Kɛ Gyehova Dasɩvʋlɔmaa nɩ, yɛbɔ mmɔdɩnɩ kɛɛ yɛkɛva mɔɔ Gyisɛsɩ ihilehileli nɩɩ mɔɔ yɩ adʋwavʋlɔ yɩ bɛva bɔwɔlɩ bɛ ɛbɩla nɩ yɛkɛyɛ egyima. Ɔzɔ ɔfʋã eyi ɩbɔ mɔɔ yede yedi nɩ dɔkɔ.

1.   Nyamɩnlɩ. Yɛsʋ̃mɩ nɔhʋanlɛ Nyamɩnlɩ ɔkʋ̃tɩnyɩɩ nɩ, Dɩyɛwɔlɛvʋlɔ nɩ mɔɔ yi dima yɛ lɛ Gyehova nɩ. (Ndwomi 83:18; Yikile 4:​11) Mɛyɩ yɛ lɛ Abilehamɩ, Mosisi, nɩɩ Gyisɛsɩ bɛ Nyamɩnlɩ nɩ.​—Ɛkɩsadɔsʋ 3:6; 32:11; Dwɔɔnʋ 20:17.

2.   Bayɩbʋlʋ. Yɛnwʋ Bayɩbʋlʋ yɩ kɛɛ ɩdɩ ɛhɛlɛlɛ mɔɔ ɩzʋ̃ Nyamɩnlɩ yi munwa nu mɔɔ ɩva ɩma adasamaa. (Dwɔɔnʋ 17:17; 2 Timoti 3:​16) Ye dedi nɩ igyĩ Bayɩbʋlʋ yɩ awuuku 66 munwatĩĩ zʋ, mɔɔ ɩdɩ “Nhyɩhyɛlɩyɛ Dadampɔ” nɩɩ “Nhyɩhyɛlɩyɛ Fʋlɔ” nɩ. Professor Jason D. BeDuhn ɩhɛlɛlɩ kɛɛ, Gyehova Dasɩvʋlɔmaa “bɛádwɩ̃ bɛma Bayɩbʋlʋ nɩ, mfomi mɔɔ bede bedi nɩ, igyĩ mɔɔ Bayɩbʋlʋ yɩzayɩ ɩkã paa nɩ zʋ.” a

    Yede Bayɩbʋlʋ yɩ munwala yetiã numɔ dɩyɛ, naasʋ̃ yɛáva numɔ ndwokɔ nɩ munwatĩĩ kɛmɔ ɩdɩ nɩ la. Yezi paa kɛɛ Bayɩbʋlʋ yɩ ɔfʋã be wɔ ɛkɛnɩ mɔɔ bɛhɛlɛlɩ wɔ sɛnkyɩlɛdɩ ɔhʋanɩ zʋ na íni kɛɛ yɛfa yɩ kɛmɔ ɩdɩ nɩ la.​—Yikile 1:1.

3.   Gyisɛsɩ. Yedi Gyisɛsɩ yi ehilehilelɛ nɩɩ yɩ ndianwʋ mɛda na yebu yɩ kɛɛ yɛ Elelɛvʋlɔ nɩɩ Nyamɩnlɩ Ɣalɛ. (Matiyu 20:28; Egyima 5:​31) Eyi kile kɛɛ, yɛdɩ Kilisinyiamaa. (Egyima 11:26) Naasʋ̃, yezuma wɔ Bayɩbʋlʋ yi nu kɛɛ, Gyisɛsɩ ɩ́dɩ Nyamɩnlɩ Tumivʋlɔ na odwokɔ bela íni Bayɩbʋlʋ yi nu mɔɔ ikile kɛɛ Nyamɩnlɩ ɩdɩ Asã-Ɔkʋ̃.​—Dwɔɔnʋ 14:28.

4.   Nyamɩnlɩ Bulombunlililɛ Yɩ Nɩ. Eyi ɩdɩ aɣanɩ ankasa mɔɔ ɩwɔ sʋlɔ na kɛ dɩyɛ be mɔɔ ɩwɔ Kilisinyiamaa bɛ ahʋnlɩnɩ nu a. Ɩkɛɣa ikeziye enii yɩ aɣanɩ dɩyɛ nɩ yɩ agyia nu na iali Nyamɩnlɩ yi tile nu pɔkɔ mɔɔ ɩwɔ ɩma azɩlɛ yɩ nɩ nwʋ egyima. (Danɩyɛlɩ 2:​44; Matiyu 6:​9, 10) Ɩlɛ́kyɛ bela eyi kɛɣa numɔ, Bayɩbʋlʋ nkɔmɩhyɛlɛ kile kɛɛ yɛda “mmɩlɩ mɔ ili awielɩyɛ nɩ nu.”​—2 Timoti 3:​1-5; Matiyu 24:​3-​14.

