Dzeuˇ yaꞈ˗euˬ kawˆ˗ahˇ Yeˬsuˇ neh ehˇ taˬ˗euˬ bi siˬ laˇ˗eu jeˬ gaˇ kawˆ˗ahˇ ngehˬ keuˆ˗euˬ ma. Biˬ siˬ laˇ˗eu jeˬ heu naˇ, Miˬyehˇ mˬ taˆ aˬ yawꞈ˗euˬ Miˇkʼahˬ beh˗awˇ Yeˬsuˇ˗ahˇ sahˬ paˬ bi geuꞈ˗euˬ lehˇ siˬ laˇ˗eu meh.

Jaˇliꞈ˗ahˇ Yeˬsuˇ baoˬ za gʼaˬ ngeh tiˬ jawˇ Saˬdaˬ hawˇ˗eu maˬ muiˬ˗eu mˬ taˆ gʼaˬ kʼehˇ deuˬ˗ahˇ mˬ taˆ neh teh dzeh˗euˬ meh lehˇ ehˇ taˬ˗euˬ meh. Nymˬ˗mˇ Saˬdaˬ hawˇ˗eu maˬ muiˬ˗eu mˬ taˆ gʼaˬ kʼehˇ deuˬ miˇ tsaˬ˗ahˇ suˬ saˬ luꞈ meh. Teu miˇ neh miˇ tsaˬ heu siˬ 1914 kʼoꞈ˗ahˇ neh naˇ maˬ muiˬ˗eu yaw doeˇ byah laˇ taˬ˗euˬ meh.—Pah mehˬ˗eu 12:7, 9.

Miˇ tsaˬ heu siˬ˗ahˇ maˬ muiˬ˗eu yaw doeˇ myaˬ laˇ tehˇ tehˬ luꞈ kʼawꞈ, Miˬyehˇ˗euˬ Miˇkʼahˬ˗euˬ sahˬ paˬ Yeˬsuˇ tsawˇ haˬ zaˬ deuˬ˗ahˇ caw ba˗eu gʼaˇ duˬ, gʼawˬ mya jeˬ mˇ˗euˬ meh. Aˬ yawꞈ miˇ tsaˬ tahˬ kʼawˇ doe ni Jaˇliꞈ bi mehˬ˗awˇ, gʼawˬ mya gʼaˬ Jaˇliꞈ zahˇ˗ahˇ ya siˬ nya˗awˇ dehꞈ ziˇ laꞈ kʼoeˇ zmˬ luꞈ˗eu meh. (Iˇsaˬyaˇ 2:2-4) Gʼawˬ mya lam gʼaˬ gaˇ mˇ˗eu gaˇ kawˆ nehˬ˗ehˇ taꞈ leˇ˗awˇ aˬ joˆ˗ehˇ ya noeˬ˗eu lehˇ maˬ ehˇ, nymˇ jiˇ muiˬ daˆ laˇ ni aˬ joˆ˗ehˇ ya jahˇ˗eu lehˇ maˬ ehˇ, yawˬ ha jaˆ˗eu jeˬ˗ahˇ nui kʼahˇ shiˇ˗awˇ pyuˇ shuiˇ myawˬ gahˬ˗euˬ zaˬ kʼaˆ maˬ ya geuꞈ ni aˬ joˆ˗ehˇ ya jahˇ˗eu lehˇ maˬ ehˇ, ya siˬ˗euˬ meh. Nymˬ˗mˇ aˬ yawꞈ maꞈ dehꞈ ziˇ˗ahˇ gaˇ dahˇ˗eu jeˬ maˬ ehˇ, Miˬyehˇ Miˇkʼahˬ˗euˬ muiˬ˗eu zaˬ lahˇ pyeuꞈ ni maˬ ehˇ, dzaw luꞈ˗eu meh.

Yeˬsuˇ mˬ taˆ uˆ lahˇ luꞈ kʼawꞈ, miˇ tsaˬ˗ahˇ naˇ tsawˇ haˬ zaˬ deuˬ uˆ lahˇ luꞈ meh siˬ. Teu miˇ neh, Miˬyehˇ Yeˬsuˇ˗ahˇ “Nawˬ˗ahˇ muiˇ˗eu deuˬ kʼoeˇ taˆ uˆ lahˇ˗awˬ” lehˇ ehˇ nehˬ˗euˬ meh. (Ja ceuˬ 110:2) Gʼawˬ myahˇ maˬ gʼeh˗ehˇ Yeˬsuˇ muiˇ˗eu deuˬ dawˬ tawˆ luꞈ˗ahˇ laˆ cawˆ le jiˇ˗awˇ ehˇ dawˬ naˇ haˬ˗eu deuˬ˗ahˇ shaˬ zahˬ laꞈ kʼoeˇ neh ka kʼoꞈ le˗eu meh.

