Aˬ dui Miˬyehˇ˗euˬ Miˇkʼahˬ aˬ jeˬ miˇ neh loˬ˗eu nga?
Yeˬhawˇbaˬ naˇ dahˬ beh˗euˬ nyiˬ dzeˇ zaˬ˗ahˇ beh˗euˬ Miˬyehˇ pyeuꞈ meh. Teu ngeh uˆ lahˇ˗eu naˇ aˬ yawꞈ tiˬ gʼaˬ tehꞈ˗ehˇ pyeuꞈ˗awˇ, nui gaˬ laꞈ kʼoeˇ neh uˆ lahˇ˗eu meh. Aˬ yawꞈ aˬ yawꞈ maꞈ˗ahˇ bi jawˇ˗eu gʼaˇ duˬ, Eˬdeˬ lehˇ kuˇ˗eu muiˬ dui dui˗eu yaˇ kʼmˇ beh nehˬ˗euˬ meh. Kʼoeˇ naˇ dzaˬ dzaˬ dawˇ dawˇ jiˇ gʼawˬ mya ni lehˬ hmˬ nehˬ˗awˇ laˬ kʼaˬ cehˇ dui dui laˇ˗eu gaˇ jiˇ biꞈ nehˬ˗euˬ meh. (Aˇdahˬbeh˗eu 1:28, 29; 2:8, 15) Tsawˇ haˬ zaˬ Miˬyehˇ neh gʼoeˇ˗eu gaˬ˗eu jeˬ laꞈ kʼoeˇ uˆ lahˇ˗eu uˬ moˆ jawˇ naˇ, laˬ kʼaˬ cehˇ nui saˇ ya oꞈ daˆ leꞈ˗eu yaw duˬ baw meh.
Dahˬ beh˗euˬ tsawˇ haˬ zaˬ Miˬyehˇ neh maˬ bi uˆ lahˇ
Jaˇliꞈ˗ahˇ mˬ taˆ gʼaˬ kʼehˇ tiˬ gʼaˬ Miˬyehˇ˗ahˇ puiˬ˗euˬ meh lehˇ ehˇ taˬ˗euˬ meh. Aˇ nah naˇ aˬ yawꞈ˗ahˇ Saˬdaˬ lehˇ kuˇ˗eu meh. Aˬ yawꞈ Miˬyehˇ tsawˇ haˬ zaˬ˗ahˇ uˆ lahˇ˗eu aˬ kawˬ˗aˬ maˬ jaˆ˗a lehˇ ja bu˗eu meh. Heu naˇ tsawˇ haˬ zaˬ Miˬyehˇ uˆ lahˇ˗eu uˬ moˆ, aˬ yawꞈ sheuˬ gʼeh˗eu uˬ moˆ maˬ jawˇ naˇ laˬ kʼaˬ cehˇ dzehˬ meh lehˇ ehˇ˗eu meh. Nui ma nyiˇ laˇ paˬ˗ehˇ gʼeh˗eu jeˬ naˇ, aˬ dui˗euˬ dahˬ beh˗euˬ aˬ da aˬ ma pyeuꞈ˗eu Aˬdaˬ hawˇ˗eu Eˇbaˆ Saˬdaˬ loꞈ˗ehˇ Miˬyehˇ˗ahˇ puiˬ˗euˬ meh.—Aˇdahˬbeh˗eu 3:1-6; Pah mehˬ˗eu 12:9.
Aˬdaˬ hawˇ˗eu Eˇbaˆ Miˬyehˇ neh maˬ bi uˆ lahˇ˗euˬ baˬ da neh, muiˬ dui dui˗eu Eˬdeˬ yaˇ kʼmˇ˗ahˇ maˬ paˇ ya jawˇ˗euˬ meh. Kʼoeˇ uˬ taꞈ zaˬ muiˬ jawˇ saˇ doˆ doˆ˗ehˇ mˬ maˬ maˬ byaˆ zaˇ ziˇ dehꞈ gʼeh˗eu noeˬ tmˬ˗eu jeˬ jiˇ cawˆ iˇ˗euˬ meh. (Aˇdahˬbeh˗eu 3:17-19) Aˬ yawꞈ neh toˆ˗ehˇ noeˬ tsehˆ˗euˬ teu naˇ, aˬ yawꞈ˗euˬ zaˬ deuˬ uˆ deuˬ˗ahˇ deuˬ dui dui˗eu meh. Jaˇliꞈ laꞈ kʼoeˇ Aˬdaˬ neh ehˇ dawˬ maˬ naˇ haˬ ni iˬ baˇ mˇ˗euˬ baˬ da neh “miˇ tsaˬ kʼoeˇ taˆ iˬ baˇ keuˆ le˗awˇ, iˬ baˇ kʼoeˇ baˬ da neh shiˇ˗eu jeˬ keuˆ le˗euˬ meh” lehˇ maˇ jawˆ ni ehˇ taˬ˗euˬ meh. (Loˇmaˆ 5:12) Iˬ baˇ heu˗aˬ nui ma nyiˇ dui dui laˇ paˬ˗ehˇ gʼeh˗eu jeˬ bi pyeuꞈ laˇ˗eu meh. Jaˇliꞈ˗ahˇ “Tsawˇ haˬ zaˬ tiˬ gʼaˬ tiˇ gʼaˬ nawˬ dzaˬ kʼaˆ dzaˬ luꞈ˗eu” meh lehˇ ehˇ taˬ˗euˬ meh. (Dawˬtsoˆ 8:9) Yaw awˬ awˬ˗ehˇ ya ehˇ naˇ, tsawˇ haˬ zaˬ uˆ lahˇ˗eu jeˬ heu naˇ aˬ myah luꞈ gaˇ kawˆ jaˆ˗eu meh.