    Gyisɛsɩ yɛ ɩdɩ Nyamɩnlɩ yɩ Bulombunlililɛ nɩ yɩ zʋ Bulombunli wɔ sʋlɔ a. Ɩwɔlɩ yɩ tʋ kɛɛ idi bulombunli wɔ ɔlʋbɔ 1914.​—Yikile 11:15.

5.   Nnwʋanlɩlelɛ. Iluwa Gyisɛsɩ yɩ elelɛ afɔlɩ nɩ ti, bɔkʋla bede yɛ wɔ tanɩ nɩɩ owulo tʋ. (Matiyu 20:28; Egyima 4:​12) Sɛ yekenyia afɔlɩ nɩ zʋ mfasʋ a, kɛ dedi nkʋ̃ la yɛ ɩwɔ kɛɛ yenyia wɔ Gyisɛsɩ yi nu a, na mfomi ɩsɛ kɛɛ yɛsɩnza yɛ ɛbɩlawɔlɛ na yenuma sʋ̃. (Matiyu 28:19, 20; Dwɔɔnʋ 3:​16; Egyima 3:​19, 20) Abiye yɩ nyɛlɩyɛ yɛ ikehile kɛɛ ɩwɔ dedi a. (Gyemisi 2:​24, 26) Naasʋ̃, sɛ yekenyia nnwʋanlɩ a, ɩ́dɩ amɩyɛzayɛ yɛ mmɔdɩnɩwɔlɛ​—mfomi ɩdɩ ‘Nyamɩnlɩ yɩ adʋmɩ.’​—Galatiyiamaa 2:​16, 21.

6.   Sʋlɔ. Gyehova Nyamɩnlɩ, Gyisɛsɩ Kɩlayɩsɩ, nɩɩ awɔvʋlɔ nɔhʋanlɛmaa yɛ bɛda sʋlɔ a. b (Ndwomi 103:19-​21; Egyima 7:​55) Mmenii ɛgyɩkɩ̃ɩ̃ be​—144,000​—yɛ bokodunwo bɛ ma bɛ nɩɩ Gyisɛsɩ keli dɩyɛ wɔ sʋlɔ a.​—Danɩyɛlɩ 7:​27; 2 Timoti 2:​12; Yikile 5:​9, 10; 14:​1, 3.

7.   Azɩlɛ. Nyamɩnlɩ ɩwɔlɩ azɩlɛ yɩ kɛɛ ɩyɛ́ adasamaa bɛ awudo eɣile bela. (Ndwomi 104:5; 115:16; Odwokɔhanlɛvʋlɔ 1:4) Nyamɩnlɩ ikeyila mmenii mɔɔ betiye yɩ odwokɔ nɩ, ɩkɛma bekenyia pɔkɔdɩlɛ baaba nɩɩ nnwʋanlɩ mɔɔ íni awielɩyɛ wɔ paladayɩsɩ azɩlɛ yɩ zʋ.​—Ndwomi 37:11, 34.

8.   Tanɩ nɩɩ Amanɩyɛnwʋnlɛ. Eyi ɩwɔlɩ yɩ tʋ mmɩlɩ mɔ Nyamɩnlɩ yɩ bɔvʋlɔ ɔkʋ̃ ɩdɩlɩ atunwa nɩ. (Dwɔɔnʋ 8:​44) Bɛɣa bɔvʋlɔlɩ ɔzɔ bɔvʋlɔ eyi “Setanɩ” nɩɩ “Abɔnsamɩ” wɔ yɩ atunwadɩlɛ mɛda, ɩlahɩlɩlahɩlɩ agyiahʋnlɩmaa mɔɔ beli bɔmʋnlɩ nɩ ma belili yɩ mɛda, na mɔɔ ɩzʋ̃ numɔ ɩɣalɩ bɔ tʋmaa zʋ nɩ, ɩdɩ tanɩ nkʋ̃ʋ̃. (Gyɛnɛsɩsɩ 3:​1-6; Wulomimaa 5:​12) Mɔɔ ɩkɛyɛ na Nyamɩnlɩ ɩahʋla iali ndwokɔ mɔɔ Setanɩ ɩma idwodwu nɩ nwʋ egyima nɩ ti, ɩma amanɩyɛnwʋnlɛ nɩɩ tanɩ nwʋ ɔhʋanɩ, naasʋ̃ ɩlɛ́ma ɩkɔhɔlɩ ɔzʋlɔ ɩkɛhyɛ.

9.   Owulo. Abiye iwu a, nɩ íni nnwʋanlɩ nu dɔkʋ̃. (Ndwomi 146:4; Odwokɔhanlɛvʋlɔ 9:​5, 10) Bɛáyɛ bɛ ayɛkwa wɔ sɩnɩ bela nu.