Teu ngeh yamˬ˗ahˇ Miˬyehˇ˗euˬ Miˇkʼahˬ heu deuˬ paˇ mˇ daˆ leꞈ meh.

• Zahˇ kʼawꞈ deuˬ˗ahˇ laˆ cawˆ meh. Tsawˇ haˬ deuˬ˗ahˇ gʼawˬ mya yaˇ kʼoꞈ jaˬ myawꞈ mehˇ shuiˇ shuiˇ˗awˇ kʼehˬ laꞈ kʼaˆ laꞈ˗euˬ zahˇ kʼawꞈ deuˬ maˬ paˇ jaˆ meh. Jaˇliꞈ˗ahˇ zahˇ kʼawꞈ deuˬ˗ahˇ meh maˬ laˇ nehˬ˗ehˇ sheu cehˆ taˬ˗euˬ meh. Gʼawˬ mya gʼaˬ zahˇ kʼawꞈ deuˬ˗ahˇ laˆ cawˆ gaˇ ya mawˇ ngeh tsawˬ guˆ˗iˇ dui dui˗eu meh.—Pah mehˬ˗eu 17:15, 16.

• Tsawˇ haˬ zaˬ˗euˬ uˆ lahˇ˗eu jeˬ˗ahˇ laˆ cawˆ meh. Miˬyehˇ Miˇkʼahˬ tsawˇ haˬ zaˬ uˆ lahˇ jeˬ dawˬ tawˆ luꞈ˗ahˇ maˇ diˇ laˆ cawˆ jiˇ meh.—Pah mehˬ˗eu 19:15, 17, 18.

• Yaw haiˬ yaw doeˇ deuˬ˗ahˇ laˆ cawˆ jiˇ meh. Noeˬ poˆ noeˬ paˇ maˬ mˇ˗eu Miˬyehˇ Miˇkʼahˬ uˆ lahˇ˗eu uˬ moˆ maˬ jawˇ˗eu yaw haiˬ yaw doeˇ deuˬ kʼoeˇ taˆ aˬ jeˬ keuˆ le˗eu nga? Jaˇliꞈ˗ahˇ “haiˬ˗eu tsawˇ haˬ deuˬ miˇ kʼahˬ heu kʼahˬ laꞈ nyiˇ bi sheuˬ dzeh” meh lehˇ ehˇ taꞈ˗euˬ meh.—Dawˬdaˬ 2:22.

• Saˬdaˬ hawˇ˗eu maˬ muiˬ˗eu mˬ taˆ gʼaˬ kʼehˇ deuˬ˗ahˇ laˆ cawˆ jiˇ meh. Saˬdaˬ hawˇ˗eu maˬ muiˬ˗eu mˬ taˆ gʼaˬ kʼehˇ deuˬ ‘miˇ kʼahˬ tsawˇ jeuˬ dawˬ tawˆ luꞈ˗ahˇ mehˇ shuiˇ maˬ paˇ shuiˇ nya’ meh.—Pah mehˬ˗eu 20:3, 10.

Miˬyehˇ˗euˬ Miˇkʼahˬ˗ahˇ ha geuꞈ˗eu deuˬ˗ahˇ tawˇ neh aˬ joˆ˗ehˇ pyeuꞈ laˇ˗eu nga?

Mˬ taˆ˗euˬ sahˬ paˬ Yeˬsuˇ tsawˇ haˬ zaˬ˗euˬ uˆ lahˇ˗eu deuˬ maˬ mˇ nya˗eu jeˬ gʼawˬ mya ni mˇ nya˗eu meh. Miˇ tsaꞈ kʼoeˇ taˆ˗euˬ tsawˇ jeuˬ deuˬ laꞈ kʼoeˇ neh 144,000 gʼaˬ˗ahˇ tseˇ˗awˇ mˬ taˆ Yeˬsuˇ nehˬ˗ehˇ tiˬ kawˆ loꞈ˗ehˇ bi uˆ lahˇ˗eu meh. (Pah mehˬ˗eu 5:9, 10; 14:1, 3) Aˬ yawꞈ miˇ tsaˬ kʼoeˇ taˆ Miˬyehˇ neh noeˬ taˬ˗euˬ jeˬ byah laˇ ni mˇ˗eu meh. Miˬyehˇ˗euˬ Miˇkʼahˬ miˇ tsaˬ kʼoeˇ taˆ˗euˬ tsawˇ haˬ zaˬ deuˬ˗euˬ gʼaˇ duˬ aˬ jeˬ jahˇ˗eu nga?

