɩkɛ yɩ. (Yikile 11:18) Kɛ Nyamɩnlɩ yɛ ɩma adasamaa sizi ɔzɔ abɔkɔ yɛ a, meti íni kɛɛ yɛfa ɔzʋnɩ bela yetiã yɩ zʋ.​—Ɛɣɛlɛwulɛ 19:3.

 Nyɛ, Bayɩbʋlʋ hyɛlɩ nkɔmɩ kɛɛ asianɩ kezizi wɔ “oyuwadɩ yɩ awielɩyɛ,” anzɛnyɩɩ “awielɩyɛ mmɩlɩ yi nu.” (Matiyu 24:3; 2 Timoti 3:1) Kɛ ndianwʋ nɩ, Gyisɛsɩ hanlɩ awielɩyɛ mmɩlɩ nwʋ odwokɔ kɛɛ: “Kɔmɩ nɩɩ azɩlɛwʋsʋlɛ kɛɣa nnɩka nnɩka.” (Matiyu 24:7) Ɩlɛ́kyɛ, Nyamɩnlɩ kɛyɩ nninyeni mɔɔ ɩfa amanɩyɛnwʋnlɛ nɩɩ ɛyɛkɛ ɩba yɛ zʋ mɔɔ asianɩ sʋ̃ kɩnla nwʋ nɩ munwatĩĩ wɔ kɛ.​—Yikile 21:​3, 4.

•   Nyamɩnlɩ fa yi Odwokɔ Bayɩbʋlʋ yɩ kyɩkyɩ bɛ ɛɣɛɛlɛ. Bayɩbʋlʋ yɩ hyɛ yɛ ɛzɩzɩbɛ kɛɛ Nyamɩnlɩ dwɩnɩ yɛ nwʋ na ɔhawʋ bela mɔɔ yeyiyiaa nɩ ɩtɩ nɣanlɩ ɩma yɛ. (Ayɩzaya 63:9; 1 Pita 5:6, 7) Isia sʋ̃ ɩbɔ anʋhʋba kɛɛ mmɩlɩ be bɛaɣa mɔɔ asianɩ ilési dɔkʋ̃.​—Kila “ Bayɩbʋlʋ nu nkyɩkyɛmi azʋlɔtʋ mɔɔ ɩkyɩkyɩ bɛzabɛ mɔɔ asianɩ dʋ bɛ nɩ bɛ ɛɣɛɛlɛ.”

•   Nyamɩnlɩ duwa yɩ azʋ̃mɩvʋlɔ zʋ bʋwa bɛzabɛ mɔɔ asianɩ dʋ bɛ nɩ. Nyamɩnlɩ ma yɩ azʋ̃mɩvʋlɔ mɔɔ bɔwɔ kɛ nnɛ nɩ sumazuma Gyisɛsɩ yɩ ndianwʋ nɩ be. Bɛhyɛlɩ nwʋmɔ nkɔmɩ kɛɛ Gyisɛsɩ kɛyɩkyɩ bɛzabɛ mɔɔ “bɛ ahʋnlɩnɩ iwuwu” nɩɩ “bɛzabɛ mɔɔ bedi aɣɛlɛbɔ” nɩ munwala bɛ ɛɣɛɛlɛ. (Ayɩzaya 61:​1, 2) Na ɔzɔ la yɛ bɛzabɛ mɔɔ bɛdɩ Nyamɩnlɩ yɩ azʋ̃mɩvʋlɔ sʋ̃ bɔ mmɔdɩnɩ kɛɛ bɛkɛyɛ a.​—Dwɔɔnʋ 13:15.

   Nyamɩnlɩ duwa yɩ azʋ̃mɩvʋlɔ zʋ ma bɛzabɛ mɔɔ asianɩ dʋ bɛ nɩ bɛsa kã nninyeni mɔɔ behyinyia.​—Egyima 11:28-30; Galatiyiamaa 6:10.

 Nyɛ. Ɩwɔ numɔ, bɛákɛlɛ Bayɩbʋlʋ yɩ kɛɛ ɩwʋwá yɛ ma yeziyeziye yɛ nwʋ yɛma asianɩ dɩyɛ, naasʋ̃ egyinalɛzʋ-ndwokɔ azʋlɔtʋ mɔɔ ɩwɔ numɔ nɩ kɔhʋla kɔwʋwa yɛ ma yekeziyeziye yɛ nwʋ yɛkɛma asianɩ. Kɛ ndianwʋ nɩ:

•   Yɛ mɔɔ asianɩ si a, ɛkɛyɛ nɩ nwʋ nhyɩhyɛlɩyɛ. Bayɩbʋlʋ yɩ kã kɛɛ, “nɣɛlɛbɛvʋlɔ nwʋ asianɩ na ɩfa yɩ nwʋ ɩkɩnta.” (Ɛɣɛlɛwulɛ 22:3) Nɣɛlɛbɛ wɔ nu kɛɛ yɛkɔnwʋ mɔɔ yɛkɛyɛ mmɩlɩ mɔ odwokɔ be dwodwu aɣilemvile nu nɩ, ansaana ɔzɔ bʋwabɩlɛ nɩ ɩaɣa. Eyi kile kɛɛ, okohunwa hunwa nninyeni nɩɩ alɩyɛ be mɔɔ ɩázɩkɛ yi munwa kogua baagɩ be nu na ɛ nɩɩ wʋ abusunwamaa bɛazunzu dɩka mɔɔ bɔkɔhʋla bekeyiyia mmɩlɩ mɔ asianɩ be zi nɩ.

•   Ma nnwʋanlɩ nwʋ hyinyia wʋ dɛla anwʋnyia. Bayɩbʋlʋ yɩ kã kɛɛ: “Yɛáfa hwɩɩ yɛba oyuwadɩ yɩ nu, yɛɛ yɛlɔ́kʋla yɛkɛva dɩyɛ be sʋ̃ yɛzʋ̃ oyuwadɩ yɩ nu yɛkɔhɔ.” (1 Timoti 6:7, 8) Ɩsɛ kɛɛ yɛbɔ mmɔdɩnɩ kɛɛ yɛzʋ̃ yɛ awudo yɛkɛyɩ yɛ nwʋ anzɛnyɩɩ yekediã yɛ anwʋnyiadɩ kɛ mmɩlɩ mɔ asianɩ be izi nɩ. Ɩsɛ kɛɛ yɛkakɛ kɛɛ yɛ nnwʋanlɩ tʋ bʋlɔ tɛla anwʋnyia bela.​—Matiyu 6:25.