Maˬ. Jaˇliꞈ˗ahˇ maˬ ehˇ, gaˇ hu˗euˬ gaˇ kawˆ boꞈ taˬ˗euˬ sahˬ boꞈ deuˬ˗ahˇ maˬ ehˇ, Ka li zaˬ deuˬ teu loꞈ˗ehˇ jahˇ˗eu lehˇ maˬ ehˇ taˬ˗aˬ.

Jaˇliꞈ gʼawˬ mya dmˬ˗ahˇ heu deuˆ˗ahˇ dawˬ yuˇ paˇ taˬ˗euˬ gaˇ haw ngeh, tiˬ gʼaˬ na Pawˇluˆ˗euˬ saˇ ka˗ahˇ shiˇ dzeuˇ˗euˬ deuˬ˗euˬ dah zaˇ iˇ cuꞈ shawˇ˗eu jeˬ jaˆ nga lehˇ noeˬ˗eu meh. Yaw jeˬ ma jeˬ, Jaˇliꞈ tiˬ dmˬ˗ahˇ “Shiˇ˗euˬ tsawˇ haˬ˗ahˇ maˬ bi gʼoꞈ dehꞈ laˇ nya˗aˇ lehˇ tsawˇ haˬ tiˬ paˆ na deuˬ ehˇ˗eu kʼoeˇ tsaˬ˗eu ngeuˇ naˇ, aˬ jeˬ miˇ neh tsawˇ haˬ kʼoeˇ deuˬ shiˇ dzeuˇ˗euˬ deuˬ˗euˬ dah zaˇ iˇ cuꞈ bi shawˇ ta” lehˇ ehˇ taˬ˗euˬ meh.

Jaˇliꞈ paw nui gahˇ ahˇ˗eu nyiˬ gʼaˬ aˬ joˆ˗ehˇ noeˬ nga lehˇ haw ma. Sahˬ boꞈ dzaw goˇ˗euˬ tsawˇ haˬ pyeuꞈ˗eu Gaˬ˗lehˇgu˗liˬ Lawˇ˗keuˬgʼuꞈ “Shiˇ dzeuˇ˗euˬ tsawˇ haˬ deuˬ˗euˬ dah zaˇ iˇ cuꞈ shawˇ˗eu lehˇ ehˇ˗eu nui noeˬ heu naˇ, Jaˇliꞈ laꞈ kʼoeˇ maˬ ehˇ, gaˇ hu˗euˬ gaˇ kawˆ˗ahˇ boꞈ taˬ˗euˬ sahˬ boꞈ deuˬ˗ahˇ maˬ ehˇ, kamˬ˗eu saˇ kiˇ maˬ jaˆ˗eu iˇ cuꞈ shawˇ˗eu tiˬ jeˬ pyeuꞈ meh” lehˇ ehˇ˗eu meh. Jaˇliꞈ paw nui gahˇ ahˇ˗eu Gawˇdawˬ Di Pi jiˇ gaˇ kawˆ heu˗ahˇ nui ma tsaˬ˗eu meh. Aˬ yawꞈ “Gaˇ hu˗euˬ gaˇ kaw˗ahˇ maˬ ehˇ, Jaˇliꞈ laꞈ kʼoeˇ maˬ ehˇ, heu loꞈ˗ehˇ gʼeh˗eu iˇ cuꞈ shawˇ˗eu jeˬ maˬ jaˆ haw˗aˬ” lehˇ boꞈ taˬ˗euˬ meh. Gaˇ kawˆ heu Jaˇliꞈ yaw shuiꞈ˗ahˇ maˬ ngehˬ keuˆ taˬ˗euˬ uˬ taꞈ, dahˬ beh˗euˬ Ka li zaˬ saˇ ka˗ahˇ heu loꞈ˗ehˇ jahˇ˗euˬ lehˇ jiˇ saˇ kiˇ maˬ jaˆ˗a. Kʼoeˇ naˇ gʼaˬ kʼehˇ deuˬ shiˇ jiˇ˗awˇ tiˬ kʼehˬ naˇ doˆ laˇ˗euˬ Ka li zaˬ aˇ muˇ deuˬ jiˇ teu loꞈ˗ehˇ maˬ jahˇ˗aˬ.

