Aˬ dui gʼawˬ myahˇ maˬ gʼeh˗ehˇ Yeˬsuˇ neh ehˇ˗euˬ “huiˬ dui dui˗eu shaˬ zahˬ” pyeuꞈ˗eu “jaˬ lehˇ lehˇ ma”˗ahˇ ya tahˬ puˬ meh. (Maꞈtehˬ 24:21, MS) Aˬ dui huiˬ dui dui˗eu shaˬ zahˬ teu poˆ˗ahˇ maˬ cehˆ dzeuˇ nya˗a. Ehˇ kʼawꞈ, aˬ dui teu yamˬ˗ahˇ dzeuˇ˗iˇ nya˗eu gʼaˇ duˬ tiˬ jeˬ paˬ jahˇ nya meh. Aˬ dui aˬ jeˬ jeˇ jahˇ nya˗eu nga?

Yeˬsuˇ gawˬ jawˬ kʼoeˇ taˆ dawˬ mehˬ mehˬ ngeh “Miˬyehˇ˗euˬ Miˇkʼahˬ hawˇ˗eu aˬ yawꞈ˗euˬ yaw tsaˬ yaw dawˇ jeˬ˗ahˇ jeˬ huˬ poˆ˗awˬ” lehˇ ehˇ˗eu meh. (Maꞈtehˬ 6:33) Aˬ dui teu loꞈ˗ehˇ aˬ joˆ˗ehˇ jahˇ nya˗eu nga?

Miˬyehˇ˗euˬ Miˇkʼahˬ˗ahˇ jeˬ hu poˆ. Heu naˇ aˬ dui Miˬyehˇ˗euˬ Miˇkʼahˬ˗ahˇ aˬ geu jeˬ˗ahˇ naˆ maˬ tseˇ maˬ kaˬ aˇ yeˇ ya taˬ huiˬ dzehˬ gaˇ ehˇ mawꞈ˗eu meh. (Maꞈtehˬ 6:25, 32, 33) Aˬ jeˬ miˇ neh nga? Tsawˇ haˬ deuˬ shaˬ zahˬ˗ahˇ aˇ naˆ ni laˆ piˇ˗eu leh jeh kʼawꞈ, maˬ laˆ piˇ nya˗eu miˇ neh meh. Miˬyehˇ Miˇkʼahˬ maˬ ngeuˇ naˇ shaˬ zahˬ teu˗ahˇ maˬ laˆ piˇ nya˗a.

Miˬyehˇ˗euˬ yaw tsaˬ yaw dawˇ jeˬ˗ahˇ jeˬ hu poˆ. Aˬ dui Miˬyehˇ˗euˬ zahˇ dawˬ kʼoꞈ dawˬ hawˇ˗eu Jaˇliꞈ zahˇ˗ahˇ kʼaˇ gʼeh nya gaˇ neh dehꞈ caw˗eu gʼaˇ duˬ ya leh jeh˗eu meh. Aˬ jeˬ miˇ neh nga? Aˬ dui aˬ jeˬ tsaˬ˗eu hawˇ˗eu maˬ tsaˬ˗eu lehˇ yawˬ ha naꞈ˗i noeˬ tsehˆ naˇ maˬ muiˬ˗eu jeˬ pyeuꞈ laˇ nya˗eu meh. (Dawˬdaˬ 16:25) Ehˇ kʼawꞈ aˬ dui Miˬyehˇ˗euˬ tsaˬ˗eu dawˇ˗eu zahˇ˗ahˇ dehꞈ caw naˇ, Miˬyehˇ aˬ dui˗ahˇ nui kʼahˇ shiˇ˗awˇ, aˬ dui kʼoeˇ taˆ jiˇ yaw muiˬ jeˬ keuˆ le˗eu meh.—Iˇsaˬyaˇ 48:17, 18.

Miˬyehˇ˗euˬ Miˇkʼahˬ hawˇ˗eu aˬ yawꞈ˗euˬ yaw tsaˬ yaw dawˇ jeˬ˗ahˇ jeˬ hu poˆ daˆ leꞈ. Tiˬ gʼaˬ na pyuˇ gʼawˬ mya ni jaˆ naˇ laˬ kʼaˬ cehˇ meh lehˇ noeˬ meh lehˇ Yeˬsuˇ ehˇ˗eu meh. Tiˬ gʼaˬ na mˇ dzaˬ kʼawꞈ dawˇ gaˇ hawˇ˗eu yawˬ ha˗euˬ nymˇ jiˇ˗ahˇ ngehˬ gʼeh gaˇ tehꞈ˗ehˇ kaꞈ gʼa˗eu miˇ neh, Miˬyehˇ Miˇkʼahˬ˗ahˇ jeˬ hu taˬ˗eu aˇ yamˬ maˬ jaˆ nga lehˇ ehˇ˗eu meh.—Maꞈtehˬ 6:19-21, 25-32.

 Aˬ jeˬ lehˇ gʼeh kʼawꞈ Yeˬsuˇ aˬ dui nymˬ˗mˇ dehꞈ nya ni loˬ˗eu jeˬ jaˆ˗eu yaw duˬ baw meh lehˇ saˇ jaˇ dzaˬ˗awˇ mehˬ hu paw kʼawꞈ Miˬyehˇ Miˇkʼahˬ neh biꞈ˗euˬ guiˬ lahˬ deuˬ za meh lehˇ saˇ jaˇ dzaˬ taˬ˗euˬ meh.—Maꞈtehˬ 6:33.

