• Miˬyehˇ Miˇkʼahˬ˗ahˇ sahˬ paˬ geuꞈ˗eu teu gʼaˬ naˇ, Miˬyehˇ neh tseˇ˗euˬ meh. ‘Ngaˇ dzoeˬ dzaˬ sahˬ paˬ ciˬ nuiˇ˗euˬ ma. Miˇ tsaˬ tsawˇ jeuˬ dawˬ tawˆ hawˇ˗eu, miˇ kʼahˬ mˬ dzeˇ miˇ dzeˇ keuˆ ni, nawˬ˗ahˇ ngaˇ biꞈ jiˇ nehˬ˗eu ma.’—Ja ceuˬ 2:6, 8.

• Miˬyehˇ Miˇkʼahˬ˗ahˇ sahˬ paˬ geuꞈ˗eu teu gʼaˬ naˇ, dzoeˬ dzaˬ sahˬ paˬ Daˬbiˇ˗ahˇ neh ya oe˗eu meh. ‘Aˬ dui gʼaˇ duˬ aˬ li tiˬ li dehꞈ le˗euˬ meh. Aˬ dui˗ahˇ aˬ li tiˬ li biꞈ laꞈ˗euˬ meh. Aˬ yawꞈ uˆ lahˇ˗eu baoˬ tiˬ jawˇ saˇ˗iˬ tiˬ jawˇ huiˬ laˇ˗awˇ, aˬ yawꞈ˗euˬ miˇ kʼahˬ aˬ myah luꞈ nui saˇ oꞈ tehꞈ˗a. Aˬ yawꞈ˗euˬ dzoeˬ dzaˬ sahˬ paˬ Daˬbiˇ˗ahˇ taꞈ tehꞈ˗a.’—Iˇsaˬyaˇ 9:6, 7.

• Miˬyehˇ Miˇkʼahˬ˗ahˇ sahˬ paˬ geuꞈ˗eu teu gʼaˬ naˇ, Behˬlehˬhehˬ meuˬ˗ahˇ ya dehꞈ le˗eu meh. ‘Behˬlehˬhehˬ meuˬ˗oˇ, nawˬ˗euˬ laꞈ kʼoeˇ, Iˇsaˬleˬlaˆ uˆ lahˇ˗eu sahˬ paˬ tiˬ gʼaˬ ngaˇ bi doˆ laˇ ma. Miˇ tsaˬ kʼoeˇ taˆ kʼaˇ jawˇ˗eu tsawˇ haˬ dawˬ tawˆ luꞈ aˬ yawꞈ huiˬ˗eu mahˇ˗eu gaˇ kawˆ siˬ nya tehꞈ˗a. ’—Miˇkaˬ 5:2, 4.

• Miˬyehˇ Miˇkʼahˬ˗ahˇ sahˬ paˬ geuꞈ˗eu teu gʼaˬ naˇ, bye gaˇ sehꞈ gaˇ ya daˬ˗eu meh. ‘Tiˬ jeˬ˗iˬ gaˇ dahˇ maˬ tsoeˬ˗eu tsawˇ haˬ loꞈ˗ehˇ, aˬ yawꞈ˗ahˇ aˬ dui yaw zeu maˬ baw˗aˬ. Aˬ yawꞈ ya naˇ ya gawˇ˗eu dawˬ tawˆ luꞈ, aˬ dui mˇ˗euˬ iˬ baˇ baˬ da neh meh. Aˬ dui neh mˇ˗euˬ yaw haiˬ jeˬ aˇ poeˬ, kʼehˬ˗eu kʼaˆ˗eu jeˬ˗ahˇ aˬ yawꞈ ya daˬ˗euˬ meh.’—Iˇsaˬyaˇ 53:3, 5.

• Miˬyehˇ Miˇkʼahˬ˗ahˇ sahˬ paˬ geuꞈ˗eu teu gʼaˬ naˇ, shiˇ˗euˬ gaˇ neh ya gʼoꞈ dehꞈ laˇ˗awˇ yaw shehꞈ kʼahˬ sehˇ za˗eu meh. ‘Shiˇ˗eu doꞈ˗ahˇ nawˇ dehˬ piˇ˗awˇ, nawˬ˗euˬ tsawˇ muiˬ tsawˇ jaˬ˗ahˇ nawˇ shiˇ˗eu duˬ kʼahˬ maˬ bi mawˇ˗a. Aˬ myah luꞈ laˬ kʼaˬ cehˇ˗eu jeˬ, nawˬ˗euˬ aˇ maˇ laꞈ˗ahˇ jaˆ meh.’—Ja ceuˬ 16:10, 11.

