Nymˬ˗mˇ iˬ nah˗euˬ Saˇ kiˇ tiˬ deuˬ na nymˇ jiˇ laꞈ kʼoeˇ˗euˬ deuˬ hawˇ˗eu mehˇ nmˇ deuˬ nehˬ˗ehˇ ngehˬ cawˬ˗eu gʼaˇ duˬ, saˇ ka˗ahˇ miˇ˗eu caˆ keu ka deuˬ˗ahˇ zmˬ˗eu meh. Noeˬ dahˇ doe laˇ˗euˬ mehˇ nmˇ deuˬ naˇ Jaˇliꞈ laꞈ kʼoeˇ˗euˬ “Nui ma˗ahˇ noeˬ˗eu tsawˇ haˬ˗aˬ, guˆ˗eu gaˆ˗eu jeˬ keuˆ le gaˇ haw mawˇ˗awˇ, yahˇ dzeuˇ nya tehꞈ˗a. Ehˇ kʼawꞈ, nui ma˗ahˇ maˬ noeˬ˗eu tsawˇ haˬ˗aˬ, nyiˬ paˆ˗ehˇ iˇ gʼeh˗awˇ, gʼawˬ shaˇ shaˬ˗ehˇ gʼeh tehꞈ˗a” lehˇ ehˇ˗eu nui noeˬ nui duˇ˗ahˇ aˬ myah luꞈ noeˬ mawˇ˗eu meh.—Dawˬdaˬ 27:12.

Aˬ dui Yeˬhawˇbaˬ aˬ dui˗ahˇ haw teˬ haw piˇ nehˬ mawꞈ˗eu lehˇ siˬ nya˗eu miˇ neh, aˬ dui laˆ pyaˆ˗eu tsawˇ haˬ deuˬ nehˬ˗ehˇ maˬ ehˇ, bi teh doˆ taˬ˗euˬ deuˬ nehˬ˗ehˇ maˬ ehˇ, aˬ yawꞈ maꞈ loꞈ˗ehˇ mehˬ bahˬ˗euˬ dawˬ˗ahˇ jah ni jahˇ˗eu deuˬ nehˬ˗ehˇ maˬ ehˇ, cawˬ maˬ cawˬ taꞈ. (Loˇmaˆ 16:17; 1 Gawˇliˬtu 5:11; 2 Yoˇhaˬ 10, 11) Aˇ muˇ laꞈ kʼoeˇ Jaˇliꞈ zahˇ˗ahˇ yaw kʼaˆ˗ehˇ maˬ mˇ caw˗eu mehˇ nmˇ tiˬ gʼaˬ na jiˇ jawˇ˗eu meh. (2 Tiˆmoˇseˬ 2:20, 21) Teu miˇ neh aˬ dui cawˬ tseˇ ngeh yaw kʼaˆ˗ehˇ saˇ tiˇ ya taˬ˗eu meh. Ehˇ kʼawꞈ ehˆ lawˬ muˇ neh sahˬ boꞈ sha ngeh, muiˬ˗eu cawˬ poˆ˗eu lehˇ ehˇ˗eu heu naˇ yaw awˬ maˬ ngeuˇ˗a.