Tsawˇ haˬ zaˬ˗euˬ uˆ lahˇ˗eu jeˬ dahˬ beh laˇ
Niˇyawˇdaˆ Yeˬhawˇbaˬ˗ahˇ muiˇ
Jaˇliꞈ˗ahˇ tsawˇ haˬ zaˬ˗euˬ uˆ lahˇ˗eu jeˬ dahˬ beh laˇ˗euˬ gʼaˬ naˇ, Niˇyawˇdaˆ pyeuꞈ meh lehˇ ehˇ taˬ˗euˬ meh. Aˬ yawꞈ Yeˬhawˇbaˬ uˆ lahˇ˗eu jeˬ˗ahˇ muiˇ˗eu meh. Niˇyawˇdaˆ˗euˬ saˇ ka˗ahˇ neh naˇ uˆ lahˇ˗eu baoˬ jaˆ˗eu deuˬ aˬ yawꞈ maꞈ˗euˬ baoˬ˗ahˇ maˬ ngeuˇ˗eu jeˬ˗ehˇ zmˬ˗eu meh. Sahˬ paˬ Sawˇlaˬmoˬ dzeuˇ yaꞈ˗euˬ 3,000 kʼoꞈ ehˇ gʼaˬ ni˗ahˇ “Kʼehˬ˗eu kʼaˆ˗eu jeˬ˗ahˇ ya daˬ luꞈ˗eu tsawˇ haˬ deuˬ myaˆ biˇ yoeˇ luꞈ˗awˇ, ngehˬ gʼeh nehˬ˗eu gʼaˬ maˬ jawˇ˗a. Aˬ yawꞈ maꞈ˗ahˇ kʼehˬ luꞈ˗eu deuˬ jawˇ paw gʼaˬ kʼaˆ˗eu miˇ neh, tiˬ gʼaˬ˗iˬ ngehˬ maˬ gʼeh nehˬ peuˬ˗a” lehˇ boꞈ taˬ˗euˬ meh.—Dawˬtsoˆ 4:1.
Nymˬ˗mˇ iˬ nah jiˇ teu loꞈ˗ehˇ pyeuꞈ luꞈ meh siˬ. Miˇ kʼahˬ deuˬ˗ahˇ haw teˬ˗euˬ aˇ maꞈ˗euˬ 2009 kʼoꞈ˗ahˇ˗euˬ paˇ dmˬ tiˬ dmˬ˗ahˇ “miˇ tsaˬ kʼoeˇ taˆ˗euˬ shaˬ zahˬ dawˬ tawˆ luꞈ tsawˇ haˬ uˆ lahˇ˗eu jeˬ maˬ muiˬ˗eu miˇ neh nga” lehˇ ehˇ˗eu tsawˇ haˬ myaˬ laˇ tehˇ tehˬ nga lehˇ ehˇ˗eu meh.
Laˆ poˆ laˆ paˇ mˇ˗eu aˇ yamˬ tsaˬ laˇ
Miˇ tsaˬ heu siˬ heu naˆ maˬ tseˇ muiˬ˗eu uˆ lahˇ˗eu gʼaˬ˗ahˇ maˬ ehˇ, heu naˆ maˬ tseˇ muiˬ˗eu uˆ lahˇ˗eu aˇ maꞈ˗ahˇ maˬ ehˇ, loˬ meh. Heu naˇ aˬ dui˗ahˇ Beh˗euˬ Miˬyehˇ neh saˇ jaˇ dzaˬ taˬ˗euˬ jeˬ pyeuꞈ meh.
Aˬ cawˬ naˆ maˬ tseˇ muiˬ dzehˬ˗eu sahˬ paˬ sahˬ ma deuˬ kʼawꞈ, tsawˇ haˬ zaˬ˗euˬ huiˬ˗eu shaˬ zahˬ deuˬ˗ahˇ maˬ laˆ piˇ nehˬ nya
Miˬyehˇ aˬ yawꞈ˗euˬ uˆ lahˇ˗eu aˇ maꞈ maˬ ngeuˇ naˇ, aˬ yawꞈ˗euˬ Miˇkʼahˬ tsawˇ haˬ zaˬ˗euˬ uˆ lahˇ˗eu jeˬ dawˬ tawˆ luꞈ˗ahˇ laˆ cawˆ jiˇ˗awˇ, “mˬ maˬ maˬ byaˆ zaˇ ziˇ ziꞈ dah ni gʼeh˗eu miˇ kʼahˬ pyeuꞈ laˇ tehꞈ˗a” lehˇ ehˇ˗eu meh. (Daˬyeˬlaˇ 2:44) Tsawˇ haˬ gʼawˬ mya lam gʼaˬ shaˇ luꞈ˗eu naˇ Miˇkʼahˬ heu kʼahˬ meh. (Maꞈtehˬ 6:9, 10) Ehˇ kʼawꞈ Miˬyehˇ Miˇkʼahˬ heu kʼahˬ˗ahˇ aˬ yawꞈ˗euˬ do neh maˬ uˆ lahˇ˗a. Aˬ yawꞈ tsawˇ haˬ zaˬ pyeuꞈ haw˗euˬ tiˬ gʼaˬ˗ahˇ sahˬ paˬ ka nehˬ˗eu meh. Miˬyehˇ aˬ suˇ gʼaˬ˗ahˇ tseˇ˗euˬ nga?