Miˇ tsaˬ kʼoeˇ taˆ byah kuꞈ˗eu sahˬ paˬ nehˬ˗ehˇ taꞈ leˇ˗awˇ tsaˬ leˇ˗eu Yeˬsuˇ Ka li tiˬ gʼaˬ jawˇ˗eu tehꞈ meh. Maˇ diˇ naˇ mˬ taˆ gʼaˬ kʼehˇ tiˬ gʼaˬ Yeˬsuˇ˗euˬ aˬ ma Maˬliˇ˗ahˇ ‘Sahˬpaˬ Miˬyehˇ pyeuꞈ˗eu Miˬyehˇ, aˬ yawꞈ˗euˬ aˬ poeˬ Daˬbiˇ˗euˬ dzoeˬ dzaˬ nuiˇ mahˬ aˬ yawꞈ˗ahˇ biꞈ tehꞈ˗a. Aˬ yawꞈ uˆ lahˇ˗eu miˇ kʼahˬ kʼoeˇ, mˬ maˬ maˬ byaˆ zaˇ ziˇ aˇ saˬ saˬ˗eu maˬ baw˗a’ lehˇ ehˇ nehˬ˗euˬ meh.—Luˇkaꞈ 1:31-33.

Yeˬsuˇ miˇ tsaˬ kʼoeˇ taˆ jawˇ ngeh uˆ lahˇ˗eu gʼaˬ maˬ geuꞈ haw˗aˬ. Yeˬsuˇ naˇ mˬ taˆ neh Miˬyehˇ˗euˬ Miˇkʼahˬ˗ahˇ sahˬ paˬ geuꞈ˗awˇ uˆ lahˇ˗eu meh. Aˬ yawꞈ aˬ jeˬ˗euˬ baˬ da neh muiˬ dui dui˗eu sahˬ paˬ pyeuꞈ˗eu nga? Aˬ yawꞈ neh miˇ tsaˬ kʼoeˇ taˆ dehꞈ ngeh mˇ˗euˬ jeˬ˗ahˇ haw kaˇ˗euˇ.

•   Yeˬsuˇ yawˬ gʼaˬ na luꞈ˗ahˇ kʼahˬ lahˇ˗eu meh. Yeˬsuˇ zaˬ yo aˬ li deuˬ˗ahˇ maˬ ehˇ, zaˬ miˬ aˬ buˇ deuˬ˗ahˇ maˬ ehˇ, zaˬ hawˇ˗eu tsawˇ mawˬ deuˬ˗ahˇ maˬ ehˇ, aˬ yawꞈ maꞈ aˬ joˆ˗ehˇ dehꞈ laꞈ˗awˇ aˬ jeˬ lehˇ beu gaˇ kʼawꞈ caw ba nehˬ˗eu meh. (Maꞈtehˬ 9:36; Maˬkuˆ 10:16) Coiˬ doi naˇ˗eu tiˬ gʼaˬ Yeˬsuˇ˗ahˇ “Nawˇ jahˇ nehˬ laꞈ mawꞈ naˇ, ngaˇ muiˬ laˇ shawˇ laˇ ni jahˇ nya meh” lehˇ tahˬ shaˇ ngeh, Yeˬsuˇ jiˇ aˬ yawꞈ˗ahˇ gʼawˬ shaˬ gaˬ˗eu miˇ neh caw ba nehˬ˗euˬ meh.—Maˬkuˆ 1:40-42.