    Iluwa awudunwolɩyɛ yɩ zʋ nɩ, Nyamɩnlɩ ikezia ɩkɛva mmenii abʋmɩ abʋmɩ sʋ̃maa mɔɔ bowuwu nɩ ɩkɛɣa nnwʋanlɩ nu dɔkʋ̃. (Egyima 24:15) Naasʋ̃ sɛ Nyamɩnlɩ itunwo awuvʋlɔ a, bɛzabɛ mɔɔ bɔkɔbʋ yɩ ɔhʋanɩhilelɛ nɩ, bekezia bɛkɛzɩkɛ bɛ mɔɔ bolótunwo bɛ dɔkʋ̃.​—Yikile 20:14, 15.

10.   Abusunwa. Yɛfa Nyamɩnlɩ yɩ mmɛla mɔɔ ɩfalɩ agyiahʋnlɩ nwʋ mɔɔ ise, ɩsɛ kɛɛ benyia ɔkʋ̃ ikyia baalɛ ɔkʋ̃, na adwomanlɩwɔlɛ nkʋ̃ʋ̃ la yɛɛ ɩkʋla ɩma abiye iyiaki agyiahʋnlɩ nɩ yedi egyima. (Matiyu 19:​4-9) Yede yedi paa kɛɛ, fʋlɔdulɛ mɔɔ ɩwɔ Bayɩbʋlʋ yi nu nɩ, ɩbʋwa ma mmusunwa nyia anyɩnlɩlelɛ.​—Ɛfɩsɛsɩmaa 5:22–​6:1.

11.   Yɛ ɔzʋ̃mɩnlɛ. Yɛáva nɣɛlanuwudo anzɛnyɩɩ aboduwaba bela yedi egyima wɔ yɛ ɔzʋ̃mɩnlɛ nu. (Ditilonɔmi 4:​15-​19; 1 Dwɔɔnʋ 5:​21) Nninyeni aditili mɔɔ yɛyɛ wɔ yɛ ɔzʋ̃mɩnlɛ nu nɩ be yɛ ilili ɔzʋlɔ yɩ a:

    •   Yɛbɔ Nyamɩnlɩ mpayɩ.​—Fɩlɩpɩmaa 4:6.

    •   Yɛkɩnga na yesuma Bayɩbʋlʋ yɩ.​—Ndwomi 1:​1-3.

    •   Yɛdwɩnɩndwɩnɩ mɔɔ yesuma wɔ Bayɩbʋlʋ yi nu nɩ nwʋ.​—Ndwomi 77:12.

    •   Yeyiyia numɔ a, yɛbɔ mpayɩ, yesuma Bayɩbʋlʋ, yɛtʋ ndwomi, yɛda ye dedi ali, na yɛhyɛ ye mmeliyema nɩɩ mmenii mvʋlɔ sʋ̃ ɛzɩzɩbɛ.​—Kolosiyiamaa 3:​16; Hibulumaa 10:23-​25.

    •   Yɛbɔ “Bulombunlililɛ nɩ nwʋ ɛlawulo”.​—Matiyu 24:14.

    •   Yɛbʋwa bɛzabɛ mɔɔ behyinyia mmʋwalɩyɛ nɩ.​—Gyemisi 2:​14-​17.

    •   Yekyina na yesiyeziye Bulombunli Ayiyialɩyɛ Nniyia nɩɩ nniyia mvʋlɔ mɔɔ yɛfa yɛtɛlɛ yɛ oyuwadɩ munwala Bayɩbʋlʋ ehilehilelɛ egyima yi nu nɩ.​—Ndwomi 127:1.

    •   Yɛbʋwa wɔ asianɩ mmɩlɩ nu.​—Egyima 11:27-​30.

12.   Yɛ ahyɩhyɛdɩ nɩ. Bɛhyɩhyɛ ye nu kɛɛ asafʋ azʋlɔtʋ, mɔɔ asafʋ nu mbanimbani yɛ bedi anyunumi a. Naasʋ̃ mbanimbani nɩ, bɛ́dɩ azɔfʋ okuwu na bɛále akatuwa bela. (Matiyu 10:8; 23:8) Yɛálile tayɩtɩ anzɛnyɩɩ kɔlɛhyɩnɩ wɔ yɛ ayiyialɩyɛ tʋ. (2 Kɔlɛntɩmaa 9:7) Yɛzʋ̃ yɛ ahʋnlɩnɩ nu yɛ yɛyɩ fʋtʋlɔ yɛbʋwa ye egyima nɩ a.