Gaˇ hu˗euˬ Yeˬsuˇ˗euˬ zaˬ lahˇ deuˬ Miˬyehˇ Miˇkʼahˬ hawˇ˗eu aˬ yawꞈ˗euˬ yaw tsaˬ yaw dawˇ jeˬ˗ahˇ jeˬ hu poˆ kʼawꞈ, aˬ yawꞈ maꞈ dehꞈ luꞈ ngeh yamˬ˗ahˇ naˇ˗eu gawˇ˗eu jeˬ hawˇ˗eu shaˬ zahˬ byoˆ˗iˇ gaˇ maˬ ya mawˇ haw˗aˬ. Ehˇ kʼawꞈ aˬ yawꞈ maꞈ haw piˇ nehˬ laꞈ˗eu jeˬ˗ahˇ za˗euˬ meh. Aˬ joˆ˗ehˇ haw piˇ nehˬ˗euˬ nga?

Aˬ yawꞈ maꞈ Miˬyehˇ˗euˬ tsaˬ˗eu dawˇ˗eu zahˇ˗ahˇ dehꞈ caw˗eu miˇ neh, Miˬyehˇ˗euˬ ehˇ dawˬ maˬ naˇ haˬ˗eu deuˬ ya tahˬ puˬ˗eu shaˬ zahˇ˗ahˇ neh dzeuˇ˗iˇ nya˗euˬ meh. Aˬ yawꞈ maꞈ Miˬyehˇ Miˇkʼahˬ˗ahˇ ziꞈ dah ni jah˗eu jeˬ heu naˇ, aˬ yawꞈ maꞈ˗ahˇ kʼaˆ dui dui˗eu shaˬ zahˬ˗ahˇ kamˬ daˬ coeˇ ni caw ba nehˬ˗euˬ meh. Miˬyehˇ jiˇ aˬ yawꞈ maꞈ˗ahˇ shaˬ zahˬ˗ahˇ kamˬ daˬ coeˇ ni “huiˬ dui dui˗eu baoˬ” biꞈ nehˬ˗euˬ meh.—2 Gawˇliˬtu 4:7-9.

Dahˬ beh˗euˬ Ka li zaˬ deuˬ Yeˬsuˇ˗euˬ ehˇ dawˬ˗ahˇ naˇ haˬ˗awˇ Miˬyehˇ˗euˬ Miˇkʼahˬ˗ahˇ jeˬ hu poˆ˗euˬ meh. Aˬ yawꞈ maꞈ laˬ kʼaˬ cehˇ˗eu guiˬ lahˬ dawˬ kʼoeˇ ngeh˗euˬ saˇ ka˗ahˇ kʼaˇ siˬ nya gaˇ tsaꞈ gaˬ˗iˇ˗euˬ meh. (Gawˇlawˇsehˇ 1:23) Nymˬ˗mˇ iˬ nah teu loꞈ˗ehˇ jahˇ˗eu tsawˇ haˬ jawˇ ngaˇ loˇ?

Jawˇ meh. Yeˬhawˇbaˬ˗euˬ Saˇ kiˇ deuˬ gʼawˬ myahˇ maˬ gʼeh˗ehˇ Miˬyehˇ˗euˬ Miˇkʼahˬ haiˬ˗eu miˇ tsaˬ heu˗ahˇ laˆ cawˆ meh lehˇ siˬ nya˗eu meh. Teu miˇ neh, aˬ yawꞈ maꞈ Yeˬsuˇ neh “Miˇ tsaˬ tahˬ kʼawˇ heu doe ni, Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ mehˬ doe tehꞈ˗a. Kʼoeˇ dzeuˇ ngeh, aˇ saˬ saˬ˗eu aˇ yamˬ keuˆ le tehꞈ˗a” lehˇ ehˇ taˬ˗euˬ dawˬ˗ahˇ mˇ caw˗eu meh.—Maꞈtehˬ 24:14.

Nawˇ guiˬ lahˬ dawˬ˗ahˇ ya gaˬ ngeh aˬ joˆ˗ehˇ jahˇ de? Nga maꞈ nawˇ gaˇ hu˗euˬ Maˬgeˬdawˇniˆ miˇ kʼahˬ˗ahˇ˗euˬ Beˬliˇ meuˬ zaˬ deuˬ loꞈ˗ehˇ gʼeh gaˇ noeˬ tmˬ ma. Aˬ yawꞈ maꞈ gʼaˬ kʼehˇ Pawˇluˆ˗ahˇ neh Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ˗ahˇ ya gaˬ ngeh, ‘nui ma laˇ gʼoˆ pah taˬ˗awˇ, nui ma keuˆ˗eu laꞈ kʼoeˇ naˇ haˬ’˗euˬ meh. Kʼoeˇ naˇ aˬ yawꞈ maꞈ aˬ yawꞈ maꞈ neh ya gaˬ˗euˬ jeˬ˗ahˇ pyehˆ tseˇ˗awˇ mˇ caw˗eu gʼaˇ duˬ, “yawˬ nah na luꞈ Jaˇliꞈ˗ahˇ gui haw luꞈ˗eu meh.”—Gʼaˬkʼehˇ 17:11, 12.

Nawˇ jiˇ ni teu loꞈ˗ehˇ jahˇ nya meh. Nawˇ Miˬyehˇ˗euˬ Miˇkʼahˬ hawˇ˗eu aˬ yawꞈ˗euˬ yaw tsaˬ yaw dawˇ jeˬ˗ahˇ jeˬ hu poˆ naˇ, nawˇ nymˬ˗mˇ neh gʼoe duˬ jaˆ˗eu uˬ taꞈ, mehˬ hu paw jiˇ mˬ maˬ maˬ byaˆ zaˇ ziˇ nui saˇ oꞈ˗eu jeˬ hawˇ˗eu haw teˬ haw piˇ nehˬ laꞈ˗eu jeˬ˗ahˇ za meh.