• Yeˬsuˇ aˬ dui˗ahˇ Yeˬhawˇbaˬ nui kʼahˇ shiˇ ni aˬ joˆ˗ehˇ ya mˇ˗eu lehˇ mehˬ˗eu meh. Aˬ yawꞈ “Naw maꞈ˗aˬ, Miˬyehˇ˗euˬ zaˬ kʼaˆ hawˇ˗eu pyuˇ shuiˇ myawˬ gahˬ˗euˬ zaˬ kʼaˆ, nyiˬ jeˬ luꞈ tiˬ kawˆ loꞈ˗ehˇ maˬ geuꞈ nya˗a” lehˇ ehˇ˗eu meh. Kʼoeˇ naˇ aˬ cawˬ neh yawˬ ha˗ahˇ aˬ joˆ˗ehˇ bi jahˇ mawꞈ˗eu loꞈ˗ehˇ yawˬ ha jiˇ ni aˬ cawˬ˗ahˇ teu loꞈ˗ehˇ jahˇ nehˬ lehˇ ehˇ˗eu meh. Dawˬ heu dawˬ˗ahˇ shuiˇ˗euˬ zahˇ dawˬ lehˇ kuˇ˗eu meh. Kʼoeˇ naˇ aˬ yawꞈ aˬ dui˗ahˇ Miˬyehˇ aˬ dui aˬ jeˬ mˇ gaˇ tehꞈ˗ehˇ maˬ ngeuˇ˗eu, aˬ dui˗euˬ nui noeˬ nui ma˗ahˇ jiˇ nui ma ahˇ˗eu meh lehˇ ehˇ˗eu meh. Teu miˇ neh aˬ dui Miˬyehˇ aˬ dui˗ahˇ nui kʼahˇ bi shiˇ˗eu gʼaˇ duˬ, aˬ dui nui ma laꞈ kʼoeˇ ahˇ˗eu jeˬ˗ahˇ yaw kʼaˆ˗ehˇ saˇ tiˇ ya taˬ˗eu meh. (Maꞈtehˬ 5:28; 6:24; 7:12) Kʼoeˇ naˇ Yeˬsuˇ aˬ dui maˇ diˇ laˬ kʼaˬ cehˇ mawꞈ naˇ, Yeˬhawˇbaˬ geuꞈ mawꞈ˗eu aˬ geu jeˬ nga lehˇ haw˗awˇ teu˗ahˇ ya mˇ caw meh lehˇ ehˇ˗eu meh.—Luˇkaꞈ 11:28.

• Yeˬsuˇ nui gaˬ˗euˬ gaˇ kawˆ mehˬ˗eu meh. Yeˬsuˇ ngehˬ˗eu jeˬ hawˇ˗eu mˇ˗eu jeˬ baoˬ ahˇ˗eu miˇ neh, naˇ haˬ˗eu deuˬ nui ma ahˇ dui dui˗eu meh. ‘Aˬ yawꞈ mehˬ nehˬ tsoˆ nehˬ gaˇ ya gaˬ˗euˬ tsawˇ haˬ aˇ maꞈ kʼoeˇ deuˬ zahˬ dui dui leˇ˗euˬ meh. Aˬ jeˬ miˇ neh ehˇ naˇ, aˬ yawꞈ mehˬ˗eu tsoˆ˗eu kʼoeˇ˗aˬ, baoˬ tiˬ byah ni ahˇ˗eu laꞈ kʼoeˇ mehˬ˗eu tsoˆ˗eu jeˬ pyeuꞈ˗eu meh.’ (Maꞈtehˬ 7:28, 29) Aˬ yawꞈ “Naw maꞈ˗ahˇ muiˇ˗eu tsawˇ haˬ˗ahˇ gaˬ˗awˬ” lehˇ jiˇ mehˬ˗eu meh. Aˬ yawꞈ zeuˇ liˬ kʼoeˇ taˆ bi taꞈ tehˬ taˬ ngeh kʼawꞈ, “Aˬda˗oˇ, aˬ yawꞈ maꞈ˗ahˇ iˬ baˇ pyehˬ nehˬ˗awˬ. Aˬ jeˬ miˇ neh ehˇ naˇ, aˬ yawꞈ maꞈ neh mˇ˗euˬ jeˬ˗ahˇ aˬ yawꞈ maꞈ maˬ siˬ nya˗a” lehˇ guiˬ lahˬ shaˇ˗eu meh.—Maꞈtehˬ 5:44; Luˇkaꞈ 23:34.

Yeˬsuˇ gʼawˬ shaˬ gaˬ˗eu nui ma ahˇ˗awˇ yawˬ gʼaˬ na luꞈ˗ahˇ caw ba nya˗eu miˇ neh, miˇ tsaˬ heu siˬ˗ahˇ uˆ lahˇ˗eu gʼaˬ pyeuꞈ˗eu tsaˬ leˇ dui dui˗eu meh. Aˬ yawꞈ aˬ geu ngeh uˆ lahˇ dahˬ beh˗eu nga?