Jaˇliꞈ˗ahˇ Yeˬsuˇ˗euˬ mehˬ nah caw teh˗eu deuˬ Yeˬsuˇ neh ‘miˇ tsaˬ tsawˇ jeuˬ dawˬ tawˆ luꞈ jawˇ gaˇ iˇ doe˗awˇ, ngaˬ˗euˬ zaˬ lahˇ pyeuꞈ laˇ ni mˇ˗iˇ˗awˬ. Aˬ yawꞈ maꞈ˗ahˇ iˇ cuꞈ shawˇ nehˬ˗awˬ. Ngaˬ neh naw maꞈ˗ahˇ dawˬ kʼaˇ biꞈ taˬ˗euˬ yawˬ jeˬ na luꞈ, aˬ yawꞈ maꞈ naˇ haˬ˗awˇ caw teh ni mehˬ nehˬ tsoˆ nehˬ˗awˬ’ lehˇ ehˇ taˬ˗euˬ dawˬ˗ahˇ ya mˇ caw meh lehˇ ehˇ˗eu meh. (Maꞈtehˬ 28:19, 20) Tsawˇ haˬ tiˬ gʼaˬ iˇ cuꞈ shawˇ˗awˇ zaˬ lahˇ maˬ pyeuꞈ laˇ mi naˆ˗ehˇ Yeˬhawˇbaˬ hawˇ˗eu Yeˬsuˇ˗euˬ gaˇ kawˆ˗ahˇ ya dzaw˗awˇ ya jah˗eu uˬ taꞈ, aˬ yawꞈ nyaꞈ˗euˬ ehˇ dawˬ ya naˇ haˬ˗eu meh. Shiˇ dzeuˇ˗awˇ lmˬ bymˇ laꞈ kʼoeˇ jawˇ˗eu deuˬ teu loꞈ˗ehˇ maˬ jahˇ nya˗eu uˬ taꞈ, dehꞈ luꞈ˗eu Ka li zaˬ deuˬ jiˇ aˬ yawꞈ maꞈ˗euˬ dah zaˇ teu loꞈ˗ehˇ maˬ jahˇ nehˬ nya˗a.—Dawˬtsoˆ 9:5, 10; Yoˇhaˬ 4:1; 1 Gawˇliˬtu 1:14-16.

Toˆ˗ehˇ naˇ Pawˇluˆ˗euˬ dawˬ aˬ jeˬ˗ahˇ ehˇ mawꞈ˗eu nga?

Gawˇliˬtu meuˬ˗ahˇ jawˇ˗eu tiˬ gʼaˬ na gʼoꞈ dehꞈ laˇ˗eu gaˇ kawˆ˗ahˇ maˬ jah˗a. (1 Gawˇliˬtu 15:12) Pawˇluˆ aˬ yawꞈ maꞈ˗euˬ nui noeˬ teu maˬ tsaˬ˗a lehˇ bi siˬ˗euˬ meh. Aˬ yawꞈ yawˬ ha˗ahˇ “shiˇ˗eu jeˬ˗ahˇ yawˬ nah na luꞈ ngaˇ ya tahˬ puˬ luꞈ˗eu ma” lehˇ ehˇ˗eu meh. Aˬ yawꞈ aˬ yawꞈ˗ahˇ bi shiˇ nya˗eu guˆ laˇ paˬ˗ehˇ gʼeh˗eu gʼawˬ mya jeˬ˗ahˇ ya tahˬ puˬ kʼawꞈ, aˬ yawꞈ Yeˬsuˇ loꞈ˗ehˇ mˬ kʼoeˇ taˆ ya gʼoꞈ dehꞈ leˇ meh lehˇ jah ziꞈ˗eu meh.—1 Gawˇliˬtu 15:30-32, 42-44.