Aˇ muˇ muˇ taˬ˗euˬ guˬ˗lmˇ laꞈ kʼoeˇ˗euˬ gʼawˬ mya gʼaˬ sahˬ boꞈ shaˬ naˇ ngehˬ˗ehˇ dzehˬ aˬ dui saˇ tiˇ yaw kʼaˆ˗ehˇ ya taˬ˗eu meh. Mehˇ nmˇ tiˬ deuˬ na˗aˬ, teu loꞈ˗ehˇ muˇ taˬ˗euˬ guˬ˗lmˇ laꞈ kʼoeˇ ahˇ leˇ˗awˇ yawˬ ha˗ahˇ coeˬ˗eu jeˬ˗ahˇ ya tahˬ puˬ˗eu meh. Aˬ dui aˇ yaˇ aˇ heˇ gʼaˬ˗ahˇ neh muˇ taˬ˗euˬ guˬ˗lmˇ laꞈ kʼoeˇ ahˇ leˇ naˇ ngehˬ˗ehˇ dzehˬ, aˬ dui aˬ yawꞈ maꞈ yawˬ gʼaˬ na luꞈ˗ahˇ maˬ siˬ nya jiˇ nya˗eu uˬ taꞈ, aˬ yawꞈ maꞈ˗euˬ nui jah gʼaˬ kʼaˆ ngaˇ laˬ lehˇ jiˇ maˬ siˬ nya˗a. Ja ceuˬ 26:4-ahˇ “Gaˇ dahˇ maˬ tsoeˬ˗eu tsawˇ haˬ˗ahˇ, cawˬ maˬ cawˬ taꞈ ni ngaˇ dehꞈ˗awˇ, mehˇ shuiˇ shuiˇ˗eu tsawˇ haˬ nehˬ˗ehˇ, mehˬ bawˬ maˬ mˇ ni dehꞈ˗eu ma” lehˇ ehˇ taˬ˗euˬ meh. Aˬ dui Jaˇliꞈ heu deuˆ˗ahˇ neh yawˬ ha nehˬ˗ehˇ siˬ nya˗eu deuˬ nehˬ˗ehˇ tehꞈ˗ehˇ sahˬ boꞈ ya sha nga lehˇ ya siˬ˗euˬ ma.

Aˇ muˇ muˇ taˬ˗euˬ guˬ˗lmˇ laꞈ kʼoeˇ aˇ myaˆ gʼaˬ tehꞈ˗ehˇ jawˇ kʼawꞈ, aˬ dui ngehˬ˗eu aˇ yamˬ hawˇ˗eu aˬ dui ngehˬ˗eu gaˇ kawˆ nehˬ˗ehˇ taꞈ leˇ˗awˇ saˇ tiˇ yaw kʼaˆ˗ehˇ ya taˬ˗eu meh. Aˬ dui aˬ cawˬ neh kʼaˇ boꞈ kʼaˇ sha nehˬ leꞈ˗euˬ yawˬ jeˬ na luꞈ˗ahˇ ya boꞈ kʼoꞈ nehˬ nga lehˇ maˬ ya noeˬ˗a. Pawˇluˆ Tiˆmoˇseˬ˗ahˇ “aˬ cawˬ gaˇ kawˆ maˬ ja paˬ˗ehˇ gʼeh˗eu jeˬ˗ahˇ keuˆ ni ja”˗eu deuˬ nehˬ˗ehˇ taꞈ leˇ˗awˇ saˇ tiˇ biꞈ taˬ˗euˬ meh. (1 Tiˆmoˇseˬ 5:13) Nymˬ˗mˇ iˬ nah jiˇ ehˆ teu deuˬ zmˬ˗eu baˬ da neh teu loꞈ˗ehˇ pyeuꞈ laˇ nya˗eu meh.

Noeˬ dahˇ doe laˇ˗euˬ mehˇ nmˇ deuˬ naˇ, mehˇ nmˇ deuˬ˗euˬ maˬ muiˬ˗eu gaˇ kawˆ˗ahˇ maˬ ja˗eu uˬ taꞈ, mehˬ nmˇ deuˬ˗euˬ zaꞈ taˬ˗euˬ gaˇ kawˆ˗ahˇ jiˇ maˬ ja˗a. Kʼoeˇ naˇ, mehˇ nmˇ deuˬ˗euˬ maˬ muiˬ˗eu gaˇ kawˆ ja gaˇ jiˇ maˬ naˇ haˬ˗a. (Ja ceuˬ 15:3; Dawˬdaˬ 20:19) Kʼoeˇ uˬ taꞈ maˬ ngeuˇ gaˇ keuˆ ni ja˗eu gaˇ kawˆ˗ahˇ maˬ ehˇ, maˬ duˬ maˬ ciˇ˗eu gaˇ kawˆ˗ahˇ maˬ ehˇ yahˇ˗eu meh. (Eˇpeˇsu 4:25) Aˬ dui˗euˬ gʼoeˇsaiˇ jw.org hawˇ˗eu JW tiˬbiˬ laꞈ kʼoeˇ aˬ dui nui ma taˬ nya˗eu doˆ saˬ saˬ laˇ˗euˬ dawˬ gaˬ kʼawˬ˗eu jeˬ hawˇ˗eu Jaˇliꞈ˗ahˇ dawˬ pehˬ taˬ˗eu gaˇ kawˆ deuˬ ahˇ gahˬ˗eu meh.

