Fʋtʋlɔ mɔɔ Gyehova Dasɩvʋlɔmaa bɔzʋ̃ bɛ ahʋnlɩnɩ nu bɛyɩ nɩ titili yɛ yɛfa yetuwa yɛ oyuwadɩ munwala egyima yɩ nwʋ kakɛ a. a Bɛfa fʋtʋlɔ nnɛka bɛtɩda yɛ ayiyialɩyɛ azʋlɔtʋ yɩ tʋ. Na bɛva ahʋanɩ mvʋlɔ sʋ̃ mɔɔ yɛkɔhʋla yekoluwa zʋ yɛkɛyɩ fʋtʋlɔ bediã Donations ɔfʋã ɛkɛnɩ wɔ yɛ wɛbsayɩtɩ yɩ zʋ. Abiye ɩkɔhʋla ɩkɛyɩ fʋtʋlɔ ɩkɔwʋwa yɛ oyuwadɩ munwala egyima yɩ nɩ, kakɛ mɔɔ yɩ asafʋ yɩ ɩbɔ anzɛnyɩɩ anwɩ̃ yɩ munwala.

 Bɛáhila ɔhʋanɩ kɛɛ Gyehova Dasɩvʋlɔmaa bokoduwa tayɩtɩ na bɛádua ozukua pɔkyɩɩ be bɛma kɛɛ boduwa. (2 Kɔlɛntɩmaa 9:7) Yɛálile kɔlɛhyɩnɩ wɔ yɛ ayiyialɩyɛ tʋ na yɛále ozukua ansaana bɛaɣa ebiye. Akʋ̃ sʋ̃, ye mbanimbani nɩ bɛále onlumanlɛ, ayileyɛlɛ, ayɩfʋlɔyɛlɛ, anzɛnyɩɩ ɔzʋ̃mɩnlɛ nu dɩyɛyɛlɛ bela nwʋ ozukua. Yɛáluwa harvest, appeal for funds, crusade, anzɛnyɩɩ nninyeni mɔɔ ɩdɩdɩ ɔzɔ zʋ yesinziãã ozukua. Yɛáva mmenii mɔɔ bɛyɩ fʋtʋlɔ nwʋ ndwokɔ yetiã kua. (Matiyu 6:2-4) Yɛáluwa yɛ wɛbsayɩtɩ nɩɩ yɛ awuuku zʋ yɛbɔ nninyeni nwʋ ɛlawulo yɛpɩbɛ ozukua.

 Gyehova Dasɩvʋlɔmaa bɛ asafʋ bela bu ozukua mɔɔ bɛ sa ɩkã yɩ nwʋ ngʋnda eziyianɩ bela wɔ bɛ ayiyialɩyɛ mɔɔ abiyela ɩkʋla ɩba ebiye nɩ tʋ. Asafʋ bela ɩta ikilahila yɩ ozukuasɛmɩ nu ikila kɛɛ sɛ bɛlɛ bedi egyima bʋwɔ a.—2 Kɔlɛntɩmaa 8:20, 21.

•   Fʋtʋlɔ nnɛka: Sa ɔkʋla fa ozukua anzɛnyɩɩ kyɛɛkɩ etiã fʋtʋlɔ nnɛka mɔɔ ɩwɔ yɛ Bulombunli Ayiyialɩyɛ Nniyia, Ayiyialɩyɛ Nniyia, anzɛnyɩɩ nnɩka mvʋlɔ mɔɔ yɛyɛ yɛ ayiyialɩyɛ nɩ nu.

•   Intanɛtɩ zʋ fʋtʋlɔyɩlɛ: Wɔ manlɩ sʋ̃maa zʋ nɩ, sa ɔkʋla oduwa credit cards, debit cards, bank transfers, nɩɩ ɩlɛtɩlɔnɩkɩ ahʋanɩ mvʋlɔ zʋ ɛyɩ fʋtʋlɔ wɔ yɛ wɛbsayɩtɩ yɩ zʋ, wɔ ɔfʋã mɔɔ ise “Donate to Jehovah’s Witnesses” nɩ. b Dasɩvʋlɔmaa be ‘bɛtɩ ozukua mɔɔ benyia nɩ be betiã ahanlɩ’ na boduwa ahʋanɩ eyimmɔ ɔkʋ̃ zʋ bɛyɩ fʋtʋlɔ eziyianɩ bela.—1 Kɔlɛntɩmaa 16:2.

•   Fʋtʋlɔyɩlɛ nwʋ nhyɩhyɛlɩyɛ: Ahʋanɩ mɔɔ yeduwa zʋ yɛyɩ fʋtʋlɔ be pɩbɛ kɛɛ yedi bɔmʋnlɩ yesunzu ahʋanɩ azʋlɔtʋ anzɛnyɩɩ mmɛla ahʋanɩ mɔɔ boduwa zʋ bɛyɛ ɔzɔ nɩ nwʋ. Sɛ ɛyɛ nhyɩhyɛlɩyɛ eyi a, sa ɩkʋla ɩma aɣanɩ nɩ ɩtɩ ndwulɩyɛ mɔɔ ɩsɛ kɛ otuwa wɔ manlɩ yi nu nɩ zʋ. Sɛ mmenii sʋ̃maa tɩ nhyɩhyɛlɩyɛ mɔɔ boduwa zʋ bɛfa akyɛdɩ bɛma mmɩlɩ mɔ bɛda azɩ anzɛnyɩɩ bowu nɩ tʋ bʋwɔ a, ɩbʋwa bɛ baaba. Yesiãã wʋ, fɩlɛ Gyehova Dasɩvʋlɔmaa bɛ Bɛtɩlɩ mɔɔ ɩwɔ wʋ manlɩ yi nu nɩ, wɔ mmɩlɩ mɔ ɛpɛ kɛɛ oduwa ahʋanɩ mɔɔ ilili zʋlɔ eyi be zʋ ɛyɩ fʋtʋlɔ nɩ:

  •   ozukua mɔɔ ɩla bangɩ

  •   insurance nɩɩ pɛnhyɛnɩ ozukua

  •   azɩlɛ nɩɩ nniyia

  •   kyɛfʋã wɔ egyima be nu nɩɩ ozukua mɔɔ bɛfa bɔbɔ bʋsɩya

  •   agyiapadɩ

 Sɛ ɛpɛɛ ndwokɔ sʋ̃maa mɔɔ ɩfalɩ kezimɔ ɛkɛyɩ fʋtʋlɔ wɔ ahʋanɩ eyimmɔ be zʋ wɔ dɩka mɔɔ ɔwɔ nɩ a, kilá ɔfʋã mɔɔ ise “Donate to Jehovah’s Witnesses”.