Gawˇliˬtu meuˬ˗ahˇ jawˇ˗eu deuˬ tseˇ doˆ taˬ˗euˬ Ka li zaˬ pyeuꞈ˗eu heu naˇ, yawˬ nah na luꞈ shaˬ zahˬ˗ahˇ ya tahˬ puˬ˗awˇ, maˬ gʼoꞈ dehꞈ laˇ mi naˆ˗ehˇ jeˬ hu ya shiˇ meh lehˇ ya gʼoˆ shaw˗eu meh. Aˬ yawꞈ maꞈ “Yeˬsuˇ˗ahˇ taꞈ nya ni iˇ cuꞈ shawˇ” ngeh “aˬ yawꞈ nehˬ˗ehˇ tiˬ kawˆ loꞈ˗ehˇ shiˇ˗eu gʼaˇ duˬ shawˇ˗eu jeˬ pyeuꞈ˗eu” meh. (Loˇmaˆ 6:3) Heu naˇ aˬ yawꞈ maꞈ Yeˬsuˇ loꞈ˗ehˇ gʼoꞈ dehꞈ laˇ˗eu gʼaˇ duˬ, Yeˬsuˇ loꞈ˗ehˇ shaˬ zahˬ˗ahˇ ya tahˬ puˬ˗awˇ ya shiˇ gaˇ ehˇ mawꞈ˗eu meh.

Yeˬsuˇ iˇ cuꞈ shawˇ gʼaˬ˗euˬ nyiˬ kʼoꞈ dzehˬ ni heu kaˬ˗ahˇ, aˬ yawꞈ˗euˬ gʼaˬ kʼehˇ nyiˬ gʼaˬ˗ahˇ “ngaˬ neh baˇ tiˇ saˬ kamˬ˗euˬ jeˬ naw nyaꞈ nmˇ aˬ diˇ aˬ maˇ kamˬ tehꞈ˗a” lehˇ ehˇ nehˬ˗euˬ meh. (Maˬkuˆ 10:38, 39) Heu deuˆ˗ahˇ Yeˬsuˇ iˇ cuꞈ laꞈ kʼoeˇ iˇ cuꞈ shawˇ˗eu jeˬ˗ahˇ ehˇ keuˆ mawꞈ˗eu maˬ ngeuˇ˗a. Aˬ yawꞈ “shiˇ˗eu gʼaˇ duˬ shawˇ˗eu jeˬ”˗ahˇ ngehˬ keuˆ luꞈ˗eu meh. Yeˬsuˇ aˇ saˬ saˬ leˇ ngeh keuˆ ni Miˬyehˇ˗ahˇ saˇ jaˇ ziꞈ lehˇ ehˇ˗eu heu naˇ, aˬ yawꞈ ya shiˇ gaˇ ehˇ keuˆ mawꞈ˗eu meh lehˇ ehˇ˗eu meh. Pawˇluˆ tseˇ doˆ taˬ˗euˬ deuˬ ‘Ka li nehˬ˗ehˇ tiˬ kawˆ loꞈ˗ehˇ daˬ naˇ, aˬ yawꞈ nehˬ˗ehˇ tiˬ kawˆ loꞈ˗ehˇ yaw shehꞈ kʼahˬ sehˇ za’ meh lehˇ boꞈ taˬ˗euˬ meh. (Loˇmaˆ 8:16, 17; 2 Gawˇliˬtu 4:17) Teu miˇ neh aˬ yawꞈ maꞈ mˬ kʼoeˇ taˆ ya gʼoꞈ dehꞈ leˇ˗eu gʼaˇ duˬ ya shiˇ˗eu meh.

Teu miˇ neh Pawˇluˆ˗euˬ dawˬ˗ahˇ tsaˬ˗eu jeˬ˗ehˇ ya ehˇ naˇ, “Toˆ˗ehˇ naˇ, shiˇ˗eu gʼaˇ duˬ iˇ cuꞈ shawˇ˗eu deuˬ tawˇ neh, aˬ jeˬ gaˇ dahˇ tsoeˬ˗eu nga? Shiˇ˗euˬ tsawˇ haˬ maˬ ya gʼoꞈ dehꞈ laˇ naˇ, aˬ yawꞈ maꞈ shiˇ˗eu gʼaˇ duˬ aˬ jeˬ miˇ neh iˇ cuꞈ paˇ shawˇ˗eu?” lehˇ meh.