• Naˇ˗eu gawˇ˗eu jeˬ hawˇ˗eu shiˇ˗eu jeˬ maˬ paˇ bi jaˆ˗eu meh. Jaˇliꞈ˗ahˇ teu gaˇ “jawˇ˗eu tsawˇ haˬ deuˬ, tiˬ gʼaˬ˗iˬ naˇ˗eu gawˇ˗eu maˬ baw”˗a lehˇ ehˇ˗awˇ, “shiˇ˗eu jeˬ maˬ paˇ jaˆ” meh lehˇ ehˇ taˬ˗euˬ meh.—Iˇsaˬyaˇ 33:24; Pah mehˬ˗eu 21:4.

• Maˇ diˇ nui saˇ oꞈ˗awˇ shaˬ zahˬ guˆ gaˆ maˬ paˇ bi jaˆ meh. Jaˇliꞈ˗ahˇ ‘nawˬ˗euˬ tsawˇ haˬ deuˬ˗ahˇ nui saˇ oꞈ˗awˇ bi baw bi za le ma’ lehˇ ehˇ taˬ˗awˇ, “tsawˇ haˬ zaˬ yawˬ gʼaˬ yawˬ na luꞈ, yawˬ ha aˬ gaꞈ baw duˆ uˬ moˆ, yawˬ ha siˬ guˬ aˬ bawˇ uˬ moˆ, nui saˇ oꞈ˗awˇ ya nuiˇ meh” lehˇ ehˇ taˬ˗euˬ meh.—Iˇsaˬyaˇ 54:13; Miˇkaˬ 4:4.

• Laˬ kʼaˬ cehˇ dui dui laˇ˗eu gaˇ jaˆ meh. Jaˇliꞈ˗ahˇ “yawˬ ha neh mˇ doˆ shaˇ doˆ taˬ˗euˬ jeˬ, yawˬ ha nui kʼahˇ tiˬ shiˇ ya zmˬ tehꞈ˗a. Aˬ yawꞈ maꞈ neh kʼaˇ mˇ˗euˬ jeˬ guiˬ lahˬ baw” meh lehˇ ehˇ taˬ˗euˬ meh.—Iˇsaˬyaˇ 65:22, 23.

• Uˬ jeˬ jaˬ lehˇ bi muiˬ kʼoꞈ laˇ meh. Jaˇliꞈ˗ahˇ “kʼaˇ shuiꞈ deh yaˇ laˬ kʼaˬ cehˇ˗awˇ, bawˇ tsahˬ˗ahˇ aˇ yehˆ poˬ laˇ tehꞈ˗a” lehˇ ehˇ taˬ˗euˬ meh.—Iˇsaˬyaˇ 35:1.

• Tsawˇ haˬ deuˬ˗ahˇ mˬ maˬ maˬ byaˆ zaˇ ziˇ ya dehꞈ gʼeh ni aˬ joˆ˗ehˇ ya jahˇ˗eu lehˇ mehˬ nehˬ meh. Jaˇliꞈ˗ahˇ “nawˇ tiˬ gʼaˬ tehꞈ˗ehˇ maˇ maˇ ni Miˬyehˇ meh lehˇ siˬ nya˗awˇ, nawˬ neh kʼehˇ gʼeh leꞈ˗euˬ Yeˬsuˇ Ka li˗ahˇ siˬ nya˗eu kʼoeˇ˗aˬ, mˬ maˬ maˬ byaˆ zaˇ ziˇ dehꞈ˗eu jeˬ pyeuꞈ˗eu meh” lehˇ ehˇ taˬ˗euˬ meh.—Yoˇhaˬ 17:3.

Miˬyehˇ nawˬ˗ahˇ muiˬ˗eu jeˬ heu deuˬ˗ahˇ bi za mawꞈ˗eu meh. (Iˇsaˬyaˇ 48:18) Nyaˆ taꞈ kʼawˆ˗awˇ nawˇ mehˬ hu paw muiˬ dui dui˗eu noeˬ tmˬ˗eu jeˬ˗ahˇ za˗eu gʼaˇ duˬ, nawˇ nymˬ˗mˇ aˬ jeˬ ya jahˇ˗eu lehˇ ja sawˇ nehˬ laꞈ meh.