Tiˬ nah Piˇliˇpaiˬ miˇ kʼahˬ Baˇgeˬ˗oˬ meuˬ jeˬ gaꞈ jeˬ ka mˇ˗eu tsahˬ˗ahˇ aˬ buˇ zaˬ guˬ nyiˬ gʼaˬ cah luꞈ ngeh, aˬ yawꞈ nyaꞈ tsawˇ haˬ uiˬ gaˇ tsaꞈ gaˬ˗eu laˆ lawˬ hawˇ˗eu, teu˗euˬ gaˇ dzeˇ zaˬ miˬ aˬ buˇ tiˬ gʼaˬ yawꞈ luꞈ gaˇ ya mawˇ˗euˬ meh. Ehˇ kʼawꞈ aˬ yawꞈ nyaꞈ tiˬ jeˬ˗iˬ myaˆ haw maˬ cawˬ ni iˇ gʼeh˗euˬ meh. Ehˇ kʼawꞈ aˬ yawꞈ nyaꞈ noeˬ taˬ nya˗eu tiˬ jeˬ naˇ, mehˇ nmˇ Heˇleˬ neh uiˇ cawˬ nehˬ˗euˬ jeˬ heu pyeuꞈ meh.

Kʼoeˇ gaˇ neh naˇ aˬ yawꞈ nyaꞈ lawˬ liˬ˗ahˇ dziˬ˗awˇ gʼoꞈ iˇ˗euˬ meh. Aˬ yawꞈ nyaꞈ lawˬ liˬ˗ahˇ dziˬ luꞈ ngeh jw.org lehˇ gʼawˬ loe ni boꞈ taˬ˗euˬ Bawˬdzaˬnymˇ˗ahˇ ya mawˇ˗awˇ, iˇ ka˗awˇ heu gaˇ mehˬ bawˬ aˬ geu ngeh nah jaˆ nga lehˇ haw iˇ˗euˬ meh. Teu ngeh aˬ yawꞈ nyaꞈ heu gaˇ gʼawˬ mya muˇ bawˬ dzaˬ luꞈ˗eu lehˇ ya siˬ˗euˬ meh.

Aˇ nah naˇ aˬ buˇ zaˬ guˬ heu nyiˬ gʼaˬ Bawˬdzaˬnymˇ˗ahˇ iˇ ngeh, aˬ yawꞈ nyaꞈ mehˇ nmˇ Heˇleˬ˗ahˇ ya mawˇ˗euˬ meh. Aꞈ yawꞈ nyaꞈ Heˇleˬ˗ahˇ mawˇ˗euˬ nehˬ˗ehˇ heu gʼaˬ naˇ aˬ yawꞈ nyaꞈ˗ahˇ uiˇ cawˬ laˇ˗eu kʼoeˇ gʼaˬ ngaˇ lehˇ haw siˬ˗euˬ meh. Teu ngeh Heˇleˬ teu nyiˬ gʼaˬ ngaˇ jawˇ gaˇ cah laꞈ luꞈ gaˇ ya mawˇ ngeh, ngaˇ aˬ jeˬ paˇ mˇ bahˬ˗aˬ leˇ heu lehˇ tsawˬ guˆ˗iˇ nya lehˇ ehˇ˗eu meh. Kʼoeˇ naˇ, aˬ buˇ zaˬ guˬ heu nyiˬ gʼaˬ gaˇ kawˆ deuˬ Heˇleˬ˗ahˇ dzawˇ nehˬ˗euˬ meh.

Heu nyiˬ gʼaˬ naˇ mehˬ bawˬ hawˇ˗eu mehˇ nmˇ deuˬ˗ahˇ ya leˇ dui dui˗awˇ, mehˇ nmˇ deuˬ nehˬ˗ehˇ jiˇ tsaˬ leˇ dzoe leˇ˗eu meh. Aˬ yawꞈ nyaꞈ mehˇ nmˇ deuˬ Bawˬdzaˬnymˇ˗ahˇ laˆ luiˆ laˆ buˇ gaˇ ya mawˇ ngeh, aˬ yawꞈ nyaꞈ jiˇ mˇ caw le˗euˬ meh. Nymˬ˗mˇ tiˬ gʼaˬ naˇ Piˬliˬpaiꞈ˗ahˇ maˬ paˇ jawˇ meh. Ehˇ kʼawꞈ dzeˇ luꞈ˗eu gʼaˬ naˇ, nymˬ˗mˇ mehˬ bawˬ˗ahˇ aˬ myah luꞈ oe˗awˇ, Jaˇliˬ dzaw laˇ shaw˗euˬ meh. Heu loꞈ˗ehˇ pyeuꞈ laˇ˗euˬ heu dawˬ tawˆ luꞈ naˇ, teu poˆ uiˇ cawˬ nehˬ˗euˬ baˬ da neh meh.