Mehˇ nmˇ tiˬ gʼaˬ na sahˬ boꞈ sha˗eu ehˆ teu˗ahˇ zmˬ˗awˇ, myawˬ ka ahˬ˗awˇ jeˬ gaꞈ jeˬ ka mˇ˗eu uˬ taꞈ, aˬ cawˬ˗ahˇ gaˇ jiˇ poˆ nehˬ˗eu meh. Heu naˇ jeˬ gaꞈ jeˬ ka mˇ˗eu gaˇ kawˆ nehˬ˗ehˇ taꞈ neh maˬ ngeuˇ nmˇ˗aˬ, Yeˬhawˇbaˬ˗ahˇ uˬ duˬ tahˬ˗eu jeˬ nehˬ˗ehˇ jeˬ maˬ taꞈ˗a. ‘Pyuˇ shuiˇ myawˬ gahˬ˗ahˇ mehˇ juiˇ maˬ juiˇ’˗eu mehˇ nmˇ deuˬ naˇ, ehˆ heu˗ahˇ zmˬ˗awˇ yawˬ ha˗euˬ gʼaˇ duˬ muiˬ ni mehˇ nmˇ deuˬ˗ahˇ jeˬ gaꞈ jeˬ ka maˬ mˇ˗a.—Heˬbyehˇ 13:5.

Aˬ dui shaˬ luꞈ zahˬ luꞈ˗eu mehˇ nmˇ deuˬ hawˇ˗eu uˬ jeˬ jaˬ lehˇ˗euˬ shaˬ zahˬ˗ahˇ ya puˬ luꞈ˗eu mehˇ nmˇ deuˬ˗ahˇ caw ba˗eu pyuˇ damˬ oˆ˗eu gʼaˇ duˬ, sahˬ boꞈ sha˗eu ehˆ teu˗ahˇ zmˬ˗awˇ aˇ muˇ muˇ doˆ laꞈ paˬ˗ehˇ gʼeh ngaˇ laˬ? (Yaˬkoˆ 2:15, 16) Aˬ dui mehˇ nmˇ deuˬ˗ahˇ gaˬ˗awˇ, kʼahˬ lahˇ˗eu miˇ neh caw ba nehˬ mawꞈ˗eu teu naˇ yaw muiˬ meh. Ehˇ kʼawꞈ, teu loꞈ˗ehˇ jahˇ˗eu teu naˇ beˬdeˬlaˇ hawˇ˗eu aˇ muˇ˗euˬ gaˇ˗ahˇ laˆ suˬ saˬ˗eu meh. (1 Tiˆmoˇseˬ 5:3, 4, 9, 10, 16) Aˬ dui toˆ˗ehˇ jahˇ naˇ, mehˇ nmˇ deuˬ˗ahˇ aˬ dui mehˇ nmˇ deuˬ˗ahˇ ngehˬ gʼeh˗eu huiˬ˗eu gaˇ za taˬ ngaˬ lehˇ gʼoˆ shaw bahˬ leˇ nya˗eu meh.

Aˬ dui Miˬyehˇ ciˬ huiˬ ciˬ mahˇ˗eu jeˬ˗ahˇ za ni mˇ mawꞈ˗eu ma. (1 Gawˇliˬtu 10:31) Teu miˇ neh aˬ dui sahˬ boꞈ sha˗eu ehˆ hawˇ˗eu saˇ ka˗ahˇ miˇ˗eu caˆ keu ka nui deuˬ˗ahˇ zmˬ ngeh saˇ tiˇ yaw kʼaˆ˗ehˇ ya taˬ˗eu meh.