     Ɔhʋanɩhilelɛ Okuwu nɩ, bɛdɩ Kilisinyiamaa okuwu ɛgyɩkɩ̃ɩ̃ be mɔɔ bɔ nwʋ ɩwʋkwa, mɔɔ bɔsʋ̃mɩ wɔ yɛ oyuwadɩ munwala egyimayɛlɛdɩka yi ti. Bɛfa ɔhʋanɩhilelɛ bɛma Gyehova Dasɩvʋlɔmaa mɔɔ bɔwɔ oyuwadɩ munwala nɩ.​—Matiyu 24:45.

13.   Yɛ ɔkʋ̃yɛlɛ. Wɔ oyuwadɩ munwala nɩ, ye munwatĩĩ yɛlɛ dedi ɔkʋ̃. (1 Kɔlɛntɩmaa 1:​10) Yɛbɔ mmɔdɩnɩ sʋ̃ kɛɛ, yɛlɛ́ma dɩka mɔɔ abiye ɩzʋ̃, yɩ abusunwa, yɩ nnwʋnlamɩ anyɩ, anzɛnyɩɩ yɩ gyinabʋ ɩkɛma ye nu ɩkɛhyɩhyɛ. (Egyima 10:34, 35; Gyemisi 2:4) Naasʋ̃ ɩávalɩ nwʋmɔ kɛɛ yɛdɩ ɔkʋ̃ nɩ, ye nu bela ɩkʋla isizi yɩzayɩ yɩ abɔkɔ. Yɛfa ye ti wʋwaba mɔɔ yɛva Bayɩbʋlʋ yɛdɩdɩ yɩ nɩ yesizi abɔkɔ.​—Wulomimaa14:​1-4; Hibulumaa 5:​14.

14.   Yɛ nyɛlɩyɛ. Yɛbɔ mmɔdɩnɩ kɛɛ yɛkɛla ɔlɔlɛ kanyɩɩ ali wɔ yɛ nyɛlɩyɛ bela nu. (Dwɔɔnʋ 13:34, 35) Yɛpʋ nyɛlɩyɛ bela mɔɔ Nyamɩnlɩ ikyi nɩ, dɩkɛɛ mmegyia mɔɔ bɛáva bedi egyima wɔ ɔhʋanɩba zʋ, meti iále mmegyia. (Egyima 15:28, 29; Galatiyiamaa 5:​19-​21) Yɛpɛ azʋ̃nudwolɩyɛ meti yɛáva yɛ nwʋ yewula kʋnɛ nu. (Matiyu 5:9; Ayɩzaya 2:4) Yɛda annidi ali yekile aɣanɩ mɔɔ ɩwɔ dɩka mɔɔ yɛda nɩ, na yedi yɩ mmɛla azʋlɔtʋ nɩ zʋ mmɩlɩ mɔ iádiyia Nyamɩnlɩ yɩ mmɛla nɩ.​—Matiyu 22:21; Egyima 5:​29.

15.   Yɛ nɩɩ mmenii mvʋlɔ avinli abusunwawɔlɛ. Gyisɛsɩ ɩhyɛlɩ kɛɛ: “Dɔ wʋ ɔhɔnwʋ kɛɛ wʋzawʋ wʋ nwʋ.” Ɩhanlɩ sʋ̃ kɛɛ, Kilisinyiamaa “bɛ́dɩ oyuwadɩ yɩ ɔfʋa.” (Matiyu 22:39; Dwɔɔnʋ 17:16, NWT) Meti yɛbɔ mmɔdɩnɩ kɛɛ ‘yɛkɛyɛ baaba yɛkɛma abiyela,’ naasʋ̃ yɛáva yɛ nwʋ yewula manlɩwulɛ ndwokɔ nɩɩ ɔzʋ̃mɩnlɛ mvʋlɔ bɔ ɔzʋ̃mɩnlɛ nu. (Galatiyiamaa 6:​10; 2 Kɔlɛntɩmaa 6:​14) Naasʋ̃, sɛ abiye si pɔkɔ wɔ ɔzɔ nninyeni yɩ nwʋ a, yɛádɩndɛ yetiyia yɩ.​—Wulomimaa 14:12.

 Sɛ ɔwɔ ndwokɔɣizialɛ mvʋlɔ mɔɔ ɩfalɩ Gyehova Dasɩvʋlɔmaa be dedi nwʋ a, sa ɔkʋla ɛkɩnga yɛ nwʋ ndwokɔ sʋ̃maa wɔ yɛ wɛbsayɩtɩ yɩ zʋ, ɔfʋlɔ yɛ ɔfɩsɩ nɩ numɔ ɔkʋ̃, ɔkɔ yɛ ayiyialɩyɛ nɩ be wɔ yɛ Bulombunli Ayiyialɩyɛ Aliyia mɔɔ ibike wʋ nɩ nu, anzɛnyɩɩ ebizia Dasɩvʋlɔ be mɔɔ ɩda ibike wʋ nɩ.